២១:១៣ ២.៤.២០២២

ថ្ងៃសៅរ៍ ទី២ ខែមេសា៖

ទីភ្នាក់ងារ Reuters បានរាយការណ៍ថា សម្តេចសង្ឃរ៉ូម៉ាំងកាតូលិកប៉ាប Francis បានឈានស្ទើរតែដល់ការរិះគន់ដោយប្រយោលដែលព្រះអង្គមិនធ្លាប់ធ្វើពីមុន លើប្រធានាធិបតីរុស្ស៊ីលោក Vladimir Putin ចំពោះការឈ្លានពានរបស់រុស្ស៊ីចូលប្រទេសអ៊ុយក្រែន ដោយព្រះអង្គមានព្រះបន្ទូលកាលពីថ្ងៃសៅរ៍ថា មាន«អ្នកកាន់អំណាចខ្លាំង»ម្នាក់កំពុងបង្កសង្គ្រាមដើម្បីប្រយោជន៍ជាតិនិយម។ រដ្ឋាភិបាលក្រុងមូស្គូថាសកម្មភាពរបស់ខ្លួនចាប់ពីថ្ងៃទី២៤ ខែកុម្ភៈ ជា«ប្រតិបត្តិការយោធាពិសេស» ដើម្បីដកយោធានិង«ដកមេដឹកនាំបែបណាហ្ស៊ី» របស់អ៊ុយក្រែន ហើយមិនមែនដើម្បីកាន់កាប់ដែនដីរបស់ប្រទេសនេះទេ។ ប៉ុន្តែសម្តេចប៉ាប Francis កន្លងមកបានបដិសេធវោហាសាស្ត្រនេះរួចហើយ ដោយព្រះអង្គបានហៅសកម្មភាពរបស់រុស្ស៊ីនេះថាជាសង្គ្រាម។

ទីភ្នាក់ងារ Reuters បានរាយការណ៍ថា សម្តេចសង្ឃរ៉ូម៉ាំងកាតូលិកប៉ាប Francis បានមានព្រះបន្ទូលកាលពីថ្ងៃសៅរ៍ថា ព្រះអង្គកំពុងពិចារណាយាងទៅរដ្ឋធានីកៀវរបស់អ៊ុយក្រែន។ នៅពេលត្រូវសួរដោយអ្នកកាសែតនៅលើព្រះទីនាំងយន្តហោះរបស់ព្រះអង្គពីទីក្រុងរ៉ូមទៅកាន់ប្រទេសកោះម៉ាល់ត៍ (Malta) ថាតើព្រះអង្គពិចារណាឆ្លើយតបនឹងការអញ្ជើញរបស់អាជ្ញាធរនយោបាយនិងសាសនារបស់អ៊ុយក្រែនដែរឬទេ សម្តេចប៉ាប Francis មានព្រះបន្ទូលថា «រឿងនេះកំពុងស្ថិតនៅក្នុងការពិចារណា» ដោយព្រះអង្គមិនបានផ្តល់សេចក្តីលម្អិតទេ។
លោក Vitaliy Kim អភិបាលក្រុងកំពង់ផែ Mykolaiv នៅភាគខាងត្បូងអ៊ុយក្រែនបាននិយាយនៅក្នុងសារតាមអនឡាញមួយកាលពីថ្ងៃសៅរ៍ថា មកទល់ពេលនេះមានមនុស្សយ៉ាងហោចណាស់៣៥នាក់ត្រូវបានបញ្ជាក់ថាបានស្លាប់ពីការវាយប្រហារមួយតាមរ៉ុក្កែតកាលពីថ្ងៃអង្គារទៅលើអគាររដ្ឋបាលមួយក្នុងទីក្រុងនេះ។នេះបើតាមទីភ្នាក់ងារReuters ដែលបានរាយការណ៍បន្ថែមថា ក្រុមអ្នកជួយសង្គ្រោះកំពុងបន្តស្វែងរកជករងគ្រោះក្នុងគំនរបែកបាក់ ក្រោយពីការវាយប្រហារនេះបានទម្លុះជ្រុងម្ខាងនៃអគារនៅកណ្តាលក្រុង Mykolaiv នេះ។
ប្រធានទីភ្នាក់ងារអវកាសរុស្ស៊ីបាននិយាយកាលពីថ្ងៃសៅរ៍ថា ការស្ថារទំនាក់ទំនងឡើងវិញរវាងដៃគូនៅស្ថានីយអវកាសអន្តរជាតិ (ISS) និងកម្មវិធីអវកាសរួមគ្នាផ្សេងទៀតនឹងអាចកើតមានឡើងបានលុះត្រាតែទណ្ឌកម្មរបស់លោកខាងលិចប្រឆាំងនឹងរដ្ឋាភិបាលក្រុងមូស្គូត្រូវបានដកចេញសិន។ នេះបើតាមទីភ្នាក់ងារReuters ដែលបានរាយការណ៍បន្ថែមថា លោក Dmitry Rogozin ប្រធានទីភ្នាក់ងារអវកាសរុស្ស៊ី Roscosmos ថ្លែងក្នុងសារតាមបណ្តាញសង្គមថា គោលដៅនៃទណ្ឌកម្មទាំងនេះគឺដើម្បី«ប្រល័យសេដ្ឋកិច្ចរុស្ស៊ីនិងរុញច្រានប្រជាជនរបស់យើងឱ្យធ្លាក់ចូលទៅក្នុងទុក្ខសោកនិងភាពអត់ឃ្លាន ដើម្បីឱ្យប្រទេសយើងដួលរលំ»។ លោកបន្ថែមថា៖ «ពួកគេនឹងមិនទទួលជោគជ័យទេ ប៉ុន្តែគោលបំណងរបស់ពួកគេជាក់ច្បាស់ណាស់»។
ទីភ្នាក់ងារ Reuters បានរាយការណ៍កាលពីថ្ងៃសៅរ៍ថា រុស្ស៊ីបានប្រកាសកំណត់ថា អ្នកកាសែតល្បីម្នាក់ អ្នកផលិតវីដេអូតាមblog និងបុគ្គលសំខាន់ៗក្នុងវិស័យប្រព័ន្ធផ្សព្វផ្សាយ៦នាក់ផ្សេងទៀត ជា«ភ្នាក់ងារបរទេស» ដែលនេះជាចំណាត់ការចុងក្រោយរបស់រុស្ស៊ីដែលអ្នករិះគន់ថាដើម្បីបំបិទមាត់ក្រុមអ្នកប្រឆាំង។ បញ្ជីឈ្មោះកាន់តែវែងដែលត្រូវផ្សាយដោយក្រសួងយុត្តិធម៌រុស្ស៊ីកាលពីយប់ថ្ងៃសុក្រមានរួមទាំងអ្នកស្រី Elizaveta Osetinskaya អតីតនិពន្ធនាយកកាសែតពាណិជ្ជកម្មរុស្ស៊ីជាច្រើនដែលបានផ្សាយទម្លាយរឿងផលប្រយោជន៍ពាណិជ្ជកម្មរបស់ក្រុមជនដែលស្និទ្ធនឹងលោកប្រធានាធិបតី Vladimir Putin។
ទូរទស្សន៍ BBC បានរាយការណ៍ថា ទង់ជាតិអ៊ុយក្រែនត្រូវបានគេបង្ហូតឡើងវិញនៅរោងចក្រថាមពលនុយក្លេអ៊ែរChernobyl ខណៈបុគ្គលិកនៅទីនោះច្រៀងភ្លេងជាតិអ៊ុយក្រែននិងអបអរសាទរការដកទ័ពចេញរបស់រុស្ស៊ីដែលបានកាន់កាប់ទីតាំងរោងចក្រនេះអស់ជាច្រើនសប្តាហ៍។
ទីភ្នាក់ងារព័ត៌មាន AP បានរាយការណ៍ថាគេបានរកឃើញសាកសពរបស់អ្នកសារព័ត៌មានថតរូបល្បីម្នាក់របស់អ៊ុយក្រែនដែលបានបាត់ខ្លួនកាលពីខែមុន នៅក្នុងតំបន់មានការប្រយុទ្ធគ្នាមួយនៅជិតរដ្ឋធានីកៀវ។ ការិយាល័យរដ្ឋអាជ្ញាជាតិអ៊ុយក្រែននៅក្នុងសេចក្តីថ្លែងការណ៍មួយកាលពីថ្ងៃសៅរ៍បាននិយាយថា លោក Maks Levin អាយុ៤០ឆ្នាំ បានស្លាប់ដោយត្រូវគ្រាប់កាំភ្លើងពីរគ្រាប់ ដែលគេគិតថាត្រូវបានបាញ់ដោយយោធារុស្ស៊ី។
ទីភ្នាក់ងារ Reuters បានរាយការណ៍ថា រដ្ឋមន្ត្រីដឹកជញ្ជូនអង់គ្លេសលោក Grant Shapps បានថ្លែងកាលពីថ្ងៃសៅរ៍ថា លោកបានរារាំងមិនឱ្យមានការប្រើប្រាស់យន្តហោះឯកជនមួយទៀតដែលមានជាប់ទាក់ទិននឹងក្រុមអភិជនរុស្ស៊ី ដោយអាជ្ញាធរអង់គ្លេសបានហាមឃាត់យន្តហោះនោះមិនឱ្យហោះចេញពីអាកាសយានដ្ឋានLuton Airport របស់ក្រុងឡុងដ៍ និងរង់ចាំការស៊ើបអង្កេតសិន។ លោកបានសរសេរនៅលើបណ្តាញTwitter ថា៖ «យើងនឹងមិនឱបដៃឈរមើលក្រុមដែលបានចំណេញ[ប្រាក់]រាប់លានតាមរយៈខ្សែរយៈលោកPutin អាចរស់នៅដោយសុខស្រួលទេ ខណៈមានការបង្ហូរឈាមជនស្លូតត្រង់។»

ទីភ្នាក់ងារព័ត៌មានAP បានរាយការណ៍ថាប្រធានាធិបតីអ៊ុយក្រែនលោក Volodymyr Zelenskyy បានព្រមានប្រាប់ប្រជាពលរដ្ឋរបស់លោកកាលពីព្រឹកថ្ងៃសៅរ៍ថាកងកម្លាំងរុស្ស៊ីដែលដកថយបានបង្កើត«មហន្តរាយ»នៅខាងក្រៅរដ្ឋធានីដោយពួកគេបានបន្សល់ទុកគ្រាប់មីននៅទូទាំង«ដែនដីនោះទាំងមូល»ដោយមានទាំងនៅជុំវិញផ្ទះនិងសាកសពផងដែរ។ លោកបានព្រមានដូច្នេះខណៈដែលវិបត្តិមនុស្សធម៌នៅក្រុង Mariupol ដែលត្រូវឡោមព័ទ្ធនោះ កាន់តែធ្ងន់ធ្ងរឡើងពីព្រោះកងកម្លាំងរុស្ស៊ីរាំងខ្ទប់កិច្ចប្រតិបត្តិការជម្លៀសនៅថ្ងៃទីពីរបន្តបន្ទាប់គ្នា។
ទូរទស្សន៍ CNN បានរាយការណ៍ថាបើតាមលោកស្រី Iryna Vereshchuk ឧបនាយករដ្ឋមន្ត្រីអ៊ុយក្រែនថាគេរំពឹងថាផ្លូវរបៀងសម្រាប់ជម្លៀស៧នៅតាមផ្លួវសំខាន់ៗនឹងបើកក្នុងប្រទេសអ៊ុយក្រែននៅថ្ងៃសៅរ៍។ ដោយប្រកាសអំពីផ្លូវរបៀងទាំងនេះតាមFacebook លោកស្រីVereshchuk បានមានប្រសាសន៍ថាក្នុងចំណោមនោះរួមមានផ្លូវពីក្រុង Mariupol ត្រូវឡោមព័ទ្ធនៅភាគខាងត្បូងប្រទេសទៅកាន់ក្រុង Zaporizhzhia កាន់កាប់ដោយរដ្ឋាភិបាលនៅផ្នែកអាគ្នេយ៍ប្រទេស។
គណៈកម្មាធិការកាកបាទក្រហមអន្តរជាតិបាននិយាយថាខ្លួននឹងប៉ុនប៉ងជាថ្មីដើម្បីជម្លៀសក្រុមអ្នកស្រុកពីក្រុងកំពង់ផែ Mariupol នៅថ្ងៃសៅរ៍ក្រោយពីបាននិយាយយោងអំពីស្ថានភាព«មិនអាចជម្លៀសបាន»កាលពីមួយថ្ងៃមុននេះ។ អ្នកនាំពាក្យម្នាក់បាននិយាយប្រាប់កាសែតThe Washington Post នៅព្រឹកថ្ងៃសៅរ៍ថាក្រុមរបស់ពួកគេ«កំពុងធ្វើដំណើរ»ពីក្រុង Zaporizhzhia ទៅក្រុង Mariupol។ បើតាមមន្ត្រីអ៊ុយក្រែនថាមានមនុស្សប្រមាណ១សែននាក់នៅជាប់ក្នុងក្រុង Mariupol។
ទីភា្នក់ងារព័ត៌មានAP បានរាយការណ៍ថាវិមានក្រឹមឡាំងបានចោទប្រកាន់អ៊ុយក្រែនថាបានវាយប្រហារតាមឧទ្ធម្ភាគចក្រលើកន្លែងស្តុកប្រងឥន្ធនៈមួយក្នុងដែនដីរុស្ស៊ី។ អ៊ុយក្រែនបានបដិសេធការទទួលខុសត្រូវដល់ការវាយប្រហារនោះ តែបើការអះអាងរបស់រដ្ឋាភិបាលម៉ូស្គូត្រូវបញ្ជាក់ថាពិតនោះ ការណ៍នេះជាការវាយប្រហារទីមួយដែលយន្តហោះអ៊ុយក្រែនបានហោះចូលក្នុងដែនអាកាសរុស្ស៊ី។ អ្នកនាំពាក្យវិមានក្រឹមឡាំងឈ្មោះDmitry Peskov បាននិយាយថា៖«ជាការពិត នេះមិនមែនជាអ្វីដែលអាចនាំឱ្យមានស្ថានភាពល្អសម្រាប់បន្តកិច្ចចរចាគ្នាទេ»។ហេតុការណ៍នេះបានកើតឡើង៥សប្តាហ៍ក្រោយរដ្ឋាភិបាលម៉ូស្គូចាប់ផ្តើមបញ្ជូនទាហាន១សែន៥ម៉ឺននាក់ចូលលុកលុយអ៊ុយក្រែន។
ទីភ្នាក់ងារព័ត៌មានAFP បានរាយការណ៍ថាក្រសួងការពារជាតិអាមេរិកបានប្រកាសកាលពីយប់ថ្ងៃសុក្រថាខ្លួននឹងផ្តល់«ជំនួយសន្តិសុខ»៣០០លានដុល្លារឱ្យអ៊ុយក្រែនដើម្បីបង្កើនសមត្ថភាពការពារខ្លួនរបស់ប្រទេសនេះដោយថែមលើជំនួយ១.៦០០លានដុល្លារដែលរដ្ឋាភិបាលក្រុងវ៉ាស៊ីនតោន បានប្តេជ្ញាជួយអ៊ុយក្រែនចាប់ពីពេលរុស្ស៊ីចូលលុកលុយកាលពីចុងខែកុម្ភៈ។កញ្ចប់ជំនួយនេះមានរួមបញ្ចូលប្រព័ន្ធរ៉ុក្កែតប្រើ laser ដ្រូន គ្រាប់រំសេវសម្ភារៈសម្រាប់មើលពេលយប់ប្រព័ន្ធគមនាគមន៍ខាងកលយុទ្ធបរិក្ខារពេទ្យនិងកងរថពាសដែក។

ប្រធានាធិបតីចិនលោក Xi Jinping និងលោកស្រី Ursula von der Leyen ប្រធានសហគមន៍អឺរ៉ុបចូលរួមតាមអនឡាយក្នុងកិច្ចប្រជុំកំពូលអឺរ៉ុបចិននៅក្រុងព្រុចសែលប្រទេសបែលហ្ស៊ិកកាលពីថ្ងៃទី១ ខែមេសា ឆ្នាំ២០២២។

ទីភ្នាក់ងារព័ត៌មាន Reuters បានរាយការណ៍ថាប្រទេសចិនបានធានាដល់សហភាពអឺរ៉ុបកាលពីថ្ងៃសុក្រថាខ្លួននឹងរកសន្តិភាពក្នុងអ៊ុយក្រែនតែបាននិយាយថាការណ៍នេះនឹងធ្វើតាមលក្ខខណ្ឌរបស់ចិនដោយចិនមិនព្រមធ្វើតាមសម្ពាធឱ្យមានជំហរតឹងរ៉ឹងជាងមុនចំពោះរុស្ស៊ី។ នាយករដ្ឋមន្ត្រីចិនលោក Li Keqiang បាននិយាយប្រាប់ពួកមេដឹកនាំសហភាពអឺរ៉ុបថារដ្ឋាភិបាលប៉េកាំងនឹងជំរុញឱ្យមានសន្តិភាពតាម«វិធីខ្លួនផ្ទាល់»ចំណែកឯប្រធានាធិបតីចិនលោក Xi Jinpingថាលោកសង្ឃឹមថាសហភាពអឺរ៉ុបនឹងទាក់ទងជាមួយប្រទេសចិន«ដោយឯករាជ្យ» ដែលជាការនិយាយយោងទៅរកចំណងទាក់ទងជិតស្និទ្ធរបស់អឺរ៉ុបជាមួយអាមេរិក។
កាសែត Washington Post បានរាយការណ៍ថាកងយោធារុស្ស៊ីបានចាប់ផ្តើមកេណ្ឌទាហានក្នុងរដូវផ្ការីក(ដើមឆ្នាំ)កាលពីថ្ងៃសុក្រ ដោយមានគោលដៅជ្រើសរើសទាហានកំណែន១៣៤.៥០០នាក់ ហើយការណ៍នេះនាំឱ្យក្រុមបុរសវ័យក្មេងព្រួយបារម្ភថាពួកគេនឹងត្រូវបញ្ជូនទៅកាន់ជួរមុខនៃការលុកលុយប្រទេសអ៊ុយក្រែន។រដ្ឋមន្ត្រីការពារជាតិរុស្ស៊ីឈ្មោះSergei Shoigu បានសន្យាថាគ្មាននរណាម្នាក់ក្នុងបណ្តាក្រុមទាហានកំណែនទាំងនេះត្រូវបញ្ជូនទៅបន្ថែមកម្លាំងទាហានរុស្ស៊ីដែលកំពុងប្រយុទ្ធក្នុងប្រទេសអ៊ុយក្រែនទេ។លោកបាននិយាយតាមទូរទស្សន៍កាលពីថ្ងៃអង្គារថា៖ «សូមកត់សម្គាល់ថាក្រុមទាហានកំណែននឹងមិនត្រូវបញ្ជូនទៅកាន់កន្លែងមានការប្រយុទ្ធទេ» ដោយលោកបានថ្លែងបន្ថែមថាក្រុមជនដែលត្រូវបានកេណ្ឌកាលពីរដូវផ្ការីក(ដើមឆ្នាំ)មុននឹងត្រូវរំសាយហើយបញ្ជូនទៅផ្ទះវិញក្រោយបានបញ្ចប់សេវាមួយឆ្នាំ។
មានសេចក្តីលម្អិតថ្មីៗស្តីពីជនជាតិ Belarus ប្រយុទ្ធជួយអ៊ុយក្រែនប្រឆាំងនឹងការលុកលុយរបស់រុស្ស៊ី ជាផ្នែកមួយនៃការតស៊ូធំជាងនេះមួយដើម្បីរំដោះប្រទេសពួកគេផ្ទាល់ពីការគ្របដណ្តប់របស់រុស្ស៊ីនិងពីការគ្រប់គ្រងដោយមេដឹកនាំផ្តាច់ការលោក Alexander Lukashenko ដែលរុស្ស៊ីគាំទ្រ។ ថ្លែងនៅក្នុងសេចក្តីសម្ភាសន៍តាមទូរសព្ទផ្តាច់មុខមួយជាមួយវីអូអេកាលពីថ្ងៃអង្គារ មេបញ្ជាការរងនៃកងកម្លាំងប្រយុទ្ធ Belarus លម្អៀងខាងអ៊ុយក្រែនបានមានប្រសាសន៍ថាចំនួនយុទ្ធជនពួកគេមានជិតដល់ចំនួនមួយកងវរសេនាតូចអ៊ុយក្រែនដែលលោកបានថ្លែងថាមានទាហានពី៤៥០ទៅ៥០០នាក់៕

២០:១០ ៣.៤.២០២២

ថ្ងៃអាទិត្យ ទី៣ ខែមេសា៖

លោក Ron Klain នាយកខុទ្ទកាល័យសេតវិមានរបស់ប្រធានាធិបតីសហរដ្ឋអាមេរិកលោក Joe Biden បាននិយាយនៅក្នុងកិច្ចសម្ភាសន៍មួយក្នុងកម្មវិធី «This Week» របស់ទូរទស្សន៍ ABC News នៅថ្ងៃអាទិត្យនេះថា សង្គ្រាមនៅអ៊ុយក្រែនគឺ «មិនងាយនឹងបញ្ចប់ក្នុងពេលឆាប់ៗនេះទេ»។ លោកបានបញ្ជាក់ដូច្នេះថា៖ «ខ្ញុំគិតថា ពលរដ្ឋអ៊ុយក្រែនឈ្នះសង្គ្រាមនៅជុំវិញទីក្រុងកៀវនិងនៅភាគខាងជើងនៃប្រទេសអ៊ុយក្រែន។ នេះគឺជាគុណសម្បត្តិដ៏ធំបំផុតចំពោះការវាយប្រយុទ្ធដែលពួកគេបានធ្វើនិងចំពោះការគាំទ្រដែលសហរដ្ឋអាមេរិកនិងសម្ព័ន្ធមិត្តអូតង់ (NATO) បានផ្ដល់ជូនពួកគេ។ យើងបញ្ជូនសព្វាវុធទៅកាន់ប្រទេសអ៊ុយក្រែនស្ទើរតែរាល់ថ្ងៃ»។ នេះបើយោងតាមបណ្ដាញព័ត៌មាន CNN។
អគ្គលេខាធិការអង្គការអូតង់ (NATO) លោក Jens Stoltenberg បានបញ្ជាក់នៅក្នុងកិច្ចសម្ភាសន៍មួយជាមួយនឹងបណ្ដាញព័ត៌មាន CNN នៅថ្ងៃអាទិត្យនេះថា ការដកកងទ័ពរបស់រុស្ស៊ីចេញពីរដ្ឋធានីកៀវ ប្រទេសអ៊ុយក្រែនគឺមិនមែនជាការដកកងទ័ពចេញពិតប្រាកដនោះទេ ប៉ុន្តែគឺជាការរៀបចំយុទ្ធសាស្ត្រកងទ័ពឡើងវិញដែលអាចនឹងមានការវាយប្រហារខ្លាំងជាងមុនទៀត។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសបារាំងលោក Jean-Yves Le Drian បាននិយាយនៅថ្ងៃអាទិត្យនេះថា លោកថ្កោលទោសខ្លាំងក្លាលើអ្វីដែលលោកហៅថាជា «ការធ្វើបាបទ្រង់ទ្រាយធំ» ដែលប្រព្រឹត្តឡើងដោយ «កងទ័ពរុស្ស៊ី» នៅក្នុងប្រទេសអ៊ុយក្រែននៅក្នុងរយៈពេលប៉ុន្មានសប្ដាហ៍ថ្មីៗនេះ។ លោក Le Drian បានលើកឡើងជាពិសេសអំពីក្រុង Bucha នៅជាយរដ្ឋធានីកៀវ ដែលនៅទីនោះ អាជ្ញាធរអ៊ុយក្រែនបាននិយាយថា «ការសម្លាប់រង្គាល» ដោយចេតនាត្រូវបានប្រព្រឹត្តឡើងដោយរុស្ស៊ី។ លោក Le Drian បានបន្ថែមថា ការធ្វើបាបដូចនេះគឺស្មើនឹងឧក្រិដ្ឋកម្មសង្គ្រាម និងថា ប្រទេសបារាំងនឹងធ្វើការជាមួយនឹងអាជ្ញាធរអ៊ុយក្រែននិងតុលាការឧក្រិដ្ឋកម្មអន្តរជាតិ (ICC) ដើម្បីកាត់ទោសអ្នកដែលទទួលខុសត្រូវចំពោះរឿងនេះ។ នេះបើយោងតាមទីភ្នាក់ងារព័ត៌មាន Reuters។

ផ្នូរខ្មោចដ៏ធំមួយនៅក្រុង Bucha ដែលស្ថិតនៅជាយរដ្ឋធានីកៀវ ប្រទេសអ៊ុយក្រែន ថ្ងៃទី៣ ខែមេសា ឆ្នាំ២០២២។

រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងកិច្ចសម្ភាសន៍មួយជាមួយនឹងបណ្ដាញព័ត៌មាន CNN នៅថ្ងៃអាទិត្យនេះថា ទិដ្ឋភាពដែលបង្ហាញអំពីសាកសពពលរដ្ឋអ៊ុយក្រែនជាច្រើននៅក្នុងក្រុង Bucha ដែលគេបានរកឃើញ បន្ទាប់ពីរុស្ស៊ីបានដកកងទ័ពរបស់ខ្លួនចេញ មានលក្ខណៈ «គួរឱ្យសោកសង្រេងជាទីបំផុត»។ នេះបើយោងតាមទីភ្នាកងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានចោទប្រកាន់កងទ័ពរុស្ស៊ីថាបានប្រព្រឹត្ត «អំពើប្រល័យពូជសាសន៍» នៅក្នុងប្រទេសរបស់លោក។ លោកបានបញ្ជាក់ក្នុងកម្មវិធី «Face the Nation» របស់ទូរទស្សន៍ CBS នៅថ្ងៃអាទិត្យនេះថា ប្រទេសអ៊ុយក្រែនកំពុងត្រូវបានកងទ័ពរុស្ស៊ី «បំផ្លាញនិងធ្វើឱ្យវិនាស»។
រដ្ឋាភិបាលរុស្ស៊ីបានបញ្ជាក់នៅថ្ងៃអាទិត្យនេះថា ការធ្វើឱ្យរុស្ស៊ីនៅឯកោគឺមិនអាចទៅរួចនោះទេ។ រុស្ស៊ីលើកឡើងដូច្នេះ ស្របពេលដែលក្រុមបស្ចិមប្រទេសបន្តដាក់ទណ្ឌកម្មលើខ្លួនទាក់ទិននឹងប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់ទូរទស្សន៍រដ្ឋរបស់រុស្ស៊ីថា៖ «មិនអាចមានការផ្ដាច់រុស្ស៊ីឱ្យនៅឯកោបានទាំងស្រុងនោះទេ។ តាមបែបបច្ចេកវិទ្យា វាមិនអាចទៅរួចនោះទេនៅក្នុងពិភពទំនើប»។ នេះបើយោងតាមទីភ្នាក់ងារព័ត៌មាន AFP។
រុស្ស៊ីបានបញ្ជាក់នៅថ្ងៃអាទិត្យនេះថា ការចរចាសន្តិភាពជាមួយអ៊ុយក្រែនមិនបានវិវឌ្ឍឱ្យបានគ្រប់គ្រាន់ដើម្បីឈានទៅដល់ការជួបចរចារវាងមេដឹកនាំនៃប្រទេសទាំងពីរទេ និងថា គោលជំហររបស់រដ្ឋាភិបាលរុស្ស៊ីលើឋានៈរបស់តំបន់ Crimea និងតំបន់ Donbas គឺនៅដដែលមិនប្រែប្រួលនោះទេ។ នេះបើយោងតាមទីភ្នាក់ងារព័ត៌មាន Reuters។
គេបានឮការផ្ទុះខ្លាំងក្លាពីរកន្លែងនៅក្នុងទីក្រុង Belgorod ប្រទេសរុស្ស៊ីជិតព្រំដែនប្រទេសអ៊ុយក្រែននៅថ្ងៃអាទិត្យនេះ។ នេះបើយោងតាមសាក្សីពីរនាក់ដែលបានប្រាប់ទីភ្នាក់ងារព័ត៌មាន Reuters។ ការផ្ទុះនេះបានឮឡើងក្នុងពេលប៉ុន្មានថ្ងៃក្រោយមក បន្ទាប់ពីអាជ្ញាធររុស្ស៊ីបានចោទប្រកាន់កងទ័ពអ៊ុយក្រែនថាបានវាយប្រហារលើឃ្លាំងស្តុកទុកប្រេងឥន្ធនៈនៅទីនោះ។ មូលហេតុនៃការផ្ទុះនេះនៅមិនទាន់ដឹងនៅឡើយទេ។

រូបថតដកស្រង់ពីវីដេអូនេះបង្ហាញពីកន្លែងស្ដុកប្រេងឥន្ធនៈមួយដែលកំពុងឆាបឆេះនៅក្នុងទីក្រុង Belgorod ប្រទេសរុស្ស៊ី ថ្ងៃទី១ ខែមេសា ឆ្នាំ២០២២។ (Russian Emergencies Ministry/Handout via REUTERS)

លោក Jaroslaw Kaczynski ប្រធានគណបក្សកាន់អំណាចនៃប្រទេសប៉ូឡូញបានបញ្ជាក់នៅក្នុងការបញ្ចេញមតិមួយដែលបានចេញផ្សាយនៅថ្ងៃអាទិត្យនេះថា ប្រទេសប៉ូឡូញចង់ឱ្យមានការបង្កើនកងទ័ពអាមេរិកចំនួន ៥០% ទៀតនៅអឺរ៉ុប។ លោកបញ្ជាក់ដូច្នេះ ស្របពេលដែលរដ្ឋាភិបាលប៉ូឡូញអំពាវនាវឱ្យមានការដាក់ទណ្ឌកម្មធ្ងន់ធ្ងរជាងមុនលើរដ្ឋាភិបាលរុស្ស៊ីទាក់ទិននឹងសង្គ្រាមរបស់រុស្ស៊ីនៅអ៊ុយក្រែន។ លោក Kaczynski បានបញ្ជាក់ប្រាប់កាសែត Welt am Sonntag របស់អាល្លឺម៉ង់ថា៖ «ប៉ូឡូញនឹងពេញចិត្ត ប្រសិនបើសហរដ្ឋអាមេរិកបង្កើនវត្តមានកងទ័ពរបស់ខ្លួននៅអឺរ៉ុបពី ១០០.០០០ នាក់ទៅ ១៥០.០០០ នាក់ នៅពេលអនាគត ដោយសារតែភាពគឃ្លើនកើនឡើងរបស់រុស្ស៊ី»។ នេះបើយោងតាមទីភ្នាក់ងារព័ត៌មាន Reuters។
លោក Charles Michel ប្រធានក្រុមប្រឹក្សាអឺរ៉ុបនៃសហភាពអឺរ៉ុប បានសន្យានៅថ្ងៃអាទិត្យនេះថានឹងដាក់ទណ្ឌកម្មបន្ថែមទៀតលើរដ្ឋាភិបាលរុស្ស៊ី។ លោកសន្យាដូច្នេះ នៅពេលដែលលោកថ្កោលទោស «ភាពឃោរឃៅ» ដែលធ្វើឡើងដោយកងទ័ពរុស្ស៊ីនៅជុំវិញរដ្ឋធានីកៀវ ប្រទេសអ៊ុយក្រែន។ លោកបានសរសេរនៅលើ Twitter ថា៖ «[ខ្ញុំ] ភ្ញាក់ផ្អើលដែលឃើញរូបភាពមិនអាចបំភ្លេចបានអំពីអំពើឃោរឃៅដែលធ្វើឡើងដោយទាហានរុស្ស៊ីនៅតំបន់ទីក្រុងកៀវ ដែល [អ៊ុយក្រែន] ទើបរំដោះបាន #BuchaMassacre»។ លោកបានសរសេរបន្ថែមថា៖ «សហភាពអឺរ៉ុបកំពុងជួយអ៊ុយក្រែននិងអង្គការក្រៅរដ្ឋាភិបាលនានានៅក្នុងការប្រមូលភស្តុតាងចាំបាច់ដើម្បីបន្តនៅក្នុងតុលាការអន្តរជាតិ»។ នេះបើយោងតាមទីភ្នាក់ងារព័ត៌មាន AFP។
អង្គការសិទ្ធិមនុស្ស Human Rights Watch បានបញ្ជាក់នៅថ្ងៃអាទិត្យនេះថា ខ្លួនបានកត់ត្រានូវអ្វីដែលខ្លួនរៀបរាប់ថាជា «ឧក្រិដ្ឋកម្មសង្គ្រាមយ៉ាងជាក់ច្បាស់» ដែលប្រព្រឹត្តិឡើងដោយកងកម្លាំងរុស្ស៊ីលើជនស៊ីវិលអ៊ុយក្រែន។ អង្គការនេះបានចេញសេចក្ដីថ្លែងការណ៍មួយដោយលើកឡើងថា ខ្លួនបានរកឃើញមាន «ករណីមួយចំនួនដែលកងកម្លាំងយោធារុស្ស៊ីបានរំលោភបំពានលើច្បាប់សង្គ្រាម» នៅក្នុងតំបន់ដែលគ្រប់គ្រងដោយរុស្ស៊ីដូចជាទីក្រុង Chernihiv ទីក្រុង Kharkiv និងទីក្រុងកៀវជាដើម។ នេះបើយោងតាមទីភ្នាក់ងារព័ត៌មាន Reuters។
លោក Robert Habeck ដែលជាអធិការបតីរងនិងជារដ្ឋមន្ត្រីសេដ្ឋកិច្ចនៃប្រទេសអាល្លឺម៉ង់បាននិយាយនៅថ្ងៃអាទិត្យនេះថា «ឧក្រិដ្ឋកម្មសង្គ្រាមដ៏អាក្រក់» ត្រូវបានប្រព្រឹត្តឡើងនៅក្នុងក្រុង Bucha នៃប្រទេសអ៊ុយក្រែន។ លោកបានអំពាវនាវឱ្យសហភាពអឺរ៉ុបដាក់ទណ្ឌកម្មថ្មីលើរុស្ស៊ី។ លោកបានប្រាប់កាសែត Bild របស់អាល្លឺម៉ង់ថា៖ «ឧក្រិដ្ឋកម្មសង្គ្រាមដ៏អាក្រក់នេះមិនអាចគ្មានចម្លើយបានទេ»។ លោកបានថ្លែងដូច្នេះនៅថ្ងៃដែលអាជ្ញាធរមូលដ្ឋានបានបញ្ជាក់ថា សាកសពជនស៊ីវិលជិត ៣០០ នាក់ត្រូវបានគេរកឃើញនៅក្នុងរណ្ដៅសពរួម បន្ទាប់ពីពេលដែលកងទ័ពរុស្ស៊ីបានដកចេញទៅ។ លោក Habeck បានបន្ថែមថា៖ «ខ្ញុំអំពាវនាវឱ្យមានការដាក់ទណ្ឌកម្មខ្លាំងក្លាបន្ថែមទៀត។ នេះជាអ្វីដែលយើងកំពុងរៀបចំជាមួយនឹងប្រទេសដៃគូរបស់យើងដែលជាសមាជិកសហភាពអឺរ៉ុប»។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសចក្រភពអង់គ្លេសអ្នកស្រី Liz Truss បានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃអាទិត្យនេះថា ការចោទប្រកាន់អំពីការវាយប្រហារលើជនស៊ីវិលក្នុងអំឡុងពេលឈ្លានពានរបស់រុស្ស៊ីលើអ៊ុយក្រែនត្រូវតែស៊ើបអង្កេតជាឧក្រិដ្ឋកម្មសង្គ្រាម។ អ្នកស្រីបានបន្ថែមថា ចក្រភពអង់គ្លេសនឹងគាំទ្រទាំងស្រុងលើវិធានការណាមួយដូចនេះដែលធ្វើឡើងដោយតុលាការឧក្រិដ្ឋកម្មអន្តរជាតិ (ICC)។ នេះបើយោងតាមបណ្ដាញព័ត៌មាន Al Jazeera។
អ៊ុយក្រែនបានថ្កោលទោសកងទ័ពរុស្ស៊ីនៅថ្ងៃអាទិត្យនេះថាបានប្រព្រឹត្តិឧក្រិដ្ឋកម្មសង្គ្រាម បន្ទាប់ពីមានការរកឃើញរណ្ដៅសាកសពរួម និងជនស៊ីវិលដែល «ត្រូវបានសម្លាប់» នៅតាមដងផ្លូវនៃក្រុង Bucha នៅជិតរដ្ឋធានីកៀវ។ អ្នកនាំពាក្យរបស់ប្រធានាធិបតីអ៊ុយក្រែនបានបញ្ជាក់ប្រាប់ទូរទស្សន៍ BBC ថា៖ «វាមើលទៅដូចជាឧក្រិដ្ឋកម្មសង្គ្រាមពិតប្រាកដ។ យើងបានរកឃើញរណ្ដៅសាកសពរួម។ យើងបានរកឃើញមនុស្សដែលត្រូវគេចងដៃចងជើង និងមានស្នាមគ្រាប់កាំភ្លើងបាញ់ចំពីក្រោយក្បាល។ ពួកគេគឺជាជនស៊ីវិលយ៉ាងច្បាស់ ហើយពួកគេត្រូវបានគេសម្លាប់»។ នេះបើយោងតាមទីភ្នាក់ងារព័ត៌មាន AFP។
លោក Anton Herashchenko ទីប្រឹក្សារដ្ឋមន្ត្រីក្រសួងមហាផ្ទៃអ៊ុយក្រែន បានបញ្ជាក់នៅលើ Telegram ថា មានការវាយប្រហារតាមអាកាសចំទីក្រុង Odesa ដែលជាទីក្រុងកំពង់ផែយុទ្ធសាស្ត្ររបស់អ៊ុយក្រែននៅសមុទ្រខ្មៅកាលពីព្រឹកថ្ងៃអាទិត្យ។ ការវាយប្រហារនេះបានកើតឡើង បន្ទាប់ពីរដ្ឋាភិបាលអ៊ុយក្រែនបានព្រមានថា រុស្ស៊ីព្យាយាមពង្រឹងកងទ័ពរបស់ខ្លួននៅភាគខាងត្បូងអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
ការផ្ទុះដ៏លាន់ឮរំពងបានកើតឡើងនៅជុំវិញទីក្រុង Odesa ប្រទេសអ៊ុយក្រែនកាលពីព្រឹកថ្ងៃអាទិត្យ។ លោក Serhiy Bratchuk មន្ត្រីយោធាតំបន់ Odesa បានសរសេរនៅលើ Facebook ថា៖ «យើងនឹងឈ្នះ។ ចុះនរកទៅពួកសត្រូវ!»។ នេះបើយោងតាមបណ្ដាញព័ត៌មាន BBC។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅក្នុងសុន្ទរកថាជាវីដេអូទៅកាន់ប្រជាជាតិកាលពីយប់ថ្ងៃសៅរ៍ថា កងទ័ពអ៊ុយក្រែនបាញ់ផ្លោងលើកងទ័ពរុស្ស៊ីនៅពេលដែលកងទ័ពរុស្ស៊ីដកថយ។ លោកថ្លែងដូច្នេះថា៖ «ពួកគេ [កងទ័ពអ៊ុយក្រែន] កំពុងកម្ទេចមនុស្សទាំងអស់ដែលពួកគេអាចធ្វើបាន»។ នេះបើយោងតាមទីភ្នាក់ងារព័ត៌មាន Associated Press។
រដ្ឋាភិបាលអ៊ុយក្រែនបានបញ្ជាក់កាលពីថ្ងៃសៅរ៍ថា កងទ័ពអ៊ុយក្រែនបានដណ្ដើមកាន់កាប់ឡើងវិញនូវតំបន់ទាំងអស់នៅជុំវិញទីក្រុងកៀវ ដោយអះអាងថា ខ្លួនបានគ្រប់គ្រងទាំងស្រុងឡើងវិញជាលើកដំបូងបង្អស់នូវតំបន់ជុំវិញរដ្ឋធានីនេះ តាំងពីពេលដែលរុស្ស៊ីបានចាប់ផ្ដើមឈ្លានពានអ៊ុយក្រែនមក។ នេះបើយោងតាមទីភ្នាក់ងារព័ត៌មាន Reuters។
លោក Uldis Bariss នាយកប្រតិបត្តិនៃក្រុមហ៊ុន Conexus Baltic Grid ដែលជាក្រុមហ៊ុនប្រតិបត្តិផ្នែកស្តុកទុកឧស្ម័នធម្មជាតិរបស់ប្រទេសឡេតូនី បាននិយាយកាលពីថ្ងៃសោរ៍ថា បណ្ដាប្រទេសនៅតំបន់សមុទ្របាល់ទិកបានឈប់នាំចូលឧស្ម័នធម្មជាតិពីរុស្ស៊ីហើយ។ លោកបានបញ្ជាក់ប្រាប់វិទ្យុឡេតូនីដូច្នេះថា៖ «តាំងពីថ្ងៃទី ១ ខែមេសាមក ប្រទេសឡេតូនី អេស្ដូនី និងលីទុយអានីបានឈប់នាំចូលឧស្ម័នធម្មជាតិពីប្រទេសរុស្ស៊ីហើយ»។ នេះបើយោងតាមទីភ្នាក់ងារព័ត៌មាន AFP។

២១:៤៥ ៤.៤.២០២២

ថ្ងៃចន្ទ ទី៤ ខែមេសា៖

ប្រធានាធិបតីសហរដ្ឋអាមេរិកលោក Joe Biden នៅថ្ងៃចន្ទនេះ បានអំពាវនាវឱ្យមានការកាត់ទោសរឿងឧក្រិដ្ឋកម្មសង្គ្រាមទាក់ទិននឹងការចោទប្រកាន់ដែលថារុស្ស៊ីបានប្រព្រឹត្តអំពើឃោរឃៅលើជនស៊ីវិលនៅក្នុងក្រុង Bucha ប្រទេសអ៊ុយក្រែន និងបាននិយាយថា លោកចង់ឱ្យមានការដាក់ទណ្ឌកម្មបន្ថែមលើរដ្ឋាភិបាលរុស្ស៊ី។ លោក Biden បានហៅប្រធានាធិបតីរុស្ស៊ីថាជា «ឧក្រិដ្ឋជនសង្គ្រាម» និងហៅការសម្លាប់ទាំងនេះថាជា «ឧក្រិដ្ឋកម្មសង្គ្រាម»។ នេះបើយោងតាមទីភ្នាក់ងារសារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បាននិយាយថា ប្រទេសអ៊ុយក្រែនចង់ «បង្ហាញដល់ពិភពលោក» អំពីអ្វីដែលបានកើតឡើងនៅក្នុងក្រុង Bucha ដោយលោកបានសន្យាថា ប្រទេសអ៊ុយក្រែននឹង «មិនបញ្ឈប់» នោះទេ រហូតទាល់តែខ្លួនរកឃើញអ្នកទទួលខុសត្រូវចំពោះរឿងនេះ។ លោក Zelenskyy បានថ្លែងទៅកាន់អ្នកសារព័ត៌មាននៅក្នុងក្រុង Bucha នៅថ្ងៃចន្ទនេះថា «វាសំខាន់ខ្លាំងណាស់សម្រាប់ពួកយើងដែលអ្នកសារព័ត៌មានបានមកទីនេះ» នៅក្នុងក្រុង Bucha។ លោកបានបន្ថែមថា៖ «យើងខ្ញុំចង់ឱ្យអ្នកបង្ហាញដល់ពិភពលោកអំពីអ្វីដែលបានកើតឡើងនៅទីនេះ អំពីអ្វីដែលយោធារុស្ស៊ីបានធ្វើ អ្វីដែលសហព័ន្ធរុស្ស៊ីបានធ្វើនៅក្នុងប្រទេសអ៊ុយក្រែនដែលមានសន្តិភាព។ វាជារឿងសំខាន់ដែលអ្នកឃើញថា [សាកសព] ទាំងនេះគឺជា [សាកសពរបស់] ជនស៊ីវិល»។ នេះបើយោងតាមទូរទស្សន៍ CNN។
ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃចន្ទនេះបានហៅការសម្លាប់ជនស៊ីវិលនៅក្នុងក្រុង Bucha នៅជាយរដ្ឋធានីកៀវ ថាជា «អំពើប្រល័យពូជសាសន៍»។ លោកបាននិយាយក្នុងអំឡុងទស្សនកិច្ចរបស់លោកទៅកាន់ក្រុង Bucha ថា៖ «ទាំងនេះគឺជាឧក្រិដ្ឋកម្មសង្គ្រាម ហើយឧក្រិដ្ឋកម្មទាំងនេះនឹងត្រូវពិភពលោកទទួលស្គាល់ថាជាអំពើប្រល័យពូជសាសន៍»។ នេះបើយោងតាមទីភ្នាក់ងារសារព័ត៌មាន AFP។
អភិបាលក្រុង Mariupol លោក Vadym Boichenko បាននិយាយនៅថ្ងៃចន្ទនេះថា ទីក្រុង Mariupol ដែលជាទីក្រុងកំពង់ផែនៅភាគអាគ្នេយ៍ប្រទេសអ៊ុយក្រែន បានរងការបំផ្លិចបំផ្លាញអស់ «៩០%» បន្ទាប់ពីកងទ័ពរុស្ស៊ីបានឡោមព័ន្ធទីក្រុងនេះ។ លោកបានបញ្ជាក់នៅក្នុងសន្និសីទកាសែតមួយថា៖ «ដំណឹងដ៏សោកសៅគឺថា ហេដ្ឋារចនាសម្ព័ន្ធ ៩០% នៅក្នុងទីក្រុង [Mariupol] ត្រូវបានបំផ្លាញ ហើយហេដ្ឋារចនាសម្ព័ន្ធ ៤០% ទៀតនៅក្នុងទីក្រុងនេះគឺមិនអាចជួសជុលឱ្យដូចដើមវិញបានទេ»។ លោកបានបន្ថែមថា ពលរដ្ឋប្រហែល ១៣០.០០០ នាក់នៅជាប់គាំងនៅក្នុងទីក្រុងនោះនៅឡើយ។ នេះបើយោងតាមទីភ្នាក់ងារសារព័ត៌មាន AFP។

អគារមួយខូចខាតខ្ទេចខ្ទីក្នុងជម្លោះរវាងរុស្ស៊ីនិងអ៊ុយក្រែន នៅក្នុងទីក្រុង Mariupol ប្រទេសអ៊ុយក្រែន ថ្ងៃទី៣ ខែមេសា ឆ្នាំ២០២២។

សហភាពអឺរ៉ុបបានប្រកាសនៅថ្ងៃចន្ទនេះថា ខ្លួនបានបង្កើតក្រុមស៊ើបអង្កេតរួមមួយជាមួយនឹងប្រទេសអ៊ុយក្រែន ដើម្បីស៊ើបអង្កេតលើការចោទប្រកាន់ដែលថារុស្ស៊ីបានប្រព្រឹត្តឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ បន្ទាប់ពីមានទិដ្ឋភាពដ៏តក់ស្លុតអំពីសាកសពរបស់ជនស៊ីវិលនៅក្នុងក្រុង Bucha ប្រទេសអ៊ុយក្រែន នៅក្រោយពេលដែលកងទ័ពរុស្ស៊ីបានដកចេញពីតំបន់នោះ។ ប្រធានគណៈកម្មការអឺរ៉ុបនៃសហភាពអឺរ៉ុបអ្នកស្រី Ursula von der Leyen បានចូលរួមរំលែកទុក្ខជាមួយនឹងប្រធានាធិបតីអ៊ុយក្រែនលោក Volodymyr Zelenskyy អំពី «ការសម្លាប់ដ៏រន្ធត់តក់ស្លុត» ដែលបានបង្ហាញឡើងកាលពីចុងសប្ដាហ៍កន្លងទៅនេះ។ អ្នកស្រីបានថ្លែងថា៖ «សហភាពអឺរ៉ុបត្រៀមលក្ខណៈរួចរាល់នៅក្នុងការពង្រឹងកិច្ចប្រឹងប្រែងនេះតាមរយៈការបញ្ជូនក្រុមស៊ើបអង្កេតទៅប្រទេសអ៊ុយក្រែនដើម្បីគាំទ្រដល់ក្រុមរដ្ឋអាជ្ញារបស់អ៊ុយក្រែន។ ទីភ្នាក់ងារ Eurojust និងទីភ្នាក់ងារ Europol របស់សហភាពអឺរ៉ុបត្រៀមខ្លួនរួចរាល់ហើយនៅក្នុងការជួយជ្រោមជ្រែង»។ នេះបើយោងតាមទូរទស្សន៍ CNN។
រដ្ឋមន្ត្រីការបរទេសចក្រភពអង់គ្លេសអ្នកស្រី Liz Truss បាននិយាយនៅថ្ងៃចន្ទនេះថា ក្រុមប្រឹក្សាសិទ្ធិមនុស្សអង្គការសហប្រជាជាតិត្រូវតែព្យួរសមាជិកភាពរបស់រុស្ស៊ីនៅក្នុងក្រុមប្រឹក្សានេះ ដោយសារតែគេបានរកឃើញសាកសពនិងរណ្ដៅសាកសពរួមនៅក្នុងក្រុង Bucha ប្រទេសអ៊ុយក្រែន។ អ្នកស្រីបានបញ្ជាក់នៅលើ Twitterថា៖ «ដោយសារមានភស្តុតាងខ្លាំងក្លានៃឧក្រិដ្ឋកម្មសង្គ្រាម ដែលក្នុងនោះរួមមានទាំងសេចក្ដីរាយការណ៍នានាអំពីរណ្ដៅសាកសពរួមនិងការកាប់សម្លាប់ដ៏សាហាវយង់ឃ្នងនៅក្នុងក្រុង Bucha ផងដែរ រុស្ស៊ីមិនអាចនៅធ្វើជាសមាជិករបស់ក្រុមប្រឹក្សាសិទ្ធិមនុស្សអង្គការសហប្រជាជាតិបានទៀតទេ»។ នេះបើយោងតាមទីភ្នាក់ងារសារព័ត៌មាន Reuters។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិអ្នកស្រី Linda Thomas-Greenfield បាននិយាយនៅថ្ងៃចន្ទនេះថា សហរដ្ឋអាមេរិកនឹងស្នើមហាសន្និបាតអង្គការសហប្រជាជាតិឱ្យព្យួរសមាជិកភាពរបស់ប្រទេសរុស្ស៊ីនៅក្នុងក្រុមប្រឹក្សាសិទ្ធិមនុស្សអង្គការសហប្រជាជាតិ។ នេះបើយោងតាមទីភ្នាក់ងារសារព័ត៌មាន Reuters។ អ្នកស្រី Thomas-Greenfield កំពុងធ្វើទស្សនកិច្ចនៅក្នុងប្រទេសរ៉ូម៉ានី ដែលនៅទីនោះ អ្នកស្រីបានជួបពិភាក្សាជាមួយនឹងនាយករដ្ឋមន្ត្រីរ៉ូម៉ានីលោក Nicolae Ciuca អំពី «ការតាំងចិត្តរួមដើម្បីជួយអ៊ុយក្រែន»។ នេះបើយោងតាមការបញ្ជាក់របស់អ្នកស្រីនៅលើ Twitter។ អ្នកស្រីក៏បានទៅមើលប្រតិបត្តិការរបស់អង្គការ World Central Kitchen នៅក្នុងរដ្ឋធានីប៊ុយការ៉េសផងដែរ ហើយអ្នកស្រីបានថ្លែងអំណរគុណនៅលើ Twitter ចំពោះលោកចុងភៅ Jose Andres និងក្រុមរបស់លោកចំពោះការផ្ដល់ម្ហូបអាហារជូនដល់ជនភៀសខ្លួនអ៊ុយក្រែន។
ប្រធានាធិបតីរុស្ស៊ីលោក Vladimir Putin បានចុះហត្ថលេខាលើអនុក្រឹត្យមួយនៅថ្ងៃចន្ទនេះ ដើម្បីដាក់កំហិតទិដ្ឋាការលើពលរដ្ឋនៃបណ្ដាប្រទេសដែលរដ្ឋាភិបាលរុស្ស៊ីចាត់ទុកថា «អមិត្ត» ដែលនេះគឺជាការឆ្លើយតបទៅនឹងទណ្ឌកម្មដែលក្រុមបស្ចិមប្រទេសបានដាក់លើរុស្ស៊ីទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ អនុក្រឹត្យនេះ ដែលចូលជាធរមាននៅថ្ងៃចន្ទនេះ តម្រូវឱ្យផ្អាកប្រព័ន្ធផ្ដល់ទិដ្ឋាការដែលមានលក្ខណៈងាយស្រួលជាងមុន ជាមួយនឹងប្រទេសជាសមាជិកសហភាពអឺរ៉ុបមួយចំនួន ក៏ដូចជាជាមួយប្រទេសន័រវែស ស្វីស ដាណឺម៉ាក និងអ៊ីស្លង់ផងដែរ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីហិរញ្ញវត្ថុអាល្លឺម៉ង់លោក Christian Lindner បាននិយាយនៅថ្ងៃចន្ទនេះថា សហភាពអឺរ៉ុបនៅមិនទាន់អាចបញ្ឈប់ការនាំចូលឧស្ម័នពីប្រទេសរុស្ស៊ីដើម្បីជាការដាក់ទណ្ឌកម្មចំពោះការឈ្លានពានរបស់រុស្ស៊ីលើអ៊ុយក្រែនបានទេ បើទោះបីជាប្រទេសមួយចំនួននៅសហភាពអឺរ៉ុបថា វិធានការនេះគឺចាំបាច់ដើម្បីប្រឆាំងនឹងរុស្ស៊ីក៏ដោយ។ លោក Lindner បានបញ្ជាក់នៅពេលលោកធ្វើដំណើរទៅដល់ប្រទេសលុចសំបួដើម្បីពិភាក្សាជាមួយនឹងរដ្ឋមន្ត្រីហិរញ្ញវត្ថុនៃបណ្ដាប្រទេសប្រើប្រាក់អឺរ៉ូថា៖ «យើងត្រូវតែកាត់ផ្ដាច់រាល់ទំនាក់ទំនងសេដ្ឋកិច្ចជាមួយប្រទេសរុស្ស៊ី ប៉ុន្តែនៅពេលនេះ វាមិនអាចទៅរួចនោះទេនៅក្នុងការកាត់ផ្ដាច់ការផ្គត់ផ្គង់ឧស្ម័ន [ពីរុស្ស៊ី]។ យើងត្រូវការពេលមួយចំនួន»។ នេះបើយោងតាមទីភ្នាក់ងារសារព័ត៌មាន AFP។
អ្នកស្រី Liudmyla Denisova ប្រធានផ្នែកសិទ្ធិមនុស្សនៃសភារបស់ប្រទេសអ៊ុយក្រែន បាននិយាយនៅថ្ងៃចន្ទនេះថា ទង្វើរបស់រដ្ឋាភិបាលរុស្ស៊ីលើឈ្លើយសឹករំលោភលើអនុសញ្ញាទីក្រុងហ្សឺណែវ។ អ្នកស្រីបានបញ្ជាក់នៅលើ Facebook ថា ទាហានអ៊ុយក្រែនដែលរុស្ស៊ីបានដោះលែង «បានប្រាប់អំពីទង្វើអមនុស្សធម៌របស់រុស្ស៊ីដែលធ្វើលើពួកគេ ដោយរុស្ស៊ីបានឃុំពួកគេនៅទីវាល នៅក្នុងរណ្ដៅ នៅក្នុងយានដ្ឋាន។ ម្ដងម្កាល រុស្ស៊ីបានយកទាហានអ៊ុយក្រែនម្នាក់ចេញ ដោយវាយនឹងស្វ័យកាំភ្លើង និងបាញ់គំរាមនៅជិតត្រចៀក»។ នេះបើយោងតាមទូរទស្សន៍ CNN។
អ្នកនាំពាក្យរបស់នាយករដ្ឋមន្ត្រីចក្រភពអង់គ្លេសបានបញ្ជាក់នៅថ្ងៃចន្ទនេះថា លោកនាយករដ្ឋមន្ត្រី Boris Johnson មានបំណងបញ្ជូនជំនួយយោធាប្រភេទថ្មីទៅឱ្យប្រទេសអ៊ុយក្រែនដើម្បីឱ្យអ៊ុយក្រែនការពារខ្លួនពីការឈ្លានពានរបស់រុស្ស៊ី។ នេះបើយោងតាមទីភ្នាក់ងារសារព័ត៌មាន Reuters។
រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃចន្ទនេះថា លោកបាននិយាយជាមួយនឹងរដ្ឋមន្ត្រីការបរទេសចិនលោក Wang Yi ហើយលោកបានសម្ដែងការដឹងគុណចំពោះ «សាមគ្គីភាព» របស់ចិនជាមួយនឹង«ជនរងគ្រោះដែលជាជនស៊ីវិល [អ៊ុយក្រែន]» នៅក្នុងសង្គ្រាម។ លោក Kuleba បានសរសេរនៅលើ Twitter ថា៖ «យើងទាំងពីរមានការជឿជាក់ដូចគ្នាថា ការបញ្ចប់សង្គ្រាមប្រឆាំងអ៊ុយក្រែនគឺផ្ដល់ប្រយោជន៍រួមដល់សន្តិភាព សន្តិសុខស្បៀងអាហារពិភពលោក និងពាណិជ្ជកម្មអន្តរជាតិ»។
នៅក្នុងការប្រារព្ធទិវាយល់ដឹងពីគ្រាប់មីននៅថ្ងៃចន្ទនេះ អគ្គលេខាធិការអង្គការសហប្រជាជាតិលោក Antonio Guterres បានអំពាវនាវឱ្យមានការចាប់អារម្មណ៍លើបញ្ហានានាដែលប្រទេសអ៊ុយក្រែនកំពុងប្រឈម ដោយលោកបាននិយាយថា ការបោសសំអាតគ្រាប់មិនទាន់ផ្ទុះ គ្រាប់មីន និងគ្រាប់បែកចង្កោមនៅក្នុងប្រទេសអ៊ុយក្រែននឹងត្រូវការពេលរាប់ទសវត្សរ៍។
អង្គការសហប្រជាជាតិបានបញ្ជាក់នៅថ្ងៃចន្ទនេះថា ជនភៀសខ្លួនអ៊ុយក្រែនជាង ៤ លាន ២ សែននាក់បានភៀសខ្លួនពីប្រទេសតាំងពីពេលដែលរុស្ស៊ីបានឈ្លានពានអ៊ុយក្រែនមក។ លោកបន្ថែមថាស្ថានភាពមនុស្សធម៌ កាន់តែដុនដាប។ ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានលើកឡើងថា ពលរដ្ឋអ៊ុយក្រែន ៤.២១៥.០៤៧ នាក់ បានភៀសខ្លួនពីប្រទេសតាំងពីសង្គ្រាមបានចាប់ផ្ដើមកាលពីថ្ងៃទី ២៤ ខែកុម្ភៈមក ដែលមានការកើនឡើងចំនួន ៣៨.៦៤៦ នាក់ បើធៀបជាមួយនឹងតួលេខកាលពីថ្ងៃអាទិត្យ។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីប៉ូឡូញលោក Mateusz Morawiecki បាននិយាយនៅក្នុងសន្និសីទសារព័ត៌មានមួយនៅថ្ងៃចន្ទនេះថា ប្រទេសអាល្លឺម៉ង់គឺជាឧបសគ្គចម្បងចំពោះការដាក់ទណ្ឌកម្មតឹងតែងជាងមុនលើរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
មន្ត្រីសហភាពអឺរ៉ុបបានបញ្ជាក់នៅថ្ងៃចន្ទនេះថា ពួកគេកំពុងថ្លឹងថ្លែងទណ្ឌកម្មថ្មីដើម្បីដាក់លើរដ្ឋាភិបាលរុស្ស៊ី នៅក្នុងការឆ្លើយតបចំពោះការចោទប្រកាន់ថា កងទ័ពរុស្ស៊ីបានប្រព្រឹត្តអំពើឃោរឃៅលើជនស៊ីវិលអ៊ុយក្រែន។ លោក Josep Borrell ប្រធានផ្នែកគោលនយោបាយការបរទេសនៃសហភាពអឺរ៉ុប បាននិយាយថា សហភាពអឺរ៉ុបបានពិភាក្សាគ្នាបន្ទាន់អំពីទណ្ឌកម្មជុំថ្មី នៅពេលដែលសហភាពអឺរ៉ុបថ្កោលទោស «អំពើឃោរឃៅ» ដែលត្រូវបានគេរាយការណ៍ថាបានកើតឡើងនៅក្នុងទីក្រុងនានារបស់ប្រទេសអ៊ុយក្រែន ដែលបានស្ថិតក្រោមការកាន់កាប់របស់កងទ័ពដែលប្រធានាធិបតីរុស្ស៊ីលោក Vladimir Putin បានបញ្ជូនកាលពីប្រាំសប្តាហ៍មុន។ នេះបើយោងតាមទីភ្នាក់ងារព័ត៌មាន AFP។

អ្នកកាសែតម្នាក់ថតវីដេអូផ្ដិតយកទិដ្ឋភាពរណ្ដៅសពដ៏ធំមួយនៅក្រុង Bucha ដែលស្ថិតនៅជាយរដ្ឋធានីកៀវ ប្រទេសអ៊ុយក្រែន ថ្ងៃទី៣ ខែមេសា ឆ្នាំ២០២២។

ប្រធានាធិបតីបារាំងលោក Emmanuel Macron បាននិយាយនៅថ្ងៃចន្ទនេះថា ទណ្ឌកម្មបន្ថែមទៀតលើប្រទេសរុស្ស៊ីគឺត្រូវការជាចាំបាច់។ លោកថ្លែងដូច្នេះ បន្ទាប់ពីរដ្ឋាភិបាលអ៊ុយក្រែនបានចោទប្រកាន់កងទ័ពរុស្ស៊ីថាបានសម្លាប់ជនស៊ីវិលនៅក្នុងក្រុង Bucha។ នេះបើយោងតាមទីភ្នាក់ងារព័ត៌មាន Reuters។ លោក Macron បានបញ្ជាក់ប្រាប់វិទ្យុ France Inter របស់បារាំងថាមាន «ភស្តុតាងយ៉ាងច្បាស់ក្រឡែត» បង្ហាញថា កងទ័ពរុស្ស៊ីជាអ្នកទទួលខុសត្រូវចំពោះឧក្រិដ្ឋកម្មសង្គ្រាមនៅក្នុងប្រទេសអ៊ុយក្រែន។
ស្ថានបេសកកម្មចក្រភពអង់គ្លេសប្រចាំអង្គការសហប្រជាជាតិ ដែលជាប្រធានក្រុមប្រឹក្សាសន្តិសុខអង្គការសហប្រជាជាតិចំនួន១៥ប្រទេសសម្រាប់ខែមេសានេះ បានបញ្ជាក់ថា ក្រុមប្រឹក្សាសន្តិសុខអង្គការសហប្រជាជាតិនឹងពិភាក្សាអំពីបញ្ហាអ៊ុយក្រែននៅថ្ងៃអង្គារស្អែកដូចគ្រោងទុក ហើយនឹងមិនជួបប្រជុំនៅថ្ងៃចន្ទនេះតាមសំណើរបស់ប្រទេសរុស្ស៊ីនោះទេ។ នេះបើយោងតាមទីភ្នាក់ងារព័ត៌មាន Reuters។ កាលពីថ្ងៃអាទិត្យ រុស្ស៊ីបានស្នើក្រុមប្រឹក្សានេះឱ្យបើកការប្រជុំនៅថ្ងៃចន្ទនេះដើម្បីពិភាក្សាអំពីអ្វីដែលរុស្ស៊ីហៅថា «ការបង្កហេតុរបស់ក្រុមជ្រុលនិយមអ៊ុយក្រែន» នៅក្នុងក្រុងBucha ប្រទេសអ៊ុយក្រែន បន្ទាប់ពីរដ្ឋាភិបាលអ៊ុយក្រែនបានចោទកងទ័ពរុស្ស៊ីថាបានសម្លាប់ជនស៊ីវិលនៅទីនោះ។
ប្រធានផ្នែកស៊ើបអង្កេតរបស់ប្រទេសរុស្ស៊ីបានបញ្ជានៅថ្ងៃចន្ទនេះឱ្យមានការស៊ើបអង្កេតជាផ្លូវការលើអ្វីដែលលោកហៅថាជា «ការបង្កហេតុ» របស់អ៊ុយក្រែន បន្ទាប់ពីរដ្ឋាភិបាលអ៊ុយក្រែនបានចោទប្រកាន់យោធារុស្ស៊ីថាបានសម្លាប់រង្គាលជនស៊ីវិលនៅក្នុងក្រុង Bucha។ គណៈកម្មាធិការស៊ើបអង្កេតរបស់រុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយថា លោក Alexander Bastrykin ដែលជាប្រធានគណៈកម្មាធិការនេះ បានបញ្ជាឱ្យបើកការស៊ើបអង្កេតនេះឡើងផ្អែកលើមូលដ្ឋានដែលថា អ៊ុយក្រែន«មានចេតនាផ្សព្វផ្សាយ ព័ត៌មានមិនត្រឹមត្រូវ» អំពីកងកម្លាំងរុស្ស៊ីនៅក្នុងក្រុង Bucha។ នេះបើយោងតាមទីភ្នាក់ងារព័ត៌មាន Reuters។
ទីភ្នាក់ងារព័ត៌មាន TASS របស់រុស្ស៊ីបានរាយការណ៍ថា រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយនៅថ្ងៃចន្ទនេះថា ការរៀបរាប់របស់អ៊ុយក្រែនអំពីអ្វីដែលបានកើតឡើងនៅក្នុងក្រុង Bucha គឺជា «ការវាយប្រហារក្លែងក្លាយ»ក្នុងគោលបំណងបង្ខូចរដ្ឋាភិបាលរុស្ស៊ី។ លោក Lavrov បានបញ្ជាក់ថា សាកសពទាំងនោះគឺត្រូវបាន «រៀបចំឡើង» ហើយរូបភាពនៃសាកសពទាំងនោះ និងអ្វីដែលលោកអះអាងថា ជាការរៀបរាប់មិនត្រឹមត្រូវរបស់អ៊ុយក្រែនអំពីព្រឹត្តិការណ៍ទាំងនេះ ត្រូវបានបណ្ដាបស្ចិមប្រទេសនិងប្រទេសអ៊ុយក្រែនផ្សព្វផ្សាយនៅលើបណ្ដាញសង្គមអនឡាញ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយថា ប្រទេសអ៊ុយក្រែននឹងធ្វើការស៊ើបអង្កេតលើការចោទប្រកាន់ដែលថា កងទ័ពរុស្ស៊ីបានប្រព្រឹត្តអំពើឃោរឃៅលើជនស៊ីវិលអ៊ុយក្រែន ដែលការស៊ើបអង្កេតនេះនឹងមានការចូលរួមពីអ្នកស៊ើបអង្កេតអន្តរជាតិ។ នេះបើយោងតាមទីភ្នាក់ងារព័ត៌មាន The Associated Press។
អ្នកស្រី Michelle Bachelet ប្រធានផ្នែកសិទ្ធិមនុស្សរបស់អង្គការសហប្រជាជាតិបាននិយាយនៅថ្ងៃចន្ទនេះថា អ្នកស្រីមានអារម្មណ៍ «តក់ស្លុត» នៅពេលបានឃើញរូបភាពសាកសព នៅក្នុងក្រុង Bucha ជិតរដ្ឋធានីរបស់ប្រទេសអ៊ុយក្រែន ក្រោយពេលដែលរុស្ស៊ីបានដកកងទ័ពចេញ។ អ្នកស្រីបានព្រមានថា នេះអាចជាឧក្រិដ្ឋកម្មសង្គ្រាម។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសជប៉ុនលោក Yoshimasa Hayashi នៅថ្ងៃចន្ទនេះ បានថ្កោលទោសអំពើហិង្សា «ឃោរឃៅហួសប្រមាណ» ដែលធ្វើឡើងលើជនស៊ីវិលនៅជិតទីក្រុងកៀវ ប្រទេសអ៊ុយក្រែន ដែលនេះជាអ្វីដែលលោកចង់សំដៅលើការសម្លាប់ [ជនស៊ីវិល] នៅក្នុងក្រុង Bucha។ លោកបានប្រាប់អ្នកសារព័ត៌មាននៅក្នុងសន្និសីទព័ត៌មានជាមួយនឹងសមភាគីប៉ូឡូញរបស់លោកនៅក្នុងទីក្រុងវ៉ាសូវី ប្រទេសប៉ូឡូញថា៖ «ខ្ញុំរន្ធត់យ៉ាងខ្លាំងនៅពេលបានឮដំណឹងអំពីអំពើហិង្សាឃោរឃៅហួសប្រមាណលើជនស៊ីវិលនៅជិតទីក្រុងកៀវ»។ លោកបានបន្ថែមថា៖ «ការសម្លាប់ជនស៊ីវិលគឺជាការរំលោភលើច្បាប់មនុស្សធម៌អន្តរជាតិ និងជារឿងដែលមិនអាចទទួលយកបាននោះទេ ហើយខ្ញុំថ្កោលទោសខ្លាំងក្លាលើទង្វើទាំងនេះ»។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសចក្រភពអង់គ្លេសអ្នកស្រី Liz Truss មានគម្រោងធ្វើទស្សនកិច្ចទៅកាន់ប្រទេសប៉ូឡូញនៅថ្ងៃចន្ទនេះ ដើម្បីអំពាវនាវឱ្យមានវិធានការតឹងតែងជាងមុនសម្រាប់ភាពគឃ្លើនរបស់រុស្ស៊ី និងដើម្បីគាំទ្រអ៊ុយក្រែននៅក្នុងការចរចាសន្តិភាព។ នេះបើយោងតាមនេះទីភ្នាក់ងារព័ត៌មាន Reuters ដែលដកស្រង់ សេចក្ដីថ្លែងការណ៍របស់ការិយាល័យអ្នកស្រី។ អ្នកស្រីថ្លែងដូច្នេះថា៖ «[ប្រធានាធិបតីរុស្ស៊ីលោក Vladimir] Putin មិនទាន់បង្ហាញឱ្យឃើញថា លោកមានភាពម៉ឺងម៉ាត់ផ្នែកការទូតនៅឡើយទេ។ វិធានការតឹងតែងពីចក្រភពអង់គ្លេសនិងពីសម្ព័ន្ធមិត្តរបស់យើងគឺពិតជាសំខាន់ដើម្បីពង្រឹងជំហររបស់អ៊ុយក្រែននៅក្នុងការចរចា»។ នេះបើយោងតាមទីភ្នាក់ងារព័ត៌មាន Reuters។
ផ្នែកស៊ើបការណ៍សម្ងាត់យោធារបស់ចក្រភពអង់គ្លេសបានបញ្ជាក់នៅថ្ងៃចន្ទនេះថា កងទ័ពរុស្ស៊ីបន្តពង្រឹងកម្លាំងនិងរៀបចំឡើងវិញ ស្របពេលដែលពួកគេបានផ្ដោតការវាយប្រហាររបស់ខ្លួនឡើងវិញលើតំបន់ Donbas នៅភាគខាងកើតប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
មន្ត្រីមូលដ្ឋាននិយាយថាកងកម្លាំងរុស្ស៊ីមើលទៅទំនងជាដកចេញពីតំបន់ Sumy Oblast នៅភាគខាងជើងប្រទេសអ៊ុយក្រែន។ បណ្ដាញព័ត៌មាន CNN បានរាយការណ៍ថា លោក Dmytro Zhyvytsky ប្រធានរដ្ឋបាលតំបន់ Sumy បានសរសេរនៅលើ Telegram ថា៖ «កងទ័ពរបស់យើងដេញពួកគេចេញពីទំបន់នានានៅជិតទីក្រុងកៀវនិងទីក្រុង Chernihiv ហើយកន្លែងដែលបាត់បង់កន្លងមក។ កងទ័ពរុស្ស៊ីមិនទាន់ចេញអស់ពីតំបន់ទីក្រុង Konotop ១០០% នៅឡើយទេ។ កងទ័ពអ៊ុយក្រែនកំពុងកម្ទេចពួកគេបណ្ដើរៗ»។ តំបន់ Sumy ស្ថិតនៅជិតព្រំដែនប្រទេសរុស្ស៊ី និងជាទីតាំងវាយប្រយុទ្ធគ្នាខ្លាំងក្លានៅពេលរុស្ស៊ីឈ្លានពានអ៊ុយក្រែនដំបូងៗ។

២៣:១២ ៥.៤.២០២២

ថ្ងៃអង្គារ ទី៥ ខែមេសា៖

ប្រធានាធិបតីអ៊ុយក្រែនលោក Volodymyr Zelenskyy បានថ្លែងប្រាប់សភាប្រទេសអេស្ប៉ាញនៅថ្ងៃអង្គារនេះថា ក្រុមហ៊ុនអេស្ប៉ាញដែលនៅធ្វើប្រតិបត្តិការក្នុងប្រទេសរុស្ស៊ីត្រូវតែចាកចេញពីប្រទេសរុស្ស៊ី ដើម្បីបង្ខំឱ្យរដ្ឋាភិបាលរុស្ស៊ីលះបង់ចោលការឈ្លានពានរបស់ខ្លួនលើប្រទេសអ៊ុយក្រែន។ លោក Zelenskyy ថ្លែងទៅកាន់សភាអេស្ប៉ាញនេះ បន្ទាប់ពីលោកបានបញ្ចប់ការថ្លែងសុន្ទរកថារបស់លោកទៅកាន់ក្រុមប្រឹក្សាសន្តិសុខអង្គការសហប្រជាជាតិ។ នេះបើយោងតាមទីភ្នាក់ងារព័ត៌មាន Reuters។

ប្រធានាធិបតីអ៊ុយក្រែន លោក Volodymyr Zelenskyy ថ្លែងតាមអនឡាញនៅក្នុងកិច្ចប្រជុំពិសេសរបស់ក្រុមប្រឹក្សាសន្ដិសុខអង្គការសហប្រជាជាតិ ក្នុងទីក្រុងញូវយ៉ក សហរដ្ឋអាមេរិក ថ្ងៃទី៥ ខែមេសា ឆ្នាំ២០២២។

ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vassily Nebenzia បានច្រានចោលការចោទប្រកាន់ដែលថាកងទ័ពរុស្ស៊ីបានប្រព្រឹត្តិអំពើឃោរឃៅនៅក្នុងប្រទេសអ៊ុយក្រែន។ លោកបដិសេធដូច្នេះនៅពេលលោកថ្លែងនៅឯក្រុមប្រឹក្សាសន្តិសុខអង្គការសហប្រជាជាតិនៅថ្ងៃអង្គារនេះ។ លោកបាននិយាយថា មិនមានភស្តុតាងណាមួយពីសាក្សីណាម្នាក់អំពីការចោទប្រកាន់នេះទេ។ នៅក្នុងការថ្លែងដោយផ្ទាល់ទៅកាន់ប្រធានាធិបតីអ៊ុយក្រែនលោក Volodymyr Zelenskyy ដែលទើបបញ្ចប់ការថ្លែងរបស់លោកទៅកាន់ក្រុមប្រឹក្សាសន្តិសុខអង្គការសហប្រជាជាតិ លោក Nebenzia បាននិយាយថា រដ្ឋាភិបាលរុស្ស៊ីនឹងធ្វើឱ្យ «អ្នកយល់ថាខ្លួនឯងជាអ្នកខុសដោយសារតែការចោទប្រកាន់គ្មានមូលដ្ឋានលើកងទ័ពរុស្ស៊ី ដែលការចោទប្រកាន់នេះមិនមានការបញ្ជាក់អះអាងណាមួយពីសាក្សីណាម្នាក់ដែលឃើញហេតុការណ៍ផ្ទាល់ភ្នែកនោះទេ»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បានជំរុញអង្គការសហប្រជាជាតិនៅថ្ងៃអង្គារនេះឱ្យ «ចាត់វិធានការជាបន្ទាន់» លើការឈ្លានពានរបស់ប្រធានាធិបតីរុស្ស៊ីលោក Vladimir Putin លើប្រទេសអ៊ុយក្រែន ដោយលោកបានអំពាវនាវឱ្យមានការដករុស្ស៊ីចេញពីក្រុមប្រឹក្សាសន្តិសុខអង្គការសហប្រជាជាតិ។ លោក Zelenskyy បានអំពាវនាវដល់ក្រុមប្រឹក្សាសន្តិសុខអង្គការសហប្រជាជាតិដែលមានប្រទេសចំនួន ១៥ ជាសមាជិក ឱ្យ «ដករុស្ស៊ីចេញ ដោយសារតែរុស្ស៊ីគឺជាអ្នកគឃ្លើនឈ្លានពាននិងជាប្រភពនៃសង្គ្រាម ដើម្បីកុំឱ្យរុស្ស៊ីរារាំងការសម្រេចណាមួយ [របស់ក្រុមប្រឹក្សាសន្តិសុខអង្គការសហប្រជាជាតិ] អំពីភាពគឃ្លើននិងសង្គ្រាមរបស់ខ្លួន [ដែលធ្វើលើអ៊ុយក្រែន]»។ លោក Zelenskyy បានបន្ថែមនៅក្នុងសុន្ទរកថាជាវីដេអូរបស់លោកទៅកាន់ក្រុមប្រឹក្សាសន្តិសុខអង្គការសហប្រជាជាតិថា៖ «អង្គការសហប្រជាជាតិអាចត្រូវបិទចោលតែម្ដង។ អស់លោក លោកស្រី អ្នកនាងកញ្ញា! តើអ្នកត្រៀមខ្លួនរួចរាល់នៅក្នុងការបិទអង្គការសហប្រជាជតិហើយឬនៅ? តើពេលវេលានៃ [ការអនុវត្ត] ច្បាប់អន្តរជាតិកន្លងផុតហើយមែនទេ? ប្រសិនបើចម្លើយរបស់អ្នកគឺ «ទេ» នោះមានន័យថា អ្នកចាំបាច់ត្រូវចាត់វិធានការជាបន្ទាន់»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បានថ្លែងប្រាប់ក្រុមប្រឹក្សាសន្តិសុខអង្គការសហប្រជាជាតិថា «ការទទួលខុសត្រូវគឺត្រូវតែមាន» សម្រាប់ប្រទេសរុស្ស៊ី។ លោកលើកឡើងដូច្នេះ នៅពេលដែលលោកបានចោទប្រកាន់កងទ័ពរុស្ស៊ីថាបានប្រព្រឹត្តិ «ឧក្រិដ្ឋកម្មសង្គ្រាមដ៏អាក្រក់បំផុត» តាំងពីសម័យសង្គ្រាមលោកលើកទីពីរមក។ លោក Zelenskyy បានបង្ហាញវីដេអូខ្លីមួយអំពីសាកសពដែលត្រូវគេដុត ពោរពេញដោយឈាម និងដាច់ខ្ទេចខ្ទីរ ដែលក្នុងនោះមានទាំងកុមារផងដែរ នៅក្នុងក្រុង Irpin តំបន់ Dymerka ទីក្រុង Mariupol និងក្រុង Bucha ប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
អគ្គលេខាធិការអង្គការសហប្រជាជាតិលោក Antonio Guterres បានព្រមានក្រុមប្រឹក្សាសន្តិសុខអង្គការសហប្រជាជាតិនៅថ្ងៃអង្គារនេះថា ការឈ្លានពានរបស់រុស្ស៊ីលើអ៊ុយក្រែនគឺជាការប្រឈមដ៏ធំបំផុតមួយចំពោះប្រព័ន្ធរៀបរយអន្តរជាតិ «ដោយសារតែទិដ្ឋភាព ប្រពលភាព និងផលវិបាកនៃការឈ្លានពាននេះ»។ លោក Gutteres បាននិយាយថា សង្គ្រាមនេះបានដាក់សម្ពាធបន្ថែមដល់បណ្ដាប្រទេសកំពុងអភិវឌ្ឍន៍ ដោយមនុស្សជាង ១.២០០ លាននាក់ងាយរងគ្រោះជាពិសេសចំពោះការឡើងថ្លៃស្បៀងអាហារ ថាមពល និងជី។ លោកបានបន្ថែមថា៖ «យើងបានឃើញរួចមកហើយថា ប្រទេសមួយចំនួនបានវិវត្តពីប្រទេសដែលងាយរងគ្រោះទៅជាប្រទេសដែលមានវិបត្តិ ហើយយើងបានឃើញសញ្ញានៃភាពចលាចលសង្គមធ្ងន់ធ្ងរ»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ អគ្គលេខាធិការអង្គការសហប្រជាជាតិ លោក Antonio Guterres ថ្លែងទៅកាន់អ្នកសារព័ត៌មានអំពីការឈ្លានពានរបស់រុស្ស៊ីលើអ៊ុយក្រែន នៅទីស្នាក់ការអង្គការសហប្រជាជាតិ ទីក្រុងញូវយ៉ក សហរដ្ឋអាមេរិក ថ្ងៃទី១៤ ខែមីនា ឆ្នាំ២០២២។ REUTERS

អ្នកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បានស្នើនៅថ្ងៃអង្គារនេះនូវកញ្ចប់ទណ្ឌកម្មទី ៥ ដើម្បីដាក់លើរុស្ស៊ី។ អ្នកស្រីបាននិយាយថា ទណ្ឌកម្មនេះធ្វើឡើងដោយសារតែរុស្ស៊ីធ្វើ «សង្គ្រាមឃោរឃៅនិងគ្មានមេត្តា» នៅក្នុងប្រទេសអ៊ុយក្រែន។ នៅក្នុងវីអេដូខ្លីមួយដែលអ្នកស្រីបង្ហោះនៅលើ Twitter អ្នកស្រីបានបង្ហាញវិធានការថ្មីចំនួន ៦ ដែលក្នុងនោះមានដូចជាការហាមឃាត់ការនាំចូលធ្យូងថ្មពីប្រទេសរុស្ស៊ី ការហាមឃាត់ប្រតិបត្តិការសាច់ប្រាក់លើធនាគារសំខាន់ៗចំនួន ៤ របស់រុស្ស៊ី ការហាមឃាត់ក្រុមហ៊ុនដឹកជញ្ជូនរបស់រុស្ស៊ីមិនឱ្យចូលកំពង់ផែនិងឆ្លងកាត់ផ្លូវរបស់បណ្ដាប្រទេសសហភាពអឺរ៉ុប ការហាមឃាត់បន្ថែមទៀតលើការនាំចេញផ្នែកបច្ចេកទេសនិងគ្រឿងយន្តទៅកាន់ប្រទេសរុស្ស៊ី ការហាមឃាត់ថ្មីលើការនាំចូលជាក់លាក់មួយចំនួនពីរុស្ស៊ី ការហាមឃាត់ក្រុមហ៊ុនរុស្ស៊ីពីលទ្ធកម្មសាធារណៈ និងការដាក់ទណ្ឌកម្មបន្ថែមទៀតលើបុគ្គលមួយចំនួន។
រដ្ឋមន្ត្រីហិរញ្ញវត្ថុបារាំងលោក Bruno Le Maire បាននិយាយនៅថ្ងៃអង្គារនេះថា មាន «ការប្ដេជ្ញាទាំងស្រុង» ពីសមាជិកសភាពអឺរ៉ុបទាំង ២៧ ប្រទេសនៅក្នុងការដាក់ទណ្ឌកម្មប្រឆាំងនឹងរុស្ស៊ី ដែលទណ្ឌកម្មនេះអាចសំដៅលើប្រេងឥន្ធនៈនិងធ្យូងថ្ម ដោយសារមានភស្តុតាងបង្ហាញថា កងទ័ពរុស្ស៊ីបានសម្លាប់ជនស៊ីវិលអ៊ុយក្រែនដោយចេតនា។ នេះបើយោងតាមទីភ្នាក់ងារព័ត៌មាន Associated Press។
អង្គការសហប្រជាជាតិបានបញ្ជាក់នៅថ្ងៃអង្គារនេះថា ពលរដ្ឋអ៊ុយក្រែនជិត ៤ លាន ២ សែន ៥ ម៉ឺននាក់ បានភៀសខ្លួនចេញពីប្រទេសអ៊ុយក្រែនក្នុងអំឡុងពេលនៃការឈ្លានពានរបស់រុស្ស៊ី ហើយពលរដ្ឋអ៊ុយក្រែន ៧ លាន ១ សែននាក់ទៀតត្រូវបានគេគិតថាកំពុងភៀសខ្លួននៅក្នុងប្រទេសអ៊ុយក្រែនផ្ទាល់។ ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានលើកឡើងថា ពលរដ្ឋអ៊ុយក្រែន ៤.២៤៤.៥៩៥ នាក់ បានភៀសខ្លួនពីប្រទេសតាំងពីសង្គ្រាមបានចាប់ផ្ដើមកាលពីថ្ងៃទី ២៤ ខែកុម្ភៈមក ដែលមានការកើនឡើងចំនួន ២៩.៥៤៨ នាក់ បើធៀបជាមួយនឹងតួលេខកាលពីថ្ងៃចន្ទ។ នេះបើយោងតាមទីភ្នាក់ងារព័ត៌មាន AFP។
លោក Alexander Alimoy អ្នកតំណាងរងអចិន្ត្រៃយ៍របស់ប្រទេសរុស្ស៊ីប្រចាំអង្គការសហប្រជាជាតិនៅទីក្រុងហ្សឺណែវ ប្រទេសស្វីស បានរិះគន់អាជ្ញាធរអ៊ុយក្រែននៅថ្ងៃអង្គារនេះ រឿងមហន្តរាយមនុស្សធម៌នៅក្នុងទីក្រុង Kharkiv ប្រទេសអ៊ុយក្រែន ដោយបានចោទប្រកាន់កងទ័ពអ៊ុយក្រែនថាបានរារាំងច្រករបៀងមនុស្សធម៌ និងបានចោទប្រកាន់ថាកងជីវពលស្ដាំនិយមបានបង្កើតឡើងនៅក្នុងសាលារៀនមួយកន្លែង។ លោកមិនបានផ្ដល់ភស្តុតាងអំពីការអះអាងរបស់លោកទាំងនេះទេ។ អភិបាលក្រុង Kharkiv បានច្រានចោលការចោទប្រកាន់នេះថាជា «ការបំភ្លៃការពិត»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេអ៊ីស្រាអែលលោក Yair Lapid នៅថ្ងៃអង្គារនេះបានថ្កោលទោសប្រទេសរុស្ស៊ីថាបានប្រព្រឹត្តិ «ឧក្រិដ្ឋកម្មសង្គ្រាម» នៅក្នុងប្រទេសអ៊ុយក្រែន។ លោកបានបញ្ជាក់នៅក្នុងសេចក្ដីថ្លែងការណ៍មួយថា៖ «រូបភាពនិងភស្តុតាងដែលបានពីអ៊ុយក្រែនមើលទៅគួរឱ្យរន្ធត់។ កងទ័ពរុស្ស៊ីបានប្រព្រឹត្តិឧក្រិដ្ឋកម្មសង្គ្រាមប្រឆាំងនឹងជនស៊ីវិលដែលគ្មានអ្វីការពារខ្លួន។ ខ្ញុំថ្កោលទោសខ្លាំងក្លាលើឧក្រិដ្ឋកម្មសង្គ្រាមទាំងនេះ»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលស្លូវ៉ានីបានបញ្ជាក់នៅថ្ងៃអង្គារនេះថា មន្ត្រីការទូតរុស្ស៊ី ៣៣ នាក់ត្រូវបានបណ្ដេញចេញពីប្រទេស បន្ទាប់ពីមានការរកឃើញសាកសពជនស៊ីវិលអ៊ុយក្រែននៅក្នុងក្រុង Bucha ប្រទេសអ៊ុយក្រែន ដែលរដ្ឋាភិបាលអ៊ុយក្រែនបានចោទប្រកាន់កងទ័ពរុស្ស៊ីថាជាអ្នកសម្លាប់ជនស៊ីវិលទាំងនេះ។ នេះបើយោងតាមទីភ្នាក់ងារព័ត៌មាន AFP។
អគ្គលេខាធិការអង្គការអូតង់ (NATO) លោក Jens Stoltenberg បាននិយាយនៅថ្ងៃអង្គារនេះថា ប្រទេសរុស្ស៊ីមិនលះបង់ចោលការវាយប្រហាររបស់ខ្លួនលើប្រទេសអ៊ុយក្រែននោះទេ ហើយប្រទេសរុស្ស៊ីនឹងព្យាយាមផ្ដោតឡើងវិញលើការវាយដណ្ដើមកាន់កាប់តំបន់ Donbas នៅក្នុងពេលប៉ុន្មានសប្ដាហ៍ខាងមុខ។ លោក Stoltenberg បានបញ្ជាក់នៅក្នុងសន្និសីទសារព័ត៌មានមួយដូច្នេះថា៖ «ឥឡូវនេះ យើងឃើញមានការចល័តកងទ័ពរបស់រុស្ស៊ីគួរឱ្យកត់សម្គាល់ចេញពីរដ្ឋធានីកៀវ ដើម្បីរៀបចំក្រុមឡើងវិញ បំពាក់អាវុធឡើងវិញ និងផ្គត់ផ្គង់ឡើងវិញ និងបង្វែរការផ្តោតរបស់ពួកគេទៅភាគខាងកើត [ក្នុងប្រទេសអ៊ុយក្រែន]។ លោកបានបន្ថែមថា៖ «នៅក្នុងពេលប៉ុន្មានសប្ដាហ៍ខាងមុខ យើងរំពឹងថា រុស្ស៊ីនឹងរុលបន្ថែមចូលទៅតំបន់ភាគខាងកើតនិងភាគខាងត្បូងនៃប្រទេសអ៊ុយក្រែន ដើម្បីព្យាយាមដណ្ដើមកាន់កាប់តំបន់ Donbas ទាំងមូល និងដើម្បីសាងសង់ផ្លូវដីភ្ជាប់ទៅតំបន់ Crimea ដែលរុស្ស៊ីកំពុងកាន់កាប់»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ អគ្គលេខាធិការអង្គការអូតង់ លោក Jens Stoltenberg ធ្វើសន្និសីទសារព័ត៌មានមួយស្ដីពីការឈ្លានពានរបស់រុស្ស៊ីលើអ៊ុយក្រែន នៅទីក្រុងព្រុចសែល ប្រទេសបែលហ្សិក ថ្ងៃទី២៤ ខែមីនា ឆ្នាំ២០២២។ REUTERS

រដ្ឋអាជ្ញាប្រទេសបារាំងបានបញ្ជាក់នៅថ្ងៃអង្គារនេះថា ពួកគេបានបើកការស៊ើបអង្កេតថ្មីចំនួន ៣ ករណីលើការសង្ស័យនៃឧក្រិដ្ឋកម្មសង្គ្រាមប្រព្រឹត្តលើជនជាតិបារាំងនៅក្នុងអំឡុងពេលរុស្ស៊ីឈ្លានពានអ៊ុយក្រែន។ ការិយាល័យរដ្ឋអាជ្ញាបារាំងបានបញ្ជាក់នៅក្នុងសេចក្ដីថ្លែងការណ៍មួយថា ករណីទាំងនេះបានធ្វើឡើងនៅក្នុងទីក្រុង Mariupol ទីក្រុង Hostomel និងទីក្រុង Chernihiv នៃប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
អធិការបតីប្រទេសអូទ្រីសលោក Karl Nehammer មានគម្រោងជួបជាមួយប្រធានាធិបតីអ៊ុយក្រែនលោក Volodymyr Zelenskyy នៅក្នុងប្រទេសអ៊ុយក្រែននៅពេលប៉ុន្មានថ្ងៃខាងមុខ ដើម្បីពិភាក្សាអំពីការគាំទ្រប្រទេសអ៊ុយក្រែនផ្នែកមនុស្សធម៌និងផ្នែកនយោបាយ។ នេះបើយោងតាមការបញ្ជាក់របស់ខុទ្ទកាល័យរបស់លោកនៅក្នុងសេចក្ដីថ្លែងការណ៍មួយនៅថ្ងៃអង្គារនេះ។ សេចក្ដីថ្លែងការណ៍នោះបានលើកឡើងថា៖ «សម្រាប់ហេតុផលសន្តិសុខ សេចក្ដីលំអិតបន្ថែមនៃដំណើរទស្សនកិច្ចនេះនឹងមិនប្រកាសនៅពេលឥឡូវនេះទេ»។ នេះបើយោងតាមទីភ្នាក់ងារព័ត៌មាន Reuters។
អ្នកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុបនឹងធ្វើដំណើរទៅកាន់រដ្ឋធានីកៀវ ប្រទេសអ៊ុយក្រែន «នៅសប្ដាហ៍នេះ» អមដំណើរដោយប្រធានផ្នែកការទូតរបស់សហភាពអឺរ៉ុបលោក Josep Borrell។ នេះបើយោងតាមការបញ្ជាក់របស់លោក Eric Mamer ដែលជាអ្នកនាំពាក្យរបស់អ្នកស្រី von der Leyen នៅថ្ងៃអង្គារនេះ។ លោក Mamer បានសរសេរនៅលើ Twitter ដូច្នេះថា មន្ត្រីជាន់ខ្ពស់បំផុតទាំងពីររូបនៃសហភាពអឺរ៉ុបនេះ «នឹងធ្វើដំណើរទៅកាន់ទីក្រុងកៀវនៅសប្ដាហ៍នេះដើម្បីជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy នៅមុនព្រឹត្តិការណ៍ «ក្រោកឈរដើម្បីអ៊ុយក្រែន (#StandUpForUkraine) ធ្វើឡើងនៅក្នុងទីក្រុងវ៉ាសូវី ប្រទេសប៉ូឡូញ នៅថ្ងៃសៅរ៍ខាងមុខ»។ នេះបើយោងតាមទីភ្នាក់ងារព័ត៌មាន AFP។
លោក Vitali Klitschko អភិបាលរដ្ឋធានីកៀវ ប្រទេសអ៊ុយក្រែន បាននិយាយនៅថ្ងៃអង្គារនេះថា លំហូរនៃ «លុយប្រឡាក់ឈាម» ចូលទៅប្រទេសរុស្ស៊ីត្រូវតែបញ្ឈប់។ លោកថ្លែងដូច្នេះ ស្របពេលដែលក្រុមបស្ចិមប្រទេសត្រៀមដាក់ទណ្ឌកម្មថ្មីលើរុស្ស៊ី បន្ទាប់ពីសាកសពជនស៊ីវិលអ៊ុយក្រែនត្រូវបានគេឃើញតាមដងផ្លូវក្នុងក្រុង Buchaកាន់កាប់ដោយកម្លាំងរុស្ស៊ីឈ្លានពាននៅប្រទេសអ៊ុយក្រែន។ លោក Klitschko ដែលស្លៀកពាក់ឯកសណ្ឋានយោធបានប្រាប់សន្និសីទអភិបាលក្រុងនៅក្នុងទីក្រុងហ្សឺណែវ ប្រទេសស្វីសតាមរយៈវីដេអូថា៖ «រាល់ប្រាក់អឺរ៉ូទាំងអស់ រាល់លុយទាំងអស់ដែលអ្នកទទួលបានពីរុស្ស៊ីឬក៏អ្នកបញ្ជូនទៅកាន់ប្រទេសរុស្ស៊ីគឺមានដិតដាមដោយឈាម។ វាជាលុយប្រឡាក់ឈាម ហើយឈាមដែលប្រឡាក់នៅលើលុយនេះគឺជាឈាមរបស់ប្រជាពលរដ្ឋអ៊ុយក្រែន»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីនៅថ្ងៃអង្គារនេះបានចោទប្រកាន់រដ្ឋាភិបាលអ៊ុយក្រែនថាបានរៀបចំឡើងនូវការស្លាប់របស់ជនស៊ីវិលនៅតាមទីតាំងមួយចំនួន ដើម្បីដាក់ការចោទប្រកាន់លើរដ្ឋាភិបាលក្រុងមូស្គូ។ ក្រសួងការពារជាតិរុស្ស៊ីបានអះអាងដូចនេះ បន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានទាមទារឱ្យមានការដាក់ទណ្ឌកម្មតឹងតែងថ្មីលើរុស្ស៊ីទាក់ទិននឹងការស្លាប់របស់ជនស៊ីវិលអ៊ុយក្រែននៅក្នុងក្រុង Bucha ប្រទេសអ៊ុយក្រែនដែលនាំឱ្យមានការថ្កោលទោសជាអន្តរជាតិ។ ក្រសួងការពារជាតិរុស្ស៊ីបានបញ្ជាក់នៅថ្ងៃអង្គារនេះថា យោធាអ៊ុយក្រែនបានថតវីដេអូក្លែងក្លាយដែលមានចេតនាបង្ហាញថា «កងទ័ពរុស្ស៊ីបានសម្លាប់ជនស៊ីវិលស្លូតត្រង់»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអង្គារនេះថា ការចរចាជាមួយរុស្ស៊ីគឺជាជម្រើសតែមួយគត់សម្រាប់ប្រទេសរបស់លោក បើទោះបីជាលទ្ធភាពនៃការចរចានៅពេលឥឡូវនេះនៅតែជា «បញ្ហាប្រឈម» ក៏ដោយ។ ប៉ុន្តែនៅក្នុងការលើកឡើងតាមទូរទស្សន៍ជាតិ លោកបាននិយាយថា វាអាចទៅរួចដែលថា លោកនិងប្រធានាធិបតីរុស្ស៊ីលោក Vladimir Putin នឹងមិនចរចាគ្នាដោយផ្ទាល់។ នេះបើយោងតាមទីភ្នាក់ងារព័ត៌មាន Reuters។

រដ្ឋាភិបាលរុស្ស៊ីនៅថ្ងៃអង្គារនេះបាននិយាយថាវិធានការរបស់ប្រទេសមួយចំនួននៅអឺរ៉ុប ក្នុងការបណ្ដេញមន្ត្រីការទូតរុស្ស៊ីនោះគឺជា «វិធានការគិតខ្លី» ដែលបានត្រឹមតែធ្វើឱ្យស្មុគស្មាញដល់ទំនាក់ទំនងតែប៉ុណ្ណោះ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានថា៖ «ការកាត់បន្ថយឱកាសសម្រាប់ទំនាក់ទំនងការទូតនៅក្នុងស្ថានការណ៍ដែលមានវិបត្តិដ៏លំបាកដែលមិនធ្លាប់មានពីមុនមកនេះគឺជាវិធានការដែលមិនគិតវែងឆ្ងាយ ដែលនឹងធ្វើឱ្យស្មុគស្មាញបន្ថែមទៀតដល់ទំនាក់ទំនងរបស់យើង ដែលជាការចាំបាច់ដើម្បីស្វែងរកដំណោះស្រាយ»។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសអេស្ប៉ាញលោក Jose Manuel Albares បាននិយាយនៅថ្ងៃអង្គារនេះថា ប្រទេសអេស្ប៉ាញនឹងបណ្ដេញមន្ត្រីការទូតនិងបុគ្គលិកស្ថានទូតរុស្ស៊ីប្រហែល ២៥ នាក់ចេញ ពីប្រទេសដោយសារតែការឈ្លានពានរបស់រុស្ស៊ីលើអ៊ុយក្រែន។ លោកបានបញ្ជាក់នៅក្នុងសន្និសីទសារព័ត៌មានមួយថា មន្ត្រីការទូតនិងបុគ្គលិកស្ថានទូតរុស្ស៊ីទាំងនេះ «តំណាងឱ្យការគំរាមកំហែងចំពោះផលប្រយោជន៍របស់ប្រទេសអេស្ប៉ាញ» ហើយពួកគេនឹងត្រូវបណ្ដេញចេញ «ជាបន្ទាន់»។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសអ៊ីតាលីលោក Luigi Di Maio បាននិយាយនៅថ្ងៃអង្គារនេះថា ប្រទេសអ៊ីតាលីបានបណ្ដេញមន្ត្រីការទូតរុស្ស៊ី ៣០ នាក់ចេញពីប្រទេស ដោយសារតែក្ដីបារម្ភផ្នែកសន្តិសុខ ហើយបើយោងតាមទីភ្នាក់ងារព័ត៌មាន TASS របស់រុស្ស៊ី ប្រទេសរុស្ស៊ីគ្រោងនឹងចាត់វិធានការសងសឹក។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
រដ្ឋមន្ត្រីការបរទេសដាណឺម៉ាកលោក Jeppe Kofod បានបញ្ជាក់នៅថ្ងៃអង្គារនេះថា ប្រទេសរបស់លោកបានបណ្ដេញ «មន្ត្រីស៊ើបការណ៍សម្ងាត់» របស់រុស្ស៊ី ១៥ នាក់ ដែលបានចុះឈ្មោះជាមន្ត្រីការទូតនៅក្នុងប្រទេសដាណឺម៉ាក។ វិធានការរបស់ប្រទេសដាណឺម៉ាកនេះបានធ្វើឡើង បន្ទាប់ពីប្រទេសអាល្លឺម៉ង់និងបារាំងបានចាត់វិធានការស្រដៀងគ្នានេះដែរ។ នេះបើយោងតាមទីភ្នាក់ងារព័ត៌មាន AFP។
ទីក្រុង Kramatorsk នៅភាគខាងកើតប្រទេសអ៊ុយក្រែនបានរងការវាយប្រហារដោយកងទ័ពអាកាសរបស់រុស្ស៊ីនៅព្រឹកថ្ងៃអង្គារនេះ បន្ទាប់ពីកងទ័ពរុស្ស៊ីបាននិយាយថា ពួកគេបានបង្វែរទិសដៅយោធាសំដៅលើតំបន់ភាគខាងកើតនៃប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
កងទ័ពអ៊ុយក្រែនបានដណ្ដើមកាន់កាប់ឡើងវិញនូវភូមិសាស្ត្រសំខាន់ភាគខាងជើង ដោយបង្ខំដោយកងទ័ពរុស្ស៊ីដកថយចេញពីតំបន់នៅជុំវិញទីក្រុង Chernihiv និងតំបន់ភាគខាងជើងនៃរដ្ឋធានីកៀវ។ នេះបើយោងតាមការបញ្ជាក់របស់ផ្នែកស៊ើបការណ៍សម្ងាត់យោធារបស់ចក្រភពអង់គ្លេសនៅថ្ងៃអង្គារនេះ។
រដ្ឋាភិបាលជប៉ុនបានដឹកជនភៀសខ្លួនអ៊ុយក្រែន ២០ នាក់ ទៅកាន់ទីក្រុងតូក្យូ ប្រទេសជប៉ុននៅថ្ងៃអង្គារនេះ ដើម្បីបង្ហាញការគាំទ្រដល់កិច្ចប្រឹងប្រែងជាអន្តរជាតិជួយអ៊ុយក្រែន។ ជនភៀសខ្លួនអ៊ុយក្រែនទាំង ២០ នាក់នេះមានអាយុចាប់ពី ៦ ដល់ ៦៦ ឆ្នាំ ហើយក្នុងចំណោមនោះមានស្ត្រី ១៥ នាក់។ ជនភៀសខ្លួនទាំងនេះមិនមែនជាជនភៀសខ្លួនអ៊ុយក្រែនដំបូងដែលធ្វើដំណើរដល់ជប៉ុនតាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈនោះទេ ប៉ុន្តែគឺជាជនភៀសខ្លួនដំបូងដែលដឹកទៅកាន់ប្រទេសជប៉ុនតាមយន្តហោះពិសេសរបស់រដ្ឋាភិបាលជប៉ុន ដែលរៀបចំដោយរដ្ឋមន្ត្រីការបរទេសជប៉ុន។ នេះបើយោងតាមទីភ្នាក់ងារព័ត៌មាន Reuters។ មិនយូរប៉ុន្មានមុនពេលលោកនិងជនភៀសខ្លួនអ៊ុយក្រែនចេញដំណើរទៅកាន់ប្រទេសជប៉ុនរដ្ឋមន្ត្រីការបរទេសជប៉ុនលោក Yoshimasa Hayashi បានប្រាប់អ្នកសារព័ត៌មាននៅក្នុងប្រទេសប៉ូឡូញថា៖ «រដ្ឋាភិបាលជប៉ុនប្ដេជ្ញាផ្ដល់ការផ្គត់ផ្គង់ជាអតិបរមាដល់ពលរដ្ឋអ៊ុយក្រែនទាំង ២០ នាក់នេះ ដើម្បីជួយឲ្យពួកគេបានរស់នៅដោយសុវត្ថិភាពនៅក្នុងប្រទេសជប៉ុន ទោះបីជាពួកគេឃ្លាតឆ្ងាយពីមាតុភូមិរបស់ខ្លួនក៏ដោយ»។
ក្រុមប្រឹក្សាសន្តិសុខអង្គការសហប្រជាជាតិគ្រោងនឹងផ្ដោតកិច្ចប្រជុំនៅថ្ងៃអង្គារនេះលើករណីសម្លាប់ជនស៊ីវិលនៅក្នុងប្រទេសអ៊ុយក្រែន គឺមួយថ្ងៃបន្ទាប់ពីប្រធានាធិបតីសហរដ្ឋអាមេរិកលោក Joe Biden បាននិយាយថា ប្រធានាធិបតីរុស្ស៊ីលោក Vladimir Putin គួរតែប្រឈមនឹងការកាត់ទោសពីបទឧក្រិដ្ឋកម្មសង្គ្រាម។ ចក្រភពអង់គ្លេសគឺជាប្រធាននៃក្រុមប្រឹក្សានេះប្រចាំខែមេសានេះ ហើយឯកអគ្គរាជទូតចក្រភពអង់គ្លេសប្រចាំអង្គការសហប្រជាជាតិអ្នកស្រី Barbara Woodward បានប្រាប់អ្នកសារព័ត៌មានថា បញ្ហានៃការសម្លាប់ជនស៊ីវិលអ៊ុយក្រែនក្នុងអំឡុងពេលឈ្លានពានរបស់រុស្ស៊ីលើអ៊ុយក្រែននោះគឺជាបញ្ហា «ចម្បង» និងជាបញ្ហា «ស្នូល» នៃកិច្ចប្រជុំនេះ។
ស្ថានបេសកកម្មការទូតចក្រភពអង់គ្លេសប្រចាំអង្គការសហប្រជាជាតិបានបញ្ជាក់កាលពីថ្ងៃចន្ទថា ប្រធានាធិបតីអ៊ុយក្រែនលោក Volodymyr Zelenskyy នឹងថ្លែងនៅថ្ងៃអង្គារនេះក្នុងអំឡុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិអំពីសង្គ្រាមនៅក្នុងប្រទេសរបស់លោក។ នេះគឺជាការថ្លែងសុន្ទរកថាលើកដំបូងរបស់លោក Zelenskyy ទៅកាន់ក្រុមប្រឹក្សាសន្តិសុខអង្គការសហប្រជាជាតិ តាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន AFP។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃ​សៅរ៍​ ទី​២ ខែ​មេសា៖

ថ្ងៃ​អាទិត្យ ទី៣​ ខែមេសា៖

ថ្ងៃចន្ទ ទី៤ ខែមេសា៖

ថ្ងៃអង្គារ ទី៥ ខែមេសា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

ថ្ងៃសៅរ៍ ទី២ ខែមេសា៖

ថ្ងៃអាទិត្យ ទី៣ ខែមេសា៖