អនុរដ្ឋមន្ត្រីការបរទេសអាមេរិកសម្តែងការបារម្ភអំពីសវនាការលោក កឹម សុខា និងវត្តមានចិននៅរាម
នៅថ្ងៃទី១១ ខែឧសភា គឺមួយថ្ងៃមុនកិច្ចប្រជុំកំពូលពិសេសអាមេរិក-អាស៊ាន អនុរដ្ឋមន្រ្តីការបរទេសសហរដ្ឋអាមេរិក លោកស្រី Wendy Sherman បានទទួលជួបជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន នៅរដ្ឋធានីវ៉ាស៊ីនតោន ដោយបានសម្តែងការគាំទ្ររបស់សហរដ្ឋអាមេរិកចំពោះកម្ពុជាជាប្រធានអាស៊ាន។ ប៉ុន្តែលោកស្រីក៏បានទទូចឱ្យកម្ពុជាជំរុញនូវការអនុវត្តពេញលេញនូវកិច្ចព្រមព្រៀងឯកច្ឆ័ន៥ចំណុចរបស់អាស៊ាន (ASEAN Five-Point Consensus) ចំពោះបញ្ហាមីយ៉ាន់ម៉ា និងបានសម្តែងការបារម្ភចំពោះសវនាការលោក កឹម សុខា និងវត្តមានរបស់ចិននៅមូលដ្ឋានទ័ពជើងទឹករាមរបស់កម្ពុជា។ នេះបើតាមសារដែលលោកស្រីបានបង្ហោះតាមបណ្តាញ Twitter។ លោកស្រីអនុរដ្ឋមន្ត្រីអាមេរិករូបនេះធ្លាប់បានសម្តែងក្តីបារម្ភប្រហាក់ប្រហែលគ្នានេះនៅក្នុងទស្សនកិច្ចនៅកម្ពុជាកាលពីខែមិថុនា ឆ្នាំ២០២១។
- ដោយ Zsombor Peter
ម៉ាឡេស៊ីស្នើឱ្យអាស៊ានបើកច្រកទាក់ទងជាមួយរដ្ឋាភិបាលស្រមោលមីយ៉ាន់ម៉ា ប៉ុន្តែរបបយោធាជំទាស់
នៅមុនកិច្ចប្រជុំពិសេសអាមេរិក-អាស៊ាននៅរដ្ឋធានីវ៉ាស៊ីនតោនក្នុងសប្តាហ៍នេះ ប្រទេសម៉ាឡេស៊ីបានស្នើឱ្យសមាគមអាស៊ានទាក់ទងក្រៅផ្លូវការជាមួយរដ្ឋាភិបាលស្រមោលនៃប្រទេសមីយ៉ាន់ម៉ាដែលគេហៅកាត់ថា NUG។ ប៉ុន្តែសំណើនេះត្រូវបានច្រានចោលភ្លាមៗដោយរបបយោធាដែលបានដណ្តើមអំណាចគ្រប់គ្រងប្រទេសមីយ៉ាន់ម៉ាកាលពីឆ្នាំមុន។ សំណើរបស់ម៉ាឡេស៊ីនេះ ទំនងនឹងត្រូវគេលើកឡើងនៅក្នុងកិច្ចប្រជុំកំពូលពិសេសក្នុងសប្តាហ៍នេះ ប៉ុន្តែសំណើនេះត្រូវប្រជែងជាមួយនឹងវិបត្តិនិងបញ្ហាផ្សេងៗរបស់អាស៊ាន ក៏ដូចជាកិច្ចប្រឹងប្រែងរបស់រដ្ឋាភិបាលក្រុងវ៉ាស៊ីនតោនកៀរគរការគាំទ្រពីអន្តរជាតិដល់ប្រទេសអ៊ុយក្រែនក្នុងសង្គ្រាមអ៊ុយក្រែនជាមួយនឹងរុស្ស៊ីផងដែរ។ អានអត្ថបទទាំងស្រុង
- ដោយ Reuters
ទីភ្នាក់ងារព័ត៌មាន Reuters បានរាយការណ៍កាលពីថ្ងៃពុធទី១១ ខែឧសភា ដោយដកស្រង់សម្តីមន្ត្រីរដ្ឋាភិបាលអាមេរិកមួយរូបថា លោកប្រធានាធិបតី Joe Biden នឹងមាន «ពេលវេលាឯកជន» ជាមួយមេដឹកនាំអាស៊ាននិមួយៗដាច់ដោយឡែកពីគ្នា ក្នុងអំឡុងកិច្ចប្រជុំកំពូលពិសេសអាមេរិក-អាស៊ាននៅថ្ងៃព្រហស្បតិ៍និងសុក្រសប្តាហ៍នេះ។ មន្ត្រីរូបនោះក៏បានបញ្ជាក់ថា អាមេរិកក៏កំពុងពិភាក្សាជាមួយអាស៊ានចំពោះលទ្ធភាពទុកឱ្យអាសនៈមីយ៉ាន់ម៉ានៅទំនេរនៅក្នុងកិច្ចប្រជុំកំពូលពិសេសរយៈពេល២ថ្ងៃនៅរដ្ឋធានីវ៉ាស៊ីនតោននេះ។
- ដោយ វីអូអេខ្មែរ
មេដឹកនាំអាស៊ានចូលជួបប្រធានរដ្ឋសភាសហរដ្ឋអាមេរិក
នៅវេលាម៉ោង ១១:៣០នាទីព្រឹកនៅរដ្ឋធានីវ៉ាស៊ីនតោន គេឃើញវត្តមានមេដឹកនាំអាស៊ានទាំង ៨ រូប រួមទាំងនាយករដ្ឋមន្ត្រីកម្ពុជាលោក ហ៊ុន សែន នៅវិមានសភាអាមេរិក ក្នុងឱកាសជំនួបពិភាក្សាការងារជាមួយលោកស្រី Nancy Pelosi ប្រធានរដ្ឋសភាអាមេរិក និងសមាជិករដ្ឋសភាអាមេរិកផ្សេងៗទៀត។ នេះជាជំនួបផ្លូវការដំបូងគេបង្អស់រវាងមេដឹកនាំអាស៊ានជាមួយមន្ត្រីរដ្ឋាភិបាលអាមេរិក នៅក្នុងកិច្ចប្រជុំកំពូលពិសេសអាមេរិក-អាស៊ាន ដែលមានរយៈពេល ២ ថ្ងៃ។