២០:៤២
១០.៤.២០២២
ថ្ងៃអាទិត្យ ទី ១០ ខែមេសា៖
- ប្រធានាធិបតីសហរដ្ឋអាមេរិកលោក Joe Biden នឹងជួបពិភាក្សាតាមអនឡាញនៅថ្ងៃចន្ទស្អែកជាមួយនឹងនាយករដ្ឋមន្ត្រីឥណ្ឌាលោក Narendra Modi។ ជំនួបនេះនឹងធ្វើឡើង បន្ទាប់ពីលោក Biden បាននិយាយអស់រយៈពេលប៉ុន្មានសប្ដាហ៍កន្លងមកថា ប្រទេសឥណ្ឌាមានការឆ្លើយតប «មិនម៉ឺងម៉ាត់» ចំពោះការឈ្លានពានរបស់រុស្ស៊ីលើអ៊ុយក្រែន។ អ្នកនាំពាក្យសេតវិមានអ្នកស្រី Jen Psaki បានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃអាទិត្យនេះថា នៅក្នុងការពិភាក្សានោះ លោក Biden នឹងបន្ត «ការប្រឹក្សាយោបល់យ៉ាងជិតស្និទ្ធអំពីផលវិបាកនៃសង្គ្រាមដ៏យង់ឃ្នងរបស់រុស្ស៊ីលើអ៊ុយក្រែន និងអំពីការកាត់បន្ថយផលប៉ះពាល់ដែលធ្វើឱ្យមានអស្ថិរភាពដល់ការផ្គត់ផ្គង់ស្បៀងអាហារនិងទីផ្សារទំនិញនៅលើពិភពលោក»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសនៃបណ្ដាប្រទេសជាសមាជិកសហភាពអឺរ៉ុបគ្រោងនឹងពិភាក្សាគ្នានៅថ្ងៃចន្ទនេះអំពីការដាក់ទណ្ឌកម្មជុំទី ៦ លើរដ្ឋាភិបាលរុស្ស៊ី សម្រាប់ការធ្វើសង្គ្រាមរបស់រុស្ស៊ីនៅក្នុងប្រទេសអ៊ុយក្រែន ប៉ុន្តែសហភាពអឺរ៉ុបនៅតែមានការខ្វែងគំនិតគ្នាលើការហាមឃាត់ការនាំចូលប្រេងឥន្ធនៈនិងឧស្ម័នពីប្រទេសរុស្ស៊ី។ ទោះបីជាទណ្ឌកម្មដែលដាក់លើការនាំចូលប្រេងឥន្ធនៈនិងឧស្ម័នពីរុស្ស៊ី ដែលជាទណ្ឌកម្មដែលនឹងប៉ះពាល់ខ្លាំងបំផុតដល់រុស្ស៊ី មិនមែនជាអ្វីដែលនឹងយកមកពិភាក្សាផ្លូវការក៏ដោយ ក៏មន្ត្រីការទូតនានានៃសហភាពអឺរ៉ុបបានទទួលស្គាល់ថា មានការពិភាក្សាអំពីរឿងនេះ។ កន្លងមក ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវម្ដងហើយម្ដងទៀតឱ្យមានការដាក់ទណ្ឌកម្មដូចនេះ។ នេះបើយោងតាមទីភ្នាក់ងារព័ត៌មាន AFP។
- អ្នកស្រី Liz Cheney សមាជិករដ្ឋសភាសហរដ្ឋអាមេរិក បាននិយាយនៅថ្ងៃអាទិត្យនេះថា អ្នកស្រីគិតថា ការវាយប្រហារដោយមីស៊ីលលើស្ថានីយរថភ្លើងរបស់អ៊ុយក្រែននៅសប្ដាហ៍នេះ «គឺជាអំពើប្រល័យពូជសាសន៍យ៉ាងពិតប្រាកដ»។ អ្នកស្រីបានបន្ថែមថា បណ្ដាប្រទេសនៅអឺរ៉ុបចាំបាច់ត្រូវ «យល់ថា ពួកគេកំពុងផ្ដល់ថវិកាដល់យុទ្ធនាការប្រល័យពូជសាសន៍នេះ» តាមរយៈការទិញប្រេងឥន្ធនៈនិងឧស្ម័នពីរុស្ស៊ី។ អ្នកស្រីលើកឡើងដូច្នេះថា៖ «ខ្ញុំយល់អំពីផលវិបាកផ្នែកសេដ្ឋកិច្ចចំពោះប្រទេសនានានៅអឺរ៉ុបខាងលិច ប្រសិនបើពួកគេដាក់បម្រាមលើការនាំចូលប្រេងឥន្ធនៈនិងឧស្ម័នដូចបម្រាមដែលសហរដ្ឋអាមេរិកបានដាក់លើការនាំចូលប្រេងឥន្ធនៈនិងឧស្ម័នរបស់រុស្ស៊ី ប៉ុន្តែពួកគេចាំបាច់ត្រូវតែធ្វើ»។ នេះបើយោងតាមបណ្ដាញព័ត៌មាន CNN។
- ទីប្រឹក្សាសន្តិសុខជាតិសេតវិមានលោក Jake Sullivan បានប្រាប់ទូរទស្សន៍ ABC News ថា ផ្នែកស៊ើបការណ៍សម្ងាត់បានបង្ហាញថា «មន្ត្រីថ្នាក់ខ្ពស់បំផុតរបស់រដ្ឋាភិបាលរុស្ស៊ីមានផែនការវាយប្រហារសំដៅលើ» ជនស៊ីវិលអ៊ុយក្រែន។ រដ្ឋាភិបាលរុស្ស៊ីបានច្រានចោលការអះអាងនេះ ប៉ុន្តែលោក Sullivan ថា ការវាយប្រហារណាមួយលើប្រជាពលរដ្ឋអ៊ុយក្រែន «គឺជាអ្វីដែលបានគ្រោងទុក»។
- នាយករដ្ឋមន្ត្រីកាណាដាលោក Justin Trudeau និងប្រធានគណៈកម្មការអឺរ៉ុបនៃសហភាពអឺរ៉ុបអ្នកស្រី Ursula von der Leyen នៅថ្ងៃអាទិត្យនេះបានសន្យាជួយផ្គត់ផ្គង់ជនភៀសខ្លួនអ៊ុយក្រែនដែលភៀសខ្លួនពីប្រទេសនៅពេលដែលរុស្ស៊ីឈ្លានពាន ដោយអ្នកទាំងពីរបាននិយាយថា ពលរដ្ឋកាណាដានិងពលរដ្ឋអឺរ៉ុបមានឆន្ទៈនៅក្នុងការបន្តទទួលយកជនភៀសខ្លួនទាំងនោះ។ លោក Trudeau បានបញ្ជាក់នៅក្នុងកម្មវិធី «State of the Union» របស់ទូរទស្សន៍ CNN ថា៖ «យើងបានទទួលយកជនភៀសខ្លួនជាង ១៤.០០០ នាក់រួចហើយ ហើយយើងកំពុងបន្តទទួលយកបន្ថែមទៀត»។ ចំណែកឯអ្នកស្រី von der Leyen បានបញ្ជាក់នៅក្នុងកម្មវិធីដូចគ្នានេះដែរថា៖ «វាជារឿងអស្ចារ្យដែលឃើញពលរដ្ឋអឺរ៉ុប ជាពិសេសពលរដ្ឋនៃប្រទេសជួរមុខ [ដែលនៅជាប់អ៊ុយក្រែន] ដូចជាប៉ូឡូញ ហុងគ្រី ឆែក ស្លូវ៉ាគី រ៉ូម៉ានី និងប៊ុលហ្គារីជាដើម មានចិត្តទូលាយនិងបើកទ្វារ [ទទួលយកជនភៀសខ្លួនទាំងនោះ]។ ពួកគេមានឆន្ទៈខ្ពស់នៅក្នុងការទទួលយកជនភៀសខ្លួនទាំងជាង ៤ លាននេះ»។
- ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានបញ្ជាក់នៅថ្ងៃអាទិត្យនេះថា ជនភៀសខ្លួនអ៊ុយក្រែនជាង ៤ លាន ៥ សែននាក់ បានភៀសខ្លួនពីប្រទេសចាប់តាំងពីពេលដែលរុស្ស៊ីបានឈ្លានពានកាលពីថ្ងៃទី ២៤ ខែកុម្ភៈមក។ ទីភ្នាក់ងារ UNHCR នេះបានលើកឡើងថា គិតត្រឹមថ្ងៃអាទិត្យនេះមានជនភៀសខ្លួនអ៊ុយក្រែនចំនួន ៤.៥០៣.៩៥៤ លាននាក់ហើយ ដែលមានការកើនឡើងចំនួន ៦២.២៩១ នាក់ បើធៀបជាមួយនឹងតួលេខកាលពីថ្ងៃសៅរ៍។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃអាទិត្យនេះថា វាគឺជា «កំហុសផ្នែកយុទ្ធសាស្ត្រ» របស់ប្រទេសអាល្លឺម៉ង់និងបារាំងដែលមិនអនុញ្ញាតឱ្យអ៊ុយក្រែនចូលជាសមាជិករបស់អង្គការអូតង់ (NATO) នៅក្នុងឆ្នាំ ២០០៨។ លោក Kuleba បានថ្លែងនៅក្នុងកិច្ចសម្ភាសន៍មួយក្នុងកម្មវិធី «Meet the Press» របស់ទូរទស្សន៍ NBC នៅថ្ងៃអាទិត្យនេះថា៖ «ប្រសិនបើអ៊ុយក្រែនជាសមាជិករបស់អង្គការអូតង់ សង្គ្រាមនេះមិនបានកើតឡើងនោះទេ»។ លោកបានបញ្ជាក់បន្ថែមដូច្នេះថា៖ «កំហុសយុទ្ធសាស្ត្រដែលធ្វើឡើងដោយប្រទេសអាល្លឺម៉ង់និងបារាំងនៅក្នុងឆ្នាំ ២០០៨ ដែលបានច្រានចោលកិច្ចប្រឹងប្រែងរបស់សហរដ្ឋអាមេរិកនិងរបស់បណ្ដាប្រទេសសម្ព័ន្ធមិត្តផ្សេងទៀតនៅក្នុងការឱ្យអ៊ុយក្រែនបានចូលជាសមាជិក [អង្គការអូតង់] គឺជាអ្វីដែលអ៊ុយក្រែនកំពុងទទួលរង»។ នេះបើយោងតាមបណ្ដាញព័ត៌មាន CNN។
- រដ្ឋាភិបាលអ៊ុយក្រែនបានបញ្ជាក់នៅថ្ងៃអាទិត្យនេះថា ការឃោសនារបស់រដ្ឋាភិបាលរុស្ស៊ីបានបង្កើតលក្ខខណ្ឌឱ្យមានការសម្លាប់ជនស៊ីវិលនៅក្នុងការឈ្លានពានរបស់រុស្ស៊ីលើអ៊ុយក្រែន។ អ៊ុយក្រែនបានចោទប្រកាន់ប្រព័ន្ធផ្សព្វផ្សាយរុស្ស៊ីថាបានបណ្ដុះការស្អប់គុំកួនចំពោះពលរដ្ឋអ៊ុយក្រែនអស់រយៈពេលជាច្រើនឆ្នាំមកហើយ។ រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃអាទិត្យនេះថា៖ «អស់រយៈពេលជាច្រើនឆ្នាំមកហើយ ឥស្សរជននយោបាយរុស្ស៊ីនិងការឃោសនារបស់រុស្ស៊ីបានញុះញង់ឱ្យមានការស្អប់គុំកួន មិនផ្ដល់តម្លៃជាមនុស្សដល់ពលរដ្ឋអ៊ុយក្រែន បណ្ដុះឧត្តមភាពរបស់រុស្ស៊ី និងបង្កើតលក្ខខណ្ឌឱ្យមានអំពើឃោរឃៅទាំងនេះ»។ នេះបើយោងតាមទីភ្នាក់ងារព័ត៌មាន AFP។
- លោក Valentin Reznichenko មេដឹកនាំរដ្ឋបាលយោធានៃក្រុង Dnipro នៅភាគកណ្ដាលប្រទេសអ៊ុយក្រែន បាននិយាយនៅថ្ងៃអាទិត្យនេះថា អាកាសយានដ្ឋាននៅក្នុងទីក្រុង Dnipro ត្រូវបានបំផ្លាញទាំងស្រុងនៅក្នុងការបាញ់ផ្លោងថ្មីរបស់រុស្ស៊ី។ លោកបានបញ្ជាក់ដូច្នេះថា៖ «មានការវាយប្រហារមួយទៀតលើអាកាសយានដ្ឋានក្រុង Dnipro។ មិនមានអ្វីនៅសល់នោះទេ។ អាកាសយានដ្ឋាននេះផ្ទាល់និងហេដ្ឋារចនាសម្ព័ន្ធដែលនៅជុំវិញត្រូវបានបំផ្លាញ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអាទិត្យនេះថា លោកបាននិយាយតាមទូរស័ព្ទជាមួយនឹងអធិការបតីអាល្លឺម៉ង់លោក Olaf Scholz អំពីលទ្ធភាពនៃការដាក់ទណ្ឌកម្មបន្ថែមលើប្រទេសរុស្ស៊ី ក៏ដូចជាការគាំទ្រថ្មីផ្នែកយោធានិងផ្នែកហិរញ្ញវត្ថុសម្រាប់ប្រទេសអ៊ុយក្រែន។ នៅក្នុងរឿងដាច់ដោយឡែកមួយផ្សេងទៀត ខុទ្ទកាល័យរបស់លោក Zelenskyy បានបញ្ជាក់នៅក្នុងសេចក្ដីថ្លែងការណ៍មួយថា លោក Zelenskyy បានពិភាក្សាតាមវីដេអូជាមួយនឹងមន្ត្រីអ៊ុយក្រែន ដោយនៅក្នុងការពិភាក្សានោះ ពួកគេបានរៀបចំសំណើសម្រាប់ឱ្យសហភាពអឺរ៉ុបដាក់ទណ្ឌកម្មជាលើកទី ៦ [លើរុស្ស៊ី]។ នេះបើយោងតាមទីភ្នាក់ងារព័ត៌មាន Reuters។
- អគ្គរដ្ឋអាជ្ញាអ៊ុយក្រែនអ្នកស្រី Iryna Venediktova បាននិយាយនៅថ្ងៃអាទិត្យនេះថា រដ្ឋាភិបាលអ៊ុយក្រែនកំពុងពិនិត្យលើការចោទប្រកាន់មេដឹកនាំរុស្ស៊ីចំនួន ៥០០ នាក់ ដែលក្នុងនោះរួមមានទាំងប្រធានាធិបតីរុស្ស៊ីលោក Vladimir Putin ផងដែរ សម្រាប់បទឧក្រិដ្ឋកម្មសង្គ្រាមរាប់ពាន់ករណី។ នេះបើយោងតាមទីភ្នាក់ងារព័ត៌មាន AFP។
- សម្ដេចប៉ាប Francis បានអំពាវនាវនៅថ្ងៃអាទិត្យនេះឱ្យមានការឈប់វាយប្រយុទ្ធគ្នានៅថ្ងៃ Easter នៅក្នុងប្រទេសអ៊ុយក្រែន ដើម្បីបើកផ្លូវឱ្យមានសន្តិភាពតាមរយៈ «ការចរចាពិតប្រាកដ»។ ព្រះអង្គបានថ្លែងទៅកាន់សាធារណជននៅទីលាន Saint Peter's Square ថា៖ «សូមឱ្យការឈប់វាយប្រយុទ្ធគ្នានៅថ្ងៃ Easter ចាប់ផ្ដើមឡើង។ ប៉ុន្តែសូមកុំផ្ដល់សព្វាវុធបន្ថែមទៀតនិងប្រយុទ្ធម្ដងទៀត។ សូមកុំធ្វើ! វាគឺជាការឈប់វាយប្រយុទ្ធគ្នាដែលនឹងឈានឆ្ពោះទៅរកសន្តិភាពតាមរយៈការចរចាពិតប្រាកដ»។ នេះបើយោងតាមទីភ្នាក់ងារព័ត៌មាន AFP។
- សម្ដេចសង្ឃ Kirill នៃវិហារគ្រិស្តសាសនានិកាយអ័រតូដុករបស់ប្រទេសរុស្ស៊ីបានអំពាវនាវនៅថ្ងៃអាទិត្យនេះឱ្យប្រជាពលរដ្ឋចូលរួមគាំទ្រអាជ្ញាធរ ស្របពេលដែលរដ្ឋាភិបាលរុស្ស៊ីកំពុងបន្តការឈ្លានពានរបស់ខ្លួននៅក្នុងប្រទេសអ៊ុយក្រែន។ ទីភ្នាក់ងារ Interfax របស់រុស្ស៊ីបានស្រង់សម្ដីរបស់ព្រះអង្គ Kirill ដែលបានថ្លែងក្នុងពិធីទេសនាមួយក្នុងទីក្រុងមូស្គូ ប្រទេសរុស្ស៊ី ថា៖ «សូមព្រះជាម្ចាស់ជួយយើងខ្ញុំឱ្យមានសាមគ្គីភាពនៅក្នុងពេលដ៏លំបាកនេះសម្រាប់មាតុភូមិរបស់យើង»។ នេះបើយោងតាមទីភ្នាក់ងារព័ត៌មាន Reuters។
- លោក Mykhailo Podolyak ទីប្រឹក្សាប្រធានាធិបតីអ៊ុយក្រែន បាននិយាយនៅថ្ងៃអាទិត្យនេះថា លោកប្រធានាធិបតី Volodymyr Zelenskyy ទំនងជានឹងជួបជាមួយនឹងប្រធានាធិបតីរុស្ស៊ីលោក Vladimir Putin នៅក្រោយពេលដែលមានការវាយប្រយុទ្ធគ្នាដ៏ធំមួយដែលគេរំពឹងថានឹងកើតឡើងនៅក្នុងតំបន់ Donbas នៅភាគខាងកើតប្រទេសអ៊ុយក្រែនតែប៉ុណ្ណោះ។ លោក Podolyak បានបញ្ជាក់នៅក្នុងការថ្លែងតាមទូរទស្សន៍ថា៖ «អ៊ុយក្រែនត្រៀមលក្ខណៈដើម្បីការប្រយុទ្ធដ៏ធំ។ អ៊ុយក្រែនត្រូវតែឈ្នះរុស្ស៊ី ជាពិសេសនៅក្នុងតំបន់ Donbas។ ហើយបន្ទាប់ពីនោះមក អ៊ុយក្រែននឹងមានជំហរចរចាដ៏មានឥទ្ធិពលជាងមុន ដែលខ្លួនអាចដាក់លក្ខខណ្ឌបានមួយចំនួន។ បន្ទាប់ពីនោះមក ប្រធានាធិបតី [ទាំងពីរ] នឹងជួបគ្នា។ ករណីនេះអាចត្រូវការពេលពី ២ ទៅ ៣ សប្ដាហ៍»។ នេះបើយោងតាមបណ្ដាញព័ត៌មាន CNN។
- ប្រភពពីរដ្ឋាភិបាលអាល្លឺម៉ង់បានបញ្ជាក់នៅថ្ងៃអាទិត្យនេះថា អ៊ុយក្រែនបានទទួលយកនូវសំណើរបស់ក្រុមហ៊ុនសព្វាវុធរបស់អាល្លឺម៉ង់មួយ ដែលមានបំណងផ្ដល់កាំភ្លើងធំដែលចល័តដោយខ្លួនឯងក្នុងចំនួនមួយដ៏ច្រើនគួរសម។ នេះបើយោងតាមទីភ្នាក់ងារព័ត៌មាន Reuters។
- ផ្នែកស៊ើបការណ៍សម្ងាត់យោធារបស់ចក្រភពអង់គ្លេសបានបញ្ជាក់នៅថ្ងៃអាទិត្យនេះថា យោធារុស្ស៊ីមានបំណងបង្កើនចំនួនកងទ័ពរបស់ខ្លួនដោយបញ្ចូលអ្នកដែលបានបញ្ចប់កាតព្វកិច្ចយោធាតាំងពីឆ្នាំ ២០១២ មក។ មូលហេតុដែលយោធារុស្ស៊ីមានបំណងធ្វើដូច្នេះគឺដោយសារតែកងទ័ពរុស្ស៊ីបានស្លាប់ជាបន្តបន្ទាប់តាំងពីពេលដែលរុស្ស៊ីបានឈ្លានពានអ៊ុយក្រែនមក។ នេះបើយោងតាមទីភ្នាក់ងារព័ត៌មាន Reuters។
- លោក Serhiy Gaidai អភិបាលតំបន់ Luhansk នៃប្រទេសអ៊ុយក្រែន បាននិយាយថា សាលារៀនមួយកន្លែងនិងអគារស្នាក់នៅខ្ពស់មួយកន្លែងបានរងការបាញ់ផ្លោងនៅព្រឹកថ្ងៃអាទិត្យនេះ។ លោកបានសរសេរនៅលើ Telegram ថា៖ «សំណាងល្អ! មិនមានមនុស្សស្លាប់និងរងរបួស [ដោយសារការបាញ់ផ្លោងនេះ]»។ តំបន់ Luhansk នេះកំពុងស្ថិតក្រោមការឡោមព័ទ្ធរបស់កងទ័ពរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិរុស្ស៊ីបានបញ្ជាក់នៅថ្ងៃអាទិត្យនេះថា កងទ័ពរុស្ស៊ីបានធ្វើការវាយប្រហារដោយមីស៊ីលនៅក្នុងតំបន់ Dnipropetrovsk តំបន់ Mykolaiv និងតំបន់ Kharkiv នៃប្រទេសអ៊ុយក្រែន។ នេះបើយោងតាមបណ្ដាញព័ត៌មាន CNN។
- អ្នកស្រី Tatiana Moskalkova ប្រធានផ្នែកសិទ្ធិមនុស្សនៃប្រទេសរុស្ស៊ី បានបញ្ជាក់នៅថ្ងៃអាទិត្យនេះថា ប្រទេសរុស្ស៊ីនិងប្រទេសអ៊ុយក្រែនបានដោះដូរអ្នកទោសកាលពីថ្ងៃសៅរ៍។ អ្នកស្រីបាននិយាយថា ក្នុងចំណោមអ្នកទោសដែលរុស្ស៊ីទទួលបាននៅក្នុងការដោះដូរនោះ មានបុគ្គលិក ៤ នាក់ នៃក្រុមហ៊ុន Rosatom ដែលជាសាជីវកម្មថាមពលបរមាណូរដ្ឋរបស់ប្រទេសរុស្ស៊ី និងទាហានរុស្ស៊ីផងដែរ។ នេះបើយោងតាមទីភ្នាក់ងារព័ត៌មាន Reuters។
- លោក Taras Didych មេដឹកនាំសហគមន៍ Dmytrivka នៃប្រទេសអ៊ុយក្រែន បាននិយាយថា សាកសពពលរដ្ឋអ៊ុយក្រែនត្រូវបានរកឃើញកាលពីថ្ងៃសៅរ៍នៅក្នុងភូមិ Buzova។ ភូមិនេះគឺជាភូមិរបស់ពលរដ្ឋប្រកាន់ទស្សនៈសេរីនិយមនៅជិតរដ្ឋធានីកៀវ ដែលកងទ័ពរុស្ស៊ីបានកាន់កាប់អស់រយៈពេលជាច្រើនសប្ដាហ៍កន្លងមក។ គេមិនទាន់ឃើញមានការបញ្ជាក់ណាមួយនៅឡើយទេអំពីចំនួននៃសាកសពទាំងនេះ។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានអរគុណចក្រភពអង់គ្លេសនិងនាយករដ្ឋមន្ត្រីអង់គ្លេសលោក Boris Johnson កាលពីថ្ងៃសៅរ៍ សម្រាប់ការផ្ដល់ការគាំទ្រផ្នែកយោធាចំពោះប្រទេសអ៊ុយក្រែន។ លោក Zelenskyy បានថ្លែងថា៖ «លោក Boris Johnson ស្ថិតក្នុងចំណោមអ្នកដែលគ្មានការសង្ស័យអ្វីទាំងអស់នៅក្នុងការគាំទ្រអ៊ុយក្រែន។ ភាពជាអ្នកដឹកនាំរបស់ចក្រភពអង់គ្លេសនៅក្នុងការផ្ដល់ជំនួយផ្នែកការពារដល់ប្រទេសរបស់យើងនិងនៅក្នុងគោលនយោបាយដាក់ទណ្ឌកម្ម នឹងចារក្នុងប្រវត្តិសាស្ត្រ»។ លោក Johnson បានជួបជាមួយនឹងលោក Zelenskyy នៅក្នុងដំណើរទស្សនកិច្ចដ៏ភ្ញាក់ផ្អើលរបស់លោកទៅកាន់រដ្ឋធានីកៀវ ប្រទេសអ៊ុយក្រែន ដើម្បីបង្ហាញអំពីផែនការរបស់ចក្រភពអង់គ្លេសនៅក្នុងការផ្ដល់ការគាំទ្របន្ថែមទៀតដល់អ៊ុយក្រែនទាំងផ្នែកហិរញ្ញវត្ថុនិងផ្នែកយោធា។ នេះបើយោងតាមបណ្ដាញព័ត៌មាន CNN។
- មន្ត្រីនៅក្នុងទីក្រុងកៀវ ប្រទេសអ៊ុយក្រែន បាននិយាយថា អ៊ុយក្រែនកំពុងត្រៀមលក្ខណៈដើម្បី «ការប្រយុទ្ធដ៏ធំ» ជាមួយនឹងកងទ័ពរុស្ស៊ីនៅភាគខាងកើតប្រទេសអ៊ុយក្រែន។ មន្ត្រីអ៊ុយក្រែនលើកឡើងដូច្នេះ ស្របពេលជនស៊ីវិលរាប់ពាន់នាក់ភៀសខ្លួនចេញពីតំបន់ភាគខាងកើតប្រទេស ដោយសារខ្លាចការវាយប្រហាររបស់រុស្ស៊ីដែលជិតកើតឡើង។ នេះបើយោងតាមទីភ្នាក់ងារព័ត៌មាន AFP។
- គណៈកម្មការអឺរ៉ុបនៃសហភាពអឺរ៉ុបបានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃសៅរ៍ថា ព្រឹត្តិការណ៍និងយុទ្ធនាការ «ក្រោកឈរដើម្បីអ៊ុយក្រែន (Stand Up for Ukraine)» ដែលមានគោលបំណងជួយពលរដ្ឋអ៊ុយក្រែនដែលភៀសខ្លួនពីការឈ្លានពានរបស់រុស្ស៊ី បានរៃអង្គាសថវិកាបានចំនួនជាង ១០.៨០០ លានដុល្លារ តាំងពីបានចាប់ផ្ដើមកាលពីថ្ងៃទី ២៦ ខែមីនាមក។ នេះបើយោងតាមបណ្ដាញព័ត៌មាន CNN។
២១:៥០
១១.៤.២០២២
ថ្ងៃចន្ទ ទី ១១ ខែមេសា៖
- នាយករដ្ឋមន្ត្រីឥណ្ឌាលោក Narendra Modi បាននិយាយនៅថ្ងៃចន្ទនេះថា លោកបានស្នើឱ្យមានការចរចាដោយផ្ទាល់រវាងប្រធានាធិបតីរុស្ស៊ីលោក Vladimir Putin និងប្រធានាធិបតីអ៊ុយក្រែនលោក Volodymyr Zelenskyy និងបានបន្ថែមថា លោកយល់ថាស្ថានការណ៍នៅក្នុងប្រទេសអ៊ុយក្រែនមានលក្ខណៈគួរឱ្យព្រួយបារម្ភខ្លាំង។ លោក Modi បានលើកឡើងដូច្នេះ បន្ទាប់ពីលោកបានជួបប្រជុំតាមអនឡាញជាមួយនឹងប្រធានាធិបតីសហរដ្ឋអាមេរិកលោក Joe Biden នៅថ្ងៃចន្ទនេះ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសនៃប្រទេសអៀរឡង់ លីទុយអានី និងហូឡង់បានបញ្ជាក់នៅថ្ងៃចន្ទនេះថា ផ្នែកប្រតិបត្តិនៃសហភាពអឺរ៉ុបកំពុងព្រាងសំណើសម្រាប់ការហាមឃាត់ការនាំចូលរបស់សហភាពអឺរ៉ុបនូវប្រេងឥន្ធនៈពីប្រទេសរុស្ស៊ី បើទោះបីជាមិនទាន់មានកិច្ចព្រមព្រៀងណាមួយនៅឡើយនៅក្នុងការហាមឃាត់ប្រេងឆៅរបស់រុស្ស៊ីនេះក៏ដោយ។ នេះបើយោងតាមទីភ្នាក់ងារព័ត៌មាន Reuters។
- ប្រទេសរុស្ស៊ីបានបញ្ជាក់នៅថ្ងៃចន្ទនេះថា ប្រទេសអ៊ុយក្រែន ដោយមានការជួយជ្រោមជ្រែងពីផ្នែកស៊ើបការណ៍សម្ងាត់របស់ចក្រភពអង់គ្លេស កំពុងរៀបចំការចោទប្រកាន់ក្លែងក្លាយថ្មីថារុស្ស៊ីប្រព្រឹត្តអំពើហិង្សាលើអ៊ុយក្រែន។ ក្រសួងការពារជាតិរុស្ស៊ីបានបញ្ជាក់ដូច្នេះថា៖ «ការបង្កហេតុដែលរៀបចំឡើងបែបក្លែងក្លាយថ្មីដែលចោទប្រកាន់កងទ័ពរុស្ស៊ីថាបានប្រព្រឹត្តអំពើឃោរឃៅលើប្រជាពលរដ្ឋអ៊ុយក្រែនកំពុងរៀបចំឡើងដោយរដ្ឋាភិបាលអ៊ុយក្រែននៅក្រោមការដឹកនាំរបស់ផ្នែកសេវាពិសេសរបស់ចក្រភពអង់គ្លេសនៅក្នុងដែនដីនៃតំបន់ Sumy»។ នេះបើយោងតាមទីភ្នាក់ងារព័ត៌មាន Reuters។
- តំបន់ចំនួន ៣ របស់ប្រទេសរុស្ស៊ីនៅជាប់ប្រទេសអ៊ុយក្រែនបានប្រកាសថា ពួកគេបានបង្កើនវិធានការសន្តិសុខនៅថ្ងៃចន្ទនេះទាក់ទិននឹងអ្វីដែលពួកគេបានបញ្ជាក់ថាជាការ «បង្កហេតុដែលអាចទៅរួច» ពីភាគីអ៊ុយក្រែន។ អាជ្ញាធរនៅក្នុងតំបន់ Belgorod តំបន់ Voronezh និងតំបន់ Bryansk នៃប្រទេសរុស្ស៊ីបានប្រកាសថា ពួកគេបានបង្កើនសន្តិសុខនិងបានជំរុញពលរដ្ឋឱ្យមានការប្រុងប្រយ័ត្ន។ នេះបើយោងតាមទីភ្នាក់ងារព័ត៌មាន Reuters។
- មន្ត្រីជាន់ខ្ពស់ផ្នែកការពារជាតិមួយរូបរបស់សហរដ្ឋអាមេរិកបាននិយាយនៅថ្ងៃចន្ទនេះថា សហរដ្ឋអាមេរិកជឿថា ប្រទេសរុស្ស៊ីបានចាប់ផ្ដើមពង្រឹងនិងបង្កើនកងទ័ពរបស់ខ្លួននៅក្នុងតំបន់ Donbas នៅភាគខាងកើតប្រទេសអ៊ុយក្រែន។ មន្ត្រីដែលថ្លែងក្នុងលក្ខខណ្ឌមិនបញ្ចេញឈ្មោះនេះបានបន្ថែមថា សហរដ្ឋអាមេរិកមិនគិតថានេះគឺជាការចាប់ផ្ដើមនៃការវាយប្រហារថ្មីនៅក្នុងតំបន់នោះទេ។ នេះបើយោងតាមទីភ្នាក់ងារព័ត៌មាន Reuters។
- អធិការបតីអូទ្រីសលោក Karl Nehammer បានពិភាក្សា «យ៉ាងម៉ឺងម៉ាត់ដោយផ្ទាល់និងបើកចំហ» ជាមួយនឹងប្រធានាធិបតីរុស្ស៊ីលោក Vladimir Putin នៅក្នុងរដ្ឋធានីមូស្គូ ប្រទេសរុស្ស៊ីនៅថ្ងៃចន្ទនេះ។ នៅក្នុងសេចក្ដីថ្លែងការណ៍មួយបន្ទាប់ពីជំនួបនេះបានបញ្ចប់ទៅ លោក Nehammer បាននិយាយថា សារសំខាន់បំផុតរបស់លោកចំពោះលោក Putin គឺថា សង្គ្រាមនៅក្នុងប្រទេសអ៊ុយក្រែនត្រូវតែបញ្ចប់ ដោយសារតែ «នៅក្នុងសង្គ្រាមគឺមានតែអ្នកចាញ់ប៉ុណ្ណោះសម្រាប់ភាគីទាំងសងខាង»។ នេះបើយោងតាមទីភ្នាក់ងារព័ត៌មាន Reuters។
- ប្រទេសចំនួន ៣ នៅអឺរ៉ុបបានបញ្ជាក់នៅថ្ងៃចន្ទនេះថា ពួកគេបានផ្ដល់ថវិកាប្រហែល ២ លាន ៥ សែនអឺរ៉ូទៅឱ្យតុលាការឧក្រិដ្ឋកម្មអន្តរជាតិ (ICC) ស្របពេលដែលតុលាការនេះកំពុងស៊ើបអង្កេតលើការចោទប្រកាន់ដែលថារុស្ស៊ីបានប្រព្រឹត្តឧក្រិដ្ឋកម្មសង្គ្រាមនៅក្នុងប្រទេសអ៊ុយក្រែន។ ការប្រកាសរបស់រដ្ឋមន្ត្រីការបរទេសនៃប្រទេសអាល្លឺម៉ង់ ហូឡង់ និងស៊ុយអែតនេះបានធ្វើឡើង បន្ទាប់ពីពួកគេបានជួបជាមួយនឹងប្រធានរដ្ឋអាជ្ញាតុលាការ ICC លោក Karim Khan រួមជាមួយនឹងបណ្ដាប្រទេសអឺរ៉ុបផ្សេងទៀត។ នេះបើយោងតាមទីភ្នាក់ងារព័ត៌មាន AFP។
- នាយករដ្ឋមន្ត្រីលីទុយអានីអ្នកស្រី Ingrida Simonyte បានធ្វើទស្សនកិច្ចទៅកាន់ប្រទេសអ៊ុយក្រែននៅថ្ងៃចន្ទនេះដើម្បីបង្ហាញការគាំទ្រដល់ប្រទេសអ៊ុយក្រែនដែលកំពុងស្ថិតក្រោមការវាយប្រហាររបស់ប្រទេសរុស្ស៊ី។ នៅក្នុងអំឡុងពេលទស្សនកិច្ចដែលមិនបានប្រកាសជាមុននេះ អ្នកស្រីគ្រោងនឹងជួបជាមួយប្រធានាធិបតីអ៊ុយក្រែនលោក Volodymyr Zelenskyy។ លោក Zelenskyy គ្រោងនឹងថ្លែងទៅកាន់សភាប្រទេសលីទុយអានីនៅថ្ងៃអង្គារស្អែក។
- លោក Josep Borrell ដែលជាមន្ត្រីការទូតកំពូលរបស់សហភាពអឺរ៉ុប បាននិយាយនៅថ្ងៃចន្ទនេះថា ប្រទេសរុស្ស៊ីគឺជាអ្នកទទួលខុសត្រូវចំពោះវិបត្តិស្បៀងអាហារសាកលលោកដែលកំពុងតែរីករាលដាល ដោយសារតែប្រទេសនេះបានធ្វើសង្គ្រាមនៅក្នុងប្រទេសអ៊ុយក្រែន ដោយបានទម្លាក់គ្រាប់បែកចំឃ្លាំងស្តុកស្រូវសាឡីនិងបានរារាំងកប៉ាល់នានាមិនឱ្យដឹកធញ្ញជាតិទៅបរទេស។ លោក Borrell បានបញ្ជាក់នៅក្នុងសន្និសីទកាសែតបន្ទាប់ពីធ្វើជាប្រធាននៅក្នុងជំនួបរវាងរដ្ឋមន្ត្រីការបរទេសនានានៃសហភាពអឺរ៉ុបថា៖ «ពួកគេបានធ្វើឱ្យមានភាពខ្វះខាត។ ពួកគេកំពុងទម្លាក់គ្រាប់បែកលើទីក្រុងនានារបស់អ៊ុយក្រែននិងកំពុងបង្កឱ្យមានភាពអត់ឃ្លាននៅលើពិភពលោក»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសកូរ៉េខាងជើងនៅថ្ងៃចន្ទនេះបានថ្កោលទោសការសម្រេចដែលផ្អាកសមាជិកភាពរបស់ប្រទេសរុស្ស៊ីនៅក្នុងក្រុមប្រឹក្សាសិទ្ធិមនុស្សអង្គការសហប្រជាជាតិ ដោយបានហៅការផ្អាកនេះថាជា «វិធានការដែលគ្មានហេតុផល» ដែលដឹកនាំដោយសហរដ្ឋអាមេរិកនិងក្រុមបស្ចិមប្រទេសនៅក្នុងការរក្សាអនុត្តរភាពនយោបាយ។ នេះបើយោងតាមទីភ្នាក់ងារព័ត៌មាន Reuters។
- មេដឹកនាំក្រុមឧទ្ទាមដែលមានទំនោរទៅរករដ្ឋាភិបាលរុស្ស៊ីបាននិយាយនៅថ្ងៃចន្ទនេះថា កងកម្លាំងផ្ដាច់ខ្លួននៅក្នុងតំបន់ភាគខាងកើតប្រទេសអ៊ុយក្រែនបានដណ្ដើមកាន់កាប់កំពង់ផែនៃទីក្រុងយុទ្ធសាស្ត្រ Mariupol ហើយ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាននានារបស់រុស្ស៊ី។ លោក Denis Pushilin មេដឹកនាំក្រុមផ្ដាច់ខ្លួននៅក្នុងតំបន់ផ្ដាច់ខ្លួន Donetsk បានបញ្ជាក់ថា៖ «ទាក់ទិននឹងកំពង់ផែក្រុង Mariupol ឥឡូវនេះកំពង់ផែនេះស្ថិតក្រោមការគ្រប់គ្រងរបស់យើងហើយ»។ នេះបើយោងតាមទីភ្នាក់ងារព័ត៌មាន AFP។
- អ្នកនាំពាក្យរដ្ឋាភិបាលអ៊ុយក្រែនលោក Oleksandr Motuzyanyk បាននិយាយនៅក្នុងសន្និសីទកាសែតមួយនៅថ្ងៃចន្ទនេះថា រដ្ឋាភិបាលអ៊ុយក្រែនរំពឹងថាប្រទេសរុស្ស៊ីនឹងបើកការវាយប្រហារដ៏ធំមួយនៅភាគខាងកើតប្រទេសអ៊ុយក្រែន «ក្នុងពេលឆាប់ៗនេះ»។ នេះបើយោងតាមទីភ្នាក់ងារព័ត៌មាន AFP។
- អង្គការសហប្រជាជាតិបានបញ្ជាក់នៅថ្ងៃចន្ទនេះថា ពលរដ្ឋអ៊ុយក្រែនជិត ៤៥.០០០ នាក់បានភៀសខ្លួនពីប្រទេសនៅក្នុងរយៈពេល ២៤ ម៉ោងចុងក្រោយ។ ឧត្តមស្នងការសហប្រជាជាតិទទួលបន្ទុកកិច្ចការសិទ្ធិមនុស្ស (UNHCR) បានបញ្ជាក់ថា ពលរដ្ឋអ៊ុយក្រែន ៤.៥៤៧.៧៣៥ នាក់បានភៀសខ្លួនពីប្រទេសតាំងពីរុស្ស៊ីបានឈ្លានពានកាលពីថ្ងៃទី ២៤ ខែកុម្ភៈមក ដែលមានការកើនឡើងចំនួន ៤៤.៧៨១ នាក់បើធៀបជាមួយនឹងតួលេខកាលពីថ្ងៃអាទិត្យ។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទថា លោកជឿថា មនុស្ស «រាប់ម៉ឺននាក់» នៅក្នុងទីក្រុង Mariupol ត្រូវបានសម្លាប់។ លោកថ្លែងដូច្នេះនៅពេលលោកស្នើសមាជិកសភាប្រទេសកូរ៉េខាងត្បូងឱ្យផ្ដល់ជំនួយយោធាដល់អ៊ុយក្រែន។ នៅក្នុងការថ្លែងទៅកាន់សភាជាតិរបស់ប្រទេសកូរ៉េខាងត្បូងតាមវីដេអូ លោក Zelenskyy បានបញ្ជាក់ថា រុស្ស៊ីបាន «បំផ្លាញ» ទីក្រុង Mariupol «ទាំង ស្រុង»។ លោកលើកឡើងដូច្នេះថា៖ «រុស្ស៊ីបានបំផ្លាញទីក្រុង Mariupol ទាំងស្រុងនិងបានដុតកម្ទេចទីក្រុងនេះឱ្យទៅជាផេះ។ យ៉ាងហោចណាស់មានពលរដ្ឋរាប់ម៉ឺននាក់នៃទីក្រុងនេះត្រូវបានសម្លាប់»។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីសេដ្ឋកិច្ចប្រទេសអាល្លឺម៉ង់លោក Robert Habeck បាននិយាយនៅថ្ងៃចន្ទថា ការបញ្ជូនសព្វាវុធពីប្រទេសអាល្លឺម៉ង់ទៅកាន់ប្រទេសអ៊ុយក្រែនគួរតែធ្វើឡើងឱ្យបានឆាប់ ដោយសារតែរុស្ស៊ីជិតវាយប្រហារពីទិសខាងកើតហើយ។ លោក Habeck លើក ឡើងដូច្នេះថា៖ «ដោយមានការសម្រេចចិត្តនៅក្នុងការផ្ដល់សព្វាវុធដល់អ៊ុយក្រែន អាល្លឺម៉ង់បានបំពេញកាតព្វកិច្ចមួយរួចហើយ ហើយដោយសារតែប្រពលភាពនៃសង្គ្រាមនេះ...យើងនឹងបន្តផ្ដល់សព្វាវុធដល់អ៊ុយក្រែនទាំងបរិមាណនិងគុណភាព»។ នេះបើយោងតាមទីភ្នាក់ងារព័ត៌មាន Reuters។
- កងទ័ពម៉ារីនរបស់អ៊ុយក្រែនបានបញ្ជាក់នៅថ្ងៃចន្ទថា កងកម្លាំងអ៊ុយក្រែនកំពុងត្រៀម «ប្រយុទ្ធលើកចុងក្រោយ» ដើម្បីគ្រប់គ្រងកំពង់ផែ Mariupol នៅភាគខាងត្បូងប្រទេស ដែលកំពុងស្ថិតក្រោមការឡោមព័ទ្ធរបស់កងទ័ពរុស្ស៊ីតាំងពីពេលដែលរុស្ស៊ីបានឈ្លាន ពានមក។ កងពលតូចម៉ារីនលេខ៣៦នៃកងទ័ពអ៊ុយក្រែន បានបញ្ជាក់នៅលើ Facebook ថា៖ «ថ្ងៃនេះប្រហែលជាថ្ងៃដែលប្រយុទ្ធលើកចុងក្រោយ ដោយសារតែ ពួកយើងជិតអស់គ្រាប់ហើយ»។ ពួកគេបានបន្ថែមថា៖ «សម្រាប់យើងមួយចំនួនគឺនឹងស្លាប់ ហើយក្រៅពីនេះគឺនឹងត្រូវគេចាប់ឃុំខ្លួន»។ នេះបើយោងតាមទីភ្នាក់ងារព័ត៌មាន AFP។
- ប្រទេសកាណាដាបានបញ្ជាក់នៅថ្ងៃចន្ទនេះថា ខ្លួនបានដាក់ទណ្ឌកម្មលើក្រុមហ៊ុននានានៅក្នុងវិស័យការពាររបស់ប្រទេសរុស្ស៊ី និងថាខ្លួនកំពុងសិក្សាអំពីជម្រើសដាក់ទណ្ឌកម្មបន្ថែមទៀតលើរុស្ស៊ីដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយ ក្រែន។ រដ្ឋាភិបាលកាណាដាបានបញ្ជាក់នៅក្នុងសេចក្ដីថ្លែងការណ៍មួយថា ទណ្ឌកម្មនេះគឺដាក់កំហិតលើអង្គភាពចំនួន៣៣នៅក្នុងផ្នែកការពាររបស់រុស្ស៊ី ដោយសារតែអង្គភាពទាំងនេះបានផ្ដល់ការជួយជ្រោមជ្រែងដល់យោធារបស់រុស្ស៊ីនៅក្នុងសង្គ្រាម។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអៀរឡង់លោក Simon Coveney បាននិយាយថា សហភាពអឺរ៉ុបគួរតែពិចារណាលើការដាក់ទណ្ឌកម្មលើឧស្សាហកម្មប្រេងឥន្ធនៈរបស់រុស្ស៊ី ប៉ុន្តែបានរំឭកថា វាជារឿងសំខាន់បំផុតសម្រាប់សហភាពអឺរ៉ុបដែលមានប្រទេស២៧ជាសមាជិកនៅក្នុងការរួមសាមគ្គីគ្នា។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ លោក Coveney បាននិយាយនៅពេលដែលរដ្ឋមន្ត្រីការបរទេសនានានៃសហភាពអឺរ៉ុបបានជួបប្រជុំគ្នានៅក្នុងប្រទេសលុចសំបួនៅថ្ងៃចន្ទថា៖ «យើងចាំបាច់ត្រូវចាត់វិធានការដាក់ទណ្ឌកម្មឱ្យបានដាច់ណាត់ដើម្បីរារាំងឱ្យបានខ្លាំងក្លាបំផុតមិនឱ្យសង្គ្រាមនិងអំពើឃោរឃៅនេះនៅបន្តទៅមុខទៀត»។ លោកបានបន្តថា៖ «បើតាមទស្សនៈរបស់យើង ទណ្ឌកម្មនោះគួររួមបញ្ចូលទាំងវិស័យប្រេងឥន្ធនៈផងដែរ»។ លោកបានបន្ថែមថា វាពិតជា «ពិបាកខ្លាំងសម្រាប់ប្រទេសសមាជិកសហភាពអឺរ៉ុបមួយចំនួន ហើយយើងត្រូវតែរក្សាគោលជំហររួបរួមគ្នានៅទូទាំងសហ ភាពអឺរ៉ុប»។
- ប្រទេសក្រូអាស៊ីនៅថ្ងៃចន្ទនេះបានប្រាប់បុគ្គលិកស្ថានទូតរុស្ស៊ី២៤នាក់ឱ្យចាកចេញពីប្រទេស ដោយសារតែការឈ្លានពានរបស់រុស្សីលើអ៊ុយក្រែននិង «ភាពគឃ្លើនដ៏ឃោរ ឃៅ» របស់រុស្ស៊ី។ នេះបើតាមការបញ្ជាក់របស់ក្រសួងការបរទេសក្រូអាស៊ីនៅក្នុងសេចក្ដីថ្លែងការណ៍មួយ បន្ទាប់ពីប្រទេសអឺរ៉ុបផ្សេងទៀតបានចាត់វិធានការស្រដៀងគ្នានេះដែរ។ ក្រសួងនេះបានបន្ថែមថា ក្នុងចំណោមបុគ្គលិកស្ថានទូតរុស្ស៊ីទាំង២៤ នាក់នោះ មានមន្ត្រីការទូតរុស្ស៊ី ១៨នាក់។ នេះបើយោងតាមទីភ្នាក់ងារព័ត៌មាន Reuters។
- ឯកអគ្គរដ្ឋទូតបារាំងប្រចាំប្រទេសអ៊ុយក្រែនលោក Etienne de Poncins បានបញ្ជាក់នៅលើ Twitter ថា មន្ត្រីប៉ូលិសបារាំងបានធ្វើដំណើរទៅដល់ប្រទេសអ៊ុយក្រែននៅថ្ងៃចន្ទនេះដើម្បីជួយអ៊ុយក្រែនស៊ើបអង្កេតលើការចោទប្រកាន់ដែលថា រុស្ស៊ីបានប្រព្រឹត្តិឧក្រិដ្ឋកម្មសង្គ្រាមបន្ទាប់ពីគេបានរកឃើញសាកសពជនស៊ីវិលរាប់រយនាក់នៅក្នុងក្រុងនានានៅជុំវិញរដ្ឋធានីកៀវមក។ លោកលើកឡើងដូច្នេះថា៖ «បារាំងគឺជាប្រទេសដំបូងគេដែលផ្ដល់ការជួយជ្រោមជ្រែងបែបនេះ។ ពួកគេនឹងចាប់ផ្ដើមការងារនៅថ្ងៃស្អែក»។ នេះបើយោងតាមទីភ្នាក់ងារព័ត៌មាន AFP។
- អ្នកនាំពាក្យរដ្ឋាភិបាលអាល្លឺម៉ង់បានបញ្ជាក់នៅថ្ងៃចន្ទនេះថា អធិការបតីអាល្លឺម៉ង់លោក Olaf Scholz បានស្វាគមន៍គម្រោងជំនួបរវាងអធិការបតីអូទ្រីសលោក Karl Nehammer និងប្រធានាធិបតីរុស្ស៊ីលោក Vladimir Putin នៅក្នុងរដ្ឋធានីមូស្គូ ប្រទេសរុស្ស៊ីនៅថ្ងៃចន្ទនេះ និងគាំទ្រកិច្ចប្រឹងប្រែងការទូតណាមួយដែលអាចកើតចេញពីជំនួបនេះដើម្បីបញ្ចប់សង្គ្រាមនៅក្នុងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- អធិការបតីអូទ្រីសលោក Karl Nehammer នៅថ្ងៃចន្ទនេះនឹងក្លាយជាមេដឹកនាំដំបូងគេបង្អស់មកពីទ្វីបអឺរ៉ុបដែលធ្វើទស្សនកិច្ចទៅកាន់ទីក្រុងមូស្គូ ប្រទេសរុស្ស៊ី តាំងពីពេលដែលរុស្ស៊ីបានឈ្លានពានអ៊ុយក្រែនមក។ លោក Nehammer បាននិយាយថា លោកនឹងជួបជាមួយនឹងប្រធានាធិបតីរុស្ស៊ីលោក Vladimir Putin និងគ្រោងលើក ឡើងអំពីការចោទប្រកាន់រឿងឧក្រិដ្ឋកម្មសង្គ្រាមដែលកើតឡើងនៅក្នុងតំបន់រងការបំផ្លិចបំផ្លាញនានានៅជុំវិញរដ្ឋធានីកៀវនៃប្រទេសអ៊ុយក្រែន ដែលរុស្ស៊ីបានកាន់កាប់ក្នុងពេលឈ្លានពាននោះ ដែលក្នុងនោះរួមមានទាំងក្រុង Bucha ផងដែរ។ នេះបើយោងតាមទីភ្នាក់ងារព័ត៌មាន AFP។
- រដ្ឋាភិបាលរុស្ស៊ីបានបញ្ជាក់នៅថ្ងៃចន្ទនេះថា ប្រសិនបើប្រទេសស៊ុយអែតនិងប្រទេសហ្វាំងឡង់ចូលជាសមាជិករបស់អង្គការអូតង់ (NATO) នោះទ្វីបអឺរ៉ុបនឹងមិនមានស្ថិរ ភាពនោះទេ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានតាមវីដេអូអនឡាញ នៅពេលគេសួរអំពីលទ្ធភាពរបស់ស៊ុយអែតនិងហ្វាំង ឡង់នៅក្នុងការចូលជាសមាជិកអង្គការអូតង់ថា៖ «យើងបានបញ្ជាក់ម្ដងហើយម្ដងទៀតថា អង្គការអូតង់នៅតែជាឧបករណ៍ដែលសំដៅឆ្ពោះទៅរកការប្រឈមមុខដាក់គ្នា ហើយការបង្កើនសមាជិកភាពណាមួយរបស់អង្គការនេះនឹងមិននាំឱ្យមានស្ថិរភាពសម្រាប់ទ្វីបអឺរ៉ុបនោះឡើយ»។ នេះបើយោងតាមទីភ្នាក់ងារព័ត៌មាន Reuters។
- សារព័ត៌មានThe Times របស់ចក្រភពអង់គ្លេស បានរាយការណ៍នៅថ្ងៃចន្ទនេះ ដោយយោងលើមន្ត្រីនានាថា ប្រទេសរុស្ស៊ីបានធ្វើ «កំហុសផ្នែកយុទ្ធសាស្ត្រដ៏ធំ» មួយ ដោយសារតែប្រទេសហ្វាំងឡង់និងប្រទេសស៊ុយអែតមានបំណងត្រៀមចូលជាសមា ជិករបស់អង្គការអូតង់ (NATO) នៅរដូវក្ដៅខាងមុខនេះ។ មន្ត្រីសហរដ្ឋអាមេរិកបាននិយាយថា សមាជិកភាពរបស់អង្គការអូតង់សម្រាប់ប្រទេសទាំងពីរគឺជាប្រធានបទនៃការពិភាក្សានៅក្នុងជំនួបរវាងរដ្ឋមន្ត្រីការបរទេសនៃបណ្ដាប្រទេសជាសមាជិកអង្គការអូតង់កាលពីសប្ដាហ៍មុន ដែលមានការចូលរួមផងដែរពីប្រទេសស៊ុយអែតនិងប្រទេសហ្វាំងឡង់។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអ៊ុយក្រែនលោក Dmytro Kuleba បានព្រមាននៅថ្ងៃចន្ទនេះថា ប្រទេសរុស្ស៊ីអាចសំដៅលើ «ប្រព័ន្ធផ្សព្វផ្សាយបរទេសនិងអ្នកនយោបាយបរទេស» តាមរយៈយុទ្ធនាការប្រឌិតព័ត៌មាន ដោយផ្ដោតលើទណ្ឌកម្មដែលដាក់លើខ្លួននិងលើការផ្គត់ផ្គង់សព្វាវុធដែលក្រុមបស្ចិមប្រទេសជួយដល់អ៊ុយក្រែន។ លោក Kuleba បានជំរុញអ្នកនយោបាយបស្ចិមប្រទេសកុំឱ្យ «ធ្លាក់ចូលក្នុងអន្ទាក់យុទ្ធនាការនេះ»។
- ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃចន្ទនេះថា កងទ័ពរុស្ស៊ីបានបន្តបាញ់ផ្លោងដាក់តំបន់Donetskនិងតំបន់Luhanskនៅភាគខាងកើតប្រទេសអ៊ុយ ក្រែន និងថា កងទ័ពអ៊ុយក្រែនបាន «វាយរុញច្រានទៅវិញជាច្រើនដងដោយធ្វើឱ្យរថក្រោះ រថយន្ត និងកាំភ្លើងធំរបស់រុស្ស៊ីរងការបំផ្លាញ»។
- ក្រុមហ៊ុន Gazprom ដែលជាក្រុមហ៊ុនផលិតឧស្ម័នរបស់រដ្ឋាភិបាលរុស្ស៊ី បានបន្តផ្គត់ផ្គង់ឧស្ម័នធម្មជាតិទៅកាន់ទ្វីបអឺរ៉ុបតាមរយៈប្រទេសអ៊ុយក្រែននៅថ្ងៃចន្ទនេះ ស្របតាមសំណើរបស់អតិថិជននៅអឺរ៉ុប។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ដែលយោងលើទីភ្នាក់ងារព័ត៌មាន Interfax របស់រុស្ស៊ី។
- រដ្ឋាភិបាលនូវែលសេឡង់បានបញ្ជាក់នៅថ្ងៃចន្ទនេះថា ខ្លួននឹងបញ្ជូនយន្តហោះយោធា C-130 Hercules និងបុគ្គលិក៥៨នាក់ទៅកាន់ទ្វីបអឺរ៉ុបដើម្បីជួយគាំទ្រប្រទេសអ៊ុយក្រែនប្រឆាំងនឹងការឈ្លានពានរបស់ប្រទេសរុស្ស៊ី។ រដ្ឋមន្ត្រីការពារជាតិនូវែលសេឡង់លោក Peeni Henare បាននិយាយនៅក្នុងសេចក្ដីថ្លែងការណ៍មួយថា ក្រុមនេះនឹងធ្វើដំណើរនៅទូទាំងទ្វីបអឺរ៉ុបដើម្បីដឹកជញ្ជូនបរិក្ខារនិងគ្រឿងផ្គត់ផ្គង់នានាទៅកាន់មណ្ឌលចែកចាយ ប៉ុន្តែនឹងមិនចូលទៅក្នុងប្រទេសអ៊ុយក្រែននោះទេ។ រដ្ឋាភិបាលនូវែលសេឡង់ក៏បានបញ្ជាក់ផងដែរថា ខ្លួននឹងបរិច្ចាគថវិកាចំនួន៩លានដុល្លារអាមេ រិកបន្ថែមទៀតសម្រាប់ការផ្គត់ផ្គង់ផ្នែកយោធា ច្បាប់ និងសិទ្ធិមនុស្ស។ នេះបើយោងតាមទីភ្នាក់ងារព័ត៌មាន Reuters។
២២:២២
១២.៤.២០២២
ថ្ងៃអង្គារ ទី ១២ ខែមេសា៖
- ប្រធានាធិបតីរុស្ស៊ីលោក Vladimir Putin បាននិយាយនៅថ្ងៃអង្គារនេះថា ការទាមទាររបស់ប្រទេសអ៊ុយក្រែនម្ដងអ៊ីចេះម្ដងអ៊ីចុះគឺធ្វើឱ្យយឺតយ៉ាវដល់ការចរចាដើម្បីបញ្ចប់ប្រតិបត្តិការយោធារបស់រុស្ស៊ីនៅអ៊ុយក្រែន។ លោក Putin បានបញ្ជាក់នៅក្នុងសន្និសីទកាសែតមួយ បន្ទាប់ពីបានធ្វើទស្សនកិច្ចទៅកាន់កន្លែងបង្ហោះយានអវកាសមួយកន្លែងនៅភាគខាងកើតបំផុតនៃប្រទេសរុស្ស៊ីថា៖ «កាលពីម្សិលមិញ ភាគីអ៊ុយក្រែនបានកែប្រែការទាមទារម្ដងទៀតហើយ។ ភាពមិនស៊ីសង្វាក់គ្នានៃចំណុចសំខាន់ៗទាំងនេះបានបង្កើតឱ្យមានការលំបាកមួយចំនួននៅក្នុងការសម្រេចឱ្យបានការព្រមព្រៀងចុងក្រោយ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីរុស្ស៊ីលោក Vladimir Putin បាននិយាយនៅថ្ងៃអង្គារនេះថា អតិផរណានិងការកើនឡើងនៃតម្លៃម្ហូបអាហារនិងប្រេងឥន្ធនៈនៅក្នុងបណ្ដាបស្ចិមប្រទេសនឹងចាប់ផ្ដើមដាក់សម្ពាធលើអ្នកនយោបាយនៅទីនោះ។ លោក Putin បានបញ្ជាក់អំពីការប្រឈមមុខរបស់រុស្ស៊ីជាមួយនឹងក្រុមបស្ចិមប្រទេសទាក់ទិននឹងរឿងអ៊ុយក្រែនថា ពេលវេលានឹងធ្វើឱ្យអ្វីៗដំណើរការទៅតាមលំនាំរបស់វា។ នេះបើយោងតាមទីភ្នាក់ងារព័ត៌មាន Reuters។
- អតីតប្រធានាធិបតីសហរដ្ឋអាមេរិកលោក Barack Obama បានបញ្ជាក់នៅក្នុងកិច្ចសម្ភាសន៍មួយដែលផ្សាយនៅក្នុងកម្មវិធី «Today» របស់ទូរទស្សន៍ NBC ថា ប្រធានាធិបតីរុស្ស៊ីលោក Vladimir Putin កំពុងធ្វើសកម្មភាពក្នុងឥរិយាបថថ្មីបែបមិនប្រយ័ត្នប្រយែងទាក់ទិននឹងការឈ្លានពានលើអ៊ុយក្រែន។ លោក Obama បញ្ជាក់ដូច្នេះថា៖ «លោក Putin គឺជាមនុស្សគ្មានមេត្តាចំពោះប្រជាពលរដ្ឋរបស់ខ្លួនក៏ដូចជាចំពោះអ្នកដទៃ»។ នេះបើយោងតាមបណ្ដាញព័ត៌មាន CNN។
- កងកម្លាំងព្រំដែនអ៊ុយក្រែនបាននិយាយនៅថ្ងៃអង្គារនេះថា មនុស្សជាង ៨៧០.០០០ នាក់ ដែលបានភៀសខ្លួនទៅបរទេសតាំងពីសង្គ្រាមបានចាប់ផ្ដើមមក បានត្រឡប់មកកាន់ប្រទេសអ៊ុយក្រែនវិញ ដែលក្នុងនោះមានទាំងស្ត្រីនិងកុមារក្នុងចំនួនកាន់តែច្រើនផងដែរ។ លោក Andriy Demchenko អ្នកនាំពាក្យកងកម្លាំងព្រំដែនអ៊ុយក្រែន បានបញ្ជាក់ថា នៅពេលបច្ចុប្បន្ននេះ ពលរដ្ឋអ៊ុយក្រែនចំនួនពី ២៥.០០០ នាក់ទៅ ៣០.០០០ នាក់ បានត្រឡប់មកកាន់ប្រទេសវិញជារៀងរាល់ថ្ងៃ។ នេះបើយោងតាមទីភ្នាក់ងារព័ត៌មាន AFP។
- មន្ត្រីជាន់ខ្ពស់ផ្នែកការពារជាតិមួយរូបរបស់សហរដ្ឋអាមេរិកបាននិយាយនៅថ្ងៃអង្គារនេះថា សហរដ្ឋអាមេរិកមិនអាចបញ្ជាក់នៅពេលនេះថាពិតប្រាកដឬក៏យ៉ាងណានោះទេអំពីករណីដែលថាមានការប្រើសារធាតុគីមីនៅក្នុងការវាយប្រហារក្នុងទីក្រុង Mariupol របស់អ៊ុយក្រែន។ មន្ត្រីដែលថ្លែងក្នុងលក្ខខណ្ឌមិនបញ្ចេញឈ្មោះនោះបានប្រាប់អ្នកកាសែតថា៖ «យើងមិនអាចបញ្ជាក់យ៉ាងណានៅឡើយទេនៅពេលនេះអំពីករណីដែលថាមានការប្រើសារធាតុគីមីនេះ»។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអូស្ត្រាលីលោកស្រី Marise Payne បាននិយាយនៅថ្ងៃអង្គារនេះថា ប្រទេសអូស្ត្រាលីនឹងស៊ើបអង្កេតលើសេចក្ដីរាយការណ៍ដែលថាសារធាតុគីមីអាចត្រូវបានប្រើនៅក្នុងការវាយប្រហារលើអ៊ុយក្រែន។ លោកស្រីបានហៅសេចក្ដីរាយការណ៍អំពីរឿងនេះថាជា «ការព្រួយបារម្ភយ៉ាងខ្លាំង» និងបាននិយាយថា ប្រទេសអូស្ត្រាលីនឹងធ្វើការជាមួយសមភាគីរបស់ខ្លួនដើម្បីផ្ទៀងផ្ទាត់សេចក្ដីរាយការណ៍ទាំងនេះ។ នេះបើយោងតាមបណ្ដាញព័ត៌មាន CNN។
- លោក Vadym Boichenko អភិបាលក្រុង Mariupol បាននិយាយនៅថ្ងៃអង្គារនេះថា ការប៉ាន់ប្រមាណថ្មីចុងក្រោយបង្អស់គឺថា ជនស៊ីវិលប្រហែល ២១.០០០ នាក់នៃទីក្រុង Mariupol ត្រូវបានសម្លាប់ តាំងពីពេលដែលរុស្ស៊ីបានឈ្លានពានមក។ នៅក្នុងការលើកឡើងមួយដែលផ្សាយតាមទូរទស្សន៍ លោក Boichenko ថា វាមានការពិបាកនៅក្នុងការគណនាចំនួនពិតប្រាកដនៃអ្នកស្លាប់និងរងរបួស តាំងពីការវាយប្រយុទ្ធគ្នានៅតាមដងផ្លូវបានចាប់ផ្ដើមមក។ នេះបើយោងតាមទីភ្នាក់ងារព័ត៌មាន Reuters។
- លោក Anatoliy Fedoruk អភិបាលក្រុង Bucha ដែលជាក្រុងនៅជិតរដ្ឋធានីកៀវ ប្រទេសអ៊ុយក្រែន បាននិយាយនៅថ្ងៃអង្គារនេះថា កន្លងមក អាជ្ញាធរបានរកឃើញសាកសព ៤០៣ នាក់ ដែលពួកគេជឿថាត្រូវបានសម្លាប់ដោយកងទ័ពរុស្ស៊ីក្នុងអំឡុងពេលរុស្ស៊ីត្រួតត្រាក្រុងនោះ។ នេះបើយោងតាមទីភ្នាក់ងារព័ត៌មាន Reuters។
- រដ្ឋាភិបាលអ៊ុយក្រែនបានបញ្ជាក់នៅថ្ងៃអង្គារនេះថា ខ្លួនបានរារាំងការប៉ុនប៉ងរបស់ជនរុស្ស៊ីដែលចង់លួចចូលប្រព័ន្ធកុំព្យូទ័រអ៊ុយក្រែនដើម្បីបំផ្លាញបណ្ដាញអគ្គិសនីរបស់អ៊ុយក្រែនកាលពីសប្ដាហ៍មុន។ លោក Victor Zhora អ្នកនាំពាក្យរដ្ឋាភិបាលអ៊ុយក្រែនបាននិយាយថា៖ «ក្រុមនេះគឺក្រុមលួចចូលប្រព័ន្ធកុំព្យូទ័របែបយោធា។ គោលបំណងរបស់ពួកគេគឺដើម្បីបង្អាក់ដំណើរការរបស់កន្លែងមួយចំនួន ដែលរួមមានទាំងស្ថានីយចែកចាយអគ្គិសនីបន្តផងដែរ»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីរុស្ស៊ីលោក Vladimir Putin បានព្រមានក្រុមបស្ចិមប្រទេសនៅថ្ងៃអង្គារនេះថា ការប៉ុនប៉ងនៅក្នុងការធ្វើឱ្យរុស្ស៊ីនៅឯកោនឹងទទួលបរាជ័យ។ លោកព្រមានដូចនេះដោយលើកយកជោគជ័យរបស់កម្មវិធីដែនអវកាសរបស់សូវៀតមកធ្វើជាភស្តុតាងថា រុស្ស៊ីអាចសម្រេចបាននូវការលោតផ្លោះដ៏អស្ចារ្យឆ្ពោះទៅមុខនៅក្នុងស្ថាន ភាពយ៉ាប់យ៉ឺន។ លោក Putin និយាយដូច្នេះថា៖ «ការដាក់ទណ្ឌកម្មគឺមានគ្រប់យ៉ាង ការកាត់ផ្ដាច់រុស្ស៊ីឱ្យនៅឯកោគឺធ្វើឡើងរួចរាល់ហើយ ប៉ុន្តែសហភាពសូវៀតនៅតែនាំមុខផ្នែកអវកាស»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវនៅថ្ងៃអង្គារនេះឱ្យសហភាពអឺរ៉ុបដាក់ទណ្ឌកម្មលើធនាគារទាំងអស់និងប្រេងឥន្ធនៈរបស់ប្រទេសរុស្ស៊ីនិងឱ្យដាក់កាលបរិច្ឆេទកំណត់ដើម្បីបញ្ឈប់ការនាំចូលឧស្ម័នពីប្រទេសរុស្ស៊ី។ លោកលើកឡើងដូច្នេះនៅក្នុងការថ្លែងរបស់លោកទៅកាន់សភាប្រទេសលីទុយអានី។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីរុស្ស៊ីលោក Vladimir Putin បាននិយាយនៅថ្ងៃអង្គារនេះថា ប្រតិបត្តិការយោធារបស់រុស្ស៊ីនៅក្នុងប្រទេសអ៊ុយក្រែននឹងសម្រេចបានយ៉ាងពិតប្រាកដតាមគោលបំណង «ដ៏ខ្ពង់ខ្ពស់» របស់ខ្លួន។ ទីភ្នាក់ងារព័ត៌មាននានារបស់រុស្ស៊ីបានដកស្រង់សម្ដីរបស់លោក Putin ដែលថ្លែងនៅក្នុងពិធីប្រគល់រង្វាន់មួយនៅកីឡដ្ឋាន Vostochny Cosmodrome នៅភាគខាងកើតបំផុតនៃប្រទេសរុស្ស៊ីថា រដ្ឋាភិបាលរុស្ស៊ីគ្មានជម្រើសអ្វីផ្សេងក្រៅពីការបើកប្រតិបត្តិការយោធាដើម្បីការពារប្រទេសរុស្ស៊ីនោះទេ និងថា ការប៉ះទង្គិចគ្នាជាមួយនឹងកងទ័ពអ៊ុយក្រែនគឺជារឿងដែលមិនអាចចៀសរួច។ នេះបើយោងតាមទីភ្នាក់ងារព័ត៌មាន Reuters។
- មេដឹកនាំលេខាធិការដ្ឋានកងទ័ពជើងគោករបស់ចក្រភពអង់គ្លេសលោក James Heappey បាននិយាយនៅថ្ងៃអង្គារនេះថា ជម្រើសទាំងអស់នឹងលើកយកមកពិភាក្សាដើម្បីឆ្លើយតបទៅនឹងការប្រើប្រាស់របស់រុស្ស៊ីនូវអាវុធគីមីណាមួយនៅក្នុងប្រទេសអ៊ុយក្រែន។ កាលពីថ្ងៃចន្ទ រដ្ឋមន្ត្រីការបរទេសចក្រភពអង់គ្លេសអ្នកស្រី Liz Truss បានបញ្ជាក់ថា ចក្រភពអង់គ្លេសកំពុងធ្វើការជាមួយនឹងដៃគូរបស់ខ្លួនដើម្បីផ្ទៀងផ្ទាត់ព័ត៌មានលម្អិតនៃសេចក្ដីរាយការណ៍ដែលថា កងទ័ពរុស្ស៊ីប្រហែលជាបានប្រើសារធាតុគីមីនៅក្នុងការវាយប្រហារលើទីក្រុង Mariupol របស់អ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- លោក Eduard Basurin អ្នកនាំពាក្យរបស់ក្រុមផ្ដាច់ខ្លួនដែលគាំទ្រដោយរុស្ស៊ីនៅភាគខាងកើតប្រទេសអ៊ុយក្រែនបានបដិសេធថាខ្លួនមិនបានប្រើអាវុធគីមីដើម្បីវាយប្រហារលើកងទ័ពអ៊ុយក្រែននៅក្នុងទីក្រុង Mariupol នោះទេ។ នេះបើយោងតាមទីភ្នាក់ងារព័ត៌មានAssociated Press។ ទីភ្នាក់ងារព័ត៌មាន Interfax របស់រុស្ស៊ីបានស្រង់សម្ដីរបស់លោក Basurin ដែលបាននិយាយនៅថ្ងៃអង្គារនេះថា កងកម្លាំងក្រុមផ្ដាច់ខ្លួន «មិនបានប្រើអាវុធគីមីណាមួយនៅក្នុងទីក្រុង Mariupol នោះឡើយ»។ កងយោធាអ៊ុយក្រែនដែលការពារទីក្រុង Mariupol បានអះអាងដោយមិនបានផ្ដល់ភស្តុតាងថា ដ្រូនមួយគ្រឿងបានទម្លាក់សារធាតុពុលលើទីតាំងរបស់ខ្លួន ប៉ុន្តែមិនបានបង្កឱ្យមានការរងរបួសអ្វីធ្ងន់ធ្ងរនោះទេ។ នេះបើយោងតាមទីភ្នាក់ងារព័ត៌មាន Associated Press។
- នាយខុទ្ទកាល័យគណៈរដ្ឋមន្ត្រីជប៉ុនលោក Hirokazu Matsuno បាននិយាយថា រដ្ឋាភិ បាលជប៉ុនមានការព្រួយបារម្ភអំពីករណីដែលអាចមានការប្រើអាវុធនុយក្លេអ៊ែរនៅក្នុងសង្គ្រាមនៅអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។ លោកបានបញ្ជាក់នៅក្នុងសន្និសីទកាសែតមួយដូច្នេះថា៖ «យើងមានការព្រួយបារម្ភយ៉ាងខ្លាំងអំពីករណីដែលអាចមានការប្រើអាវុធនុយក្លេអ៊ែរនៅក្នុងអំឡុងពេលនៃការឈ្លានពានរបស់រុស្ស៊ីលើអ៊ុយក្រែន»។
- គណៈប្រតិភូមកពីរដ្ឋាភិបាលចម្រុះនៃប្រទេសអាល្លឺម៉ង់បានបំពេញទស្សនកិច្ចទៅកាន់ប្រទេសអ៊ុយក្រែននៅថ្ងៃអង្គារនេះ។ នេះបើយោងតាមប្រភពមួយដែលប្រាប់ទីភ្នាក់ងារព័ត៌មាន AFP។ អ្នកស្រី Marie-Agnes Strack Zimmermann នៃគណបក្សប្រជាធិបតេយ្យសេរីនិយម (FDP) លោក Michael Roth នៃគណបក្សប្រជាធិបតេយ្យសង្គមនិយម (SDP) និងលោក Anton Hofreiter នៃគណបក្សបៃតង (Green Party) បានជួបជាមួយនឹងសមាជិកសភាអ៊ុយក្រែននៅភាគខាងលិចប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
- អង្គការពាណិជ្ជកម្មពិភពលោក (WTO) បានព្រមាននៅថ្ងៃអង្គារនេះថា សង្គ្រាមរបស់រុស្ស៊ីនៅក្នុងប្រទេសអ៊ុយក្រែនបានធ្វើឱ្យអាប់អួរដល់ក្ដីរំពឹងសម្រាប់ពាណិជ្ជកម្មពិភពលោក។ អង្គការនេះបានបញ្ជាក់ថា សង្គ្រាមនេះនឹងបំផ្លាញការរីកចម្រើនរបស់ពាណិជ្ជកម្មនៅលើពិភពលោកនៅក្នុងឆ្នាំនេះ និងធ្វើឱ្យការរីកចម្រើនរបស់ផលិផលក្នុងស្រុកសរុប (GDP) ធ្លាក់ចុះ។ នេះបើយោងតាមទីភ្នាក់ងារព័ត៌មាន AFP។
- អង្គការសហប្រជាជាតិបានបញ្ជាក់នៅថ្ងៃអង្គារនេះថា ពលរដ្ឋអ៊ុយក្រែនជាង ៤ លាន ៦ សែននាក់បានភៀសខ្លួនពីសង្គ្រាមនៅអ៊ុយក្រែន។ ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានលើកឡើងថា ពលរដ្ឋអ៊ុយក្រែន ៤.៦១៥.៨៣០ នាក់បានភៀសខ្លួនពីប្រទេសតាំងពីពេលដែលរុស្ស៊ីបានឈ្លានពានកាលពីថ្ងៃទី ២៤ ខែកុម្ភៈមក ដែលមានការកើនឡើងចំនួន ៦៨.០៩៥ នាក់ បើធៀបជាមួយនឹងតួលេខកាលពីថ្ងៃចន្ទ។ នេះបើយោងតាមទីភ្នាក់ងារព័ត៌មាន AFP។
- លោកនាយឧត្តមនាវី Rob Bauer ដែលជាប្រធានគណៈកម្មាធិការយោធារបស់អង្គការអូតង់(NATO) បាននិយាយនៅថ្ងៃអង្គារនេះថា វាគឺជាសិទ្ធិអធិបតេយ្យរបស់ប្រទេសនានាដូចជាស៊ុយអែតនិងហ្វាំងឡង់ជាដើមនៅក្នុងការសម្រេចថាតើពួកគេចង់ចូលជាសមាជិកអង្គការអូតង់ឬក៏អត់។ នេះបើយោងតាមទីភ្នាក់ងារព័ត៌មាន Reuters។ លោក Bauer បានថ្លែងទៅកាន់អ្នកសារព័ត៌មាននៅក្នុងទីក្រុងសេអ៊ូល ប្រទេសកូរ៉េខាងត្បូងថា អង្គការអូតង់មិនមែនជាអង្គការដែលទាមទារនោះទេ និងមិនបានដាក់សម្ពាធលើប្រទេសណាមួយឱ្យចូលជាសមាជិករបស់ខ្លួន ឬផ្ដល់សព្វាវុធដល់ប្រទេសអ៊ុយក្រែននោះឡើយ។
- ការវាយប្រយុទ្ធនៅភាគខាងកើតប្រទេសអ៊ុយក្រែននឹងកើនឡើងកាន់តែខ្លាំងនៅក្នុងរយៈពេលពីរទៅបីសប្ដាហ៍ខាងមុខ ដោយសារតែរុស្ស៊ីបន្តផ្ដោតប្រតិបត្តិការរបស់ខ្លួនឡើងវិញនៅទីនោះ។ នេះបើយោងតាមការបញ្ជាក់នៅលើ Twitter របស់ក្រសួងការពារជាតិចក្រភពអង់គ្លេសនៅក្នុងការជូនដំណឹងប្រចាំថ្ងៃរបស់ខ្លួនអំពីការស៊ើបការណ៍សម្ងាត់នៅសមរភូមិនៅថ្ងៃអង្គារនេះ។
- មេដឹកនាំសាសនាមួយក្រុមនឹងធ្វើទស្សនកិច្ចទៅកាន់ប្រទេសអ៊ុយក្រែននៅថ្ងៃអង្គារនេះ ដើម្បីបង្ហាញការគាំទ្រដល់ពលរដ្ឋដែលរងគ្រោះដោយសារសង្គ្រាម។ គណៈប្រតិភូនេះមានដូចជាព្រះសង្ឃ មេដឹកនាំសាសនាជ្វីហ្វ បព្វជិតឥស្លាម មេដឹកនាំសាសនាព្រះពុទ្ធ មេដឹកនាំសាសនាហិណ្ឌូ និងអតីតមេដឹកនាំព្រះវិហារគ្រិស្ដសាសនាអង់គ្លេស Canterbury លោក Rowan Williams។ នេះបើយោងតាមសេចក្ដីរាយការណ៍របស់បណ្ដាញព័ត៌មាន BBC។ ក្រុមនេះនឹងជួបជាមួយនឹងជនផ្លាស់ទីដោយបង្ខំនៅក្នុងប្រទេសអ៊ុយក្រែន ដែលរត់គេចពីសង្គ្រាមនៅភាគខាងកើតប្រទេសទៅទីក្រុង Chernivtsi នៅភាគខាងលិចប្រទេស។
- ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីឥណ្ឌាលោក Narendra Modi មាន «ការផ្ដោះប្ដូរទស្សនៈគ្នាដោយស្មោះត្រង់» អំពីសង្គ្រាមនៅអ៊ុយ ក្រែន នៅក្នុងជំនួបតាមអនឡាញកាលពីថ្ងៃចន្ទ។ រដ្ឋមន្ត្រីការបរទេសអាមេរិកលោក Antony Blinken បានប្រាប់អ្នកកាសែតបន្ទាប់ពីជំនួបតាមអនឡាញនេះបានបញ្ចប់ទៅថា៖ «វាជាការសំខាន់ដែលប្រទេសទាំងអស់ ជាពិសេសប្រទេសដែលមានឥទ្ធិពលមានប្រៀប ដាក់សម្ពាធលើ [ប្រធានាធិបតីរុស្ស៊ី] លោក Putin ឱ្យបញ្ចប់សង្គ្រាម»។ នេះបើយោងតាមទីភ្នាក់ងារព័ត៌មាន AFP។
- អ្នកស្រី Sima Bahous ប្រធានអង្គការស្ត្រីអង្គការសហប្រជាជាតិ បាននិយាយកាលពីថ្ងៃចន្ទថា មានសេចក្ដីរាយការណ៍កាន់តែច្រើនថាមានករណីចាប់រំលោភនិងអំពើហិង្សាផ្លូវភេទធ្វើឡើងលើស្ត្រីនិងកុមារនៅក្នុងប្រទេសអ៊ុយក្រែន។ អ្នកស្រីបានបន្ថែមថា ការចោទប្រកាន់ទាំងនេះត្រូវតែស៊ើបអង្កេត។ នេះបើយោងតាមបណ្ដាញព័ត៌មាន CNN។
២៣:១៤
១៣.៤.២០២២
ថ្ងៃពុធ ទី ១៣ ខែមេសា៖
- រដ្ឋាភិបាលរុស្ស៊ីបានបញ្ជាក់នៅថ្ងៃពុធនេះថា ខ្លួនជំទាស់យ៉ាងដាច់អហង្ការចំពោះការលើកឡើងរបស់ប្រធានាធិបតីសហរដ្ឋអាមេរិកលោក Joe Biden ដែលថា សកម្មភាពរបស់រុស្ស៊ីនៅក្នុងប្រទេសអ៊ុយក្រែនគឺជា «អំពើប្រល័យពូជសាសន៍» និងបានចោទប្រកាន់រដ្ឋាភិបាលសហរដ្ឋអាមេរិកថាបានបន្លំលាក់ពុត។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅក្នុងសន្និសីទកាសែតតាមអនឡាញថា៖ «យើងចាត់ទុកការប្រឹងប្រែងដើម្បីបង្វែរស្ថានការណ៍បែបនេះថាមិនអាចទទួលយកបាន»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីប៉ូឡូញនិងប្រធានាធិបតី ៣ រូបផ្សេងទៀតនៃប្រទេសនៅតំបន់បាល់ទិក បានធ្វើទស្សនកិច្ចនៅថ្ងៃពុធនេះទៅកាន់ក្រុង Borodyanka ដែលស្ថិតនៅមិនឆ្ងាយប៉ុន្មានពីរដ្ឋធានីកៀវ ប្រទេសអ៊ុយក្រែន។ ប្រធានាធិបតីលីទុយអានីលោក Gitanas Nauseda បានបញ្ជាក់នៅក្នុងសេចក្ដីថ្លែងការណ៍មួយថា៖ «វាជាការពិបាកនៅក្នុងការជឿថា អំពើសាហាវយង់ឃ្នងនៃសង្គ្រាមដូចនេះអាចធ្វើឡើងនៅក្នុងទ្វីបអឺរ៉ុបនាសតវត្សរ៍ទី ២១ នេះ ប៉ុន្តែនេះគឺជាការពិត។ នេះគឺជាសង្គ្រាមដែលយើងត្រូវតែឈ្នះ»។ លោកបានបន្ថែមថា៖ «កន្លែងនេះពោរពេញដោយភាពឈឺចាប់និងភាពរងទុក្ខ។ ពលរដ្ឋអ៊ុយក្រែនត្រូវបានសម្លាប់និងធ្វើទារុណកម្មនៅទីនេះ ហើយផ្ទះសម្បែងស្នាក់នៅនិងហេដ្ឋារចនាសម្ព័ន្ធស៊ីវិលផ្សេងទៀតបានរងការទម្លាក់គ្រាប់បែក»។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
- រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen នៅថ្ងៃពុធនេះបានអំពាវនាវដល់ប្រទេសចិននិងប្រទេសផ្សេងទៀតឱ្យជួយបញ្ចប់ «សង្គ្រាមដ៏ឃោរឃៅ» របស់រុស្ស៊ីនៅអ៊ុយក្រែន។ លោកស្រីបានថ្លែងនៅក្នុងព្រឹត្តិការណ៍មួយដែលរៀបចំដោយអង្គការ Atlantic Council ថា លោកស្រីសង្ឃឹម «យ៉ាងមុតមាំ» ថា ប្រទេសចិននឹងអាចទាញប្រយោជន៍បែបវិជ្ជមានពី «ទំនាក់ទំនងពិសេស» របស់ខ្លួនជាមួយនឹងរុស្ស៊ី និងបាននិយាយថា ឋានៈរបស់ចិននៅលើពិភពលោកនឹងរងគ្រោះ ប្រសិនបើចិនបរាជ័យមិនបានធ្វើដូច្នេះ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen បាននិយាយនៅថ្ងៃពុធនេះថា ការរីកចម្រើនសេដ្ឋកិច្ចនៅលើពិភពលោកនឹងរងការប៉ះពាល់ដោយសារសង្គ្រាមរបស់រុស្ស៊ីនៅអ៊ុយក្រែន។ លោកស្រីបានកត់សម្គាល់ថា សង្គ្រាមនេះបានធ្វើឱ្យតម្លៃម្ហូបអាហារ ថាមពល និងលោហធាតុឡើងខ្លាំង ដោយបន្ថែមលើសម្ពាធអតិផរណាដែលមានស្រាប់។ អ្នកស្រីបានថ្លែងនៅក្នុងព្រឹត្តិការណ៍មួយដែលរៀបចំដោយអង្គការ Atlantic Council ថា «សង្គ្រាមនេះទំនងជានឹងប៉ះពាល់ដល់ការរីកចម្រើននៅលើពិភពលោក» និងបានបន្ថែមថា អ្នកស្រីព្រួយបារម្ភថាវិបត្តិសេដ្ឋកិច្ចអាចកើតឡើងនៅអឺរ៉ុប។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
- រដ្ឋមន្ត្រីហិរញ្ញវត្ថុសហរដ្ឋអាមេរិកអ្នកស្រី Janet Yellen បាននិយាយនៅថ្ងៃពុធនេះថា ប្រទេសណាដែលស្វែងរកផលប្រយោជន៍ដោយមិនបានថ្កោលទោស «សង្គ្រាមដ៏ឃោរឃៅ» របស់រុស្ស៊ីលើអ៊ុយក្រែន គឺជាប្រទេសដែលមិនបានមើលឃើញវែងឆ្ងាយហើយនឹងប្រឈមនឹងផលវិបាក ប្រសិនបើប្រទេសទាំងនោះធ្វើឱ្យអន្តរាយដល់ទណ្ឌ កម្មរបស់ក្រុមបស្ចិមប្រទេស។ អ្នកស្រីបានបន្ថែមដូច្នេះថា៖ «សូមទុកចិត្តចុះ! ដរាបណា [ប្រធានាធិបតីរុស្ស៊ី] លោក Putin មិនបញ្ចប់សង្គ្រាមដ៏ឃោរឃៅដែលខ្លួនជ្រើសរើសធ្វើនេះទេ រដ្ឋបាលរបស់លោកប្រធានាធិបតី Biden នឹងធ្វើការជាមួយនឹងដៃគូរបស់សហរដ្ឋអាមេរិកដើម្បីរុញប្រទេសរុស្ស៊ីឱ្យកាន់តែឯកោបន្ថែមទៀតទាំងផ្នែកសេដ្ឋកិច្ច ហិរញ្ញវត្ថុនិងយុទ្ធសាស្ត្រ»។ នេះបើយោងតាមទីភ្នាក់ងារព័ត៌មាន Reuters។
- ក្រសួងការពារជាតិរុស្ស៊ីបានបញ្ជាក់នៅថ្ងៃពុធនេះថា ទាហានអ៊ុយក្រែនជាង១.០០០ នាក់ បានចុះចាញ់នៅក្នុងទីក្រុង Mariupol។ ទីក្រុង Mariupol គឺជាទីក្រុងកំពង់ផែយុទ្ធ សាស្ត្រនៅភាគខាងកើតប្រទេសអ៊ុយក្រែនដែលកងទ័ពរុស្ស៊ីបានឡោមព័ទ្ធអស់ជាងមួយខែកន្លងមកហើយ។ ក្រសួងការពារជាតិរុស្ស៊ី បានលើកឡើងនៅក្នុងសេចក្ដីថ្លែង ការណ៍មួយថា៖ «នៅក្នុងទីក្រុង Mariupol... ទាហានអ៊ុយក្រែន ១.០២៦ នាក់នៃកង ពលតូចម៉ារីនលេខ៣៦ បានស្ម័គ្រចិត្តទម្លាក់អាវុធនិងចុះចាញ់»។ នេះបើយោងតាមទីភ្នាក់ងារព័ត៌មាន AFP។
- អង្គការយូណេស្កូ (UNESCO) បានបញ្ជាក់នៅថ្ងៃពុធនេះថា បូជនីយដ្ឋានវប្បធម៌និងសាសនាជិត១០០ កន្លែងនៅក្នុងប្រទេសអ៊ុយក្រែនបានរងការខូចខាតជាបន្តតាំងពីពេលដែលរុស្ស៊ីបានឈ្លានពានអ៊ុយក្រែននៅថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន AFP។
- របាយការណ៍មួយរបស់អង្គការសន្តិសុខនិងកិច្ចសហប្រតិបត្តិការអឺរ៉ុប (OSCE) ដែលចេញផ្សាយនៅថ្ងៃពុធនេះ បានចោទប្រកាន់ប្រទេសរុស្ស៊ីថាបាន «រំលោភលើច្បាប់មនុស្សធម៌អន្តរជាតិក្នុងទម្រង់យ៉ាងច្បាស់» នៅក្នុងប្រទេសអ៊ុយក្រែន។ របាយការណ៍នេះបានបន្ថែមថា ប្រសិនបើរុស្ស៊ីបានគោរពតាមកាតព្វកិច្ចជាអន្តរជាតិរបស់ខ្លួនបន្ទាប់ពីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក «ចំនួនជនស៊ីវិលដែលត្រូវបានសម្លាប់ឬក៏រងរបួសគឺមានចំនួនតិចជាងនេះច្រើន»។ នេះបើតាមសេចក្តីរាយ ការណ៍របស់ទីភ្នាក់ងារព័ត៌មាន AFP។
- ឯកសារគោលនយោបាយរបស់រដ្ឋាភិបាលហ្វាំងឡង់ដែលចេញផ្សាយនៅថ្ងៃពុធនេះបានបញ្ជាក់ថា ការឈ្លានពានរបស់រុស្ស៊ីលើអ៊ុយក្រែនបានផ្លាស់ប្ដូរយ៉ាងខ្លាំងដល់បរិយាកាសសន្តិសុខរបស់ប្រទេសហ្វាំងឡង់។ នេះបើយោងតាមទីភ្នាក់ងារព័ត៌មាន Reuters។
- លោក Oleksiy Arestovych ទីប្រឹក្សាកំពូលរបស់ប្រធានាធិបតីអ៊ុយក្រែននៅថ្ងៃពុធនេះបាននិយាយថា រដ្ឋាភិបាលអ៊ុយក្រែនចង់ឱ្យអធិការបតីអាល្លឺម៉ង់លោក Olaf Scholz ធ្វើទស្សនកិច្ចនិងសន្យាផ្ដល់សព្វាវុធបន្ថែមទៀត។ ប្រធានាធិបតីអាល្លឺម៉ង់លោក Frank-Walter Steinmeier បានទទួលស្គាល់កាលពីថ្ងៃអង្គារថា លោកបានស្នើធ្វើទស្សនកិច្ចទៅកាន់ប្រទេសអ៊ុយក្រែនជាមួយនឹងមេដឹកនាំផ្សេងទៀតនៅអឺរ៉ុប ប៉ុន្តែរដ្ឋាភិបាលអ៊ុយក្រែនបានប្រាប់លោកថា អ៊ុយក្រែនមិនទាន់ស្វាគមន៍លោកនៅពេលនេះទេ។ ប៉ុន្តែលោក Arestovych បានថ្លែងប្រាប់ទូរទស្សន៍ ZDF របស់អាល្លឺម៉ង់ថា៖ «ខ្ញុំគិតថា ការអះអាងចម្បងគឺខុសពីនេះ។ ប្រធានាធិបតីរបស់យើងរំពឹងឱ្យអធិការបតីអាល្លឺម៉ង់ [លោក Scholz ធ្វើទស្សនកិច្ច] ដូច្នេះលោក Scholz អាចសម្រេចដោយផ្ទាល់និងតាមការប្រតិបត្តិជាក់ស្ដែងដែលក្នុងនោះរួមមានទាំងការផ្ដល់សព្វាវុធផងដែរ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីប៉ូឡូញលោក Andrzej Duda ប្រធានាធិបតីអេស្ដូនីលោក Alar Karis ប្រធានាធិបតីលីទុយអានីលោក Gitanas Nauseda និងប្រធានាធិបតីឡេតូនីលោក Egils Levits បានធ្វើដំណើរទៅរដ្ឋធានីកៀវ ប្រទេសអ៊ុយក្រែនតាមរថភ្លើងនៅថ្ងៃពុធនេះ ដើម្បីបង្ហាញការគាំទ្រចំពោះប្រធានាធិបតីអ៊ុយក្រែនលោក Volodymyr Zelenskyy ប្រឆាំងនឹងការឈ្លានពានរបស់រុស្ស៊ី។ នេះបើតាមការបញ្ជាក់របស់លោក Jakub Kumoch ដែលជាទីប្រឹក្សារបស់ប្រធានាធិបតីប៉ូឡូញ។ លោក Kumoch ថា៖ «គោលបំណងរបស់យើងគឺដើម្បីគាំទ្រ ប្រធានាធិបតីអ៊ុយក្រែនលោក Zelenskyy និងអ្នកការ ពារអ៊ុយក្រែននៅក្នុងស្ថានការណ៍ផ្ដាច់ព្រាត់នេះសម្រាប់ប្រទេសអ៊ុយក្រែន»។ មុនពេលឡើងជិះរថភ្លើង ប្រធានាធិបតីទាំង ៤ រូបបានជួបគ្នានៅក្នុងទីក្រុង Rzeszow ប្រទេសប៉ូឡូញ នៅជិតព្រំដែនប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
- ចក្រភពអង់គ្លេសបានបញ្ជាក់នៅថ្ងៃពុធនេះថា ខ្លួនបានដាក់ទណ្ឌកម្មថ្មីលើបុគ្គល ២០៦នាក់ដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។ ចក្រភពអង់គ្លេសបានបន្ថែមថា ក្នុងចំណោមនោះ បុគ្គល១៧៨ នាក់មានការពាក់ព័ន្ធនៅក្នុងការជួយជ្រោមជ្រែងតំបន់ផ្ដាច់ខ្លួនដែលគាំទ្រដោយរុស្ស៊ីនៅក្នុងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃពុធនេះបានជំរុញបណ្ដាប្រទេសនៅទ្វីបអឺរ៉ុបឱ្យចាត់វិធានការបន្ថែមទៀតប្រឆាំងនឹងរុស្ស៊ី ដោយលោកបានព្រមានថា «យើងអាចបញ្ឈប់រុស្ស៊ី ឬក៏អាចបាត់បង់អឺរ៉ុបខាងកើតទាំងមូលតែម្ដង»។ លោកបានថ្លែងទៅកាន់សភាអេស្ដូនីដូច្នេះថា៖ «ប្រសិនបើអឺរ៉ុបខ្ជះខ្ជាយពេលវេលា រុស្ស៊ីនឹងប្រើពេលវេលានោះដើម្បីពង្រីកតំបន់សង្គ្រាមទៅកាន់ប្រទេសផ្សេងទៀត»។ នេះបើយោងតាមទីភ្នាក់ងារព័ត៌មាន Reuters។
- ប្រធានាធិបតីអ៊ុយក្រែនលោក Volodymyr Zelenskyy បានថ្លែងទៅកាន់សភាអេស្ដូនីនៅថ្ងៃពុធនេះ ដោយជំរុញឱ្យមេដឹកនាំនានាបញ្ឈប់ភាពគឃ្លើនរបស់រុស្ស៊ីតាមរយៈការចាត់វិធានការរួមគ្នា និងបានអំពាវនាវឱ្យមានការបន្តដាក់ទណ្ឌកម្មលើរុស្ស៊ី។ លោក Zelenskyy ថា ការដាក់ទណ្ឌកម្មគឺជាមធ្យោបាយតែមួយគត់ដែលអាចបង្ខំរុស្ស៊ីឱ្យពិចារណាអំពីសន្តិភាពបាន។ នេះបើយោងតាមទីភ្នាក់ងារព័ត៌មាន Reuters។
- អ៊ុយក្រែនបានបញ្ជាក់នៅថ្ងៃពុធនេះថា ខ្លួនបានផ្អាកដំណើរការច្រករបៀងមនុស្សធម៌ទាំងអស់ដែលអនុញ្ញាតឱ្យជនស៊ីវិលភៀសខ្លួនពីតំបន់សង្គ្រាមសម្រាប់ថ្ងៃពុធនេះ ដោយបានចោទប្រកាន់កងទ័ពរុស្ស៊ីថាបានរំលោភលើកិច្ចព្រមព្រៀងច្រករបៀងមនុស្សធម៌នេះ។ ឧបនាយករដ្ឋមន្ត្រីអ៊ុយក្រែនអ្នកស្រី Iryna Vereshchuk បានបញ្ជាក់នៅក្នុងសេចក្ដីថ្លែងការណ៍មួយនៅលើបណ្ដាញសង្គមអនឡាញថា៖ «ជាអកុសល យើងមិនបើកច្រករបៀងមនុស្សធម៌នៅថ្ងៃនេះទេ។ ស្ថានការណ៍នៅតាមផ្លូវគឺមានគ្រោះថ្នាក់ខ្លាំងណាស់ ហើយយើងត្រូវបង្ខំផ្អាកច្រករបៀងមនុស្សធម៌នេះនៅថ្ងៃនេះ»។ នេះបើយោងតាមទីភ្នាក់ងារព័ត៌មាន AFP។
- អនុរដ្ឋមន្ត្រីការពារជាតិអ៊ុយក្រែនអ្នកស្រី Hanna Malyar បាននិយាយនៅថ្ងៃពុធនេះថា មានហានិភ័យខ្ពស់នៃករណីដែលរុស្ស៊ីប្រើអាវុធគីមីប្រឆាំងនឹងប្រទេសអ៊ុយក្រែន។ ការលើកឡើងនេះគឺជាការបន្ទរតាមការព្រមានរបស់ប្រធានាធិបតីអ៊ុយក្រែនលោក Volodymyr Zelenskyy កាលពីដើមសប្ដាហ៍នេះ។ នេះបើយោងតាមទីភ្នាក់ងារព័ត៌ មាន Reuters។ កាលពីថ្ងៃអង្គារ អ្នកស្រី Malyar បាននិយាយថា អាជ្ញាធរកំពុងពិនិត្យលើសេចក្ដីរាយការណ៍ដែលមិនមានការផ្ទៀងផ្ទាត់ដែលថារុស្ស៊ីប្រហែលជាបានប្រើអាវុធគីមីនៅពេលរុស្ស៊ីឡោមព័ទ្ធទីក្រុង Mariupol។
- ប្រធានាធិបតីបារាំងលោក Emmanuel Macron បានបដិសេធនៅថ្ងៃពុធនេះថា លោកនឹងមិននិយាយតាមការចោទប្រកាន់របស់ប្រធានាធិបតីសហរដ្ឋអាមេរិកលោក Joe Biden ដែលថា រុស្ស៊ីបានប្រព្រឹត្តិ «អំពើប្រល័យពូជសាសន៍» លើពលរដ្ឋអ៊ុយក្រែននោះទេ ដោយលោកបានព្រមានថា ការបង្កើនពាក្យសម្ដីខ្លាំងៗនឹងមិនអាចជួយបញ្ចប់សង្គ្រាមនេះបានឡើយ។ លោក Macron បាននិយាយថា វាជាការប្រសើរបំផុតនៅ ក្នុងការ «ប្រយ័ត្នប្រយែង» ជាមួយនឹងការប្រើពាក្យ «ប្រល័យពូជសាសន៍» នៅក្នុងស្ថានភាពនេះ ជាពិសេសដោយសារតែ «ពលរដ្ឋអ៊ុយក្រែននិងពលរដ្ឋរុស្ស៊ីគឺជាពល រដ្ឋដែលមានភាតរភាពជាមួយគ្នា»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
- ប្រធានាធិបតីសហរដ្ឋអាមេរិកលោក Joe Biden កាលពីថ្ងៃអង្គារបានចោទប្រកាន់ជាលើកដំបូងបង្អស់ថា កងកម្លាំងរបស់ប្រធានាធិបតីរុស្ស៊ីលោក Vladimir Putin បានប្រព្រឹត្តិអំពើប្រល័យពូជសាសន៍នៅក្នុងប្រទេសអ៊ុយក្រែន។ លោក Biden បានប្រាប់អ្នកសារព័ត៌មានក្នុងពេលប៉ុន្មានម៉ោងក្រោយមកបន្ទាប់ពីលោកបានប្រើពាក្យ «ប្រ ល័យពូជសាសន៍» នេះនៅក្នុងអំឡុងពេលលោកថ្លែងសុន្ទរកថានៅក្នុងរដ្ឋ Iowa ថា៖ «មែន! ខ្ញុំបានហៅការប្រព្រឹត្តិនោះថាជាអំពើប្រល័យពូជសាសន៍»។ នេះបើយោងតាមទីភ្នាក់ងារព័ត៌មាន AFP។
- ក្រសួងការពារជាតិសហរដ្ឋអាមេរិក នឹងរៀបចំការប្រជុំមួយនៅថ្ងៃពុធនេះជាមួយនឹងក្រុមហ៊ុនផ្នែកការពារជាតិធំៗបំផុតរបស់សហរដ្ឋអាមេរិក ដើម្បីពិភាក្សាអំពីការបំពេញតាមតម្រូវការរបស់ប្រទេសអ៊ុយក្រែនដែលស្នើសុំសព្វាវុធ។ អនុរដ្ឋមន្ត្រីការពារជាតិសហរដ្ឋអាមេរិកអ្នកស្រី Kathleen Hicks បានប្រាប់អ្នកសារព័ត៌មានថា អ្នកស្រីនឹងចូលរួមនៅក្នុងការប្រជុំនេះ។ រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយកាលពីថ្ងៃអង្គារថា សហរដ្ឋអាមេរិកនឹង «បន្តផ្ដល់ជំនួយផ្នែកសន្តិសុខនិងសម្របសម្រួលជាមួយនឹងសម្ព័ន្ធមិត្តនិងដៃគូនានាដើម្បីគាំទ្រសមត្ថភាពរបស់ប្រទេសអ៊ុយក្រែននៅក្នុងការការពារខ្លួន»។
- សហរដ្ឋអាមេរិកត្រូវគេរំពឹងថា នឹងប្រកាសនៅពេលឆាប់ៗខាងមុខនេះអំពីជំនួយបន្ថែមផ្នែកសន្តិសុខរហូតដល់៧៥០លានដុល្លារសម្រាប់ប្រទេសអ៊ុយក្រែន ខណៈ ពេលដែលប្រធានាធិបតីអ៊ុយក្រែនលោក Volodymyr Zelenskyy បានអំពាវនាវសុំជំនួយបន្ថែមទៀតដើម្បីវាយបកលើកងទ័ពរុស្ស៊ី។ ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីចក្រភពអង់គ្លេសលោក Boris Johnson កាលពីថ្ងៃអង្គារ «បានបញ្ជាក់អំពីការតាំងចិត្តរបស់ខ្លួននៅក្នុងការបន្តផ្ដល់ជំនួយផ្នែកសន្តិសុខនិងផ្នែកមនុស្សធម៌ដល់ប្រទេសអ៊ុយក្រែន នៅក្នុងស្ថានការណ៍ដែលអ៊ុយក្រែនកំពុងប្រឈមនឹងអំពើឃោរឃៅជាបន្តរបស់ប្រទេសរុស្ស៊ី»។ នេះបើយោងតាមការបញ្ជាក់របស់សេតវិមាននៅក្នុងសេចក្តីថ្លែងការណ៍មួយ។
- អនុរដ្ឋមន្ត្រីសេដ្ឋកិច្ចសហរដ្ឋអាមេរិកលោក Wally Adeyemo ដែលជាអ្នកសម្រប សម្រួលចម្បងម្នាក់របស់សហរដ្ឋអាមេរិកលើយុទ្ធសាស្ត្រដាក់ទណ្ឌកម្មលើប្រទេសរុស្ស៊ី បាននិយាយកាលពីថ្ងៃអង្គារថា សហរដ្ឋអាមេរិកនិងសម្ព័ន្ធមិត្តរបស់ខ្លួនកំពុងជំរុញទៅមុខនូវការដាក់ទណ្ឌកម្មក្នុងគោលបំណងបង្ខំប្រធានាធិបតីរុស្ស៊ីលោក Vladimir Putin ឱ្យចំណាយថវិការបស់ប្រទេសរុស្ស៊ីជួយសេដ្ឋកិច្ចរបស់រុស្ស៊ីកុំឱ្យធ្លាក់ ចុះ ជាជាងចំណាយលើ «សព្វាវុធសង្គ្រាម» សម្រាប់ការប្រយុទ្ធនៅក្នុងប្រទេសអ៊ុយ ក្រែន។ នេះបើយោងតាមទីភ្នាក់ងារព័ត៌មាន Associated Press។