២២:២៣
២០.៥.២០២២
ថ្ងៃសុក្រ ទី ២០ ខែឧសភា៖
- ទីភ្នាក់ងារសារព័ត៌មាន Reuters បានរាយការណ៍ថា នៅក្នុងសញ្ញាមួយនៃតម្រូវការបន្ទាន់របស់រុស្ស៊ី ក្នុងការពង្រឹងកិច្ចប្រឹងប្រែងធ្វើសង្គ្រាមរបស់ខ្លួននៅក្នុងប្រទេសអ៊ុយក្រែន សភារុស្ស៊ីបាននិយាយកាលពីថ្ងៃសុក្រថា ខ្លួននឹងពិចារណាលើសេចក្តីព្រាងច្បាប់អនុញ្ញាតឱ្យជនជាតិរុស្ស៊ីដែលមានអាយុលើសពី៤០ ឆ្នាំនិងជនបរទេសដែលមានអាយុលើសពី៣០ឆ្នាំ ចុះឈ្មោះចូលបម្រើយោធា។ គេហទំព័ររបស់សភាជាន់ទាបបាននិយាយថា វិធានការនេះនឹងអនុញ្ញាតឱ្យយោធាប្រើជំនាញរបស់អ្នកជំនាញដែលមានវ័យចំណាស់។ សភាបានថ្លែងថា៖ «សម្រាប់ការប្រើប្រាស់អាវុធដែលមានភាពជាក់លាក់ខ្ពស់ ប្រតិបត្តិការអាវុធនិងឧបករណ៍យោធាត្រូវការអ្នកឯកទេសដែលមានជំនាញវិជ្ជាជីវៈខ្ពស់។ បទពិសោធន៍បង្ហាញថា ពួកគេក្លាយជាមនុស្សបែបនេះនៅអាយុ៤០-៤៥ ឆ្នាំ»។
- ទីភ្នាក់ងារសារព័ត៌មាន TASS របស់រុស្ស៊ីបានរាយការណ៍នៅថ្ងៃសុក្រថា រដ្ឋមន្ត្រីការពារជាតិរុស្ស៊ី លោក Sergei Shoigu បាននិយាយថា ទាហានអ៊ុយក្រែនជិត២.០០០ នាក់ដែលបានជាប់នៅក្នុងរោងចក្រដែកថែប Azovstal នៃទីក្រុង Mariupol បានចុះចាញ់រហូតមកដល់ពេលនេះ។ ទីភ្នាក់ងារសារព័ត៌មានReutersមិនអាចផ្ទៀងផ្ទាត់របាយការណ៍ដោយឯករាជ្យបានទេ។ យុទ្ធជនអ៊ុយក្រែនរាប់រយនាក់បានចុះចាញ់ពីទីវាលនៃលេណដ្ឋាន និងផ្លូវរូងក្រោមដីនៅខាងក្រោមរោងចក្រ ទោះបីជារដ្ឋាភិបាលក្រុងមូស្គូ និងក្រុងកៀវបានផ្តល់ការប៉ាន់ស្មានតួលេខខុសៗគ្នាក៏ដោយ។
- អ៊ុយក្រែនមានអាវុធដែលស្ថាបនាឡើងសម្រាប់ប្រឆាំងនិងបំផ្លិចបំផ្លាញ ដែលកើតឡើងដោយជម្លោះ។ ជាមួយនឹងសមត្ថភាពដំឡើងថាមពល៥៥ ជីហ្គាវ៉ាត់(GW) ប្រទេសដែលហែកហួរដោយសង្រ្គាមនេះ អាចផលិតអគ្គិសនីបានច្រើនជាងតម្រូវការបច្ចុប្បន្ន។ នោះជាឱកាសមួយសម្រាប់ទាំងទីក្រុងកៀវ និងសហភាពអឺរ៉ុបដែលស្រេកឃ្លានថាមពល។
- អង្គការកាកបាទក្រហមបាននិយាយកាលពីថ្ងៃព្រហស្បតិ៍ថា ខ្លួនបានចុះបញ្ជីឈ្លើយសឹកអ៊ុយក្រែនរាប់រយនាក់ដែលបានចាកចេញពីរោងចក្រដែកថែប Azovstal នៅទីក្រុង Mariupol ភាគខាងត្បូង បន្ទាប់ពីមានការប្រឈមមុខដាក់គ្នាអស់ជាច្រើនសប្តាហ៍ ដោយការឡោមព័ទ្ធរបស់ទាហានរុស្ស៊ី។ ការប្រកាសដោយគណៈកម្មាធិការនៃកាកបាទក្រហមអន្តរជាតិ ដែលដើរតួជាអ្នកការពារនៃអនុសញ្ញាទីក្រុងហ្សឺណែវ ដែលមានគោលបំណងកំហិត«ភាពព្រៃផ្សៃនៃសង្គ្រាម»បានកើតឡើងភ្លាមៗបន្ទាប់ពីយោធារបស់រុស្ស៊ីបាននិយាយថា ទាហានអ៊ុយក្រែន១.៧៣០នាក់នៅរោងចក្រដែកថែបបានចុះចាញ់។ ការយកចិត្តទុកដាក់ឥឡូវនេះ គឺងាកទៅមើលពីរបៀបដែលឈ្លើយសឹកទាំងនោះអាចត្រូវបានប្រព្រឹត្តដាក់និងសិទ្ធិដែលពួក គេមាន។ ទីភ្នាក់ងារសារព័ត៌មាន Associated Press ពិនិត្យមើលចំណោទសំខាន់ៗមួយចំនួនអំពីឈ្លើយសឹក នៅក្នុងសង្គ្រាមជិតបីខែរបស់រុស្ស៊ីលើអ៊ុយក្រែន។
- ប្រាក់រូបរបស់រុស្ស៊ីបានកើនឡើងដល់កម្រិតខ្លាំងបំផុតធៀបនឹងប្រាក់អឺរ៉ូ និងប្រាក់ដុល្លារចាប់តាំងពីខែមិថុនាឆ្នាំ២០១៥ និងខែមីនា ឆ្នាំ២០១៨ នៅថ្ងៃសុក្រ។ អ្នកវិភាគសន្មតថា ដោយសារសហភាពអឺរ៉ុបកំពុងរៀបចំបង់ប្រាក់ឱ្យរុស្ស៊ីសម្រាប់ថ្លៃឧស្ម័ននិងការគ្រប់គ្រងដើមទុនដែលដាក់ដោយរដ្ឋាភិបាលក្រុងមូស្គូ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters ។
- យោងតាមក្រសួងការពារជាតិអង់គ្លេសបានឱ្យដឹងថា នៅក្នុងសញ្ញាចុងក្រោយនៃការខកចិត្តកាន់តែខ្លាំងឡើងចំពោះលទ្ធផលមិនល្អនៃកងកម្លាំងរបស់ខ្លួនក្នុងប្រទេសអ៊ុយក្រែន យោធារុស្ស៊ីបានបណ្តេញចេញឬជំនួសមេបញ្ជាការតំបន់មួយចំនួននាពេលថ្មីៗនេះ។ នេះបើយោងតាមក្រសួងការពារជាតិអង់គ្លេស។ ការរកឃើញរបស់អង់គ្លេសបង្ហាញពីការធ្លាក់ចុះនិងភាពច្របូកច្របល់សម្រាប់យោធារុស្ស៊ីក្នុងសង្គ្រាមជិតបីខែរបស់ខ្លួន។ ក្រសួងការពារជាតិអាមេរិកបាននិយាយកាលពីថ្ងៃទី១៨ ខែឧសភាថា ទោះបីជាមានបញ្ហា និងចំណុចខ្វះខាតក៏ដោយ កងកម្លាំងរុស្ស៊ីនៅតែមានប្រៀបលើចំនួន និងកម្លាំងអាវុធ ហើយហាក់ដូចជាកំពុងសម្របខ្លួនទៅនឹងយុទ្ធសាស្ត្ររបស់អ៊ុយក្រែន ដោយងាកទៅរកការវាយប្រហារដោយអង្គភាពតូចៗ។ នៅសមរភូមិ វិទ្យុអឺរ៉ុបសេរី/វិទ្យុសេរីភាពបាននិយាយជាមួយលោក Liam Collins ដែលជាវរសេនីយ៍ឯកនៃកងកម្លាំងពិសេសរបស់សហរដ្ឋអាមេរិកចូលនិវត្តន៍ និងជានាយកប្រតិបត្តិនៃវេទិកាគោលនយោបាយ Madison។
២១:១៣
២១.៥.២០២២
ថ្ងៃសៅរ៍ ទី ២១ ខែឧសភា៖
- រុស្ស៊ីបានបញ្ជាក់នៅថ្ងៃសៅរ៍នេះថា ខ្លួនបានហាមឃាត់ពលរដ្ឋអាមេរិកាំង ៩៦៣ នាក់ ដែលក្នុងនោះរួមមានទាំងប្រធានាធិបតីអាមេរិកលោក Joe Biden រដ្ឋមន្ត្រីការបរទេសអាមេរិកលោក Antony Blinken និងប្រធានទីភ្នាក់ងារស៊ើបការណ៍សម្ងាត់ (CIA) របស់សហរដ្ឋអាមេរិកលោក William Burns ផងដែរ មិនឱ្យចូលមកក្នុងទឹកដីរបស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- អ្នកតំណាងរបស់សហរដ្ឋអាមេរិកនិងរបស់បណ្ដាប្រទេសមួយចំនួនទៀតបានដើរចេញពីកិច្ចប្រជុំថ្នាក់រដ្ឋមន្ត្រីពាណិជ្ជកម្មរបស់វេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅក្នុងទីក្រុងបាងកក ប្រទេសថៃ នៅថ្ងៃសៅរ៍នេះ ដើម្បីតវ៉ាប្រឆាំងនឹងការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមការបញ្ជាក់របស់មន្ត្រីនានា។ អ្នកតំណាងមកពីប្រទេសកាណាដា នូវែលសេឡង់ ជប៉ុន និងអូស្ត្រាលីបានចូលរួមជាមួយនឹងអ្នកតំណាងមកពីសហរដ្ឋអាមេរិកនៅក្នុងការដើរចេញពីកិច្ចប្រជុំនេះ។ នេះបើតាមការបញ្ជាក់របស់មន្ត្រីរដ្ឋាភិបាលថៃពីររូបនិងមន្ត្រីការទូតអន្តរជាតិពីររូប។ ការដើរចេញនេះបានធ្វើឡើងនៅពេលដែលអ្នកតំណាងរបស់រុស្ស៊ីកំពុងថ្លែងសុន្ទរកថានៅក្នុងពិធីបើកនៃកិច្ចប្រជុំរយៈពេលពីរថ្ងៃនេះ។ នេះបើយោងតាមទីភ្នាក់ងារព័ត៌មាន Reuters។
- សេតវិមានបានបញ្ជាក់ថា ប្រធានាធិបតីសហរដ្ឋអាមេរិកលោក Joe Biden នៅថ្ងៃសៅរ៍នេះបានចុះហត្ថលេខាលើសំណើច្បាប់ដែលសភាទាំងពីរថ្នាក់ទើបបានអនុម័តដើម្បីផ្ដល់ជំនួយជិត ៤០ ពាន់លានដុល្លារដល់ប្រទេសអ៊ុយក្រែន ដែលនេះគឺជាកិច្ចប្រឹងប្រែងមួយដើម្បីបង្កើនការគាំទ្រផ្នែកយោធាដល់អ៊ុយក្រែនទាក់ទិននឹងការឈ្លានពានរបស់រុស្ស៊ីនៅទីនោះ។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃសៅរ៍នេះថា សង្គ្រាមនៅអ៊ុយក្រែនអាចដោះស្រាយបានតាមរយៈមធ្យោបាយ «ការទូត» តែប៉ុណ្ណោះ។ លោកលើកឡើងដូច្នេះនៅចំពេលដែលការចរចារវាងរដ្ឋាភិបាលអ៊ុយក្រែននិងរដ្ឋាភិបាលរុស្ស៊ីកំពុងជាប់គាំង។ លោក Zelenskyy បានបញ្ជាក់ប្រាប់ស្ថានីយទូរទស្សន៍មួយរបស់អ៊ុយក្រែនថា សង្គ្រាម «នឹងមានលក្ខណៈបង្ហូរឈាម នឹងមានការវាយប្រយុទ្ធគ្នា ប៉ុន្តែជាក់ស្ដែងនឹងបញ្ចប់តាមរយៈមធ្យោបាយការទូតតែប៉ុណ្ណោះ»។ នេះបើយោងតាមទីភ្នាក់ងារព័ត៌មាន AFP។
- យោធារុស្ស៊ីបានបញ្ជាក់នៅថ្ងៃសៅរ៍នេះថា ខ្លួនបានបំផ្លាញសព្វាវុធនិងឧបករណ៍យោធា «ជាច្រើន» របស់អ៊ុយក្រែនដែលបានមកពីសហរដ្ឋអាមេរិកនិងទ្វីបអឺរ៉ុបនៅក្នុងតំបន់ Zhytomyr នៃប្រទេសអ៊ុយក្រែននៅភាគខាងលិចរដ្ឋធានីកៀវ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន TASS របស់រុស្ស៊ី ដែលយោងលើសម្ដីរបស់អ្នកនាំពាក្យក្រសួងការពារជាតិរុស្ស៊ីឧត្តមសេនីយ៍ Igor Konashenkov។ លោក Konashenkov ថា សព្វាវុធទាំងនោះត្រូវបានបំផ្លាញដោយប្រើមីស៊ីលស្វ័យនាំផ្លូវ Kalibr។ នេះបើយោងតាមបណ្ដាញព័ត៌មាន CNN។
- ចក្រភពអង់គ្លេសចង់បញ្ជូនសព្វាវុធទំនើបទៅកាន់ប្រទេសម៉ុលដាវីដើម្បីការពារប្រទេសនេះពីការគំរាមកំហែងឈ្លានពានរបស់រុស្ស៊ី។ នេះបើយោងតាមសេចក្ដីរាយការណ៍របស់សារព័ត៌មាន Telegraph ដែលយោងលើសម្ដីរបស់រដ្ឋមន្ត្រីការបរទេសចក្រភពអង់គ្លេសលោកស្រី Liz Truss។ លោកស្រី Truss បានប្រាប់សារព័ត៌មាននោះថា ប្រធានាធិបតីរុស្ស៊ីលោក Vladimir Putin បានតាំងចិត្តធ្វើឱ្យ «រុស្ស៊ីកាន់តែធំអស្ចារ្យជាងមុន» បើទោះបីជាការឈ្លានពានរបស់លោកលើអ៊ុយក្រែនបានបរាជ័យនៅក្នុងការទទួលបានជោគជ័យភ្លាមៗក៏ដោយ។ នេះបើយោងតាមទីភ្នាក់ងារព័ត៌មាន Reuters។
- ប្រទេសរុស្ស៊ីបានបញ្ឈប់ការផ្គត់ផ្គង់ឧស្ម័នធម្មជាតិដល់ប្រទេសហ្វាំងឡង់នៅថ្ងៃសៅរ៍នេះ បន្ទាប់ពីប្រទេសហ្វាំងឡង់បានបដិសេធមិនព្រមបង់ថ្លៃចំណាយជាប្រាប់រូបដល់ក្រុមហ៊ុន Gazprom របស់រុស្ស៊ី។ ក្រុមហ៊ុន Gazprom បានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃសៅរ៍នេះថា ខ្លួនបាន «បញ្ឈប់ទាំងស្រុងនូវការផ្គត់ផ្គង់ឧស្ម័ន» ដោយសារតែខ្លួនមិនបានទទួលបានការបង់ប្រាក់ជាប្រាក់រូបពីក្រុមហ៊ុន Gasum របស់ប្រទេសហ្វាំងឡង់ «នៅត្រឹមថ្ងៃទី ២០ ខែឧសភា»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានស្នើដំណោះស្រាយជាផ្លូវការមួយកាលពីថ្ងៃសុក្រជាមួយនឹងក្រុមសម្ព័ន្ធមិត្តរបស់អ៊ុយក្រែន ដើម្បីឱ្យរុស្ស៊ីសងដល់ការខូចខាតដែលកងទ័ពរុស្ស៊ីបានប្រព្រឹត្តិក្នុងអំឡុងពេលសង្គ្រាម។ លោកបានថ្លែងនៅក្នុងសុន្ទរកថាជាវីដេអូមួយថា៖ «យើងអញ្ជើញប្រទេសដៃគូនានាឱ្យចុះហត្ថលេខាលើកិច្ចព្រមព្រៀងពហុភាគីនិងបង្កើតយន្តការមួយដើម្បីធានាថា អ្នកដែលរងគ្រោះដោយសារទង្វើរបស់រុស្ស៊ីអាចទទួលបានសំណងសម្រាប់ការបាត់បង់ដែលបានកើតឡើង»។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិរុស្ស៊ីបានបញ្ជាក់កាលពីថ្ងៃសុក្រថា ក្រុមទាហានអ៊ុយក្រែនចុងក្រោយដែលបានតស៊ូក្រាញននាលនៅក្នុងរោងចក្រដែកថែប Azovstal ក្នុងទីក្រុង Mariupol ឥឡូវនេះបានចុះចាញ់ហើយ ដែលនេះបង្ហាញឱ្យឃើញអំពីការបញ្ចប់ការវាយប្រហាររាប់សប្ដាហ៍កន្លងមក។ ក្រសួងនេះបានលើកឡើងនៅក្នុងសេចក្ដីថ្លែងការណ៍មួយថា៖ «ដែនដីនៃរោងចក្រដែកថែប Azovstal … ត្រូវបានរំដោះទាំងស្រុងហើយ»។ ក្រសួងនេះបានបន្ថែមថា ក្រុមចុងក្រោយដែលបានចុះចាញ់នេះមានគ្នាចំនួន ៥៣១ នាក់។ នេះបើយោងតាមទីភ្នាក់ងារព័ត៌មាន Reuters។
២២:០៤
២២.៥.២០២២
ថ្ងៃអាទិត្យ ទី ២២ ខែឧសភា៖
- ប្រធានាធិបតីសេណេហ្គាល់លោក Macky Sall បាននិយាយថា លោកនឹងធ្វើទស្សនកិច្ចទៅកាន់រដ្ឋធានីមូស្គូនៃប្រទេសរុស្ស៊ីនិងរដ្ឋធានីកៀវនៃប្រទេសអ៊ុយក្រែននៅក្នុងរយៈពេលប៉ុន្មានសប្ដាហ៍ខាងមុខក្នុងនាមជាប្រធានសហភាពអាហ្វ្រិក (AU)។ លោកបានបញ្ជាក់ថា លោកចង់ឃើញការបន្ធូរបន្ថយភាពតានតឹងនៅក្នុងប្រទេសអ៊ុយក្រែននិងសន្តិភាពតាមរយៈការចរចារវាងភាគីទាំងពីរ។ លោក Sall បានថ្លែងនៅក្នុងសន្និសីទកាសែតរួមមួយជាមួយនឹងអធិការបតីអាល្លឺម៉ង់លោក Olaf Scholz ថា៖ «យើងមិនចង់ចូលបក្សសម្ព័ន្ធណាមួយនៅក្នុងសង្គ្រាមនេះទេ។ ជាការពិត យើងចង់បានសន្តិភាព។ ទោះបីជាយើងថ្កោលទោសការឈ្លានពាននេះក៏ដោយ ក៏យើងកំពុងធ្វើការដើម្បីបន្ធូរបន្ថយភាពតានតឹង ដើម្បីឱ្យមានកិច្ចឈប់វាយប្រយុទ្ធគ្នា ឱ្យមានការចរចា។ ...នេះគឺជាជំហររបស់ [សហភាព] អាហ្វ្រិក»។ នេះបើយោងតាមទីភ្នាក់ងារព័ត៌មាន Reuters។
- បញ្ហាអ៊ុយក្រែនគឺជាបញ្ហាចម្បងនៅក្នុងរបៀបវារៈនៃកិច្ចប្រជុំរយៈពេល ៤ ថ្ងៃ របស់បណ្ដាមេដឹកនាំអាជីវកម្មនៅលើពិភពលោកនៅក្នុងទីក្រុង Davos ប្រទេសស្វីស។ កិច្ចប្រជុំនេះនឹងចាប់ផ្ដើមនៅថ្ងៃចន្ទស្អែកនេះ ដោយមានការថ្លែងសុន្ទរកថាជាវីដេអូពីប្រធានាធិបតីអ៊ុយក្រែនលោក Volodymyr Zelenskyy ផងដែរ។ នេះបើយោងតាមទីភ្នាក់ងារព័ត៌មាន Reuters។
- បញ្ហាសង្គ្រាមនៅអ៊ុយក្រែន ដោយនៅក្នុងនោះបញ្ហាជំងឺនិងការបំផ្លិចបំផ្លាញកើតឡើងនៅក្រោយពេលសង្គ្រាម គឺជាបញ្ហាលេចឡើងនៅថ្ងៃអាទិត្យនេះ នៅពេលដែលអង្គការសុខភាពពិភពលោក (WHO) បានកោះហៅប្រទេសជាសមាជិកនានាឱ្យមកប្រជុំដើម្បីដោះស្រាយបញ្ហាជំងឺកូវីដ១៩ និងបញ្ហាប្រឈមផ្នែកសុខភាពផ្សេងៗទៀតនៅលើពិភពលោក។ ប្រធានអង្គការ WHO លោក Tedros Adhanom Ghebreyesus បានព្រមាននៅថ្ងៃបើកមហាសន្និបាតចម្បងប្រចាំឆ្នាំរបស់អង្គការ WHO នេះថា៖ «នៅទីណាមានសង្គ្រាម នៅទីនោះភាពអត់ឃ្លាននិងជំងឺនឹងកើតឡើងភ្លាមៗ»។ នេះបើយោងតាមទីភ្នាក់ងារព័ត៌មាន AFP។
- លោក Clement Beaune រដ្ឋលេខាធិការក្រសួងការបរទេសនៃប្រទេសបារាំងទទួលបន្ទុកកិច្ចការទ្វីបអឺរ៉ុប បាននិយាយនៅថ្ងៃអាទិត្យនេះថា កិច្ចប្រឹងប្រែងរបស់ប្រទេសអ៊ុយក្រែននៅក្នុងការចូលជាសមាជិកសហភាពអឺរ៉ុបនឹងត្រូវចំណាយពេល «១៥ ឆ្នាំ ឬក៏ ២០ ឆ្នាំ» ដើម្បីបញ្ចប់រួចរាល់។ លោក Beaune បានបញ្ជាក់ប្រាប់វិទ្យុ Radio J. ថា៖ «យើងត្រូវតែស្មោះត្រង់។ ប្រសិនបើអ្នកនិយាយថាអ៊ុយក្រែននឹងចូលជាសមាជិកសហភាពអឺរ៉ុបនៅក្នុងរយៈពេល ៦ ខែ ឬក៏មួយឆ្នាំ ឬក៏ពីរឆ្នាំ នោះអ្នកច្បាស់ជាកុហកហើយ។ វាប្រហែលជាត្រូវចំណាយពេល ១៥ ឆ្នាំ ឬក៏ ២០ ឆ្នាំ។ វាចំណាយពេលយូរ»។ នេះបើយោងតាមទីភ្នាក់ងារព័ត៌មាន AFP។
- សភាអ៊ុយក្រែនបានបោះឆ្នោតនៅថ្ងៃអាទិត្យនេះដើម្បីពន្យារបន្តនូវច្បាប់អាជ្ញាសឹកនៅក្នុងប្រទេសសម្រាប់រយៈពេល ៩០ ថ្ងៃទៀត រហូតដល់ថ្ងៃទី ២៣ ខែសីហា។ នេះបើយោងតាមការប្រកាសរបស់សភាអ៊ុយក្រែនតាម Telegram។ សភាអ៊ុយក្រែនបានបន្ថែមថា វិធានការនេះទទួលបានការគាំទ្រចំនួន ៣២០ សំឡេង ក្នុងចំណោមសមាជិកសរុបចំនួន ៤៥០ នាក់។ គេរំពឹងថា ប្រធានាធិបតីអ៊ុយក្រែនលោក Volodymyr Zelenskyy នឹងចុះហត្ថលេខាលើវិធានការនេះដើម្បីឱ្យក្លាយទៅជាច្បាប់។ នេះបើយោងតាមបណ្ដាញព័ត៌មាន CNN។
- ប្រធានាធិបតីប៉ូឡូញលោក Andrzej Duda បាននិយាយនៅថ្ងៃអាទិត្យនេះថា «ស្ថានភាពដូចធម្មតា» ជាមួយនឹងប្រទេសរុស្ស៊ីគឺមិនអាចទៅរួចនោះទេ បន្ទាប់ពីកងទ័ពរុស្ស៊ីបានរងការរិះគន់ថាបានសម្លាប់ជនស៊ីវិលទ្រង់ទ្រាយធំនិងបានប្រព្រឹត្តឧក្រិដ្ឋកម្មសង្គ្រាមមក។ លោក Duda បានបញ្ជាក់ប្រាប់សភាអ៊ុយក្រែនថា៖ «បន្ទាប់ពី [មានការសម្លាប់] នៅក្នុងទីក្រុង Bucha តំបន់ Borodianka និងទីក្រុង Mariupol មក «ស្ថានភាពដូចធម្មតា» ជាមួយនឹងរុស្ស៊ីគឺមិនអាចមានតទៅទៀតបានទេ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអាទិត្យនេះក្នុងអំឡុងពេលប្រធានាធិបតីប៉ូឡូញលោក Andrzej Duda ធ្វើទស្សនកិច្ចនៅក្នុងប្រទេសអ៊ុយក្រែនថា ពលរដ្ឋប៉ូឡូញនៅក្នុងប្រទេសអ៊ុយក្រែននឹងទទួលបានសិទ្ធិដូចទៅនឹងសិទ្ធិដែលជនភៀសខ្លួនអ៊ុយក្រែននៅក្នុងប្រទេសប៉ូឡូញទទួលបាននៅពេលបច្ចុប្បន្ននេះដូច្នេះដែរ។ រដ្ឋាភិបាលប៉ូឡូញបានផ្ដល់សិទ្ធិរស់នៅ សិទ្ធិធ្វើការ និងសិទ្ធិសុំប្រាក់សន្តិសុខសង្គមដល់ជនភៀសខ្លួនអ៊ុយក្រែនជាង ៣ លាននាក់ ដែលភៀសខ្លួនពីការឈ្លានពានរបស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីសហរដ្ឋអាមេរិកលោក Joe Biden នឹងជួបមួយទល់នឹងមួយជាមួយនឹងនាយករដ្ឋមន្ត្រីឥណ្ឌាលោក Narendra Modi នៅសប្ដាហ៍នេះនៅក្នុងប្រទេសជប៉ុន ស្របពេលដែលសហរដ្ឋអាមេរិកធ្វើការដើម្បីបញ្ចុះបញ្ចូលប្រទេសឥណ្ឌាឱ្យចូលរួមជាមួយនឹងក្រុមបស្ចិមប្រទេសនៅក្នុងការដាក់ទណ្ឌកម្មលើរុស្ស៊ី។ លោក Biden និងលោក Modi នឹងជួបពិភាក្សាគ្នានៅក្រៅកិច្ចប្រជុំរបស់ក្រុមប្រទេស Quad។ ក្រុមប្រទេស Quad គឺជាសម្ព័ន្ធភាពក្រៅផ្លូវការមួយរវាងសហរដ្ឋអាមេរិក ឥណ្ឌា ជប៉ុន និងអូស្ត្រាលី។ ទីប្រឹក្សាសន្តិសុខជាតិសហរដ្ឋអាមេរិកលោក Jake Sullivan បានប្រាប់អ្នកកាសែតនៅពេលលោក Biden ជិះយន្តហោះពីប្រទេសកូរ៉េខាងត្បូងទៅប្រទេសជប៉ុនថា នៅពេលដែលលោក Biden និងលោក Modi ជួបគ្នាដាច់ដោយឡែក ការពិភាក្សារបស់លោកទាំងពីរនឹង «ប្រកបដោយផ្លែផ្កានិងមានលក្ខណៈត្រង់ទៅត្រង់មក»។ នេះបើយោងតាមបណ្ដាញព័ត៌មាន CNN។
- ប្រធានាធិបតីប៉ូឡូញលោក Andrzej Duda បានប្រាប់សមាជិករដ្ឋសភាអ៊ុយក្រែននៅក្នុងរដ្ឋធានីកៀវ ប្រទេសអ៊ុយក្រែននៅថ្ងៃអាទិត្យនេះថា មានតែអ៊ុយក្រែនតែប៉ុណ្ណោះដែលមានសិទ្ធិសម្រេចអំពីអនាគតរបស់ខ្លួន។ លោក Duda គឺជាមេដឹកនាំបរទេសដំបូងគេបង្អស់ដែលថ្លែងសុន្ទរកថាដោយផ្ទាល់ទៅកាន់រដ្ឋសភាអ៊ុយក្រែន តាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក។ លោក Duda បានបញ្ជាក់ដូច្នេះថា៖ «ក្ដីបារម្ភបានលេចឡើងដោយនិយាយថាអ៊ុយក្រែនគួរតែធ្វើតាមការទាមទាររបស់ [ប្រធានាធិបតីរុស្ស៊ីលោក Vladimir] Putin។ មានតែអ៊ុយក្រែនតែប៉ុណ្ណោះដែលមានសិទ្ធិសម្រេចអំពីអនាគតរបស់ខ្លួន»។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
- ខុទ្ទកាល័យរបស់លោកប្រធានាធិបតី Volodymyr Zelenskyy នៃប្រទេសអ៊ុយក្រែនបានបញ្ជាក់នៅថ្ងៃអាទិត្យនេះថា ទីក្រុង Severodonetsk ដែលជាទីក្រុងសំខាន់ផ្នែកយុទ្ធសាស្ត្រនៅភាគខាងកើតប្រទេសអ៊ុយក្រែនបានរងការវាយប្រហារពីទិសជាច្រើនកាលពីយប់មិញ ប៉ុន្តែកងទ័ពរុស្ស៊ីត្រូវបានរុញច្រានទៅវិញ។ នេះបើយោងតាមបណ្ដាញព័ត៌មាន CNN។
- ប្រធានាធិបតីអ៊ុយក្រែនលោក Volodymyr Zelenskyy បានថ្លែងនៅក្នុងសុន្ទរកថារបស់លោកកាលពីយប់ថ្ងៃសៅរ៍ថា៖ «ស្ថានការណ៍នៅក្នុងតំបន់ Donbas មានសភាពយ៉ាប់យ៉ឺនខ្លាំង»។ លោកលើកឡើងដូច្នេះ ស្របពេលដែលកងទ័ពរុស្ស៊ីបានបង្កើនការវាយប្រហារលើទីក្រុង Slovyansk និងទីក្រុង Severodonetsk នៅក្នុងរយៈពេលប៉ុន្មានថ្ងៃចុងក្រោយនេះ។ នេះបើយោងតាមបណ្ដាញព័ត៌មាន CNN។
- ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅក្នុងសុន្ទរកថាកាលពីយប់ថ្ងៃសៅរ៍ថា៖ «កងទ័ពរុស្ស៊ីបានបំផ្លាញស្ថាប័នអប់រំចំនួន ១.៨៧៣ កន្លែង [របស់ប្រទេសអ៊ុយក្រែន]។ នេះគឺជាការបាត់បង់ដ៏ច្រើនមហិមា»។ នេះបើយោងតាមបណ្ដាញព័ត៌មាន CNN។
- រដ្ឋាភិបាលអ៊ុយក្រែនបានបញ្ជាក់កាលពីថ្ងៃសៅរ៍ថា ខ្លួននឹងមិនពិចារណាអំពីកិច្ចព្រមព្រៀងនៃបទឈប់បាញ់ណាមួយជាមួយនឹងរុស្ស៊ីនោះទេ និងថា រដ្ឋាភិបាលអ៊ុយក្រែននឹងមិនទទួលយកកិច្ចព្រមព្រៀងណាមួយជាមួយនឹងរដ្ឋាភិបាលរុស្ស៊ីដែលពាក់ព័ន្ធនឹងការប្រគល់ទឹកដីណាមួយឱ្យរុស្ស៊ីនោះឡើយ។ លោក Mykhailo Podolyak ទីប្រឹក្សាប្រធានាធិបតីអ៊ុយក្រែនបាននិយាយថា ការធ្វើសម្បទានណាមួយនឹងជះលទ្ធផលផ្ទុយពីការរំពឹងទុកដល់អ៊ុយក្រែន ដោយសារតែរុស្ស៊ីនឹងវាយប្រហារត្រឡប់មកវិញខ្លាំងក្លាជាងមុន បន្ទាប់ពីមានការផ្អាកការឈប់វាយប្រយុទ្ធគ្នាណាមួយ។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយថា លោកបាននិយាយជាមួយនឹងនាយករដ្ឋមន្ត្រីអ៊ីតាលីលោក Mario Draghi កាលពីថ្ងៃសៅរ៍ និងបានសង្កត់ធ្ងន់អំពីសារៈសំខាន់នៃការដាក់ទណ្ឌកម្មបន្ថែមលើរុស្ស៊ីនិងការធ្វើយ៉ាងណាឱ្យរុស្ស៊ីបញ្ឈប់ការរាំងខ្ទប់កំពង់ផែរបស់អ៊ុយក្រែន។ លោក Zelenskyy បានសរសេរនៅលើ Twitter ថា លោកក៏បានថ្លែងអំណរគុណផងដែរដល់លោក Draghi សម្រាប់ «ការគាំទ្រគ្មានលក្ខខណ្ឌ» របស់លោកលើកិច្ចប្រឹងប្រែងរបស់អ៊ុយក្រែននៅក្នុងការក្លាយជាសមាជិករបស់សហភាពអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានចោទប្រកាន់ប្រទេសរុស្ស៊ីថាបានរាំងខ្ទប់ការនាំចេញរបស់អ៊ុយក្រែននូវផលិតផលស្បៀងអាហារចំនួន ២២ លានតោន និងបានព្រមានថា ប្រសិនបើកំពង់ផែរបស់ខ្លួននៅតែរាំងខ្ទប់ ប្រទេសជាច្រើននឹងប្រឈមនឹងវិបត្តិស្បៀងអាហារ។ លោក Zelenskyy បាននិយាយថា៖ «សហគមន៍អន្តរជាតិត្រូវតែជួយធ្វើយ៉ាងណាកុំឱ្យមានការរាំងខ្ទប់ដល់កំពង់ផែរបស់អ៊ុយក្រែន បើមិនដូច្នេះទេ វិបត្តិស្បៀងអាហារនឹងកើតឡើងក្រោយវិបត្តិថាមពល [នៅពេលបច្ចុប្បន្ន] នេះ ហើយប្រទេសជាច្រើនបន្ថែមទៀតនឹងប្រឈមនឹងវិបត្តិនេះ»។ នេះបើយោងតាមការបញ្ជាក់របស់ខុទ្ទកាល័យប្រធានាធិបតីអ៊ុយក្រែន។ លោក Zelenskyy ថ្លែងដូច្នេះនៅក្នុងអំឡុងពេលប្រជុំជាមួយនឹងប្រព័ន្ធផ្សព្វផ្សាយ បន្ទាប់ពីលោកបានពិភាក្សាជាមួយនឹងនាយករដ្ឋមន្ត្រីព័រទុយហ្គាល់លោក Antonio Costa នៅក្នុងរដ្ឋធានីកៀវ ប្រទេសអ៊ុយក្រែនកាលពីថ្ងៃសៅរ៍មក។ នេះបើយោងតាមបណ្ដាញព័ត៌មាន CNN។
- ទីភ្នាក់ងារព័ត៌មាន RIA Novosti របស់រុស្ស៊ីបានរាយការណ៍កាលពីថ្ងៃសៅរ៍ថា រដ្ឋាភិបាលរុស្ស៊ីកំពុងពិចារណាលើការដោះដូរអ្នកទោសអ៊ុយក្រែនដែលមកពីកងវរសេនាធំ Azov ជាមួយនឹងលោក Viktor Medvedchuk ដែលជាអ្នកនយោបាយនិងជាមហាសេដ្ឋីអ៊ុយក្រែនដែលមានទំនោរទៅរករុស្ស៊ី។ នេះបើយោងតាមបណ្ដាញព័ត៌មាន CNN។
២២:០៦
២៣.៥.២០២២
ថ្ងៃចន្ទ ទី ២៣ ខែឧសភា៖
- ថ្នាក់ដឹកនាំគណបក្សប្រជាធិបតេយ្យនិងថ្នាក់ដឹកនាំគណបក្សសាធារណរដ្ឋនៃព្រឹទ្ធសភាសហរដ្ឋអាមេរិកបានស្នើនូវសេចក្ដីសម្រេចមួយនៅថ្ងៃចន្ទនេះដើម្បីគាំទ្រកិច្ចប្រឹងប្រែងរបស់ប្រទេសស៊ុយអែតនិងប្រទេសហ្វាំងឡង់នៅក្នុងការចូលជាសមាជិកអង្គការអូតង់ (NATO)។ លោក Mitch McConnell មេដឹកនាំគណបក្សសាធារណរដ្ឋនៃព្រឹទ្ធសភាអាមេរិក និងលោក Jim Risch សមាជិកកំពូលខាងគណបក្សសាធារណរដ្ឋនៃគណៈកម្មាធិការទំនាក់ទំនងបរទេសនៃព្រឹទ្ធសភាអាមេរិក បានចូលរួមជាមួយនឹងលោក Chuck Schumer មេដឹកនាំគណបក្សប្រជាធិបតេយ្យនៃព្រឹទ្ធសភាអាមេរិក និងលោក Bob Menendez ប្រធានគណៈកម្មាធិការទំនាក់ទំនងបរទេសនៃព្រឹទ្ធសភាអាមេរិកនិងសមាជិកព្រឹទ្ធសភាផ្សេងទៀតនៅក្នុងការស្នើសេចក្ដីសម្រេចនេះ។ លោក Menendez បានបញ្ជាក់នៅក្នុងសេចក្ដីថ្លែងការណ៍មួយថា៖ «យើងគាំទ្រទាំងស្រុងលើពាក្យសុំរបស់ពួកគេនៅក្នុងការចូលជាសមាជិកអង្គការអូតង់ និងទន្ទឹងរង់ចាំនូវការចូលជាសមាជិកនេះបានលឿននៅក្នុងរយៈពេលប៉ុន្មានខែខាងមុខ»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីតួកគីលោក Recep Tayyip Erdogan ដែលប្រទេសរបស់លោកបានជំទាស់ទៅនឹងកិច្ចប្រឹងប្រែងរបស់ប្រទេសស៊ុយអែតនិងប្រទេសហ្វាំងឡង់នៅក្នុងការចូលជាសមាជិកអង្គការអូតង់ (NATO) បានអំពាវនាវនៅថ្ងៃចន្ទនេះឱ្យរដ្ឋាភិបាលស៊ុយអែតចាត់ «វិធានការច្បាស់លាស់» ដែលនឹងកាត់បន្ថយក្ដីបារម្ភផ្នែកសន្តិសុខរបស់តួកគី។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ កន្លងមក ប្រទេសតួកគីបានបញ្ជាក់ថា ខ្លួនជំទាស់ទៅនឹងការចូលជាសមាជិករបស់ប្រទេសទាំងពីរនៅក្នុងអង្គការអូតង់ ដោយសារតែប្រទេសទាំងពីរគាំទ្រក្រុម Kurdistan Workers' Party (PKK) និងក្រុមផ្សេងទៀតដែលប្រទេសតួកគីចាត់ទុកថាជាក្រុមភេរវករ។
- ប្រទេសលីទុយអានី ស្លូវ៉ាគី ឡេតូនី និងអេស្ដូនីនឹងអំពាវនាវនៅថ្ងៃអង្គារស្អែកឱ្យមានការរឹបអូសទ្រព្យសម្បត្តិរបស់ប្រទេសរុស្ស៊ីដែលសហភាពអឺរ៉ុបបានបង្កក ដើម្បីផ្គត់ផ្គង់ដល់ការកសាងប្រទេសអ៊ុយក្រែនឡើងវិញនៅពេលណាដែលការឈ្លានពានរបស់រុស្ស៊ីបានបញ្ចប់។ នេះបើយោងតាមលិខិតរួមគ្នាមួយច្បាប់របស់ប្រទេសទាំង ៤ ដែលបានបង្ហាញឡើងនៅថ្ងៃចន្ទនេះ។
- បណ្ដាញព័ត៌មាន BBC បានដកស្រង់សម្ដីរបស់ឧបនាយករដ្ឋមន្ត្រីទីមួយនៃប្រទេសអ៊ុយក្រែនអ្នកស្រី Yulia Svyrydenko ដែលបាននិយាយនៅថ្ងៃចន្ទនេះថា សហគមន៍អន្តរជាតិគួរតែជួយធានាធ្វើយ៉ាងណាឱ្យមានការឆ្លងកាត់ប្រកបដោយសុវត្ថិភាពនៅក្នុងច្រករបៀងមួយសម្រាប់កប៉ាល់នានាដែលដឹកស្បៀងអាហារចេញពីកំពង់ផែនៃទីក្រុង Odesa ដើម្បីជួយប្រទេសអ៊ុយក្រែននិងដើម្បីបញ្ចៀសមិនឱ្យមានគ្រោះទុរ្ភិក្សកើតឡើងនៅលើពិភពលោក។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីបេឡារុសលោក Alexander Lukashenko បាននិយាយនៅថ្ងៃចន្ទនេះថា លោកមានក្ដីបារម្ភអំពីអ្វីដែលលោកហៅថាជាវិធានការរបស់ក្រុមបស្ចិមប្រទេសនៅក្នុងការ «បំបែក» ប្រទេសអ៊ុយក្រែន និងបានចោទប្រកាន់ប្រទេសប៉ូឡូញថាបានស្វះស្វែងដណ្ដើមត្រួតត្រាផ្នែកភាគខាងលិចនៃប្រទេសអ៊ុយក្រែន។ លោកមិនបានផ្ដល់ភស្តុតាងណាមួយសម្រាប់ការអះអាងរបស់លោកទាំងនេះទេ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសសហរដ្ឋអាមេរិកលោក Antony Blinken បានជួបជាមួយនឹងរដ្ឋមន្ត្រីការបរទេសជប៉ុនលោក Hayashi Yoshimasa នៅក្នុងទីក្រុងតូក្យូ ប្រទេសជប៉ុននៅថ្ងៃចន្ទនេះ។ អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានបញ្ជាក់នៅក្នុងសេចក្ដីថ្លែងការណ៍មួយថា៖ «លោករដ្ឋមន្ត្រី [Blinken] និងរដ្ឋមន្ត្រីការបរទេស [ជប៉ុន] បានសរសើរសម្ព័ន្ធភាពរវាងសហរដ្ឋអាមេរិកនិងប្រទេសជប៉ុនថាជាមូលដ្ឋាននៃសន្តិភាព សន្តិសុខ និងវិបុលភាពនៅក្នុងតំបន់ឥណ្ឌូប៉ាស៊ីហ្វិក»។ លោក Price បានបន្ថែមថា៖ «លោកទាំងពីរបានបញ្ជាក់ជាថ្មីអំពីការគាំទ្រយ៉ាងមុតមាំរបស់ពួកគេចំពោះអធិបតេយ្យភាពនិងឯករាជ្យភាពរបស់ប្រទេសអ៊ុយក្រែន និងបានតាំងចិត្តនៅក្នុងការធ្វើឱ្យរដ្ឋាភិបាលរុស្ស៊ីទទួលខុសត្រូវចំពោះសង្គ្រាមនៃភាពគឃ្លើនរបស់ខ្លួននៅក្នុងប្រទេសអ៊ុយក្រែន»។
- ប្រធានាធិបតីរុស្ស៊ីលោក Vladimir Putin បាននិយាយថា សេដ្ឋកិច្ចរបស់រុស្ស៊ីអាច «ទ្រាំទ្រ» នឹងការដាក់ទណ្ឌកម្មរបស់អន្តរជាតិបានយ៉ាងល្អ បើទោះបីជាវា «មិនងាយស្រួល» ក៏ដោយ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ លោក Putin នៅថ្ងៃចន្ទនេះបានទទួលជួបពិភាក្សាជាមួយនឹងប្រធានាធិបតីបេឡារុសលោក Alexander Lukashenko នៅរមណីយដ្ឋាន Sochi នៅសមុទ្រខ្មៅ។ លោក Putin ថ្លែងដូច្នេះថា៖ «សេដ្ឋកិច្ចរបស់រុស្ស៊ីអាចទ្រាំទ្រការដាក់ទណ្ឌកម្មបាន។ វាអាចទ្រាំទ្របានយ៉ាងប្រសើរបំផុត»។
- រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ខ្លួនកំពុងសម្លឹងមើលលើសំណើគម្រោងសន្តិភាពរបស់ប្រទេសអ៊ីតាលីនៅក្នុងការបញ្ចប់សង្គ្រាមនៅអ៊ុយក្រែន។ អនុរដ្ឋមន្ត្រីការបរទេសរុស្ស៊ីលោក Andrey Rudenko បានប្រាប់អ្នកសារព័ត៌មានថា៖ «យើងបានទទួលសំណើនេះកាលពីពេលថ្មីៗនេះនិងកំពុងសិក្សាលើសំណើនេះ»។ លោកបានបដិ សេធមិនផ្ដល់ព័ត៌មានលំអិតណាមួយទេ។ នេះបើយោងតាមទីភ្នាក់ងារព័ត៌មាន AFP។
- ទីភ្នាក់ងារព័ត៌មាន RIA របស់រុស្ស៊ីបានដកស្រង់សម្ដីរបស់អនុរដ្ឋមន្ត្រីការបរទេសរុស្ស៊ីលោក Andrey Rudenko ដែលបាននិយាយនៅថ្ងៃចន្ទថា ប្រទេសរុស្ស៊ីនឹងត្រៀមលក្ខណៈរួចរាល់នៅក្នុងការត្រឡប់ទៅរកការចរចាវិញជាមួយនឹងប្រទេសអ៊ុយក្រែន «ឱ្យបានឆាប់នៅពេលណាដែលរដ្ឋាភិបាលអ៊ុយក្រែនបង្ហាញនូវជំហរដែលមានប្រយោជន៍»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីសហរដ្ឋអាមេរិកលោក Joe Biden បាននិយាយនៅថ្ងៃចន្ទថា ប្រធានាធិបតីរុស្ស៊ីលោក Vladimir Putin «ត្រូវតែទទួលរងនូវផលវិបាកធ្ងន់ធ្ងរសម្រាប់ភាពសាហាវយង់ឃ្នងរបស់ខ្លួននៅអ៊ុយក្រែន»។ នៅក្នុងការថ្លែងក្នុងអំឡុងពេលទស្សនកិច្ចទៅកាន់ប្រទេសជប៉ុន លោក Biden បានលើកឡើងអំពីសារៈសំខាន់នៃការបញ្ជូនសារដោយមានការដាក់ទណ្ឌកម្មរយៈពេលវែងសម្រាប់ប្រទេសរុស្ស៊ី។
- អ្នកនាំពាក្យរបស់នាយករដ្ឋមន្ត្រីចក្រភពអង់គ្លេសបានបញ្ជាក់នៅថ្ងៃចន្ទថា លោកនាយករដ្ឋមន្ត្រី Boris Johnson បានឯកភាពជាមួយនឹងនាយករដ្ឋមន្ត្រីថ្មីរបស់ប្រទេសអូស្ត្រាលីលោក Anthony Albanese ថា សង្គ្រាមនៅអ៊ុយក្រែនមិនត្រូវលើកទឹកចិត្តប្រទេសផ្សេងទៀតឱ្យបំផ្លាញដល់ស្ថិរភាពរបស់ពិភពលោកនោះទេ។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅថ្ងៃចន្ទថា មនុស្ស៨៧នាក់ត្រូវបានសម្លាប់នៅក្នុងការវាយប្រហាររបស់រុស្ស៊ីកាលពីដើមខែនេះលើមូលដ្ឋានយោធាមួយកន្លែងនៅក្នុងតំបន់មួយនៅភាគខាងជើងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
- រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ក្រុមបស្ចិមប្រទេសបានបង្កឱ្យមានវិបត្តិស្បៀងអាហារនៅលើពិភពលោកតាមរយៈការដាក់ទណ្ឌកម្មតឹងតែងបំផុតនៅក្នុងប្រវត្តិសាស្ត្រសម័យទំនើបនេះលើប្រទេសរុស្ស៊ីទាក់ទិននឹងរឿងសង្គ្រាមនៅអ៊ុយក្រែន។ រដ្ឋាភិបាលរុស្ស៊ីបានលើកឡើងថា ប្រធានាធិបតីរុស្ស៊ីលោក Vladimir Putin បានឯកភាពជាមួយនឹងការវាយតម្លៃរបស់អង្គការសហប្រជាជាតិដែលថា ពិភពលោកបានប្រឈមនឹងវិបត្តិស្បៀងអាហារដែលវិបត្តិនេះអាចនឹងបណ្ដាលឱ្យមានគ្រោះទុរ្ភិក្សកើតឡើង។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវនៅថ្ងៃចន្ទឱ្យមានការផ្ដល់សព្វាវុធបន្ថែមទៀតដល់ប្រទេសអ៊ុយក្រែន។ លោកអំពាវនាវដូច្នេះនៅក្នុងកិច្ចប្រជុំរបស់អង្គការវេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីស។ លោក Zelenskyy បានថ្លែងសុន្ទរកថាតាមអនឡាញទៅកាន់វេទិកាសេដ្ឋកិច្ចពិភព លោកថា កន្លងមក ជីវិតមនុស្សរាប់ម៉ឺននាក់អាចត្រូវបានជួយសង្គ្រោះ ប្រសិនបើអ៊ុយ ក្រែនបានទទួល «១០០% នូវអ្វីដែលយើងត្រូវការក្នុងពេលតែមួយកាលពីខែកុម្ភៈ» នៅពេលដែលរុស្ស៊ីបានឈ្លានពានអ៊ុយក្រែន។ លោកបានបន្ថែមថា៖ «ហេតុដូច្នេះហើយបានជាអ៊ុយក្រែនត្រូវការសព្វាវុធទាំងអស់ដែលយើងស្នើ មិនមែនគ្រាន់តែសព្វាវុធដែលត្រូវបានផ្ដល់ឱ្យប៉ុណ្ណោះទេ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃចន្ទបានថ្លែងប្រាប់កិច្ចប្រជុំរបស់បណ្ដាមេដឹកនាំអាជីវកម្មនៅលើពិភពលោកនៅក្នុងទីក្រុង Davos ប្រទេសស្វីសថា ពិភពលោកបានប្រឈមនឹងចំណុចរបត់មួយនិងត្រូវតែបង្កើនការដាក់ទណ្ឌ កម្មប្រឆាំងនឹងរុស្ស៊ី។ លោក Zelenskyy បានថ្លែងនៅក្នុងសុន្ទរកថាមួយថា៖ «ប្រវត្តិ សាស្ត្រកំពុងស្ថិតនៅចំណុចរបត់។ ...នេះគឺពិតជាពេលវេលាដែលត្រូវសម្រេចថាតើកម្លាំងតិរច្ឆាននឹងត្រួតត្រាពិភពលោកឬក៏យ៉ាងណានោះ»។ នេះបើយោងតាមទីភ្នាក់ ងារព័ត៌មាន Reuters។
- រដ្ឋមន្ត្រីសេដ្ឋកិច្ចអាល្លឺម៉ង់លោក Robert Habeck បានព្រមានប្រទេសហុងគ្រីមិនឱ្យរារាំងកិច្ចប្រឹងប្រែងរបស់សហភាពអឺរ៉ុបនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ីដើម្បីឆ្លើយតបទៅនឹងសង្គ្រាមរបស់រុស្ស៊ីនៅក្នុងប្រទេសអ៊ុយក្រែន។ លោក Habeck បានបញ្ជាក់នៅក្នុងកិច្ចប្រជុំរបស់អង្គការវេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីសនៅថ្ងៃចន្ទថា៖ «ប្រទេសផ្សេងៗមានដំណោះស្រាយខុស ៗគ្នា»។ លោកបានបន្ថែមថា៖ «ខ្ញុំរំពឹងថា ប្រទេសនីមួយៗ ដែលក្នុងនោះរួមទាំងប្រ ទេសហុងគ្រីផងដែរនឹងធ្វើការដើម្បីរកដំណោះស្រាយ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីផ្នែកអាកាសធាតុរបស់ប្រទេសប៉ូឡូញអ្នកស្រី Anna Moskwa បានបញ្ជាក់នៅលើ Twitter នៅថ្ងៃចន្ទថា ប្រទេសប៉ូឡូញបានសម្រេចបញ្ចប់កិច្ចព្រមព្រៀងអន្តររដ្ឋាភិ បាលមួយជាមួយនឹងប្រទេសរុស្ស៊ីទាក់ទិននឹងបំពង់ឧស្ម័ន Yamal។ អ្នកស្រី Moskwa បានលើកឡើងដូច្នេះថា៖ «ភាពគឃ្លើនរបស់រុស្ស៊ីលើអ៊ុយក្រែនបានធ្វើឱ្យរដ្ឋាភិបាលប៉ូឡូញតាំងចិត្តជាក់ច្បាស់ថានឹងត្រូវតែមានភាពឯករាជ្យទាំងស្រុងពីឧស្ម័នរបស់រុស្ស៊ី។ យើងតែងតែដឹងថា ក្រុមហ៊ុន Gazprom [ក្រុមហ៊ុនឧស្ម័នរបស់រុស្ស៊ី] មិនមែនជាដៃគូដ៏គួរឱ្យទុកចិត្តនោះទេ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ខ្លួនមានការព្រួយបារម្ភអំពីសវនាការកាត់ទោសទាហានរុស្ស៊ីម្នាក់ដែលរងការចោទប្រកាន់ពីបទឧក្រិដ្ឋកម្មសង្គ្រាមនៅក្នុងរដ្ឋធា នីកៀវ ប្រទេសអ៊ុយក្រែន និងបានបន្ថែមថា ខ្លួនមិនអាចការពារផលប្រយោជន៍របស់ទាហានរុស្ស៊ីនោះដោយផ្ទាល់បាន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅក្នុងសន្និសីទកាសែតតាមអនឡាញជាមួយនឹងអ្នកសារព័ត៌ មានថា៖ «ជាការពិត យើងមានការបារម្ភអំពីវាសនារបស់ពលរដ្ឋយើង ប៉ុន្តែ ខ្ញុំនិយាយឡើងវិញ យើងមិនមានសមត្ថភាពនៅក្នុងការការពារប្រយោជន៍របស់ពលរដ្ឋនោះដោយផ្ទាល់នោះទេ»។ នេះបើយោងតាមទីភ្នាក់ងារព័ត៌មាន Reuters។
- មេដឹកនាំនៃតំបន់ Donetsk ដែលជាតំបន់ផ្ដាច់ខ្លួនចេញពីអ៊ុយក្រែន បាននិយាយនៅថ្ងៃចន្ទថា យុទ្ធជនដែលចុះចាញ់នៅរោងចក្រដែកថែប Azovstal ក្នុងទីក្រុង Mariupol នឹងប្រឈមនឹងការកាត់ទោសនៅក្នុងតំបន់ផ្ដាច់ខ្លួននេះ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Interfax របស់រុស្ស៊ី។ សេចក្ដីរាយការណ៍នេះមិនបានបញ្ជាក់អំពីបទចោទប្រកាន់អ្វីដែលយុទ្ធជនទាំងនោះនឹងប្រឈមនោះទេ។ នេះបើយោងតាមទីភ្នាក់ងារព័ត៌មាន Reuters។
- ទីភ្នាក់ងារជនភៀសខ្លួនអង្គការសហប្រជាជាតិបានបញ្ជាក់នៅថ្ងៃចន្ទថា មនុស្សជាង ៦លាន៥សែននាក់បានភៀសខ្លួនចេញពីប្រទេសអ៊ុយក្រែន តាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន Reuters។
- ប្រទេសអ៊ុយក្រែននិងប៉ូឡូញបានឯកភាពគ្នាកាលពីថ្ងៃអាទិត្យនៅក្នុងការបង្កើតការគ្រប់គ្រងគយរួមគ្នានៅតាមព្រំដែន និងធ្វើការលើក្រុមហ៊ុនផ្លូវដែករួមគ្នាដើម្បីសម្រួលដល់ការធ្វើដំណើររបស់ប្រជាពលរដ្ឋនិងបង្កើនសក្កានុពលនៃការនាំចេញរបស់ប្រ ទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- អ្នកតំណាងមកពីប្រទេសចំនួន៧ដែលក្នុងនោះរួមមានទាំងប្រទេសដែលដើរចេញពិកិច្ចប្រជុំថ្នាក់រដ្ឋមន្ត្រីពាណិជ្ជកម្មរបស់វេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ី ហ្វិក(APEC)នៅក្នុងទីក្រុងបាងកក ប្រទេសថៃ ដើម្បីតវ៉ាប្រឆាំងនឹងការឈ្លានពានរបស់រុស្ស៊ីលើអ៊ុយក្រែនផងដែរ បានបញ្ជាក់នៅក្នុងសេចក្ដីថ្លែងការណ៍រួមកាលពីថ្ងៃអាទិត្យថា ពួកគេមាន «ក្ដីបារម្ភធ្ងន់ធ្ងរ» ទាក់ទិននឹងវិបត្តិមនុស្សធម៌នៅក្នុងប្រទេសអ៊ុយក្រែន។ បណ្ដាប្រទេសទាំងនេះបានលើកឡើងដូច្នេះថា៖ «ដោយបញ្ជាក់ឡើងវិញអំពីសារៈសំខាន់នៃប្រព័ន្ធរៀបរយអន្តរជាតិដែលផ្អែកលើច្បាប់ ដែលទ្រទ្រង់នូវតំបន់អាស៊ីប៉ាស៊ីហ្វិកមួយដែលមានលក្ខណៈបើកចំហ ស្វាហាប់ ធន់ និងមានសន្តិភាព យើងជំរុញខ្លាំងក្លាឱ្យប្រទេសរុស្ស៊ីបញ្ឈប់ការប្រើកម្លាំងរបស់ខ្លួនជាបន្ទាន់និងដកចេញទាំងស្រុងនិងគ្មានលក្ខខណ្ឌនូវកងទ័ពរបស់ខ្លួនទាំងអស់ពីប្រទេសអ៊ុយក្រែន»។ ប្រទេសទាំង ៧ នោះគឺសហរដ្ឋអាមេរិក អូស្ត្រាលី កាណាដា ឈីលី ជប៉ុន សាធារណ រដ្ឋកូរ៉េ និងនូវែលសេឡង់។ រីឯប្រទេសដែលដើរចេញពីកិច្ចប្រជុំនេះកាលពីថ្ងៃសៅរ៍ដើម្បីតវ៉ានឹងការឈ្លានពានរបស់រុស្ស៊ីលើអ៊ុយក្រែនគឺសហរដ្ឋអាមេរិក កាណាដា នូវែលសេឡង់ ជប៉ុន និងអូស្ត្រាលី។ នេះបើយោងតាមទីភ្នាក់ងារព័ត៌មាន Reuters។