រដ្ឋមន្រ្តីរតនាគារសហរដ្ឋអាមេរិកលោក Steven Mnuchin និយាយថា លោកសង្ឃឹមនឹងធ្វើឲ្យមានការជឿនលឿនជាដុំកំភួននៅក្នុងការចរចាពាណិជ្ជកម្មជាមួយចិន នៅពេលដែលប្រទេសដែលមានសេដ្ឋកិច្ចដ៏ធំបង្អស់២ របស់ពិភពលោក ព្យាយាមឈោងដល់សេចក្តីសម្រេចមួយដើម្បីបញ្ចប់សង្គ្រាមពាណិជ្ជកម្ម។
លោក Mnuchin និងលោក Robert Lighthizer តំណាងពាណិជ្ជកម្មអាមេរិក នឹងដឹកនាំគណៈប្រតិភូសហរដ្ឋអាមេរិកដើម្បីជួបជាមួយមន្រ្តីចិននៅសប្តាហ៍នៅក្នុងទីក្រុងប៉េកាំង។ នៅសប្តាហ៍ក្រោយ មន្រ្តីចិននឹងធ្វើដំណើរទៅកាន់រដ្ឋធានីវ៉ាស៊ីនតោនដើម្បីធ្វើការចរចាមួយឈុតទៀត។
រដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៉េកាំងបានធ្វើការចរចាជាច្រើនលើកនៅឆ្នាំនេះដើម្បីដោះស្រាយសង្គ្រាមពាណិជ្ជកម្ម ដែលបានចាប់ផ្តើមនៅឆ្នាំ២០១៨ នៅពេលដែលប្រធានាធិបតីសហរដ្ឋអាមេរិកលោក ដូណាល់ ត្រាំ បានដាក់ពន្ធគយលើទំនិញនាំចូលរបស់ចិន ដែលមានតម្លៃ២៥០ពាន់លានដុល្លារ។ លោកប្រធានាធិបតីត្រាំបានព្យាយាមជំរុញឲ្យរដ្ឋាភិបាលក្រុងប៉េកាំងធ្វើការកែប្រែការធ្វើពាណិជ្ចកម្មរបស់ខ្លួន។ ចិនបានធ្វើការសងសឹកដោយការបង្កើនពន្ធគយលើកទំនិញនាំចេញដែលមានតម្លៃ១១០ពាន់លានដុល្លាររបស់សហរដ្ឋអាមេរិក៕
