អង្គការសុខភាពពិភពលោក WHO បានព្រមានកាលពីថ្ងៃពុធថាការកាត់ផ្តាច់ថវិការបស់សហរដ្ឋអាមេរិក នឹងមាន«ផលប៉ះពាល់ដ៏ខ្ទេចខ្ទី»លើកម្មវិធីប្រយុទ្ធប្រឆាំងនឹងជំងឺរបេងហើយធ្វើឱ្យគ្រោះថ្នាក់ដល់ជីវិតមនុស្សរាប់លាននាក់។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
ទីភ្នាក់ងារសុខភាពរបស់អង្គការសហប្រជាជាតិនោះបានបញ្ជាក់ថាកិច្ចប្រឹងប្រែងសាកលលោកដើម្បីប្រយុទ្ធនឹងជំងឺរបេង ដែលជាជំងឺឆ្លងដ៏ប្រល័យបំផុតរបស់ពិភពលោកបានជួយសង្គ្រោះជីវិតមនុស្ស៧៩លាននាក់ក្នុងពេល២ទសវត្សរ៍កន្លងមក ហើយកំពុងបញ្ចៀសការស្លាប់មនុស្ស៣លាន៦សែន៥ម៉ឺននាក់កាលពីមួយឆ្នាំកន្លងទៅ។
អង្គការសុខភាពពិភពលោក WHO បានព្រមានថាក៏ប៉ុន្តែការកាត់ផ្តាច់ថវិកាភ្លាមៗដើម្បីប្រតិបត្តិដល់ការចំណាយជំនួយបរទេសសហរដ្ឋអាមេរិកភាគច្រើនចាប់តាំងពីប្រធានាធិបតីសហរដ្ឋអាមេរិកលោក Donald Trump បានវិលត្រឡប់ទៅកាន់អំណាចនៅក្នុងខែមករាមក«ឥឡូវនេះបានគំរាមកំហែងនិងប្រែក្រឡាស់វិញនូវសមិទ្ធិផលដែលទទួលបាននេះដោយកំពុងដាក់មនុស្សរាប់លាននាក់ ជាពិសេសអ្នកដែលងាយទទួលរងគ្រោះបំផុតឱ្យធ្លាក់ចូលក្នុងហានិភ័យខ្លាំងបំផុត»។
ការព្រមាននេះបានកើតមានឡើងនៅពេលដែលតុលាការកំពូលសហរដ្ឋអាមេរិកកាលពីពុធម្សិលមិញបានច្រានចោលការស្វះស្វែងរបស់លោកប្រធានាធិបតី Trump ដើម្បីបង្កកការចំណាយលើជំនួយបរទេសចំនួន២ពាន់លានដុល្លារ។
លោកប្រធានាធិបតី Trump បានចុះហត្ថលេខាលើបទបញ្ជាប្រធានាធិបតីនៅថ្ងៃទី១នៃការកាន់តំណែងរបស់លោកដែលបានទាមទារឱ្យបង្កករយៈពេល៩០ថ្ងៃលើជំនួយបរទេសទាំងអស់របស់សហរដ្ឋអាមេរិកដើម្បីផ្តល់ឱ្យរដ្ឋបាលរបស់លោកនូវពេលវេលាដើម្បីពិនិត្យមើលឡើងវិញនូវការចំណាយបរទេស។ ហើយសំខាន់ជាងគេ លោកប្រធានាធិបតីបានរំលាយទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិឬ USAID ដែលជាអង្គការសំខាន់សម្រាប់ចែកចាយជំនួយមនុស្សធម៌របស់សហរដ្ឋអាមេរិក។
អង្គការ WHO បាននិយាយថាទិន្នន័យដែលខ្លួនបានទទួលមកពីរដ្ឋាភិបាលសហរដ្ឋអាមេរិក កម្មវិធីជំងឺរបេងនិងប្រភពផ្សេងទៀតបានបង្ហាញថារដ្ឋាភិបាលក្រុងវ៉ាស៊ីនតោនបានផ្តល់ប្រហែលមួយភាគបីនៃជំនួយអន្តរជាតិទាំងអស់សម្រាប់កម្មវិធីរបេងដែលមានទឹកប្រាក់ប្រហែល២រយលានដុល្លារទៅ២៥០លានដុល្លារក្នុងមួយឆ្នាំៗ។
ទីភ្នាក់ងារសុខភាពអង្គការសហប្រជាជាតិបាននិយាយថាតំបន់អាហ្វ្រិកបានរងការប៉ះពាល់ខ្លាំងបំផុតដោយការកាត់ផ្តាច់ថវិកានេះ បន្ទាប់មកតំបន់អាស៊ីខាងត្បូងនិងខាងកើតនិងតំបន់ប៉ាស៊ីហ្វិកភាគខាងលិច៕
វេទិកាបញ្ចេញមតិ