នាយករដ្ឋមន្ត្រីកម្ពុជាចេញដំណើរមកសហរដ្ឋអាមេរិក
លោកនាយករដ្ឋមន្ត្រី ហ៊ុន សែន នៃប្រទេសកម្ពុជា ដែលប្រធានអាស៊ាននៅឆ្នាំនេះ ព្រមទាំងគណៈប្រតិភូកម្ពុជា បានធ្វើដំណើរចាកចេញពីរាជធានីភ្នំពេញនៅព្រឹកថ្ងៃអង្គារនេះ ទៅកាន់រដ្ឋធានីវ៉ាស៊ីនតោន សហរដ្ឋអាមេរិក ដើម្បីចូលរួមកិច្ចប្រជុំកំពូលពិសេសអាមេរិក-អាស៊ាន នៅថ្ងៃទី ១២-១៣ ខែឧសភា ឆ្នាំ២០២២។ នេះបើតាមការផ្សាយរបស់គេហទំព័រហ្វេសប៊ុករបស់លោកនាយកមន្ត្រី ហ៊ុន សែន។
- ដោយ AFP
ខណៈសង្គ្រាមអ៊ុយក្រែនកំពុងបន្តយ៉ាងក្តៅគគុក រដ្ឋបាលលោក Biden ក៏មិនភ្លេចផ្តោតការតាំងចិត្តទៅលើតំបន់អាស៊ី
បន្ទាប់ពីរយៈពេលជាច្រើនខែដោយផ្តោតលើការជួយគាំទ្រអ៊ុយក្រែននិងការដាក់ទណ្ឌកម្មលើប្រធានាធិបតីរុស្ស៊ីលោក Vladimir Putin នោះមក នៅពេលនេះ លោក Biden ហាក់ដូចជាកំពុងបង្វែរការផ្តោតរបស់លោកទៅកាន់តំបន់អាស៊ីវិញយ៉ាងហោចណាស់ក៏ក្នុងពេលជាបណ្តោះអាសន្នផងដែរដែលជាសញ្ញាមួយដែលថា សង្គ្រាមនៅក្នុងប្រទេសអ៊ុយក្រែនមិនបានបង្វែរទិសដៅនៃរដ្ឋបាលរបស់លោក Biden ចេញពីគោលបំណងអន្តរជាតិផ្សេងៗទៀតនោះឡើយ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ចាប់ពីថ្ងៃព្រហស្បតិ៍នេះទៅ លោក Biden នឹងជួបជាមួយមេដឹកនាំនៃប្រជាជាតិអាស៊ីអាគ្នេយ៍ឬអាស៊ាន នៅក្នុងកិច្ចប្រជុំកំពូលរយៈពេល២ថ្ងៃនៅក្នុងរដ្ឋធានីវ៉ាស៊ីនតោន សហរដ្ឋអាមេរិក ដែលជាសញ្ញាមួយនៃការចូលរួមរបស់សហរដ្ឋអាមេរិកនៅក្នុងតំបន់ដែលប្រទេសចិនកំពុងបង្កើនឥទ្ធិពលនោះ។
- ដោយ ស៊ុន ណារិន
លោក ហ៊ុន សែន ប្រធានអាស៊ាន ដឹកនាំគណៈប្រតិភូទៅបំពេញទស្សនកិច្ចនៅអាមេរិក
លោកនាយករដ្ឋមន្រ្តី ហ៊ុន សែន នៅព្រឹកថ្ងៃអង្គារនេះ បានដឹកនាំគណៈប្រតិភូទៅបំពេញទស្សនកិច្ចនៅទីក្រុងវ៉ាស៊ីនតោន រដ្ឋធានីនៃសហរដ្ឋអាមេរិក ក្នុងនាមជាប្រធានសមាគមអាស៊ាន ដែលមាន១០ប្រទេស។
នៅក្នុងដំណើរទស្សនកិច្ចនេះ លោក ហ៊ុន សែន នឹងធ្វើជាសហប្រធាននៃកិច្ចប្រជុំកំពូលពិសេសអាមេរិក-អាស៊ាន (US-ASEAN Special Summit) ដើម្បីរំឭកខួបអនុស្សាវរីយ៍លើកទី៤៥នៃទំនាក់ទំនងដៃគូសន្ទនាអាស៊ាន-អាមេរិក ដែលនឹងធ្វើឡើងនៅថ្ងៃទី១២ និងទី១៣ ខែឧសភា ឆ្នាំ២០២២។ នេះបើតាមសេចក្តីប្រកាសរបស់ក្រសួងការបរទេសកម្ពុជា ចេញផ្សាយនៅថ្ងៃអង្គារនេះ។
លោក ប្រាក់ សុខុន រដ្ឋមន្ត្រីការបរទេសកម្ពុជា ស្ថិតក្នុងចំណោមមន្ត្រីជាន់ខ្ពស់កម្ពុជាដែលនឹងចូលរួមក្នុងកិច្ចប្រជុំកំពូលពិសេសអាមេរិក-អាស៊ាននៅរដ្ឋធានីវ៉ាស៊ីនតោននៅសប្តាហ៍នេះ ជាមួយលោកនាយករដ្ឋមន្ត្រី ហ៊ុន សែន។ ក្រសួងការបរទេសកម្ពុជាបានបញ្ហាក់ថាលោកបានចេញដំណើរមកសហរដ្ឋអាមេរិក មុនលោក ហ៊ុន សែន គឺតាំងពីថ្ងៃទី៩ ខែឧសភា។