ប្រមុខរដ្ឋដែលជាសមាជិករបស់អង្គការអូតង់បានជួបប្រជុំកាលពីថ្ងៃពុធនៅក្នុងរដ្ឋធានីវ៉ាស៊ីនតោន នៅក្នុងសម័យប្រជុំការងាររបស់សន្និសីទកំពូល នៅពេលដែលពួកគេស្វះ ស្វែងជំរុញការគាំទ្ររបស់សម្ព័ន្ធមិត្តដល់ប្រទេសអ៊ុយក្រែន ហើយនឹងធ្វើឱ្យប្រសើរឡើងនូវការខំប្រឹងប្រែងនិងការទប់ស្កាត់ជាមុនរបស់ខ្លួនផ្ទាល់។
ការចរចាទាំងនោះបានបន្តធ្វើឡើងអស់រាប់សិបខែក្នុងកម្រិតទាបជាង រួមទាំងជំនួបរបស់រដ្ឋមន្ត្រីការបរទេសរបស់អង្គការអូតង់នៅដើមឆ្នាំនេះ ក៏ប៉ុន្តែ នៅពេលឥឡូវនេះ ការណ៍នេះអាស្រ័យលើពួកមេដឹកនាំដើម្បីធានាឲ្យសម្រេចបានកិច្ចព្រមព្រៀងចុងក្រោយបង្អស់របស់ខ្លួន។
កម្មវិធីកាលពីថ្ងៃពុធបញ្ចប់ទៅដោយមានសកម្មភាពចងមិត្តនឹងគ្នា ដោយប្រធានាធិបតីសហរដ្ឋអាមេរិកលោក Joe Biden ធ្វើជាម្ចាស់ផ្ទះរៀបចំទទួលសម្ព័ន្ធមិត្តអូតង់ដោយមានការទទួលទានអាហារពេលល្ងាចនៅឯសេតវិមាន។
ដោយអង្គការអូតង់កំពុងប្រឈមអ្វីដែលអាចជាការសាកល្បងដ៏ធំបំផុតនៅក្នុងប្រវត្តិសាស្ត្ររបស់ខ្លួនរយៈពេល ៧៥ ឆ្នាំ លោក Biden កាលពីថ្ងៃអង្គារ បានបញ្ជាក់យ៉ាងច្បាស់អំពីសន្តិភាពតាមរយៈកម្លាំង។
លោកប្រធានាធិបតី Biden បានថ្លែងនៅឯការចាប់ផ្តើមនៃសន្និសីទកំពូលរយៈពេល ៣ ថ្ងៃថា «វាជាការល្អដែលយើងខ្លាំងជាងពេលណាៗទាំងអស់។ ពីព្រោះតែ ពេលនេះនៅក្នុងប្រវត្តិសាស្ត្រយើងធ្វើការអំពាវនាវឱ្យមានកម្លាំងរួមរបស់យើង»។
កាលពីថ្ងៃពុធម្សិលមិញ នាយករដ្ឋមន្ត្រីប្រទេសហូឡង់លោក Dick Schoof នាយករដ្ឋមន្ត្រីដាណឺម៉ាក លោក Mette Frederiksen និងលោកប្រធានាធិបតី Biden បានប្រកាសថា រដ្ឋាភិបាលហូឡង់កំពុងស្ថិតក្នុងដំណើរការផ្តល់យន្តហោះធុន F-16 ផលិតនៅសហរដ្ឋអាមេរិកដល់ប្រទេសអ៊ុយក្រែន ដោយមានការគាំទ្ររបស់សហរដ្ឋអាមេរិក។
មេដឹកនាំទាំង ៣ បានបញ្ជាក់នៅក្នុងសេចក្តីថ្លែងការណ៍ដែលបានចេញផ្សាយដោយសេតវិមានថាដំណើរការនៃការផ្ទេរយន្តហោះធុន F-16 ទៅឱ្យអ៊ុយក្រែនឥឡូវនេះកំពុងធ្វើឡើង ហើយថា កងទ័ពរបស់រដ្ឋាភិបាលក្រុងកៀវនឹងហោះហើរយន្តហោះទាំងនោះនៅរដូវក្តៅនេះ ក៏ប៉ុន្តែ មិនបានផ្តល់សេចក្តីលម្អិតបន្ថែមទៀត ដោយហេតុផលសន្តិសុខ។ ពួកគេបាននិយាយថាប្រទេសបែលហ្ស៊ិកនិងន័រវែសក៏បានសន្យាបញ្ជូនយន្តហោះបន្ថែមទៀតដល់ប្រទេសអ៊ុយក្រែន៕
