២១:១៣
១៦.៥.២០២២
ថ្ងៃចន្ទ ទី ១៦ ខែឧសភា៖
- លោក Stanislav Zas អគ្គលេខាធិការអង្គការសន្ធិសញ្ញាសន្តិសុខរួម (CSTO) ដែលជាអង្គការដឹកនាំដោយប្រទេសរុស្ស៊ី បានប្រាប់អ្នកសារព័ត៌មាននៅថ្ងៃចន្ទនេះថា ការពង្រីកសមាជិកភាពរបស់អង្គការអូតង់ (NATO) នឹងបណ្ដាលឱ្យមានការកើនឡើងនូវភាពតានតឹងនៅទ្វីបអឺរ៉ុប។ លោក Zas បានថ្លែងបន្ទាប់ពីកិច្ចប្រជុំរបស់បណ្ដាមេដឹកនាំនៃអង្គការ CSTO នៅក្នុងទីក្រុងមូស្គូ ប្រទេសរុស្ស៊ីបានបញ្ចប់ទៅថា អង្គការ CSTO កំពុងប្រឈមនឹងបញ្ហានៃយោធានីយកម្មបន្ថែមទៀតរបស់តំបន់អឺរ៉ុបខាងកើត។ នេះបើយោងតាមទីភ្នាក់ងារព័ត៌មាន Reuters។
- មេដឹកនាំខាងគណបក្សសាធារណរដ្ឋនៃព្រឹទ្ធសភាសហរដ្ឋអាមេរិកលោក Mitch McConnell បាននិយាយថា សហរដ្ឋអាមេរិកនឹងចាត់វិធានការឱ្យបានឆាប់នៅក្នុងការផ្ដល់សច្ចានុមតិលើពាក្យសុំរបស់ប្រទេសស៊ុយអែតក្នុងការចូលជាសមាជិកអង្គការអូតង់ (NATO)។ នេះបើយោងតាមទីភ្នាក់ងារព័ត៌មាន Associated Press។ លោក McConnell បានបញ្ជាក់នៅក្នុងអំឡុងពេលសន្និសីទកាសែតមួយក្នុងទីក្រុងស្តុកខុល ប្រទេសស៊ុយអែតថា៖ «យើងសង្ឃឹមថានឹងអនុម័តលើពាក្យសុំនេះមុនខែសីហា។ យើងមានទំនុកចិត្តថាពាក្យសុំនេះនឹងត្រូវបានយល់ព្រម»។ លោក McConnell បានធ្វើទស្សនកិច្ចនៅក្នុងតំបន់អឺរ៉ុបនោះជាមួយនឹងគណៈប្រតិភូសមាជិកព្រឹទ្ធសភាអាមេរិកផ្សេងទៀតខាងគណបក្សសាធារណរដ្ឋ ដើម្បីបង្ហាញការគាំទ្រ ស្របពេលដែលតំបន់នោះប្រឈមនឹងការឈ្លានពានរបស់រុស្ស៊ី។ កាលពីព្រឹកថ្ងៃចន្ទ បន្ទាប់ពីបានជួបប្រជុំជាមួយនឹងប្រធានាធិបតីហ្វាំងឡង់លោក Sauli Niinisto នៅក្នុងទីក្រុងហែលស៊ិនគី ប្រទេសហ្វាំងឡង់មក លោក McConnell ក៏បានបញ្ជាក់ផងដែរថា សភាសហរដ្ឋអាមេរិកនឹងស្វះស្វែងអនុម័តលើពាក្យសុំរបស់ប្រទេសហ្វាំងឡង់នៅក្នុងការចូលជាសមាជិកអង្គការអូតង់មុនពេលសភាឈប់សម្រាកនៅខែសីហាខាងមុខ។
- មេដឹកនាំនៃប្រទេសដាណឺម៉ាក អ៊ីស្លង់ និងន័រវែសបានស្វាគមន៍ការសម្រេចរបស់ប្រទេសហ្វាំងឡង់និងរបស់ប្រទេសស៊ុយអែតនៅក្នុងការដាក់ពាក្យចូលជាសមាជិកអង្គការអូតង់ (NATO)។ ប្រទេសដាណឺម៉ាក អ៊ីស្លង់ និងន័រវែសបានបញ្ជាក់នៅក្នុងសេចក្ដីថ្លែងការណ៍រួមមួយថា៖ «យើងស្វាគមន៍យ៉ាងមុតមាំនូវការសម្រេចរបស់ប្រទេសហ្វាំងឡង់និងរបស់ប្រទេសស៊ុយអែតនៅក្នុងការដាក់ពាក្យចូលជាសមាជិកអង្គការអូតង់»។ នេះបើយោងតាមបណ្ដាញព័ត៌មាន CNN។
- វិមានប្រធានាធិបតីបារាំងបានបញ្ជាក់នៅថ្ងៃចន្ទនេះថា លោកប្រធានាធិបតី Emmanuel Macron គាំទ្រពេញទំហឹងលើការសម្រេចរបស់ប្រទេសស៊ុយអែតនៅក្នុងការចូលជាសមាជិករបស់អង្គការអូតង់ (NATO)។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលស៊ុយអែតដែលដឹកនាំដោយគណបក្សប្រជាធិបតេយ្យសង្គមនិយម នៅថ្ងៃចន្ទនេះបានសម្រេចជាផ្លូវការនៅក្នុងការដាក់ពាក្យចូលជាសមាជិកអង្គការអូតង់ (NATO) បន្ទាប់ពីប្រទេសហ្វាំងឡង់ដែលជាប្រទេសជិតខាងរបស់ខ្លួនបានប្រកាសជាផ្លូវការនៅក្នុងការដាក់ពាក្យចូលជាសមាជិកអង្គការអូតង់នេះកាលពីថ្ងៃអាទិត្យ។ នេះបើយោងតាមទីភ្នាក់ងារព័ត៌មាន Reuters។
- ប្រទេសអ៊ីស្រាអែលកំពុងបង្កើនទិន្នផលឧស្ម័នធម្មជាតិរបស់ខ្លួននៅឯសមុទ្រ និងមានបំណងសម្រេចឱ្យបាននូវកិច្ចព្រមព្រៀងអំពីការផ្គត់ផ្គង់ឧស្ម័នជាមួយនឹងទ្វីបអឺរ៉ុបនៅក្នុងរយៈពេលប៉ុន្មានខែខាងមុខ ស្របពេលដែលទ្វីបអឺរ៉ុបកំពុងស្វះស្វែងរកជម្រើសផ្សេងជំនួសឱ្យការផ្គត់ផ្គង់ឧស្ម័នរបស់រុស្ស៊ី។ អគ្គនាយកនៃក្រសួងថាមពលអ៊ីស្រាអែលលោក Lior Schillat បាននិយាយថា៖ «យើងសង្ឃឹមថានឹងបង្កើតដំណើរការការងារឱ្យបានឆាប់ ហើយនៅក្នុងរដូវក្ដៅខាងមុខនឹងសម្រេចឱ្យបាននូវកិច្ចព្រមព្រៀងក្របខ័ណ្ឌមួយ»។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិរុស្ស៊ីបានបញ្ជាក់នៅថ្ងៃចន្ទនេះថា កិច្ចព្រមព្រៀងមួយត្រូវបានសម្រេចឡើងដើម្បីដឹកជញ្ជូនទាហានអ៊ុយក្រែនដែលរងរបួសចេញពីរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន ទៅកាន់មន្ទីរពេទ្យមួយកន្លែងនៅក្នុងក្រុង Novoazovsk ដែលត្រួតត្រាដោយរុស្ស៊ី។ ក្រសួងនេះបានបន្ថែមថា ច្រករបៀងមនុស្សធម៌មួយត្រូវបានបើកសម្រាប់គោលបំណងនេះ។ នេះបើយោងតាមទីភ្នាក់ងារព័ត៌មាន Reuters។
- តុលាការមួយនៅក្នុងទីក្រុងមូស្គូនៃប្រទេសរុស្ស៊ីបានពិន័យវិទ្យុសេរីភាព/វិទ្យុអឺរ៉ុបសេរី (Radio Liberty/Radio Free Europe) ដែលជាប្រព័ន្ធផ្សព្វផ្សាយឧបត្ថម្ភដោយសហរដ្ឋអាមេរិក ចំនួន ១៨ លានរូប ដែលស្មើនឹង ២៨០.២៤៧ ដុល្លារអាមេរិក សម្រាប់ការមិនលុបចោលនូវព័ត៌មានដែលរុស្ស៊ីថាជាព័ត៌មាន «ក្លែងក្លាយ» អំពីប្រតិបត្តិការរបស់រុស្ស៊ីនៅអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Interfax របស់រុស្ស៊ីនៅថ្ងៃចន្ទនេះ។ អង្គភាពរបស់រុស្ស៊ីដែលមានតួនាទីតាមដានសារគមនាគមន៍បានបិទគេហទំព័ររបស់វិទ្យុសេរីភាព/វិទ្យុអឺរ៉ុបសេរី និងប្រព័ន្ធផ្សព្វផ្សាយបរទេសមួយចំនួនទៀតកាលពីដើមខែមីនា។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទនេះថា លោកបានពិភាក្សាជាមួយនឹងប្រធានអង្គការមូលនិធិរូបិយវត្ថុអន្តរជាតិ (IMF) អ្នកស្រី Kristalina Georgieva អំពីតម្រូវការសម្រាប់ការគាំទ្រផ្នែកហិរញ្ញវត្ថុចំពោះសេដ្ឋកិច្ចអ៊ុយក្រែន។ លោក Zelenskyy បានសរសេរនៅលើ Twitter ថា៖ «អង្គការ IMF គឺជាដៃគូដ៏សំខាន់របស់យើង។ យើងទន្ទឹងរង់ចាំធ្វើការរួមគ្នាប្រកបដោយផ្លែផ្កាបន្ថែមទៀតនៅក្នុងការរក្សាស្ថិរភាពហិរញ្ញវត្ថុរបស់ប្រទេសអ៊ុយក្រែន»។ នេះបើយោងតាមទីភ្នាក់ងារព័ត៌មាន Reuters។
- មន្ត្រីនានាបាននិយាយថា គណៈកម្មការអឺរ៉ុបនៃសហភាពអឺរ៉ុបគ្រោងស្នើនៅថ្ងៃពុធខាងមុខនូវកញ្ចប់ជំនួយហិរញ្ញវត្ថុថ្មីសម្រាប់ប្រទេសអ៊ុយក្រែន ដែលក្នុងនោះរួមមានទាំងកម្ចីថ្មីដើម្បីផ្ដល់សាច់ប្រាក់ភ្លាមៗទៅឱ្យរដ្ឋាភិបាលអ៊ុយក្រែននិងការតាំងចិត្តសម្រាប់ហិរញ្ញប្បទានរយៈពេលវែងលើការកសាងប្រទេសអ៊ុយក្រែនឡើងវិញផងដែរ។ នេះបើយោងតាមទីភ្នាក់ងារព័ត៌មាន Reuters។
- ក្រសួងហិរញ្ញវត្ថុអ៊ុយក្រែនបានបញ្ជាក់នៅថ្ងៃចន្ទថា ប្រទេសអ៊ុយក្រែននិងប្រទេសជប៉ុនបានចុះហត្ថលេខាលើកិច្ចព្រមព្រៀងមួយអំពីកម្ចីចំនួន ១០០ លានដុល្លារ ដែលមានបំណងជាចម្បងជួយគាំទ្រប្រជាពលរដ្ឋងាយរងគ្រោះនៅក្នុងប្រទេសអ៊ុយក្រែន បន្ទាប់ពីរុស្ស៊ីបានឈ្លានពាន។ ក្រសួងនេះបានបន្ថែមថា កម្ចីនេះគឺសម្រាប់រយៈពេល ៣០ ឆ្នាំ ដែលក្នុងនោះមានទាំងរយៈពេលអនុគ្រោះចំនួន១០ឆ្នាំផងដែរ។ នេះបើយោងតាមទីភ្នាក់ងារព័ត៌មាន Reuters។
- អ៊ុយក្រែនបានបញ្ជាក់នៅថ្ងៃចន្ទថា កងទ័ពរបស់ខ្លួនបានវាយប្រហារតបតរុញច្រានកងទ័ពរុស្ស៊ីនៅក្នុងតំបន់ Kharkiv ដែលអាចធ្វើឱ្យកងទ័ពអ៊ុយក្រែនរុលទៅដល់ព្រំដែនជាប់ប្រទេសរុស្ស៊ីបាន។ ក្រសួងការពារជាតិអ៊ុយក្រែនបានបង្ហោះវីដេអូមួយបង្ហាញនូវអ្វីដែលខ្លួនបញ្ជាក់ថាជាកងទ័ពអ៊ុយក្រែននៅឯព្រំដែន ដោយនៅក្នុងនោះ ទាហានម្នាក់បានប្រាប់ប្រធានាធិបតីអ៊ុយក្រែនលោក Volodymyr Zelenskyy ថា៖ «យើងមកដល់ទីនេះហើយ»។
- យោធាអ៊ុយក្រែនបានបញ្ជាក់នៅថ្ងៃចន្ទថា កងទ័ពរុស្ស៊ីបានផ្ដោតការវាយប្រហារថ្មីៗចុងក្រោយបង្អស់របស់ខ្លួនលើតំបន់ Donetsk នៅភាគខាងកើតប្រទេសអ៊ុយក្រែន ដោយសំដៅលើជនស៊ីវិលនិងទីតាំងយោធានៅក្នុងក្រុងជាច្រើន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។
- រដ្ឋមន្ត្រីការបរទេសហុងគ្រីលោក Peter Szijjarto បានបញ្ជាក់នៅលើទំព័រ Facebook របស់លោកនៅថ្ងៃចន្ទថា ប្រទេសហុងគ្រីមិនទាន់ទទួលបានសំណើថ្មីម៉ឺងម៉ាត់ណាមួយពីគណៈកម្មការអឺរ៉ុបនៃសហភាពអឺរ៉ុបនៅឡើយទេទាក់ទិនទៅនឹងទណ្ឌកម្មលើប្រេងឥន្ធនៈរបស់រុស្ស៊ី ចាប់តាំងពីពេលដែលប្រធានគណៈកម្មការអឺរ៉ុបបានធ្វើទស្សន កិច្ចទៅកាន់រដ្ឋធានីប៊ុយដាប៉ែស ប្រទេសហុងគ្រីកាលពីដើមខែនេះមក។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអាល្លឺម៉ង់អ្នកស្រី Annalena Baerbock បាននិយាយនៅថ្ងៃចន្ទថា សហភាពអឺរ៉ុបនឹងត្រូវការរយៈពេលប៉ុន្មានថ្ងៃទៀតដើម្បីស្វែងរកការព្រមព្រៀងគ្នាលើកញ្ចប់ទណ្ឌកម្មលើកទី ៦ ប្រឆាំងនឹងរុស្ស៊ី។ អ្នកស្រី Baerbcok បានប្រាប់អ្នកកាសែតនៅពេលអ្នកស្រីធ្វើដំណើរទៅដល់កន្លែងប្រជុំជាមួយនឹងសមភាគីអឺរ៉ុបរបស់អ្នកស្រីនៅក្នុងទីក្រុងព្រុចសែល ប្រទេសបែលហ្ស៊ិកថា៖ «ក្នុងនាមជាពលរដ្ឋអាល្លឺម៉ង់ យើងដឹងថានេះ [ការដាក់ ទណ្ឌកម្មលើការនាំចូលប្រេងឥន្ធនៈពីរុស្ស៊ី] គឺមិនមែនជាជំហានដ៏ងាយស្រួលនោះទេ។ បញ្ហាមួយចំនួនចាំបាច់ត្រូវតែដោះស្រាយ ហើយករណីនេះនឹងមិនកើតឡើងនៅថ្ងៃនេះទេ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអូទ្រីសលោក Alexander Schallenberg បាននិយាយនៅថ្ងៃចន្ទថា ប្រទេសអូទ្រីសរំពឹងថាសហភាពអឺរ៉ុបនឹងឯកភាពគ្នានៅក្នុងរយៈពេលប៉ុន្មានថ្ងៃខាងមុខនេះលើកញ្ចប់ទណ្ឌកម្មលើកទី ៦ ដែលដាក់លើរុស្ស៊ី។ លោក Schallenberg បានប្រាប់អ្នកកាសែតនៅពេលលោកបានធ្វើដំណើរទៅដល់កន្លែងប្រជុំមួយជាមួយនឹងសមភាគីអឺរ៉ុបរបស់លោកនៅក្នុងទីក្រុងព្រុចសែល ប្រទេសបែលហ្សិកថា៖ «ខ្ញុំមានទំនុកចិត្តថាយើងនឹងអាចធ្វើយ៉ាងណាឱ្យមានការអនុម័តលើកញ្ចប់ទណ្ឌកម្មលើកទី ៦ នេះនៅក្នុងពេលប៉ុន្មានថ្ងៃខាងមុខ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសលីទុយអានីលោក Gabrielius Landsbergis បាននិយាយនៅថ្ងៃចន្ទថា គម្រោងរបស់សហភាពអឺរ៉ុបនៅក្នុងការដាក់ទណ្ឌកម្មលើការនាំចូលប្រេងឥន្ធនៈពីរុស្ស៊ីត្រូវបានបង្អាក់ដោយប្រទេសមួយក្នុងចំណោមប្រទេសទាំង ២៧ ដែលជាសមាជិកសហភាពអឺរ៉ុប។ លោក Landsbergis បានបញ្ជាក់ថា៖ «សហភាព [អឺរ៉ុប] ទាំងមូលកំពុងត្រូវបានបង្អាក់ដោយប្រទេសជាសមាជិកមួយ។ ...យើងត្រូវតែឯកភាពគ្នា។ យើងមិនអាចត្រូវបានបង្អាក់ទេ»។ មន្ត្រីការទូតអឺរ៉ុបនានាបានលើកឡើងថា ប្រ ទេសដែលបង្អាក់ដល់ដំណើរការដាក់ទណ្ឌកម្មរបស់សហភាពអឺរ៉ុបនេះគឺប្រទេសហុង គ្រី។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីរុស្ស៊ីលោក Vladimir Putin បាននិយាយនៅថ្ងៃចន្ទថា ប្រទេសរុស្ស៊ីគ្មានបញ្ហាណាមួយជាមួយនឹងប្រទេសហ្វាំងឡង់និងប្រទេសស៊ុយអែតនោះទេ ប៉ុន្តែលោកថា ការពង្រីកហេដ្ឋារចនាសម្ព័ន្ធយោធានៅលើទឹកដីនៃប្រទេសទាំងពីរគឺតម្រូវឱ្យមានប្រតិកម្មពីរដ្ឋាភិបាលរុស្ស៊ី។ លោក Putin បានថ្លែងនៅឯកិច្ចប្រជុំនៃអង្គការសន្ធិសញ្ញាសន្តិសុខរួម (CSTO) ដែលដឹកនាំដោយរុស្ស៊ីថា ការពង្រីកអង្គការអូតង់គឺជាបញ្ហាសម្រាប់រុស្ស៊ី ហើយអង្គការអូតង់ត្រូវតែមើលឱ្យបានដិតដល់លើអ្វីដែលលោកបាននិយាយអំពីផែនការរបស់អង្គការអូតង់នៅក្នុងការបង្កើនឥទ្ធិពលរបស់ខ្លួននៅលើពិភពលោក។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ការសម្រេចរបស់ប្រទេសហ្វាំងឡង់និងប្រ ទេសស៊ុយអែតនៅក្នុងការចូលជាសមាជិកអង្គការអូតង់ (NATO) នឹងមិនធ្វើឱ្យសន្តិ សុខនៅក្នុងទ្វីបអឺរ៉ុបមានភាពប្រសើរឡើងនោះទេ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកកាសែតថា៖ «យើងមិនជឿថា ការចូលជាសមា ជិករបស់ប្រទេសហ្វាំងឡង់និងប្រទេសស៊ុយអែតនៅក្នុងអង្គការអូតង់នឹងពង្រឹងឬក៏លើកកម្ពស់រចនាសម្ព័ន្ធសន្តិសុខនៅក្នុងទ្វីបរបស់យើង [អឺរ៉ុប] នោះឡើយ»។ នេះបើយោងតាមទីភ្នាក់ងារព័ត៌មាន AFP។
- អនុរដ្ឋមន្ត្រីការបរទេសរុស្ស៊ីលោក Sergei Ryabkov និយាយនៅថ្ងៃចន្ទថា ជម្រើសរបស់ប្រទេសហ្វាំងឡង់និងរបស់ប្រទេសស៊ុយអែតនៅក្នុងការចូលជាសមាជិកអង្គការអូតង់គឺជាកំហុសដែលនឹងមានផលវិបាកធំធេង។ ទីភ្នាក់ងារព័ត៌មាន Interfax របស់រុស្ស៊ីបានរាយការណ៍ថា លោក Ryabkov បានបញ្ជាក់ថា ហ្វាំងឡង់និងស៊ុយអែតមិនគួរយល់ខុសថា រុស្ស៊ីនឹងមិនខ្វាយខ្វល់អំពីការសម្រេចចិត្តទាំងនេះរបស់ពួកគេទេ។ នេះបើយោងតាមទីភ្នាក់ងារព័ត៌មាន Reuters។
- រដ្ឋសភាហ្វាំងឡង់និងរដ្ឋសភាស៊ុយអែតនៅថ្ងៃចន្ទបានចាប់ផ្ដើមជជែកដេញដោលអំពីកិច្ចប្រឹងប្រែងរបស់រដ្ឋាភិបាលរៀងៗខ្លួននៅក្នុងការចូលជាសមាជិកអង្គការអូតង់ ខណៈពេលដែលប្រទេសទាំងពីរត្រៀមដាក់ពាក្យចូលជាសមាជិកនេះនៅក្នុងសប្ដាហ៍នេះ។ ប្រទេសហ្វាំងឡង់បានប្រកាសជាផ្លូវការអំពីគោលបំណងរបស់ខ្លួននៅក្នុងការចូលជាសមាជិកអង្គការអូតង់កាលពីថ្ងៃអាទិត្យ ចំណែកឯគណបក្សកាន់អំណាចរបស់ប្រទេសស៊ុយអែតវិញបានបញ្ជាក់ថាខ្លួនគាំទ្រសមាជិកភាពរបស់ស៊ុយអែតនៅក្នុងអង្គការអូតង់។ នេះបើយោងតាមទីភ្នាក់ងារព័ត៌មាន AFP។
២១:៣៨
១៧.៥.២០២២
ថ្ងៃអង្គារ ទី ១៧ ខែឧសភា៖
- ប្រទេសហ្វាំងឡង់និងប្រទេសស៊ុយអែតនឹងដាក់ពាក្យសុំចូលជាសមាជិកអង្គការអូតង់ (NATO) រួមគ្នានៅថ្ងៃពុធស្អែក។ នេះបើយោងតាមការប្រកាសរបស់ប្រទេសទាំងពីរ បើទោះបីជាមានការគំរាមពីប្រទេសតួកគីនៅក្នុងការរារាំងការពង្រីកសមាជិកភាពរបស់អង្គការអូតង់ក៏ដោយ។ នាយករដ្ឋមន្ត្រីស៊ុយអែតលោកស្រី Magdalena Anderson បាននិយាយនៅថ្ងៃអង្គារនេះក្នុងអំឡុងពេលសន្និសីទកាសែតរួមគ្នាជាមួយនឹងប្រធានាធិបតីហ្វាំងឡង់លោក Sauli Niinisto ថា៖ «ខ្ញុំសប្បាយចិត្តដែលយើងបានដើរលើមាគ៌ាដូចគ្នានិងយើងអាចធ្វើរឿងទាំងនេះជាមួយគ្នា»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអង្គារនេះថា លោកបានសន្ទនាតាមទូរស័ព្ទ «យ៉ាងយូរនិងប្រកបដោយផ្លែផ្កា» ជាមួយនឹងប្រធានាធិបតីបារាំងលោក Emmanuel Macron អំពីសង្គ្រាមនៅក្នុងប្រទេសអ៊ុយក្រែន។ លោក Zelenskyy បានបញ្ជាក់នៅលើ Twitter ថា៖ «[ខ្ញុំ] បានប្រាប់ [លោក Macron] អំពីរឿងរ៉ាវនៃអរិភាព ប្រតិបត្តិការជួយសង្គ្រោះទាហាន [អ៊ុយក្រែន] ពីរោងចក្រដែកថែប Azovstal និងចក្ខុវិស័យនៃក្ដីរំពឹងនៃដំណើរការចរចា [សន្តិភាព]។ [ខ្ញុំក៏] បានលើកឡើងផងដែរអំពីបញ្ហានៃការផ្គត់ផ្គង់ប្រេងឥន្ធនៈដល់អ៊ុយក្រែន»។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលអ៊ុយក្រែនបានបញ្ជាក់នៅថ្ងៃអង្គារនេះថា ការចរចាសន្តិភាពដើម្បីបញ្ចប់សង្គ្រាមជាមួយរុស្ស៊ីនៅក្នុងប្រទេសអ៊ុយក្រែនត្រូវបានផ្អាក និងបានស្ដីបន្ទោសរដ្ឋាភិបាលរុស្ស៊ីថាបានបរាជ័យនៅក្នុងការស្វែងរកចំណុចសម្រុះសម្រួល។ លោក Mykhaylo Podolyak ទីប្រឹក្សាប្រធានាធិបតីអ៊ុយក្រែនបានបញ្ជាក់នៅក្នុងសេចក្ដីថ្លែងការណ៍មួយដែលចេញផ្សាយដោយខុទ្ទកាល័យប្រធានាធិបតីអ៊ុយក្រែនថា៖ «ដំណើរការចរចាត្រូវបានផ្អាក»។ នេះបើយោងតាមទីភ្នាក់ងារព័ត៌មាន AFP។
- រដ្ឋអាជ្ញាតុលាការឧក្រិដ្ឋកម្មអន្តរជាតិ (ICC) លោក Karim Khan បាននិយាយនៅថ្ងៃអង្គារនេះថា លោកបានបញ្ជូនក្រុមអ្នកស៊ើបអង្កេត អ្នកជំនាញផ្នែកនីតិបច្ចេកវិទ្យានិងបុគ្គលិកជំនួយការសរុបទាំងអស់ចំនួន ៤២ នាក់ ទៅកាន់ប្រទេសអ៊ុយក្រែន ដែលជាផ្នែកមួយនៃការស៊ើបអង្កេតលើករណីសង្ស័យអំពីឧក្រិដ្ឋកម្មសង្គ្រាមក្នុងអំឡុងពេលដែលរុស្ស៊ីឈ្លានពានអ៊ុយក្រែន។ នេះបើយោងតាមទីភ្នាក់ងារព័ត៌មាន Associated Press។
- ប្រធានាធិបតីរុស្ស៊ីលោក Vladimir Putin បាននិយាយនៅថ្ងៃអង្គារនេះថា វិស័យប្រេងឥន្ធនៈកំពុងរង «ការផ្លាស់ប្ដូរដែលមានផលប៉ះពាល់ទូលំទូលាយ» និងបានអះអាងថា ការណ៍ដែលអឺរ៉ុបដាក់ទណ្ឌកម្មលើរុស្ស៊ីទាក់ទិននឹងរឿងអ៊ុយក្រែននេះមានន័យថាអឺរ៉ុបនឹងធ្វើ «អត្តឃាតសេដ្ឋកិច្ច»។ លោក Putin បានបញ្ជាក់ថា តាមរយៈការបញ្ឈប់ជាដំណាក់កាលនូវការនាំចូលប្រេងឥន្ធនៈពីរុស្ស៊ី អឺរ៉ុបនឹងធ្វើឱ្យខ្លួនឯងឈឺចាប់តែប៉ុណ្ណោះ។ លោក Putin បានជំរុញឲ្យមន្ត្រីរដ្ឋាភិបាលរុស្ស៊ីទាញប្រយោជន៍ពីវិធានការ «ដែលមិនបានគិតហ្មត់ចត់» របស់ក្រុមបស្ចិមប្រទេសនេះ។ នេះបើយោងតាមទីភ្នាក់ងារព័ត៌មាន AFP។
- មន្ត្រីការទូតកំពូលរបស់សហភាពអឺរ៉ុបលោក Josep Borrell បាននិយាយនៅថ្ងៃអង្គារនេះថា សហភាពអឺរ៉ុបនឹងធ្វើយ៉ាងណាឱ្យអ៊ុយក្រែនមានសព្វាវុធប្រើជាបន្តរហូត នៅពេលដែលសង្គ្រាមប្រឆាំងនឹងរុស្ស៊ីនៅបន្តនៅលើទឹកដីអ៊ុយក្រែន។ លោក Borrell បានប្រាប់អ្នកកាសែតនៅក្នុងទីក្រុងព្រុចសែល ប្រទេសបែលហ្ស៊ិក នៅក្រោយកិច្ចប្រជុំរបស់បណ្ដារដ្ឋមន្ត្រីការពារជាតិនៃសហភាពអឺរ៉ុបថា៖ «សហភាពអឺរ៉ុបនឹងមិនឱ្យអ៊ុយក្រែនអស់សព្វាវុធប្រើប្រាស់នោះទេ»។ នេះបើយោងតាមទីភ្នាក់ងារព័ត៌មាន Reuters។
- មន្ត្រីការទូតកំពូលរបស់សហភាពអឺរ៉ុបលោក Josep Borrell បាននិយាយនៅថ្ងៃអង្គារនេះថា ប្រសិនបើតួលេខនិងសេចក្ដីរាយការណ៍នានាគឺជាការពិត នោះកងទ័ពរុស្ស៊ីបានរង «ការបាត់បង់ដ៏ធំសម្បើម» នៅក្នុងការឈ្លានពានរបស់ខ្លួននៅអ៊ុយក្រែន។ លោក Borrell បានប្រាប់អ្នកកាសែតនៅក្នុងទីក្រុងព្រុចសែល ប្រទេសបែលហ្ស៊ិក នៅក្រោយកិច្ចប្រជុំរបស់បណ្ដារដ្ឋមន្ត្រីការពារជាតិនៃសហភាពអឺរ៉ុបថា៖ «ខ្ញុំមិនហ៊ានធ្វើការប៉ាន់ស្មានណាមួយអំពីថាតើរុស្ស៊ីអាចតទល់បានយូរប៉ុណ្ណានោះទេ។ ...ប្រសិនបើវាជាការពិតដែលថារុស្ស៊ីបានបាត់បង់ទាហានរបស់ខ្លួនចំនួន ១៥% តាំងពីសង្គ្រាមនេះបានចាប់ផ្ដើមមក នោះវាគឺជាកំណត់ត្រាពិភពលោកនៃការបាត់បង់របស់ទាហាននៃប្រទេសមួយដែលឈ្លានពានប្រទេសមួយទៀត»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen បាននិយាយនៅថ្ងៃអង្គារនេះថា សហរដ្ឋអាមេរិកបានធ្វើការតាំងចិត្តមុតមាំនៅក្នុងការផ្ដល់ថវិកាដល់អ៊ុយក្រែន ហើយសហភាពអឺរ៉ុបនឹងទំនងជារួមចំណែកផ្នែកហិរញ្ញវត្ថុដ៏ច្រើនគួរសមដើម្បីឱ្យអ៊ុយក្រែនអាចបន្តដំណើរទៅមុខបាន។ លោកស្រីបានបន្ថែមថា លោកស្រីនឹងងាកទៅរកបណ្ដាប្រទេសដែលជាសមាជិកនៃក្រុមប្រទេស G-7 ដូចជាចក្រភពអង់គ្លេស កាណាដា និងជប៉ុនជាដើម ដើម្បីឱ្យជួយបង្កើនការជួយជ្រោមជ្រែងផងដែរ។ បណ្ដារដ្ឋមន្ត្រីហិរញ្ញវត្ថុនិងប្រធានធនាគារកណ្ដាលនៃក្រុមប្រទេស G-7 គ្រោងនឹងជួបប្រជុំគ្នានៅថ្ងៃព្រហស្បតិ៍និងថ្ងៃសុក្រខាងមុខនៅក្នុងប្រទេសអាល្លឺម៉ង់ ដោយរបៀបវារៈជាចម្បងគឺផ្ដោតលើការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានបញ្ជាក់នៅថ្ងៃអង្គារថា វាគឺជា «អំពើចោរកម្មទាំងស្រុង» ប្រសិនបើក្រុមប្រទេស G-7 និងសហភាពអឺរ៉ុបអនុញ្ញាតឱ្យអ៊ុយក្រែនប្រើប្រាក់បម្រុងទុករបស់រុស្ស៊ីដែលត្រូវបានបង្កកនោះ។ រដ្ឋាភិបាលរុស្ស៊ីបានហៅវិធានការដូចនេះថាជាអំពើខុសច្បាប់និងជាវិធានការដែលទាមទារឱ្យមានការឆ្លើយតបស្របទៅតាមនោះ។ រដ្ឋមន្ត្រីហិរញ្ញវត្ថុអាល្លឺម៉ង់លោក Christian Lindner បានបញ្ជាក់ប្រាប់សារព័ត៌មានរបស់អឺរ៉ុបចំនួន៤ថា លោកបើកឱ្យមានការពិភាក្សាអំពីការរឹបអូសយកទ្រព្យសម្បត្តិរដ្ឋរបស់រុស្ស៊ីដើម្បីផ្ដល់ហិរញ្ញវត្ថុដល់ការកសាងប្រទេសអ៊ុយក្រែនឡើងវិញនិងថាសំណើទាក់ទិននឹងរឿងនេះកំពុងត្រូវបានពិភាក្សារួចហើយក្នុងចំណោមបណ្ដាប្រទេសជាសមាជិកក្រុមប្រទេស G-7 និងនៅក្នុងសហភាពអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
- ទីភ្នាក់ងារព័ត៌មាន Interfax របស់រុស្ស៊ីបានដកស្រង់សម្ដីរបស់អនុរដ្ឋមន្ត្រីការបរទេសរុស្ស៊ីលោក Andrey Rudenko ដែលបាននិយាយនៅថ្ងៃអង្គារថា ប្រទេសរុស្ស៊ីនិងប្រទេសអ៊ុយក្រែនមិនបានចរចាណាមួយនោះទេទោះ «ក្នុងទម្រង់ណា» ក៏ដោយ។ លោក Rudenko បញ្ជាក់ដូច្នេះថា៖ «ទេ! ការចរចាមិនបានបន្តធ្វើនោះឡើយ។ តាមលក្ខណៈប្រតិបត្តិជាក់ស្ដែង អ៊ុយក្រែនបានដកខ្លួនចេញពីដំណើរការចរចានេះ»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយថា លោកនឹងអធិការបតីអាល្លឺម៉ង់លោក Olaf Scholz បានពិភាក្សាគ្នានៅថ្ងៃអង្គារអំពីស្ថានការណ៍នៅសមរភូមិជួរមុខនៃសង្គ្រាមរវាងអ៊ុយក្រែននិងរុស្ស៊ីនិងអំពីលទ្ធភាពនៃការបង្កើនការដាក់សម្ពាធទណ្ឌកម្មលើរដ្ឋាភិបាលរុស្ស៊ី។ លោក Zelenskyy បានសរសេរនៅលើ Twitter ថា៖ «ខ្ញុំបានពិភាក្សាប្រកបដោយផ្លែផ្កាជាមួយនឹងអធិការបតីអាល្លឺម៉ង់។ ខ្ញុំបានពិភាក្សាអំពីស្ថានការណ៍នៅសមរភូមិជួរមុខ ការដាក់សម្ពាធបន្ថែមលើរុស្ស៊ី ការបង្កើនការដាក់ទណ្ឌកម្មនិងក្ដីរំពឹងសម្រាប់សន្តិភាព»។ លោក Zelenskyy បានបន្ថែមថា អ៊ុយក្រែនពឹងលើការជួយជ្រោមជ្រែងពីអាល្លឺម៉ង់បន្ថែមទៀតដើម្បីឱ្យអ៊ុយក្រែនអាចក្លាយជាសមាជិកពេញសិទ្ធិរបស់សហភាពអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
- ក្រុមផ្ដាច់ខ្លួនដែលគាំទ្រដោយរុស្ស៊ីបាននិយាយនៅថ្ងៃអង្គារថា ទាហានអ៊ុយក្រែន ២៥៦ នាក់ដែលបានប្រយុទ្ធតស៊ូក្រាញននាលនៅក្នុងរោងចក្រដែកថែប Azovstal ក្នុងទីក្រុង Mariupol ប្រទេសអ៊ុយក្រែន «បានចុះចាញ់» ហើយទាហានចំនួន ៥១ នាក់បានរងរបួស។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅព្រឹកថ្ងៃអង្គារថា លោកសង្ឃឹមថាជីវិតរបស់ទាហានការពាររោងចក្រដែកថែប Azovstal នៅក្នុងទីក្រុង Mariupol នឹងត្រូវបានជួយសង្គ្រោះ។ លោក Zelenskyy ថ្លែងនៅក្នុងសុន្ទរកថាជាវីដេអូថា៖ «យើងសង្ឃឹមថាយើងនឹងអាចជួយសង្គ្រោះជីវិតទាហានរបស់យើង។ មានអ្នករងរបួសធ្ងន់ធ្ងរនៅក្នុងចំណោមនោះ។ ពួកគេទទួលបានការព្យាបាល។ អ៊ុយក្រែនត្រូវការវីរបុរសអ៊ុយក្រែនឱ្យនៅរស់»។ នេះបើយោងតាមទីភ្នាក់ងារព័ត៌មាន Reuters។
- បញ្ជាការដ្ឋានយោធាអ៊ុយក្រែនបានបញ្ជាក់នៅព្រឹកថ្ងៃអង្គារថា បេសកកម្មរបស់ «វីរបុរសនៅពេលបច្ចុប្បន្ននេះ» នៅក្នុងការការពាររោងចក្រដែកថែប Azovstal នៅឯកំពង់ផែយុទ្ធសាស្ត្រនៃទីក្រុង Mariupol នៅភាគខាងត្បូងប្រទេសបានបញ្ចប់ហើយ។ បញ្ជាការដ្ឋានយោធានេះក៏បានសន្យាផងដែរថានឹងជួយសង្គ្រោះទាហានដែលនៅជាប់នៅក្នុងរោងចក្រនោះ។ អគ្គសេនាធិការកងទ័ពជើងគោកអ៊ុយក្រែនបានបញ្ជាក់នៅក្នុងសេចក្ដីថ្លែងការណ៍មួយថា៖ «ក្រុមទាហាននៅ «Mariupol» បានបំពេញបេសកកម្មប្រយុទ្ធរបស់ខ្លួនរួចហើយ។ បញ្ជាការដ្ឋានយោធាកំពូលបានបញ្ជាឱ្យមេបញ្ជាការនៃកងទាហានដែលឈរជើងនៅឯរោងចក្រដែកថែប Azovstal ឱ្យជួយសង្គ្រោះជីវិតទាហាន។ ...អ្នកការពារទីក្រុង Mariupol គឺជាវីរបុរសនៅពេលបច្ចុប្បន្ននេះ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលរុស្ស៊ីបានបញ្ជាក់នៅថ្ងៃអង្គារថា ខ្លួនបានដកខ្លួនចេញពីអង្គការក្រុមប្រឹក្សាបណ្ដាប្រទេសសមុទ្របាល់ទិក (CBSS)។ ការដកខ្លួនចេញរបស់រុស្ស៊ីនេះធ្វើឡើងនៅចំពេលដែលរុស្ស៊ីមានភាពតានតឹងជាមួយនឹងក្រុមបស្ចិមប្រទេសទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ ក្រសួងការបរទេសរុស្ស៊ីបានលើកឡើងថា អង្គការ CBSS បានក្លាយជា «ឧបករណ៍របស់គោលនយោបាយប្រឆាំងនឹងរុស្ស៊ី» និង «កាន់តែផុងចូលទៅក្នុងគំនិតប្រឆាំងនឹងរុស្ស៊ីនិងការកុហក»។ ក្រសួងការបរទេសរុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយថា៖ «យើងចាត់ទុកថាវត្តមានបន្ថែមទៀតរបស់ប្រទេសរុស្ស៊ីនៅក្នុងអង្គការ CBSS គឺមិនទំនងនិងជាការខាតប្រយោជន៍»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីសហរដ្ឋអាមេរិកលោក Joe Biden នឹងទទួលជួបមេដឹកនាំនៃប្រទេសស៊ុយអែតនិងមេដឹកនាំនៃប្រទេសហ្វាំងឡង់នៅសេតវិមាននៅថ្ងៃព្រហស្បតិ៍ខាងមុខ ដើម្បីពិភាក្សាអំពីពាក្យសុំរបស់ប្រទេសទាំងពីរនៅក្នុងការចូលជាសមាជិកអង្គការអូតង់។ នេះបើតាមការបញ្ជាក់របស់សេតវិមាននៅក្នុងសេចក្ដីថ្លែងការណ៍មួយ។ អ្នកនាំពាក្យសេតវិមានអ្នកស្រីKarine Jean-Pierre បាននិយាយនៅថ្ងៃអង្គារថា លោក Biden នាយករដ្ឋមន្ត្រីស៊ុយអែតអ្នកស្រី Magdalena Anderson និងប្រធានាធិបតីហ្វាំងឡង់លោក Sauli Niinisto ក៏នឹងពិភាក្សាផងដែរអំពី «សន្តិសុខនៅទ្វីបអឺរ៉ុប ក៏ដូចជាការពង្រឹងភាពជាដៃគូដ៏ជិតស្និទ្ធរបស់យើងទាក់ទិនទៅនឹងបញ្ហាសាកលជាច្រើននិងការគាំទ្រប្រទេសអ៊ុយក្រែន»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយនៅថ្ងៃអង្គារថា ការចូលជាសមាជិករបស់ប្រទេសហ្វាំងឡង់និងប្រទេសស៊ុយអែតនៅក្នុងអង្គការអូតង់ ប្រហែលជានឹងមិនធ្វើឱ្យមាន «ភាពខុសគ្នាច្រើន» នោះទេ ដោយសារតែប្រទេសទាំងពីរបានចូលរួមជាយូរមកហើយនៅក្នុងសមយុទ្ធយោធារបស់អង្គការអូតង់។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីហ្វាំងឡង់លោក Sauli Niinisto បាននិយាយនៅថ្ងៃអង្គារថា ប្រទេសហ្វាំងឡង់និងប្រទេសស៊ុយអែតនឹងអាចសម្រេចបានកិច្ចព្រមព្រៀងជាមួយនឹងប្រទេសតួកគីទាក់ទិននឹងការជំទាស់របស់តួកគីចំពោះផែនការរបស់ហ្វាំងឡង់និងស៊ុយអែតនៅក្នុងការចូលជាសមាជិកអង្គការអូតង់ (NATO)។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអាល្លឺម៉ង់អ្នកស្រី Annalena Baerbock បាននិយាយថា អ្នកស្រីមានទំនុកចិត្តថា ប្រទេសហ្វាំងឡង់និងប្រទេសស៊ុយអែតនឹងអាចចូលជាសមាជិកអង្គការអូតង់បានឆាប់ បើទោះបីជាមានមន្ទិលពីប្រធានាធិបតីតួកគីលោក Recep Tayyip Erdoganទាក់ទិនទៅនឹងការចូលជាសមាជិកនេះក៏ដោយ។ អ្នកស្រី Baerbock បានថ្លែងនៅក្នុងទីក្រុងប៊ែរឡាំង ប្រទេសអាល្លឺម៉ង់នៅថ្ងៃអង្គារថា៖ «មានបញ្ហានៅសេសសល់មួយចំនួនពីខាងភាគីតួកគី»។ អ្នកស្រីបានបន្ថែមថា បញ្ហាទាំងនោះកំពុងត្រូវបានពិភាក្សា ប៉ុន្តែខ្ញុំមានទំនុកចិត្តយ៉ាងមុតមាំថាការចូលជាសមាជិកនេះនឹងដំណើរការបានឆាប់ ដោយសារតែមនុស្សគ្រប់គ្នាដឹងថានេះគឺជាដំណាក់កាលផ្ដាច់ព្រាត់ជាប្រវត្តិសាស្ត្រនៅក្នុងស្ថានការណ៍ដ៏រំជើបរំជួលតានតឹងនេះ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីទីស្ដីការគណៈរដ្ឋមន្ត្រីជប៉ុនលោកHirokazu Matsuno បាននិយាយនៅថ្ងៃអង្គារថា ប្រទេសជប៉ុនគោរព «ការសម្រេចចិត្តដ៏ម៉ឺងម៉ាត់» របស់ប្រទេសស៊ុយអែតនៅក្នុងការដាក់ពាក្យចូលជាសមាជិកអង្គការអូតង់។ លោក Matsuno បានបញ្ជាក់នៅក្នុងសន្និសីទកាសែតជាប្រចាំមួយថា ការឈ្លានពានរបស់រុស្ស៊ីលើអ៊ុយក្រែនគឺជាបញ្ហាដែលមិនត្រឹមតែប៉ះពាល់ដល់ទ្វីបអឺរ៉ុបប៉ុណ្ណោះទេ ក៏ប៉ុន្តែថែមទាំងប៉ះពាល់ដល់តំបន់ឥណ្ឌូប៉ាស៊ីហ្វិកផងដែរ។ នេះបើយោងតាមទីភ្នាក់ងារព័ត៌មាន Reuters។
២២:០៣
១៨.៥.២០២២
ថ្ងៃពុធ ទី ១៨ ខែឧសភា៖
- ប្រធានាធិបតីសហរដ្ឋអាមេរិកលោក Joe Biden បាននិយាយនៅថ្ងៃពុធនេះថា សហរដ្ឋអាមេរិកនឹងធ្វើការជាមួយនឹងប្រទេសហ្វាំងឡង់និងប្រទេសស៊ុយអែតដើម្បីត្រៀមលក្ខណៈប្រយ័ត្នប្រយែងទប់ទល់នឹងការគំរាមកំហែងណាមួយចំពោះសន្តិសុខរួមរបស់ពួកគេ នៅពេលដែលអង្គការអូតង់ (NATO) កំពុងពិចារណាសមាជិកភាពរបស់ប្រទេសទាំងពីរ។ លោក Biden បានបញ្ជាក់នៅក្នុងសេចក្ដីថ្លែងការណ៍មួយថា លោកគាំទ្រយ៉ាងមុតមាំលើការដាក់ពាក្យរបស់ប្រទេសហ្វាំងឡង់និងប្រទេសស៊ុយអែតចូលជាសមាជិកអង្គការអូតង់។ លោកបានថ្លែងថា ការចូលជាសមាជិករបស់ប្រទេសទាំងពីរនឹង «ពង្រឹងបន្ថែមដល់កិច្ចសហប្រតិបត្តិការផ្នែកការពាររបស់យើងនិងផ្ដល់ប្រយោជន៍ដល់អង្គការអូតង់ទាំងមូល»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយថា ប្រសិនបើប្រទេសស៊ុយអែតបានចូលជាសមាជិកអង្គការអូតង់ (NATO) នោះប្រទេសនេះនឹងធ្វើឱ្យអង្គការអូតង់ «មានភាពប្រសើរជាងមុននៅក្នុងការការពារខ្លួន»។ លោក Austin លើកឡើងដូច្នេះក្នុងអំឡុងពេលថ្លែងសុន្ទរកថាបើកមុនពេលការប្រជុំទ្វេភាគីជាមួយនឹងរដ្ឋមន្ត្រីការពារជាតិស៊ុយអែតលោក Peter Hultgvist ចូលមកដល់នៅក្រសួងការពារជាតិអាមេរិកនៅថ្ងៃពុធនេះ។ លោក Austin បានបន្ថែមថា៖ «សហរដ្ឋអាមេរិកគាំទ្រយ៉ាងមុតមាំលើការដាក់ពាក្យរបស់ប្រទេសស៊ុយអែតចូលជាសមាជិកអង្គការអូតង់»។ នេះបើយោងតាមបណ្ដាញទូរទស្សន៍ CNN។
- រដ្ឋាភិបាលប្រទេសឆែកបានអនុម័តជាឯកច្ឆន្ទលើសមាជិកភាពរបស់ប្រទេសហ្វាំងឡង់និងប្រទេសស៊ុយអែតនៅក្នុងអង្គការអូតង់ (NATO) ក្នុងពេលតែប៉ុន្មានម៉ោងក្រោយមកប៉ុណ្ណោះ ដែលប្រទេសទាំងពីរបានដាក់ពាក្យជាផ្លូវការសុំចូលជាសមាជិកអង្គការអូតង់។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។
- រដ្ឋមន្ត្រីការបរទេសសហរដ្ឋអាមេរិកលោក Antony Blinken បានរិះគន់ថា ការឈ្លានពានរបស់រុស្ស៊ីលើអ៊ុយក្រែនបានធ្វើឱ្យ «មនុស្ស ៤០ លាននាក់ទៀតជួបប្រទះនឹងបញ្ហាអសន្តិសុខស្បៀងអាហារ»។ លោក Blinken បានបញ្ជាក់នៅក្នុងកំណត់សម្គាល់របស់លោកនៅថ្ងៃពុធនេះមុនពេលជួបជាមួយនឹងរដ្ឋមន្ត្រីការបរទេសប៉ាគីស្ថានលោក Bhutto Zardari ថា៖ «អសន្តិសុខស្បៀងអាហារបានកើនឡើងធ្ងន់ធ្ងរដោយសារភាពគឃ្លើនរបស់រុស្ស៊ីលើអ៊ុយក្រែន ដោយវាបានធ្វើឱ្យមនុស្ស ៤០ លាននាក់ទៀតជួបប្រទះនឹងបញ្ហាអសន្តិសុខស្បៀងអាហារនេះ»។ នេះបើយោងតាមបណ្ដាញទូរទស្សន៍ CNN។
- អង្គការសិទ្ធិមនុស្ស Human Rights Watch បានបញ្ជាក់នៅថ្ងៃពុធនេះថា ខ្លួនបានកត់ត្រាករណីបន្ថែមទៀតនៃ «ឧក្រិដ្ឋកម្មសង្គ្រាមជាក់ស្ដែង» ដែលប្រព្រឹត្តិឡើងដោយទាហានរុស្ស៊ីនៅក្នុងតំបន់ពីរនៅប្រទេសអ៊ុយក្រែន។ អង្គការនេះ បានលើកឡើងនៅក្នុងរបាយការណ៍មួយថា កងទ័ពរុស្ស៊ីដែលត្រួតត្រាផ្នែកភាគច្រើននៃតំបន់រដ្ឋធានីកៀវនិងតំបន់ទីក្រុង Chernihiv នៃប្រទេសអ៊ុយក្រែនតាំងពីចុងខែកុម្ភៈរហូតដល់ខែមីនាបានធ្វើឱ្យជនស៊ីវិលរងការសម្លាប់ភ្លាមៗដោយគ្មានការកាត់ទោស ការធ្វើទារុណកម្ម និងការបំពានធ្ងន់ធ្ងរផ្សេងៗទៀត។ នេះបើយោងតាមទីភ្នាក់ងារព័ត៌មាន Reuters។
- តុលាការមួយនៅក្នុងរដ្ឋធានីកៀវនៃប្រទេសអ៊ុយក្រែនបានបើកសវនាការកាត់ទោសទាហានរុស្ស៊ីម្នាក់ឈ្មោះ Vadim Shishimarin អាយុ ២១ ឆ្នាំ នៅថ្ងៃពុធនេះ ដែលនេះគឺជាសវនាការដំបូងបង្អស់អំពីឧក្រិដ្ឋកម្មសង្គ្រាមនៅក្នុងប្រទេសអ៊ុយក្រែន។ ទាហានរុស្ស៊ីរូបនេះត្រូវបានចោទប្រកាន់ពីបទឃាតកម្ម និង «រំលោភលើច្បាប់ទម្លាប់នៃសង្គ្រាម» ក្រោមមាត្រា ៤៣៨ នៃក្រមព្រហ្មទណ្ឌរបស់ប្រទេសអ៊ុយក្រែន។ ជននេះបានទទួលកំហុស «ទាំងស្រុង» និងប្រឈមនឹងការជាប់ពន្ធនាគារមួយជីវិត។ នេះបើយោងតាមបណ្ដាញទូរទស្សន៍ CNN។
- រដ្ឋាភិបាលរុស្ស៊ីនៅថ្ងៃពុធនេះបានបណ្ដេញមន្ត្រីការទូតមួយចំនួនមកពីប្រទេសបារាំង អ៊ីតាលី និងអេស្ប៉ាញចេញពីប្រទេស ដើម្បីជាការសងសឹកចំពោះការណ៍ដែលប្រទេសទាំង ៣ បានបណ្ដេញមន្ត្រីការទូតរុស្ស៊ីចេញ។ នេះបើយោងតាមទីភ្នាក់ងារព័ត៌មាន AFP។
- ក្រសួងការពារជាតិរុស្ស៊ីបានបញ្ជាក់នៅក្នុងវីដេអូមួយនៅថ្ងៃពុធនេះថា យុទ្ធជនអ៊ុយក្រែនដែលបានចុះចាញ់នៅឯរោងចក្រដែកថែប Azovstal ក្នុងទីក្រុង Mariupol ប្រទេសអ៊ុយក្រែន ត្រូវបានបញ្ជូនទៅកាន់មន្ទីរពេទ្យនៅក្នុងក្រុង Novoazovsk ក្នុងសាធារណរដ្ឋ Donetsk ដែលជាតំបន់ផ្ដាច់ខ្លួននៅក្នុងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅថ្ងៃពុធថា សំណើរបស់សហរដ្ឋអាមេរិកនៅក្នុងការយកពន្ធគយលើប្រេងឥន្ធនៈរបស់រុស្ស៊ីមានន័យថាអ្នកទិញនឹងត្រូចំណាយបន្ថែមឬក៏នឹងត្រូវស្វែងរកអ្នកផ្គត់ផ្គង់ផ្សេង។ កាលពីថ្ងៃអង្គារ រដ្ឋមន្ត្រីហិរញ្ញវត្ថុសហរដ្ឋអាមេរិកអ្នកស្រី Janet Yellen បានបញ្ជាក់ថា សហភាពអឺរ៉ុបអាចដាក់បញ្ចូលគ្នានូវការយកពន្ធគយលើការនាំចូលប្រេងឥន្ធនៈពីរុស្ស៊ីជាមួយនឹងការហាមឃាត់ជាដំណាក់កាលនូវការនាំចូលប្រេងឥន្ធនៈពីរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅថ្ងៃពុធថា មិនមានដំណើរការបន្តទៅមុខណាមួយនៃការចរចាសន្តិភាពជាមួយនឹងប្រទេសអ៊ុយក្រែននោះទេ និងថា រដ្ឋាភិបាលអ៊ុយក្រែនបានបង្ហាញនូវភាពគ្មានឆន្ទៈទាំងស្រុងនៅក្នុងការបន្តការចរចា។ លោក Peskov ថ្លែងដូច្នេះថា៖«ការចរចាមិនបានវិវឌ្ឍទៅមុខទេ ហើយយើងកត់សម្គាល់ឃើញនូវភាពគ្មានឆន្ទៈទាំងស្រុងរបស់ក្រុមអ្នកចរចាអ៊ុយក្រែននៅក្នុងការបន្តដំណើរការនេះ»។
- ប្រធានាធិបតីតួកគីលោក Recep Tayyip Erdogan ដែលកន្លងមកបានគំរាមរាំងខ្ទប់ការចូលជាសមាជិករបស់ប្រទេសហ្វាំងឡង់និងប្រទេសអ៊ុយអែតនៅក្នុងអង្គការអូតង់ បានជំរុញសមាជិកអង្គការអូតង់នៅថ្ងៃពុធឱ្យ «គោរព» ក្ដីបារម្ភរបស់រដ្ឋាភិបាលតួកគីអំពីប្រទេសទាំងពីរ ដែលតួកគីបានចោទប្រកាន់ថាបានផ្ដល់ជម្រកលាក់ខ្លួនដល់ភេរវ ករ។ លោក Erdogan បានបញ្ជាក់ដូច្នេះថា៖ «ក្ដីរំពឹងតែមួយគត់របស់យើងពីសម្ព័ន្ធមិត្តអង្គការអូតង់គឺថា...ដំបូងត្រូវយល់អំពីក្ដីបារម្ភរបស់យើងហើយបន្ទាប់មកត្រូវគោរព និងនៅចុងបញ្ចប់ត្រូវគាំទ្រ»។ នេះបើយោងតាមទីភ្នាក់ងារព័ត៌មាន AFP។
- ប្រទេសហ្វាំងឡង់និងប្រទេសស៊ុយអែតបានដាក់ពាក្យជាផ្លូវការនៅក្នុងការចូលជាសមាជិកអង្គការអូតង់ (NATO) នៅថ្ងៃពុធ ដោយបានចាប់ផ្ដើមនូវដំណើរការចូលជាសមាជិកនេះដែលគេរំពឹងថានឹងចំណាយពេលតែប៉ុន្មានសប្ដាហ៍ប៉ុណ្ណោះ។ មន្ត្រីការ ទូតនានាថា ការផ្ដល់សច្ចានុមតិរបស់សភានៃបណ្ដាប្រទេសជាសមាជិកអង្គការអូតង់ទាំង ៣០ លើពាក្យសុំចូលជាសមាជិកនេះអាចចំណាយពេលរហូតដល់ទៅមួយឆ្នាំ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសចក្រភពអង់គ្លេសអ្នកស្រី Liz Truss បាននិយាយថា ចក្រភពអង់ គ្លេសស្វាគមន៍ទស្សនៈដែលចង់ឱ្យមានតុលាការឧក្រិដ្ឋកម្មអន្តរជាតិមួយកាត់ទោសប្រធានាធិបតីរុស្ស៊ីលោកVladimir Putin និងថ្នាក់ដឹកនាំផ្សេងទៀតរបស់រុស្ស៊ីទាក់ទិននឹងរឿងសង្គ្រាមនៅអ៊ុយក្រែន។ នេះបើយោងតាមសេចក្ដីរាយការណ៍របស់កាសែត The Guardian។
- ក្រសួងការពារជាតិអ៊ីស្រាអែលបានបញ្ជាក់នៅថ្ងៃពុធថា អ៊ីស្រាអែលបានបញ្ជូនមួកការពារចំនួន២.០០០និងអាវកាក់ការពារចំនួន៥០០ឱ្យអង្គការសង្គ្រោះបន្ទាន់និងអង្គ ការស៊ីវិលនានានៅក្នុងប្រទេសអ៊ុយក្រែន។ រដ្ឋមន្ត្រីការពារជាតិអ៊ីស្រាអែលលោក Benny Gantz បាននិយាយកាលពីខែមុនថា លោកនឹងអនុញ្ញាតឱ្យមានការបញ្ជូនមួកការពារនិងអាវកាក់ទាំងនេះ។ ការបញ្ជូនទាំងនេះធ្វើឡើង បន្ទាប់ពីមានការស្នើពីអ៊ុយ ក្រែន។ នេះបើយោងតាមទីភ្នាក់ងារព័ត៌មាន Reuters។
- ប្រធានគណៈកម្មការអឺរ៉ុបនៃសហភាពអឺរ៉ុបអ្នកស្រី Ursula von der Leyen នៅថ្ងៃពុធបានស្នើនូវជំនួយបន្ថែមរហូតដល់៩ពាន់លានអឺរ៉ូ (៩.៥០០លានដុល្លារអាមេរិក) សម្រាប់អ៊ុយក្រែននៅក្នុងឆ្នាំនេះ ដើម្បីជួយអ៊ុយក្រែនដោះស្រាយការបំផ្លិចបំផ្លាញដោយសារសង្គ្រាម។ អ្នកស្រី von der Leyen ក៏បានបញ្ជាក់ផងដែរថា វាដល់ពេលដែលត្រូវគិតអំពីការកសាងប្រទេសអ៊ុយក្រែនឡើងវិញហើយនៅពេលណាដែលសង្គ្រាមបានបញ្ចប់។ អ្នកស្រីបានបន្ថែមថា សហភាពអឺរ៉ុបមាន «ចំណាប់អារម្មណ៍ផ្នែកយុទ្ធសាស្ត្រនៅក្នុងការដឹកនាំកិច្ចប្រឹងប្រែងកសាងឡើងវិញនេះ»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសចក្រភពអង់គ្លេសអ្នកស្រី Liz Truss បាននិយាយនៅថ្ងៃពុធថា ចក្រភពអង់គ្លេសនិងបណ្ដាប្រទេសផ្សេងទៀតនៃក្រុមប្រទេស G-7 កំពុងពិនិត្យមើលលើវិធីដែលអាចប្រើទ្រព្យសម្បត្តិរបស់ប្រទេសរុស្ស៊ីសម្រាប់ផ្គត់ផ្គង់ដល់ការកសាងប្រទេសអ៊ុយក្រែនឡើងវិញ។ អ្នកស្រីបានបញ្ជាក់ប្រាប់វិទ្យុ Times Radio ថា៖ «យើងត្រូវការផែនការ Marshall ថ្មីដើម្បីកសាងអ៊ុយក្រែនឡើងវិញ ហើយជាការពិត យើងទើបតែបានពិភាក្សាអំពីរឿងនេះនៅឯកិច្ចប្រជុំរបស់ក្រុមប្រទេស G-7 ដែលខ្ញុំបានពិភាក្សាជាមួយនឹងសហសេវិករបស់ខ្ញុំមកពីជុំវិញពិភពលោក។ យើងកំពុងពិនិត្យមើលលើវិធីដែលយើងអាចធ្វើបានដើម្បីប្រើទ្រព្យសម្បត្តិរបស់រុស្ស៊ីនៅក្នុងការជួយចំណាយលើការកសាងអ៊ុយក្រែនឡើងវិញ»។ នេះបើយោងតាមទីភ្នាក់ងារព័ត៌មាន Reuters។
- មន្ត្រីអង្គការសហប្រជាជាតិបានបញ្ជាក់ថា អគ្គលេខាធិការអង្គការសហប្រជាជាតិលោក Antonio Guterres គ្រោងនឹងបង្ហាញជាសាធារណៈនៅថ្ងៃពុធថា លោកកំពុងពិភាក្សាជាមួយនឹងប្រទេសរុស្ស៊ី អ៊ុយក្រែន តួកគី សហរដ្ឋអាមេរិកនិងសហភាពអឺរ៉ុប ក្នុងគោលបំណងដើម្បីស្ដារការដឹកជញ្ជូនធញ្ញជាតិរបស់អ៊ុយក្រែននិងធ្វើឱ្យការនាំ ចេញជីពីប្រទេសរុស្ស៊ីនិងប្រទេសបេឡារុសដំណើរការឡើងវិញ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីហិរញ្ញវត្ថុរុស្ស៊ីលោក Anton Siluanov បានបញ្ជាក់នៅក្នុងវេទិកាមួយនៅថ្ងៃពុធថា ប្រទេសរុស្ស៊ីនឹងសងបំណុលបរទេសរបស់ខ្លួនជាប្រាក់រូបរបស់រុស្ស៊ី ប្រសិនបើសហរដ្ឋអាមេរិករាំងខ្ទប់ជម្រើសផ្សេងទៀត។ លោក Siluanov បានលើកឡើងថា រុស្ស៊ីនឹងមិនធ្វើឱ្យខ្លួនឯងខកខានមិនបានសងបំណុលនោះទេ ដោយសារតែរុស្ស៊ីមានលុយដើម្បីសងបំណុល។ នេះបើយោងតាមទីភ្នាក់ងារព័ត៌មាន Reuters។
- តុលាការអ៊ុយក្រែនបានបើកសវនាការនៅថ្ងៃពុធដើម្បីកាត់ទោសទាហានរុស្ស៊ីម្នាក់ឈ្មោះ Vadim Shishimarin អាយុ២១ឆ្នាំ ដែលចោទប្រកាន់ថាបានសម្លាប់ជនស៊ីវិលម្នាក់នៅភាគឦសានប្រទេសអ៊ុយក្រែនកាលពីថ្ងៃទី ២៨ ខែកុម្ភៈ។ នេះគឺជាសវនាការឧក្រិដ្ឋ កម្មសង្គ្រាមដំបូងបង្អស់តាំងពីពេលដែលរុស្ស៊ីបានឈ្លានពានអ៊ុយក្រែនមក។ រដ្ឋាភិ បាលរុស្ស៊ីបានបញ្ជាក់នៅថ្ងៃពុធនេះថា ខ្លួនមិនបានទទួលដំណឹងណាមួយអំពីរឿងនេះទេ។ នេះបើយោងតាមទីភ្នាក់ងារព័ត៌មាន AFP។
- ទីភ្នាក់ងារព័ត៌មាន DAN នៅក្នុងប្រទេសអ៊ុយក្រែនបានរាយការណ៍ដោយដកស្រង់សម្ដីរបស់មេដឹកនាំក្រុមផ្ដាច់ខ្លួនដែលមានទំនោរទៅរករុស្ស៊ីលោក Denis Pushilin ដែលបាននិយាយនៅថ្ងៃពុធថា មេបញ្ជាការកំពូលរបស់អ៊ុយក្រែននៅឯរោងចក្រដែកថែប Azovstal ក្នុងទីក្រុង Mariupol កំពុងស្ថិតនៅក្នុងរោងចក្រនោះនៅឡើយ និងមិនទាន់ចុះចាញ់នោះទេ។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិរុស្ស៊ីបានបញ្ជាក់ថា យុទ្ធជនអ៊ុយក្រែនចំនួន ៦៩៤ នាក់ដែលតស៊ូស្វិតស្វាញនៅក្នុងរោងចក្រដែកថែប Azovstal ក្នុងទីក្រុង Mariupol បានចុះចាញ់នៅក្នុងរយៈពេល២៤ម៉ោងចុងក្រោយនេះ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន RIA របស់រុស្ស៊ីនៅថ្ងៃពុធនេះ។ ទីភ្នាក់ងារព័ត៌មាន RIA នេះបានរាយការណ៍បន្ថែមទៀតដោយយោងលើក្រសួងការពារជាតិរុស្ស៊ីថា តាំងពីថ្ងៃចន្ទមក ជនសកម្មប្រយុទ្ធ ៩៥៦ នាក់នៅរោងចក្រ Azovstal បានចុះចាញ់ ដែលក្នុងចំណោមនោះ ៨០ នាក់បានរងរបួស។ នេះបើយោងតាមទីភ្នាក់ងារព័ត៌មាន Reuters។
២៣:០២
១៩.៥.២០២២
ថ្ងៃព្រហស្បតិ៍ ទី ១៩ ខែឧសភា៖
- អង្គការសហប្រជាជាតិនៅថ្ងៃព្រហស្បតិ៍នេះបានជំរុញប្រទេសរុស្ស៊ីនិងប្រទេសអ៊ុយក្រែនឱ្យ «ផ្អែកលើ» ការប្រាស្រ័យទាក់ទងគ្នានិងការសម្របសម្រួលដែលអាចអនុញ្ញាតឱ្យមានប្រតិបត្តិការជម្លៀសមនុស្សចេញពីទីក្រុង Mariupol ដើម្បីចាប់ផ្ដើមឡើងវិញនូវការចរចាសន្តិភាពដែលជាប់គាំងកន្លងមក។ ប្រធានផ្នែកជំនួយមនុស្សធម៌របស់អង្គការសហប្រជាជាតិលោក Martin Griffiths បាននិយាយថា ប្រតិបត្តិការដោយជោគជ័យនៅក្នុងការជម្លៀសជនស៊ីវិលនិងក្រោយមកយុទ្ធជនចេញពីរោងចក្រដែកថែប Azovstal ក្នុងទីក្រុង Mariupol ត្រួសត្រាយផ្លូវត្រឡប់ទៅរកការចរចាដ៏ទូលំទូលាយឡើងវិញដើម្បីបញ្ចប់សង្គ្រាមដ៏ឃោរឃៅនេះ។ នេះបើយោងតាមទីភ្នាក់ងារព័ត៌មាន AFP។
- ក្រុមប្រទេស G-7 បានប្ដេជ្ញាផ្ដល់ថវិកាចំនួន ១៨.៤០០ លានដុល្លារអាមេរិកជាជំនួយនិងជាកម្ចីដើម្បីជួយអ៊ុយក្រែនបំពេញតាមតម្រូវការផ្នែកហិរញ្ញវត្ថុបន្ទាន់របស់ខ្លួន។ នេះបើយោងតាមសេចក្ដីព្រាងនៃសេចក្ដីថ្លែងការណ៍រួមរបស់ក្រុមប្រទេស G-7 ដែលទីភ្នាក់ងារព័ត៌មាន Reuters បានទទួលនៅថ្ងៃព្រហស្បតិ៍នេះ។
- នាយករដ្ឋមន្ត្រីអ៊ុយក្រែនលោក Denys Shmyhal បាននិយាយនៅថ្ងៃព្រហស្បតិ៍នេះថា លោកនិងរដ្ឋមន្ត្រីហិរញ្ញវត្ថុនានានៃក្រុមប្រទេស G-7 បានពិភាក្សាគ្នាអំពី «ជំហានដែលអាចប្រតិបត្តិជាក់ស្ដែងដើម្បីរើបឡើងវិញពីផលវិបាកនៃសង្គ្រាម»។ លោកបានសរសេរនៅលើ Twitter ថា៖ «អ៊ុយក្រែនការពារពិភពដែលមានអារ្យធម៌ខ្ពង់ខ្ពស់ទាំងមូល។ ការគាំទ្ររបស់ដៃគូនានានឹងជួយបង្កើនដល់ជ័យជម្នះរបស់យើង។ ទោះបីជារុស្ស៊ីប្រឹងប្រែងបំផ្លាញសេដ្ឋកិច្ចរបស់យើងក៏ដោយ ក៏រួមគ្នា យើងនឹងឈ្នះ!»។ នេះបើយោងតាមទីភ្នាក់ងារព័ត៌មាន Reuters។
- អគ្គលេខាធិការអង្គការអូតង់ (NATO) លោកបាននិយាយនៅថ្ងៃព្រហស្បតិ៍នេះថា វាជារឿងធម្មតានោះទេដែលសមាជិកអង្គការអូតង់មានទស្សនៈផ្សេងគ្នា។ លោកលើកឡើងដូច្នេះចង់សំដៅលើភាពស្ទាក់ស្ទើររបស់ប្រទេសតួកគីនៅក្នុងការទទួលយកប្រទេសស៊ុយអែតនិងប្រទេសហ្វាំងឡង់ជាសមាជិកអង្គការអូតង់។ លោក Stoltenberg បានប្រាប់អ្នកកាសែតនៅក្នុងអំឡុងពេលទស្សនកិច្ចនៅក្នុងរដ្ឋធានីកូប៉ិនហាក ប្រទេសដាណឺម៉ាកថា៖ «វាជារឿងធម្មតាដែលមានទស្សនៈផ្សេងគ្នានៅក្នុងអង្គការអូតង់លើការសម្រេចចិត្តសំខាន់ៗ។ យើងមានបទពិសោធន៍ច្រើននៅក្នុងអង្គការអូតង់ គឺនៅពេលណាដែលមានទស្សនៈផ្ទុយគ្នា យើងអង្គុយចុះស្វែងរកដំណោះស្រាយ»។ លោកបានបន្ថែមថា៖ «យើងកំពុងប្រាស្រ័យទាក់ទងយ៉ាងជិតស្និទ្ធជាមួយនឹងប្រទេសហ្វាំងឡង់ ស៊ុយអែត និងតួកគី។ យើងកំពុងដោះស្រាយក្ដីបារម្ភដែលតួកគីបានលើកឡើង»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីហ្វាំងឡង់លោក Sauli Niinisto បាននិយាយនៅថ្ងៃព្រហស្បតិ៍នេះថា ប្រទេសហ្វាំងឡង់ស្វាគមន៍ចំពោះការពិភាក្សាអំពីក្ដីបារម្ភរបស់ប្រទេសតួកគីទាក់ទិននឹងពាក្យសុំរបស់ហ្វាំងឡង់ក្នុងការចូលជាសមាជិកអង្គការអូតង់ (NATO) ដោយលោកបានបន្ថែមថា ប្រទេសហ្វាំងឡង់ត្រៀមលក្ខណៈរួចជាស្រេចនៅក្នុងការតាំងចិត្តចំពោះសន្តិសុខរបស់ប្រទេសតួកគី។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីសហរដ្ឋអាមេរិកលោក Joe Biden បានជួបជាមួយនឹងមេដឹកនាំនៃប្រទេសស៊ុយអែតនិងមេដឹកនាំនៃប្រទេសហ្វាំងឡង់នៅថ្ងៃព្រហស្បតិ៍នេះ បន្ទាប់ពីប្រទេសទាំងពីរបានដាក់ពាក្យជាផ្លូវការចូលជាសមាជិកអង្គការអូតង់ (NATO) ដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។ លោក Biden បាននិយាយថា «ចំណុចសំខាន់គឺសាមញ្ញបំផុត ដែលនោះគឺថា ហ្វាំងឡង់និងស៊ុយអែតធ្វើឱ្យអង្គការអូតង់ខ្លាំងជាងមុន» និងបានផ្ដល់ «ការគាំទ្រទាំងស្រុងពេញទំហឹងរបស់សហរដ្ឋអាមេរិក [ចំពោះការចូលជាសមាជិកនេះ]»។ ទីប្រឹក្សាសន្តិសុខជាតិនៃសេតវិមានលោក Jake Sullivan បាននិយាយថា៖ «នេះគឺជាព្រឹត្តិការណ៍ជាប្រវត្តិសាស្ត្រ ជាស្ថានការណ៍នៃចំណុចរបត់មួយនៅក្នុងសន្តិសុខរបស់ទ្វីបអឺរ៉ុប។ ប្រទេសពីរដែលមានប្រវត្តិអព្យាក្រឹតជាយូរមកហើយនឹងចូលរួមជាមួយនឹង [អង្គការអូតង់ដែលជា] សម្ព័ន្ធភាពផ្នែកការពារដ៏មានឥទ្ធិពលបំផុតនៅលើពិភពលោក»។ នេះបើយោងតាមទីភ្នាក់ងារព័ត៌មាន Reuters និងទីភ្នាក់ងារព័ត៌មានបារាំង AFP។
- នាយករដ្ឋមន្ត្រីអ៊ីតាលីលោក Mario Draghi បានអំពាវនាវនៅថ្ងៃព្រហស្បតិ៍ឱ្យមានកិច្ចឈប់បាញ់គ្នាជាបន្ទាន់នៅក្នុងប្រទេសអ៊ុយក្រែន ដើម្បីឱ្យការចរចាម៉ឺងម៉ាត់នៅក្នុងការបញ្ចប់សង្គ្រាមនេះអាចចាប់ផ្ដើមបាន។ លោក Draghi បានថ្លែងប្រាប់ព្រឹទ្ធសភាអ៊ីតា លីថា៖ «កិច្ចឈប់បាញ់គ្នាត្រូវតែសម្រេចឱ្យបានកាន់តែឆាប់កាន់តែប្រសើរ»។ លោកបានបន្ថែមថា វាជារឿងសំខាន់ដែលត្រូវរក្សាការដាក់សម្ពាធលើរុស្ស៊ីតាមរយៈការដាក់ទណ្ឌកម្មសេដ្ឋកិច្ច «ដោយសារតែយើងត្រូវតែនាំរដ្ឋាភិបាលរុស្ស៊ីមកកាន់តុចរចា»។ នេះបើយោងតាមទីភ្នាក់ងារព័ត៌មាន Reuters។
- ក្រសួងការបរទេសរុស្ស៊ីបានបញ្ជាក់នៅថ្ងៃព្រហស្បតិ៍ថា ប្រសិនបើខ្លួនពិចារណាលើការអំពាវនាវរបស់អង្គការសហប្រជាជាតិដែលចង់ឱ្យខ្លួនបើកច្រកចូលទៅកាន់កំពង់ផែរបស់ប្រទេសអ៊ុយក្រែននៅសមុទ្រខ្មៅ នោះគេក៏ត្រូវពិចារណាអំពីការដកទណ្ឌកម្មប្រឆាំងនឹងរុស្ស៊ីចេញផងដែរ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Interfax របស់រុស្ស៊ី។ កាលពីថ្ងៃពុធ លោក David Beasley ប្រធានអង្គការស្បៀងអាហារពិភពលោក (WFP) របស់អង្គការសហប្រជាជាតិ បានអំពាវនាវទៅកាន់ប្រធានាធិបតីរុស្ស៊ីលោក Vladimir Putin ថា៖ «ប្រសិនបើអ្នកមានបេះដូង សូមបើកកំពង់ផែទាំងនេះទៅ»។ នេះបើយោងតាមទីភ្នាក់ងារព័ត៌មាន Reuters។
- អ្នកស្រី Kristalina Georgieva ប្រធានអង្គការមូលនិធិរូបិយវត្ថុអន្តរជាតិ (IMF) បាននិយាយនៅថ្ងៃព្រហស្បតិ៍ថា អ្នកស្រី «កាន់តែមានសុទិដ្ឋិនិយម»ថា កិច្ចព្រមព្រៀងរបស់ក្រុមប្រទេស G-7 នៅក្នុងការផ្ដល់ថវិកាថ្មីដល់ប្រទេសអ៊ុយក្រែនអាចសម្រេចបាន និងអាចជួយអ៊ុយក្រែនឱ្យចៀសផុតពីអតិផរណាលោតផ្លោះ។ នេះបើយោងតាមទីភ្នាក់ងារព័ត៌មាន Reuters។
- អធិការបតីអាល្លឺម៉ង់លោក Olaf Scholz បាននិយាយថា សហភាពអឺរ៉ុបត្រូវតែត្រៀមលក្ខណៈសម្រាប់ការកសាងប្រទេសអ៊ុយក្រែនឡើងវិញនៅពេលណាដែលសង្គ្រាមបានបញ្ចប់ តាមរយៈការបង្កើតបេឡាសាមគ្គីដើម្បីជួយចំណាយលើការកសាងឡើងវិញដែលនឹងអស់ទឹកប្រាក់រាប់ពាន់លានអឺរ៉ូ។ លោក Scholz លើកឡើងដូច្នេះថា៖ «ការកសាងហេដ្ឋារចនាសម្ព័ន្ធដែលត្រូវបានបំផ្លាញនិងការស្ដារឡើងវិញនូវសេដ្ឋកិច្ចរបស់អ៊ុយក្រែននឹងចំណាយអស់ថវិការាប់ពាន់លាន [អឺរ៉ូ]។ យើងក្នុងនាមជាសហភាពអឺរ៉ុបត្រូវតែចាប់ផ្ដើមរៀបចំបង្កើតបេឡាសាមគ្គីមួយដែលបានថវិកាមកពីការរួមចំណែករបស់សហភាពអឺរ៉ុបនិងដៃគូនានារបស់ខ្លួន»។ នេះបើយោងតាមទីភ្នាក់ងារព័ត៌មាន Reuters។
- នាយករដ្ឋមន្ត្រីជប៉ុនលោកFumio Kishidaបានប្រាប់អ្នកសារព័ត៌មាននៅថ្ងៃព្រហស្បតិ៍ថា ប្រទេសជប៉ុននឹងបង្កើនជំនួយហិរញ្ញវត្ថុទ្វេដងសម្រាប់ប្រទេសអ៊ុយ ក្រែនរហូតដល់ចំនួន៦០០លានដុល្លារអាមេរិក នៅក្នុងវិធានការដែលមានការសម្រប សម្រួលមួយជាមួយនឹងធនាគារពិភពលោក ដើម្បីគាំទ្រដល់ភាពចាំបាច់ផ្នែកហិរញ្ញវត្ថុរបស់ប្រទេសអ៊ុយក្រែនក្នុងរយៈពេលខ្លី ដែលបានរងការខូចខាតដោយសារការឈ្លាន ពានរបស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីតួកគីលោក Recep Tayyip Erdogan បាននិយាយនៅថ្ងៃព្រហស្បតិ៍ថា ប្រទេសតួកគី«តាំងចិត្ត» រារាំងការចូលជាសមាជិករបស់ប្រទេសស៊ុយអែតនិងប្រ ទេសហ្វាំងឡង់នៅក្នុងអង្គការអូតង់ដោយលោកបានបញ្ជាក់ថា ប្រទេសស៊ុយអែតគឺជា «ជម្រកសុវត្ថិភាពភេរវកម្មទាំងស្រុង»។ នេះបើយោងតាមទីភ្នាក់ងារព័ត៌មាន AFP។
- នាយករដ្ឋមន្ត្រីប៉ូឡូញលោក Mateusz Morawiecki បាននិយាយនៅថ្ងៃព្រហស្បតិ៍ថា ប្រទេសប៉ូឡូញនិងជួយប្រទេសស៊ុយអែតនិងប្រទេសហ្វាំងឡង់ ប្រសិនបើប្រទេសទាំងពីរត្រូវបានវាយប្រហារមុនពេលពួកគេបានចូលជាសមាជិកអង្គការអូតង់ (NATO)។ លោក Morawiecki បានបញ្ជាក់នៅក្នុងអំឡុងពេលសន្និសីទកាសែតមួយថា៖ «ខ្ញុំចាត់ ទុកការចូលជាសមាជិករបស់ប្រទេសហ្វាំងឡង់និងប្រទេសស៊ុយអែតនៅក្នុងអង្គការអូតង់ជាសញ្ញាដ៏សំខាន់មួយនៅក្នុងការពង្រឹងសន្តិសុខនៅអឺរ៉ុប»។ លោកបានបន្ថែមថា៖ «ខ្ញុំចង់បញ្ជាក់ឱ្យបានច្បាស់ថា ក្នុងករណីណាដែលមានការវាយប្រហារលើប្រ ទេសស៊ុយអែតឬក៏ប្រទេសហ្វាំងឡង់ក្នុងអំឡុងពេលដំណើរការចូលជាសមាជិកនេះ ប្រទេសប៉ូឡូញនឹងជួយពួកគេ»។ នេះបើយោងតាមទីភ្នាក់ងារព័ត៌មាន Reuters។
- ទាហានរុស្ស៊ីដំបូងបង្អស់ដែលត្រូវបានកាត់ទោសនៅក្នុងប្រទេសអ៊ុយក្រែនពីបទឧក្រិដ្ឋកម្មសង្គ្រាម បានស្នើសុំនៅក្នុងតុលាការនៅថ្ងៃព្រហស្បតិ៍ឱ្យមាន «ការលើកលែងទោស» នៅពេលដែលទាហានរូបនេះរៀបរាប់លំអិតអំពីវិធីដែលខ្លួនសម្លាប់ជនស៊ីវិលម្នាក់នៅក្នុងប្រទេសអ៊ុយក្រែនកាលពីចុងខែកុម្ភៈ។ នេះបើយោងតាមទីភ្នាក់ងារព័ត៌មាន AFP។
- លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បាននិយាយនៅថ្ងៃព្រហស្បតិ៍ថា លោកបាននិយាយជាមួយនឹងរដ្ឋមន្ត្រីការបរទេសរុស្ស៊ីលោក Sergei Lavrov អំពីតួនាទីរបស់រុស្ស៊ីនៅក្នុងបញ្ហាសុខភាពសាកលលោកនិងអំពីស្ថានការណ៍នៅក្នុងប្រទេសអ៊ុយក្រែន។ លោក Ghebreyesus បានបញ្ជាក់នៅលើ Twitter ដូច្នេះថា៖ «ខ្ញុំបានស្នើឱ្យមានលទ្ធភាពចូលដោយសុវត្ថិភាពទៅកាន់ទីក្រុង Mariupol ទីក្រុង Kherson ផ្នែកខាងត្បូងនៃទីក្រុង Zaporizhzhia និងតំបន់ឡោមព័ទ្ធផ្សេងទៀត ដើម្បីផ្ដល់ជំនួយផ្នែកសុខាភិបាល។ ជនស៊ីវិលត្រូវតែទទួលបានការការពារ»។ នេះបើយោងតាមទីភ្នាក់ងារព័ត៌មាន Reuters។
- អង្គការគណៈកម្មាធិការអន្តរជាតិកាកបាទក្រហមបានបញ្ជាក់នៅថ្ងៃព្រហស្បតិ៍ថា ខ្លួនបានចាប់ផ្ដើមចុះឈ្មោះឈ្លើយសឹករាប់រយនាក់មកពីរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន។ អង្គការនេះបានបញ្ជាក់នៅក្នុងសេចក្ដីថ្លែង ការណ៍មួយថា ប្រតិបត្តិការតាមដានយុទ្ធជនដែលចាក ចេញពីរោងចក្រនោះបានចាប់ផ្ដើមកាលពីថ្ងៃអង្គារនិងកំពុងបន្តរហូតមកដល់ថ្ងៃព្រហស្បតិ៍នេះ។ ជាផ្នែកមួយនៃដំណើរការនេះ អង្គការនេះបានកត់ត្រាព័ត៌មានពីយុទ្ធជនផ្ទាល់ដើម្បីតាមដានអ្នកដែលត្រូវបានចាប់ខ្លួន។ នេះបើយោងតាមទីភ្នាក់ងារព័ត៌មាន Reuters។
- ទីភ្នាក់ងារព័ត៌មាន TASS របស់រុស្ស៊ីបានដកស្រង់សម្ដីរបស់មេដឹកនាំក្រុមផ្ដាច់ខ្លួនលោកDenis Pushilin ដែលមានទំនោរទៅរករុស្ស៊ីដែលបាននិយាយនៅថ្ងៃព្រហស្បតិ៍ថា យុទ្ធជនអ៊ុយក្រែនជាងពាក់កណ្ដាលដែលបានស្ថិតនៅក្នុងរោងចក្រដែកថែប Azovstal ក្នុងទីក្រុង Mariupol ប្រទេសអ៊ុយក្រែន ឥឡូវនេះបានចាកចេញហើយ។ គេនៅមិនទាន់ច្បាស់ភ្លាមៗនៅឡើយទេថាតើយុទ្ធជនប៉ុន្មាននាក់ដែលលោក Pushilin ចង់សំដៅលើនោះ។ កន្លងមក អ៊ុយក្រែននិងរុស្ស៊ីបានផ្ដល់តួលេខខុសៗគ្នាអំពីចំនួនយុទ្ធជនដែលបានចាកចេញពីរោងចក្រនោះ។ នេះបើយោងតាមទីភ្នាក់ងារព័ត៌មាន Reuters។
- លោក Andriy Yermak នាយកខុទ្ទកាល័យរបស់ប្រធានាធិបតីអ៊ុយក្រែនបាននិយាយនៅថ្ងៃព្រហស្បតិ៍ថា រដ្ឋាភិបាលអ៊ុយក្រែនស្វាគមន៍ការផ្ដល់សច្ចានុមតិរបស់ព្រឹទ្ធសភាសហរដ្ឋអាមេរិកលើការតែងតាំងអ្នកស្រី Bridget Brink ជាឯកអគ្គរដ្ឋទូតអាមេរិកប្រចាំប្រទេសអ៊ុយក្រែន។ លោក Yermak បានសរសេរនៅលើ Twitter ដូច្នេះថា៖ «យើងស្វាគមន៍ការសម្រេចជាឯកច្ឆន្ទរបស់ព្រឹទ្ធសភាសហរដ្ឋអាមេរិកនៅក្នុងការយល់ព្រមចំពោះការតែងតាំងអ្នកស្រី Bridget Brink ជាឯកអគ្គរដ្ឋទូតអាមេរិកប្រចាំប្រទេសអ៊ុយក្រែន»។
- ព្រឹទ្ធសភាសហរដ្ឋអាមេរិកបានផ្ដល់សច្ចានុមតិកាលពីថ្ងៃពុធចំពោះការតែងតាំងអ្នកស្រី Bridget Brink ជាឯកអគ្គរដ្ឋទូតសហរដ្ឋអាមេរិកប្រចាំប្រទេសអ៊ុយក្រែន។ តំណែងនេះគឺជាតំណែងដ៏សំខាន់មួយដែលនៅទំនេរអស់រយៈពេល ៣ ឆ្នាំមកហើយ។ អ្នកស្រីបានទទួលការផ្ដល់សច្ចានុមតិនេះក្នុងសំឡេងបោះឆ្នោតជាឯកច្ឆន្ទ។ នេះបើយោងតាមទីភ្នាក់ងារព័ត៌មាន Reuters។