- ដោយ ម៉ែន គឹមសេង
លោកចូ បៃដិនថ្លែងពីការប្តេជ្ញាជួយតិអ៊ុយក្រែននិងកំណើនសេដ្ឋកិច្ចក្នុងសុន្ទរកថាស្ថានភាពសហព័ន្ធដំបូង
នៅក្នុងសុន្ទរកថាស្តីពីស្ថានភាពសហព័ន្ធលើកទីមួយរបស់លោកកាលពីយប់ថ្ងៃអង្គារ លោកប្រធានាធិបតីសហរដ្ឋអាមេរិក Joe Biden បានប្រមូលការគាំទ្រពីគណបក្សនយោបាយធំៗទាំង២ដើម្បីជួយពលរដ្ឋអ៊ុយក្រែនប្រយុទ្ធប្រឆាំងការឈ្លានពានរបស់រុស្ស៊ី។ លោកបៃដិនក៏ថ្លែងពីកំណើនសេដ្ឋកិច្ចផងដែរ។ លោកម៉ែន គឹមសេងនៃវីអូអេរាយការណ៍បន្ថែមក្នុងកម្មវិធី«ប្រភពច្បាស់ការណ៍»(Primary Sources)៕
ក្រុមស្ត្រីនិងកុមារអ៊ុយក្រែន ធ្វើដំណើរតាមផ្លូវច្រើនថ្ងៃស្វែងរកកន្លែងសុវត្ថិភាព
ពីក្រុង Kyiv ទៅ Zhitomyr បន្ទាប់មកទៅ Rivne ហើយតមក ទៅដល់ព្រំដែនប៉ូឡូញចូលរួមជាក្បួនឡាន និងមនុស្សស្ពាយកាបូបចម្ងាយ១០០គ.ម. ដើរតាមដងផ្លូវ។ នេះ ជាអ្វីដែលកើតមានដល់អ្នកស្រី Snizhana នៅពេលអ្នកស្រីចាកចេញពីក្រុង Kyiv កាលពីថ្ងៃទី ២៥ ខែកុម្ភៈ ដើម្បីធ្វើដំណើរទៅកាន់ប្រទេសអាល្លឺម៉ង់ ដែលអ្នកស្រីមានញាតិសន្តាននៅទីនោះ។ អ្នកស្រី Snizhana ដែលជាជនភៀសខ្លួនអ៊ុយក្រែននិយាយថា៖
«យើងត្រូវតែទៅកាន់ព្រំដែនផ្សេងមួយទៀត គឺព្រំដែនជាមួយប្រទេសស្លូវ៉ាគី។ មានក្បួនឡាន ៦គ.ម. តែយ៉ាងហោចណាស់ ក៏មិនមែន១០០គ.ម.ទេ»។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
- ដោយ Reuters
កងទ័ពរុស្ស៊ីចូលកំពង់ផែយុទ្ធសាស្ត្រ Kherson របស់អ៊ុយក្រែន
ទីក្រុងកៀវ និងខាកៀវ អ៊ុយក្រែន — កងទ័ពរុស្ស៊ី បានស្ថិតនៅកណ្តាលទីក្រុងកំពង់ផែយុទ្ធសាស្ត្រ Kherson របស់អ៊ុយក្រែននៅថ្ងៃព្រហស្បតិ៍នេះ មួយថ្ងៃបន្ទាប់ពីការអះអាងខុសគ្នាដែលថា តើរដ្ឋាភិបាលក្រុងមូស្គូពិតជាបានកាន់កាប់ទីក្រុងដ៏សំខាន់មួយនេះជាលើកដំបូងឬយ៉ាងណានៅក្នុងការឈ្លានពានរបស់ខ្លួនអស់រយៈពេល៨ ថ្ងៃនោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ក្រសួងការពារជាតិរុស្ស៊ី ប្រាប់ឲ្យដឹងថា ខ្លួនបានត្រួតត្រាទីក្រុង Kherson កាលពីថ្ងៃពុធម្សិលមិញ ក៏ប៉ុន្តែទីប្រឹក្សាម្នាក់របស់ប្រធានាធិបតីអ៊ុយក្រែនលោក Volodymyr Zelenskiy បានឆ្លើយតបវិញថា កងទ័ពអ៊ុយក្រែន បានបន្តការពារទីក្រុងកំពង់ផែនៅសមុទ្រខ្មៅមួយនេះដែលមានពលរដ្ឋរស់នៅប្រមាណ ២ សែន ៥ ម៉ឺននាក់។
គណៈប្រតិភូអ៊ុយក្រែន បានចាកចេញពីប្រទេសរបស់ខ្លួនដើម្បីទៅចូលរួមកិច្ចចរចាលើកទី ២ ជាមួយមន្ត្រីរុស្ស៊ីអំពីបទឈប់បាញ់គ្នា។ នេះបើតាមលោក Mykhailo Podolyak ដែលជាទីប្រឹក្សាប្រធានាធិបតីអ៊ុយក្រែន ដែលបានប្រាប់ទីភ្នាក់ងារព័ត៌មាន Reuters។
ការប្រឆាំងតបតដ៏ខ្លាំងក្លារបស់លោក Zelenskyy ធ្វើឲ្យលោកក្លាយជាឥស្សរជនល្បីក្នុងពិភពលោក
ប្រធានាធិបតីអ៊ុយក្រែន លោក Volodymyr Zelenskyy បានក្លាយជាតួរអង្គដ៏សំខាន់មួយនៅលើឆាកអន្តរជាតិ នៅក្នុងរយៈពេលប៉ុន្មានថ្ងៃ ចាប់តាំងពីកងកម្លាំងរុស្ស៊ីបានឈ្លានពានចូលប្រទេសរបស់លោក ដោយលោកបានប្រកាសពីគោលជំហរបន្តស្ថិតនៅទីក្រុងកៀវ បើទោះបីជាទាហានរុស្ស៊ីរាប់ម៉ឺននាក់ឡោមព័ទ្ធរដ្ឋធានីនេះក៏ដោយ។
ជាការឆ្លើយតបគួរឲ្យកត់សម្គាល់ទៅនឹងសំណើរបស់សហរដ្ឋអាមេរិក ក្នុងការជម្លៀសលោកនិងក្រុមគ្រួសារចេញពីអ៊ុយក្រែន បន្ទាប់ពីមានការឈ្លានពានបានចាប់ផ្ដើម លោកថា «ការវាយប្រយុទ្ធគ្នាកើតឡើងនៅទីនេះ ខ្ញុំត្រូវការគ្រាប់រំសេវ មិនមែនដំណើរចាកចេញនោះទេ»។ ពាក្យសម្ដីទាំងនេះហើយដែលធ្វើឲ្យលោកក្លាយជានិម្មិតសញ្ញានៃការប្រឆាំងដ៏ខ្លាំងក្លារបស់អ៊ុយក្រែនទៅលើទាហានឈ្លានពានរុស្ស៊ី។
ការថ្លែងតាមវីដេអូឃ្លីបមួយរបស់លោក Zelenskyy ថតចេញពីវិថីមួយនៃរដ្ឋធានីអ៊ុយក្រែន ដែលកំពុងស្ថិតក្រោមការគំរាមកំហែងនិងការអំពាវនាវរបស់លោកទៅកាន់សហភាពអឺរ៉ុប និងស្ថាប័នអន្តរជាតិផ្សេងទៀតឲ្យជួយគាំទ្រដល់ការរើបម្រះនៃប្រទេសរបស់លោកចេញពីការឈ្លានពានរបស់រុស្ស៊ី បានធ្វើឲ្យលោកល្បីល្បាញពាសពេញសាកលលោក។
ប៉ុន្តែថ្មីៗមុនពេលនេះ អតីតតារាសម្ដែងនិងកំប្លែងរូបនេះ មិនមានភាពល្បីល្បាញនៅក្រៅប្រទេសកំណើតរបស់លោកនោះទេ។ លោក Zelenskyy ដែលមានអាយុ ៤៤ ឆ្នាំ បានចូលកាន់តំណែងនៅរដូវផ្ការីក ក្នុងឆ្នាំ ២០១៩ ដោយទទួលបានសន្លឹកបោះឆ្នោតគាំទ្រ ៧៣.២ ភាគរយ យកឈ្នះទៅលើអតីតប្រធានាធិបតីលោក Petro Poroshenko។
ការជាប់ឆ្នោតរបស់លោក គឺជាករណីកើតចេញពីសិល្បៈច្នៃប្រឌិតនៃជីវិតលើលោកនេះពិតៗដោយសារតែមុនពេលបោះឆ្នោត លោក Zelenskyy មានភាពល្បីល្បាញ នៅពេលលោកបានសម្ដែងនិងដើរតួជាគ្រូបង្រៀនប្រវត្តិសាស្ត្រម្នាក់ ហើយត្រូវបានជាប់ឆ្នោតជាប្រធានាធិបតីអ៊ុយក្រែននៅក្នុងកម្មវិធីទូរទស្សន៍ដ៏ល្បីមួយឈ្មោះថា «អ្នកបម្រើពលរដ្ឋ»។
គោលគំនិតនៃកម្មវិធីទូរទស្សន៍នោះ បានធ្វើឲ្យតួអង្គលោក Zelenskyy កើនប្រជាប្រិយភាព បន្ទាប់ពីវីដេអូមួយបានបង្ហាញរូបលោកស្រែកឡូឡាប្រឆាំងនឹងអំពើពុករលួយនៅអ៊ុយក្រែន។ កាលពីឆ្នាំ ២០១៨ គណបក្សនយោបាយថ្មីមួយនៅអ៊ុយក្រែន ដែលដាក់ឈ្មោះទៅតាមឈ្មោះកម្មវិធីទូរទស្សន៍របស់លោក Zelenskyy បានប្រកាសតែងតាំងតារាទូរទស្សន៍រូបនេះឲ្យធ្វើជាបេក្ខជនប្រធានាធិបតី នៅលើវេទិកាប្រឆាំងនឹងអំពើពុករលួយ ដែលស្រដៀងទៅនឹងតួអង្គប្រធានាធិបតីនៅក្នុងសាច់រឿងនោះដែរ។
លោក Zelenskyy មានដើមកំណើតនៅភាគខាងកើតនៃប្រទេសអ៊ុយក្រែន។ លោកកើតក្នុងទីក្រុង Kryvyi Rih ដែលជាទីក្រុងមួយនៅតំបន់និយាយភាសារុស្ស៊ី នៅប៉ែកកណ្ដាលភាគខាងត្បូងនៃអ៊ុយក្រែន ដែលកាលនោះជាផ្នែកមួយនៃសហភាពសូវៀត។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
