លោក Nguyen Xuan Phuc ដែលស្ថិតនៅពីក្រោយវិធានការជោគជ័យនៃការដោះស្រាយវិបត្តិជំងឺកូវីដ១៩ ក្នុងប្រទេសវៀតណាម បានស្បថចូលកាន់តំណែងជាផ្លូវការជាប្រធានាធិបតីវៀតណាមនៅក្នុងរដ្ឋធានីហាណូយនៅថ្ងៃចន្ទនេះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
លោក Phuc អាយុ ៦៦ ឆ្នាំ ធ្លាប់ធ្វើជានាយករដ្ឋមន្ត្រីវៀតណាមក្នុងរយៈពេល ៥ ឆ្នាំចុងក្រោយនេះ ដែលជារយៈពេលមួយដែលវៀតណាមមានសេដ្ឋកិច្ចរីកចម្រើន ហើយវិធានការដោះស្រាយវិបត្តិជំងឺកូវីដ១៩ របស់រដ្ឋាភិបាលរបស់លោកបានទទួលការកោតសរសើរទាំងនៅក្នុងនិងក្រៅប្រទេស។
បន្ទាប់ពីការបោះឆ្នោតសម្ងាត់នៅថ្ងៃចន្ទនេះ លោក Phuc បានទទួលសំឡេងគាំទ្រច្រើនបំផុតក្នុងចំណោមសមាជិករដ្ឋសភាជាតិជិត ៥០០ នាក់។
ប្រទេសវៀតណាមដឹកនាំដោយគណបក្សកុម្មុយនីស្ត ដែលជាផ្លូវការមានអគ្គលេខាធិការបក្ស ប្រធានាធិបតី និងនាយករដ្ឋមន្ត្រី ហើយការសម្រេចសំខាន់ៗធ្វើឡើងដោយគណៈកម្មាធិការមជ្ឈិមបក្សដែលមានសមាជិកចំនួន ១៨ រូប។
លោក Phuc គឺជាបេក្ខជនតែម្នាក់គត់ដែលត្រូវបានស្នើតែងតាំងជាប្រធានាធិបតី ដោយសារតែលោក Nguyen Phu Trong ដែលជាអគ្គលេខាធិការបក្សកុម្មុយនីស្ត និងដែលបានកាន់តំណែងជាប្រធានាធិបតីវៀតណាមតាំងពីឆ្នាំ ២០១៨ មក បានលាលែងពីតំណែង។
រដ្ឋសភាជាតិវៀតណាមបានបញ្ជាក់ថា នេះគឺជា «លើកដំបូងបង្អស់ដែលនាយករដ្ឋមន្ត្រី ត្រូវបានស្នើតែងតាំងឲ្យកាន់តំណែងជាប្រធានាធិបតី»។
បន្ទាប់ពីបានស្បថចូលកាន់តំណែង លោក Phuc បានថ្លែងប្រាប់ប្រជាជាតិថា លោកមាន «សំណាងនិងកិត្តិយស» ដែលបានកាន់តំណែងនេះ៕
