សហរដ្ឋអាមេរិក កាលពីថ្ងៃអង្គារ បានច្រានចោលនូវការអះអាងរបស់រុស្ស៊ីដែលថា ឧស្ម័នគីមី Sarin ដែលបានសម្លាប់មនុស្សរាប់សិបនាក់នៅក្នុងប្រទេសស៊ីរីកាលពីសប្តាហ៍មុននោះ ត្រូវបានប្រើក្នុងការវាយប្រហារតាមអាកាសទៅលើឃ្លាំងផ្ទុកគ្រាប់រំសេវដែលកាន់កាប់ដោយពួកឧទ្ទាម ហើយថាវាមិនមែនចេញពីវាយប្រហារដោយចេតនាដោយពួកអ្នកប្រយុទ្ធស៊ីរីទៅលើជនស៊ីវិលទេ។
ពួកមន្រ្តីសន្តិសុខជាតិនៅសេតវិមានបានចោទប្រកាន់ប្រធានាធិបតីស៊ីរី Bashar al- Assad ដែលជាសម្ព័ន្ធមិត្តរដ្ឋាភិបាលក្រុងមូស្គូថាបានធ្វើយុទ្ធនាការដ៏ច្បាស់ក្រឡែតមួយដើម្បីឲ្យពិបាកយល់ពីលក្ខណៈនៃការវាយប្រហារនេះ។
ពួកគេនិយាយទៀតថា ការវាយប្រហារអាវុធគីមីនៅថ្ងៃទី៤ ខែមេសា បានទម្លាក់នៅចំពាក់កណ្តាលផ្លូវ គឺដូចដែលបានរូបភាពបានបង្ហាញ ហើយមិនមែនទម្លាក់មកលើអាគារទេ។
ពួកមន្រ្តីដែលនិយាយក្នុងលក្ខខណ្ឌមិនបញ្ចេញឈ្មោះបាននិយាយថា ស៊ីរីមិនបានប្រមូលអាវុធគីមីអស់ទេ ថ្វីបើមានកិច្ចព្រមព្រៀងឆ្នាំ២០១៣ ដើម្បីរុះរើឃ្លាំងអាវុធនោះក៏ដោយ។
មន្រ្តីម្នាក់របស់សេតវិមានបាននិយាយថា៖ «យើងដឹងថា របបស៊ីរីមានឧស្ម័ន Sarin។យើងមានទំនុកចិត្តថា ពួកឧទ្ទាមដែលវាយប្រហាររដ្ឋាភិបាល Assad មិនមានឧស្ម័ន Sarin ទេ»។
មន្រ្តីរូបនោះ បានហៅភ័ស្តតាងនោះថាជាឱកាសមួយសម្រាប់រុស្ស៊ីបញ្ចប់យុទ្ធនាការផ្តល់ព័ត៌មានមិនច្បាស់លាស់។ ក៏ប៉ុន្តែ ក្រោយមក លោក Sean Spicer អ្នកនាំពាក្យសេតវិមានបាននិយាយថា មិនមានការមូលមតិគ្នាក្នុងចំណោមមន្រ្តីស៊ើបការណ៍សម្ងាត់សហរដ្ឋអាមេរិកថា រុស្ស៊ីបានឃុបឃិតគ្នាជាមួយរដ្ឋាភិបាលស៊ីរីនៅក្នុងការវាយប្រហារនេះទេ៕
