យោធាអ៊ុយក្រែនបាននិយាយនៅថ្ងៃព្រហស្បតិ៍នេះថា ខ្លួនបានបាញ់ទម្លាក់ដ្រូនចំនួន៤៦គ្រឿងនៃដ្រូនទាំងអស់ចំនួន៧០គ្រឿងដែលកងទ័ពរុស្ស៊ីបានប្រើប្រាស់នៅក្នុងការវាយប្រហារដៅលើតំបន់មួយចំនួននៅភាគកណ្តាលនិងខាងកើតប្រទេសអ៊ុយក្រែន។
កម្ទេចបាក់បែកមកពីដ្រូនដែលធ្លាក់នោះបានធ្វើឱ្យខូចខាតផ្ទះសម្បែងនៅក្នុងទីក្រុង Cherkasy ទីក្រុង Kharkiv និងទីក្រុង Sumy។ នេះបើតាមកងទ័ពអាកាសរបស់អ៊ុយក្រែន។
កងទ័ពការពារដែនអាកាសរបស់អ៊ុយក្រែនក៏បានបាញ់ទម្លាក់ដ្រូននៅក្នុងទីក្រុង Chernihiv ទីក្រុង Dnipropetrovsk ទីក្រុង Kherson ទីក្រុង Kyiv ទីក្រុង Mykolaiv ទីក្រុង Poltava និងទីក្រុងផ្សេងៗទៀតផងដែរ។
ការវាយប្រហារបានកើតមានឡើងក្នុងរយៈពេលមួយថ្ងៃក្រោយមកបន្ទាប់ពីកាំជ្រួចមីស៊ីលរបស់រុស្ស៊ីបានត្រូវចំទីក្រុង Zaporizhzhia ដែលបានសម្លាប់មនុស្សយ៉ាងតិចណាស់ចំនួន១៣នាក់និងធ្វើឱ្យមនុស្ស៣០នាក់ផ្សេងទៀតរងរបួស។
ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃពុធថា «គ្មានអ្វីដែលព្រៃផ្សៃជាងការទម្លាក់គ្រាប់បែកពីអាកាសមកលើទីក្រុងដែលបានដឹងថាជនស៊ីវិលនឹងទទួលរងគ្រោះនោះទេ»។
ក្រសួងការពារជាតិរុស្ស៊ីបានឱ្យដឹងនៅថ្ងៃព្រហស្បតិ៍នេះថា ខ្លួនបានបាញ់ទម្លាក់ដ្រូនអ៊ុយក្រែនចំនួន១៥គ្រឿង រួមទាំងនៅលើទីក្រុង Belgorod ទីក្រុង Bryansk និងទីក្រុង Krasnodar ដែលស្ថិតនៅតាមបណ្តោយព្រំដែនរុស្ស៊ីនិងអ៊ុយក្រែន។
អភិបាលទីក្រុង Krasnodar លោក Veniamin Kondratyev បាននិយាយនៅលើតេឡេក្រាមថាកម្ទេចបាក់បែករបស់ដ្រូនបានធ្លាក់ធ្វើឱ្យខូចខាតផ្ទះមួយខ្នង ប៉ុន្តែមិនមានមនុស្សស្លាប់ ឬរងរបួសពីការវាយប្រហាររបស់អ៊ុយក្រែននេះទេ៕
ព័ត៌មានខ្លះនៃសេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន Reuters។
អ៊ុយក្រែនរាយការណ៍ថាបានកម្ទេចដ្រូនរបស់រុស្ស៊ីចំនួន៤៦គ្រឿង
