- ដោយ វីអូអេខ្មែរ
កិច្ចប្រជុំកំពូលអាមេរិក-អាស៊ានចាប់ផ្តើមនៅរដ្ឋធានីវ៉ាស៊ីនតោន
កិច្ចប្រជុំកំពូលពិសេសអាមេរិក-អាស៊ានរយៈពេល២ថ្ងៃចាប់ផ្តើមជាផ្លូវការនៅថ្ងៃព្រហស្បតិ៍នេះ នៅរដ្ឋធានីវ៉ាស៊ីនតោនសហរដ្ឋអាមេរិក។ នេះជាលើកទី១ហើយដែលមេដឹកនាំសហរដ្ឋអាមេរិកបានជួបប្រជុំជាមួយនឹងមេដឹកនាំអាស៊ាននៅរដ្ឋធានីវ៉ាស៊ីនតោនដោយមានការប្រជុំនៅវិមានសភា សេតវិមាននិងក្រសួងការបរទេស។ លោកនាយករដ្ឋមន្ត្រីហ៊ុនសែនគឺជាប្រធានប្តូរវេនរបស់អាស៊ានត្រូវធ្វើជាសហប្រធានកិច្ចប្រជុំនេះជាមួយនឹងប្រធានាធិបតីសហរដ្ឋអាមេរិក លោក Joe Biden (ចូ បៃដិន)។
ក្រុមផ្សាយរបស់វីអូអេ ដោយមាន លោក ម៉ែន គឹមសេង លោក សុខ ខេមរា លោក ប៉ូច រាសី និងលោក ចាប ចិត្រា បានចាប់ផ្តើមការផ្សាយពិសេសនេះផ្ទាល់ពីបរិវេណ សេតវិមាន ដែលជាវិមានប្រធានាធិបតីសហរដ្ឋអាមេរិក។
រដ្ឋមន្ត្រីការបរទេសអាស៊ានជួបប្រជុំគ្នានៅវ៉ាស៊ីនតោនមួយថ្ងៃមុនកិច្ចប្រជុំកំពូល
កាលពីថ្ងៃទី១១ ខែឧសភា ឆ្នាំ ២០២២ (ត្រូវនឹងថ្ងៃទី១២ ខែឧសភា ឆ្នាំ២០២២ ម៉ោងនៅកម្ពុជា) រដ្ឋមន្ត្រីការបរទេសកម្ពុជា លោក ប្រាក់ សុខុន និងរដ្ឋមន្ត្រីការបរទេសអាស៊ានដទៃទៀតបានចូលរួមក្នុងកម្មវិធីអាហារថ្ងៃត្រង់ការងាររបស់រដ្ឋមន្រ្ដីការបរទេសអាស៊ាន ដើម្បីត្រៀមរៀបចំកិច្ចប្រជុំកំពូលពិសេសអាមេរិក-អាស៊ាននៅថ្ងៃបន្ទាប់។ នេះបើតាមការផ្សាយរបស់ក្រសួងការបរទេសកម្ពុជា។
- ដោយ វីអូអេខ្មែរ
បាតុករខ្មែរអាមេរិកាំងតវ៉ាទាមទារការគោរពសិទ្ធិមនុស្សនៅកម្ពុជាអំឡុងទស្សនកិច្ចរបស់លោក ហ៊ុន សែន
បាតុករខ្មែរដែលរស់នៅសហរដ្ឋអាមេរិកជាច្រើនបានមកធ្វើបាតុកម្មតវ៉ាទាមទារសិទ្ធិមនុស្សនិងលទ្ធិប្រជាធិបតេយ្យនៅកម្ពុជា។ ការទាមទារនេះដោយសារស្ថានភាពនៃការគោរពសិទ្ធិមនុស្សធ្លាក់ចុះយ៉ាងខ្លាំងក្នុងរយៈពេលជាង៤ឆ្នាំមកនេះ។ លោក ម៉ែន គឹមសេង នៃវីអូអេបានទៅចុះយកព័ត៌មានផ្ទាល់នៅកន្លែងធ្វើបាតុកម្មក្នុងរដ្ឋធានីវ៉ាស៊ីនតោន។
កាលពីល្ងាចថ្ងៃព្រហស្បតិ៍ ប្រធានាធិបតីអាមេរិកលោក Joe Biden បានស្វាគមន៍មេដឹកនាំអាស៊ាននៅសេតវិមានក្នុងរដ្ឋធានីវ៉ាស៊ីនតោន ដោយបានថតរូបជុំគ្នា មុននឹងជួបពិភាក្សាគ្នាក្នុងអំឡុងអាហារពេលល្ងាច។
កម្រងរូបភាព៖ លោកប្រធានាធិបតី Biden ថតរូបជាមួយមេដឹកនាំអាស៊ាន មុនជំនួបពិភាក្សាគ្នា