ខណៈពេលដែលការផ្តោតអារម្មណ៍ភាគច្រើននៅក្នុងកិច្ចប្រជុំកំពូលរបស់អង្គការអូតង់ក្នុងទីក្រុងវ៉ាស៊ីនតោន មានលើការផ្តល់ការគាំទ្របន្ថែមសម្រាប់អ៊ុយក្រែន មន្ត្រីលោកខាងលិចមួយចំនួនមានចេតនាដូចគ្នាក្នុងការប្រឈមមុខនឹងបញ្ហាប្រឈមមួយទៀតដែលកើតឡើងដោយសារការឈ្លានពានរបស់រុស្ស៊ី នោះគឺការរត់ប្រណាំងសព្វាវុធដ៏តឹងរ៉ឹងនិងផលប៉ះពាល់ជាសកល។
ក្រុមមន្ត្រីអះអាងថា វាមិនគ្រប់គ្រាន់ទៀតទេក្នុងការព្យាយាមធានាឱ្យអ៊ុយក្រែនមានអាវុធ និងប្រព័ន្ធការពារដែលខ្លួនត្រូវការ ដើម្បីទប់ទល់បាននឹងការវាយប្រហារដោយឥតឈប់ឈររបស់រុស្ស៊ី។ ពួកគេនិយាយថាអង្គការអូតង់ត្រូវតែរៀបចំក្នុងពេលព្រមៗគ្នាក្នុងការចំណាយលើសល្បឿន ដើរឲ្យបានមុន និងផលិតឲ្យបានលើសក្រុមសម្ព័ន្ធភាពដែលកំពុងជួយយោធារុស្ស៊ីឱ្យបន្តដំណើរទៅមុខទៀត។
ក្រុមមន្ត្រីបានចោទប្រកាន់ចិនម្តងហើយម្តងទៀតថាបានដើរតួនាទីយ៉ាងសំខាន់ក្នុងការទ្រទ្រង់ យោធារបស់រុស្ស៊ីដោយការបញ្ជូនវត្ថុធាតុដើមទៅឲ្យទីក្រុងមូស្គូ និងអ្វីដែលហៅថាជាសមាសធាតុដែលអាចប្រើប្រាស់បានពីរយ៉ាងដែលរុស្ស៊ីត្រូវការសម្រាប់ផលិតអាវុធទំនើបៗ និងប្រព័ន្ធសព្វាវុធ។
កាលពីខែមេសា និងឧសភា សហរដ្ឋអាមេរិក និងអង់គ្លេស បានដាក់ទណ្ឌកម្មថ្មីប្រឆាំងនឹងក្រុមហ៊ុន និងមន្ត្រីអ៊ីរ៉ង់ ដែលពាក់ព័ន្ធនឹងការផលិតយន្តហោះគ្មានមនុស្សបើកសម្រាប់យោធារុស្ស៊ី។
មន្ត្រីអង្គការអូតង់ដែលបាននិយាយជាមួយ VOA បាននិយាយថា ការគាំទ្រពីប្រទេសចិន អ៊ីរ៉ង់ និងកូរ៉េខាងជើងបានផ្លាស់ប្តូរយ៉ាងខ្លាំងនូវការប្រយុទ្ធរបស់រុស្ស៊ីនៅលើសមរភូមិ ដោយបង្ហាញពីការវាយតម្លៃរបស់ក្រុមស៊ើបការណ៍សម្ងាត់ថាយោធារបស់រុស្ស៊ី «នឹងត្រូវការពេលវេលាជាច្រើនឆ្នាំ»ដើម្បីស្តារសម្ភារៈយោធាដែលលែងប្រើការកើត៕
