ថ្ងៃចន្ទ ទី១៨ ខែកក្កដា៖

• ប្រធានាធិបតី​អ៊ុយក្រែន លោក Volodymyr Zelenskyy បាន​ព្យួរ​តំណែង​ប្រធាន​ទីភ្នាក់ងារ​ចារកម្ម​អ៊ុយក្រែន លោក Ivan Bakanov និង​អគ្គរដ្ឋ​អាជ្ញា អ្នកស្រី Iryna Venediktova ដោយ​លើក​ឡើង​ពី​ករណី​ក្បត់​ជាតិ​ជាច្រើននៅ​ក្នុង​អង្គភាព​ដ៏​មាន​ឥទ្ធិពល​ទាំង​ពីរ។ លោក​បាន​និយាយ​ថា អតីត​បុគ្គលិក​ជាង ៦០ នាក់​ក្នុង​អង្គភាព​ទី​ពីរ ឥឡូវនេះ​កំពុង​ធ្វើការ​ប្រឆាំង​នឹង​អ៊ុយក្រែន​ នៅ​ក្នុង​តំបន់​ដែល​កាន់កាប់​ដោយ​រុស្ស៊ី។ លោក​បាន​បន្ថែម​ថា ករណី​សហការ​និង​អំពើ​ក្បត់​ជាតិ​សរុប​ចំនួន ៦៥១ ត្រូវ​បាន​ដាក់​ប្រឆាំង​នឹង​មន្ត្រី​អនុវត្ត​ច្បាប់។
• មន្ត្រីសង្គ្រោះ​បន្ទាន់​របស់​អ៊ុយក្រែន​បាន​និយាយ​នៅ​ថ្ងៃ​ចន្ទ​ថា មនុស្ស ៦ នាក់​បាន​ស្លាប់ បន្ទាប់​ពី​យោធារុស្ស៊ី​បាន​បាញ់​ផ្លោង​លើ​អគារ​មួយ​នៅ​ក្នុង​ទីក្រុង Toretsk ភាគ​ខាង​កើត​ប្រទេស​អ៊ុយក្រែន។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន​ RFE/RL។
• នៅ​ថ្ងៃ​ចន្ទ​នេះ រដ្ឋ​មន្ត្រី​ការបរទេស​សហភាព​អឺរ៉ុប​កំពុង​ពង្រីក​ការ​រឹត​បន្តឹង​ទណ្ឌកម្ម​ដ៏​ទូលំទូលាយ​លើ​រុស្ស៊ី និង​សម្លឹង​មើល​មធ្យោបាយ​បន្ថែម​ទៀត ដើម្បីហាម​ឃាត់​លើ​ការ​នាំ​ចេញ​មាស ដោយ​សង្ឃឹម​ថា វិធានការ​នេះ​អាច​ចាប់ផ្តើម​មាន​ឥទ្ធិពល​ខ្លាំង​ក្លា​លើ​សង្គ្រាមនៅអ៊ុយក្រែន។ នេះ​បើ​យោង​តាម​ទីភ្នាក់ងារ​ព័ត៌មាន AP។
• រដ្ឋ​មន្ត្រី​ការបរទេស​អ៊ុយក្រែន លោក Dmytro Kuleba បាន​ជំរុញ​ឱ្យ​រដ្ឋមន្ត្រី​ការបរទេស​សហភាព​អឺរ៉ុប ផ្តល់​ជំនួយ​យោធា​បន្ថែម​ទៀត បង្កើត​ការ​ហាម​ឃាត់​លើ​ថាមពល​រុស្ស៊ី និង​ដាក់​កម្រិត​លើ​តម្លៃ​ប្រេង​របស់​រុស្ស៊ី។ លោក​ក៏​បាន​លើក​ទឹកចិត្ត​ដល់​ការ​គាំទ្រ​របស់​អឺរ៉ុប​ចំពោះ​សាលាក្តី​ដើម្បី​កាត់​ទោស​ឧក្រិដ្ឋកម្ម​ឈ្លានពាន​ ដែល​កំពុង​កើត​មាន​នៅ​ក្នុង​អ៊ុយក្រែន​ផង​ដែរ។
• រដ្ឋមន្ត្រី​ការបរទេស​សហរដ្ឋ​អាមេរិក លោក Antony Blinken កំពុងទទួល​ស្វាគមន៍​ភរិយា​ប្រធានាអធិបតី​អ៊ុយក្រែន លោកស្រី Olena Zelenska នៅ​ក្នុង​កិច្ចប្រជុំ​មួយ​នៅថ្ងៃចន្ទ ដែល​ធ្វើ​ឡើង​នៅ​រដ្ឋធានី​វ៉ាស៊ីនតោន សហរដ្ឋ​អាមេរិក។
• ការិយាល័យ​រដ្ឋអាជ្ញា​អនីតិជន​អ៊ុយក្រែន​បាន​និយាយ​នៅ​ថ្ងៃ​ចន្ទ​ថា យ៉ាង​ហោច​ណាស់​កុមារ ៣៥៣ នាក់​បាន​ស្លាប់ និង​ជាង ៦៦៥ នាក់​បាន​រង​របួស​ដោយសារ​តែ​ការ​លុកលុយ​របស់​រុស្ស៊ី។ ការិយាល័យ​នេះ​បាន​និយាយ​ថា ការ​រង​របួស​ភាគច្រើន​ត្រូវ​បាន​គេ​រាយការណ៍​នៅក្នុង​ទីក្រុង Donetsk ទីក្រុង Kharkiv និង​រដ្ឋធានី​កៀវ ហើយ​យ៉ាង​ហោច​ណាស់​ស្ថាប័ន​អប់រំ​ចំនួន ២.១៣៨ ត្រូវ​បាន​ខូច​ខាត ដែល​ក្នុង​នោះ ២២១ ត្រូវ​បាន​បំផ្លាញ​ទាំង​ស្រុង។
• រុស្ស៊ី​បាន​បញ្ជា​ឱ្យ​កងកម្លាំង​របស់​ខ្លួន​កំណត់​មីស៊ីល​រយៈ​ចម្ងាយ​ឆ្ងាយ និង​អាវុធ​កាំភ្លើងធំ ដែល​បណ្តា​ប្រទេស​លោក​ខាងលិច​បាន​ផ្គត់ផ្គង់​ដល់​អ៊ុយក្រែន​នា​ពេល​ថ្មីៗ​នេះ ជា​គោលដៅ​វាយប្រហារ។ នេះ​ជា​សញ្ញា​មួយ​បង្ហាញ​ថា កម្លាំង​អាវុធ​បន្ថែម​របស់​អ៊ុយក្រែន បាន​ចាប់ផ្តើម​ផ្លាស់​ប្តូរ​ស្ថានភាព​សង្គ្រាម។ នៅ​ថ្ងៃ​ចន្ទ រដ្ឋមន្ត្រី​ការពារជាតិ​រុស្ស៊ី លោក Sergei Shoigu បាន​ប្រាប់​ទាហាន​រុស្ស៊ី​មួយ​ក្រុម ឱ្យ​វាយ​ប្រហារ​លើ​អាវុធ​រយៈ​ចម្ងាយ​ឆ្ងាយ​របស់​អ៊ុយក្រែន​ ជា​គោលដៅ​អាទិភាព ដើម្បី​ទប់ស្កាត់​ការ​បាញ់ផ្លោង​នៅ​ក្នុង​តំបន់​ភាគ​ខាង​កើតអ៊ុយក្រែន ដែល​កាន់​កាប់​ដោយ​កង​កម្លាំង​រុស្ស៊ី។ នេះ​បើ​យោង​តាម​ក្រសួង​ការពារ​ជាតិ​រុស្ស៊ី៕

ថ្ងៃសុក្រ ទី ១៥ ខែកក្កដា៖

• ទូរទស្សន៍ Al Jazeera រាយការណ៍​ថា នាយក​រដ្ឋមន្ត្រី​ហុងគ្រី​លោក Victor Orban បាន​និយាយ​ថា សហភាព​អឺរ៉ុប​បាន «បាញ់​ខ្លួន​ឯង​ចំ​សួត» ជាមួយ​នឹង​ទណ្ឌកម្ម​របស់​ខ្លួន​ប្រឆាំង​នឹង​ប្រទេសរុស្ស៊ី។ នៅ​ក្នុង​បទសម្ភាសន៍​តាមវិទ្យុ​សាធារណៈ លោក Orban បាន​និយាយ​ថា៖ «ដំបូង​ឡើយ ខ្ញុំគិតថា យើង​គ្រាន់​តែ​បាញ់​ខ្លួន​ឯង​ចំ​ជើង​ប៉ុណ្ណោះ ក៏ប៉ុន្តែ​ឥឡូវ​នេះ វា​ច្បាស់​ណាស់​ថា សេដ្ឋកិច្ច​អឺរ៉ុប​បាន​បាញ់​ខ្លួន​ឯង​ចំ​សួត ហើយ​អឺរ៉ុប​កំពុងព្យាយាម​ដក​ដង្ហើម​យ៉ាង​លំបាក»។
• ព័ត៌មាន​សម្ងាត់​នៅពេល​ថ្មីៗនេះ​ពី​ក្រសួង​ការពារជាតិ​ចក្រភព​អង់គ្លេស ​បានឲ្យ​ដឹង​ថា កង​កម្លាំង​បំបែក​ខ្លួនគាំទ្ររុស្ស៊ី​របស់​សាធារណរដ្ឋ​ប្រជាមានិត Luhansk បាន​អះអាងថា ​បាន​ចូល​ដល់​ជាយ​ក្រុង Siversk។ ព័ត៌មាន​សម្ងាត់​ថ្មី​នេះ​បាន​បញ្ជាក់ថា ការអះអាង​នេះ​មិន​ទាន់​បាន​ផ្ទៀត​ផ្ទាត់​ថា​ពិតប្រាកដ​មែន​នោះ​ទេ ហើយ​ថា ​នៅ​ពេល​ដែល​ទីក្រុង Siversk ត្រូវបាន​ចូល​កាន់​កាប់​ហើយ​នោះ ទីក្រុង Bakhmut ទំនង​ជា​គោលដៅ​បន្ទាប់។
• ទូរទស្សន៍ Al Jazeera បាន​រាយការណ៍​ថា សហភាព​ស្គី​អន្តរជាតិ​បាន​ទម្លាក់​ប្រទេស​រុស្ស៊ី​ពី​ការ​ធ្វើ​ជា​ម្ចាស់ផ្ទះ​នៃ​ព្រឹត្តិការណ៍ Grant Prix of Figure Skating។ ទីក្រុង Espoo ប្រទេស​ហ្វាំងឡង់ នឹង​រៀបចំ​ព្រឹត្តិការណ៍​នេះ​ជំនួស​វិញ នៅ​ថ្ងៃទី ២៥ ដល់ ២៧ ខែវិច្ឆិកា។
• វិទ្យាស្ថាន​សម្រាប់​ការសិក្សា​សង្គ្រាម​ ដែល​ជា​ស្ថាប័ន​ស្រាវជ្រាវ​សហរដ្ឋ​អាមេរិក​មួយ ​បាន​និយាយ​នៅ​ក្នុង​ការវាយ​តម្លៃ​ចុងក្រោយ​របស់​ខ្លួន​អំពី​ជម្លោះ​អ៊ុយក្រែន​ថា រុស្ស៊ី​នៅ​តែ​បន្ត​វាយលុក​ទីក្រុង Vinnytsia ទីក្រុង Kharkiv និង​ទីក្រុង Mykolaiv។ រុស្ស៊ី​ក៏​កំពុង​ព្យាយាម​បន្ត​វាយលុក​ក្នុង​ទីក្រុង Siversk និង​វាយប្រហារ​ទីក្រុង Bakhmut និង​ទីក្រុង Slovyansk ផងដែរ។
• សហរដ្ឋ​អាមេរិក​បាន​និយាយ​កាល​ពី​ថ្ងៃ​ព្រហស្បតិ៍​ថា ខ្លួន​នឹង​មិន​រារាំង​ការលក់​ឧបករណ៍​កសិកម្ម​ទៅ​ឱ្យ​រុស្ស៊ី​ទេ ហើយ​បដិសេធ​ជា​ថ្មី​ម្តង​ទៀត​នូវ​ការ​ចោទប្រកាន់​របស់​រុស្ស៊ី​ដែល​ថា ទណ្ឌកម្ម​របស់​លោក​ខាង​លិច គឺ​ជា​មូលហេតុ​នៃ​វិបត្តិ​ស្បៀង​អាហារ​ពិភពលោក មិនមែន​ការ​លុកលុយ​របស់​ខ្លួន​លើ​អ៊ុយក្រែន​នោះ​ទេ។ ក្រសួង​រតនាគារ​អាមេរិក​ក្នុងសេចក្តី​ច្បាប់​ស្តី​ពី​ករណី​លើកលែង​ក្នុងទណ្ឌកម្ម​បាន​និយាយ​ថា ខ្លួន​នឹង​មិន​បញ្ឈប់​ប្រតិបត្តិការ​របស់​សហរដ្ឋ​អាមេរិក​ទាក់ទង​នឹង​ការផលិត ការលក់​ឬ​ការ​ដឹកជញ្ជូន​ឧបករណ៍​កសិកម្ម​នោះទេ។ អនុលោម​តាម​វិធានពី​មុន ​ដែល​បាន​កំណត់​បន្ទាប់ពីការ​លុកលុយថ្ងៃទី ២៤ ខែកុម្ភៈ របស់​រុស្ស៊ី ក្រសួង​ហិរញ្ញវត្ថុ​សហរដ្ឋ​អាមេរិក​ក៏​បាន​និយាយ​ថា ខ្លួន​មិន​ហាមឃាត់​ទំនិញ​កសិកម្ម​ដូចជា​ជី ក៏​ដូចជា​ឧបករណ៍​វេជ្ជសាស្ត្រ​និងឧបករណ៍​តេស្ត​រក​ជំងឺ​កូវីដ​១៩ នោះទេ។
• ពីរ​ខែ​បន្ទាប់​ពី​ធ្លាក់​ចូល​ក្នុង​ការកាន់កាប់​របស់​ទាហានរុស្ស៊ី ទីក្រុង Popasna ភាគ​ខាង​កើត​អ៊ុយក្រែន​ដែល​មាន​ប្រជាពលរដ្ឋ​រស់​នៅ ២០.០០០ នាក់​ បាន​ប្រែ​ទៅ​ជា​ទីក្រុង​ខ្មោច ដែល​មាន​សញ្ញា​នៃ​ជីវិត​តិចតួច។ កងទ័ព​អ៊ុយក្រែន​បាន​ដក​ថយ​ពី​ទីក្រុង Popasna ក្នុង​ខែ​ឧសភា បន្ទាប់ពី​កងកម្លាំង​រុស្ស៊ី​បាន​បើក​ការ​វាយលុក​ភាគច្រើន នៅ​តាម​បណ្តោយ​ភាគខាងកើត​នៃ​ប្រទេស​អ៊ុយក្រែន ដោយ​មាន​ការវាយ​ប្រហារ​យ៉ាងខ្លាំងក្លា និង​ការ​បាញ់​ផ្លោង​ជុំវិញ​ទីក្រុង​ក្នុង​តំបន់ Luhansk។ អ្នក​យក​ព័ត៌មាន Reuters ម្នាក់​ បាន​ទៅ​មើល​ទីក្រុង Popasna កាល​ពី​ថ្ងៃ​ព្រហស្បតិ៍ ហើយ​បាន​រក​ឃើញ​ថា ទីក្រុង​នេះ​ត្រូវ​បាន​បោះបង់ចោល ដោយ​អគារ​ផ្ទះល្វែង​ស្ទើរ​តែ​ទាំងអស់​ត្រូវ​បាន​បំផ្លាញ ឬខូចខាត​យ៉ាងខ្លាំង។ ដង​ផ្លូវ​គ្មានមនុស្ស ឬ​សត្វឡើយ៕

ថ្ងៃព្រហស្បតិ៍ ទី ១៤ ខែកក្កដា៖

• ក្រុម​មន្ត្រី​ដែលត្រូវបាន​តែងតាំង​ដោយ​រុស្ស៊ី​នៅ​ផ្នែកខ្លះ​នៃ​តំបន់​ Zaporizhzhia ភាគ​ខាងត្បូងអ៊ុយក្រែន ដែល​ស្ថិត​ក្រោម​ការ​គ្រប់គ្រង​របស់រុស្ស៊ី មាន​គោល​បំណង​ធ្វើ​ប្រជាមតិ​ស្តី​ពី​ការ​ចុះចូល​ជាមួយ​រដ្ឋាភិបាល​រុស្ស៊ី​នៅ​ខែកញ្ញា​ខាង​មុខ​នេះ​។ នេះ​បើ​យោងតាម​ទីភ្នាក់ងារ​ព័ត៌មាន RIA Novosti របស់​រុស្ស៊ី​ ដែលដក​ស្រង់​សម្តី​មន្ត្រី​ក្នុង​តំបន់​ម្នាក់ ហើយ​ដែល​ត្រូវបាន​រាយការណ៍​ដោយ​ទីភ្នាក់ងារ​ព័ត៌មាន Reuters។
• ការិយាល័យ​សិទ្ធិ​មនុស្ស​របស់​អង្គការ​សហប្រជាជាតិ​ឲ្យ​ដឹង​ថា ជន​ស៊ីវិល​ជាង ៥.០០០ នាក់ ត្រូវ​បាន​សម្លាប់​នៅ​ក្នុង​ប្រទេស​អ៊ុយក្រែន​ ចាប់តាំង​ពី​ប្រទេស​រុស្ស៊ី​បាន​ឈ្លានពាន​លើ​អ៊ុយក្រែន​នៅថ្ងៃទី ២៤ ខែកុម្ភៈ​មក ហើយ​ថា ចំនួន​មនុស្ស​ស្លាប់​ពិតប្រាកដ​ទំនង​ជា​ខ្ពស់​ជាង​នេះ។ នេះ​បើ​យោងតាម​ទីភ្នាក់ងារ​ព័ត៌មាន Al Jazeera។
• មន្ត្រី​អ៊ុយក្រែន​ថា កាំជ្រួច​មីស៊ីល​រុស្ស៊ី​បី​គ្រាប់​ត្រូវ​បាន​បាញ់​ទៅ​លើ​អគារ​នានា​ក្នុង​ទីក្រុង Vinnytsia ភាគ​កណ្តាល​ប្រទេស​អ៊ុយក្រែន។ ការិយាល័យ​អគ្គរដ្ឋអាជ្ញា​នៃ​ប្រទេស​អ៊ុយក្រែន បាន​និយាយ​ថា មនុស្ស​យ៉ាង​ហោចណាស់ ២០ នាក់ រួម​ទាំង​កុមារ​ពីរ​នាក់ ត្រូវ​បាន​សម្លាប់ ​នៅ​ក្នុង​ការ​វាយ​ប្រហារ​តាម​អាកាស​នេះ។ ការិយាល័យ​នេះ​បាន​បន្ថែម​ថា «មនុស្ស​ជា​ច្រើន​នាក់» ផ្សេង​ទៀត​ បាន​រង​របួស ហើយ​ប្រតិបត្តិការ​ស្វែង​រក​និង​សង្គ្រោះ​កំពុង​បន្ត​ធ្វើ​ឡើង។ នេះ​បើ​យោងតាម​ទីភ្នាក់ងារ​ព័ត៌មាន CNN។
• រដ្ឋមន្ត្រី​ក្រសួង​ហិរញ្ញវត្ថុ​សហរដ្ឋ​អាមេរិក អ្នកស្រី Janet Yellen បាន​និយាយ​នៅ​ថ្ងៃព្រហស្បតិ៍​ថា សង្រ្គាម​របស់​រុស្ស៊ី​នៅ​អ៊ុយក្រែន​បាន​ជះឥទ្ធិពល​អវិជ្ជមាន​នៅ​ទូទាំង​ពិភពលោក ដូច​ដែល​បាន​ឃើញ​នៅ​ពេល​តម្លៃ​ថាមពល​ឡើង​ថ្លៃ​ខ្ពស់ និង​ការកើន​ឡើង​នៃ​អសន្តិសុខ​ស្បៀង​អាហារ។ ការអត្ថាធិប្បាយ​របស់​អ្នកស្រី Yellen បាន​ធ្វើ​ឡើង​ក្នុង​អំឡុង​ពេល​សន្និសីទ​សារព័ត៌មាន​ ដែល​ធ្វើ​ឡើង​នៅ​លើកោះ​បាលី​ ប្រទេសឥណ្ឌូណេស៊ី ជា​ទី​ដែល​មេដឹកនាំ​ហិរញ្ញវត្ថុ​នៃ​បណ្តា​ប្រទេស​ដែល​មាន​សេដ្ឋកិច្ច​ជឿនលឿន​ទាំង ២០ ឬ​ហៅ​ថា G-20 រួម​ទាំង​រុស្ស៊ី​ កំពុង​ជួប​ប្រជុំ​គ្នា។ នេះ​បើ​យោងតាម​ទីភ្នាក់ងារ​ព័ត៌មាន Reuters។
• ទីភ្នាក់ងារ​ព័ត៌មាន The Guardian រាយការណ៍​ថា ជនជាតិ​អាមេរិកាំង​ទី​ ៣ ​កំពុង​ត្រូវ​បាន​ចាប់ខ្លួន​ដោយ​ក្រុម​បំបែកខ្លួន​ដែល​គាំទ្រ​រុស្ស៊ី។ លោក Suedi Murekezi ត្រូវ​បាន​ចាប់​ខ្លួន​កាល​ពី​ខែមុន នៅ​ក្នុង​ទីក្រុង​កំពង់ផែ Kherson ដែល​កាន់កាប់​ដោយ​រុស្ស៊ី​ នៅ​ភាគខាងត្បូង​អ៊ុយក្រែន។ ​លោក​ Sele Murekezi ដែល​ត្រូវ​ជា​បងប្រុស បាន​និយាយ​ថា បុរស​អាយុ ៣៥ ឆ្នាំ​រូប​នេះ បាន​រស់​នៅ​ទីនោះ​អស់រយៈ​ពេល​ជាង ២ ឆ្នាំ​មក​ហើយ។ លោក​ Suedi Murekezi បាន​ធ្វើ​ទស្សនកិច្ច​នៅ​អ៊ុយក្រែន​ ដើម្បី​ធ្វើ​ជំនួញ។
• កូរ៉េខាងជើង​បាន​និយាយ​នៅ​ថ្ងៃព្រហស្បតិ៍​ថា ខ្លួន​បាន​ផ្ញើ​សារ​ទៅ​កាន់​ក្រុម​មេដឹកនាំ​នៃ​តំបន់​ផ្តាច់​ខ្លួន Donetsk និង Luhansk នៅ​ភាគខាងកើត​អ៊ុយក្រែន ​ដែល​គាំទ្រ​ដោយ​រុស្ស៊ី អំពី​ឆន្ទៈ​របស់​កូរ៉េខាងជើង នៅ​ក្នុង​ការអភិវឌ្ឍ​ទំនាក់ទំនង​ការទូត។ ប្រទេស​កូរ៉េខាងជើង រួម​ជាមួយ​នឹង​រុស្ស៊ី និង​ស៊ីរី គឺ​ជា​ប្រទេស​ដែល​ទទួល​ស្គាល់​ឯករាជ្យ​នៃ​បណ្តា​ខេត្ត​នៅ​អ៊ុយក្រែន ​ដែល​ក្រុម​ផ្តាច់​ខ្លួន​បាន​កាន់កាប់​តាំង​ពី​ឆ្នាំ ២០១៤៕

ថ្ងៃពុធ ទី ១៣ ខែកក្កដា៖

• ​ជន​ភៀសខ្លួន​ប្រមាណ​ពីរ​ភាគ​បី​មក​ពី​អ៊ុយក្រែន រំពឹង​ថា​នឹង​បន្ត​ស្នាក់នៅ​ក្នុង​ប្រទេស​ដែល​ពួកគេ​បាន​ភៀសខ្លួន​ទៅ រហូត​ដល់ការ​ប្រយុទ្ធ​គ្នា​ថមថយ​ ហើយ​ស្ថានភាព​សន្តិសុខ​ប្រសើរ​ឡើង​វិញ​នៅ​ក្នុង​ប្រទេស​អ៊ុយក្រែន បន្ទាប់ពី​រុស្ស៊ី​បាន​ឈ្លាន​ពាន​លើ​អ៊ុយក្រែន។ នេះ​បើ​យោង​តាម​ការ​រកឃើញ​ពី​ការ​ស្ទង់​មតិ​មួយ​របស់​ទីភ្នាក់ងារ​ទទួល​បន្ទុក​កិច្ចការ​ជនភៀសខ្លួន​របស់​អង្គការ​សហប្រជាជាតិ​ UNHCR។ ទីភ្នាក់ងារ​ព័ត៌មាន​ Reuters បាន​រាយការណ៍​ថា ជនភៀសខ្លួន​ភាគច្រើន​មក​ពី​ប្រទេស​អ៊ុយក្រែន ជាពិសេស​ស្ត្រី​និង​កុមារ សង្ឃឹម​ថា​នឹង​វិល​ត្រឡប់​ទៅ​ផ្ទះសម្បែង​របស់​ពួកគេ​វិញ នៅ​ពេល​ណាមួយ​នាថ្ងៃ​អនាគត។ នេះ​បើ​យោង​តាម​ការ​ស្ទង់​មតិ​ពី​ជនភៀសខ្លួន​ប្រមាណ ៤.៩០០ នាក់​មក​ពី​អ៊ុយក្រែន ដែល​កំពុង​រស់នៅ​ក្នុង​សាធារណរដ្ឋ​ឆេក ​ប្រទេស​ហុងគ្រី ម៉ុលដាវី ប៉ូឡូញ រូម៉ានី និង​ប្រទេស​ស្លូវ៉ាគី។ ការ​ស្ទង់​មតិ​នេះ​ត្រូវបាន​ធ្វើ​ឡើង​ក្នុង​ចន្លោះពាក់​កណ្តាល​ខែ​ឧសភា​និង​ពាក់កណ្តាល​ខែ​មិថុនា។ ​ទីភ្នាក់ងារ UNHCR ក៏​បាន​ឲ្យ​ដឹងផង​ដែរ​ថា ជន​ភៀស​ខ្លួន​ប្រមាណ ៥លាន ៦សែន​នាក់ ត្រូវបាន​កត់ត្រា​ថា​កំពុង​មាន​វត្តមាន​នៅ​ទូទាំង​ទ្វីប​អ៊ឺរ៉ុប ដោយ​មនុស្ស​ជិត ៨ លាន ៨ សែន​នាក់​ បាន​ភៀស​ខ្លួន​ចេញ​ពី​អ៊ុយក្រែន ហើយ​ជិត ៣ លាន ៣ សែន​នាក់ បាន​ឆ្លង​ព្រំដែន​ត្រឡប់​ទៅ​អ៊ុយក្រែន​វិញ​ ចាប់តាំង​ពី​រុស្ស៊ី​បាន​ឈ្លាន​ពាន​លើ​ប្រទេស​អ៊ុយក្រែន​ កាលពី​ថ្ងៃទី ២៤ ខែ​កុម្ភៈ​មក។
• ប្រទេស​អ៊ុយក្រែន​ កំពុង​ស្ថិត​ក្នុង​ «ពីរ​ជំហាន» ពី​ការ​សម្រេច​បាន​កិច្ចព្រមព្រៀង​មួយ​ជាមួយ​រុស្ស៊ី​ដើម្បី​នាំចេញ​គ្រាប់​ធុញ្ញជាតិ​របស់​អ៊ុយក្រែន​ទៅកាន់​ទីផ្សារ​អន្តរជាតិ។ នេះ​បើ​តាម​រដ្ឋមន្ត្រី​ការ​បរទេស Dmytro Kuleba ដែល​បាន​ថ្លែង​ប្រាប់​សារព័ត៌មាន​អេស្ប៉ាញ El Pais មុន​កិច្ចពិភាក្សា​ចម្រុះ​ភាគី​លើ​បញ្ហា​នេះ នៅ​ទីក្រុង​ Istanbul ប្រទេស​តួកគី។ នេះ​បើ​យោង​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។ តួកគីកំពុង​ធ្វើការ​ជាមួយ​អង្គការ​សហប្រជាជាតិ​ ដើម្បី​សម្រួល​ឲ្យ​មាន​កិច្ច​ព្រមព្រៀង​មួយ​នេះ​ឡើង ក្រោយ​ពី​ការ​ឈ្លានពាន​របស់​រុស្ស៊ី​លើ​ប្រទេស​អ៊ុយក្រែន​ចាប់តាំង​ពី​ថ្ងៃទី ២៤ ខែ​កុម្ភៈ​មក ដែល​ការណ៍នេះ​បាន​បណ្តាល​ឲ្យ​តម្លៃ​គ្រាប់​ធុញ្ញជាតិ​ ប្រេង​ចម្អិន​អាហារ ប្រេង​ឥន្ធនៈ និង​តម្លៃ​ជី ឡើង​ថ្លៃ ហើយ​បង្ក​ឲ្យ​មាន​វិបត្តិ​ស្បៀងអាហារ​សកល​លោក​។
• ក្រសួង​ការបរទេស​រុស្ស៊ី​បាន​ឲ្យ​ដឹង​ថា ខ្លួន​នឹង​ពិចារណា​បន្ត​ដឹក​ជញ្ជូន​ឧស្ម័ន​ទៅកាន់​ទ្វីប​អ៊ឺរ៉ុប ឆ្លងកាត់​ប្រទេស​អ៊ុយក្រែន ក្រៅពី​កិច្ច​សន្យា​បច្ចុប្បន្ន​របស់​ខ្លួន​ដែល​នឹង​អស់​សុពលភាព​នៅ​ឆ្នាំ ២០២៤ ឲ្យ​តែ​បណ្តា​ប្រទេស​នៅ​ទ្វីប​អ៊ឺរ៉ុប​នៅតែ​ចង់​បាន​ឧស្ម័ន​រុស្ស៊ី ហើយ​ឲ្យ​តែ​ប្រព័ន្ធ​បញ្ជូន​ឧស្ម័ន​របស់​អ៊ុយក្រែន​ដំណើរការ។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters ដែល​បាន​ដកស្រង់​ខ្លឹមសារ​ព័ត៌មាន​ពី​ទីភ្នាក់ងារ​ព័ត៌មាន RIA Novosti។ ទោះ​ជា​សង្គ្រាម​ក្នុង​ប្រទេស​អ៊ុយក្រែន​នៅតែ​បន្ត​ក្តី ក៏​រុស្ស៊ីកំពុង​បន្ត​ដឹក​ជញ្ជូន​ឧស្ម័ន​ក្នុង​បរិមាណ​ធំ​តាម​ច្រកនានា​ក្នុង​ប្រទេស​អ៊ុយក្រែន​ ទៅកាន់​ប្រទេស​នានា​ក្នុង​ទ្វីប​អ៊ឺរ៉ុប ដែល​ជា​អតិថិជន​សកល​ដ៏​សំខាន់​មួយ​របស់​រដ្ឋាភិបាល​រុស្ស៊ី​ក្នុង​ការ​នាំចេញ​ឧស្ម័ន​ ដែល​មាន​តម្លៃ​ជា​ទឹកប្រាក់​រាប់​ពាន់លាន​ដុល្លារ​អាមេរិក។ ​
• ក្រសួង​ការពារ​ជាតិ​រុស្ស៊ី​បាន​ឲ្យ​ដឹង​នៅ​ថ្ងៃ​ពុធ​ថា កង​ទ័ព​រុស្ស៊ី​បាន​បាញ់​ទម្លាក់​យន្តហោះ​ចម្បាំង​យោធា​ចំនួន៤​គ្រឿង​ របស់​អ៊ុយក្រែន​ នៅក្នុង​ទឹកដី​អ៊ុយក្រែន។ នៅ​ក្នុង​សេចក្តី​ថ្លែងការណ៍​ប្រចាំ​ថ្ងៃ​មួយ​ ក្រសួង​នេះ​បាន​អះអាង​ថា កងទ័ព​រុស្ស៊ី​បាន​បាញ់​កម្ទេច​យន្តហោះ​ចម្បាំង Su-25 និង​ Su-24 ដែល​ជា​យន្តហោះ​ពី​សម័យ​សូវៀត​ប្រើ​ដោយ​កងទ័ព​អ៊ុយក្រែន​ នៅ​តំបន់​ Donetsk ភាគ​ខាង​កើត​ប្រទេស​អ៊ុយក្រែន និង​យន្តហោះ​ចម្បាំង Su-25 មួយ​គ្រឿង​ទៀត​ រួម​ទាំង​យន្តហោះ​ Mig-29 ដែល​ជា​យន្ត​ហោះ​ចម្បាំង​ផលិត​ក្នុង​សម័យ​សូវៀត នៅ​តំបន់ Mykolaiv ភាគខាង​ត្បូង​ប្រទេស​អ៊ុយក្រែន។ ទីភ្នាក់ងារ​ព័ត៌មាន Reuters មិន​អាច​សុំការ​បញ្ជាក់​នូវ​ព័ត៌មាន​នេះ​បាន​នៅ​ឡើយ​ទេ៕