ថ្ងៃព្រហស្បតិ៍ ទី ១៨ ខែសីហា៖

• ទីភ្នាក់ងារ​ព័ត៌មាន Reuters​ រាយការណ៍​ថា​ ក្រសួងការពារ​ជាតិ​រុស្ស៊ីបាននិយាយ​ថា​ ខ្លួនអាច​នឹង​បិទ​រោងចក្រ​ថាមពល​នុយក្លេអ៊ែរ Zaporizhzhia ប្រសិន​បើការ​បាញ់​ផ្លោង​ដាក់​រោងចក្រ​នេះ​ នៅ​តែ​បន្ត​នោះ។​ នៅ​ក្នុង​កិច្ចប្រជុំ​ខ្លី​មួយ​ លោក Igor Kirillov ប្រធាន​កងកម្លាំង​ការពារផ្នែក​អាវុធ​ជីវសាស្រ្ត​ គី​មី​ និង​វិទ្យុសកម្ម​របស់​រុស្ស៊ី​ បាន​និយាយថា​ ប្រព័ន្ធ​បម្រុង​របស់​រោងចក្រ​នេះ​បាន​ទទួល​រងការ​ខូចខាត​ ដោយ​សារ​តែ​ការ​បាញ់ផ្លោង។​ មន្ត្រី​រុស្ស៊ី​រូប​នេះ​ក៏​បាន​និយាយផង​ដែរ​ថា​ ក្នុង​ករណី​ដែល​មាន​ការផ្ទុះ​ធ្លាយនោះ​ សារធាតុ​វិទ្យុសកម្ម​របស់​រោងចក្រ​នេះ​ អាច​ទៅ​ដល់​ប្រទេស​អាល្លឺម៉ង់​ ប៉ូឡូញ​ និង​ប្រទេស​ស្លូវ៉ាគី។​ រោងចក្រ​ថាមពល​នុយក្លែអ៊ែរ​នេះ​ ត្រូវ​បាន​កងទ័ព​រុស្ស៊ី​ដណ្តើម​កាន់កាប់កាល​ពី​ខែ​មីនា​កន្លង​ទៅ។
• ប្រទេស​កាណាដា បាន​ផ្តល់​ប្រាក់កម្ចី​ប្រមាណ​ជាង ៣៤៨​ លានដុល្លារអាមេរិក​ ដល់​ប្រទេស​អ៊ុយក្រែន​ ដើម្បី​គាំទ្រ​ដល់ការ​ទិញ​ប្រេងសម្រាប់​ម៉ាស៊ីន​កម្តៅចាំបាច់​ សម្រាប់​ប្រើ​ប្រាស់​ក្នុងរដូវរងារ​ខាង​មុខ។ នេះ​បើតាម​ការ​លើក​ឡើង​របស់រដ្ឋមន្ត្រី​ក្រសួង​ហិរញ្ញវត្ថុ​កាណាដា​លោក​ស្រី Chrystia Freeland នៅ​ក្នុង​សេចក្តី​ថ្លែងការណ៍​មួយ។ ប្រាក់កម្ចី​នេះជា​ផ្នែក​មួយ​នៃទឹក​ប្រាក់​កម្ចី​សរុប​ចំនួន​ ១,៥១​ ពាន់លាន​ដុល្លារ​អាមេរិក​ ដែល​ប្រទេស​កាណាដា​ បាន​សន្យា​ឱ្យ​អ៊ុយក្រែន​ខ្ចី​ ដើម្បី​គាំទ្រ​ដល់​ប្រទេស​នេះ​ ក្នុង​អំឡុង​ពេល​នៃ​ការ​ចូល​ឈ្លានពាន​របស់​រុស្ស៊ី។
• រដ្ឋមន្ត្រី​ការបរទេសសហរដ្ឋអាមេរិក​ លោក Antony Blinken បាន​និយាយ​នៅ​ថ្ងៃពុធ​ជាមួយ​រដ្ឋមន្ត្រី​កាបរទេស​អ៊ុយក្រែន​ លោក​ Dmytro Kuleba ស្តី​ពីការ​គាំទ្រ​បន្ត​របស់​សហរដ្ឋអាមេរិកទៅ​លើ​វិស័យ​ការពារ​ដែល​អ៊ុយក្រែន​ត្រូវ​ការ។ នេះបើតាម​ការ​លើក​ឡើង​របស់​អ្នក​នាំពាក្យ​ក្រសួង​ការបរទេស​អាមេរិក​ លោក​ Ned Price។ រដ្ឋមន្ត្រីការបរទេស​អាមេរិក ក៏​បាន​ជម្រាប​ជូន​រដ្ឋមន្ត្រី​ការបរទេស​អ៊ុយក្រែនផង​ដែរ​ ពី​ការ​បញ្ជូន​ជំនួយ​សន្តិសុខរបស់​អាមេរិក​ទៅ​ឱ្យ​អ៊ុយក្រែន​ និង​បាន​ថ្កោលទោសសកម្មភាព​នា​ពេល​ថ្មីៗ​នេះ​របស់​កងកម្លាំង​រុស្ស៊ី ​នៅ​ទីតាំង​និងជុំវិញ​រោងចក្រ​ថាមពល​នុយក្លេអ៊ែរ Zaporizhzhia របស់​អ៊ុយក្រែន​នោះ។
• ជនស៊ីវិល​ពីរ​នាក់​ស្លាប់​ និង ​១៨ ​នាក់​ផ្សេងទៀត​រងរបួស​ នៅ​ក្នុង​ការ​វាយ​ប្រហារ​ដោយ​គ្រាប់​រ៉ុកក្កែត​កាល​ពី​ព្រឹក​ព្រលឹម​ថ្ងៃ​ព្រហស្បតិ៍​នេះ​ នៅ​ក្នុងទីក្រុង Kharkiv ភាគខាងកើត​អ៊ុយក្រែន។​ នេះបើតាម​ការបញ្ជាក់​របស់អភិបាល​តំបន់​ លោក Oleh Synehubov។​ បើតាម​អភិបាល​តំបន់​រូប​នេះ​ ការ​វាយ​ប្រហារ​នោះកើត​មាន​ឡើង​ បន្ទាប់​ពី​ការ​វាយ​ប្រហារ​ផ្សេង​មួយ​ទៀត​របស់​រុស្ស៊ីទៅ​លើ​ទីក្រុង Kharkiv កាល​ពី​ថ្ងៃ​ពុធ​ ដែល​បាន​សម្លាប់​ជន​ស៊ីវិល ៧ ​នាក់​ និងធ្វើឲ្យ​រងរបួស​ ១៧ ​នាក់នោះ។​ នេះ​បើតាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។ ​
• យន្តហោះចម្បាំង​រុស្ស៊ី​ប្រភេទ MiG-31 ពីរគ្រឿង​ ត្រូវ​បាន​សង្ស័យ​ថា បាន​ហោះ​រំលោភចូល​ទៅ​ក្នុង​ដែន​អាកាស​របស់ប្រទេស​ហ្វាំងឡង់​ នៅ​ព្រឹក​ថ្ងៃ​ព្រហស្បតិ៍​នេះ​ នៅ​ជិត​ទីក្រុង​មាត់​សមុទ្រ Porvoo នៃ​ឈូងសមុទ្រ​ហ្វាំងឡង់។​ នេះបើតាម​ការ​ឱ្យ​ដឹង​របស់​ក្រសួង​ការពារ​ជាតិ​ហ្វាំងឡង់។​ ប្រធាន​ផ្នែក​ទំនាក់ទំនង​ក្រសួង​ការពារ​ជាតិ​ហ្វាំងឡង់​ ​លោក​ Kristian Vakkuri​ ប្រាប់​ទីភ្នាក់ងារ​ព័ត៌មាន Reuters​ ថា​ «ការ​រំលោភ​របស់​យន្តហោះ​ចម្បាំង​រុស្ស៊ី​ ដែល​ត្រូវ​បាន​សង្ស័យ​នោះ​ គឺ​មាន​ចម្ងាយប្រមាណ​ ១ ​គីឡូម៉ែត្រ​ចូលទៅ​ក្នុង​ដែន​អាកាស​របស់​ប្រទេស​ហ្វាំងឡង់»៕

ថ្ងៃពុធ ទី ១៧ ខែសីហា៖

• ចិន​នឹង​បញ្ជូន​កងទ័ព​របស់​ខ្លួន​ទៅ​កាន់​ប្រទេស​រុស្ស៊ី​ ដើម្បី​ចូល​រួម​នៅ​ក្នុង​សមយុទ្ធ​យោធា​រួម​គ្នា​មួយជាមួយរុស្ស៊ី​និង​ប្រទេស​ផ្សេងៗ​ទៀត​ ដែល​រួម​មានឥណ្ឌា​ បេឡារុស​ និង​ប្រទេស​តាហ្ស៊ីគីស្ថាន។ នេះ​បើ​តាម​សេចក្តី​រាយការណ៍​របស់ទី​ភ្នាក់ងារ​ព័ត៌មាន Reuters នៅ​ថ្ងៃ​ពុធ​នេះ​ ដែល​បាន​ស្រង់​សម្តីក្រសួង​ការពារ​ជាតិ​ចិន។​ ការ​ចូល​រួម​របស់កងទ័ព​ចិន​នៅ​ក្នុង​សមយុទ្ធ​យោធា​រួម​គ្នា​នេះ​មិនពាក់ព័ន្ធ​ទៅ​នឹង​ស្ថានភាព​តំបន់​និង​អន្តរជាតិ​នា​ពេល​បច្ចុប្បន្ន​នេះ​ឡើយ។ នេះ​បើ​តាម​ការ​លើក​ឡើង​របស់ក្រសួង​ការពារ​ជាតិ​ចិន​នៅ​ក្នុង​សេចក្តី​ថ្លែងការណ៍​មួយ។ សេចក្តី​ថ្លែងការណ៍​នេះ​បន្ត​ទៀត​ថា​ សមយុទ្ធ​យោធា​នេះ​ជាផ្នែក​មួយ​នៃ​កិច្ចព្រមព្រៀងស្តីពី​កិច្ច​សហប្រតិបត្តិការទ្វេភាគី​ប្រចាំ​ឆ្នាំ​ ដែល​កំពុង​ធ្វើ​ឡើង។​
• រដ្ឋមន្ត្រី​ការបរទេស​សហរដ្ឋ​អាមេរិក​លោក​ Antony Blinken បាន​ប្រកាសកាល​ពី​យប់​ថ្ងៃ​ចន្ទ​នូវ​ទឹក​ប្រាក់​ចំនួន ​៦៨ លាន​ដុល្លារ​ ដើម្បី​ជួយដល់​ការ​ទិញ ដឹក​ជញ្ជូន​ និង​ស្តុកទុក​នូវ​ស្រូវ​សាឡី​អ៊ុយក្រែនរហូត​ដល់​ ១ សែន ​៥ ម៉ឺនតោន​ ដើម្បី​ដោះ​ស្រាយ​នូវ​បញ្ហា​អសន្តិសុខ​ស្បៀង​ធ្ងន់ធ្ងរ។ ស្រប​ពេល​ដែលមានការ​បន្ត​ឡើង​វិញ​នូវ​ការ​នាំចេញគ្រាប់ធញ្ញជាតិ​ពី​កំពង់ផែ​សមុទ្រ​ខ្មៅ​របស់​អ៊ុយក្រែន​ ដែល​ជា​ជំហាន​វិជ្ជមាន​មួយ​ក្នុង​ការ​ដោះស្រាយ​នូវតម្រូវការ​ក្នុង​ប្រទេស​ដែល​ខ្វះខាត​ស្បៀង​អាហារ​នោះ​ ការ​ដឹកជញ្ជូន​នេះ​ត្រូវ​តែ​បន្ត​ធ្វើ​ទៅ​ទៀត​ ដើម្បីធ្វើ​ឱ្យ​ស្បៀង​អាហារ​ជា​ច្រើន​លាន​តោន​ដែល​នៅ​ជាប់​គាំង​អាច​ទៅ​ដល់​ទី​ផ្សារ​ និង​ជួយ​ដល់ប្រទេសដែលងាយ​រង​គ្រោះបំផុត​នៅ​ក្នុង​ពិភពលោក។​ នេះ​បើ​តាម​ការ​លើក​ឡើង​របស់​លោក Blinken នៅ​ក្នុង​សេចក្តី​ថ្លែងការណ៍​មួយ។
• អគ្គលេខាធិការ​អង្គការ​សហប្រជាជាតិលោក​ Antonio Guterres មាន​គម្រោង​នឹងទៅធ្វើ​ទស្សនកិច្ច​នៅ​ប្រទេស​អ៊ុយក្រែន​នៅ​ថ្ងៃ​ព្រហស្បតិ៍​នេះ​ ដើម្បី​ជួប​ប្រជុំ​ជាមួយ​ប្រធានាធិបតី​អ៊ុយក្រែន​ លោក Zelenskyy និង​ប្រធានាធិបតី​ប្រទេស​តួកគី​លោក​ Recep Tayyip Erdogan។ ​អ្នកនាំពាក្យ​របស់អគ្គលេខាធិការអង្គការ​សហប្រជាជាតិលោក Stephane Dujarric បាន​ប្រាប់​ក្រុម​អ្នក​សារព័ត៌មានថា​ ប្រធាន​អង្គការ​សហប្រជាជាតិ​រូប​នេះ​ក៏​នឹង​ធ្វើ​ដំណើរ​ទៅ​កាន់​ទីក្រុង Odesa ​ដែល​ស្ថិត​នៅ​ភាគ​ខាង​ត្បូង​អ៊ុយក្រែន​ផង​ដែរ​នៅ​ថ្ងៃ​សុក្រនេះ​ ដើម្បី​ពិនិត្យ​មើល​កំពុង​ផែមួយ​ ដែល​កំពុង​ត្រូវ​បាន​ប្រើប្រាស់ជា​ផ្នែក​មួយនៃ​គំនិត​ផ្តួចផ្តើម​ ក្នុង​ការ​ចាប់​ផ្តើម​ឡើងវិញ​នូវ​ការ​នាំចេញគ្រាប់ធញ្ញជាតិ​របស់​អ៊ុយក្រែន​នោះ។​ អង្គការ​សហប្រជាជាតិ​និងប្រទេស​តួកគី​ បាន​ផ្តួចផ្តើមឱ្យ​មាន​កិច្ចព្រមព្រៀង​មួយ​ជា​មួយ​រុស្ស៊ីនិង​អ៊ុយក្រែន​ ខណៈ​ពេល​ដែល​កំពុង​មាន​វិបត្តិ​ស្បៀងអាហារ​ជា​សាកល​ ហើយមាន​នាវា​ដឹកជញ្ជូនជា​ច្រើន​គ្រឿង​ បាន​ដឹក​គ្រាប់​ធញ្ញជាតិចេញ​ពី​ប្រទេស​អ៊ុយក្រែន​រួច​ហើយ។
• ក្រុម​អ្នក​បច្ចេកទេស​អ៊ុយក្រែន​នៅ​ទីតាំងរោងចក្រ​ថាមពល​នុយក្លេអ៊ែរ​ដែល​ទទួល​រង​ការ​បាញ់​ផ្លោង​និង​កំពុង​កាន់​កាប់ដោយ​កងកម្លាំង​រុស្ស៊ី​នោះ​ បាន​ធ្វើ​ការ​ក្រោម​ចុង​កាំភ្លើងរបស់​កងទ័ព​រុស្ស៊ី​ និង​ប្រឈមនឹង​ការ​ដាក់​សម្ពាធជា​ខ្លាំង​ ប៉ុន្តែ​ពួក​គេ​នៅ​តែស្ថិត​នៅ​ទី​នោះ​ ដើម្បីធានា​ថា​នឹង​មិន​មាន​មហន្តរាយ​ណាមួយ​ ដូច​អ្វី​ដែល​កើត​មាន​ឡើង​នៅ​រោងចក្រ​នុយក្លេអ៊ែរ Chornobyl នោះ​ឡើយ។​ នេះ​បើ​តាមការ​បញ្ជាក់​របស់​អ្នក​បច្ចេកទេស​អ៊ុយក្រែនមួយ​រូប ហើយ​ដែល​ត្រូវ​បាន​រាយការណ៍​ដោយ​ទី​ភ្នាក់ងារ​ព័ត៌មាន ​Reuters។ ​អ្នក​បច្ចេកទេស​អ៊ុយក្រែនរូប​នេះ​ ដែល​សុំមិន​បញ្ចេញ​ឈ្មោះ​ ដោយ​ខ្លាច​មាន​ការ​សងសឹកពី​សំណាក់​រុស្ស៊ី​នោះ​ បាន​លើក​ឡើង​ពី​ស្ថានភាព​ការងារ​ដ៏​លំបាក​នៅរោងចក្រ​ថាមពល​នុយក្លេអ៊ែរ Zaporizhzhia ដែល​ភាគី​អ៊ុយក្រែន​និង​រុស្ស៊ី​បាន​ចោទ​ប្រកាន់​គ្នា​ទៅ​វិញ​ទៅ​មកជុំវិញ​រឿងបាញ់​ផ្លោង​ដាក់​រោងចក្រ​នេះ។​ ​
• កង​នាវា​ជើងទឹក​រុស្ស៊ី​នៅ​សមុទ្រ​ខ្មៅ​ដែល​មាន​មូលដ្ឋានក្នុង​តំបន់ Crimea របស់​រុស្ស៊ី​ បាន​តែង​តាំង​មេបញ្ជាការ​ថ្មីម្នាក់។ នេះ​បើ​តាមទី​ភ្នាក់ងារ​ព័ត៌មាន​រដ្ឋ​រុស្ស៊ី​ RIA ដែល​បាន​ស្រង់​ប្រភពមួយ​ចំនួន​ចេញ​ផ្សាយ​នៅ​ថ្ងៃ​ពុធ​នេះ​ បន្ទាប់​ពី​មាន​ការ​ផ្ទុះ​ដ៏​កក្រើកនៅ​មូលដ្ឋាន​យោធា​រុស្ស៊ី​នៅ​ក្នុង​ឧបទ្វីបនេះ​ កាល​ពី​៩​ថ្ងៃ​មុន។ ទី​ភ្នាក់ងារ​ព័ត៌មាន​រដ្ឋ​រុស្ស៊ី​មួយ​នេះ​ក៏​បាន​ស្រង់​ប្រភព​នានាដោយ​និយាយ​ថា​ មេបញ្ជាការ​យោធា​ថ្មី​ប្រចាំ​តំបន់​នេះ​ គឺ​លោក Viktor Sokolov ត្រូវ​បាន​គេ​ណែនាំឱ្យ​ជួបជា​មួយ​សមាជិក​ក្រុមប្រឹក្សា​យោធា​កងទ័ព​ជើង​ទឹក​រុស្ស៊ី​ នៅ​កំពង់​ផែ Sevastopol ។

ថ្ងៃអង្គារ​ ទី ១៦ ខែសីហា៖

• តុលាការ​មួយ​នៅក្នុង​ប្រទេស​រុស្ស៊ី​បាន​ផាក​ពិន័យក្រុមហ៊ុន​ផ្សាយ​ព័ត៌មាន Twitch ចំនួន​៣៣.០០០​ដុល្លារ​អាមេរិក​នៅ​ថ្ងៃ​អង្គារ​នេះ ដែល​បាន​ផ្សព្វផ្សាយនូវ​ព័ត៌មាន ដែលមិន​គួរ​ឱ្យ​ទុកចិត្តបាន​ ស្តី​ពីការ​ចោទ​ប្រកាន់​ឧក្រិដ្ឋកម្ម​សង្គ្រាម​នៅ​ក្នុងទីប្រជុំជន Bucha ក្នុង​ប្រទេស​អ៊ុយក្រែន។​ នេះ​បើតាម​ការ​ចេញ​ផ្សាយរបស់​ទី​ភ្នាក់ងារ​ព័ត៌មាន Reuters ដែល​បានស្រង់ផ្សាយ​បន្តពី​ទី​ភ្នាក់ងារ​ព័ត៌មាន​ Interfax របស់​រុស្ស៊ី​។​ ​កាល​ពី​ពេល​កន្លង​ទៅ​ ប្រព័ន្ធសេវាកម្ម​សារ​តាម​បណ្តាញ​ Telegram ត្រូវ​ទទួលរង​ការ​ផាក​ពិន័យ​នូវ​ទឹកប្រាក់​ប្រមាណ​៦៦.០០០ដុល្លារ​អាមេរិក​ ​ដោយ​សារ​ការ​បដិសេធមិន​ព្រម​លុប​ខ្លឹមសារ​បង្ហោះទាក់​ទង​នឹង​ជម្លោះនៅ​ក្នុង​ប្រទេស​អ៊ុយក្រែន។​
• រដ្ឋ​មន្ត្រី​ក្រសួង​ការពារជាតិ​រុស្ស៊ី​លោក​ Sergei Shoigu បាន​និយាយនៅ​ថ្ងៃ​អង្គារ​នេះ​ នៅ​ក្នុង​សុន្ទរកថា​មួយ​នៅ​ឯ​សន្និសីទស្តី​ពី​សន្តិសុខ​អន្តរជាតិក្នុង​ទីក្រុង​មូស្គូ​ថា​ ប្រទេស​រុស្ស៊ីមិន​ចាំបាច់​ប្រើប្រាស់អាវុធ​នុយក្លេអ៊ែរ​នៅ​ក្នុង​ប្រទេស​អ៊ុយក្រែន​នោះ​ឡើយ​។​ នេះ​បើយោង​ទៅ​លើ​ការ​ចេញ​ផ្សាយ​របស់​ទី​ភ្នាក់ងារ​ព័ត៌មាន Reuters។ លោក Shoigu ក៏​បាន​ចោទ​ប្រកាន់ផង​ដែរ​ថា​ សកម្មភាព​ប្រតិបត្តិការយោធា​អ៊ុយក្រែន ត្រូវ​បាន​រៀប​ចំធ្វើ​ឡើងដោយ​សហរដ្ឋអាមេរិក​ និង​ចក្រភព​អង់គ្លេស ហើយ​អង្គការ​អូតង់​បាន​បង្កើន​ការ​ពង្រាយ​កងទ័ព​របស់​ខ្លួន​ នៅ​ក្នុង​តំបន់​អឺរ៉ុប​ភាគ​កណ្តាល​និង​ខាង​កើត​អស់​រយៈពេល​ជា​ច្រើន​លើក​ច្រើន​សារ។​
• រុស្ស៊ី​និយាយ​នៅ​ថ្ងៃ​អង្គារ​នេះ​ថា​ ​ការ​ផ្ទុះ​ដ៏​ខ្លាំងនៅ​ទី​តាំង​យោធា​មួយ​កន្លែង​ក្នុងឧបទ្វីបCrimea ដែល​គ្រប់គ្រង​ដោយ​រុស្ស៊ី​ក្នុងប្រទេស​អ៊ុយក្រែន​ ហើយ​ដែល​បាន​បំផ្លាញ​ហេដ្ឋារចនាសម្ព័ន្ធ​អគ្គិសនី​នោះ​ ​គឺជា​សកម្មភាព​នៃ​ការ​ធ្វើ​វិទ្ធង្សនា​មួយ​។ ទន្ទឹម​នឹង​នេះ​ដែរ​ ប្រធានាធិបតី​រុស្ស៊ី​ លោក Vladimir Putin​ ក៏បាន​និយាយ​ថា​ ​សហរដ្ឋអាមេរិក​កំពុងព្យាយាម​អូសបន្លាយ​ជម្លោះ និង​បាន​ចោទ​ប្រកាន់​រដ្ឋាភិបាល​ក្រុង​វ៉ាស៊ីនតោន​ថា​ ​បានដាក់​ពលរដ្ឋ​អ៊ុយក្រែន​នៅខែ្ស​បន្ទាត់​ជួរមុខនៃ​ការ​វាយ​ប្រហារ ​ហើយ​បាន​ផ្តល់​ឱ្យ​រដ្ឋាភិបាល​អ៊ុយក្រែន​ នូវ​អាវុធ​ធន់ធ្ងន់​ជា​ច្រើន។​ នេះ​បើតាមការ​ចេញ​ផ្សាយ​របស់​ទី​ភ្នាក់ងារ​ព័ត៌មាន AFP ។​ ​
• ប្រទេស​ហ្វាំឡង់​នឹង​កម្រិតចំនួន​ទិដ្ឋាការ​ទេសចរណ៍​សម្រាប់​ជនជាតិ​រុស្ស៊ី​ នៅ​ត្រឹម​១០​ភាគរយ​ ចាប់​ពី​ថ្ងៃ​ទី​១​ ខែ​កញ្ញា​ខាង​មុខ​នេះ​តទៅ​ ដោយ​សារ​ការ​មិន​សប្បាយចិត្តទៅ​លើការ​ធ្វើ​ទេសចរណ៍​របស់​ពលរដ្ឋ​រុស្ស៊ី ក្នុង​អំឡុង​ពេល​ដែល​សង្គ្រាម​កំពុង​កើត​មាន​ឡើង​នៅ​ក្នុង​ប្រទេស​អ៊ុយក្រែន។​ នេះ​បើ​តាម​ការ​បញ្ជាក់​របស់​រដ្ឋាភិបាលហ្វាំងឡង់នៅ​ថ្ងៃ​អង្គារ​នេះ។​ «ទិដ្ឋាការ​ប្រភេទ​ទេសចរណ៍​នឹង​មិន​ត្រូវ​បញ្ឈប់​ទាំង​ស្រុង​នោះឡើយ ប៉ុន្តែ​ចំនួន​ទិដ្ឋាការ​ដែល​នឹង​ត្រូវ​ផ្តល់​ដល់​ពលរដ្ឋ​រុស្ស៊ី​ នឹងត្រូវ​កាត់​បន្ថយ​ក្នុង​ចំនួន​ដ៏​ច្រើន»។ នេះ​បើ​តាមរដ្ឋមន្ត្រី​ការបរទេស​ហ្វាំងឡង់​លោក Pekka Haavisto ដែល​បាន​ប្រាប់ក្រុម​អ្នក​សារព័ត៌មាន​នៅ​ក្នុង​រដ្ឋធានី​ហែលស៊ីនគី (Helsinki) នៃ​ប្រទេស​ហ្វាំងឡង់។ បច្ចុប្បន្ន​នេះ​ ហ្វាំងឡង់​ផ្តល់​ទិដ្ឋាការ​ទេសចរណ៍ដល់​ពលរដ្ឋ​រុស្ស៊ី​ប្រមាណ​១ពាន់​នាក់​ក្នុង​មួយ​ថ្ងៃ។​ នេះ​បើ​តាមរដ្ឋមន្ត្រី​ការបរទេស​ហ្វាំងឡង់​រូប​នេះ​ ដែល​បាន​ប្រាប់​វិទ្យុ​រដ្ឋ Yle ក្នុង​ពេល​ដាច់​ដោយឡែក​មួយ។​ នេះ​បើ​តាម​ការ​ចេញ​ផ្សាយ​របស់​ទី​ភ្នាក់ងារ​ព័ត៌មាន AFP។
• កងយោធា​អ៊ុយក្រែន​និយាយ​ថា​ ខ្លួន​កំពុង​ត្រៀម​ខ្លួនដើម្បី​ទប់ទល់​នឹង​ការ​វាយ​ប្រហារ​របស់​រុស្ស៊ី ក្នុង​ឱកាស​នៃ​បុណ្យ​ខួប​ឯករាជ្យជាតិ​របស់​ខ្លួន​។ នេះ​បើ​តាម​ការ​ចេញ​ផ្សាយ​របស់​ទី​សារព័ត៌មាន Kyiv Independent នៅ​ថ្ងៃ​អង្គារ​នេះ។​ អ្នកនាំពាក្យទីបញ្ជាការដ្ឋាន​កងទ័ព​ជើង​អាកាស​លោក​ Yuriy Ihnat បាន​និយាយថា​ របាយការណ៍​ចារកម្ម​បាន​បង្ហាញ​ថា​ រុស្ស៊ី​កំពុង​បង្កើនសកម្មភាព​យោធានៅ​លើ​ទឹកដី​ប្រទេស​បេឡារុស​ ហើយ​ប្រហែល​ជាកំពុង​ប្រុង​ប្រៀបបើក​ការ​វាយ​ប្រហារមក​លើ​អ៊ុយក្រែន​ ​ក្នុង​ឱកាស​នៃ​បុណ្យ​ឯករាជ្យជាតិ​របស់​ប្រទេស​នេះ នៅ​ថ្ងៃ​ទី​២៤ ខែ​សីហា ខាង​មុខ​នេះ។​ នេះ​បើ​តាម​ការ​ចេញ​ផ្សាយ​របស់​សារព័ត៌មាន​មួយ​នេះ។
  

ថ្ងៃ​ចន្ទ ទី ១៥ ខែសីហា៖

• ប្រទេស​រុស្ស៊ី​នឹង​ធ្វើ«អ្វីៗទាំង​អស់​ដែល​ចាំបាច់» ដើម្បី​អនុញ្ញាតឱ្យ​ក្រុម​អ្នក​ជំនាញ​មក​ពី​ទី​ភ្នាក់ងារ​ថាមពល​បរមាណូ​អន្តរជាតិ(IAEA) អាច​ទៅ​ពិនិត្យ​មើលរោងចក្រ​ថាមពល​នុយក្លេអ៊ែរ​ Zaporizhzhia នៅ​ផ្នែក​ខាង​ត្បូង​ប្រទេស​អ៊ុយក្រែន។​ នេះ​បើតាម​អ្នកនាំពាក្យ​ក្រសួង​ការបរទេស​រុស៊្សី​លោក​ស្រី Maria Zakharova ​ដែល​បានលើក​ឡើង​នៅ​ក្នុង​សេចក្តីថ្លែងការណ៍​មួយ​ ដែល​ត្រូវ​បាន​ផ្សព្វផ្សាយ​នៅ​ថ្ងៃ​ចន្ទ​នេះ។ ទីតាំង​រោងចក្រ​នេះ​ ទទួល​រង​នូវ​ការ​បាញ់​ផ្លោងក្នុង​រយៈ​ពេល​ប៉ុន្មាន​ថ្ងៃ​ថ្មីៗ​នេះ ដោយភាគី​រុស្ស៊ី​និង​អ៊ុយក្រែន​ បាន​ចោទ​ប្រកាន់​គ្នា​ទៅ​វិញ​ទៅ​មក ថា​បង្ក​ឱ្យ​មាន​ហានិភ័យទៅ​លើ​ទី​តាំង​នេះ។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន Reuters។
• កម្មវិធី​មួយ​ដែល​ត្រូវ​បាន​បង្កើត​ឡើង​កាល​ពី​ឆ្នាំ​ទៅ​ដើម្បី​គាំទ្រ​ដល់​ការ​ជម្លៀស​ពលរដ្ឋ អាហ្វហ្គានីស្ថាន​ បន្ទាប់​ពី​ការ​ដក​កងទ័ព​អាមេរិកចេញ​ពី​ប្រទេស​នេះ​ដោយ​ភាព​ច្របូក​ច្របល់នោះ​ ត្រូវ​បាន​ពង្រីក​ក្នុង​ពេល​ថ្មីៗ​នេះ​ ដើម្បី​ជួយ​ដល់​ពលរដ្ឋ​អ៊ុយក្រែន​ ដែល​កំពុង​រត់​គេច​ខ្លួន​ចេញ​ពី​ប្រទេស​របស់​ខ្លួន​ ដោយ​សារ​តែ​ការ​ចូលឈ្លានពាន​របស់​កងកម្លាំង​រុស្ស៊ី​ទៅ​ក្នុង​។​ នេះបើតាម​សេចក្តីរាយការណ៍​របស់​ទី​ភ្នាក់ងារ​ព័ត៌មាន​ Reuters។ កម្មវិធី​នេះ​ដែល​ត្រូវ​បាន​ចាប់​ផ្តើម​ឡើង​ដោយសម្ព័ន្ធអង្គការ​មិន​រក​ប្រាក់កម្រៃ​ ដោយ​ធ្វើ​ជា​ដៃ​គូ​ជា​មួយ​ក្រសួង​ការបរទេស​អាមេរិក​ អនុញ្ញាត​ឱ្យក្រុមដែល​មាន​គ្នា​លើស​ពី​៥​នាក់ឬក្រុម​មនុស្ស​ពេញ​វ័យច្រើន​ជាង​នេះ ​ ដើម្បី​ធ្វើការ​គាំទ្រដល់​ការទៅ​តាំង​ទី​លំនៅជាបណ្តោះ​អាសន្ន​ក្នុង​សហរដ្ឋ​អាមេរិក។ នេះ​ជា​ការ​ងារ​មួយ​ដែល​ជា​ទូទៅ​ ត្រូវ​បាន​អនុវត្ត​ដោយទី​ភ្នាក់ងារ​មួយ​ចំនួនក្នុង​ពេល​កន្លង​ទៅ​ ដែល​ត្រូវ​បាន​បង្កើត​ឡើងសម្រាប់ជួយ​ដល់​អ្នក​តាំង​ទី​លំនៅ​ថ្មី។​
• ឯកអគ្គរដ្ឋទូត​ហ្វីលីពីន​ប្រចាំ​សហរដ្ឋអាមេរិក​លោក Jose Manuel Romualdez បាន​និយាយ​នៅ​ថ្ងៃ​ចន្ទនេះ​ថា រដ្ឋាភិបាល​ប្រទេស​ហ្វីលីពីន​ កំពុង​សម្លឹង​ទៅរកការ​ទិញ​ឧទ្ធម្ភាគចក្រ​ធន់ធ្ងន់ Chinook ពី​សហរដ្ឋអាមេរិក​ បន្ទាប់​ពី​លុប​ចោល​កិច្ចព្រមព្រៀង​ទិញ​ឧទ្ធម្ភាគចក្រ​របស់​រុស្ស៊ី​ ដែល​មាន​តម្លៃ​ប្រមាណ​២២៧,៣៥លានដុល្លារ​អាមេរិក​ ដើម្បី​ជៀសវាងការ​ដាក់​ទណ្ឌកម្ម​។​ នេះ​បើតាម​សេចក្តី​រាយការណ៍​របស់​ទី​ភ្នាក់ងារ​ព័ត៌មាន Reuters។​ សហរដ្ឋអាមេរិកមាន​បំណង​យល់​ព្រម​ទៅលើ​លើ​កិច្ចព្រមព្រៀងមួយជាមួយ​រដ្ឋាភិបាល​ហ្វីលីពីន​ក្នុង​ទឹក​ប្រាក់ដែល​ប្រទេស​ហ្វីលីពីន​មាន​គម្រោងថា​នឹង​ទិញ​ឧទ្ធម្ភាគចក្រ​ពី​ប្រទេស​រុស្ស៊ី​។​ នេះ​បើតាមការ​បញ្ជាក់​ឱ្យ​ដឹង​របស់​ឯកអគ្គរដ្ឋទូតហ្វីលីពីន​រូប​នេះ​ ដែល​បាន​ប្រាប់ក្រុម​អ្នក​សារព័ត៌មានតាម​ប្រព័ន្ធ​អនឡាញ។​ លោក​បន្ថែម​ទៀត​ថា​ កិច្ច​ព្រមព្រៀង​ជា​មួយ​រដ្ឋាភិបាល​ក្រុង​វ៉ាស៊ីតោនជុំវិញ​រឿង​នេះ ក៏​រួម​មាន​បញ្ចូល​ផង​ដែរ ការ​ជួស​ជុល​ថែរក្សា​និង​ការផ្តល់​គ្រឿង​បន្លាស់​ជា​ដើម​។​
• ប្រទេស​នូវែលស៊ីឡង់​បាន​បញ្ជូន​បុគ្គលិក​យោធា​ចំនួន​១២០​នាក់ទៅ​កាន់ចក្រភព​អង់គ្លេស​ ដើម្បី​ធ្វើ​ការ​បណ្តុះបណ្តាល​ដល់​កងទ័ព​អ៊ុយក្រែន ក្នុង​ការ​ប្រយុទ្ធ​ក្នុង​សមរភូមិជួរ​មុខ។​ នេះ​បើ​តាម​សេចក្តីរាយការណ៍​របស់​ទី​ភ្នាក់ងារ​ព័ត៌មាន Reuters នៅ​ថ្ងៃចន្ទ​នេះ​ ដោយ​ដកស្រង់​សម្តីមន្ត្រីរដ្ឋាភិបាលនូវែលស៊ីឡង់។ ក្រុម​បណ្តុះបណ្តាល​កងទ័ព​ជើងគោក​នូវែលស៊ីឡង់​ពីរ​ក្រុម​នឹងផ្តល់ការ​ហ្វឹកហ្វឺន​ជំនាញ​សំខាន់ៗដល់​កង​កម្លាំង​អ៊ុយក្រែន​ ដើម្បីធ្វើ​ការ​ប្រយុទ្ធ​ឱ្យ​មាន​ប្រសិទ្ធភាព​ ​ក្នុង​នោះ​ក៏​រួម​របៀប​ប្រើប្រាស់​អាវុធ​ ការ​ជួយ​សង្គ្រោះ​បឋម​ ការអនុវត្ត​ច្បាប់​ និង​ជំនាញ​ផ្សេងៗ​ទៀត​ផង​ដែរ។​ ការ​ហ្វឹកហ្វឺន​ដល់​កងកម្លាំង​អ៊ុយក្រែនចំនួន​ប្រមាណ​៨០០​នាក់​ នឹង​ត្រូវ​ធ្វើ​ឡើង​នៅ​ក្នុង​ទីតាំង​មួយ​ ក្នុង​ចំណោម​ទីតាំងទាំង​៤​កន្លែង​ នៅ​ក្នុង​ប្រទេសអង់គ្លេស។ បុគ្គលិក​ក្រសួង​ការពារ​ជាតិ​នូវែលស៊ីឡង់​នឹង​មិន​ធ្វើ​ដំណើរ​ទៅ​កាន់​ប្រទេស​អ៊ុយក្រែន​នោះ​ឡើយ។​ នេះ​បើ​តាមរដ្ឋាភិបាល​នូវែលស៊ីឡង់​ ​ដែល​បាន​និយាយ​នៅ​ក្នុង​សេចក្តី​ថ្លែងការណ៍​មួយ។
• ​ប្រទេស​ចំនួន​៤២​នៅ​ជុំវិញ​ពិភពលោក​ បាន​ចុះហត្ថលេខា​លើ​សេចក្តី​ថ្លែងការណ៍​មួយ​ ដោយ​ជំរុញឱ្យ​រុស្ស៊ី​ដក​កង​កម្លាំង​យោធា​របស់​ខ្លួន​ចេញ​ពី​ទីតាំង​រោងចក្រថាមពល​នុយក្លេអ៊ែរ Zaporizhzhia នៅ​ក្នុង​ប្រទេស​អ៊ុយក្រែន ដោយ​និយាយ​ថា​ វត្តមាន​របស់​ពួក​គេ​នៅ​ទី​នោះ​ បង្ក​ឱ្យមានគ្រោះថ្នាក់​ជា​ខ្លាំងទៅ​លើ​រោង​ចក្រ​នេះ។​ នេះ​បើយោង​ទៅតាមការ​ផ្សព្វផ្សាយ​របស់​វិទ្យុ​សេរីភាព/​វិទ្យុ​អឺរ៉ុប​សេរី។​ សេចក្តី​ថ្លែងការណ៍​នេះ​ត្រូវ​បានផ្សព្វផ្សាយ​នៅ​លើ​គេហទំព័រ​សហភាព​អឺរ៉ុប​ កាល​ពី​ថ្ងៃ​ទី​១៤ ខែ​សីហា ដោយថ្កោលទោស​ទៅ​លើ​ការ​ចូល​ឈ្លានពាន​ដោយ​គ្មាន​ហេតុផល របស់​កងកម្លាំង​រុស្ស៊ី​ទៅ​ក្នុង​ប្រទេស​អ៊ុយក្រែន​ និង​បាន​និយាយ​ថា​ វត្តមាន​របស់​កងកម្លាំង​រុស្ស៊ីនៅទីតាំង​រោងចក្រ​ថាមពល​នោះ​ នឹង​រារាំង​ដល់​អ្នក​ជំនាញ​ក្នុង​ការ​ចូល​ទៅ​ថែរក្សា​ជួសជុល ​និង​ពិនិត្យ​មើល​សុវត្ថិភាព​នៃ​វិទ្យុ​សកម្ម​របស់​វា។
• ក្រុម​ការពារ​ក្តី​របស់​តារា​បាល់បោះ​អាមេរិក​លោក​ស្រី​ Brittney Griner​ ដែល​ត្រូវ​បាន​កាត់​ទោស​ឱ្យ​ជាប់​ពន្ធនាគារចំនួន​៩​ឆ្នាំ​នៅ​ក្នុង​ប្រទេសរុស្ស៊ី ពី​បទ​ពាក់ព័ន្ធ​នឹង​គ្រឿង​ញៀន​នោះ​ បាន​ប្តឹង​ឧទ្ធរណ៍​ប្រឆាំង​នឹង​ការ​កាត់ទោស​របស់​ខ្លួនពី​បទ​ប្រើប្រាស់​និង​រត់ពន្ធ​គ្រឿងញៀន។ នេះ​បើ​តាមមេធាវី​របស់តារា​បាល់បោះ​រូប​នេះ​ គឺលោ​ក​ស្រី Maria Blagovolina ដែល​បាន​ប្រាប់​ទី​ភ្នាក់ងារ​ព័ត៌មាន Reuters នៅ​ថ្ងៃ​ចន្ទ​នេះ។​ រដ្ឋាភិបាល​សហរដ្ឋអាមេរិក​បាន​និយាយ​ថា​ លោក​ស្រី​ត្រូវ​បាន​ចាប់​ឃុំ​ខ្លួន​ដោយ​ខុសច្បាប់ ហើយ​បាន​ស្នើដើម្បី​ធ្វើ​ការ​ដោះដូរលោក​ស្រី​ជា​មួយ​នឹងឈ្មួញ​អាវុធ​រុស្ស៊ី​លោក Viktor Bout ដែល​កំពុង​ជាប់​ពន្ធនាគារ​ចំនួន​២៥​ឆ្នាំ​ នៅ​ក្នុង​សហរដ្ឋ​អាមេរិក។