២១:៥៧ ៤.៥.២០២២

ថ្ងៃពុធ ទី ៤ ខែឧសភា៖

រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen បាននិយាយនៅថ្ងៃពុធនេះថា សហរដ្ឋអាមេរិកបានពិភាក្សាឥតឈប់ឈរជាមួយនឹងដៃគូរបស់ខ្លួនអំពីការដាក់ទណ្ឌកម្មបន្ថែមទៀតលើរុស្ស៊ី និងអាចចាត់ «វិធានការបន្ថែមទៀត» ដើម្បីដាក់សម្ពាធលើរដ្ឋាភិបាលរុស្ស៊ីឱ្យបញ្ឈប់ការឈ្លានពានរបស់ខ្លួនលើអ៊ុយក្រែន។ លោកស្រី Yellen បានបញ្ជាក់នៅក្នុងសន្និសីទរបស់កាសែត Wall Street Journal ថា លោកស្រីនឹងមិនបង្ហាញអំពីវិធានការជាក់លាក់ណាមួយមុនពេលប្រកាសផ្លូវការនោះទេ ប៉ុន្តែបានលើកឡើងថា វិធានការបន្ថែមនឹងទំនងជាធ្វើឡើង «ប្រសិនបើរុស្ស៊ីនៅបន្តសង្គ្រាមនេះប្រឆាំងនឹងអ៊ុយក្រែន»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen ថ្លែងទៅកាន់ក្រុមប្រឹក្សាអាត្លង់ទិក ក្នុងរដ្ឋធានីវ៉ាស៊ីនតោន ថ្ងៃទី ១៣ ខែមេសា ឆ្នាំ២០២២។ (AP Photo/Jacquelyn Martin)

ប្រធានាធិបតីសហរដ្ឋអាមេរិកលោក Joe Biden បាននិយាយនៅថ្ងៃពុធនេះថា លោក «បើកចំហ» ចំពោះការដាក់ទណ្ឌកម្មបន្ថែមលើរុស្ស៊ី ហើយនឹងពិភាក្សាអំពីវិធានការនានាជាមួយនឹងសម្ព័ន្ធមិត្តមកពីក្រុមប្រទេស G-7 នៅក្នុងរយៈពេលប៉ុន្មានថ្ងៃខាងមុខ។ លោក Biden បញ្ជាក់ដូច្នេះថា៖ «យើងតែងតែបើកចំហចំពោះការដាក់ទណ្ឌកម្មបន្ថែមទៀត»។ លោកថ្លែងដូច្នេះក្នុងពេលមិនយូរប៉ុន្មាន បន្ទាប់ពីសហភាពអឺរ៉ុបបានប្រកាសអំពីគម្រោងនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ី និងអំពីវិធានការថ្មីៗផ្សេងទៀតដើម្បីដាក់ទណ្ឌកម្មលើរដ្ឋាភិបាលរុស្ស៊ីសម្រាប់ការឈ្លានពានដោយបង្ហូរឈាមរបស់រុស្ស៊ីលើអ៊ុយក្រែន។ លោក Biden បានប្រាប់អ្នកកាសែតថា៖ «ខ្ញុំនឹងនិយាយទៅកាន់សមាជិកនៃក្រុមប្រទេស G-7 នៅសប្ដាហ៍នេះអំពីអ្វីដែលយើងនឹងធ្វើឬក៏មិនធ្វើ»។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីជប៉ុនលោក Fumio Kishida បាននិយាយនៅថ្ងៃពុធនេះថា លោកមិនអាចទទួលយកបាននោះទេនូវការសម្រេចរបស់រដ្ឋាភិបាលរុស្ស៊ីដែលហាមឃាត់លោកនិងពលរដ្ឋជប៉ុន ៦២ នាក់ផ្សេងទៀតមិនឱ្យចូលទឹកដីរុស្ស៊ី និងថា រុស្ស៊ីគឺជាអ្នកទទួលខុសត្រូវទាំងស្រុងសម្រាប់ការធ្វើឱ្យទំនាក់ទំនងទ្វេភាគីរវាងជប៉ុននិងរុស្ស៊ីឈានមកដល់ចំណុចនេះ។ លោក Kishida បានបញ្ជាក់បន្ទាប់ពីលោកបានពិភាក្សាជាមួយនាយករដ្ឋមន្ត្រីអ៊ីតាលីលោក Mario Draghi នៅក្នុងទីក្រុងរ៉ូម ប្រទេសអ៊ីតាលីថា៖ «រុស្ស៊ីគឺជាភាគីដែលឈានទៅរកការធ្វើសង្គ្រាមនិងធ្វើឱ្យមានស្ថានភាពដូចសព្វថ្ងៃនេះ។ ...ការប្រកាសរបស់រុស្ស៊ី [លើការហាមឃាត់ពលរដ្ឋជប៉ុនចំនួន ៦៣ នាក់មិនឱ្យចូលទឹកដីរុស្ស៊ី] គឺពិតជាមិនអាចទទួលយកបាននោះទេ»។ នេះបើយោងតាមទីភ្នាក់ងារព័ត៌មាន Reuters។
ចក្រភពអង់គ្លេសបានហាមឃាត់រាល់ការនាំចេញផ្នែកសេវាកម្មទាំងអស់ទៅកាន់ប្រទេសរុស្ស៊ីនៅថ្ងៃពុធនេះ និងបានប្រកាសអំពីការដាក់ទណ្ឌកម្មលើបុគ្គលនិងអង្គភាពសរុបចំនួន ៦៣ ដែលក្នុងនោះរួមមានទាំងក្រុមហ៊ុនប្រព័ន្ធផ្សព្វផ្សាយនិងជនល្បីល្បាញនានាដែលខ្លួនបានចោទថាបានផ្សព្វផ្សាយព័ត៌មានប្រឌិតផងដែរ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីម៉ិកស៊ិកលោក Andres Manuel Lopez Obrador បាននិយាយនៅថ្ងៃពុធនេះថា រដ្ឋបាលរបស់លោកនឹងមិនដាក់ទណ្ឌកម្មលើរុស្ស៊ីដោយសារតែការឈ្លានពានរបស់រុស្ស៊ីលើអ៊ុយក្រែននោះទេ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Lopez Obrador បានបញ្ជាក់ថា «យើងចង់រក្សាភាពអព្យាក្រឹត្យ» និងបានអំពាវនាវឱ្យមានការចរចា។
ក្រសួងការពារជាតិអ៊ុយក្រែនបានបញ្ជាក់នៅថ្ងៃពុធនេះថា រុស្ស៊ីបានប៉ុនប៉ងបង្កើនកម្រិតនៃការវាយប្រហាររបស់ខ្លួននៅភាគខាងកើតប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ អ្នកនាំពាក្យក្រសួងការពារជាតិអ៊ុយក្រែនលោក Oleksandr Motuzyanyk បាននិយាយថា រដ្ឋាភិបាលរុស្ស៊ីបានធ្វើការវាយប្រហារតាមអាកាសជិត ៥០ ដងកាលពីថ្ងៃអង្គារ។ លោកក៏បានលើកឡើងផងដែរថា ការវាយប្រហារដោយកាំភ្លើងធំនិងការវាយប្រហារតាមអាកាសរបស់រុស្ស៊ីបានបន្តយូរៗម្ដងលើរោងចក្រដែកថែប Azovstal នៅក្នុងទីក្រុង Mariupol។
រដ្ឋាភិបាលរុស្ស៊ីបានបញ្ជាក់នៅថ្ងៃពុធនេះថា មិនមានកិច្ចព្រមព្រៀងណាមួយត្រូវបានសម្រេចឡើងអំពីជំនួបដែលអាចទៅរួចណាមួយរវាងប្រធានាធិបតីរុស្ស៊ីលោក Vladimir Putin និងសម្ដេចប៉ាប Francis សម្រាប់ការពិភាក្សាអំពីវិបត្តិអ៊ុយក្រែននោះទេ។ សម្ដេចប៉ាប Francis បានថ្លែងនៅក្នុងកិច្ចសម្ភាសន៍មួយដែលចេញផ្សាយកាលពីថ្ងៃអង្គារថា ព្រះអង្គបានស្នើសុំជួបជាមួយនឹងលោក Putin ដើម្បីព្យាយាមបញ្ឈប់សង្គ្រាមនៅក្នុងប្រទេសអ៊ុយក្រែន ប៉ុន្តែមិនទាន់ទទួលបានការឆ្លើយតបណាមួយនៅឡើយទេ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។

សម្ដេចប៉ាប Francis យាងថ្លែងសុន្ទរកថានៅទីលានប្រជុំជនក្នុងទីក្រុង St. Peter នៅវ៉ាទីកង់ ថ្ងៃទី ៤ ខែឧសភា ឆ្នាំ២០២២។

ឧបនាយករដ្ឋមន្ត្រីប៊ុលហ្គារីលោក Assen Vassilev បាននិយាយនៅថ្ងៃពុធនេះថា ប្រទេសប៊ុយហ្គារីនឹងស្វះស្វែងសុំការលើកលែង ប្រសិនបើសហភាពអឺរ៉ុបយល់ព្រមអនុញ្ញាតឱ្យមានការលើកលែងលើការហាមឃាត់ណាមួយលើការនាំចូលប្រេងឥន្ធនៈពីរុស្ស៊ី។ លោកបានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត Capital ថា៖ «តាមលក្ខណៈជាក់ស្ដែង ប្រទេសប៊ុយហ្គារីអាចធ្វើបានដោយមិនចាំបាច់ពឹងលើប្រេងឆៅរបស់រុស្ស៊ី ប៉ុន្តែករណីនេះនឹងធ្វើឱ្យតម្លៃប្រេងឥន្ធនៈឡើងថ្លៃខ្លាំង។ ដូច្នេះ ប្រសិនបើគណៈកម្មការអឺរ៉ុបនៃសហភាពអឺរ៉ុបពិចារណាអំពីការលើកលែង យើងចង់ទទួលបានការលើកលែងដូចនេះ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីសេដ្ឋកិច្ចស្លូវ៉ាគីលោក Richard Sulik បាននិយាយនៅថ្ងៃពុធនេះថា ប្រទេសស្លូវ៉ាគីចង់បានដំណាក់កាលអន្តរកាលរយៈពេល ៣ ឆ្នាំ សម្រាប់ខ្លួននៅក្នុងការចាប់ផ្ដើមអនុវត្តដោយសន្សឹមៗតាមសំណើទណ្ឌកម្មរបស់សហភាពអឺរ៉ុបនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ី។ ប្រទេសស្លូវ៉ាគីទទួលបានប្រេងឆៅដែលនាំចូលពីរុស្ស៊ីជាចម្បងតាមបំពង់បង្ហូរប្រេង Druzhba សម័យសហភាពសូវៀត។ នេះបើយោងតាមទីភ្នាក់ងារព័ត៌មាន Reuters។
តម្លៃប្រេងឥន្ធនៈបានកើនឡើងនៅថ្ងៃពុធនេះ នៅពេលដែលសហភាពអឺរ៉ុប ដែលជាប្លុកធ្វើពាណិជ្ជកម្មច្រើនជាងគេបំផុតនៅលើពិភពលោក បានបង្ហាញអំពីគម្រោងនៅក្នុងហាមឃាត់ការនាំចូលប្រេងឥន្ធនៈពីរុស្ស៊ីជាដំណាក់កាល។ នេះបើយោងតាមទីភ្នាក់ងារព័ត៌មាន Reuters។
លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បានស្នើនៅថ្ងៃពុធឱ្យមានការចាប់ផ្ដើមនូវកញ្ចប់ជំនួយជួយស្ដារប្រទេសអ៊ុយក្រែនដើម្បីជួយកសាងអ៊ុយក្រែនឡើងវិញ នៅពេលណាដែលសង្គ្រាមរបស់រុស្ស៊ីនៅអ៊ុយក្រែនបានបញ្ចប់។ លោកស្រីបានថ្លែងប្រាប់សភាសហភាពអឺរ៉ុបថា៖ «កញ្ចប់ជំនួយនេះគួរ តែជំរុញឱ្យមានការវិនិយោគជាច្រើន [នៅអ៊ុយក្រែន] ដើម្បីបំពេញតម្រូវការនិងការកែទម្រង់ចាំបាច់នានា»។ លោកស្រីបានបន្ថែមថា៖ «នៅទីបំផុត វានឹងត្រួសត្រាយផ្លូវសម្រាប់អនាគតរបស់អ៊ុយក្រែននៅក្នុងសហភាពអឺរ៉ុប»។ នេះបើយោងតាមទីភ្នាក់ងារព័ត៌មាន Reuters។
លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុបបាននិយាយនៅថ្ងៃពុធថា សហភាពអឺរ៉ុបនឹងហាមឃាត់ស្ថានីយទូរទស្សន៍ចំនួន៣ដែលគ្រប់គ្រងដោយរដ្ឋរបស់រុស្ស៊ី ដែលនេះគឺជាផ្នែកមួយនៃកញ្ចប់ទណ្ឌកម្មលើកទី៦របស់សហភាពអឺរ៉ុបទាក់ទិននឹងការធ្វើសង្គ្រាមរបស់រុស្ស៊ីនៅអ៊ុយក្រែន។ លោកស្រីបានថ្លែងប្រាប់សភាសហភាពអឺរ៉ុបថា៖ «ស្ថានីយទូរទស្សន៍ទាំងនេះនឹងមិនត្រូវបានអនុញ្ញាតឱ្យចែកផ្សាយព័ត៌មានរបស់ខ្លួនជាបន្តទៀតឡើយនៅក្នុងសហភាពអឺរ៉ុប មិនថាក្នុងទម្រង់បែបណានោះទេ ទោះតាមខ្សែកាប តាមផ្កាយរណប តាមអ៊ីនធឺណិត ឬក៏តាម apps ក្នុងទូរស័ព្ទ smartphone ក៏ដោយ»។ លោកស្រីបានហៅស្ថានីយទូរទស្សន៍ទាំងនេះថាជា «កន្លែងបំពងសំឡេងខ្លាំងក្លានៃការកុហកនិងការឃោសនារបស់ប្រធា នាធិបតីរុស្ស៊ីលោក Vladimir] Putin»។ នេះបើយោងតាមទីភ្នាក់ងារព័ត៌មាន Reuters។
គណៈកម្មការអឺរ៉ុបនៃសហភាពអឺរ៉ុបបានស្នើឱ្យមានការដាក់ទណ្ឌកម្មលើធនាគារ Credit Bank of Moscow និងធនាគារ Russian Agricultural Bank របស់រុស្ស៊ី។ នេះបើយោងតាមប្រភពមួយពីសហភាពអឺរ៉ុបដែលបានប្រាប់ទីភ្នាក់ងារព័ត៌មានReuters នៅថ្ងៃពុធ។ នៅមុនហ្នឹងក្នុងថ្ងៃពុធនេះផងដែរ លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បាននិយាយថា ធនាគារ Sberbank របស់រុស្ស៊ីក៏នឹងត្រូវរងទណ្ឌកម្មផងដែរ។

រូបឯកសារ៖ លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប ថ្លែងសុន្ទរកថានៅទីស្នាក់ការសហភាពអឺរ៉ុប ក្នុងទីក្រុងព្រុចសែល ប្រទេសប៊ែលហ្សិក ថ្ងៃទី ២៧ ខែមេសា ឆ្នាំ២០២២។ (AP)

អឺរ៉ុបនឹងនៅបន្តទិញប្រេងឥន្ធនៈពីរុស្ស៊ីតាមរយៈប្រទេសទីបី នៅពេលដែលដែលសហភាពអឺរ៉ុបដាក់ស្នើនូវការហាមឃាត់ការនាំចូលប្រេងឥន្ធនៈពីរុស្ស៊ី។ នេះបើយោងតាមសេចក្ដីរាយការណ៍របស់ទីភ្នាក់ងារ RIA របស់រុស្ស៊ីដែលយោងលើសម្ដីរបស់លោក Vladimir Dzhabarov អនុប្រធានទីមួយនៃគណៈកម្មាធិការកិច្ចការអន្តរជាតិនៃព្រឹទ្ធសភារុស្ស៊ី ដែលបាននិយាយនៅថ្ងៃពុធនេះ។ នេះបើយោងតាមទីភ្នាក់ងារព័ត៌មាន Reuters។
ប្រទេសហុងគ្រីនិងប្រទេសស្លូវ៉ាគីនឹងអាចបន្តទិញប្រេងឆៅពីរុស្ស៊ីរហូតដល់ដំណាច់ឆ្នាំ ២០២៣នៅក្រោមកិច្ចសន្យាដែលមានស្រាប់ ដែលនេះគឺជាការលើកលែងនៅក្នុងការហាមឃាត់ការនាំចូលប្រទេសឥន្ធនៈពីរុស្ស៊ីដែលគណៈកម្មការអឺរ៉ុបនៃសហភាពអឺរ៉ុបបានស្នើឡើងនៅថ្ងៃពុធ។ នេះបើយោងតាមប្រភពមួយពីសហភាពអឺរ៉ុបដែលបានប្រាប់ទីភ្នាក់ងារព័ត៌មាន Reuters នៅថ្ងៃពុធ។
នៅក្នុងការស្នើការដាក់ទណ្ឌកម្មជុំទី៦ប្រឆាំងនឹងរុស្ស៊ីទាក់ទិននឹងការធ្វើសង្គ្រាមរបស់រុស្ស៊ីនៅអ៊ុយក្រែន លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បាននិយាយនៅថ្ងៃពុធនេះថា បណ្ដាប្រទេសសហភាពអឺរ៉ុបនឹងឈប់នាំចូលប្រេងឥន្ធនៈនិងប្រេងចម្រាញ់ពីរុស្ស៊ី។ លោកស្រីបានបញ្ជាក់ប្រាប់សភាអឺរ៉ុបថា៖ «យើងនឹងបញ្ឈប់ការនាំចូលប្រេងឆៅពីរុស្ស៊ីជាដំណាក់កាលនៅក្នុងអំឡុងពេល ៦ ខែ និងការនាំចូលប្រេងចម្រាញ់នៅត្រឹមចុងឆ្នាំនេះ»។ អ្នកស្រីបានបន្តថា៖ «នេះគឺជាការហាមឃាត់ការនាំចូលទាំងស្រុងនូវប្រេងឥន្ធនៈរបស់រុស្ស៊ីទាំងអស់ ទាំងតាមផ្លូវសមុទ្រនិងតាមបំពង់បង្ហូរប្រេង ទាំងប្រេងឆៅនិងប្រេងចម្រាញ់»។ អ្នកស្រីបានបន្ថែមថា៖ «វានឹងមិនងាយស្រួលនោះទេ។ សមាជិក [សហភាពអឺរ៉ុប] ខ្លះពឹងផ្អែកខ្លាំងលើប្រេងឥន្ធនៈរបស់រុស្ស៊ី។ ប៉ុន្តែយើងត្រូវតែធ្វើការលើរឿងនេះ»។ សំណើទណ្ឌកម្មនេះតម្រូវឱ្យមានការយល់ព្រមពីប្រទេសទាំង ២៧ នៃសហភាពអឺរ៉ុបដើម្បីអាចចូលជាធរមានបាន។ នេះបើយោងតាមទីភ្នាក់ងារព័ត៌មាន Reuters។
ប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Charles Mechel បានសន្យានៅថ្ងៃពុធថានឹងបង្កើនជំនួយយោធារបស់សហភាពអឺរ៉ុបដល់ប្រទេសម៉ុលដាវី ដែលនៅជាប់នឹងប្រទេសអ៊ុយក្រែន។ កាលពីពេលថ្មីៗនេះ ប្រទេសម៉ុលដាវីបានប្រឈមនឹងការវាយប្រហារជាច្រើននៅក្នុងតំបន់ផ្ដាច់ខ្លួនដែលមានទំនោរទៅរករុស្ស៊ី។ នេះបើយោងតាមទីភ្នាក់ងារព័ត៌មាន AFP។
សាកសពជនស៊ីវិល២០នាក់ទៀតត្រូវបានរកឃើញនៅក្នុងរយៈពេល២៤ម៉ោងចុងក្រោយនេះនៅក្នុងតំបន់រដ្ឋធានីកៀវ ប្រទេសអ៊ុយក្រែន។ នេះបើតាមការបញ្ជាក់របស់ប៉ូលិសនៅថ្ងៃពុធនេះ។ ការរកឃើញនេះបានធ្វើឱ្យចំនួនសាកសពសរុបដែលបានរកឃើញកន្លងមកកើនដល់ ១.២៣៥ នាក់។ នេះបើយោងតាមទីភ្នាក់ងារព័ត៌មាន AFP។
ក្បួនរថយន្តក្រុងបានចាកចេញពីទីក្រុង Mariupol ប្រទេសអ៊ុយក្រែន នៅថ្ងៃពុធដែលនេះគឺជាការព្យាយាមថ្មីមួយរបស់ប្រទេសអ៊ុយក្រែន អង្គការសហប្រជាជាតិនិងគណៈ កម្មាធិការអន្តរជាតិកាកបាទក្រហម (ICRC) នៅក្នុងការជម្លៀសជនស៊ីវិលចេញពីទីក្រុងនេះ។ នេះបើតាមការបញ្ជាក់របស់អភិបាលតំបន់ Donetsk លោក Pavlo Kyrylenko។ លោកបានបន្ថែមថា រថយន្តក្រុងទាំងនេះធ្វើដំណើរឆ្ពោះទៅទីក្រុង Zaporizhzhia ដែលគ្រប់គ្រងដោយអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

ប្រជាជនអ៊ុយក្រែនហូបអាហារក្រោយពីរត់ភៀសខ្លួនពីក្រុង Mariupol មកដល់មជ្ឈមណ្ឌលសម្រាប់ជនភៀសខ្លួននៅក្រុង Zaporizhzhia ប្រទេសអ៊ុយក្រែន ថ្ងៃទី ៣ ខែឧសភា ឆ្នាំ២០២២។ (AP Photo/Evgeniy Maloletka)

ក្រសួងការបរទសរុស្ស៊ីបានប្រកាសនៅថ្ងៃពុធនេះអំពីការដាក់ទណ្ឌកម្មលើមន្ត្រីរដ្ឋាភិបាល អ្នកកាសែតនិងសាស្ត្រាចារ្យនៃប្រទេសជប៉ុនទាំងអស់ចំនួន៦៣នាក់ចំពោះការប្រឡូកនៅក្នុងអ្វីដែលរុស្ស៊ីហៅថាជា «វោហាសាស្ត្រដែលមិនអាចទទួលយកបាន» ប្រឆាំងនឹងរដ្ឋាភិបាលរុស្ស៊ី។ បញ្ជីឈ្មោះអ្នកដែលរងទណ្ឌកម្មរបស់រុស្ស៊ីនេះរួមមានទាំងនាយករដ្ឋមន្ត្រីជប៉ុនលោក Fumio Kishida រដ្ឋមន្ត្រីការបរទេសជប៉ុនលោក Yoshimasa Hayashi និងរដ្ឋមន្ត្រីការពារជាតិជប៉ុនលោក Nobuo Kishi ផងដែរក្នុងចំណោមមន្ត្រីផ្សេងៗទៀត។ ក្រសួងការបរទេសរុស្ស៊ីបញ្ជាក់ថា ទណ្ឌកម្មនេះរារាំងបុគ្គលទាំងនោះមិនឱ្យចូលមកក្នុងប្រទេសរុស្ស៊ីដោយគ្មានកាលកំណត់។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលអ៊ុយក្រែនបានចោទប្រកាន់រដ្ឋាភិបាលរុស្ស៊ីនៅថ្ងៃពុធថាមានគម្រោងរៀបចំក្បួនព្យុះហយាត្រាយោធានៅក្នុងទីក្រុងMariupol នៅថ្ងៃទី៩ ខែឧសភាខាងមុខដើម្បីប្រារព្ធជ័យជម្នះលើពួកណាហ្ស៊ីកាលពីសម័យសង្គ្រាមលោកលើកទីពីរ។ រដ្ឋាភិបាលអ៊ុយក្រែនបានបញ្ជាក់ថា មន្ត្រីម្នាក់នៃរដ្ឋបាលប្រធានាធិបតីរុស្ស៊ីបានទៅដល់ទីក្រុង Mariupolហើយ។ នេះបើយោងតាមទីភ្នាក់ងារព័ត៌មាន AFP។
ចក្រភពអង់គ្លេសបានបញ្ជាក់នៅថ្ងៃពុធនេះថា រុស្ស៊ីបានដាក់ពង្រាយក្រុមយុទ្ធសាស្ត្រកងវរសេនាតូចចំនួន ២២ ក្រុមនៅជិតទីក្រុង Izium នៅភាគខាងកើតប្រទេសអ៊ុយ ក្រែន ដើម្បីរុលទៅមុខតាមបណ្ដោយអ័ក្សនៅភាគខាងជើងនៃតំបន់ Donbas។ ផ្នែកស៊ើបការណ៍សម្ងាត់យោធារបស់ចក្រភពអង់គ្លេសបានបញ្ជាក់នៅលើ Twitter ថា រុស្ស៊ីទំនងជាអាចមានបំណងរំកិលផុតពីទីក្រុង Izium ដើម្បីដណ្ដើមកាន់កាប់ទីក្រុង Kramatorsk និងទីក្រុង Severodonetsk។ នេះបើយោងតាមទីភ្នាក់ងារព័ត៌មាន Reuters។
កងកម្លាំងនៃប្រទេសបេឡារុសបានចាប់ផ្ដើមការធ្វើសមយុទ្ធបន្ទាន់នៅថ្ងៃពុធដើម្បីសាកសមត្ថភាពត្រៀមប្រយុទ្ធរបស់ខ្លួន។ នេះបើយោងតាមទីភ្នាក់ងារព័ត៌មាន TASS របស់រុស្ស៊ី ដែលបានយោងលើការលើកឡើងរបស់ក្រសួងការពារជាតិបេឡារុស។ នៅក្នុងស្ថានភាពនៃការឈ្លានពានរបស់រុស្ស៊ីលើអ៊ុយក្រែន ក្រសួងការពារជាតិបេឡា រុសថា ការធ្វើសមយុទ្ធនេះមិនបង្កជាការគំរាមកំហែងចំពោះប្រទេសជិតខាងខ្លួនឬក៏ចំពោះសហគមន៍ជាទូទៅនៅទ្វីបអឺរ៉ុបនោះទេ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសសហរដ្ឋអាមេរិកលោកAntony Blinkenនិងរដ្ឋមន្ត្រីការបរទេសចក្រភពអង់គ្លេសលោកស្រី Liz Truss បានពិភាក្សាគ្នាតាមទូរស័ព្ទកាលពីថ្ងៃអង្គារអំពីការគាំទ្រប្រទេសអ៊ុយក្រែន។ អ្នកនាំពាក្យក្រសួងការបរទេសអាមេរិកលោក Ned Price បាននិយាយថា ប្រមុខការទូតទាំងពីរបានពិភាក្សាអំពី«ជំនួយផ្នែកសន្តិសុខនិងផ្នែកមនុស្សធម៌បន្ថែមទៀតសម្រាប់អ៊ុយក្រែននិងសាមគ្គីភាពរវាងបណ្ដាប្រទេសនៅជុំវិញមហាសមុទ្រអាត្លង់ទិកជាបន្ត»ក៏ដូចជា «ផលវិបាកផ្នែកសេដ្ឋកិច្ចលើប្រទេសណាដែលនៅបន្តផ្ដល់ការគាំទ្រផ្នែកហិរញ្ញវត្ថុនិងសម្ភារដែលជួយដល់ការធ្វើសង្គ្រាមរបស់រុស្ស៊ីប្រឆាំងនឹងអ៊ុយក្រែន» ផងដែរ។
ប្លុកពីរនៃបណ្ដាប្រទេសនៅតំបន់អាមេរិកកណ្ដាលនិងតំបន់ការ៉ាអ៊ីបកាលពីថ្ងៃអង្គារបានថ្កោលទោសការវាយប្រហាររបស់រុស្ស៊ីលើអ៊ុយក្រែនហើយបានព្រមានអំពីផលប៉ះពាល់នៃសង្គ្រាមនេះលើតំបន់អាមេរិកកណ្ដាលនិងតំបន់ការ៉ាអ៊ីប។ នៅក្នុងការថ្លែងសម្រាប់សហគមន៍ប្រទេសតំបន់ការ៉ាអ៊ីប(CARICOM)ដែលជាអង្គការអន្តររដ្ឋាភិបាលតំណាងឱ្យប្រទេសភាគច្រើននៃតំបន់ការ៉ាអ៊ីប រដ្ឋមន្ត្រីការបរទេសប្រទេសបេលីលោក Eamon Courtenay បាននិយាយនៅក្នុងសន្និសីទកាសែតថា៖ «យើងទាមទារឱ្យមានការបញ្ឈប់អរិភាពពាក់ព័ន្ធទៅនឹងបូរណភាពទឹកដីនិងអធិបតេយ្យភាពរបស់ប្រទេសអ៊ុយក្រែន»។ ចំណែកឯរដ្ឋមន្ត្រីការបរទេសប៉ាណាម៉ាវិញបានថ្លែងថា អង្គការប្រព័ន្ធសមាហរណកម្មតំបន់អាមេរិកកណ្ដាល (SICA) ដែលមានប្រទេសទាំងអស់នៅក្នុងតំបន់ជាសមាជិក «ថ្កោលទោសខ្លាំងក្លាលើការប្រើកម្លាំងនិងអំពើហិង្សា» របស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។

២១:៥០ ៥.៥.២០២២

ថ្ងៃព្រហស្បតិ៍ ទី ៥ ខែឧសភា៖

ប្រធានាធិបតីអ៊ុយក្រែនលោក Volodymyr Zelenskyy បានអញ្ជើញអធិការបតីអាល្លឺម៉ង់លោក Olaf Scholz និងប្រធានាធិបតីអាល្លឺម៉ង់លោក Frank-Walter Steinmeier ឱ្យធ្វើទស្សនកិច្ចទៅកាន់ប្រទេសអ៊ុយក្រែន។ នេះបើតាមការបញ្ជាក់របស់ខុទ្ទកាល័យប្រធានាធិបតីអាល្លឺម៉ង់នៅថ្ងៃព្រហស្បតិ៍នេះ។ លោក Zelenskyy បានផ្ដល់ការអញ្ជើញដូចនេះនៅក្នុងអំឡុងពេលសន្ទនាតាមទូរស័ព្ទជាមួយនឹងលោក Steinmeier នៅថ្ងៃព្រហស្បតិ៍នេះ។ នេះបើយោងតាមប្រភពមួយមកពីខុទ្ទកាល័យប្រធានាធិបតីអាល្លឺម៉ង់ដែលបានប្រាប់ទីភ្នាក់ងារព័ត៌មាន AFP។
នាយករដ្ឋមន្ត្រីអ៊ីស្រាអែលលោក Naftali Bennett បាននិយាយនៅថ្ងៃព្រហស្បតិ៍នេះថា ប្រធានាធិបតីរុស្ស៊ីលោក Vladimir Putin បានសុំទោសចំពោះការលើកឡើងរបស់រដ្ឋមន្ត្រីការបរទេសរុស្ស៊ីដែលថាមេដឹកនាំផ្ដាច់ការណាហ្ស៊ីលោក Adolf Hitler មានដើមកំណើតជាជាតិសាសន៍ជ្វីហ្វ។ បន្ទាប់ពីបានសន្ទនាតាមទូរស័ព្ទជាមួយនឹងលោក Putin មក លោក Bennett បានបញ្ជាក់ថា លោកទទួលយកការសុំទោសរបស់លោក Putin នេះ និងបានអរគុណលោក Putin ចំពោះការបញ្ជាក់អំពីគោលជំហររបស់លោក។ លោក Bennett ក៏បាននិយាយផងដែរថា លោកបានស្នើលោក Putin ឱ្យពិចារណាអនុញ្ញាតឱ្យមានការជម្លៀសជនស៊ីវិលចេញពីរោងចក្រដែកថែប Azovstal ក្នុងទីក្រុង Mariupol ប្រទេសអ៊ុយក្រែន។ លោក Bennett បានលើកឡើងថា លោកបានស្នើដូច្នេះបន្ទាប់ពីលោកបានសន្ទនានៅមុនការស្នើនេះជាមួយនឹងប្រធានាធិបតីអ៊ុយក្រែនលោក Volodymyr Zelenskyy និងថា លោក Putin បានសន្យាថានឹងបង្កើតច្រករបៀងសម្រាប់ជម្លៀសជនស៊ីវិល។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin និងនាយករដ្ឋមន្ត្រីអ៊ីស្រាអែលលោក Naftali Bennett នៅថ្ងៃព្រហស្បតិ៍នេះបានពិភាក្សាគ្នាអំពីវិបត្តិអ៊ុយក្រែននិងអំពីអំពើប្រល័យពូជសាសន៍ Holocaust ក្នុងសម័យសង្គ្រាមលោកលើកទីពីរ នៅចំពេលដែលមានភាពតានតឹងទាក់ទិននឹងការលើកឡើងរបស់រដ្ឋមន្ត្រីការបរទេសរុស្ស៊ីកាលពីថ្ងៃអាទិត្យដែលថាមេដឹកនាំផ្ដាច់ការណាហ្ស៊ីលោក Adolf Hitler មានឈាមជ័រជាជាតិសាសន៍ជ្វីហ្វ។ រដ្ឋាភិបាលរុស្ស៊ីបានបញ្ជាក់ដូច្នេះថា៖ «ការផ្ដោះប្ដូរយោបល់គ្នាបែបស៊ីជម្រៅអំពីស្ថានភាពនៅក្នុងប្រទេសអ៊ុយក្រែនបានបន្តធ្វើឡើង»។ រដ្ឋាភិបាលរុស្ស៊ីបានបន្ថែមថា មេដឹកនាំទាំងពីរក៏បានពិភាក្សាគ្នាផងដែរអំពី «អនុស្សាវរីយ៍ជាប្រវត្តិសាស្ត្រ» និងអំពីអំពើប្រល័យពូជសាសន៍ Holocaust។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ ប្រធានាធិបតីរុស្ស៊ី លោក Vladimir Putin ពិភាក្សាជាមួយនាយករដ្ឋមន្ត្រីអ៊ីស្រាអែល លោក Naftali Bennett ក្នុងអំឡុងកិច្ចប្រជុំរបស់ពួកគេក្នុងទីក្រុង Sochi ប្រទេសរុស្ស៊ី កាលពីថ្ងៃទី២២ ខែតុលា ឆ្នាំ២០២១។

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃព្រហស្បតិ៍នេះថា រដ្ឋមន្ត្រីការបរទេសរុស្ស៊ីលោក Sergei Lavrov គួរតែសុំទោសជាសាធារណៈចំពោះជាតិសាសន៍ជ្វីហ្វទាំងអស់នៅជុំវិញពិភពលោកទាក់ទិននឹងការលើកឡើងរបស់លោកដែលថាមេដឹកនាំផ្ដាច់ការហាហ្ស៊ីលោក Adolf Hitler មានឈាមជ័រជាជាតិសាសន៍ជ្វីហ្វ។ លោក Kuleba បានសរសេរនៅលើ Twitter ដូច្នេះថា៖ «រដ្ឋមន្ត្រីការបរទេសអ៊ីស្រាអែលលោក Yair Lapid និងខ្ញុំមានការខឹងសម្បារនឹងការលើកឡើងរបស់រដ្ឋមន្ត្រីការបរទេសរុស្ស៊ីដែលមានលក្ខណៈប្រឆាំងនឹងជាតិសាសន៍ជ្វីហ្វ។ ខ្ញុំសង្កត់ធ្ងន់ថា គំនិតបែបប្រឆាំងនឹងជាតិសាសន៍ជ្វីហ្វរបស់ឥស្សរជនរុស្ស៊ីមានប្រវត្តិជាយូរមកហើយ។ វិធីកែខ្លួនតែមួយគត់សម្រាប់លោក Lavrov គឺលោកត្រូវសុំទោសជាសាធារណៈចំពោះជាតិសាសន៍ជ្វីហ្វទាំងអស់។ ពាក្យប្រឆាំងនឹងជាតិសាសន៍ជ្វីហ្វណាមួយគឺមិនអាចអត់ឱនឱ្យបាននោះទេ»។ នេះបើយោងតាមបណ្ដាញទូរទស្សន៍ CNN។
បណ្ដាប្រទេសជាសមាជិកអង្គការសុខភាពពិភពលោក (WHO) នឹងពិចារណាលើសេចក្ដីសម្រេចមួយប្រឆាំងនឹងរុស្ស៊ីនៅសប្ដាហ៍ក្រោយ បន្ទាប់ពីរុស្ស៊ីបានឈ្លានពានអ៊ុយក្រែន។ សេចក្ដីសម្រេចនោះក៏រួមមានទាំងលទ្ធភាពដែលអាចឈានទៅដល់ការបិទទីស្នាក់ការអង្គការសុខភាពពិភពលោកប្រចាំតំបន់ដ៏ចម្បងមួយនៅក្នុងទីក្រុងមូស្គូផងដែរ។ នេះបើយោងតាមឯកសារមួយដែលទីភ្នាក់ងារព័ត៌មាន Reuters បានទទួលនៅថ្ងៃព្រហស្បតិ៍នេះ។ សេចក្ដីព្រាងនៃសេចក្ដីសម្រេចនេះ ដែលរៀបចំឡើងភាគច្រើនដោយមន្ត្រីការទូតសហភាពអឺរ៉ុបនិងបានដាក់ជូនការិយាល័យអង្គការសុខភាពពិភពលោកប្រចាំទ្វីបអឺរ៉ុបនៅសប្ដាហ៍នេះ បានធ្វើឡើងបន្ទាប់ពីមានសំណើពីប្រទេសអ៊ុយក្រែន។ សេចក្ដីព្រាងនេះត្រូវបានចុះហត្ថលេខាដោយប្រទេសជាសមាជិកអង្គការសុខភាពពិភពលោកយ៉ាងតិច ៣៨ ដែលក្នុងនោះរួមមានទាំងប្រទេសតួកគី បារាំង និងអាល្លឺម៉ង់ផងដែរ។ នេះបើយោងតាមទីភ្នាក់ងារព័ត៌មាន Reuters។
អគ្គមេបញ្ជាការកងទ័ពអ៊ុយក្រែនលោកនាយឧត្តមសេនីយ៍ Valeriy Zaluzhnyi បាននិយាយនៅថ្ងៃព្រហស្បតិ៍នេះថា ប្រទេសរបស់លោកត្រូវការប្រព័ន្ធបាញ់រ៉ុក្កែត (MLRS) ជាច្រើន ដើម្បីការពារប្រឆាំងនឹងមីស៊ីលស្វ័យនាំផ្លូវរបស់រុស្ស៊ី។ លោក Zaluzhnyi បានបញ្ជាក់ដូច្នេះ បន្ទាប់ពីលោកបានប្រាប់ប្រធានក្រុមនាយសេនាធិការកងទ័ពសហរដ្ឋអាមេរិកលោកនាយឧត្តមសេនីយ៍ Mark Milley អំពីស្ថានភាពយោធានៅក្នុងប្រទេសអ៊ុយក្រែនថា រុស្ស៊ីបានចាប់ផ្ដើមប្រើការវាយប្រហារជាថ្មីដោយមីស៊ីលស្វ័យនាំផ្លូវ។ នេះបើយោងតាមទីភ្នាក់ងារព័ត៌មាន Reuters។
អគ្គលេខាធិការអង្គការអូតង់ (NATO) លោក Jens Stoltenberg បានបញ្ជាក់ប្រាប់ទូរទស្សន៍ SVT របស់ប្រទេសស៊ុយអែតនៅថ្ងៃព្រហស្បតិ៍នេះថា អង្គការអូតង់នឹងបង្កើនវត្តមានរបស់ខ្លួននៅជុំវិញព្រំដែនរបស់ស៊ុយអែតនិងនៅក្នុងសមុទ្របាល់ទិក នៅពេលណាដែលប្រទេសស៊ុយអែតដាក់ពាក្យសុំចូលជាសមាជិករបស់អង្គការអូតង់ហើយពាក្យសុំនោះកំពុងដំណើរការ។ ប្រទេសស៊ុយអែតនិងប្រទេសហ្វាំងឡង់មិនទាន់ចូលជាសមាជិករបស់អង្គការអូតង់នៅឡើយទេ ប៉ុន្តែដោយសារតែរុស្ស៊ីបានភ្ជាប់យកតំបន់ Crimea របស់ប្រទេសអ៊ុយក្រែនកាលពីឆ្នាំ ២០១៤ និងដោយសារតែការឈ្លានពានរបស់រុស្ស៊ីលើអ៊ុយក្រែននៅពេលបច្ចុប្បន្ននេះ បានធ្វើឱ្យស៊ុយអែតនិងហ្វាំងឡង់ពិចារណាឡើងវិញអំពីគោលនយោបាយសន្តិសុខរបស់ពួកគេ ដោយពួកគេនឹងទំនងជាចូលជាសមាជិករបស់អង្គការអូតង់។ លោក Stoltenberg និយាយដូច្នេះថា៖ «ខ្ញុំជឿថា យើងនឹងស្វែងរកដំណោះស្រាយសម្រាប់តម្រូវការផ្នែកសន្តិសុខដែលប្រទេសស៊ុយអែតនឹងមាននៅក្នុងដំណាក់កាលអន្តរកាលមួយ»។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអ៊ុយក្រែនលោក Denys Shmyhal បាននិយាយនៅថ្ងៃព្រហស្បតិ៍នេះថា ប្រទេសអ៊ុយក្រែនទទួលបានជំនួយជាង ១២ ពាន់លានដុល្លារជាសព្វាវុធនិងហិរញ្ញវត្ថុ តាំងពីពេលដែលរុស្ស៊ីបានចាប់ផ្ដើមឈ្លានពានពេញទំហឹងលើខ្លួនកាលពីថ្ងៃទី ២៤ ខែកុម្ភៈមក។ នៅក្នុងការថ្លែងនៅឯសន្និសីទកម្រិតខ្ពស់របស់អ្នកបរិច្ចាគជំនួយនៅក្នុងរដ្ឋធានីវ៉ាសូវី ប្រទេសប៉ូឡូញ រួមជាមួយនឹងមេដឹកនាំនៃប្រទេសប៉ូឡូញ ស៊ុយអែត និងប្រធានគណៈកម្មការអឺរ៉ុបនៃសហភាពអឺរ៉ុប លោក Shmyhal បានថ្លែងអំណរគុណដល់មេដឹកនាំទាំងនេះសម្រាប់ការគាំទ្រមិនងាករេរបស់ពួកគេចំពោះប្រទេសអ៊ុយក្រែននៅក្នុងអំឡុងពេលសង្គ្រាមនេះ។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីប៉ូឡូញលោក Mateusz Morawiecki បាននិយាយថា ថវិកាចំនួន ៦.៥០០ លានដុល្លារអាមេរិកត្រូវបានរៃអង្គាសនៅក្នុងសន្និសីទអ្នកបរិច្ចាគជំនួយអន្តរជាតិមួយនៅក្នុងទីក្រុងវ៉ាសូវី ប្រទេសប៉ូឡូញ ដើម្បីផ្ដល់ការជួយជ្រោមជ្រែងផ្នែកមនុស្សធម៌ដល់ប្រទេសអ៊ុយក្រែនដែលហែកហួរដោយសារសង្គ្រាម។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ សន្និសីទនេះបានធ្វើឡើងនៅថ្ងៃព្រហស្បតិ៍នេះនិងបានសហរៀបចំដោយប្រទេសប៉ូឡូញនិងស៊ុយអែត និងមានការចូលរួមពីនាយករដ្ឋមន្ត្រីនិងឯកអគ្គរដ្ឋទូតតំណាងឱ្យបណ្ដាប្រទេសជាច្រើននៅអឺរ៉ុប ក៏ដូចជាពីប្រទេសដែលនៅឆ្ងាយពីអឺរ៉ុបនឹងពីក្រុមហ៊ុនជំនួញមួយចំនួនផងដែរ។
ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃព្រហស្បតិ៍បានចាប់ផ្ដើមវេទិការៃអង្គាសប្រាក់ជាសាកលមួយដើម្បីជួយរដ្ឋាភិបាលអ៊ុយក្រែនឱ្យឈ្នះសង្គ្រាមប្រឆាំងនឹងរុស្ស៊ី និងកសាងហេដ្ឋារចនាសម្ព័ន្ធរបស់ប្រទេសអ៊ុយក្រែនឡើងវិញ។ លោក Zelenskyy បាននិយាយនៅក្នុងវីដេអូមួយដែលបង្ហោះនៅលើទំព័រ Twitter របស់លោកថា៖ «ដោយគ្រាន់តែចុចប៊ូតុងមួយប៉ុណ្ណោះ អ្នកអាចបរិច្ចាគថវិកាដើម្បីជួយការពារអ្នកការពាររបស់យើង ដើម្បីជួយសង្គ្រោះជនស៊ីវិលរបស់យើង និងដើម្បីកសាងប្រទេសអ៊ុយក្រែនឡើងវិញ»។ វេទិកាដែលលោក Zelenskyy បានចាប់ផ្ដើមអនុវត្តនេះមានឈ្មោះ «United24» ដែលមានវេបសាយ u24.gov.ua។ នេះបើយោងតាមទីភ្នាក់ងារព័ត៌មាន AFP។

លោក Charles Michel ប្រធានក្រុមប្រឹក្សាអឺរ៉ុបនៃសហភាពអឺរ៉ុបបានបញ្ជាក់នៅក្នុងកិច្ចសម្ភាសន៍មួយដែលចេញផ្សាយនៅថ្ងៃព្រហស្បតិ៍ថា សហភាពអឺរ៉ុបគួរលក់ទ្រព្យសម្បត្តិរបស់រុស្ស៊ីដែលខ្លួនរឹបអូសបានដើម្បីបានថវិកាយកទៅជួយកសាងប្រទេសអ៊ុយក្រែនដែលខ្ទេចខ្ទាំដោយសារសង្គ្រាមរបស់រុស្ស៊ី។ លោក Michel បានប្រាប់ទីភ្នាក់ ងារព័ត៌មាន Intefax-Ukraine ថា៖ «តាមទស្សនៈផ្ទាល់ខ្លួនរបស់ខ្ញុំ ខ្ញុំជឿថា នេះគឺពិត ជាសំខាន់ដោយសារតែមិនត្រឹមតែបង្កកទ្រព្យសម្បត្តិប៉ុណ្ណោះទេ ប៉ុន្តែថែមទាំងរឹប អូសទ្រព្យសម្បត្តិនិងលក់យកថវិកាដើម្បីកសាងប្រទេសអ៊ុយក្រែនឡើងវិញផងដែរ»។ នេះបើយោងតាមទីភ្នាក់ងារព័ត៌មាន AFP។
លោកស្រី Barbara Pompili រដ្ឋមន្ត្រីក្រសួងបរិស្ថាននិងថាមពលនៃប្រទេសបារាំង បានបញ្ជាក់នៅ ថ្ងៃព្រហស្បតិ៍ថា លោកស្រីមានទំនុកចិត្តថា បណ្ដាប្រទេសសមាជិកសហភាពអឺរ៉ុបនឹងសម្រេចបាននូវការមូលមតិគ្នានៅត្រឹមចុងសប្ដាហ៍នេះលើវិធីបញ្ចប់ការនាំចូលប្រេងឥន្ធនៈពីរុស្ស៊ី។ លោកស្រីបានថ្លែងប្រាប់វិទ្យុFrance Infoរបស់បារាំងថា៖ «ប្រទេសខ្លះពឹងផ្អែកលើប្រេងឥន្ធនៈរបស់រុស្ស៊ីជាងប្រទេសផ្សេងទៀត។ ដូច្នេះហើយ យើងត្រូវតែព្យាយាមស្វែងរកដំណោះស្រាយ ដើម្បីឱ្យប្រទេសទាំងនោះអាចចូលរួមមូលមតិគ្នាបានលើទណ្ឌកម្មទាំងនេះ។ ខ្ញុំគិតថា យើងគួរតែអាចធ្វើវាបាន»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីនៅថ្ងៃព្រហស្បតិ៍នេះបានចោទប្រកាន់ក្រុមបស្ចិមប្រទេសថាបានរារាំងមិនឱ្យយុទ្ធនាការយោធារបស់រុស្ស៊ីនៅក្នុងប្រទេសអ៊ុយក្រែនបញ្ចប់ទៅ «បានលឿន» ដោយសារក្រុមបស្ចិមប្រទេសបានផ្គត់ផ្គង់សព្វាវុធដល់អ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីជប៉ុនលោកFumio Kishida បាននិយាយនៅថ្ងៃព្រហស្បតិ៍ថា លោកបានថ្កោលទោសខ្លាំងក្លាបំផុតចំពោះការឈ្លានពានរបស់រុស្ស៊ីលើអ៊ុយក្រែន។ លោកបានបន្ថែមថាការឈ្លានពានរបស់រុស្ស៊ីនេះគឺស្មើនឹងឧក្រិដ្ឋកម្មសង្គ្រាម។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Kishida ថ្លែងដូច្នេះនៅក្នុងទីក្រុងឡុងដ៍ ចក្រភពអង់គ្លេស បន្ទាប់ពីលោកបានធ្វើទស្សនកិច្ចរយៈពេលវែងមួយទៅកាន់តំបន់អាស៊ីអាគ្នេយ៍។ មន្ត្រីរដ្ឋាភិបាលជប៉ុនបានបញ្ជាក់ថា រដ្ឋាភិបាលជប៉ុនបានសង្ឃឹមថានឹងរៀបចំការពិភាក្សាអំពីការឈ្លានពានរបស់រុស្ស៊ី និងកៀរគរការឆ្លើយតបនៅក្នុងតំបន់អាស៊ីអាគ្នេយ៍ចំពោះការឈ្លានពាននេះ ដែលនៅក្នុងតំបន់អាស៊ីអាគ្នេយ៍នោះគឺមានតែប្រទេសសិង្ហបុរីមួយតែប៉ុណ្ណោះដែលបានចូលរួមដាក់ទណ្ឌកម្មប្រឆាំងនឹងរុស្ស៊ី។
លោក Koichi Hagiuda រដ្ឋមន្ត្រីក្រសួងសេដ្ឋកិច្ច ពាណិជ្ជកម្មនិងឧស្សាហកម្មនៃប្រ ទេសជប៉ុន បាននិយាយនៅថ្ងៃព្រហស្បតិ៍នេះថា ប្រទេសជប៉ុននឹងប្រឈមនឹង «ការលំបាក» ប្រសិនបើអនុវត្តតាមភ្លាមៗនូវវិធានការនៃការកាត់ផ្ដាច់ការនាំចូលប្រេងឥន្ធនៈពីប្រទេសរុស្ស៊ីទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ លោក Hagiudaបានថ្លែងដូច្នេះនៅក្នុងអំឡុងដំណើរទស្សនកិច្ចរបស់លោកនៅរដ្ឋធានីវ៉ាស៊ីន តោន សហរដ្ឋអាមេរិក បន្ទាប់ពីគណៈកម្មការអឺរ៉ុបនៃសហភាពអឺរ៉ុបបានស្នើកាលពីថ្ងៃពុធនូវកញ្ចប់ទណ្ឌកម្មតឹងតែងបំផុតប្រឆាំងនឹងរុស្ស៊ី ដែលក្នុងនោះរួមមានទាំងការហាមឃាត់ការនាំចូលប្រេងឆៅពីរុស្ស៊ីផងដែរ។ នេះបើយោងតាមទីភ្នាក់ងារព័ត៌មាន Reuters។
នៅក្នុងកិច្ចសម្ភាសន៍មួយជាមួយនឹងទីភ្នាក់ងារព័ត៌មាន Associated Press នៅក្នុងរដ្ឋធានីមីនស្កិ៍ ប្រទេសបេឡារុស នៅថ្ងៃព្រហស្បតិ៍ ប្រធានាធិបតីបេឡារុសលោក Alexander Lukashenko បាននិយាយថា លោកមិនគិតថាសកម្មភាពយោធារបស់រុស្ស៊ីនៅក្នុងប្រទេសអ៊ុយក្រែន «អូសបន្លាយយូរដូច្នេះទេ»។ ស្របពេលនោះដែរ លោក Lukashenko បានចោទប្រកាន់ប្រទេសអ៊ុយក្រែនថាបាន «បង្កហេតុជាមួយរុស្ស៊ី» និងមិនចាប់អារម្មណ៍ចំពោះការចរចាសន្តិភាព។
ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃព្រហស្បតិ៍ថា ដោយសារកងកម្លាំងនៅក្នុងប្រទេសបេឡារុសធ្វើសមយុទ្ធយោធាជាប្រចាំ រុស្ស៊ីទំនងជា «ពង្រីកការគំរាមកំហែង» ដែលបេឡារុសបានបង្កឡើង«ចំពោះអ៊ុយក្រែន» នេះ ក្នុងគោលបំណងធ្វើឱ្យអ៊ុយក្រែនរក្សាកងកម្លាំងរបស់ខ្លួនបន្ថែមទៀតនៅភាគខាងជើងប្រទេសដើម្បីកុំឱ្យអ៊ុយក្រែនអាចពង្រាយកងទ័ពទៅកាន់ផ្នែកភាគខាងកើតនៃប្រទេសបាន។
រុស្ស៊ីបានបញ្ជាក់នៅថ្ងៃព្រហស្បតិ៍នេះថា កាំភ្លើងធំរបស់ខ្លួនបានបាញ់ចំទីតាំងនិងបន្ទាយរបស់ប្រទេសអ៊ុយក្រែនជាច្រើនកន្លែងកាលពីយប់មិញ ដោយបានសម្លាប់យុទ្ធជនអ៊ុយក្រែនជាង ៦០០ នាក់។ នេះបើយោងតាមទីភ្នាក់ងារព័ត៌មាន Reuters។
លោក Vyacheslav Gladkov អភិបាលតំបន់ Belgorod នៃប្រទេសរុស្ស៊ី បាននិយាយនៅថ្ងៃព្រហស្បតិ៍នេះថា ភូមិពីរនៅក្នុងតំបន់ Belgorod ជាប់នឹងព្រំដែនប្រទេសអ៊ុយ ក្រែន ត្រូវបានកងកម្លាំងអ៊ុយក្រែនបាញ់ផ្លោងដាក់។ លោកបានបន្ថែមថា មិនមានជនស៊ីវិលណាម្នាក់បានស្លាប់និងរងរបួសដោយសារការបាញ់ផ្លោងរបស់អ៊ុយក្រែននេះទេ។ នេះបើយោងតាមទីភ្នាក់ងារព័ត៌មាន Reuters។
លោក Serhiy Gaidai អភិបាលតំបន់ Luhansk នៃប្រទេសអ៊ុយក្រែន បាននិយាយនៅថ្ងៃព្រហស្បតិ៍នេះថា ជនស៊ីវិល៥នាក់ ត្រូវបានសម្លាប់ដោយសារការបាញ់ផ្លោងរបស់កងទ័ពរុស្ស៊ីនៅក្នុងតំបន់ Luhansk នៅក្នុងរយៈពេល ២៤ ម៉ោងចុងក្រោយនេះ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃព្រហស្បតិ៍ថា លោកបាននិយាយជាមួយនឹងនាយករដ្ឋមន្ត្រីអ៊ីស្រាអែលលោក Naftali Bennett និងបានពិភាក្សាអំពី «ការលើកឡើងដែលធ្វើឱ្យមានការខឹងសម្បារនិងមិនអាចទទួលយកបានទាំងស្រុង» របស់រដ្ឋមន្ត្រីការបរទេសរុស្ស៊ីលោក Sergei Lavrov កាលពីថ្ងៃអាទិត្យកន្លងទៅនេះ ដែលថាមេដឹកនាំផ្ដាច់ការណាហ្ស៊ីលោក Adolf Hitler មានឈាម ជ័រជាជាតិសាសន៍ជ្វីហ្វ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅក្នុងសុន្ទរកថាមួយនៅព្រឹកថ្ងៃព្រហស្បតិ៍ថា កិច្ចឈប់វាយប្រយុទ្ធគ្នារយៈពេលវែងគឺត្រូវការជាចាំបាច់ ដើម្បីជម្លៀសជនស៊ីវិលដែលនៅសេសសល់នៅក្នុងទីក្រុង Mariupol។ លោកនិយាយដូច្នេះថា៖ «វាត្រូវការពេលដើម្បីជម្លៀសមនុស្សចេញពីជម្រកក្រោមដីទាំង នោះ។ ក្នុងស្ថានភាពបច្ចុប្បន្ន យើងមិនអាចប្រើឧបករណ៍ធុនធ្ងន់ដើម្បីរើកកាយចេញនូវកម្ទេចកម្ទីបាក់បែកនោះឡើយ។ ទាំងអស់នេះគឺត្រូវធ្វើដោយដៃ»។
រដ្ឋាភិបាលរុស្ស៊ីបានច្រានចោលការចោទប្រកាន់ដែលថាកងទ័ពរុស្ស៊ីបានសម្រុកចូលរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន និងបានបញ្ជាក់ថា ច្រករបៀងមនុស្សធម៌មានដំណើរការនៅទីនោះនៅថ្ងៃព្រហស្បតិ៍។ នៅពេលសួរថាតើការអះអាងរបស់មន្ត្រីជាន់ខ្ពស់អ៊ុយក្រែនម្នាក់ដែលថាកងទ័ពរុស្ស៊ីបានទម្លាយចូលទៅក្នុងបរិវេណរបស់រោងចក្រនោះគឺជារឿងពិតឬក៏យ៉ាងណានោះ អ្នកនាំពាក្យរដ្ឋាភិបាលរុស្ស៊ីលោកDmitry Peskov បានឱ្យអ្នកសារព័ត៌មានយោងលើបទបញ្ជារបស់ប្រធានាធិបតីរុស្ស៊ីលោក Vladimir Putin កាលពីលើកមុន ដែលបញ្ជាមិនឱ្យកងទ័ពរុស្ស៊ីសម្រុកចូលក្នុងរោងចក្រនោះ។ នេះបើយោងតាមទីភ្នាក់ងារព័ត៌មាន Reuters។

ផ្សែងហុយចេញពីរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន ក្នុងទឹកដីក្រោមរដ្ឋាភិបាលនៃសាធារណរដ្ឋប្រជាមានិត Donetsk ភាគខាងកើតអ៊ុយក្រែន ថ្ងៃពុធ ទី ៤ ឧសភា ឆ្នាំ ២០២២។

រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍នេះថា ខ្លួនបានដឹងថាសហរដ្ឋអាមេរិក ចក្រភពអង់គ្លេស និងប្រទេសសមាជិកអង្គការអូតង់ (NATO) ផ្សេងទៀតបានផ្ដល់ព័ត៌ មានស៊ើបការណ៍សម្ងាត់ជាបន្តរហូតដល់កងទ័ពអ៊ុយក្រែន និងថាករណីនេះនឹងមិនអាចបញ្ឈប់រុស្ស៊ីនៅក្នុងការសម្រេចឱ្យបានតាមគោលបំណងរបស់ខ្លួនឡើយ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov មានប្រតិកម្មបែបនេះតបទៅនឹងសេចក្ដីរាយការណ៍របស់កាសែត New York Times ដែលថា សហរដ្ឋអាមេរិកបានផ្ដល់ព័ត៌ មានស៊ើបការណ៍សម្ងាត់ដែលអាចជួយកងកម្លាំងអ៊ុយក្រែនឱ្យសម្លាប់នាយឧត្តម សេនីយ៍យោធារុស្ស៊ីជាច្រើននាក់នៅក្នុងសង្គ្រាមនៅអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
សហរដ្ឋអាមេរិកបានផ្ដល់ព័ត៌មានស៊ើបការណ៍សម្ងាត់ដែលអាចជួយកងកម្លាំងអ៊ុយ ក្រែនឱ្យសម្លាប់នាយឧត្តមសេនីយ៍យោធារុស្ស៊ីជាច្រើននាក់នៅក្នុងសង្គ្រាមនៅអ៊ុយ ក្រែន។ នេះបើយោងតាមសេចក្ដីរាយការណ៍របស់កាសែត The New York Times កាលពីថ្ងៃពុធ ដោយយោងលើមន្ត្រីជាន់ខ្ពស់សហរដ្ឋអាមេរិក។ កាសែតនេះបានរាយ ការណ៍ថា រដ្ឋាភិបាលអាមេរិកបានផ្ដល់ឱ្យអ៊ុយក្រែននូវព័ត៌មានលំអិតអំពីការចល័តកងទ័ពរបស់រុស្ស៊ីដែលគេរំពឹងទុក និងអំពីទីតាំងនិងព័ត៌មានលំអិតផ្សេងទៀតអំពីបញ្ជាការដ្ឋានយោធាចល័តរបស់រុស្ស៊ី ហើយអ៊ុយក្រែនបានបញ្ចូលព័ត៌មានទាំងនេះជាមួយនឹងព័ត៌មានស៊ើបការណ៍សម្ងាត់របស់ខ្លួនដើម្បីធ្វើការវាយប្រហារដោយកាំភ្លើងធំនិងការវាយប្រហារផ្សេងៗទៀតដែលបានសម្លាប់មន្ត្រីយោធារុស្ស៊ី។ នេះបើយោងតាមទីភ្នាក់ងារព័ត៌មាន Reuters។

២២:២៧ ៦.៥.២០២២

ថ្ងៃសុក្រ ទី៦ ខែឧសភា៖

ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃសុក្រថា កិច្ចប្រជុំនៃរដ្ឋមន្ត្រីការបរទេសសហភាពអឺរ៉ុបនឹងធ្វើឡើងនៅសប្តាហ៍ក្រោយ ប្រសិនបើប្រទេសមកពីប្លុកនេះបរាជ័យក្នុងការឈានដល់កិច្ចព្រមព្រៀងស្តីពីហាមប្រាមការទិញប្រេងប្រឆាំងនឹងរុស្ស៊ីនៅចុងសប្តាហ៍នេះ។ នេះបើយោងតាមទៅភ្នាក់ងារព័ត៌មាន Reuters។
អ្នកនាំពាក្យរដ្ឋាភិបាលអាល្លឺម៉ង់ ថាអធិការបតីអាល្លឺម៉ង់ លោក Olaf Scholz នឹងចូលរួមក្នុងកិច្ចពិភាក្សាអនឡាញ G7 នៅថ្ងៃអាទិត្យ ស្តីពីស្ថានភាពក្នុងប្រទេសអ៊ុយក្រែន ដែលនឹងត្រូវចូលរួមដោយប្រធានាធិបតីអ៊ុយក្រែន លោក Volodymyr Zelenskyy នេះបើយោងតាមសារព័ត៌មាន Reuters។ អ្នកនាំពាក្យរូបនេះបានបន្ថែមថា លោក Scholz ក៏នឹងថ្លែងសុន្ទរកថាតាមទូរទស្សន៍ដល់ប្រជារាស្ត្រអាល្លឺម៉ង់នៅល្ងាចថ្ងៃទី៨ ខែឧសភា ដែលជាខួបនៃការបញ្ចប់សង្គ្រាមលោកលើកទីពីរ។ អ្នកនាំពាក្យរូបនេះបន្ថែមថា កាលបរិច្ឆេទនេះមានអត្ថន័យពិសេសនៅឆ្នាំនេះ ខណៈដែលប្រទេសពីរគឺអ៊ុយក្រែននិងរុស្ស៊ី ដែលធ្លាប់ជាជនរងគ្រោះនៃពួកណាស៊ីអាល្លឺម៉ង់ឥឡូវនេះកំពុងច្បាំងគ្នា។
មន្ត្រីអ៊ុយក្រែនបាននិយាយនៅថ្ងៃសុក្រថា ជនស៊ីវិលជាច្រើនទៀតត្រូវបានជួយសង្គ្រោះពីផ្លូវរូងក្រោមដីនៅក្រោមរោងចក្រដែកថែបដែលត្រូវបានឡោមព័ទ្ធក្នុងទីក្រុង Mariupol បើទោះបីជាក្រុមអ្នកប្រយុទ្ធអ៊ុយក្រែនបានជាប់នៅបរិវេណដ៏ធំនោះ ដើម្បីប្រឹងទប់ទល់ជាចុងក្រោយនឹងការកាន់កាប់ទីក្រុងកំពង់ផែយុទ្ធសាស្ត្រនេះទាំងស្រុងដោយរដ្ឋាភិបាលទីក្រុងម៉ូស្គូ។ នេះបើយោងតាមទីភ្នាក់ងារព័ត៌មាន AP។ ការប្រយុទ្ធនៅក្នុងទីក្រុងដ៏សំខាន់ចុងក្រោយរបស់អ៊ុយក្រែននេះហាក់ដូចជាកាន់តែអស់សង្ឃឹម។ យុទ្ធជនអ៊ុយក្រែនប្រហែល ២.០០០ នាក់ តាមការប៉ាន់ប្រមាណចុងក្រោយបង្អស់របស់រុស្ស៊ី ត្រូវបានជាប់នៅក្នុងផ្លូវរូងក្រោមដី និងលេណដ្ឋាននៅក្រោមរោងចក្រដែកថែប Azovstal ដ៏ធំល្វឹងល្វើយ ហើយពួកគេបានបដិសេធមិនព្រមចុះចាញ់ម្តងហើយម្តងទៀត។

រូបឯកសារ៖ ទាហានរុស្ស៊ីបានបាញ់ពីរថក្រោះអំឡុងពេលប្រយុទ្ធគ្នាក្នុងជម្លោះអ៊ុយក្រែននិងរុស្ស៊ីក្បែររោងចក្រដែក Azovstal ក្នុងក្រុងកំពង់ផែ Mariupol ភាគខាងត្បូង ប្រទេសអ៊ុយក្រែន កាលពីថ្ងៃទី៥ ខែឧសភា ឆ្នាំ២០២២។

ទីភ្នាក់ងារព័ត៌មាន Reuters បានរាយការណ៍ថា អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃសុក្រថា មានវោហាសាស្ត្រអរិភាពចេញពីប្រទេសប៉ូឡូញ ហើយថារដ្ឋាភិបាលក្រុងវ៉ាសូវី អាចជា «ប្រភពនៃការគំរាមកំហែង»។ ប្រទេសប៉ូឡូញបានដឹកនាំការអំពាវនាវឱ្យសហភាពអឺរ៉ុបពង្រឹងការដាក់ទណ្ឌកម្ម និងឱ្យសម្ព័ន្ធមិត្តអូតង់ផ្តល់អាវុធដល់អ៊ុយក្រែន ខណៈដែលខ្លួនព្យាយាមទប់ទល់នឹងកងកម្លាំងរុស្ស៊ី ដែលបានហូរចូលភាគខាងកើតរបស់ខ្លួន។ រដ្ឋមន្ត្រីក្រសួងបរិស្ថាននិងអាកាសធាតុប៉ូឡូញ លោកស្រី Anna Moskwa បាននិយាយកាលពីថ្ងៃចន្ទថា «ប៉ូឡូញមានមោទនភាពដែលមានឈ្មោះនៅក្នុងបញ្ជីប្រទេសដែលមិនរួសរាយរាក់ទាក់របស់លោក Putin»។
អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅថ្ងៃសុក្រថា ព័ត៌មានដែលថារុស្ស៊ីកំពុងលួចគ្រាប់ធញ្ញជាតិពីអ៊ុយក្រែនទំនងជាក្លែងក្លាយ។ លោក Peskov ថ្លែងដូច្នេះ បន្ទាប់ពីមន្ត្រីទីភ្នាក់ងារអាហាររបស់អង្គការសហប្រជាជាតិបាននិយាយថា មានសញ្ញាបង្ហាញថា រុស្ស៊ីបាននឹងកំពុងដឹកជញ្ជូនគ្រាប់ធញ្ញជាតិចេញពីតំបន់កាន់កាប់នៃប្រទេសជិតខាងរបស់ខ្លួន។ លោក Peskov បាននិយាយថា «យើងមិនមានព័ត៌មានទេ វាជាព័ត៌មានក្លែងក្លាយ»។ នេះបើយោងតាមសារព័ត៌មាន Reuters។
សារព័ត៌មាន Reuters រាយការណ៍ថា លោក Josef Schmidhuber នាយករងអង្គការស្បៀងអាហារ និងកសិកម្មអង្គការសហប្រជាជាតិផ្នែកទីផ្សារនិងពាណិជ្ជកម្ម បានប្រាប់សន្និសីទសារព័ត៌មានទីក្រុងហ្សឺណែវតាមរយៈ Zoom នៅថ្ងៃសុក្រថា គ្រាប់ធញ្ញជាតិជិត ២៥ លានតោនត្រូវបានជាប់គាំងនៅក្នុងប្រទេសអ៊ុយក្រែន ហើយមិនអាចចាកចេញពីប្រទេស ដោយសារតែបញ្ហាប្រឈមផ្នែកហេដ្ឋារចនាសម្ព័ន្ធ និងការបានបិទបណ្តាកំពង់ផែសមុទ្រខ្មៅរួមទាំងកំពង់ផែ Mariupol។ ការស្ទះនេះត្រូវបានគេមើលឃើញថា ជាកត្តាដែលបណ្តាលឲ្យតម្លៃអាហារឡើងថ្លៃខ្ពស់។ យោងតាមទិន្នន័យរបស់ក្រុមប្រឹក្សាធញ្ញជាតិអន្តរជាតិ អ៊ុយក្រែនជាប្រទេសនាំចេញពោតធំជាងគេទី ៤ របស់ពិភពលោកក្នុងរដូវកាលឆ្នាំ ២០២០/២១ និងជាប្រទេសនាំចេញស្រូវសាលីទី ៦។
អ៊ុយក្រែនបានទទួលការសន្យាចំនួន ៦,៥ ពាន់លានដុល្លារនៅក្នុងសន្និសីទម្ចាស់ជំនួយអន្តរជាតិនៅក្រុងវ៉ាសូវីប្រទេសប៉ូឡូញ កាលពីថ្ងៃព្រហស្បតិ៍។ ប្រធានការិយាល័យ VOA អឺរ៉ុបខាងកើត លោក Myroslava Gongadze បានពិភាក្សាអំពីលទ្ធផលពីសន្និសីទ និងបញ្ហាផ្សេងទៀត ជាមួយនាយករដ្ឋមន្ត្រីអ៊ុយក្រែន លោក Denys Shmyhal នៅរដ្ឋធានីរបស់ប៉ូឡូញ។
នាយករដ្ឋមន្ត្រីហុងគ្រីបានអះអាងសារជាថ្មីអំពីជំហររបស់រដ្ឋាភិបាលរបស់លោកថា ខ្លួននឹងមិន គាំទ្រកញ្ចប់ទណ្ឌកម្មថ្មីរបស់សហភាពអឺរ៉ុប ដែលបានស្នើឡើងប្រឆាំងនឹងរុស្ស៊ី ដែលរួមមានការហាមប្រាមលើការនាំចូលប្រេង។ ថ្លែងតាមវិទ្យុរដ្ឋនៅថ្ងៃសុក្រ លោក Viktor Orban បាននិយាយថា ការហាមប្រាមនឹងដូចជាការទម្លាក់ «គ្រាប់បែកបរមាណូ» ទៅលើសេដ្ឋកិច្ចហុងគ្រី។ ប៉ុន្តែលោកក៏បាននិយាយដែរថា រដ្ឋាភិបាលទីក្រុង Budapest បើកចំហចំពោះសំណើផ្សេងទៀត ប្រសិនបើពួកគេមិនប៉ះពាល់ដល់ផលប្រយោជន៍របស់ហុងគ្រី។ នេះបើយោងតាមសេចក្តីរាយការណ៍របស់ វិទ្យុអឺរ៉ុបសេរី/វិទ្យុសេរីភាព។

រូបឯកសារ៖ នាយករដ្ឋមន្ត្រីហុងគ្រី លោក Viktor Orban ទទួលស្គាល់អ្នកគាំទ្រក្នុងពេលការប្រមូលផ្តុំពេលយប់នៃការបោះឆ្នោតក្នុងទីក្រុង Budapest ប្រទេសហុងគ្រី ថ្ងៃទី៣ ខែមេសា ឆ្នាំ២០២២។

ទីភ្នាក់ងារព័ត៌មាន Reuters បានរាយការណ៍ថា ប្រទេសអ៊ុយក្រែនបានអំពាវនាវទៅកាន់ អង្គការវេជ្ជបណ្ឌិតគ្មានព្រំដែន ដើម្បីជួយជម្លៀសអ្នកប្រយុទ្ធដែលជាប់នៅក្នុងរោងចក្រដែកថែប Azovstal ដ៏ធំនៅក្នុងទីក្រុង Mariupol ដែលត្រូវបានហ៊ុំព័ទ្ធដោយកងកម្លាំងរុស្ស៊ី។
កងកម្លាំងរុស្ស៊ីបានបន្តការវាយលុករបស់ពួកគេឡើងវិញលើរោងចក្រដែកថែបដ៏ធំសម្បើមមួយនៅក្នុងកំពង់ផែ Mariupol របស់ប្រទេសអ៊ុយក្រែនដែលត្រូវបានបំផ្លិចបំផ្លាញ ដោយប្រើយន្តហោះដើម្បីវាយប្រហារអ្នកប្រយុទ្ធអ៊ុយក្រែនដែលកំពុងកាន់នៅទីនោះ។ យុទ្ធជនអ៊ុយក្រែនរហូតដល់ ២.០០០ នាក់ រួមទាំងជនស៊ីវិលរាប់រយនាក់ ត្រូវបានគេជឿថានៅស្នាក់នៅក្នុងរោងចក្រ Azovstal ដែលប្រព័ន្ធការពាររបស់ពួកគេត្រូវបានទម្លាយកាលពីដើមសប្តាហ៍នេះដោយកងកម្លាំងរុស្ស៊ី។ អង្គការសហប្រជាជាតិបាននិយាយថា កិច្ចខិតខំប្រឹងប្រែងជម្លៀសមួយផ្សេងទៀតកំពុងដំណើរការ ហើយមន្ត្រីជាន់ខ្ពស់អ៊ុយក្រែនបាននិយាយថា ជនស៊ីវិលជិត ៥០០នាក់ ត្រូវបានជម្លៀសរហូតមកដល់ពេលនេះ។ អគ្គសេនាធិការអ៊ុយក្រែនបាននិយាយនៅក្នុងការវាយតម្លៃប្រចាំថ្ងៃរបស់ខ្លួននៅថ្ងៃសុក្រថា ជនជាតិរុស្ស៊ីកំពុងប្រើប្រាស់យន្តហោះជាផ្នែកនៃការវាយប្រហារជាថ្មីលើរោងចក្រដែកថែបនេះ។ នេះបើយោងតាមសេចក្តីរាយការណ៍របស់ វិទ្យុអឺរ៉ុបសេរី/វិទ្យុសេរីភាព។
រដ្ឋមន្ត្រីការពារជាតិអាល្លឺម៉ង់លោកស្រី Christine Lambrecht បានបញ្ជាក់នៅថ្ងៃសុក្រថា អាល្លឺម៉ង់នឹងផ្គត់ផ្គង់អ៊ុយក្រែនជាមួយនឹងកាំភ្លើងធំបាញ់ស្វ័យប្រវត្តិដ៏មានឥទ្ធិពលចំនួន៧គ្រឿងដើម្បីជួយការពារខ្លួនប្រឆាំងនឹងប្រទេសរុស្ស៊ី។ លោកស្រី Lambrecht បាននិយាយថា ទាហានអ៊ុយក្រែននឹងត្រូវបានបណ្តុះបណ្តាលនៅក្នុងប្រទេសអាល្លឺម៉ង់ដើម្បីប្រើប្រាស់កាំភ្លើងធំស្វ័យប្រវត្តិ Panzerhaubitze 2000 ដែលមានលក្ខណៈស្រដៀងនឹងរថក្រោះហើយមានរយៈចម្ងាយបាញ់ដល់ទៅ៤០គីឡូម៉ែត្រ។ អាល្លឺម៉ង់បានបង្កើនការគាំទ្រផ្នែកសម្ភារៈរបស់ខ្លួនសម្រាប់អ៊ុយក្រែនក្នុងប៉ុន្មានសប្តាហ៍ថ្មីៗនេះ បន្ទាប់ពីការស្ទាក់ស្ទើរពីដំបូងក្នុងការផ្តល់អាវុធធុនធ្ងន់របស់ខ្លួនបានទាក់ទាញការរិះគន់យ៉ាងទូលំទូលាយ។

រូបឯកសារ៖ កាំភ្លើងធំស្វ័យប្រវត្តិ Panzerhaubitze 2000 របស់អាល្លឺម៉ង់ត្រូវបានផ្ទុកទៅលើយានដឹកជញ្ជូនធុនធ្ងន់នៅក្នុងបន្ទាយ Hindenburg ក្នុងក្រុង Munster នៅថ្ងៃទី១៤ ខែកុម្ភៈ ឆ្នាំ២០២២។

ទីភ្នាក់ងារព័ត៌មាន Reuters រាយការណ៍ថា រុស្ស៊ីនឹងមិនប្រើប្រាស់អាវុធនុយក្លេអ៊ែរនៅអ៊ុយក្រែនទេ នេះបើតាមអ្នកនាំពាក្យក្រសួងការបរទេសរុស្ស៊ីលោក Alexei Zaitsevបាននិយាយនៅថ្ងៃសុក្រ។ លោក Zaitsev បានប្រាប់អ្នកយកព័ត៌មានថា ការប្រើប្រាស់អាវុធនុយក្លេអ៊ែររបស់រុស្ស៊ីជាហានិភ័យមួយដែលមន្ត្រីលោកខាងលិចបានពិភាក្សាជាសាធារណៈគឺមិនត្រូវបានអនុវត្តក្នុងអ្វីដែលរដ្ឋាភិបាលក្រុងម៉ូស្គូហៅថា ប្រតិបត្តិការយោធាពិសេសរបស់ខ្លួនក្នុងប្រទេសអ៊ុយក្រែននោះទេ។ នាយកទីភ្នាក់ងារស៊ើបការណ៍ព័ត៌មានសម្ងាត់អាមេរិក CIA លោក William Burns បាននិយាយកាលពីថ្ងៃទី១៤ ខែមេសាថា ដោយសារឧបសគ្គនានាដែលរុស្ស៊ីបានជូបនៅអ៊ុយក្រែន «គ្មាននរណាម្នាក់ក្នុងចំណោមពួកយើង អាចមិនទទួលស្គាល់ការគំរាមកំហែងដែលបង្កឡើងដោយលទ្ធភាពនៃការប្រើប្រាស់អាវុធនុយក្លេអ៊ែរយុទ្ធសាស្ត្រឬអាវុធនុយក្លេអ៊ែរកម្រិតស្រាលនោះទេ»។
កាសែត The New York Times រាយការណ៍ថា ជនស៊ីវិលជិត៥០០នាក់ត្រូវបានជម្លៀសចេញពីទីក្រុង Mariupol និងរោងចក្រដែក Azovstal ។
ទីប្រឹក្សាអភិបាលក្រុង Mariupol ប្រទេសអ៊ុយក្រែន និយាយថា ការប្រើប្រាស់មជ្ឈមណ្ឌលឃុំឃាំង «ជំរុំសួរចម្លើយ» របស់រុស្ស៊ី បានប្រែក្លាយទីក្រុងនេះទៅជា «ជំរុំពិឃាត» នេះបើយោងតាមសេចក្តីរាយការណ៍របស់សារព័ត៌មាន Al Jazeera។
ក្រសួងការពារជាតិអាមេរិកបាននិយាយថា មិនមានការចង្អុលបង្ហាញណាមួយដែលបេឡារុសមានគម្រោងចូលរួមក្នុងជម្លោះក្នុងប្រទេសអ៊ុយក្រែននោះទេ។នេះបើយោងតាមសេចក្តីរាយការណ៍របស់ទូរទស្សន៍ Al Jazeera។
ទូរទស្សន៍ CNN រាយការណ៍ថា មន្ទីរបញ្ចកោណបានបដិសេធសេចក្តីរាយការណ៍ព័ត៌មានដែលនិយាយថា សហរដ្ឋអាមេរិកបានផ្តល់ការស៊ើបការណ៍ សម្ងាត់ដែលបានជួយអ៊ុយក្រែនបាញ់ពន្លិចនាវាចម្បាំងរុស្ស៊ី Moskva។ អ្នកនាំពាក្យក្រសួងការពារជាតិលោក John Kirby បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា «យើងមិនបានផ្តល់ឱ្យអ៊ុយក្រែននូវព័ត៌មានកំណត់គោលដៅជាក់លាក់សម្រាប់ វាយប្រហារនាវាចម្បាំង Moskva នោះទេ។ យើងមិនពាក់ព័ន្ធនឹងការសម្រេចចិត្តរបស់អ៊ុយក្រែនក្នុងការវាយប្រហារលើនាវានេះឬនៅក្នុងប្រតិបត្តិការដែលពួកគេបានអនុវត្តនោះទេ។ យើងមិនបានដឹងជាមុន អំពីចេតនារបស់អ៊ុយក្រែនក្នុងការវាយប្រហារនាវាចម្បាំង Moskva នោះទេ»។
ព័ត៌មានស៊ើបការណ៍សម្ងាត់ចុងក្រោយបំផុតពីក្រសួងការពារជាតិរបស់ចក្រភពអង់គ្លេសឲ្យដឹងថា កិច្ចខិតខំប្រឹងប្រែងរបស់រុស្ស៊ីដើម្បីសម្រេចការគ្រប់គ្រងទីក្រុងMariupol រួមទាំងរោងចក្រដែកថែប Azovstal ទំនងជាផ្សារភ្ជាប់ទៅនឹងផែនការរបស់រុស្ស៊ីក្នុងការប្រារព្ធទិវាជ័យជំនះនៅថ្ងៃទី៩ ខែឧសភា។ ទិវាជ័យជំនះគឺជាការអបអរសាទរជ័យជម្នះឆ្នាំ ១៩៤៥ របស់សហភាពសូវៀតលើ ណាស៊ីអាល្លឺម៉ង់។ ព័ត៌មានស៊ើបការណ៍សម្ងាត់ដដែលឲ្យដឹងថា លោក Putin ចង់ទទួលបានជោគជ័យជានិមិត្តរូបនៅអ៊ុយក្រែន។
កាសែត Washington Post រាយការណ៍ថា ទីក្រុង Ivan-Frankivsk ភាគខាងលិចអ៊ុយក្រែនកំពុងព្រមានអ្នកស្រុករបស់ខ្លួន អំពីការបាញ់ផ្លោងដែលអាចកើតមានឡើង នៅមុនការប្រារព្ធទិវាជ័យជម្នះ ៩ ឧសភា របស់រុស្ស៊ី។
ប្រទេសរុស្ស៊ីប្រើទិវាជ័យជំនះដែលជាពិធីបុណ្យប្រពៃណីនៃមោទនភាពជាតិដើម្បីអបអរសាទរជ័យជំនះរបស់សហភាពសូវៀតលើពួកណាស៊ីអាល្លឺម៉ង់។ មេដឹកនាំនៅទីក្រុង Ivano-Frankivsk ប្រទេសអ៊ុយក្រែន ភ័យខ្លាចថានៅ ពិធីឆ្នាំនេះនឹងនាំឱ្យមានការកើនឡើងនៃការវាយប្រហាររបស់រុស្ស៊ី។ មេដឹកនាំអ៊ុយក្រែនទាំងនេះ កំពុងប្រាប់អ្នកស្រុកឱ្យជម្លៀសចេញ ឬឱ្យស្នាក់នៅខាងក្នុង ហើយពួកគេបានលុបចោលព្រឹត្តិការណ៍សាធារណៈទាំងអស់។ នេះបើតាមកាសែត The Washington Post។

១៩:៣៤ ៧.៥.២០២២

ថ្ងៃសៅរ៍ ទី ៧ ខែឧសភា៖

បញ្ជាការយោធាអ៊ុយក្រែនបានថ្លែងនៅថ្ងៃសៅរ៍ថា រុស្ស៊ីបានបន្តវាយប្រហារលើតំបន់រោងចក្រដែកថែប Azovstal នៅទីក្រុងកំពង់ផែ Mariupol។ សារមួយរបស់យោធាអ៊ុយក្រែនដែលបានបង្ហោះលើបណ្តាញសង្គម Facebook រាល់ល្ងាច បានឲ្យដឹងថា៖ «ដោយមានការគាំទ្រជាការបាញ់កាំភ្លើងធំ និងរថក្រោះ (សត្រូវ) បានបន្តសកម្មភាពវាយប្រហាររបស់ខ្លួន»។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានជួបពិភាក្សាជាមួយសមាជិករដ្ឋាភិបាលរបស់លោក កាលពីថ្ងៃសៅរ៍ ដើម្បីពិភាក្សាអំពីសេដ្ឋកិច្ចរបស់អ៊ុយក្រែន។ លោក Zelenskyy បានថ្លែងអំពីការខ្វះខាតប្រេងឥន្ធនៈ ដែលកំពុងប៉ះពាល់ដល់អ៊ុយក្រែន ចាប់តាំងពីការឈ្លានពានរបស់រុស្ស៊ីបានកើតឡើង។ នេះបើតាមទីភ្នាក់ងារព័ត៌មាន AP។
ទីភ្នាក់ងារព័ត៌មាន Reuters បានរាយការណ៍ថា លោកស្រី Jill Biden ភរិយារបស់ប្រធានាធិបតីសហរដ្ឋអាមេរិកលោក Joe Biden បានជួបជាមួយក្រុមស្ត្រីជាម្តាយនិងជាអ្នកបម្រើការងារក្នុងវិស័យអប់រំ នៅទីក្រុង Bucharest ប្រទេសរូម៉ានី កាលពីថ្ងៃសៅរ៍នៅសាលារៀនមួយ ដោយបានសរសើរពីភាពរឹងមាំនិងការតស៊ូជម្នះរបស់ស្ត្រីទាំងនោះ។ លោកស្រី Jill Biden ក៏បានជួបក្មេងៗជនជាតិអ៊ុយក្រែននិងរូម៉ានី ដែលកំពុងគូររូបបាតដៃពួកគេលើក្រដាសដែលមានពណ៌តំណាងឲ្យទង់ជាតិរបស់ប្រទេសពួកគេ។ លោកស្រីបានធ្វើដំណើរទៅកាន់សាលារៀននេះ ដោយមានការអមដំណើរដោយលោកស្រី Carmen Iohannis ភរិយារបស់ប្រធានាធិបតីរូម៉ានី ដែលជាគ្រូបង្រៀនម្នាក់ផងដែរ។

លោកស្រី Jill Biden និយាយជាមួយសិស្សអ៊ុយក្រែន នៅពេលលោកស្រីធ្វើទស្សនកិច្ចនៅសាលារៀន Uruguay នៅរដ្ឋធានី Bucharest ប្រទេសរូម៉ានី ថ្ងៃទី ៧ ខែឧសភា ឆ្នាំ ២០២២។

លោក Dmytro Zhyvytskyi អភិបាលតំបន់ បានឲ្យដឹងថា មីស៊ីលជាច្រើនគ្រាប់របស់រុស្ស៊ីដែលបាញ់តាមអាកាស បានធ្លាក់ចំទីតាំងពីរនៅក្បែរព្រំដែនរុស្ស៊ីក្នុងតំបន់ Sumy ភាគខាងជើងប្រទេសអ៊ុយក្រែន កាលពីថ្ងៃសៅរ៍។ មន្ត្រីយាមល្បាតព្រំដែនម្នាក់បានរងរបួស នៅក្នុងសង្កាត់ Myropilske និងសង្កាត់ Khotin។ លោក Zhyvytskyi បានសរសេរបែបនេះតាមកម្មវិធីផ្ញើសារ Telegram។ នេះបើតាមទីភ្នាក់ងារព័ត៌មាន Reuters។
ក្រសួងការពារជាតិអ៊ុយក្រែន ឲ្យដឹងថា យោធាអ៊ុយក្រែនបានបំផ្លាញនាវាចម្បាំងមួយរបស់រុស្ស៊ី នៅកោះពស់នៃតំបន់សមុទ្រខ្មៅ ដោយបានបង្ហោះវីដេអូតាមបណ្តាញសង្គមបង្ហាញទិដ្ឋភាពផ្ទុះឡើងលើផ្ទាំងមួយ។ រុស្ស៊ីមិនទាន់បញ្ជាក់ពីការវាយប្រហារនេះនៅឡើយទេ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មានបារាំង AFP។
ការបាញ់គ្រាប់ផ្តក់របស់ទាហានរុស្ស៊ីបានធ្លាក់ចំសារមន្ទីរមួយ ដែលឧទ្ទិសដល់ទស្សនវិទូនិងអ្នកនិពន្ធកំណាព្យអ៊ុយក្រែន Hryhoriy Skovoroda នៅភូមិ Skovorodynivka ក្នុងប្រទេសអ៊ុយក្រែន ដោយបណ្តាលឲ្យមានអគ្គិភ័យឆាបឆេះហើយបានបំផ្លាញអគារនោះ។ នេះបើតាមការលើកឡើងរបស់លោក Oleh Sinegubov អភិបាលតំបន់ Kharkiv កាលពីថ្ងៃសៅរ៍។ នេះបើតាមទីភ្នាក់ងារព័ត៌មាន Reuters។
ស្នងការសិទ្ធិមនុស្សរបស់ក្រុមប្រឹក្សាអឺរ៉ុបលោកស្រី Dunja Mijatovic បានចាត់ទុកសកម្មភាពរំលោភសិទ្ធិមនុស្សរបស់រុស្ស៊ីលើប្រទេសអ៊ុយក្រែនថា «តក់ស្លុត» បន្ទាប់ពីលោកស្រីបានធ្វើទស្សនកិច្ចរយៈពេល ៤ ថ្ងៃនៅក្នុងប្រទេសអ៊ុយក្រែន។ ក្រុមប្រឹក្សាអឺរ៉ុបបានថ្លែងតាមសេចក្តីថ្លែងការណ៍មួយថា ដំណើរទស្សនកិច្ចនៅតាមតំបន់ជាយរដ្ឋធានីកៀវ បានបង្ហាញឲ្យឃើញ «ភស្តុតាងកាន់តែច្រើនឡើងអំពីការសម្លាប់តាមតែអំពើចិត្ត ការធ្វើទារុណកម្ម និងការបាត់ខ្លួនមនុស្សទាំងបង្ខំ»។ នេះបើតាមទីភ្នាក់ងារព័ត៌មានបារាំង AFP។
រដ្ឋមន្ត្រីការបរទេសសហរដ្ឋអាមេរិក Antony Blinkey បានថ្លែងនៅថ្ងៃសៅរ៍ថា ប្រធានាធិបតីរុស្ស៊ីលោក Vladimir Putin បានព្យាយាម «កែប្រែប្រវត្តិសាស្ត្រ» ដោយប្រៀបធៀបអ៊ុយក្រែនទៅនឹងអាល្លឺម៉ង់ក្រោមការគ្រប់គ្រងរបស់ពួកណាហ្ស៊ី នៅក្នុងកិច្ចប្រឹងប្រែងមួយដើម្បីធ្វើជាមូលហេតុត្រឹមត្រូវសម្រាប់សកម្មភាពឈ្លានពានរបស់ខ្លួនលើប្រទេសអ៊ុយក្រែន ដែលជាប្រទេសជិតខាង។ នៅក្នុងសេចក្តីប្រកាសព័ត៌មានមួយមុនខួបទី ៧៧ នៃទិវាជ័យជម្នះក្នុងថ្ងៃអឺរ៉ុប លោក Blinken បានលើកឡើងអំពីសង្គ្រាមចុងក្រោយដែលបានកើតឡើងនៅក្នុងទ្វីបអឺរ៉ុប។ ក្នុងការធ្វើដូច្នេះ លោក Blinken បានថ្លែងថា ពិភពលោកចាំបាច់ត្រូវ «បង្កើនការតាំងចិត្តរបស់យើងដើម្បីជម្នះនឹងជនដែលបច្ចុប្បន្នព្យាយាមកែប្រែការចងចាំបែបប្រវត្តិសាស្ត្រ ដើម្បីតែមហិច្ឆតារបស់ខ្លួន»។ នេះបើតាមសេចក្តីរាយការណ៍របស់កាសែត The Washington Post។
ទីភ្នាក់ងារព័ត៌មាន Reuters បានរាយការណ៍ថា តំណាងរាស្ត្រជាន់ខ្ពស់រុស្ស៊ីម្នាក់បានចោទប្រកាន់ថា រដ្ឋាភិបាលអាមេរិកបានរៀបចំប្រតិបត្តិការយោធានៅក្នុងប្រទេសអ៊ុយក្រែន ដោយចាត់ទុកសកម្មភាពនេះថាជាការលូកដៃពាក់ព័ន្ធដោយផ្ទាល់របស់សហរដ្ឋអាមេរិកនៅក្នុងសកម្មភាពយោធាប្រឆាំងនឹងរុស្ស៊ី។ លោក Vyacheslav Volodin បានសរសេរនៅតាមបណ្តាញ Telegram ថា «រដ្ឋាភិបាលអាមេរិកកំពុងរៀបចំនិងបង្កើតប្រតិបត្តិការយោធា ដូច្នេះវាស្មើនឹងការចូលរួមដោយផ្ទាល់ក្នុងសកម្មភាពយោធាប្រឆាំងនឹងប្រទេសរបស់យើង»។ រដ្ឋាភិបាលអាមេរិកនិងប្រទេសនៅអឺរ៉ុបដែលជាសមាជិកសម្ព័ន្ធភាពអូតង់ បានផ្តល់អាវុធធុនធ្ងន់ដល់រដ្ឋាភិបាលអ៊ុយក្រែន ដើម្បីជួយទប់ទល់នឹងការវាយប្រយុទ្ធរបស់រុស្ស៊ី ដែលអាចធ្វើឲ្យរុស្ស៊ីក្តោបក្តាប់ផ្នែកខ្លះនៃតំបន់ភាគខាងកើតនិងភាគខាងត្បូងប្រទេសអ៊ុយក្រែន ប៉ុន្តែបរាជ័យក្នុងការវាយកាន់កាប់រដ្ឋធានីកៀវ។
គ្រាប់មីស៊ីលជាច្រើនបានបាញ់ចំទីក្រុងកំពង់ផែ Odesa ដែលស្ថិតនៅភាគខាងត្បូង អ៊ុយក្រែនកាលពីសៅរ៍។ នេះបើតាមសេចក្តីថ្លែងការណ៍តាមទូរទស្សន៍របស់លោក Serhiy Bratchuk អ្នកនាំពាក្យរដ្ឋបាលតំបន់។ លោក Bratchuk បានថ្លែងថា គ្រាប់មីស៊ីលទាំងនេះបានបាញ់ចំទីក្រុង បន្ទាប់ពីមីស៊ីល ៤ គ្រាប់ បានបាញ់ចំទីតាំងនៅជុំវិញតំបន់ក្រុង Odesa កាលពីពេលព្រឹកថ្ងៃសៅរ៍។ នេះបើតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានគោរពវិញ្ញាណក្ខន្ធរបស់លោក Oleksandr Makhov អ្នកកាសែតអ៊ុយក្រែន ដែលបានស្លាប់នៅក្នុងសមរភូមិប្រយុទ្ធមួយក្បែរក្រុង Izyum នៃតំបន់ Kharkiv។ លោក Makhov អាយុ ៣៦ ឆ្នាំ គឺជាអ្នកកាសែតយោធាដ៏ឆ្នើមមួយរូបនៅក្នុងប្រទេសអ៊ុយក្រែន ដែលបានចូលបម្រើក្នុងជួរកងទ័ពអ៊ុយក្រែន គ្រាដែលរុស្ស៊ីបានចាប់ផ្តើមធ្វើសង្គ្រាមជាមួយអ៊ុយក្រែន។ នេះបើតាមទីភ្នាក់ងារព័ត៌មាន AP។

ពលរដ្ឋម្នាក់ជិះកង់កាត់អគារដែលត្រូវបានបំផ្លាញ ក្រោយទាហានរុស្ស៊ីបានបាញ់គ្រាប់ផ្តក់នៅក្រុង Irpin ប្រទេសអ៊ុយក្រែន ថ្ងៃទី ៧ ខែឧសភា ឆ្នាំ ២០២២។

អភិបាលតំបន់នៅក្នុងប្រទេសអ៊ុយក្រែន ឲ្យដឹងថា មនុស្សម្នាក់ត្រូវបានរាយការណ៍ថា បានស្លាប់ និងបីនាក់ទៀតបានរងរបួសកាលពីថ្ងៃសុក្រ ដោយសារតែការបាញ់គ្រាប់ផ្តក់របស់ទាហានរុស្ស៊ីនៅទីក្រុង Lyman ដែលស្ថិតនៅក្នុងតំបន់ Donetsk ភាគខាងកើតប្រទេសអ៊ុយក្រែន។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។
ប្រធានាធិបតីអ៊ុយក្រែន លោក Volodymyr Zelenskyy បានថ្លែងថា កិច្ចប្រឹងប្រែងផ្នែកការទូត កំពុងដំណើរការដើម្បីជួយសង្គ្រោះទាហានអ៊ុយក្រែនដែលជាប់គាំងនៅក្នុងរោងចក្រដែកថែប Azovstal នៅទីក្រុងកំពង់ផែ Mariupol ស្របពេលដែលជនស៊ីវិលជាបន្តបន្ទាប់ ត្រូវបានជម្លៀសចេញពីរោងចក្រដែលរងការវាយប្រហារយ៉ាង ធ្ងន់ធ្ងរ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
មន្ត្រីជាន់ខ្ពស់អ៊ុយក្រែនម្នាក់ប្រចាំក្រសួងមហាផ្ទៃ បានព្រមានអំពី«ការចាប់ផ្តើមសកម្មភាពបំផ្លិចបំផ្លាញនិងឧក្រិដ្ឋកម្មផ្សេងៗ» មុនថ្ងែជ័យជម្នះរបស់រស្ស៊ី ដែលនឹងធ្វើឡើងនៅថ្ងៃចន្ទ។ រដ្ឋាភិបាលរុស្ស៊ីប្រារព្ធទិវាជ័យជម្នះសូវៀតលើក្រុមណាហ្ស៊ីអាល្លឺម៉ង់ នៅក្នុងសង្គ្រាមលោកលើកទី ២ ដែលធ្វើឡើងជារៀងរាល់ឆ្នាំនៅថ្ងៃទី ៩ ខែឧសភា។ នេះបើតាមទីភ្នាក់ងារព័ត៌មាន AP។
ជនស៊ីវិល ៥០ នាក់ ត្រូវបានជម្លៀសកាលពីថ្ងៃសុក្រ ចេញពីរោងចក្រដែកថែប Azovstal នៅទីក្រុង Mariupol ប្រទេសអ៊ុយក្រែន ដែលត្រូវបានហ៊ុមព័ទ្ធដោយទាហានរុស្ស៊ី។ នេះបើតាមទីភ្នាក់ងារព័ត៌មាន AP។
សមាជិកនៃក្រុមប្រឹក្សាសន្តិសុខប្រចាំអង្គការសហប្រជាជាតិ រួមទាំងរុស្ស៊ី បានព្រមព្រៀងគ្នាអនុម័តលើសេចក្តីថ្លែងការណ៍មួយ ដែលបង្ហាញ «ការគាំទ្រដ៏ខ្លាំងក្លា» ដល់កិច្ចប្រឹងប្រែងរបស់អគ្គលេខាធិការអង្គការសហប្រជាជាតិលោក Antonio Guterres ដើម្បីស្វែងរកដំណោះស្រាយដោយសន្តិភាពមួយដល់«ជម្លោះ»នៅក្នុងប្រទេសអ៊ុយក្រែន។ នេះបើតាមទីភ្នាក់ងារព័ត៌មាន AP។
កាសែត The Washington Post រាយការណ៍ថា អគ្គលេខាធិការអង្គការសហប្រជាជាតិលោក Antonio Guterres នឹងធ្វើដំណើរទស្សនកិច្ចទៅប្រទេសម៉ុលដាវីនៅថ្ងៃចន្ទបន្ទាប់ពីមន្ត្រីការទូតជាន់ខ្ពស់ម្នាក់របស់សហភាពអឺរ៉ុប បានបង្ហាញក្តីបារម្ភពីមហិច្ឆតារបស់រុស្ស៊ី នៅក្នុងការពង្រីកការក្តោបក្តាប់រស់ខ្លួន ហួសពីព្រំដែនអ៊ុយក្រែន ហើយធ្លាយចូលទៅប្រទេសអឺរ៉ុបដែលនៅជិតខាងនោះ។
ទីភ្នាក់ងារព័ត៌មានរបស់រដ្ឋាភិបាលរុស្ស៊ី បានរាយការណ៍កាលពីថ្ងៃសុក្រថា សាធារណរដ្ឋប្រកាសផ្តាច់ខ្លួនពីរក្នុងតំបន់ឧស្សាហកម្មនាផ្នែកខាងកើតនៃប្រទេសអ៊ុយក្រែន បានចាត់តាំងឲ្យមានឯកអគ្គរដ្ឋទូតវិសាមញ្ញប្រចាំប្រទេសរុស្ស៊ី។ នេះបើតាមទីភ្នាក់ងារព័ត៌មាន AP។

រណ្តៅដ៏ជ្រៅមួយបានកើតឡើង ក្រោយគ្រាប់មីស៊ីលរុស្ស៊ីបានបាញ់ចំតំបន់រស់នៅរបស់ប្រជាពលរដ្ឋនៅភូមិ Bakhmut នៃតំបន់ Donetsk ថ្ងៃទី ៧ ខែឧសភា ឆ្នាំ ២០២២។

មន្ត្រីប្រចាំក្រុមប្រឹក្សាសន្តិសុខជាតិនៃប្រទេសអ៊ុយក្រែន កាលពីថ្ងៃសុក្រ បានព្រមានពលរដ្ឋក្នុងក្រុង អំពីការកើនឡើងនៃករណីបាញ់គ្រាប់ផ្តក់ នៅថ្ងៃអាទិត្យ និងថ្ងៃចន្ទ ដែលត្រូវនឹងពិធីអបអរសាទរថ្ងៃជ័យជម្នះរបស់រុស្ស៊ី។ នេះបើតាមទីភ្នាក់ងារព័ត៌មាន AP។
កាសែត The Washington Post បានរាយការណ៍ថា ជនជាតិអ៊ុយក្រែន ៤១ នាក់ រួមទាំងមន្ត្រីយោធា ២៨ នាក់ និងប្រធានព្រះវិហារគ្រិស្តនិកាយ Orthodox ម្នាក់ ត្រូវបានដោះលែង ក្រោយកិច្ចចរចាប្តូរអ្នកទោសជាមួយរុស្ស៊ី។ នាយករដ្ឋមន្ត្រីអ៊ុយក្រែន លោកស្រី Iryna Vereshchuk បានប្រកាសដូច្នេះ តាមបណ្តាញ Telegram។
លោកស្រី Jen Psaki អ្នកនាំពាក្យសេតវិមាន ថ្លែងថា លោកប្រធានាធិបតី Joe Biden នឹងជួបពិភាក្សាតាមប្រព័ន្ធអ៊ីនធឺណិតជាមួយមេដឹកនាំប្រទេសជាសមាជិក G-7 និងលោក Volodymyr Zelenskyy នៅថ្ងៃអាទិត្យ។ ថ្លែងកាលពីថ្ងៃសុក្រនៅលើយន្តហោះប្រធានាធិបតីអាមេរិក Air Force One លោកស្រី Psaki និយាយថា ប្រទេស G-7 នឹងពិភាក្សាគ្នាអំពីសង្គ្រាម ផលប៉ះពាល់ជាសកលលោក អនាគតរបស់ប្រទេសអ៊ុយក្រែន និងការពង្រីកការដាក់ទណ្ឌកម្មបន្ថែម។ នេះបើតាមទីភ្នាក់ងារព័ត៌មាន AP។
កាលពីថ្ងៃសុក្រ ប្រធានាធិបតីសហរដ្ឋអាមេរិកលោក Joe Biden បានអនុម័តឲ្យមានការដឹកជញ្ជូនជំនួយយោធាជាគ្រាប់កាំភ្លើងធំ និងប្រព័ន្ធរ៉ាដា ដែលមានតម្លៃជាទឹកប្រាក់ប្រមាណ ១៥០ លានដុល្លារ ទៅឲ្យប្រទេសអ៊ុយក្រែន ដើម្បីជួយអ៊ុយក្រែនវាយប្រយុទ្ធទប់ទល់នឹងកងកម្លាំងឈ្លានពានរបស់រុស្ស៊ី។ នេះបើតាមទីភ្នាក់ងារព័ត៌មាន AP។
ក្រុមផ្តាច់ខ្លួនដែលគាំទ្ររុស្ស៊ីនៅប្រទេសម៉ុលដាវី បានថ្លែងនៅថ្ងៃសៅរ៍ថា តំបន់ដែលខ្លួនបានកាន់កាប់ ត្រូវបានវាយប្រហារបួនលើកដោយដ្រូន នៅក្បែរព្រំដែនអ៊ុយក្រែន កាលពីយប់ថ្ងៃសុក្ររំលងអធ្រាត។ ក្នុងរយៈពេលជិតពីរសប្តាហ៍កន្លងមកនេះ ករណីវាយប្រហារស្រដៀងគ្នានេះដែលបានកើតឡើងនៅតំបន់ Transdniestria បានបង្កឲ្យមានក្តីបារម្ភជាអន្តរជាតិថា សង្គ្រាមរបស់រុស្ស៊ីនៅក្នុងប្រទេសអ៊ុយក្រែន អាចនឹងរីករាលដាលហួសព្រំដែនប្រយុទ្ធអ៊ុយក្រែន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
យោធាអ៊ុយក្រែនបានថ្លែងកាលពីថ្ងៃសុក្រថា ខ្លួនបានបោះជំហានទៅមុខនៅក្នុងតំបន់ Kharkiv ដោយវាយយកភូមិចំនួន ៥ និងផ្នែកខ្លះនៃភូមិទី ៦ មកវិញ។ នេះបើតាមទីភ្នាក់ងារព័ត៌មាន AP។
កាសែត The Washington Post បានរាយការណ៍ថា កាលពីថ្ងៃសៅរ៍ អ៊ុយក្រែនបានចោទទាហានរុស្ស៊ីថា បានបំផ្លាញស្ពានចំនួន ៣ នៅទីក្រុង Kharkiv ដែលជាទីក្រុងធំបង្អស់ទី ២ របស់អ៊ុយក្រែន ក្នុងគោលបំណងរារាំងការវាយប្រហារតទល់វិញពីទាហានអ៊ុយក្រែន។
ទីភ្នាក់ងារព័ត៌មាន AP រាយការណ៍ថា ភូមិមួយនៅតំបន់ Belgorod ភាគខាងត្បូងប្រទេសរុស្ស៊ី ដែលជាប់ព្រំដែនប្រទេសអ៊ុយក្រែន កំពុងជម្លៀសមនុស្សចេញពីទីនោះ ដោយសារការបាញ់គ្រាប់ផ្តក់ចេញពីតំបន់កាន់កាប់ដោយទាហានអ៊ុយក្រែន។ នេះបើតាមការអះអាងរបស់អភិបាលក្នុងតំបន់។
រដ្ឋមន្ត្រីហិរញ្ញវត្ថុអ៊ីតាលី បានអនុម័តលើប្រកាសមួយដែលនឹងរារាំងមិនឲ្យនាវាកម្សាន្តធំមួយគ្រឿង ធ្វើដំណើរចេញពីកំពង់ផែ Tuscan បន្ទាប់ពីការស៊ើបអង្កេត បានបង្ហាញឲ្យដឹងថា នាវា Scheherazade ដ៏ទំនើបនេះ មានជាប់ពាក់ព័ន្ធនឹង «សមាជិកសំខាន់ៗនៅក្នុងជួររដ្ឋាភិបាលរុស្ស៊ី»។ នេះបើតាមទីភ្នាក់ងារព័ត៌មាន AP។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃពុធ ទី ៤ ខែឧសភា៖

ថ្ងៃព្រហស្បតិ៍ ទី ៥ ខែឧសភា៖

ថ្ងៃសុក្រ ទី៦ ខែឧសភា៖

ថ្ងៃសៅរ៍ ទី ៧ ខែឧសភា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២