២២:២៧
១.៦.២០២២
ថ្ងៃពុធ ទី ១ ខែមិថុនា៖
- លោក Juergen Stock អគ្គលេខាធិការអង្គការប៉ូលិសអឺរ៉ុប Europol បានព្រមាននៅថ្ងៃពុធនេះថា សព្វាវុធជាច្រើនដែលកំពុងបញ្ជូនទៅឱ្យប្រទេសអ៊ុយក្រែននៅទីបំផុតនឹងធ្លាក់ក្នុងដៃរបស់ឧក្រិដ្ឋជននៅទ្វីបអឺរ៉ុបនិងកន្លែងផ្សេងៗទៀត។ លោកបានជំរុញប្រទេសនានាឱ្យចាប់ផ្ដើមត្រួតពិនិត្យឱ្យបានហ្មត់ចត់លើប្រព័ន្ធទិន្នន័យតាមដានអាវុធ។ លោកបានបញ្ជាក់ដូច្នេះថា៖ «បរិមាណដ៏ច្រើននៃសព្វាវុធនានាដែលកំពុងមាននៅក្នុងអំឡុងពេលសង្គ្រាមនាពេលបច្ចុប្បន្ននេះ នឹងបណ្ដាលឱ្យមានការរីកសាយភាយនូវសព្វាវុធខុសច្បាប់នៅក្នុងដំណាក់កាលក្រោយសង្គ្រាម»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយនៅថ្ងៃពុធនេះថា ប្រទេសអ៊ុយក្រែនបានផ្ដល់ការធានាថា ខ្លួននឹងមិនប្រើប្រព័ន្ធអាវុធរយៈចម្ងាយឆ្ងាយដែលសហរដ្ឋអាមេរិកបានផ្ដល់ឱ្យ ដើម្បីវាយប្រហារលើគោលដៅនានានៅលើទឹកដីរបស់ប្រទេសរុស្ស៊ីនោះឡើយ។ លោក Blinken ថ្លែងដូច្នេះ នៅពេលដែលគេសួរលោកអំពីវិធីកាត់បន្ថយជាអតិបរមានូវហានិភ័យនៃការធ្វើឱ្យភាពតានតឹងកាន់តែរីករាលដាលបន្ថែមទៀត ស្របពេលដែលសហរដ្ឋអាមេរិកផ្ដល់ប្រព័ន្ធអាវុធរយៈចម្ងាយឆ្ងាយនេះដល់ប្រទេសអ៊ុយក្រែន បន្ទាប់ពីលោកបានជួបពិភាក្សាជាមួយនឹងអគ្គលេខាធិការអង្គការអូតង់ (NATO) លោក Jens Stoltenberg នៅក្នុងរដ្ឋធានីវ៉ាស៊ីនតោនមក។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយនៅថ្ងៃពុធនេះថា ការផ្គត់ផ្គង់របស់សហរដ្ឋអាមេរិកនូវប្រព័ន្ធបាញ់រ៉ុក្កែតទំនើបដល់ប្រទេសអ៊ុយក្រែនបានបង្កឱ្យមានហានិភ័យនៃការទាញ «ប្រទេសទីបី» ឱ្យធ្លាក់ចូលទៅក្នុងសង្គ្រាមនៅអ៊ុយក្រែន។ លោក Lavrov បានថ្លែងដូច្នេះតបទៅនឹងសំណួរនៅក្នុងសន្និសីទសារព័ត៌មានមួយនៅក្នុងប្រទេសអារ៉ាប៊ីសាអូឌីតអំពីផែនការរបស់សហរដ្ឋអាមេរិកនៅក្នុងការផ្ដល់ប្រព័ន្ធរ៉ុក្កែតទំនើបឱ្យអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយនៅថ្ងៃពុធនេះថា រដ្ឋាភិបាលរុស្ស៊ីកំពុងប្រឈមនឹងការលំបាកនៅក្នុងការនាំចេញធញ្ញជាតិ ដោយសារតែការដាក់ទណ្ឌកម្មរបស់ក្រុមបស្ចិមប្រទេសលើកប៉ាល់ដឹកទំនិញរបស់ខ្លួន។ លោក Lavrov បានបញ្ជាក់នៅក្នុងអំឡុងពេលដំណើរទស្សនកិច្ចទៅកាន់ប្រទេសអារ៉ាប៊ីសាអូឌីតថា៖ «[រដ្ឋាភិបាលរុស្ស៊ី] ក៏មានបញ្ហាផងដែរជាមួយនឹងការនាំចេញធញ្ញជាតិរបស់ខ្លួន។ ...កប៉ាល់ដែលដឹកជញ្ជូនធញ្ញជាតិរបស់រុស្ស៊ីបានរងនូវទណ្ឌកម្ម [របស់ក្រុមបស្ចិមប្រទេស]»។ នេះបើយោងតាមទីភ្នាក់ងារព័ត៌មាន Reuters។
- លោក Mykhailo Podolyak ដែលជាទីប្រឹក្សាប្រធានាធិបតីអ៊ុយក្រែននិងជាអ្នកចរចាចម្បងរបស់អ៊ុយក្រែនក្នុងអំឡុងពេលចរចាសន្តិភាពជាមួយនឹងរុស្ស៊ីកាលពីលើកមុនៗ បានចោទប្រកាន់ទ្វីបអឺរ៉ុបនិងសហរដ្ឋអាមេរិកថាមាន «ការភ័យខ្លាច» រុស្ស៊ីដោយ «មិនសមហេតុផល»។ លោក Podolyak លើកឡើងដូច្នេះនៅក្នុងកិច្ចសម្ភាសន៍មួយដែលទីភ្នាក់ងារព័ត៌មាន Interfax Ukraine របស់ប្រទេសអ៊ុយក្រែនបានចេញផ្សាយនៅថ្ងៃពុធ។ នេះបើយោងតាមទីភ្នាក់ងារព័ត៌មាន Reuters។
- អគ្គលេខាធិការអង្គការសហប្រជាជាតិលោក Antonio Guterres បាននិយាយនៅថ្ងៃពុធថា លោកសង្ឃឹមថានឹងមានដំណោះស្រាយមួយដើម្បីកាត់បន្ថយផលប៉ះពាល់នៃសង្គ្រាមនៅអ៊ុយក្រែនលើការផ្គត់ផ្គង់ស្បៀងអាហារនៅលើពិភពលោក។ ដោយសាររុស្ស៊ីបានត្រួតត្រាឬក៏រាំងខ្ទប់កំពង់ផែទាំងអស់របស់ប្រទេសអ៊ុយក្រែននៅសមុទ្រខ្មៅ ការដឹកជញ្ជូនធញ្ញជាតិចេញពីប្រទេសអ៊ុយក្រែនបានជាប់គាំងតាំងពីពេលដែលរុស្ស៊ីបានឈ្លានពានអ៊ុយក្រែនមក។ ស្របពេលនោះដែរ រដ្ឋាភិបាលរុស្ស៊ីបានរិះគន់ថា ទណ្ឌកម្មរបស់ក្រុមបស្ចិមប្រទេសបានរារាំងដល់ការនាំចេញទាំងធញ្ញជាតិនិងជី។ នេះបើយោងតាមទីភ្នាក់ងារព័ត៌មាន Reuters។
- សម្ដេបប៉ាប Francis បានអំពាវនាវទៅកាន់អាជ្ញាធរនានានៅថ្ងៃពុធឱ្យបញ្ឈប់ការរាំងខ្ទប់លើការនាំចេញស្រូវសាឡីពីប្រទេសអ៊ុយក្រែន ដោយព្រះអង្គបានលើកឡើងថា ធញ្ញជាតិមិនអាចត្រូវបានប្រើជា «អាវុធនៃសង្គ្រាម» បានទេ។ ព្រះអង្គបានថ្លែងទៅកាន់មនុស្សរាប់ពាន់នាក់នៅទីលាន St. Peter's Square ថា ការរាំងខ្ទប់នេះគួរតែដកចេញ ដោយសារតែមនុស្សជាច្រើនលាននាក់ពឹងផ្អែកលើស្រូវសាឡីពីប្រទេសអ៊ុយ ក្រែន ជាពិសេសនៅប្រទេសក្រីក្របំផុតនៅលើពិភពលោក។
- អនុរដ្ឋមន្ត្រីការបរទេសរុស្ស៊ីលោក Sergei Ryabkov បាននិយាយថា រដ្ឋាភិបាលរុស្ស៊ីនឹងស្វែងរកវិធីដើម្បីផ្គត់ផ្គង់ធញ្ញជាតិនិងជីរបស់រុស្ស៊ីដល់ទីផ្សារនានា បើទោះបីជាមានការដាក់ទណ្ឌកម្មពីក្រុមបស្ចិមប្រទេសក៏ដោយ។ នេះបើយោងតាមទីភ្នាក់ងារព័ត៌ មាន Reuters ដែលយោងលើសេចក្ដីរាយការណ៍របស់ទីភ្នាក់ងារព័ត៌មាន RIA របស់រុស្ស៊ីនៅថ្ងៃពុធ។
- ក្រុមហ៊ុន Gazprom របស់រុស្ស៊ីបានបញ្ជាក់នៅថ្ងៃពុធថា ការនាំចេញឧស្ម័នរបស់ខ្លួនទៅកាន់បណ្ដាប្រទេសផ្សេងៗក្រៅពីអតីតសហភាពសូវៀតបានធ្លាក់ចុះជាងមួយភាគបួននៅរវាងខែមករានិងខែឧសភាបើធៀបនឹងរយៈពេលដូចគ្នានេះកាលពីមួយឆ្នាំកន្លងទៅ បន្ទាប់ពីខ្លួនបានបាត់បង់អតិថិជនមួយចំនួននៅអឺរ៉ុប។ នេះបើយោងតាមទីភ្នាក់ងារព័ត៌មាន AFP។
- រដ្ឋាភិបាលរុស្ស៊ីបានបញ្ជាក់នៅថ្ងៃពុធថា រុស្ស៊ីនឹងចាត់វិធានការដើម្បី«កាត់បន្ថយជាអតិបរមា»នូវផលប៉ះពាល់នៃការដាក់ទណ្ឌកម្មមួយផ្នែករបស់សហភាពអឺរ៉ុបលើវិស័យប្រេងឥន្ធនៈរបស់ខ្លួន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានថា៖ «ទណ្ឌកម្មនឹងមានផលប៉ះពាល់អវិជ្ជមានដល់ទ្វីបអឺរ៉ុប រុស្ស៊ីនិងទីផ្សារថាមពលនៅលើសាកលលោកទាំងមូល»។ នេះបើយោងតាមទីភ្នាក់ងារព័ត៌ មាន AFP។
- លោក Oleksandr Stryuk អភិបាលក្រុង Sievierodonetsk នៃប្រទេសអ៊ុយក្រែនបានប្រាប់ទីភ្នាក់ងារព័ត៌មាន Reuters នៅក្នុងកិច្ចសម្ភាសន៍មួយតាមទូរស័ព្ទនៅថ្ងៃពុធថា កងទ័ពអ៊ុយក្រែនកំពុងនៅកាន់កាប់ទីក្រុង Sievierodonetsk តែ២០%ប៉ុណ្ណោះ ប៉ុន្តែនៅមានក្ដីសង្ឃឹមថានឹងអាចរារាំងកងទ័ពរុស្ស៊ីមិនឱ្យត្រួតត្រាទីក្រុងនេះបានទាំង ស្រុង។ នេះបើយោងតាមទីភ្នាក់ងារព័ត៌មាន Reuters។
- លោក Serhiy Gaidai អភិបាលតំបន់ Luhansk នៃប្រទេសអ៊ុយក្រែន បាននិយាយនៅថ្ងៃពុធថា ឥឡូវនេះកងទ័ពរុស្ស៊ីបានត្រួតត្រាទីក្រុង Sievierodonetsk ដែលជាទីក្រុងយុទ្ធសាស្ត្រដ៏សំខាន់មួយនៅភាគខាងកើតប្រទេសអ៊ុយក្រែនប្រហែល៧០% ហើយ។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃពុធថា កងទ័ពរុស្ស៊ីបានរុលកាន់តែជិតចូលទៅផ្នែកកណ្ដាលនៃទីក្រុង Sievierodonetsk របស់ប្រទេសអ៊ុយ ក្រែន។ ក្រសួងនេះបានលើកឡើងនៅក្នុងបច្ចុប្បន្នភាពព័ត៌មានស៊ើបការណ៍សម្ងាត់របស់ខ្លួនដែលបង្ហោះនៅលើ Twitter ថា៖ «ឥឡូវនេះកងទ័ពរុស្ស៊ីដែលក្នុងនោះរួមមានទាំងយុទ្ធជនមកពីតំបន់ Chechen ផងដែរ ទំនងជាបានត្រួតត្រាក្រុងនេះជាងពាក់កណ្ដាលហើយ»។ នេះបើយោងតាមទីភ្នាក់ងារព័ត៌មាន Reuters។
- អធិការបតីអាល្លឺម៉ង់លោក Olaf Scholz បាននិយាយនៅថ្ងៃពុធថា ប្រទេសអាល្លឺម៉ង់នឹងផ្គត់ផ្គង់ប្រព័ន្ធការពារបាញ់ពីដីទៅអាកាសរយៈចម្ងាយមធ្យម IRIS-T ដល់ប្រទេសអ៊ុយក្រែន។ លោកលើកឡើងដូច្នេះ បន្ទាប់ពីមានការអង្វរស្នើសុំពីរដ្ឋាភិបាលអ៊ុយ ក្រែនក៏ដូចជាពីគណបក្សប្រឆាំងនៅអាល្លឺម៉ង់ឱ្យបង្កើនការបញ្ជូនសព្វាវុធធុនធ្ងន់ទៅឱ្យប្រទេសអ៊ុយក្រែន។ លោក Scholz បានប្រាប់សមាជិកសភានៅក្នុងសភាអាល្លឺម៉ង់ថា៖ «កាលពីពេលថ្មីៗនេះ រដ្ឋាភិបាលអាល្លឺម៉ង់បានសម្រេចថាយើងនឹងបញ្ជូនប្រព័ន្ធការពារ IRIS-T ដែលជាប្រព័ន្ធការពារដែនអាកាសដ៏ទំនើបបំផុតដែលប្រទេសអាល្លឺ ម៉ង់មាន [ទៅឱ្យប្រទេសអ៊ុយក្រែន]»។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានចោទប្រកាន់រដ្ឋាភិបាលសហរដ្ឋអាមេរិកនៅថ្ងៃពុធថាបាន «បន្ថែមប្រេងពីលើភ្លើង» តាមរយៈការមានគម្រោងផ្គត់ផ្គង់ប្រព័ន្ធមីស៊ីលទំនើបដល់ប្រទេសអ៊ុយក្រែន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌ មានថា៖ «យើងជឿថា សហរដ្ឋអាមេរិកកំពុងបន្ថែមប្រេងពីលើភ្លើងដោយចេតនា»។ លោកបានបន្ថែមថា «ការផ្គត់ផ្គង់ដូចនេះ» មិនបានលើកទឹកចិត្តរដ្ឋាភិបាលអ៊ុយក្រែនឱ្យបន្តឡើងវិញនូវការចរចាសន្តិភាពនោះទេ។ នេះបើយោងតាមទីភ្នាក់ងារព័ត៌មាន AFP។
- រដ្ឋាភិបាលរុស្ស៊ីបានបញ្ជាក់នៅថ្ងៃពុធនេះថា ការសម្រេចរបស់សហរដ្ឋអាមេរិកនៅក្នុងការផ្គត់ផ្គង់ប្រព័ន្ធរ៉ុក្កែតទំនើបនិងសព្វាវុធដល់ប្រទេសអ៊ុយក្រែនគឺជារឿងអវិជ្ជមានហួសហេតុនិងអាចបង្កើនហានិភ័យនៃការប្រឈមមុខដាក់គ្នាដោយផ្ទាល់។ អនុរដ្ឋ មន្ត្រីការបរទេសរុស្ស៊ីលោក Sergei Ryabkov បានបញ្ជាក់ប្រាប់ទីភ្នាក់ងារព័ត៌មាន RIA Novosti របស់រុស្ស៊ីថា រដ្ឋាភិបាលរុស្ស៊ីយល់ឃើញថាជំនួយយោធារបស់សហរដ្ឋអាមេរិកឱ្យប្រទេសអ៊ុយក្រែនគឺជារឿង «អវិជ្ជមានហួសហេតុ»។ នេះបើយោងតាមទីភ្នាក់ងារព័ត៌មាន Reuters។
- មន្ត្រីជាន់ខ្ពស់មួយរូបរបស់រដ្ឋាភិបាលសហរដ្ឋអាមេរិកបាននិយាយកាលពីថ្ងៃអង្គារថា សហរដ្ឋអាមេរិកនឹងផ្ដល់ឱ្យប្រទេសអ៊ុយក្រែននូវប្រព័ន្ធបាញ់រ៉ុក្កែតចល័ត M142 High Mobility Artillery Rocket System (HIMARS) ដើម្បីបំពាក់បំប៉នសមត្ថភាពរបស់អ៊ុយ ក្រែននៅក្នុងការប្រយុទ្ធនៅសមរភូមិតតាំងនឹងការឈ្លានពានរបស់រុស្ស៊ី។ មន្ត្រីរូបនេះបានប្រាប់អ្នកសារព័ត៌មានថា៖ «អ៊ុយក្រែននឹងប្រើប្រព័ន្ធទាំងនេះដើម្បីរុញច្រានការរុលចូលមករបស់រុស្ស៊ីលើទឹកដីរបស់អ៊ុយក្រែន ប៉ុន្តែនឹងមិនប្រើប្រព័ន្ធទាំងនេះដើម្បីវាយប្រហារសំដៅលើគោលដៅនានានៅលើទឹកដីរុស្ស៊ីនោះទេ»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីសហរដ្ឋអាមេរិកលោក Joe Biden បាននិយាយថា សហរដ្ឋអាមេរិកនឹងផ្ដល់ឱ្យប្រទេសអ៊ុយក្រែននូវប្រព័ន្ធរ៉ុក្កែតទំនើបនិងសព្វាវុធបន្ថែមទៀត ដើម្បីឱ្យអ៊ុយ ក្រែនអាច «វាយប្រហារចំគោលដៅសំខាន់ៗបានប្រសើរជាងមុននៅសមរភូមិ»។ នៅក្នុងអត្ថបទបញ្ចេញមតិមួយដែលចុះផ្សាយនៅក្នុងសារព័ត៌មាន New York Times កាលពីថ្ងៃអង្គារ លោក Biden បានបញ្ជាក់ថា៖ «យើងបានចាត់វិធានការយ៉ាងលឿននៅក្នុងការបញ្ជូនឱ្យប្រទេសអ៊ុយក្រែននូវសព្វាវុធនិងគ្រាប់រំសេវក្នុងបរិមាណច្រើនគួរសម ដើម្បីឱ្យអ៊ុយក្រែនអាចប្រយុទ្ធនៅសមរភូមិ និងអាចមានជំហររឹងមាំបំផុតនៅឯតុចរចា»។ នេះបើយោងតាមទីភ្នាក់ងារព័ត៌មាន Reuters។
២១:៣៦
២.៦.២០២២
ថ្ងៃព្រហស្បតិ៍ ទី ២ ខែមិថុនា៖
- មន្ត្រីការទូតមួយរូបបានបញ្ជាក់ថា មន្ត្រីការទូតសហភាពអឺរ៉ុបបានផ្ដល់ការអនុម័តចុងក្រោយនៅថ្ងៃព្រហស្បតិ៍នេះលើទណ្ឌកម្មជុំទី ៦ របស់សហភាពអឺរ៉ុបដើម្បីដាក់លើប្រទេសរុស្ស៊ីទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ ទណ្ឌកម្មលើកនេះរួមមានការហាមឃាត់មួយផ្នែកលើការនាំចូលប្រេងឥន្ធនៈពីប្រទេសរុស្ស៊ីហើយនឹងការដកធនាគារ Sberbank ដែលជាធនាគារកំពូលរបស់រុស្ស៊ីចេញពីប្រព័ន្ធទូរគមនាគមន៍ហិរញ្ញវត្ថុអន្តរធនាគារពិភពលោក (SWIFT)។ នេះបើយោងតាមទីភ្នាក់ងារព័ត៌មាន Reuters។
- មន្ត្រីការទូតនានាបាននិយាយថា បណ្ដាឯកអគ្គរដ្ឋទូតប្រចាំសហភាពអឺរ៉ុបនៅថ្ងៃព្រហស្បតិ៍នេះ បានដកឈ្មោះមេដឹកនាំវិហារគ្រិស្តសាសនានិកាយអ័រតូដុករបស់រុស្ស៊ីចេញពីបញ្ជីខ្មៅដែលបានស្នើឡើង បន្ទាប់ពីមានការប្រឆាំងពីប្រទេសហុងគ្រី ដែលការធ្វើដូច្នេះអនុញ្ញាតឱ្យពួកគេអាចឯកភាពគ្នាលើទណ្ឌកម្មជុំថ្មី [សម្រាប់ដាក់លើប្រទេសរុស្ស៊ីទាក់ទិននឹងសង្គ្រាមនៅអ៊ុយក្រែន] បាន។ នេះបើយោងតាមទីភ្នាក់ងារព័ត៌មាន AFP។
- ប្រធានសភាអឺរ៉ុបអ្នកស្រី Roberta Metsola បាននិយាយនៅថ្ងៃព្រហស្បតិ៍នេះថា អ្នកបញ្ចុះបញ្ចូលគោលនយោបាយរុស្ស៊ីត្រូវបានរារាំងពីសភាអឺរ៉ុប ដោយអ្នកស្រីបានបន្ថែមថា អឺរ៉ុបត្រូវតែការពារខ្លួនពីឥទ្ធិពលនិងការឃោសនារបស់រដ្ឋាភិបាលរុស្ស៊ីទាក់ទិននឹងសង្គ្រាមនៅអ៊ុយក្រែន។ អ្នកស្រី Metsola បានបញ្ជាក់នៅលើ Twitter ដូច្នេះថា៖ «អ្នកតំណាងរបស់ក្រុមហ៊ុនរុស្ស៊ីមិនត្រូវបានអនុញ្ញាតឱ្យចូល [ក្នុងសភាអឺរ៉ុប] នោះទេ [ដោយការសម្រេចនេះ] ចូលជាធរមានភ្លាមៗ»។ នេះបើយោងតាមទីភ្នាក់ងារព័ត៌មាន Reuters។
- មនុស្សជាង ១ លាន ៦ សែននាក់មកពីប្រទេសអ៊ុយក្រែននិងសាធារណរដ្ឋផ្ដាច់ខ្លួននានានៅក្នុងតំបន់ Donbas នៃប្រទេសអ៊ុយក្រែនបានឆ្លងចូលទឹកដីប្រទេសរុស្ស៊ីតាំងពីពេលដែលរុស្ស៊ីបានចាប់ផ្ដើមឈ្លានពានអ៊ុយក្រែនមក។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន TASS របស់រុស្ស៊ីនៅថ្ងៃព្រហស្បតិ៍នេះ ដែលបានយោងលើប្រភពមកពីផ្នែកអនុវត្តច្បាប់។ ប្រភពនោះបានលើកឡើងដូច្នេះថា៖ «គិតត្រឹមព្រឹកថ្ងៃពុធ មនុស្សជាង ១ លាន ៦ សែននាក់ ដែលក្នុងនោះរួមមានទាំងកុមារជិត ២៦៣.០០០ នាក់ផងដែរ បានឆ្លងព្រំដែន [ពីអ៊ុយក្រែនចូលទឹកដីរុស្ស៊ី] »។ នេះបើយោងតាមបណ្ដាញព័ត៌មាន CNN។
- លោកនាយឧត្តមសេនីយ៍ Oleksiy Gromov នៃប្រទេសអ៊ុយក្រែន បាននិយាយនៅថ្ងៃព្រហស្បតិ៍នេះថា កងទ័ពរុស្ស៊ីកំពុងព្យាយាមវាយប្រហារលើភូមិ Berestove នៅភាគខាងកើតប្រទេសអ៊ុយក្រែនដែលស្ថិតនៅលើផ្លូវចម្បងមួយភ្ជាប់ទីក្រុង Lysychansk នៃតំបន់ Luhansk ទៅនឹងផ្នែកផ្សេងទៀតនៃប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលសេណេហ្គាល់បានបញ្ជាក់នៅថ្ងៃព្រហស្បតិ៍ថា ប្រធានាធិបតីសេណេហ្គាល់លោក Macky Sallដែលជាប្រធានសហភាពអាហ្វ្រិក នឹងនិយាយជាមួយនឹងប្រធានាធិបតីរុស្ស៊ីលោកVladimir Putin នៅក្នុងទីក្រុង Sochi នៅភាគនិរតីប្រទេសរុស្ស៊ីនៅថ្ងៃសុក្រ។ ខុទ្ទកាល័យរបស់លោក Sall បានលើកឡើងថា ដំណើរទស្សនកិច្ចរបស់លោក Sall មានបំណង «បញ្ឈប់ការរាំងខ្ទប់ដល់ធញ្ញជាតិនិងជី ដែលការរាំងខ្ទប់នេះប៉ះពាល់ ជាពិសេសដល់បណ្ដាប្រទេសនៅទ្វីបអាហ្វ្រិក» និងបន្ធូរបន្ថយស្ថានការណ៍តានតឹងនៃសង្គ្រាមនៅអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
- អ្នកនាំពាក្យក្រសួងការបរទេសអ៊ុយក្រែនលោកOleg Nikolenko និយាយនៅថ្ងៃព្រហស្បតិ៍ថា ប្រទេសអ៊ុយក្រែនកំពុងធ្វើការជាមួយនឹងដៃគូអន្តរជាតិនានា នៅក្នុងការបង្កើតបេសកកម្មដែលគាំទ្រដោយអង្គការសហប្រជាជាតិដើម្បីស្ដារឡើងវិញនូវផ្លូវដឹកជញ្ជូនទំនិញនៅសមុទ្រខ្មៅនិងនាំចេញកសិផលរបស់អ៊ុយក្រែន។ លោក Nikolenko បានសរសេរនៅលើ Facebook ថា៖ «យើងអំពាវនាវឱ្យប្រទេសនានាដែលសន្តិសុខស្បៀងអាហាររបស់ខ្លួនអាចរងគ្រោះជាងគេ ដោយសារភាពគឃ្លើនរបស់រុស្ស៊ីលើអ៊ុយក្រែន ប្រើប្រាស់ទំនាក់ទំនងរបស់ពួកគេជាមួយនឹងរដ្ឋាភិបាលរុស្ស៊ីដើម្បីបង្ខំឱ្យរុស្ស៊ីបញ្ឈប់ការរាំងខ្ទប់កំពង់ផែសមុទ្ររបស់អ៊ុយក្រែននិងបញ្ចប់សង្គ្រាម»។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍នេះថា ខ្លួនត្រៀមខ្លួនរួចរាល់នៅក្នុងការដោះស្រាយជម្លោះណាមួយដោយផ្ទាល់ជាមួយនឹងម្ចាស់បំណុលរបស់ខ្លួន បន្ទាប់ពីខ្លួនមិនបានសងបំណុលបរទេសរបស់ខ្លួន ដោយសារតែការដាក់ទណ្ឌកម្មរបស់ក្រុមបស្ចិមប្រទេស ទាក់ទិននឹងរឿងសង្គ្រាមនៅអ៊ុយក្រែន។ រដ្ឋាភិបាលរុស្ស៊ីកំពុងប្រឈមនឹងហានិភ័យនៃការមិនមានលទ្ធភាពសងបំណុលបរទេសរបស់ខ្លួន នៅក្នុងរយៈពេលជាងមួយសតវត្សកន្លងមកនេះ។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីសេដ្ឋកិច្ចអាល្លឺម៉ង់លោក Robert Habeck បាននិយាយនៅថ្ងៃព្រហស្បតិ៍ថា ប្រទេសអាល្លឺម៉ង់ត្រូវតែធ្វើការឱ្យបានខ្លាំងក្លាជាងមុន ដើម្បីកាត់បន្ថយការពឹងផ្អែកផ្នែកថាមពលរបស់ខ្លួនលើប្រទេសរុស្ស៊ី ប៉ុន្តែទណ្ឌកម្មរបស់ក្រុមបស្ចិមប្រទេសដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែននៅតែកំពុងមានផលប៉ះពាល់ធ្ងន់ធ្ងរលើធនធានធ្វើសង្គ្រាមរបស់រុស្ស៊ី។ លោក Habeck បានបញ្ជាក់ថា៖ «សេដ្ឋកិច្ចរុស្ស៊ីកំពុងដួលរលំ»។ នេះបើយោងតាមទីភ្នាក់ងារព័ត៌មាន Reuters។
- ក្រសួងការបរទេសរុស្ស៊ីបានបញ្ជាក់នៅថ្ងៃព្រហស្បតិ៍ថា ការសម្រេចរបស់សហភាពអឺរ៉ុបនៅក្នុងការហាមឃាត់មួយផ្នែកជាដំណាក់កាលនូវការនាំចូលប្រេងឥន្ធនៈពីប្រទេសរុស្ស៊ីទំនងជាបានធ្វើឱ្យមានអស្ថិរភាពដល់ទីផ្សារថាមពលសាកលលោក។ ក្រសួងនេះបានលើកឡើងនៅក្នុងសេចក្ដីថ្លែងការណ៍មួយថា៖ «សហភាពអឺរ៉ុបនិងសហរដ្ឋអាមេរិកដែលជាអ្នកទំនុកបម្រុងផ្នែកនយោបាយរបស់ខ្លួនគឺជាអ្នកទទួលខុសត្រូវទាំងស្រុងចំពោះហានិភ័យនៃការធ្វើឱ្យបញ្ហាស្បៀងអាហារនិងថាមពលនៅលើពិភពលោកកាន់តែរីកធំឡើង ដែលបញ្ហានេះកើតឡើងដោយសារតែវិធានការខុសច្បាប់របស់សហភាពអឺរ៉ុប»។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍ថា ផែនការរបស់សហរដ្ឋអាមេរិកនៅក្នុងការលក់ឱ្យប្រទេសអ៊ុយក្រែននូវយន្តហោះដ្រូន MQ-1C Gray Eagle ចំនួន ៤ គ្រឿងដែលអាចបំពាក់មីស៊ីល Hellfire ដើម្បីប្រើក្នុងសមរភូមិប្រយុទ្ធនឹងរុស្ស៊ី នឹងមិនធ្វើឱ្យមានការប្រែប្រួលដល់កម្រិតថេរនៃអ្វីដែលរុស្ស៊ីហៅថាជាប្រតិបត្តិការយោធាពិសេសរបស់ខ្លួននោះទេ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានតាមវីដេអូអនឡាញថា៖ «ការបញ្ជូនសព្វាវុធ [របស់បស្ចិមប្រទេស] ចូលទៅអ៊ុយក្រែនមិនធ្វើឱ្យមានការប្រែប្រួលដល់កម្រិតថេរទាំងអស់នៃប្រតិបត្តិការពិសេស [របស់រុស្ស៊ី] នោះទេ។ គោលបំណងរបស់ប្រតិបត្តិការពិសេសនេះនឹងសម្រេចបាន ប៉ុន្តែករណីនេះនឹងធ្វើឱ្យអ៊ុយក្រែនកាន់តែរងភាពឈឺចាប់...»។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិស្លូវ៉ាគីបានបញ្ជាក់នៅថ្ងៃព្រហស្បតិ៍ថា ប្រទេសស្លូវ៉ាគីនឹងបញ្ជូនកាំភ្លើងធំធុនធ្ងន់ Zuzana 2 ដែលចល័តដោយខ្លួនឯងចំនួន ៨ គ្រឿងទៅឱ្យប្រទេសអ៊ុយក្រែននៅក្រោមកិច្ចព្រមព្រៀងពាណិជ្ជកម្មមួយ។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិនិងក្រសួងហិរញ្ញវត្ថុស៊ុយអែតបានបញ្ជាក់នៅថ្ងៃព្រហស្បតិ៍ថា ប្រទេសស៊ុយអែតនឹងផ្ដល់ឱ្យប្រទេសអ៊ុយក្រែននូវជំនួយសេដ្ឋកិច្ចនិងសព្វាវុធបន្ថែមទៀត។ រដ្ឋមន្ត្រីហិរញ្ញវត្ថុស៊ុយអែតលោក Mikael Damberg និងរដ្ឋមន្ត្រីការពារជាតិស៊ុយអែតលោក Peter Hultqvist បានបញ្ជាក់នៅក្នុងសន្នសីទសារព័ត៌មានមួយថា សព្វាវុធដែលនឹងបញ្ជូនឱ្យអ៊ុយក្រែន រួមមានផងដែរនូវមីស៊ីលបាញ់នាវានិងអាវុធបាញ់រថក្រោះជាច្រើនទៀត។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវនៅថ្ងៃព្រហស្បតិ៍ឱ្យក្រុមបស្ចិមប្រទេសបង្កើនការផ្គត់ផ្គង់សព្វាវុធដល់ប្រទេសអ៊ុយក្រែន ដើម្បីជំរុញសង្គ្រាមរ៉ាំរ៉ៃរបស់អ៊ុយក្រែនជាមួយនឹងរុស្ស៊ីឱ្យឈានទៅដល់ «ចំណុចប្រែប្រួល» ដែលនឹងអនុញ្ញាតឱ្យអ៊ុយ ក្រែនអាចឈ្នះសង្គ្រាមនេះ។ លោក Zelenskyy បានថ្លែងតាមវីដេអូអនឡាញទៅកាន់វេទិកាក្រុងប្រាទីស្លាវ៉ាឆ្នាំ ២០២២ របស់អង្គការ GLOBSEC នៅក្នុងរដ្ឋធានីប្រាទីស្លាវ៉ា ប្រទេសស្លូវ៉ាគីថា ការខ្វែងគំនិតគ្នានៅអឺរ៉ុបបានបង្កើតឱកាសសម្រាប់ប្រទេសរុស្ស៊ីនៅក្នុងការកេងប្រយោជន៍។ ប៉ុន្តែលោក Zelenskyy បានបន្ថែមថា រដ្ឋាភិបាលអ៊ុយក្រែនដឹងគុណចំពោះជំនួយដែលក្រុមបស្ចិមប្រទេសផ្ដល់ជូនអ៊ុយក្រែនក្នុងពេលកន្លងមក។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃព្រហស្បតិ៍ថា កងទ័ពរុស្ស៊ីត្រួតត្រាប្រទេសអ៊ុយក្រែនប្រហែលមួយភាគប្រាំ ដែលក្នុងនោះរួមមានទាំងឧបទ្វីប Crimea និងដែនដីនៅភាគខាងកើត ដែលក្រុមផ្ដាច់ខ្លួនគាំទ្រដោយរុស្ស៊ីកាន់កាប់តាំងពីឆ្នាំ ២០១៤ មកផងដែរ។ លោក Zelenskyy បានបញ្ជាក់នៅក្នុងអំឡុងពេលថ្លែងសុន្ទរកថាទៅកាន់សមាជិកសភានៃប្រទេសលុចសំបួថា៖ «ថ្ងៃនេះ ទឹកដីអ៊ុយក្រែនប្រហែល ២០% ស្ថិតក្រោមការគ្រប់គ្រងរបស់ពួកឈ្លានពានត្រួតត្រា»។ នេះបើយោងតាមទីភ្នាក់ងារព័ត៌មាន AFP។
- លោក Pavlo Kyrylenko អភិបាលតំបន់ Donetsk បាននិយាយនៅថ្ងៃព្រហស្បតិ៍ថា កងទ័ពរុស្ស៊ីនៅភាគខាងកើតប្រទេសអ៊ុយក្រែនកំពុងប៉ុនប៉ងរុលចូលទៅភាគខាងត្បូងសំដៅឆ្ពោះទៅទីក្រុង Kramatorsk និងទីក្រុង Sloviansk ដែលជាទីក្រុងសំខាន់ៗដែលអ៊ុយក្រែនកំពុងកាន់កាប់។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិរុស្ស៊ីបានបញ្ជាក់នៅថ្ងៃព្រហស្បតិ៍ថា កងទ័ពរុស្ស៊ីបានបាញ់ទម្លាក់យន្តហោះចម្បាំង Su-25 មួយគ្រឿងរបស់ប្រទេសអ៊ុយក្រែននៅក្នុងតំបន់ Mykolaiv។ ក្រសួងនេះក៏បានលើកឡើងនៅក្នុងសេចក្ដីជូនដំណឹងមួយផងដែរថា កងទ័ពរុស្ស៊ីបានវាយប្រហារចំទីបញ្ជាការរបស់កងទ័ពអ៊ុយក្រែននៅជិតទីក្រុង Kharkiv។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃព្រហស្បតិ៍ថា រុស្ស៊ីបានដណ្ដើមកាន់ កាប់ផ្នែកភាគច្រើនបំផុតនៃទីក្រុង Sievierodonetsk ដែលជាទីក្រុងឧស្សាហកម្មរបស់ប្រ ទេសអ៊ុយក្រែន។ ក្រសួងនេះបានបន្ថែមថា អ៊ុយក្រែនទំនងជានៅកាន់កាប់តំបន់ខ្សែទន្លេក្នុងតំបន់ឆ្លងកាត់រវាងទីក្រុង Sievierodonetsk និងក្រុង Lysychansk ហើយនឹងទីក្រុង Lyman។ នេះបើយោងតាមទីភ្នាក់ងារព័ត៌មាន Reuters។
២២:០១
៣.៦.២០២២
ថ្ងៃសុក្រ ទី ៣ ខែមិថុនា៖
- មន្ត្រីយោធាកំពូលរបស់អ៊ុយក្រែន និយាយនៅថ្ងៃសុក្រថាកងកម្លាំងរុស្សីកំពុងកសាងវិធីសាស្ត្រការពារខ្លួនជាច្រើនជាន់នៅក្នុងតំបន់ប៉ែកខាងត្បូងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មានអាមេរិកាំង Associated Press។ ពេលនិយាយតាមបណ្តាញវីដេអូក្នុងវេទិកា Globsec ក្នុងរដ្ឋធានីប្រាទីស្លាវ៉ានៃសាធារណរដ្ឋស្លូវ៉ាគី រដ្ឋមន្ត្រីការពារជាតិអ៊ុយក្រែនលោក Oleksiy Reznikov បានថ្លែងថាកងកម្លាំងរុស្សីបានឈប់រុលទៅមុខក្នុងតំបន់ Kherson ហើយ ហើយកំពុងផ្តោតទៅលើការពង្រឹងនៅទីតាំងដែលពួកគេកំពុងឈរជើងវិញ។ រដ្ឋមន្ត្រីការពារជាតិអ៊ុយក្រែនរូបនេះ បានអំពាវនាវឲ្យមានការផ្តល់អាវុធបន្ថែមទៀតដល់អ៊ុយក្រែន ដោយនិយាយថា ជំនួយយោធាក្នុងកម្រិតបច្ចុប្បន្ននេះបានត្រឹមតែអនុញ្ញាតឲ្យអ៊ុយក្រែនទប់ការរុលទៅមុខរបស់កម្លាំងរុស្សីប៉ុណ្ណោះ តែអ៊ុយក្រែនត្រូវការជំនួយថែមទៀតដើម្បីធ្វើឲ្យរដ្ឋាភិបាលរុស្សីវិលទៅរកការចរចាវិញ។
- មន្ត្រីអង្គការសហប្រជាជាតិ ព្រមាននៅថ្ងៃសុក្រថា សង្គ្រាមដែលអូសបន្លាយពេលយូរក្នុងប្រទេសអ៊ុយក្រែនអាចបង្កវិបត្តិអត់ឃ្លាននៅក្នុងប្រទេសនោះនិងនៅជុំវិញពិភពលោក។ នេះបើផ្អែកតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មានReuters។ អ្នកសម្របសម្រួលរបស់អង្គការសហប្រជាជាតិទទួលបន្ទុកវិបត្តិនៅអ៊ុយក្រែនលោក Amin Awad និយាយថា ប្រជាជនយ៉ាងតិច ១៥,៧ លាននាក់នៅអ៊ុយក្រែនកំពុងត្រូវការជំនួយនិងការការពារបន្ទាន់ ហើយថាចំនួននេះកើនឡើងជារៀងរាល់ថ្ងៃ។
- សហភាពអឺរ៉ុបកាលពីថ្ងៃសុក្រ បានដាក់ឈ្មោះមេបញ្ជាការយោធារុស្សីក្នុងបញ្ជីខ្មៅ ដោយសារពួកគេបានដឹកនាំកងកម្លាំងដែលពាក់ព័ន្ធនឹងអំពើឃោរឃៅនៅអ៊ុយក្រែន។ នេះបើយោងតាម Reuters។ សហភាពអឺរ៉ុប បានហៅមេបញ្ជាការយោធារុស្សីទាំងនេះថាជា «អ្នកកាប់សម្លាប់មនុស្ស» នៅក្រុង Bucha និងក្រុង Mariupol។ បញ្ជីទណ្ឌកម្មសហភាពអឺរ៉ុបចុងក្រោយបង្អស់ រួមបញ្ចូលទាំងនាង Alina Kabaeva ដែលសហភាពអឺរ៉ុបពណ៌នាថាមាន «ទំនាក់ទំនងជិតស្និទ្ធ » ជាមួយប្រធានាធិបតីរុស្សី លោក Vladimir Putin ទោះបីជាលោកពូទីនបដិសេធថា ពួកគេគ្មានទំនាក់ទំនងស្នេហាជាមួយគ្នាក៏ដោយ។ សហភាពអឺរ៉ុប បានបញ្ចេញឈ្មោះបុគ្គល ៦៥ នាក់ទៀត ដែលស្ថិតក្រោមការដាក់ទណ្ឌកម្មលើកចុងក្រោយបង្អស់ ដោយសារការឈ្លានពានរបស់រុស្សីលើអ៊ុយក្រែន។
- ប្រធានាធិបតីសេណេហ្គាល់ លោក Macky Sall ដែលមានតួនាទីជាប្រធានសហភាពអាហ្វ្រិកផងនោះ បាននិយាយកាលពីថ្ងៃសុក្រថា ប្រធានាធិបតីរុស្សី លោក Vladimir Putin បានសម្តែងឆន្ទៈសម្រួលការនាំចេញទំនិញជាគ្រាប់ធញ្ញជាតិ (cereals) របស់អ៊ុយក្រែន ក្នុងអំឡុងពេលជួបប្រជុំគ្នានៅទីក្រុងSochi ប្រទេសរុស្សីកាលពីថ្ងៃសុក្រ។ នេះបើយោងតាមទីភ្នាក់ងារព័ត៌មានReuters។ លោក Sall បានបន្ថែមតាមសារបង្ហោះលើបណ្តាញ Twitter ថា លោកពូទីនក៏បានប្រាប់លោកថារុស្សីក៏ត្រៀមខ្លួនរួចរាល់ក្នុងការធានាការនាំចេញស្រូវសាឡីនិងជីរបស់រុស្សីដែរ។
- ប្រធានាធិបតីអ៊ុយក្រែនលោក Volodymyr Zelenskyy បានថ្លែងសារវីដេអូក្នុងថ្ងៃទី ១០០នៃសង្គ្រាមរបស់រុស្សីក្នុងប្រទេសអ៊ុយក្រែនដោយអះអាងថា«យើងនឹងឈ្នះ»។ នេះបើយោងតាមសេចក្តីរាយការណ៍របស់សារព័ត៌មានអង់គ្លេស BBC នៅថ្ងៃសុក្រ។ វីដេអូដែលបង្ហោះនេះ បង្ហាញប្រធានាធិបតីខ្លួនឯងនិងក្រុមរបស់លោកឈរនៅពីមុខវិមានប្រធានាធិបតីអ៊ុយក្រែននៅចំកណ្តាលរដ្ឋធានីកៀវស្រដៀងនឹងវីដេអូដែលលោកប្រធានាធិបតីអ៊ុយក្រែនរូបនេះបានបង្ហោះចេញពីទីតាំងដដែល មួយថ្ងៃក្រោយប្រ ទេសរុស្សីបានបើកការឈ្លានពានលើអ៊ុយក្រែន។ ប៉ុន្តែ អ្នកសម្របសម្រួលវិបត្តិអ៊ុយ ក្រែនរបស់អង្គការសហប្រជាជាតិលោក Amin Awad និយាយថា៖ «សង្គ្រាមនេះ គ្មានអ្នកចាញ់ហើយនឹងមិនមានអ្នកឈ្នះទេ»។
- ការឈ្លានពានរបស់រុស្សីលើប្រទេសអ៊ុយក្រែនបានធ្វើឱ្យខូចផ្លូវថ្នល់អស់ជាង ៤០០ គីឡូម៉ែត្រនិងបំផ្លាញសាលារៀនអស់ជិត ៧០ ខ្នងនិងសាលាមត្តេយ្យ ៥០ ខ្នងគ្រាន់តែនៅក្នុងក្រុងLuhanskតែមួយប៉ុណ្ណោះ។ នេះបើយោងសេចក្តីរាយការណ៍របស់ទូរទស្សន៍ Al Jazeera នៅថ្ងៃសុក្រ។បណ្តាញព័ត៌មាននេះ ក៏បានស្រង់សម្តីអភិបាលក្រុងនៅប៉ែកខាងកើតប្រទេសអ៊ុយក្រែននោះថា ការឈ្លានពាននេះ ក៏បានបំផ្លាញមន្ទីរពេទ្យអស់ ៣៣ ខ្នងនិងគ្លីនិកពិនិត្យសុខភាពជនបទអស់ ២៣៧ ខ្នងដែរ។
- អ្នកសម្របសម្រួលវិបត្តិម្នាក់របស់អង្គការសហប្រជាជាតិបាននិយាយនៅថ្ងៃសុក្រថា គេត្រូវការការចរចាបន្ថែមទៀតដើម្បីឱ្យសម្រេចកិច្ចព្រមព្រៀងមួយក្នុងការអនុញ្ញាតការនាំចេញទំនិញពីប្រទេសរុស្សីដែលជាផ្នែកមួយនៃកិច្ចព្រមព្រៀងដែលគេគ្រោងទុកជាមុន ដើម្បីបន្តការនាំចេញស្បៀងអាហាររបស់អ៊ុយក្រែន។ ទីភ្នាក់ងារព័ត៌មាន Reuters បានរាយការណ៍ថា ដោយរុស្សីគ្រប់គ្រងនិងទប់ស្កាត់រាល់ចរាចរណ៍នៅកំពង់ ផែទាំងអស់នៅតាមបណ្តោយសមុទ្រខ្មៅរបស់អ៊ុយក្រែន ការដឹកកសិផលធញ្ញជាតិចេញពីប្រទេសអ៊ុយក្រែនបានជាប់គាំងតាំងពីការឈ្លានពានរបស់រុស្សីនៅថ្ងៃទី ២៤ ខែកុម្ភៈមក ខណៈរដ្ឋាភិបាលរុស្សីបានស្តីបន្ទោសការដាក់ទណ្ឌកម្មរបស់បស្ចិមប្រទេសចំពោះការអាក់ខាននៃការនាំចេញធញ្ញជាតិនិងជីពីប្រទេសអ៊ុយក្រែននេះ។
- ក្រសួងការបរទេសរុស្សី និយាយថាខ្លួនបានកោះហៅប្រធានស្ថាប័នប្រព័ន្ធផ្សព្វផ្សាយអាមេរិកក្នុងទីក្រុងមូស្គូឲ្យទៅជួបនៅថ្ងៃចន្ទសប្តាហ៍ក្រោយ ដើម្បីជូនដំណឹងដល់ពួកគេអំពីវិធានការតឹងតែងជាការឆ្លើយតបទៅនឹងការរឹតត្បិតរបស់សហរដ្ឋអាមេរិកទៅលើប្រព័ន្ធផ្សព្វផ្សាយរុស្សី។ នេះបើផ្អែកតាមសេចក្តីរាយការណ៍របស់ទីភ្នាក់ងារព័ត៌មាន Reuters នៅថ្ងៃសុក្រ។ ទីភ្នាក់ងារព័ត៌មានរបស់អង់គ្លេសមួយនេះបានដកស្រង់សម្តីរបស់អ្នកនាំពាក្យក្រសួងការបរទេសរុស្សីគឺអ្នកស្រី Maria Zakharova ដែលនិយាយថា៖ «បើការងាររបស់ប្រព័ន្ធផ្សព្វផ្សាយរុស្សី រួមមានប្រតិបត្តិករនិងអ្នកសារព័ត៌មានមិនមានប្រក្រតីភាពនៅសហរដ្ឋអាមេរិកទេ វិធានការតឹងរ៉ឹងបំផុតនឹងកើតឡើងជៀសមិនរួច»។
- ក្រុមហ៊ុនភោជនីយដ្ឋានលក់អាហារឆ្អិនស្រាប់ភ្លាមៗរបស់អាមេរិក Burger King ជួបបញ្ហាច្រើននៅពេលព្យាយាមដកខ្លួនពីការរកស៊ីក្នុងប្រទេសរុស្សី។ ទីភ្នាក់ងារព័ត៌មាន Reuters រាយការណ៍នៅថ្ងៃសុក្រថា ក្រុមហ៊ុននេះមិនអាចចាកចេញពីភាពជាដៃគូឬបិទទីតាំងហាងជិត៨០០កន្លែងក្នុងប្រទេសរុស្សី ក្រោយពីការឈ្លានពានរបស់រុស្សីលើប្រទេសអ៊ុយក្រែនតាំងពីខែកុម្ភៈមក។ ក្រុមហ៊ុនភោជនីយដ្ឋាននេះ បានផ្អាកការគាំទ្រខាងអាជីវកម្មនេះក្នុងប្រទេសរុស្សីកាលពីខែមីនា ដោយព្យាយាមលក់ភាគហ៊ុនរបស់ខ្លួនក្នុងជំនួញចូលហ៊ុនគ្នាជាមួយក្រុមហ៊ុន Tim Hortons ប៉ុន្តែមិនបានជោគជ័យដោយ សារបញ្ហាផ្លូវច្បាប់ដ៏ស្មុគស្មាញ។ ក្រុមហ៊ុនគូប្រជែង McDonald's បានបិទដំណើរការរកស៊ីរបស់ខ្លួនក្នុងប្រទេសរុស្សីកាលពីពេលថ្មីៗនេះ មុននឹងគ្រោងបើកដំណើរការឡើងវិញក្រោមស្លាកយីហោថ្មីនៅចុងខែនេះ។
- មេដឹកនាំអង្គការអូតង់លោក Jens Stoltenberg បានព្រមានបស្ចិមប្រទេសឱ្យត្រៀមខ្លួនរយៈពេលវែង ខណៈដែលការវាយប្រយុទ្ធគ្នារវាងកងកម្លាំងរុស្សីនិងអ៊ុយក្រែនបន្តនៅទីក្រុងសំខាន់ Severodonetsk ស្ថិតនៅប៉ែកខាងកើតប្រទេសអ៊ុយក្រែន។ នេះបើយោងតាមបណ្តាញសារព័ត៌មាន BBC ក្នុងប្រទេសអង់គ្លេស។ ឥឡូវផ្នែកភាគច្រើននៃទីក្រុងនេះ ស្ថិតក្រោមការគ្រប់គ្រងរបស់ទ័ពរុស្សី។ រហូតមកដល់ពេលនេះ កងកម្លាំងរុស្សីបានត្រួតត្រាដែនដីអ៊ុយក្រែនបាន២០ភាគរយហើយចាប់តាំងពីការឈ្លានពានរបស់រុស្សីលើអ៊ុយក្រែនតាំងពីខែកុម្ភៈមក។
- ប្រទេសអាល្លឺម៉ង់បានថ្កោលទោសខ្លាំងក្លាលើការប៉ុនប៉ងរបស់ប្រធានាធិបតីរុស្សីលោក Vladimir Putin ក្នុងការបង្កើតការពណ៌នាថា លោកខាងលិចទទួលខុសត្រូវចំពោះការបង្កឲ្យមានភាពអត់ឃ្លាននៅទ្វីបអាហ្វ្រិក។ នេះបើយោងតាមសេចក្តីរាយ ការណ៍របស់ទីភ្នាក់ងារព័ត៌មាន Reuters ដែលបានស្រង់សម្តីអ្នកនាំពាក្យម្នាក់នៃក្រ សួងការបរទេសអាល្លឺម៉ង់នៅថ្ងៃសុក្រ។ ថ្លែងក្នុងសន្និសិទសារព័ត៌មានជាប្រចាំដែលរៀបចំដោយរដ្ឋាភិបាល អ្នកនាំពាក្យរូបនេះនិយាយថា៖ «យើងត្រូវតែនិយាយសង្កត់ធ្ងន់ថាការណ៍ពិតគឺថាហានិភ័យនៃភាពអត់ឃ្លានក្នុងផ្នែកនានានៃពិភពលោក ដោយសារការកាត់ផ្តាច់ខ្សែសង្វាក់នាំចេញធញ្ញជាតិ គឺជាលទ្ធផលនៃសង្គ្រាមឈ្លានពានរបស់រុស្សី គឺមិនមែនជាការដាក់ទណ្ឌកម្មរបស់បស្ចិមប្រទេសទេ»។
- អ្នកនាំពាក្យក្រសួងការបរទេសរុស្សីអ្នកស្រី Maria Zakharova បាននិយាយនៅថ្ងៃសុក្រថា ការបង្កើនការចំណាយផ្នែកយោធារបស់ប្រទេសអាល្លឺម៉ង់មានន័យថាប្រទេសនេះ កំពុងធ្វើទំនើបកម្មយោធារបស់ខ្លួនឡើងវិញ ហើយការណ៍នេះនឹងបង្កើនហានិភ័យខាងសន្តិសុខ។ នេះបើយោងតាមសេចក្តីរាយការណ៍របស់ Reuters។ ការថ្លែងនេះធ្វើឡើង ក្រោយពីប្រទេសអាល្លឺម៉ង់បានថ្កោលទោសខ្លាំងក្លាលើការប៉ុនប៉ងរបស់ប្រធានាធិបតីរុស្សីលោក Vladimir Putin ក្នុងការបង្កើតការព័ណ៌នាថាលោកខាងលិចទទួលខុសត្រូវចំពោះការបង្កឲ្យមានភាពអត់ឃ្លាននៅទ្វីបអាហ្វ្រិក។ អ្នកស្រី Maria Zakharova ថ្លែងថា៖ «យើងមើលឃើញការថ្លែងរបស់អធិការបតីអាល្លឺម៉ង់ថាជាការបញ្ជាក់ម្តងទៀតថា រដ្ឋាភិបាលអាល្លឺម៉ង់បានរៀបចំជើងព្រួលសម្រាប់ការធ្វើទំនើប កម្មយោធាឡើងវិញ។ តើការណ៍នេះបានបញ្ចប់ទៅដោយរបៀបណា? គេដឹងរឿងនេះច្បាស់ណាស់ពីប្រវត្តិសាស្ត្រ»។
- រដ្ឋាភិបាលរុស្សីនិយាយថាការផ្គត់ផ្គង់ធញ្ញជាតិរបស់អ៊ុយក្រែនទៅកាន់ទីផ្សារពិភពលោក នឹងជាផ្នែកមួយនៃរបៀបវារៈសម្រាប់ការពិភាក្សារបស់ប្រធានាធិបតីរុស្សីលោក Vladimir Putin ជាមួយប្រធានសហភាពអាហ្វ្រិកគឺលោក Macky Sall ដែលជាប្រធានាធិបតីសេណេហ្គាល់ ។ នេះបើផ្អែកតាមទីភ្នាក់ងារព័ត៌មានthe Associated Press។ អ៊ុយក្រែនជាប្រទេសនាំចេញស្រូវសាឡី ពោតនិងប្រេងឆាដ៏ធំជាងគេមួយលើសកលលោក។ អាជ្ញាធរអ៊ុយក្រែននិងបស្ចិមប្រទេសដែលគាំទ្រអ៊ុយក្រែនបានចោទរុស្សីថាបានរាំងខ្ទប់កំពង់ផែរបស់អ៊ុយក្រែន ដែលធ្វើឱ្យគ្រោះថ្នាក់ដល់សង្វាក់ផ្គត់ផ្គង់ស្បៀងអាហារក្នុងពិភពលោក ប៉ុន្តែរុស្សីបានបដិសេធ។
- ប្រធានសហភាពអាហ្វ្រិកលោក Macky Sall បានទទូចឲ្យប្រធានាធិបតីរុស្សីលោក Vladimir Putin ពិចារណាអំពីទុក្ខវេទនានៅតាមបណ្តាប្រទេសនានាក្នុងទ្វីបអាហ្វ្រិកដោយសារតែកង្វះស្បៀងដែលបណ្តាលមកពីយុទ្ធនាការយោធារបស់រដ្ឋាភិបាលរុស្សីក្នុងប្រទេសអ៊ុយក្រែន។ នេះបើផ្អែកតាមទីភ្នាក់ងារព័ត៌មានបារាំង AFP។ លោក Putin ធ្វើជាម្ចាស់ផ្ទះទទួលជួបប្រធានាធិបតីសេណេហ្គាល់លោក Macky Sall ដែលជាប្រធានសហភាពអាហ្វ្រិកនៅវិមាន Black Sea របស់លោក Putin ក្នុងទីក្រុង Sochi ចំខួបគម្រប់ថ្ងៃទី១០០នៃការឈ្លានពានរបស់រុស្សីក្នុងប្រទេសអ៊ុយក្រែន។ កង្វះស្បៀងក្នុងសកលលោកនិងការស្ទះសង្វាក់ផ្គត់ផ្គង់គ្រាប់ធញ្ញជាតិនៅតាមកំពង់ផែរបស់អ៊ុយក្រែនស្ថិតក្នុងរបៀបវារៈនៃជំនួបនេះ។
- រុស្សីបានបើកការិយាល័យសេវាកម្មទេសន្តរប្រវេសន៍នៅក្នុងទីក្រុង Melitopol ដោយទទួលយកពាក្យសុំចូលសញ្ជាតិរុស្សីតាមនីតិវិធីរហ័សដែលលោកប្រធានាធិបតីរុស្សី Vladimir Putin បានពង្រីកដល់តំបន់ Kherson និង Zaporizhzhia។ នេះបើយោងតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន Associated Press។ នៅថ្ងៃសុក្រ ទូរទស្សន៍រដ្ឋរុស្សីបានរាយការណ៍ថា ពលរដ្ឋក្នុងក្រុង Melitopol របស់អ៊ុយក្រែន៣ពាន់នាក់ បានដាក់ពាក្យស្នើសុំចូលសញ្ជាតិរុស្សីក្នុងរយៈពេលប៉ុន្មានថ្ងៃចុងក្រោយនេះ។ ប៉ុន្តែមិនមានការបញ្ជាក់ដោយឯករាជ្យអំពីរបាយការណ៍នេះទេ៕
២១:១២
៤.៦.២០២២
ថ្ងៃសៅរ៍ ទី៤ ខែមិថុនា៖
- ប្រធានាធិបតីអ៊ុយក្រែនលោក Volodymyr Zelenskyy បានជំរុញអភិបាលក្រុងនានារបស់សហរដ្ឋអាមេរិកឱ្យកាត់ផ្ដាច់ទំនាក់ទំនង «ភាពជាបងប្អូន» ជាមួយនឹងទីក្រុងនានារបស់រុស្ស៊ី និងឱ្យចូលរួមនៅក្នុង «គម្រោងសេដ្ឋកិច្ចដ៏ធំបំផុតនៅពេលបច្ចុប្បន្ននេះ» តាមរយៈការជួយកសាងប្រទេសអ៊ុយក្រែនឡើងវិញនៅពេលណាដែលសង្គ្រាមបានបញ្ចប់។ លោក Zelenskyy បានបញ្ជាក់ដូច្នេះនៅក្នុងវីដេអូអនឡាញដែលថ្លែងទៅកាន់សន្និសីទប្រចាំឆ្នាំលើកទី ៩០ របស់អភិបាលក្រុងនានារបស់សហរដ្ឋអាមេរិកនៅថ្ងៃសៅរ៍។ នេះបើយោងតាមបណ្ដាញព័ត៌មានទូរទស្សន៍ CNN។
- ប្រធានាធិបតីបារាំងលោក Emmanuel Macron បាននិយាយថា វាជារឿងសំខាន់ដែលគេត្រូវធ្វើយ៉ាងណាកុំឱ្យរុស្ស៊ីអាម៉ាស់មុខ ដើម្បីនៅពេលណាដែលការប្រយុទ្ធគ្នានៅអ៊ុយក្រែនបានបញ្ចប់ គេអាចស្វែងរកដំណោះស្រាយការទូតបាន។ លោកបានបន្ថែមថា លោកជឿថា បារាំងនឹងដើរតួជាអ្នកសម្របស្រួលដើម្បីបញ្ចប់សង្គ្រាមនេះ។ លោក Macron បានបញ្ជាក់នៅក្នុងកិច្ចសម្ភាសន៍មួយជាមួយនឹងសារព័ត៌មានក្នុងតំបន់នានាដែលបានចេញផ្សាយនៅថ្ងៃសៅរ៍ថា៖ «យើងត្រូវតែធ្វើយ៉ាងណាកុំឱ្យរុស្ស៊ីអាម៉ាស់មុខ ដូច្នេះនៅថ្ងៃដែលការប្រយុទ្ធគ្នាបានបញ្ចប់ យើងអាចបង្កើតច្រកចេញមួយតាមរយៈមធ្យោបាយការទូត។ ខ្ញុំជឿថា វាគឺជាតួនាទីរបស់បារាំងនៅក្នុងការធ្វើជាអំណាចសម្របសម្រួល»។ នេះបើយោងតាមទីភ្នាក់ងារព័ត៌មាន Reuters។
- ប្រធានផ្នែកសេដ្ឋកិច្ចនៃសហភាពអឺរ៉ុបលោក Paolo Gentiloni បាននិយាយនៅថ្ងៃសៅរ៍ថា បណ្ដាប្រទេសជាសមាជិកសហភាពអឺរ៉ុបនឹងត្រូវបានអនុញ្ញាតឱ្យប្រើថវិកាដែលបានមកពីមូលនិធិសម្រាប់ការរើបឡើងវិញរបស់សហភាពអឺរ៉ុប ដែលបានបង្កើតឡើងដើម្បីគាំទ្រដល់ការរីកចម្រើនសេដ្ឋកិច្ចនៅក្រោយវិបត្តិជំងឺកូវីដ១៩ ក្នុងគោលបំណងបង្កើនចំណុះឧស្ម័នធម្មជាតិរាវ (LNG)។ តាំងពីពេលដែលរុស្ស៊ីបានឈ្លានពានអ៊ុយក្រែនមក បណ្ដាប្រទេសជាសមាជិកសហភាពអឺរ៉ុបបានប្រឹងប្រែងកាត់ផ្ដាច់ការពឹងផ្អែករបស់ខ្លួនលើការនាំចូលឧស្ម័នពីប្រទេសរុស្ស៊ី។ ការសាងសង់ហេដ្ឋារចនាសម្ព័ន្ធថ្មីសម្រាប់នាំចូលឧស្ម័នធម្មជាតិរាវបន្ថែមទៀតគឺជាផ្នែកមួយនៃយុទ្ធសាស្ត្ររបស់សហភាពអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
- លោក Vadym Lyakh ប្រធានរដ្ឋបាលយោធានៃទីក្រុង Sloviansk ក្នុងប្រទេសអ៊ុយក្រែន បាននិយាយនៅថ្ងៃសៅរ៍ ថា មនុស្សរាប់រយនាក់កំពុងភៀសខ្លួនចេញពីទីក្រុង Sloviansk នៅភាគខាងកើតប្រទេសអ៊ុយក្រែនជារៀងរាល់ថ្ងៃ ដោយនៅសប្ដាហ៍នេះអ្នកដែលបានជម្លៀសខ្លួនចេញមានចំនួនកើនឡើងស្ទើរតែពីរដង។ នេះបើយោងតាមបណ្ដាញព័ត៌មានទូរទស្សន៍ CNN។
- រដ្ឋាភិបាលអ៊ុយក្រែនបានបញ្ជាក់នៅថ្ងៃសៅរ៍ថា រុស្ស៊ីបានប្រើកម្លាំងដែលខ្លួនមានទាំងអស់ដើម្បីដណ្ដើមកាន់កាប់ទីក្រុងឧស្សាហកម្ម Severodonetsk ក្នុងកិច្ចប្រឹងប្រែងដើម្បីត្រួតត្រាលើតំបន់ Donbas ទាំងមូលនៅភាគខាងកើតប្រទេសអ៊ុយក្រែន។ លោក Sergiy Gaidai អភិបាលតំបន់ Lugansk នៃប្រទេសអ៊ុយក្រែន បាននិយាយនៅក្នុងកិច្ចសម្ភាសន៍មួយដែលបង្ហោះនៅលើបណ្ដាញសង្គមអនឡាញផ្លូវការរបស់លោកថា៖ «ស្ថានការណ៍ជារួមនៅក្នុងតំបន់មានភាពតានតឹងខ្លាំង។ ការប្រយុទ្ធនៅពេលឥឡូវនេះគឺផ្ដោតនៅលើទីក្រុង Severodonetsk ដោយសារតែបើតាមការស្វែងយល់របស់យើង យោធារុស្ស៊ីកំពុងប្រើកម្លាំងទាំងអស់និងធនធានបម្រុងទាំងអស់របស់ខ្លួននៅក្នុងទិសដៅនេះ»។ នេះបើយោងតាមការរាយការណ៍របស់ទីភ្នាក់ងារព័ត៌មាន AFP។
- ក្រសួងការពារជាតិរុស្ស៊ីបានបញ្ជាក់នៅថ្ងៃសៅរ៍ថា កងទ័ពរបស់ខ្លួនបានបាញ់ទម្លាក់យន្តហោះដឹកសព្វាវុធមួយគ្រឿងរបស់អ៊ុយក្រែននៅជិតទីក្រុងកំពង់ផែ Odesa នៅសមុទ្រខ្មៅ។ ក្រសួងនេះបានលើកឡើងទៀតថា មីស៊ីលរបស់រុស្ស៊ីក៏បានបាញ់ចំមជ្ឈមណ្ឌលហ្វឹកហ្វឺនកាំភ្លើងធំមួយកន្លែងផងដែរនៅក្នុងតំបន់ Sumy នៃប្រទេសអ៊ុយក្រែន។ ក្រសួងនេះបានបន្ថែមថា ការវាយប្រហារមួយទៀតបានបំផ្លាញប៉ុស្តិ៍យោធារបស់ «ទាហានស៊ីឈ្នួលបរទេស» នៅក្នុងតំបន់ Odesa។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃសៅរ៍នេះថា សកម្មភាពវាយប្រហារយោធារបស់រុស្ស៊ីតាមផ្លូវអាកាសនៅលើតំបន់ Donbas ប្រទេសអ៊ុយក្រែន នៅតែមានកម្រិតខ្ពស់ ដោយរុស្ស៊ីបានប្រើអាវុធយុទ្ធភណ្ឌទាំងអាចបញ្ជាបាននិងមិនអាចបញ្ជាបាន ពេលកំពុងធ្វើប្រតិបត្តិការដើម្បីវាយប្រហារ។ ក្រសួងនេះបានលើកឡើងនៅលើបណ្តាញ Twitter ថា៖ «ការកើនឡើងនូវការប្រើប្រាស់អាវុធយុទ្ធភណ្ឌដែលមិនអាចបញ្ជាបានពេលកំពុងធ្វើប្រតិបត្តិការបានបណ្ដាលឱ្យមានការបំផ្លិចបំផ្លាញយ៉ាងរាលដាលលើតំបន់ទីប្រជុំជនមានសំណង់អាគារនានានៅក្នុងតំបន់ Donbas និងស្ទើរតែប្រាកដថាបានបណ្ដាលឱ្យមានការបំផ្លិចបំផ្លាញខុសគោលដៅច្រើនគួរសមនិងការស្លាប់និងរងរបួសរបស់ជនស៊ីវិល»។ នេះបើយោងតាមទីភ្នាក់ងារព័ត៌មាន Reuters។
- ប្រភពពីរដ្ឋាភិបាលជប៉ុនបានបញ្ជាក់នៅថ្ងៃសៅរ៍ថា នាយករដ្ឋមន្ត្រីជប៉ុនលោក Fumio Kishida ប្រហែលជានឹងចូលរួមនៅក្នុងកិច្ចប្រជុំកំពូលរបស់អង្គការអូតង់ (NATO) នៅចុងខែមិថុនាខាងមុខ ដើម្បីពិភាក្សាអំពីបញ្ហាសង្គ្រាមនៅអ៊ុយក្រែន។ កិច្ចប្រជុំកំពូលរបស់អង្គការអូតង់នេះគ្រោងនឹងធ្វើឡើងពីថ្ងៃទី ២៩ ដល់ថ្ងៃទី ៣០ ខែមិថុនានេះនៅក្នុងទីក្រុងម៉ាឌ្រីដ ប្រទេសអេស្ប៉ាញ។ នេះបើយោងតាមបណ្ដាញព័ត៌មានទូរទស្សន៍ Al Jazeera។
- អគ្គលេខាធិការអង្គការសហប្រជាជាតិលោក Antonio Guterres បានអំពាវនាវសាជាថ្មី នៅក្នុងសេចក្ដីថ្លែងការណ៍មួយ ឱ្យមានការបញ្ចប់សង្គ្រាមរបស់រុស្ស៊ីនៅអ៊ុយក្រែន នៅពេលដែលសង្គ្រាមនេះបានឈានចូលដល់ថ្ងៃទី ១០០។ លោក Guterres បានបញ្ជាក់នៅក្នុងសេចក្ដីថ្លែងការណ៍នោះកាលពីថ្ងៃសុក្រថា៖ «ខ្ញុំអំពាវនាវជាថ្មីឱ្យមានការបញ្ចប់ជាបន្ទាន់នូវសង្គ្រាមនេះ ឱ្យមានការដឹកជញ្ជូនជំនួយមនុស្សធម៌ដោយគ្មានការរារាំងចូលទៅឱ្យអ្នកដែលត្រូវការជំនួយនេះ ឱ្យមានការជម្លៀសចេញដោយសុវត្ថិភាពនូវជនស៊ីវិលដែលជាប់គាំងនៅក្នុងតំបន់ប្រយុទ្ធនានា និងឱ្យមានការការពារជាបន្ទាន់លើជនស៊ីវិលនិងការគោរពសិទ្ធិមនុស្សស្របទៅតាមបទដ្ឋានអន្តរជាតិ»។ នេះបើយោងតាមបណ្ដាញព័ត៌មានទូរទស្សន៍ CNN។