លោក Yoshihide Suga ត្រូវបានជ្រើសរើសជាប្រធានថ្មីនៃគណបក្សប្រជាធិបតេយ្យសេរីនិយម ដែលជាគណបក្សកាន់អំណាចរបស់ប្រទេសជប៉ុន។ ការជ្រើសរើសនេះស្ទើរតែអាចផ្តល់ការធានានៅក្នុងការបោះឆ្នោតសភានៅពេលខាងមុខថា លោកអាចក្លាយជានាយករដ្ឋមន្ត្រីថ្មី។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន AP។
លោក Suga ដែលជាប្រធានគណៈរដ្ឋមន្ត្រីក្នុងរដ្ឋាភិបាលជប៉ុនបច្ចុប្បន្ន បានទទួលសំឡេងឆ្នោតគាំទ្រចំនួន ៣៧៧ សំឡេង នៅក្នុងការបោះឆ្នោតរបស់គណបក្សប្រជាធិបតេយ្យសេរីនិយម ដើម្បីជ្រើសរើសអ្នកស្នងតំណែងលោកនាយករដ្ឋមន្រ្តី Shinzo Abe ដែលបានប្រកាសលាលែងពីតំណែងកាលពីខែមុនដោយសារបញ្ហាសុខភាព។
គូប្រជែង ២ នាក់ទៀត ទទួលបានសន្លឹកឆ្នោតគាំទ្រសរុបទាំង ២ នាក់ ចំនួន ១៥៧ សំឡេង។
ជ័យជម្នះដែលគេរំពឹងទុកជាមុនរបស់លោក Suga នេះ ស្ទើរតែអាចធានាបាននៅក្នុងការបោះឆ្នោតរបស់សភានៅថ្ងៃពុធខាងមុខថា លោកនឹងត្រូវបានគេជ្រើសរើសជានាយករដ្ឋមន្ត្រីថ្មីរបស់ប្រទេសជប៉ុន ដោយសារតែគណបក្សរបស់លោកមានសំឡេងភាគច្រើននៅក្នុងសភា៕
