ទិដ្ឋភាពអគារចងចាំសង្គ្រាមលោកលើកទីពីរ ដែលរងការបំផ្លិចបំផ្លាញដោយសារការប្រយុទ្ធគ្នារវាងអ៊ុយក្រែននិងរុស្ស៊ីនៅភូមិ Dolyna ក្នុងតំបន់ Donetsk ប្រទេសអ៊ុយក្រែន ថ្ងៃទី ៣ ខែវិច្ឆិកា ឆ្នាំ២០២២។

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

២៦ កុម្ភៈ ២០២២

រុស្ស៊ីបានចូលឈ្លានពានអ៊ុយក្រែន តាំងពីថ្ងៃទី២៤ ខែកម្ភៈ មក។ សូមតាមដានព្រឹត្តិការណ៍ថ្មីៗប្រចាំថ្ងៃទាក់ទងនឹងវិបត្តិអ៊ុយក្រែន នៅលើទំព័រ Live Blog ដែលផ្សាយផ្ទាល់នេះ។

២១:០៥ ២៨.៥.២០២២

ថ្ងៃសៅរ៍ ទី ២៨ ខែឧសភា៖

សាខាមួយនៃព្រះវិហារសាសនាគ្រិស្តនិកាយ Orthodox របស់អ៊ុយក្រែន ដែលនៅតែស្មោះត្រង់នឹងរុស្ស៊ីក្រោយពីមានការបែកបាក់កាលពីឆ្នាំ ២០១៩ បានឱ្យដឹងថា ខ្លួននឹងកាត់ផ្ដាច់ចំណងទាក់ទងជាមួយនឹងព្រះវិហាររុស្ស៊ី ដោយសារតែការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

សមាជិកនៃសាខាព្រះវិហារសាសនាគ្រិស្ដនិកាយ Orthodox របស់អ៊ុយក្រែន ចូលរួមក្នុងកិច្ចប្រជុំក្រុមប្រឹក្សាមយយនៅ St. Panteleimon Monastery ដើម្បីពិភាក្សាអំពីការកាត់ផ្ដាច់ចំណងទាក់ទងជាមួយនឹងព្រះវិហារនៅរុស្ស៊ីពាក់ព័ន្ធនឹងការឈ្លានពានរបស់រុស្ស៊ីលើអ៊ុយក្រែន ទីក្រុងកៀវ ប្រទេសអ៊ុយក្រែន ថ្ងៃទី ២៧ ខែឧសភា ឆ្នាំ២០២២។ (Ukrainian Orthodox Church/Handout via REUTERS)

រុស្ស៊ីបានឱ្យដឹងថា កងកម្លាំងរបស់ខ្លួនបានកាន់កាប់ពេញលេញនូវក្រុង Lyman របស់អ៊ុយក្រែន ដែលជាបណ្ដុំខ្សែរថភ្លើងមួយនៅក្នុងតំបន់ Donetsk នៅថ្ងៃសៅរ៍នេះ។ ការកាន់កាប់ក្រុងនេះនឹងជួយដល់ប្រតិបត្តិការយោធានៅដំណាក់កាលបន្ទាប់ទៀតរបស់រុស្ស៊ីនៅក្នុងតំបន់ Donbas ដែលស្ថិតនៅប៉ែកខាងកើតអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
អភិបាលតំបន់ Luhansk នៃប្រទេសអ៊ុយក្រែន លោក Serhiy Gaidai បាននិយាយកាលពីព្រឹកថ្ងៃសៅរ៍ថា មានកងកម្លាំងរុស្ស៊ីប្រមាណចំនួន ១ ម៉ឺននាក់នៅក្នុងតំបន់ប៉ែកខាងកើតអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
កងកម្លាំងរុស្ស៊ីនៅថ្ងៃសៅរ៍នេះបានប្រកាសអំពីការធ្វើតេស្ដជោគជ័យចុងក្រោយបង្អស់មួយនូវការបាញ់គ្រាប់មីស៊ីលល្បឿនលឿន Zircon ខណៈដែលរុស្ស៊ីបង្កើនប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន។ គ្រាប់មីស៊ីលនោះត្រូវបានបាញ់ចេញពីនាវា Admiral Gorshkov ដែលចតនៅសមុទ្រ Barents និងបានបាញ់ចំ«គោលដៅដោយជោគជ័យ» ដែលស្ថិតនៅចម្ងាយ ១ ពាន់គីឡូម៉ែត្រពីសមុទ្រ White នៅអាក់ទិក។ នេះបើយោងតាមក្រសួងការពារជាតិរុស្ស៊ី ដែលត្រូវបានចេញផ្សាយដោយទីភ្នាក់ងារព័ត៌មាន AFP។
អតីតប្រធានាធិបតីអ៊ុយក្រែន លោក Petro Poroshenko បាននិយាយនៅថ្ងៃសៅរ៍នេះថា លោកត្រូវបានហាមឃាត់មិនឱ្យចាកចេញពីប្រទេស និងបានចោទរដ្ឋាភិបាលអ៊ុយក្រែនថាបានបំពាននូវអ្វីដែលហៅថាជាបទឈប់បាញ់នយោបាយដែលមានស្រាប់ ចាប់តាំងពីរុស្ស៊ីឈ្លានពានអ៊ុយក្រែនមក។ លោក Poroshenko ដែលបានកាន់អំណាចពីឆ្នាំ ២០១៤ ដល់ឆ្នាំ ២០១៩ បានបង្ហាញខ្លួនជាសាធារណៈជាញឹកញាប់ចាប់តាំងពីសង្គ្រាមជាមួយរុស្ស៊ីបានចាប់ផ្ដើមមក ដោយលោកបានបង្ហាញខ្លួននៅលើកញ្ចក់ទូរទស្សន៍អន្តរជាតិដើម្បីផ្ដល់អត្ថាធិប្បាយនានា។ នេះបើយោងតាមទីភ្នាក់ងារព័ត៌មាន AFP។
ទីភ្នាក់ងារព័ត៌មាន Reuters ចេញផ្សាយថា លោក Mykhailo Podolyak ដែលជាអ្នកចរចាម្នាក់នៃក្រុមអ្នកចរចាសន្ដិភាពរបស់អ៊ុយក្រែន បានបង្ហោះសារនៅលើបណ្ដាញសង្គម Telegram ថា ការព្រមព្រៀងណាមួយជាមួយនឹងរុស្ស៊ី «គឺគ្មានតម្លៃទាល់តែសោះ»។ លោកបានសរសេរថា៖ «តើវាអាចទៅរួចទេក្នុងការចរចាជាមួយនឹងប្រទេសមួយ ដែលតែងតែកុហកឥតអៀនខ្មាស តាមបែបឃោសនានោះ?»។
នាយករដ្ឋមន្ត្រីអ៊ីតាលី លោក Mario Draghi បាននិយាយតាមទូរសព្ទកាលពីថ្ងៃសុក្រ ជាមួយនឹងប្រធានាធិបតីអ៊ុយក្រែន លោក Volodymyr Zelesnkyy ដើម្បីធានាដល់សមភាគីអ៊ុយក្រែនអំពី «ការគាំទ្ររបស់រដ្ឋាភិបាលអ៊ីតាលីនៅក្នុងការសម្របសម្រួលជាមួយនឹងសហភាពអឺរ៉ុប»។ នេះបើយោងតាមទីភ្នាក់ងារព័ត៌មាន AP។

រូបឯកសារ៖ នាយករដ្ឋមន្ត្រីអ៊ីតាលី លោក Mario Draghi ស្ដាប់សំណួរអ្នកកាសែត នៅក្នុងសន្និសីទសារព័ត៌មានមួយក្នុងទីក្រុងរ៉ូម ប្រទេសអ៊ីតាលី ថ្ងៃទី ៧ ខែមេសា ឆ្នាំ២០២២។ (REUTERS)

ប្រធានាធិបតីរុស្ស៊ី លោក Vladimir Putin និយាយថា ប្រទេសអ៊ុយក្រែនគួរតែដកចេញនូវគ្រាប់មីនក្នុងសមុទ្រចេញពីតំបន់នានានៅក្បែរកំពង់ផែរបស់ខ្លួនដើម្បីឱ្យការដឹកជញ្ជូនទំនិញអាចធ្វើបានដោយសុវត្ថិភាព។ លោក Putin បានថ្លែងយ៉ាងដូច្នេះនៅក្នុងការនិយាយតាមទូរសព្ទជាមួយនឹងអធិការបតីនៃប្រទេសអូទ្រីស លោក Karl Nehammer។ នេះបើយោងតាមទីភ្នាក់ងារព័ត៌មាន AP។
នៅក្នុងការបង្ហាញដ៏កម្រមួយនូវការប្រឆាំងនឹងសង្គ្រាមរបស់រុស្ស៊ីនៅក្នុងប្រទេសអ៊ុយក្រែន លោក Leonid Vasyukevich អនុប្រធានផ្នែកច្បាប់នៃគណបក្សកុម្មុយនីស្ដនៅប៉ែកខាងកើតបំផុតរបស់រុស្ស៊ី បានទាមទារឱ្យមានការបញ្ចប់ប្រតិបត្តិការយោធារបស់រុស្ស៊ីនៅអ៊ុយក្រែន និងដកកងកម្លាំងរបស់រុស្ស៊ីចេញមកវិញ។ លោក Vasyukevich ថ្លែងនៅក្នុងការប្រជុំមួយនៃសភាថ្នាក់តំបន់ Primorsk នៅកំពង់ផែ Vladivostok នៅជាប់មហាសមុទ្រប៉ាស៊ីហ្វិកកាលពីថ្ងៃសុក្រថា៖ «យើងយល់ថា ប្រសិនបើប្រទេសរបស់យើងមិនបញ្ឈប់ប្រតិបត្តិការយោធាទេនោះ នោះយើងនឹងមានកុមារកំព្រាកាន់តែច្រើននៅក្នុងប្រទេសរបស់យើង»។ នេះបើយោងតាមទីភ្នាក់ងារព័ត៌មាន AP។
នាយករដ្ឋមន្ត្រីអង់គ្លេស លោក Boris Johnson និយាយថា កងកម្លាំងរុស្ស៊ីកំពុងតែវិវឌ្ឍទៅមុខ នៅប៉ែកខាងកើតប្រទេសអ៊ុយក្រែន ហើយកងកម្លាំងអ៊ុយក្រែនត្រូវការគ្រាប់រ៉ុក្កែតបាញ់ចម្ងាយឆ្ងាយ និងសព្វាវុធយោធាដ៏ដទៃទៀត។ នេះបើយោងតាមទីភ្នាក់ងារព័ត៌មាន AP។
រដ្ឋមន្ត្រីការបរទេសតួកគីលោក Mevlut Cavusoglu និយាយថា ប្រទេសស៊ុយអែត និងហ្វាំងឡង់ត្រូវតែចាត់វិធានការចាំបាច់ដើម្បីដោះស្រាយនូវកង្វល់ផ្នែកសន្ដិសុខរបស់ប្រទេសលោកដើម្បីឈានទៅដល់ការដកចេញនូវការបដិសេធរបស់តួកគីនៅក្នុងការសុំចូលជាសមាជិកអង្គការអូតង់របស់ប្រទេសទាំងពីរ។ នេះបើយោងតាមទីភ្នាក់ងារព័ត៌មាន AP។
រដ្ឋមន្ត្រីក្រសួងអភិវឌ្ឍន៍របស់អាល្លឺម៉ង់ លោកស្រី Svenja Schulze បានធ្វើដំណើរទៅកាន់ប្រទេសអ៊ុយក្រែនដើម្បីសន្យាផ្ដល់ការគាំទ្រផ្នែកស៊ីវិលបន្ថែមទៀត និងពិភាក្សាអំពីការកសាងប្រទេសអ៊ុយក្រែនឡើងវិញ។ លោកស្រី Schulze គឺជារដ្ឋមន្ត្រីអាល្លឺម៉ង់ទីពីរដែលបានធ្វើដំណើរទស្សនកិច្ចទៅកាន់ប្រទេសអ៊ុយក្រែនចាប់តាំងពីរុស្ស៊ីចាប់ផ្ដើមឈ្លានពានអ៊ុយក្រែនមក។ រដ្ឋមន្ត្រីក្រសួងការបរទេសអាល្លឺម៉ង់លោកស្រី Annalena Baerbock បានធ្វើទស្សនកិច្ចទៅកាន់អ៊ុយក្រែនកាលពីថ្ងៃទី ១០ ខែឧសភា និងបានបើកស្ថានទូតអាល្លឺម៉ង់ឡើងវិញនៅក្នុងរដ្ឋធានីកៀវ។ នេះបើយោងតាមទីភ្នាក់ងារព័ត៌មាន AP។

២០:២៨ ២៩.៥.២០២២

ថ្ងៃអាទិត្យ ទី ២៩ ខែឧសភា៖

ទូរទស្សន៍ TRT Haber របស់ប្រទេសតួកគីបានរាយការណ៍នៅថ្ងៃអាទិត្យនេះថា ប្រធានាធិបតីតួកគីលោក Recep Tayyip Erdogan បាននិយាយថា ការពិភាក្សារបស់រដ្ឋាភិបាលតួកគីកាលពីសប្ដាហ៍មុនជាមួយនឹងគណៈប្រតិភូហ្វាំងឡង់និងគណៈប្រតិភូស៊ុយអែតគឺមិនស្ថិតនៅក្នុង «កម្រិតដែលបានរំពឹងទុកនោះទេ» ហើយរដ្ឋាភិបាលតួកគីមិនអាចយល់ព្រមឲ្យប្រទេស «ដែលគាំទ្រភេរវកម្ម» ទាំងពីរនេះចូលជាសមាជិកអង្គការអូតង់ (NATO) បានឡើយ។ នេះបើយោងតាមទីភ្នាក់ងារព័ត៌មាន Reuters។
ឯកអគ្គរដ្ឋទូតរុស្ស៊ីប្រចាំចក្រភពអង់គ្លេសលោក Andrei Kelin បានអះអាងនៅថ្ងៃអាទិត្យនេះថា ការចោទប្រកាន់ដែលថារុស្ស៊ីបានប្រព្រឹត្តឧក្រិដ្ឋកម្មសង្គ្រាមនៅក្នុងក្រុង Bucha ប្រទេសអ៊ុយក្រែន គឺជា «រឿងប្រឌិត»។ លោក Kelin បានលើកឡើងដូច្នេះនៅក្នុងកិច្ចសម្ភាសន៍មួយនៅក្នុងកម្មវិធី «Sunday Morning» របស់បណ្ដាញព័ត៌មាន BBC និងបានបដិសេធថា កងទ័ពរុស្ស៊ីមិនបានបាញ់ផ្លោងលើជនស៊ីវិលនោះទេ។ នេះបើយោងតាមបណ្ដាញព័ត៌មាន CNN។
ប្រធានាធិបតីស៊ែប៊ីលោក Aleksandar Vucic បាននិយាយនៅថ្ងៃអាទិត្យនេះថា លោកបានយល់ព្រមចំពោះកិច្ចសន្យាថ្មីសម្រាប់ការផ្គត់ផ្គង់ឧស្ម័នរយៈពេល ៣ ឆ្នាំ នៅក្នុងការសន្ទនាតាមទូរស័ព្ទជាមួយប្រធានាធិបតីរុស្ស៊ីលោក Vladimir Putin។ កិច្ចសន្យាផ្គត់ផ្គង់ឧស្ម័នរយៈពេល ១០ ឆ្នាំរបស់ប្រទេសស៊ែប៊ីនៅពេលបច្ចុប្បន្នជាមួយនឹងក្រុមហ៊ុន Gazprom របស់រុស្ស៊ី នឹងផុតកំណត់នៅថ្ងៃទី ៣១ ខែឧសភាខាងមុខ។ នេះបើយោងតាមទីភ្នាក់ងារព័ត៌មាន Reuters។

ទាហានអ៊ុយក្រែនម្នាក់ពិនិត្យស្ថានភាពខូចខាតនៅក្នុងតំបន់ដែលរងការវាយប្រហារដោយទាហានរុស្ស៊ី ខណៈការឈ្លានពានរបស់រុស្ស៊ីនៅអ៊ុយក្រែននៅតែបន្ត នៅក្នុងភូមិ Marinka ក្នុងតំបន់ Donetsk ប្រទេសអ៊ុយក្រែន កាលពីថ្ងៃទី ២៨ ខែឧសភា ឆ្នាំ ២០២២។

ប្រធានាធិបតីអ៊ុយក្រែនលោក Volodymyr Zelenskyy បាននិយាយថា លោកនឹងថ្លែងសុន្ទរកថាទៅកាន់ក្រុមប្រឹក្សាអឺរ៉ុបនៃសហភាពអឺរ៉ុបនៅក្នុងអំឡុងកិច្ចប្រជុំរបស់ក្រុមប្រឹក្សានេះនៅថ្ងៃចន្ទនិងថ្ងៃអង្គារខាងមុខ។ លោក Zelenskyy ថ្លែងដូច្នេះថា៖ «ខ្ញុំនឹងនិយាយជាពិសេសអំពីបញ្ហាភេរវកម្មដែលជាការពិតបានក្លាយជាទម្រង់តែមួយគត់នៃសកម្មភាពរបស់ប្រទេសរុស្ស៊ីប្រឆាំងនឹងទ្វីបអឺរ៉ុប និងអំពីបញ្ហាភេរវកម្មនៅលើទឹកដីអ៊ុយក្រែន បញ្ហាភេរវកម្មលើទីផ្សារថាមពលរបស់អឺរ៉ុប មិនមែនត្រឹមតែលើអ៊ុយក្រែនប៉ុណ្ណោះទេ បញ្ហាភេរវកម្មលើទីផ្សារស្បៀងអាហារ និងបញ្ហាភេរវកម្មលើសាកលលោក។ តើភេរវកម្មបែបណាទៀតដែលនឹងកើតឡើងនៅពេលបន្ទាប់?»។ នេះបើយោងតាមបណ្ដាញព័ត៌មាន Al Jazeera។
ការប្រយុទ្ធគ្នាដើម្បីគ្រប់គ្រងតំបន់ Donbas នៅភាគខាងកើតប្រទេសអ៊ុយក្រែនកាន់តែតានតឹងឡើងនៅថ្ងៃអាទិត្យនេះ នៅពេលដែលកងទ័ពរុស្ស៊ីបន្តឹងការក្ដោបក្ដាប់របស់ខ្លួននៅជុំវិញទីក្រុង Severodonetsk និងទីក្រុង Lysychansk ដែលជាទីក្រុងចម្បងៗរបស់អ៊ុយក្រែន។ លោក Sergiy Gaiday អភិបាលតំបន់ Lugansk បានបញ្ជាក់តាម Telegram ថា ស្ថានការណ៍នៅក្នុងទីក្រុង Lysychansk គឺ «កាន់តែអាក្រក់ខ្លាំងឡើង»។ នេះបើយោងតាមទីភ្នាក់ងារព័ត៌មាន AFP។
ទីភ្នាក់ងារព័ត៌មាន TASS របស់រុស្ស៊ីបានដកស្រង់សម្ដីរបស់ក្រសួងការពារជាតិរុស្ស៊ីដែលបានបញ្ជាក់នៅថ្ងៃអាទិត្យនេះថា មីស៊ីលរបស់រុស្ស៊ីបានបំផ្លាញឃ្លាំងអាវុធដ៏ធំមួយរបស់កងទ័ពអ៊ុយក្រែននៅក្នុងទីក្រុង Kryvyi Rih នៅភាគកណ្ដាលប្រទេសអ៊ុយក្រែន។ ទីភ្នាក់ងារព័ត៌មាន TASS នេះបានរាយការណ៍បន្ថែមថា ក្រសួងការពារជាតិរុស្ស៊ីក៏បានបញ្ជាក់ផងដែរថា ប្រព័ន្ធការពារទប់ទល់នឹងយន្តហោះចម្បាំងរបស់រុស្ស៊ីបានបាញ់ទម្លាក់យន្តហោះចម្បាំង SU-25 របស់អ៊ុយក្រែននៅក្នុងតំបន់ Dnipro ប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោក Olaf Scholz កាលពីថ្ងៃសៅរ៍បានស្នើប្រធានាធិបតីរុស្ស៊ីលោក Vladimir Putin ឲ្យដោះលែងយុទ្ធជនអ៊ុយក្រែន ២.៥០០ នាក់ ដែលបានលាក់ខ្លួននៅក្នុងរោងចក្រដែកថែប Azovstal ក្នុងទីក្រុង Mariupol និងដែលត្រូវបានរុស្ស៊ីចាប់ធ្វើឈ្លើយសឹក។ ខុទ្ទកាល័យប្រធានាធិបតីបារាំងបានបញ្ជាក់បន្ទាប់ពីមេដឹកនាំទាំង ៣ បានបញ្ចប់ការសន្ទនាតាមទូរស័ព្ទថា៖ «លោកប្រធានាធិបតី Macron និងអធិការបតីអាល្លឺម៉ង់បានស្នើឲ្យមានការដោះលែងអ្នកការពាររោងចក្រ Azovstal ប្រហែល ២.៥០០ នាក់ ដែលត្រូវបានកងទ័ពរុស្ស៊ីចាប់ធ្វើជាចំណាប់ខ្មាំង»។ នេះបើយោងតាមទីភ្នាក់ងារព័ត៌មាន AFP។

សកម្មភាពបាញ់រ៉ុកកែតរបស់ក្រុមប្រដាប់អាវុធសាធារណរដ្ឋប្រជាមានិត Donetsk តាមរយៈរថយន្តយោធាបាញ់គ្រាប់រ៉ុកកែត ស្ថិតមិនឆ្ងាយពីតំបន់ Panteleimonivka ដែលគ្រប់គ្រងដោយរដ្ឋាភិបាលនៃសាធារណរដ្ឋប្រជាមានិត Donetsk ភាគខាងកើតប្រទេសអ៊ុយក្រែន កាលពីថ្ងៃទី ២៨ ខែឧសភា ឆ្នាំ ២០២២។

អធិការបតីអាល្លឺម៉ង់លោក Olaf Scholz និងប្រធានាធិបតីបារាំងលោក Emmanuel Macron កាលពីថ្ងៃសៅរ៍បានស្នើប្រធានាធិបតីរុស្ស៊ីលោក Vladimir Putin ឲ្យធ្វើ «ការចរចាឲ្យបានម៉ឺងម៉ាត់និងដោយផ្ទាល់» ជាមួយនឹងប្រធានាធិបតីអ៊ុយក្រែនលោក Volodymyr Zelenskyy។ ខុទ្ទកាល័យអធិការបតីអាល្លឺម៉ង់បានបញ្ជាក់ថា នៅក្នុងការសន្ទនារយៈពេល ៨០ នាទីជាមួយនឹងលោក Putin លោក Scholz និងលោក Macron «បានទទូចឲ្យមានកិច្ចឈប់វាយប្រយុទ្ធគ្នាជាបន្ទាន់និងឲ្យមានការដកកងទ័ពរុស្ស៊ីចេញ»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីរុស្ស៊ីលោក Vladimir Putin បានប្រាប់មេដឹកនាំនៃប្រទេសបារាំងនិងប្រទេសអាល្លឺម៉ង់កាលពីថ្ងៃសៅរ៍ថា រដ្ឋាភិបាលរុស្ស៊ីត្រៀមលក្ខណៈរួចរាល់នៅក្នុងការស្វែងរកវិធីបញ្ជូនចេញនូវធញ្ញជាតិដែលជាប់គាំងនៅកំពង់ផែប្រទេសអ៊ុយក្រែន ប៉ុន្តែបានទាមទារឲ្យក្រុមបស្ចិមប្រទេសដកទណ្ឌកម្មចេញ។ លោក Putin ក៏បានព្រមានប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោក Olaf Scholz ផងដែរ មិនឲ្យបង្កើនការផ្គត់ផ្គង់សព្វាវុធដល់អ៊ុយក្រែន ដោយបាននិយាយថា ការធ្វើដូច្នេះអាចធ្វើឲ្យស្ថានការណ៍កាន់តែគ្មានអស្ថិរភាពបន្ថែមទៀតនៅក្នុងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។

២២:៤៧ ៣០.៥.២០២២

ថ្ងៃចន្ទ ទី ៣០ ខែឧសភា៖

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃចន្ទនេះថា ប្រទេសអ៊ុយក្រែនឆ្អែតចិត្តជាមួយនឹង «ដំណោះស្រាយពិសេស» និងទម្រង់ផ្ដល់ឱ្យផ្សេងគ្នាសម្រាប់ការចូលជាសមាជិករបស់អ៊ុយក្រែននៅក្នុងសហភាពអឺរ៉ុប។ លោក Kuleba ថ្លែងដូច្នេះថា៖ «យើងត្រូវការការបញ្ជាក់ច្បាស់លាស់តាមផ្លូវច្បាប់ដែលថាអ៊ុយក្រែនគឺជាផ្នែកមួយនៃគម្រោងសមាហរណកម្មអឺរ៉ុប ហើយការបញ្ជាក់បែបនេះគឺការផ្ដល់ឋានៈជាបេក្ខជនប្រទេស [សម្រាប់សមាជិកភាពរបស់អ៊ុយក្រែននៅក្នុងសហភាពអឺរ៉ុប]»។ នេះបើយោងតាមទីភ្នាក់ងារព័ត៌មាន Reuter។

រដ្ឋមន្ត្រីការបរទេសអ៊ុយក្រែន លោក Dmytro Kuleba ថ្លែងសុន្ទរកថា ក្នុងអំឡុងពេលនៃកិច្ចប្រជុំវេទិកាសេដ្ឋកិច្ចពិភពលោកឆ្នាំ ២០២២ នៅទីក្រុងដាវ៉ូស ប្រទេសស្វីស ថ្ងៃទី ២៥ ខែឧសភា ឆ្នាំ២០២២។

អនុប្រធានក្រុមប្រឹក្សាសន្តិសុខរបស់ប្រទេសរុស្ស៊ីលោក Dmitry Medvedev បាននិយាយនៅថ្ងៃចន្ទនេះថា ការសម្រេចរបស់រដ្ឋាភិបាលសហរដ្ឋអាមេរិកនៅក្នុងការមិនបញ្ជូនឱ្យប្រទេសអ៊ុយក្រែននូវប្រព័ន្ធរ៉ុក្កែតដែលអាចបាញ់ដល់ប្រទេសរុស្ស៊ីបានគឺជារឿង «ត្រឹមត្រូវ»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីសហរដ្ឋអាមេរិកលោក Joe Biden បាននិយាយនៅថ្ងៃចន្ទនេះថា សហរដ្ឋអាមេរិកនឹងមិនបញ្ជូនឱ្យអ៊ុយក្រែននូវប្រព័ន្ធរ៉ុក្កែតដែលអាចបាញ់ដល់រុស្ស៊ីនោះទេ។ ការលើកឡើងនេះបានធ្វើឡើងបន្ទាប់ពីមានសេចក្ដីរាយការណ៍ថា រដ្ឋបាលរបស់លោក Biden បានត្រៀមលក្ខណៈនៅក្នុងការបញ្ជូនប្រព័ន្ធរ៉ុក្កែតទំនើបដែលបាញ់បានចម្ងាយឆ្ងាយទៅឱ្យរដ្ឋាភិបាលអ៊ុយក្រែនដើម្បីប្រយុទ្ធនឹងរុស្ស៊ី។ លោក Biden បានប្រាប់អ្នកកាសែតថា៖ «យើងនឹងមិនបញ្ជូនឱ្យអ៊ុយក្រែននូវប្រព័ន្ធរ៉ុក្កែត» ដែលអាចបាញ់ដល់ប្រទេសរុស្ស៊ីនោះឡើយ។
ប្រធានាធិបតីតួកគីលោក Recep Tayyip Erdogan បានប្រាប់ប្រធានាធិបតីរុស្ស៊ីលោក Vladimir Putin នៅថ្ងៃចន្ទនេះថា រដ្ឋាភិបាលតួកគីត្រៀមលក្ខណៈរួចរាល់នៅក្នុងការបំពេញតួនាទីនៅក្នុង «យន្តការសង្កេតការណ៍» រវាងរដ្ឋាភិបាលរុស្ស៊ី រដ្ឋាភិបាលអ៊ុយក្រែន និងអង្គការសហប្រជាជាតិ ប្រសិនបើកិច្ចព្រមព្រៀងមួយសម្រេចបានទាក់ទិននឹងរឿងនេះ។ ខុទ្ទកាល័យប្រធានាធិបតីតួកគីបានបញ្ជាក់នៅក្នុងសេចក្ដីថ្លែងការណ៍មួយថា លោក Erdogan បានប្រាប់លោក Putin នៅក្នុងការសន្ទនាតាមទូរស័ព្ទថា សន្តិភាពត្រូវតែបង្កើតឡើងឱ្យបានឆាប់តាមដែលអាចធ្វើទៅបាន ហើយជំហានកសាងទំនុកចិត្តចាំបាច់ត្រូវតែអនុវត្តទាក់ទិននឹងសង្គ្រាមនៅអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយថា ប្រធានាធិបតីរុស្ស៊ីលោក Vladimir Putin បានប្រាប់ប្រធានាធិបតីតួកគីលោក Recep Tayyip Erdogan នៅក្នុងការសន្ទនាតាមទូរស័ព្ទនៅថ្ងៃចន្ទនេះថា រុស្ស៊ីត្រៀមលក្ខណៈរួចរាល់នៅក្នុងការសម្របសម្រួលការដឹកជញ្ជូនទំនិញនានាឆ្លងកាត់តាមផ្លូវសមុទ្រដោយគ្មានការរារាំង ដែលក្នុងនោះរួមមានទាំងការដឹកជញ្ជូនធញ្ញជាតិចេញពីកំពង់ផែរបស់ប្រទេសអ៊ុយក្រែនផងដែរ។ នេះបើយោងតាមទីភ្នាក់ងារព័ត៌មាន Reuters។

ទាហានអ៊ុយក្រែនដើរកាត់អគារមួយដែលរងការបំផ្លិចបំផ្លាញយ៉ាងធ្ងន់ធ្ងរដោយសារការបាញ់ផ្លោងរបស់រុស្ស៊ី នៅក្រុង Bakhmut ប៉ែកខាងកើតប្រទេសអ៊ុយក្រែន ថ្ងៃទី ២៨ ខែឧសភា ឆ្នាំ ២០២២។ (AP Photo/Francisco Seco)

រដ្ឋមន្ត្រីការបរទេសថ្មីរបស់ប្រទេសបារាំងអ្នកស្រី Catherine Colonna បាននិយាយនៅថ្ងៃចន្ទនេះនៅពេលអ្នកស្រីធ្វើទស្សនកិច្ចទៅកាន់រដ្ឋធានីកៀវ ប្រទេសអ៊ុយក្រែនថា រដ្ឋាភិបាលបារាំងត្រៀមលក្ខណៈរួចរាល់នៅក្នុងការបង្កើនជំនួយយោធាដល់អ៊ុយក្រែនដើម្បីជួយអ៊ុយក្រែនតតាំងនឹងការឈ្លានពានរបស់រុស្ស៊ី។ អ្នកស្រី Colonna បានថ្លែងនៅក្នុងសន្និសីទកាសែតមួយដែលធ្វើឡើងជាមួយនឹងរដ្ឋមន្ត្រីការបរទេសអ៊ុយក្រែនលោក Dmytro Kuleba ថា «ប្រទេសបារាំងមិនមែនកំពុងមានសង្គ្រាមជាមួយនឹងរុស្ស៊ីទេ» ប៉ុន្តែបារាំងនឹង «បន្តពង្រឹងការបញ្ជូនសព្វាវុធ [ដល់អ៊ុយក្រែន]»។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីហុងគ្រីលោក Viktor Orban បានព្រមាននៅថ្ងៃចន្ទនេះនៅពេលលោកធ្វើដំណើរទៅដល់កន្លែងប្រជុំរបស់បណ្ដាមេដឹកនាំសហភាពអឺរ៉ុបថា សហភាពអឺរ៉ុបមិនទាន់សម្រេចបាននូវការសម្រុះសម្រួលណាមួយដែលអាចធ្វើឱ្យរដ្ឋាភិបាលហុងគ្រីគាំទ្រការហាមឃាត់ការនាំចូលប្រេងឥន្ធនៈពីរុស្ស៊ីនៅឡើយទេ។ នេះបើយោងតាមទីភ្នាក់ងារព័ត៌មាន AFP។
លោក Josep Borrell ប្រធានក្រុមប្រឹក្សាអឺរ៉ុបនៃសហភាពអឺរ៉ុបបាននិយាយនៅថ្ងៃចន្ទថា ប្រទេសសមាជិកសហភាពអឺរ៉ុបគួរតែអាចសម្រេចបាននូវកិច្ចព្រមព្រៀងមួយនៅក្នុងការប្រជុំនៅថ្ងៃចន្ទនេះអំពីកញ្ចប់ទណ្ឌកម្មបន្ទាប់សម្រាប់ដាក់លើប្រទេសរុស្ស៊ី ដែលក្នុងនោះរួមមានទាំងការហាមឃាត់នូវការនាំចូលប្រេងឥន្ធនៈពីរុស្ស៊ីផងដែរ។ លោក Borrell បានបញ្ជាក់ប្រាប់វិទ្យុ France Info ថា៖ «យើងចាំបាច់ត្រូវតែសម្រេចជាឯកច្ឆន្ទ។ មានការពិភាក្សាកាលពីរសៀលម្សិលមិញ ហើយនឹងមានការពិភាក្សានៅព្រឹកនេះនិងពេញមួយរសៀលនេះ»។ លោកបានបន្ថែមថា៖ «ខ្ញុំគិតថានៅរសៀលនេះ យើងនឹងអាចផ្ដល់ជូនបណ្ដាមេដឹកនាំនៃប្រទេសជាសមាជិកសហភាពអឺរ៉ុបនូវកិច្ចព្រមព្រៀងមួយ»។ នេះបើយោងតាមទីភ្នាក់ងារព័ត៌មាន Reuters។
មន្ត្រីការទូតកំពូលៗនៃសហភាពអឺរ៉ុបបានជួបប្រជុំគ្នានៅថ្ងៃចន្ទសម្រាប់ការប៉ុនប៉ងចុងក្រោយបង្អស់នៅក្នុងការឯកភាពគ្នាលើការហាមឃាត់ការនាំចូលប្រេងឥន្ធនៈពីប្រទេសរុស្ស៊ី ក្នុងគោលបំណងដើម្បីបញ្ចៀសមិនឱ្យមានការបង្ហាញឡើងអំពីការមិនសាមគ្គីគ្នាទាក់ទិននឹងការឆ្លើយតបរបស់សហភាពអឺរ៉ុបចំពោះសង្គ្រាមនៅអ៊ុយក្រែន មុនពេលមេដឹកនាំរបស់ពួកគេជួបប្រជុំគ្នានៅពេលក្រោយនៅថ្ងៃចន្ទនេះ។ បើយោងទៅលើសេចក្ដីព្រាងនៃសេចក្ដីថ្លែងការណ៍បិទបញ្ចប់នៃកិច្ចប្រជុំរបស់សហភាពអឺរ៉ុបនៅថ្ងៃនេះ មេដឹកនាំនៃប្រទេសជាសមាជិកសហភាពអឺរ៉ុបទាំង ២៧ គួរតែឯកភាពគ្នាថា ទណ្ឌកម្មលើកនេះនឹងមានបញ្ចូលនូវផ្នែកប្រេងឥន្ធនៈផងដែរ ដោយមានការលើកលែងបណ្ដោះអាសន្នចំពោះប្រេងឆៅដែលបញ្ជូនតាមបំពង់បង្ហូរប្រេង ដែលនេះជាការសម្រុះសម្រួលដែលឯកអគ្គរដ្ឋទូតនានាមិនបានឯកភាពគ្នាកាលពីថ្ងៃអាទិត្យម្សិល មិញ។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអេស្ប៉ាញលោក Pedro Sanchez បាននិយាយនៅថ្ងៃចន្ទថា ការគាំទ្ររបស់អង្គការអូតង់ចំពោះប្រទេសអ៊ុយក្រែនគឺមិនអាចបំបែកបានទេ ហើយប្រធានា ធិបតីរុស្ស៊ីលោក Vladimir Putin នឹងមិនសម្រេចតាមគោលបំណងរបស់លោកនៅក្នុងប្រទេសអ៊ុយក្រែននោះឡើយ។ លោក Sanchez បានបញ្ជាក់នៅក្នុងពិធីប្រារព្ធខួបលើកទី៤០របស់ប្រទេសអេស្ប៉ាញក្នុងនាមជាសមាជិកអង្គការអូតង់ថា៖ «ការគាំទ្រប្រទេសអ៊ុយក្រែនដោយការតាំងចិត្តគឺជាវិធីតែមួយគត់នៅក្នុងការធានាថាទ្វីបអឺរ៉ុបនិងពិភពលោកដែលយើងបានកសាងឡើងមានអនាគតច្បាស់លាស់»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសបារាំងអ្នកស្រី Catherine Colonna នៅថ្ងៃចន្ទបានថ្កោលទោសការសម្លាប់ជនស៊ីវិលនៅជាយរដ្ឋធានីកៀវ ប្រទេសអ៊ុយក្រែន ក្នុងអំឡុងពេលធ្វើទស្សន កិច្ចទៅកាន់ប្រទេសអ៊ុយក្រែនដើម្បីបង្ហាញការគាំទ្រ។ បន្ទាប់ពីបានធ្វើទស្សនកិច្ចទៅកាន់វិហារគ្រិស្ដសាសនានិកាយអ័រតូដុកមួយកន្លែងនៅក្នុងក្រុង Bucha ជាយរដ្ឋធានីកៀវ ដែលនៅទីនោះកងទ័ពរុស្ស៊ីត្រូវបានចោទប្រកាន់ថាបានសម្លាប់ជនស៊ីវិលមក អ្នកស្រី Colonna បានប្រាប់អ្នកកាសែតថា៖ «រឿងនេះមិនគួរកើតឡើងទាល់តែសោះ។ រឿងនេះមិនត្រូវកើតឡើងម្ដងទៀតជាដាច់ខាត»។ នេះបើយោងតាមទីភ្នាក់ ងារព័ត៌មាន AFP។

ប្រជាជនអ៊ុយក្រែនឡើងជិះរថភ្លើងរត់ភៀសខ្លួននៅក្រុង Soledar តំបន់ Donetsk ប្រទេសអ៊ុយក្រែន ថ្ងៃទី ២៤ ខែឧសភា ឆ្នាំ២០២២។ (AP Photo/Andriy Andriyenko)

រដ្ឋមន្ត្រីការបរទេសបារាំងអ្នកស្រី Catherine Colonna បានធ្វើដំណើរទៅដល់ប្រទេសអ៊ុយក្រែននៅថ្ងៃចន្ទសម្រាប់ដំណើរទស្សនកិច្ចលើកដំបូងរបស់អ្នកស្រីទៅកាន់ប្រទេសនេះ។ នេះបើយោងតាមសារបង្ហោះនៅលើទំព័រ Twitter របស់អ្នកស្រី។ ក្រសួងការបរទេសបារាំងបានបញ្ជាក់ថា អ្នកស្រី Colonna នឹងជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy និងរដ្ឋមន្ត្រីការបរទេសអ៊ុយក្រែនលោក Dmytro Kuleba នៅក្នុងរដ្ឋធានីកៀវ ដើម្បីពិភាក្សាអំពីការគាំទ្ររបស់ប្រទេសបារាំងចំពោះប្រទេសអ៊ុយក្រែន «គ្រប់ផ្នែកទាំងអស់ ហើយជាពិសេសអំពីបញ្ហាដែល [រុស្ស៊ី] រាំងខ្ទប់ការនាំចេញធញ្ញជាតិនិងគ្រាប់ពូជរុក្ខជាតិប្រេងរបស់អ៊ុយក្រែន»។ នេះបើយោងតាមទូរទស្សន៍ CNN។
លោក Sergiy Gaiday អភិបាលតំបន់ Lugansk នៃប្រទេសអ៊ុយក្រែនបាននិយាយនៅថ្ងៃចន្ទថា កងទ័ពរុស្ស៊ីបានសម្រុកចូលកាន់តែកៀកទៅផ្នែកកណ្ដាលនៃទីក្រុង Severodonetsk នៅភាគខាងកើតប្រទេសអ៊ុយក្រែន។ លោកបានបញ្ជាក់នៅក្នុងសេចក្ដីថ្លែងការណ៍មួយនៅលើបណ្ដាញសង្គមអនឡាញថា៖ «រុស្ស៊ីកំពុងសម្រុកចូលទៅផ្នែកកណ្ដាលនៃទីក្រុង Severodonetsk។ ការប្រយុទ្ធកំពុងបន្ត។ ស្ថានការណ៍គឺពិបាកខ្លាំងណាស់»។ នេះបើយោងតាមទីភ្នាក់ងារព័ត៌មាន AFP។
ក្រុមតន្ត្រី Kalush របស់ប្រទេសអ៊ុយក្រែន ដែលបានឈ្នះពានរង្វាន់ការប្រកួតចម្រៀង Eurovision នៅឆ្នាំនេះ បានដាក់ដេញថ្លៃពានរង្វាន់នេះតម្លៃ ៩០០.០០០ ដុល្លារអាមេរិក សម្រាប់ការបរិច្ចាគដល់មូលនិធិមួយកន្លែងដែលជួយកងទ័ពអ៊ុយក្រែន។ ក្រុមតន្ត្រី Kalush បានសរសេរនៅលើ Facebook កាលពីយប់ថ្ងៃអាទិត្យប្រកាសអំពីអ្នកឈ្នះការដេញថ្លៃនេះថា៖ «អ្នកទាំងអស់គ្នាអស្ចារ្យណាស់!»។ ក្រុមតន្ត្រីនេះបានបន្ថែមថា៖ «សូមថ្លែងអំណរគុណជាពិសេសដល់ក្រុម WhiteBIT ដែលបានទិញពានរង្វាន់នេះសម្រាប់តម្លៃ៩០០.០០០ដុល្លារអាមេរិក (៨៣៧.០០០ អឺរ៉ូ) ហើយឥឡូវនេះក្រុមនេះគឺជាម្ចាស់កម្មសិទ្ធិស្របច្បាប់ [លើពានរង្វាន់នេះ]»។ នេះបើយោងតាមទីភ្នាក់ងារព័ត៌ មាន AFP។
ប្រធានាធិបតីអ៊ុយក្រែនលោក Volodymyr Zelenskyy បានធ្វើដំណើរជាលើកដំបូងកាលពីថ្ងៃអាទិត្យម្សិលមិញទៅកាន់តំបន់ភាគខាងកើតប្រទេសអ៊ុយក្រែនដែលហែក ហួរដោយសារសង្គ្រាម តាំងពីពេលដែលរុស្ស៊ីបានឈ្លានពានមក។ បន្ទាប់ពីបានធ្វើទស្សនកិច្ចនៅក្នុងទីក្រុង Kharkiv លោក Zelenskyy បានប្រកាសថា លោកបានបញ្ឈប់តំណែងប្រធានផ្នែកសន្តិសុខនៃទីក្រុងនេះ។ លោកថា ប្រធានផ្នែកសន្តិសុខនេះត្រូវបានបញ្ឈប់ពីតំណែង «ដោយសារមិនបានធ្វើការដើម្បីការពារទីក្រុង Kharkiv តាំងពីថ្ងៃដំបូងនៃសង្គ្រាមពេញទំហឹងនេះ ប៉ុន្តែគិតតែអំពីខ្លួនឯងតែប៉ុណ្ណោះ»។ នេះបើយោងតាមទីភ្នាក់ងារព័ត៌មាន AFP។

២១:៤៩ ៣១.៥.២០២២

ថ្ងៃអង្គារ ទី ៣១ ខែឧសភា៖

អគ្គរដ្ឋអាជ្ញាប្រទេសអ៊ុយក្រែនអ្នកស្រី Iryna Venediktova បាននិយាយនៅថ្ងៃអង្គារនេះថា ប្រទេសអ៊ុយក្រែនបានកំណត់ករណីសង្ស័យរឿងឧក្រិដ្ឋកម្មសង្គ្រាមចំនួនរាប់ពាន់ករណីនៅក្នុងតំបន់ Donbas ភាគខាងកើតប្រទេសអ៊ុយក្រែន ដែលនៅទីនោះកងទ័ពរុស្ស៊ីកំពុងបង្កើនការវាយប្រហារ។ អ្នកស្រីបានបញ្ជាក់បន្ថែមថា ករណីសង្ស័យរឿងឧក្រិដ្ឋកម្មសង្គ្រាមនៅក្នុងតំបន់ឧស្សាហកម្ម Donbas នេះស្ថិតក្នុងចំណោមករណីប្រហែល ១៥.០០០ នៅទូទាំងប្រទេសអ៊ុយក្រែន តាំងពីពេលដែលកងទ័ពរុស្ស៊ីបានឈ្លានពានអ៊ុយក្រែននៅថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន AFP។
ប្រទេសអេស្ដូនី ឡេតូនី និងស្លូវ៉ាគីបានចុះហត្ថលេខាលើកិច្ចព្រមព្រៀងមួយក្នុងអំឡុងពេលកិច្ចប្រជុំសម្របសម្រួលរយៈពេល ២ ថ្ងៃក្នុងទីក្រុងឡាអេ ប្រទេសហូឡង់ ដើម្បីចូលរួមជាមួយនឹងប្រទេសលីទុយអានី ប៉ូឡូញ និងអ៊ុយក្រែននៅក្នុងក្រុមស៊ើបអង្កេតរួមដែលនឹងជួយសម្របសម្រួលការចែកចាយភស្តុតាងនៃអំពើឃោរឃៅនានាតាមរយៈទីភ្នាក់ងារ Eurojust ដែលជាទីភ្នាក់ងារសហប្រតិបត្តិការផ្នែកតុលាការរបស់សហភាពអឺរ៉ុប។ ស្របពេលនោះដែរ រដ្ឋអាជ្ញាតុលាការឧក្រិដ្ឋកម្មអន្តរជាតិ (ICC) លោក Karim Khan បាននិយាយនៅថ្ងៃអង្គារនេះថា លោកមានគម្រោងបើកការិយាល័យមួយនៅក្នុងរដ្ឋធានីកៀវ ប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។

ក្រុមរដ្ឋអាជ្ញាធ្វើសន្និសីទកាសែតលើការស៊ើបអង្កេតករណីឧក្រិដ្ឋកម្មសង្គ្រាមក្នុងប្រទេសអ៊ុយក្រែន នៅទីក្រុងឡាអេ ប្រទេសហូរឡង់ ថ្ងៃទី ៣១ ខែឧសភា ឆ្នាំ២០២២។

រដ្ឋាភិបាលអ៊ុយក្រែននៅថ្ងៃអង្គារនេះ បានស្វាគមន៍ការហាមឃាត់មួយផ្នែករបស់សហភាពអឺរ៉ុបលើការនាំចូលប្រេងឥន្ធនៈពីរុស្ស៊ី ដោយបានបញ្ជាក់ថា ការហាមឃាត់នេះនឹងធ្វើឱ្យប៉ះពាល់ដល់សេដ្ឋកិច្ចរបស់រុស្ស៊ីនិងប៉ះពាល់ដល់សមត្ថភាពរបស់រុស្ស៊ីនៅក្នុងការផ្គត់ផ្គង់ហិរញ្ញវត្ថុដល់សង្គ្រាមនៅអ៊ុយក្រែន។ ក្រសួងការបរទេសអ៊ុយក្រែនបានបញ្ជាក់នៅក្នុងសេចក្ដីថ្លែងការណ៍មួយថា៖ «យើងរំពឹងថា នៅត្រឹមចុងឆ្នាំ ២០២២ នេះ រុស្ស៊ីនឹងបាត់បង់ការនាំចេញប្រេងឥន្ធនៈរបស់ខ្លួនចំនួនរហូតដល់ ៩០% ទៅកាន់ទ្វីបអឺរ៉ុប។ ករណីនេះមានន័យថា ធនធានយោធារបស់រុស្ស៊ីនឹងមិនទទួលបានថវិការាប់ម៉ឺនលានដុល្លារសម្រាប់ការធ្វើសង្គ្រាមប្រឆាំងនឹងអ៊ុយក្រែននោះទេ»។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអ៊ីតាលីលោក Mario Draghi បាននិយាយនៅថ្ងៃអង្គារនេះថា គណៈកម្មការអឺរ៉ុបនៃសហភាពអឺរ៉ុបបានទទួលនូវអំណាចពេញលេញនៅក្នុងការពិនិត្យលើលទ្ធភាពនៃការកំណត់តម្លៃអតិបរមាលើការនាំចូលឧស្ម័នពីប្រទេសរុស្ស៊ី។ លោក Draghi បានប្រាប់អ្នកសារព័ត៌មាននៅក្នុងទីក្រុងព្រុចសែល ប្រទេសបែលហ្ស៊ិកបន្ទាប់ពីកិច្ចប្រជុំរបស់សហភាពអឺរ៉ុបថា៖ «គណៈកម្មការ [អឺរ៉ុប] ទទួលបាននូវសិទ្ធិអំណាចនៅក្នុងការសិក្សាអំពីលទ្ធភាពនៃការកំណត់តម្លៃអតិបរមា [លើការនាំចូល] ឧស្ម័ន [ពីរុស្ស៊ី]»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីបារាំងលោក Emmanuel Macron បាននិយាយនៅថ្ងៃអង្គារនេះថា អ្វីៗក៏អាចពិចារណាបានដែរសម្រាប់លទ្ធភាពនៃការដាក់ទណ្ឌកម្មជុំបន្ទាប់លើប្រទេសរុស្ស៊ី។ លោក Macron បានប្រាប់អ្នកសារព័ត៌មាន បន្ទាប់ពីកិច្ចប្រជុំពិសេសរបស់សហភាពអឺរ៉ុបនៅក្នុងទីក្រុងព្រុចសែល ប្រទេសបែលហ្ស៊ិកបានបញ្ចប់ទៅថា៖ «ខ្ញុំគិតថាយើងមិនគួរដកចេញនូវចំណុចណាមួយទេសម្រាប់ [ការពិចារណាលើការដាក់ទណ្ឌកម្មជុំបន្ទាប់លើរុស្ស៊ី] នៅក្នុងរយៈពេលប៉ុន្មានសប្ដាហ៍ខាងមុខ។ អ្វីៗទាំងអស់គឺអាស្រ័យលើការវិវត្តនៃស្ថានការណ៍នៅមូលដ្ឋានផ្ទាល់»។ នេះបើយោងតាមបណ្ដាញព័ត៌មាន CNN។
ប្រធានាធិបតីបារាំងលោក Emmanuel Macron បានថ្លែងនៅថ្ងៃអង្គារនេះទៅកាន់អ្នកសារព័ត៌មានបន្ទាប់ពីកិច្ចប្រជុំរបស់សហភាពអឺរ៉ុបនៅក្នុងទីក្រុងព្រុចសែល ប្រទេសបែលហ្ស៊ិកបានបញ្ចប់ទៅថា លោកសង្ឃឹមថានៅក្នុងរយៈពេលប៉ុន្មានថ្ងៃនិងប៉ុន្មានសប្ដាហ៍ខាងមុខ កិច្ចព្រមព្រៀងមួយអាចនឹងសម្រេចបានជាមួយនឹងប្រទេសរុស្ស៊ីដើម្បីអនុញ្ញាតឱ្យមានការនាំចេញស្បៀងអាហារពីប្រទេសអ៊ុយក្រែន។ លោកបាននិយាយថា ការពិភាក្សាអំពីរឿងនេះកាលពីពេលថ្មីៗនេះរវាងប្រធានាធិបតីរុស្ស៊ីនិងប្រធានាធិបតីតួកគីទទួលបាន «លទ្ធផលវិជ្ជមាន»។ នេះបើយោងតាមទីភ្នាក់ងារព័ត៌មាន Reuters។

ប្រធានាធិបតីបារាំង លោក Emmanuel Macron ថ្លែងទៅកាន់អ្នកសារព័ត៌មាន ក្នុងអំឡុងពេលនៃថ្ងៃទីពីរនៃកិច្ចប្រជុំកំពូលមេដឹកនាំសហភាពអឺរ៉ុប ខណៈដែលបណ្ដាមេដឹកនាំសហភាពអឺរ៉ុបស្វះស្វែងរកការព្រមព្រៀងគ្នាចំពោះទណ្ឌកម្មលើប្រេងរុស្ស៊ី ដើម្បីជាការឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន នៅទីក្រុងព្រុចសែល ប្រទេសប៊ែលហ្សិក ថ្ងៃទី ៣១ ខែឧសភា ឆ្នាំ២០២២។ (REUTERS)

ប្រធានសហភាពអាហ្វ្រិកលោក Macky Sall បានព្រមានបណ្ដាមេដឹកនាំនៃប្រទេសជាសមាជិកសហភាពអឺរ៉ុបនៅថ្ងៃអង្គារនេះថា ការសម្រេចរបស់មេដឹកនាំទាំងនោះនៅក្នុងការដកធនាគារនានារបស់រុស្ស៊ីចេញពីប្រព័ន្ធទូរគមនាគមន៍ហិរញ្ញវត្ថុអន្តរធនាគារពិភពលោក (SWIFT) ប្រឈមនឹងការធ្វើឱ្យប៉ះពាល់ដល់ការផ្គត់ផ្គង់ស្បៀងអាហារដល់ទ្វីបអាហ្វ្រិក។ នៅក្នុងការថ្លែងតាមវីដេអូអនឡាញទៅកាន់បណ្ដាមេដឹកនាំនៃប្រទេសជាសមាជិកសហភាពអឺរ៉ុប លោក Sall បានទទួលស្គាល់ថា ការរាំងខ្ទប់របស់រុស្ស៊ីលើទីក្រុង Odessa របស់អ៊ុយក្រែនបានប៉ះពាល់ដល់ការនាំចេញស្បៀងអាហាររបស់អ៊ុយក្រែន ហើយលោកបានគាំទ្រកិច្ចប្រឹងប្រែងដែលដឹកនាំដោយអង្គការសហប្រជាជាតិនៅក្នុងការធ្វើយ៉ាងណាមិនឱ្យមានការរាំងខ្ទប់នេះ។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសអ៊ុយក្រែនលោក Dmytro Kuleba បានសរសេរនៅលើ Twitter នៅថ្ងៃអង្គារនេះថា ប្រទេសអ៊ុយក្រែនកំពុងធ្វើការជាមួយទាហានជើងទឹកនៃប្រទេសទី ៣ មួយចំនួនលើប្រតិបត្តិការអន្តរជាតិដែលដឹកនាំដោយអង្គការសហប្រជាជាតិ ដើម្បីធានាឱ្យមានផ្លូវពាណិជ្ជកម្មប្រកបដោយសុវត្ថិភាពសម្រាប់ការនាំចេញស្បៀងអាហារ។ លោកមិនបានផ្ដល់ព័ត៌មានលំអិតបន្ថែមណាមួយទេ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសរុស្ស៊ីលោក Sergei Lavrov នឹងធ្វើទស្សនកិច្ចទៅកាន់ប្រទេសអារ៉ាប៊ីសាអូឌីតនៅថ្ងៃពុធដែលនៅទីនោះលោកនឹងជួបជាមួយនឹងរដ្ឋមន្ត្រីការបរទេសមកពីបណ្ដាប្រទេសជាសមាជិកក្រុមប្រឹក្សាសហប្រតិបត្តិការបណ្ដាប្រទេសអារ៉ាប់ជាប់ឈូងសមុទ្រពែក្ស (GCC)។ នេះបើតាមការបញ្ជាក់របស់មន្ត្រីពីររូបនៅថ្ងៃអង្គារដែលសុំមិនបញ្ចេញឈ្មោះ។ ប្រធានបទនៃការពិភាក្សានេះនៅមិនទាន់ច្បាស់នៅឡើយ បើទោះបីជាមន្ត្រីទាំងពីរបាននិយាយថា រដ្ឋមន្ត្រីការបរទេសនៃប្រទេសអារ៉ាប់ជាប់ឈូងសមុទ្រពែក្សទាំង ៦ ក៏នឹងមានជំនួបតាមអនឡាញជាមួយនឹងរដ្ឋមន្ត្រីការបរទេសអ៊ុយក្រែនលោក Dmytro Kuleba នៅថ្ងៃពុធផងដែរក៏ដោយ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសតួកគីលោក Mevlut Cavusoglu បាននិយាយនៅថ្ងៃអង្គារថា ប្រទេសហ្វាំងឡង់និងប្រទេសស៊ុយអែតគួរតែកែប្រែច្បាប់របស់ខ្លួនប្រសិនបើចាំបាច់ដើម្បីបំពេញតាមតម្រូវការរបស់ប្រទេសតួកគីនិងទទួលបានការគាំទ្រពីតួកគីសម្រាប់កិច្ចប្រឹងប្រែងចូលជាសមាជិករបស់ពួកគេនៅក្នុងអង្គការអូតង់ (NATO)។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសតួកគីលោក Mevlut Cavusoglu បាននិយាយនៅថ្ងៃអង្គារថា រដ្ឋមន្ត្រីការបរទេសរុស្ស៊ីលោក Sergei Lavrov គ្រោងធ្វើទស្សនកិច្ចជាមួយនឹងគណៈប្រតិភូយោធាមួយក្រុមទៅកាន់ប្រទេសតួកគីនៅថ្ងៃទី៨ ខែមិថុនាខាងមុខដើម្បីពិភាក្សាអំពីលទ្ធភាពបង្កើតច្រករបៀងសមុទ្រសម្រាប់ការនាំចេញកសិផលរបស់ប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

រដ្ឋមន្ត្រីការបរទេសតួកគី លោក Mevlut Cavusoglu ថ្លែងសុន្ទរកថាក្នុងអំឡុងពេលនៃសន្និសីទសារព័ត៌មានមួយនៅទីក្រុងអ៊ីស្ដង់ប៊ុល ប្រទេសតួកគី ថ្ងៃទី ២៧ ខែឧសភា ឆ្នាំ២០២២។ (REUTERS)

ទីភ្នាក់ងារព័ត៌មាន Interfax របស់រុស្ស៊ីបានដកស្រង់សម្ដីរបស់មេដឹកនាំនៃតំបន់ផ្ដាច់ខ្លួន Donetsk ដែលគាំទ្រដោយរុស្ស៊ីនៅក្នុងប្រទេសអ៊ុយក្រែននៅថ្ងៃអង្គារថា កប៉ាល់ដឹកទំនិញមួយគ្រឿងបានចាកចេញពីកំពង់ផែទីក្រុង Mariupol នៃប្រទេសអ៊ុយក្រែនជាលើកដំបូងបង្អស់ឆ្ពោះទៅកាន់ប្រទេសរុស្ស៊ី តាំងពីពេលដែលរុស្ស៊ីបានដណ្ដើមកាន់កាប់ទីក្រុងនេះមក។ នេះបើយោងតាមទីភ្នាក់ងារព័ត៌មាន Reuters។
ទាហានរុស្ស៊ីពីរនាក់ត្រូវបានកាត់ទោសនៅថ្ងៃអង្គារឱ្យជាប់ពន្ធនាគារជាង១១ឆ្នាំ បន្ទាប់ពីតុលាការអ៊ុយក្រែនបានរកឃើញថា ពួកគេមានកំហុសចំពោះការបាញ់គ្រាប់ផ្លោងលើតំបន់រស់នៅរបស់ជនស៊ីវិល។ សាលក្រមផ្ដន្ទាទោសនេះបានធ្វើឡើងក្នុងពេលមួយសប្ដាហ៍ក្រោយមក បន្ទាប់ពីតុលាការមួយនៅក្នុងរដ្ឋធានីកៀវ ប្រទេសអ៊ុយក្រែនបានកាត់ទោសទាហានរុស្ស៊ីអាយុ ២១ ឆ្នាំម្នាក់ឱ្យជាប់ពន្ធនាគារមួយជីវិតពីបទសម្លាប់ជនស៊ីវិលម្នាក់។ នេះបើយោងតាមទីភ្នាក់ងារព័ត៌មាន AFP។
ក្រសួងការពារជាតិរុស្ស៊ីបានបញ្ជាក់នៅថ្ងៃអង្គារថា កងទ័ពរុស្ស៊ីបានបាញ់ទម្លាក់យន្តហោះចម្បាំងSu-25 មួយគ្រឿងរបស់អ៊ុយក្រែននៅក្នុងតំបន់ Mykolaiv នៃប្រទេសអ៊ុយក្រែន និងបានទម្លាក់គ្រាប់បែកលើស្ថានីយរ៉ាដាមួយកន្លែងនិងឃ្លាំងគ្រាប់រំសេវពីរកន្លែងនៅភាគខាងកើតប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
លោក Oleksandr Stryuk អភិបាលក្រុង Sievierodonetsk នៃប្រទេសអ៊ុយក្រែន បាននិយាយនៅថ្ងៃអង្គារថា អ៊ុយក្រែននៅកាន់កាប់ទីក្រុង Sievierodonetsk នៅឡើយហើយកងទ័ពអ៊ុយក្រែនកំពុងប្រយុទ្ធនឹងកងទ័ពរុស្ស៊ីដែលរុលចូលមកយឺតៗ ប៉ុន្តែការជម្លៀសជនស៊ីវិលចេញនៅពេលនេះគឺមិនទាន់អាចទៅរួចនោះទេ។ នេះបើយោងតាមទីភ្នាក់ងារព័ត៌មាន Reuters។
លោក Serhiy Gaidai អភិបាលតំបន់ Luhansk នៃប្រទេសអ៊ុយក្រែនបានបញ្ជាក់ប្រាប់ទូរទស្សន៍រដ្ឋអ៊ុយក្រែននៅថ្ងៃអង្គារថា កងទ័ពរុស្ស៊ីកំពុងរុលទៅមុខយឺតៗឆ្ពោះទៅកាន់ផ្នែកកណ្ដាលនៃទីក្រុង Sievierodonetsk នៅក្នុងតំបន់ Luhansk ភាគខាងកើតប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

រថពាសដែករបស់កងកម្លាំងគាំទ្ររុស្ស៊ីបើកនៅតាមដងផ្លូវមួយក្នុងអំឡុងពេលនៃជម្លោះរវាងអ៊ុយក្រែន និងរុស្ស៊ីនៅក្នុងក្រុង Popasna ក្នុងតំបន់ Luhansk ប្រទេសអ៊ុយក្រែន ថ្ងៃទី ២៦ ខែឧសភា ឆ្នាំ២០២២។ (REUTERS)

ផ្នែកស៊ើបការណ៍សម្ងាត់យោធារបស់ចក្រភពអង់គ្លេសបានបញ្ជាក់នៅថ្ងៃអង្គារថា កងទ័ពរុស្ស៊ីបានរុលទៅមុខយឺតៗចូលទៅក្នុងតំបន់ Luhansk ប្រទេសអ៊ុយក្រែន និងបានបន្ថែមថា ការប្រមូលផ្ដុំទ័ពរបស់រុស្ស៊ីនៅក្នុងតំបន់តូចមួយបង្កើនហានិភ័យសម្រាប់អ្នកដទៃនៅតាមតំបន់ផ្សេងៗទៀត។ នេះបើយោងតាមទីភ្នាក់ងារព័ត៌មាន Reuters។
អធិការបតីអូទ្រីសលោក Karl Nehammer បាននិយាយនៅថ្ងៃអង្គារថា សហភាពអឺរ៉ុបនឹងមិនពិភាក្សាអំពីការហាមឃាត់ការនាំចូលឧស្ម័នពីរុស្ស៊ីជាផ្នែកមួយនៃការដាក់ទណ្ឌកម្មបន្ទាប់លើរុស្ស៊ីទាក់ទិននឹងសង្គ្រាមរបស់រុស្ស៊ីនៅអ៊ុយក្រែននោះទេ។ លោក Nehammer បានបញ្ជាក់ដូច្នេះថា៖ «ការហាមឃាត់ការនាំចូលឧស្ម័ននឹងមិនមែនជាប្រធានបទពិភាក្សានោះឡើយ។ [អធិការបតីអាល្លឺម៉ង់] លោក Olaf Scholz ក៏បានបញ្ជាក់យ៉ាងច្បាស់រួចហើយផងដែរអំពីរឿងនេះ»។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអេស្តូនីអ្នកស្រី Kaja Kallas បាននិយាយនៅថ្ងៃអង្គារនេះថា សហភាពអឺរ៉ុបគួរតែធ្វើបន្ថែមលើសពីនេះទៀតនិងពិភាក្សាអំពីកញ្ចប់ទណ្ឌកម្មលើកទី៧ដើម្បីដាក់លើរុស្ស៊ី ដែលក្នុងនោះរួមមានទាំងជំហាននៅក្នុងការហាមឃាត់ការនាំចូលឧស្ម័នផងដែរ ប៉ុន្តែអ្នកស្រីបានបញ្ជាក់បន្ថែមថា អ្នកស្រីមិនមានក្ដីសង្ឃឹមខ្ពស់ថារឿងនេះនឹងកើតឡើងនោះទេ។ នេះបើយោងតាមទីភ្នាក់ងារព័ត៌មាន Reuters។
លោក Ihor Zhovkva អនុប្រធានខុទ្ទកាល័យប្រធានាធិបតីអ៊ុយក្រែនបានបញ្ជាក់នៅក្នុងសុន្ទ រកថាមួយនៅក្នុងទីក្រុងម៉ាឌ្រីដ ប្រទេសអេស្ប៉ាញនៅថ្ងៃអង្គារថា ទណ្ឌកម្មថ្មីចុងក្រោយបង្អស់របស់សហភាពអឺរ៉ុបនេះ «មិនទាន់គ្រប់គ្រាន់» នោះទេ ហើយល្បឿននៃការដាក់ទណ្ឌ កម្មកន្លងមកលើរុស្ស៊ីមានភាពយឺតយ៉ាវ។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីឡេតូនីលោក Krisjanis Karins នៅថ្ងៃអង្គារបានសរសើរកិច្ចព្រមព្រៀងរបស់សហភាពអឺរ៉ុបនៅក្នុងការហាមឃាត់ភាគច្រើនបំផុតនូវការនាំចូលប្រេងឥន្ធនៈពីរុស្ស៊ី ដោយលោកបាននិយាយថា សហភាពអឺរ៉ុបបានឯកភាពគ្នាលើកញ្ចប់ទណ្ឌកម្មលើកទី ៦ នេះ ដើម្បីធ្វើឱ្យរដ្ឋាភិបាលរុស្ស៊ីខ្សោះថវិកានៅក្នុងការធ្វើសង្គ្រាមប្រឆាំងនឹងអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ ក្រុមបុគ្គលិកដើរកាត់អាងស្ដុកប្រេងមួយកន្លែងនៅស្ថានីយបូមប្រេង Kaleikino ក្នុងតំបន់Transneft Kama ក្បែរក្រុង Almetyevsk ប្រទេសរុស្ស៊ី ថ្ងៃទី ២៧ ខែមេសា ឆ្នាំ២០២២។

ប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Josep Borrell ដែលជាមន្ត្រីការទូតកំពូលរបស់សហភាពអឺរ៉ុប បាននិយាយនៅថ្ងៃអង្គារថា កិច្ចព្រមព្រៀងរបស់សហភាពអឺរ៉ុបនៅក្នុងការហាមឃាត់ភាគច្រើនបំផុតនូវការនាំចូលប្រេងឥន្ធនៈពីរុស្ស៊ីនឹងបង្ខំឱ្យរដ្ឋាភិបាលរុស្ស៊ីលក់ប្រេងឆៅក្នុងតម្លៃទាបទៅឱ្យប្រទេសផ្សេងៗ។ នៅពេលធ្វើដំណើរទៅដល់កន្លែងប្រជុំរបស់បណ្ដាមេដឹកនាំសហភាពអឺរ៉ុបនៅថ្ងៃទីពីរអំពីស្ថានភាពថ្មីៗនៃសង្គ្រាមរបស់រុស្ស៊ីលើអ៊ុយ ក្រែន លោក Borrell បានបញ្ជាក់ថា៖ «អឺរ៉ុបគឺជាអតិថិជនសំខាន់បំផុតរបស់រុស្ស៊ី។ គោលបំណងគឺធ្វើយ៉ាងណាឱ្យរុស្ស៊ីមានធនធានហិរញ្ញវត្ថុតិចជាងមុននៅក្នុងការផ្គត់ផ្គង់ដល់ធន ធានធ្វើសង្គ្រាមរបស់ខ្លួន»។ នេះបើយោងតាមទីភ្នាក់ងារព័ត៌មាន Reuters។
អ្នកនាំពាក្យគណៈកម្មការអឺរ៉ុបនៃសហភាពអឺរ៉ុបបាននិយាយនៅថ្ងៃអង្គារថា ទណ្ឌកម្មរបស់សហភាពអឺរ៉ុបនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ីតាមផ្លូវសមុទ្រនឹងធ្វើឡើងជាបណ្ដើរៗដោយរយៈពេល ៦ ខែសម្រាប់ប្រេងឆៅ និងរយៈពេល ៨ ខែសម្រាប់ប្រេងចម្រាញ់។ ពេលវេលានេះនឹងចាប់ផ្ដើមនៅពេលណាដែលទណ្ឌកម្មនេះត្រូវបានអនុម័តជាផ្លូវការ។ នេះបើយោងតាមទីភ្នាក់ងារព័ត៌មាន Reuters។
អ្នកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បាននិយាយនៅព្រឹកថ្ងៃអង្គារថា បណ្ដាមេដឹកនាំនៃប្រទេសជាសមាជិកសហភាពអឺរ៉ុបបានសម្រេចបានកិច្ចព្រមព្រៀងមួយ «ជាគោលការណ៍» នៅក្នុងការហាមឃាត់ការនាំចូលប្រេងឥន្ធនៈពីប្រទេសរុស្ស៊ី។ អ្នកស្រីបានប្រាប់អ្នកសារព័ត៌មានបន្ទាប់ពីកិច្ចប្រជុំរបស់សហភាពអឺរ៉ុបនៅក្នុងទីក្រុងព្រុចសែល ប្រទេសបែលហ្ស៊ិកនៅថ្ងៃដំបូងបានបញ្ចប់ទៅថា៖ «ខ្ញុំសប្បាយចិត្តខ្លាំងណាស់ដែលមេដឹកនាំនានាអាចឯកភាពគ្នាជាគោលការណ៍លើកញ្ចប់ទណ្ឌកម្មលើកទី ៦ [សម្រាប់ដាក់លើប្រទេសរុស្ស៊ី]»។ អ្នកស្រីបានបន្ថែមថា៖ «ឥឡូវនេះ ក្រុមប្រឹក្សា [អឺរ៉ុប] គួរតែអាចសម្រេចជាចុងក្រោយនូវការហាមឃាត់លើការនាំចូលប្រេងឥន្ធនៈទាំងអស់ស្ទើរតែ ៩០% នៅត្រឹមចុងឆ្នាំនេះ។ នេះគឺជាជំហានទៅមុខដ៏សំខាន់។ ទាក់ទិននឹងប្រេងឥន្ធនៈ ១០% ទៀត ដែលបញ្ជូនតាមបំពង់បង្ហូរប្រេង យើងនឹងងាកទៅផ្តោតលើបញ្ហានេះក្នុងពេលឆាប់ៗ»។ នេះបើយោងតាមទីភ្នាក់ងារព័ត៌មាន Reuters។

ព័ត៌មានផ្សេងទៀត

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃសៅរ៍ ទី ២៨ ខែឧសភា៖

ថ្ងៃអាទិត្យ ទី ២៩ ខែឧសភា៖

ថ្ងៃចន្ទ ទី ៣០ ខែឧសភា៖

ថ្ងៃ​អង្គារ ទី ៣១ ខែឧសភា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

ថ្ងៃអង្គារ ទី ៣១ ខែឧសភា៖