ប្រធានាធិបតីអ៊ុយក្រែនលោក Volodymyr Zelenskyy បានស្នើផ្តល់និមិត្តសញ្ញាសន្តិភាពដល់រដ្ឋាភិបាលក្រុងវ៉ាស៊ីនតោនកាលពីថ្ងៃអង្គារម្សិលមិញដោយនិយាយថាប្រ ទេសរបស់លោកបានប្រុងប្រៀបដើម្បីចរចាបញ្ចប់សង្គ្រាមរយៈពេល៣ឆ្នាំរបស់រុស្ស៊ីលើអ៊ុយក្រែន«ឱ្យបានឆាប់ទៅតាមលទ្ធភាពដែលអាចធ្វើបាន»ហើយនឹង«ធ្វើការនៅក្រោមការដឹកនាំដ៏ខ្លាំងរបស់លោក Donald Trump» ប្រធានាធិបតីសហរដ្ឋអាមេរិក ដើម្បីធ្វើឱ្យសម្រេចកិច្ចព្រមព្រៀងសន្តិភាពមួយ។
លោក Zelenskyy បាននិយាយថាការប៉ះទង្គិចយ៉ាងជូរចត់ជាមួយលោក Trump នៅឯសេតវិមានកាលពីថ្ងៃសុក្រសប្តាហ៍មុនជា«ការគួរឱ្យសោកស្តាយ»ហើយថាលោកនៅតែប្រុងប្រៀបខ្លួនដើម្បីចុះហត្ថលេខាលើកិច្ចព្រមព្រៀងមួយដែលនឹងផ្តល់ឱ្យសហរដ្ឋអាមេរិកនូវសិទ្ធិដ៏សំខាន់ យូរអង្វែងដល់រ៉ែសំខាន់ៗរបស់អ៊ុយក្រែនដែលជាតម្រូវការសម្រាប់ការផលិតផលិតផលបច្ចេកវិទ្យារបស់អាមេរិក។
នៅក្នុងការចុះផ្សាយលើបណ្តាញសង្គម X មេដឹកនាំអ៊ុយក្រែនបាននិយាយនៅក្នុងសេចក្តីថ្លែងការណ៍ថាការពិភាក្សារបស់លោកជាមួយលោកប្រធានាធិបតី Trump និងអនុប្រធានាធិបតី JD Vance «មិនបានប្រព្រឹត្តទៅតាមអ្វីដែលត្រូវធ្វើ»។ វាជាពេលវេលាដើម្បីធ្វើឱ្យត្រឹមត្រូវ។ យើងចង់បានកិច្ចសហប្រតិបត្តិការនិងការទាក់ទងប្រកបដោយការស្ថាបនានាពេលអនាគត។
លោកTrumpបានបញ្ចាឱ្យលោកZelenskyyចាកចេញពីសេតវិមានហើយកិច្ចព្រម ព្រៀងរ៉ែនោះមិនបានចុះហត្ថលេខាទេ។
លោក Trump និងលោក Vance បានអង្គុយជិតគ្នានៅក្នុងការិយាល័យរាងពងក្រពើហើយបានស្តីបន្ទោសលោក Zelenskyy ថាជាមនុស្សមិនដឹងគុណចំពោះគ្រាប់រំសេវដែលមានតម្លៃជាង១រយពាន់លានដុល្លារដែលសហរដ្ឋអាមេរិកបានបញ្ជូនទៅឱ្យកងកម្លាំងអ៊ុយក្រែនដើម្បីទប់ទល់ការឈ្លានពានរបស់រដ្ឋាភិបាលក្រុងមូស្គូនៅឆ្នាំ២០២២ ទោះបីមេដឹកនាំអ៊ុយក្រែនរូបនេះបានថ្លែងអំណរគុណជាច្រើនលើកដល់សហរដ្ឋអាមេរិកក៏ដោយ៕
