២១:៥៧ ៦.៧.២០២២

ថ្ងៃពុធ ទី ៦ ខែកក្កដា៖

រដ្ឋាភិបាលវិមានក្រឹមឡាំងបានរិះគន់ប្រទេសជប៉ុនកាលពីថ្ងៃពុធអំពីអ្វីដែលខ្លួនបានហៅថា «គោលជំហរប្រកបដោយអមិត្ត»ចំពោះរុស្ស៊ីដោយនិយាយថា ការណ៍នេះបានធ្វើឱ្យប៉ះពាល់ដល់ទំនាក់ទំនងការអភិវឌ្ឍទំនាក់ទំនងសេដ្ឋកិច្ច រួមបញ្ជូលទាំងថាមពលផងដែរ។ ជប៉ុនបានចូលរួមជាមួយសម្ព័ន្ធមិត្តលោកខាងលិចនៅក្នុងការដាក់ទណ្ឌកម្មសេដ្ឋកិច្ចយ៉ាងខ្លាំងលើរុស្ស៊ីប្រឆាំងការឈ្លានពានលើអ៊ុយក្រែន។ រដ្ឋាភិបាលក្រុងមូស្គូក៏មានការទើសចិត្តនឹងសេចក្តីរាយការណ៍ថា នាយករដ្ឋមន្ត្រីជប៉ុនលោក Fumio Kishida បានស្នើឱ្យមានការកំណត់តម្លៃប្រេងរបស់រុស្ស៊ីដែលមានតម្លៃពាក់កណ្តាលនៃតម្លៃក្នុងពេលបច្ចុប្បន្ននេះ។ អ្នកនាំពាក្យរដ្ឋាភិបាលវិមានក្រឹមឡាំងលោក Dmitry Peskov បានប្រាប់ទីភ្នាក់ងារព័ត៌មាន Reuters ថា «ជប៉ុនកំពុងប្រកាន់យកគោលជំហរប្រកបដោយអមិត្តចំពោះរុស្ស៊ី។ ក្នុងករណីនេះ ការប្រកាន់យកជំហរអមិត្តបែបនេះមិនបានជួយសម្របសម្រួលទំនាក់ទំនងពាណិជ្ជកម្ម និងសេដ្ឋកិច្ច រួមទាំងការសន្ទនាអំពីថាមពលទេ»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
កងកម្លាំងរបស់រុស្ស៊ីបានកម្ទេចប្រព័ន្ធរ៉ុក្កែត HIMARS ដែលផលិតដោយសហរដ្ឋអាមេរិកចំនួន២គ្រឿងហើយនិងឃ្លាំងផ្ទុកអាវុធប្រព័ន្ធរ៉ុក្កែតនៅផ្នែកខាងកើតនៃប្រទេសអ៊ុយក្រែន។ នេះបើតាមការបញ្ជាក់របស់ក្រសួងការពារជាតិរុស្ស៊ីនៅថ្ងៃពុធ។ ក្រសួងការពារជាតិរុស្ស៊ីបានឱ្យដឹងទៀតថា រុស្ស៊ីបានកម្ទេចប្រដាប់បាញ់ប្រព័ន្ធរ៉ុកក្កែត High Mobility (HIMARS) ដែលសហរដ្ឋអាមេរិកនិងសម្ព័ន្ធមិត្តបានផ្តល់ឱ្យរដ្ឋាភិបាលក្រុងកៀវ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។

រថក្រោះរបស់កងកម្លាំងអ៊ុយក្រែនបើកកាត់តាមផ្លូវក្នុងក្រុង Kramatorsk ដែលស្ថិតនៅប៉ែកខាងកើតអ៊ុយក្រែន ថ្ងៃទី ៦ ខែកក្កដា ឆ្នាំ២០២២។

សហភាពអឺរ៉ុបមានផែនការក្លាយជាអ្នកវិនិយោគទុនដ៏ធំបំផុតរបស់ពិភពលោកនៅក្នុងប្រទេសតាហ្ស៊ីគីស្ថាននៅក្នុងចំណាត់ការមួយដែលមានគោលបំណងជួយប្រទេសអាស៊ីកណ្តាលមួយនេះឱ្យកាត់បន្ថយការពឹងផ្អែកលើថាមពលរបស់រុស្ស៊ីហើយនឹងជាផ្នែកមួយនៃការឆ្លើយតបរបស់សហភាពអឺរ៉ុបដល់គម្រោងក្រវាត់ពាណិជ្ជកម្មរបស់ចិន។ នេះបើតាមមន្ត្រីសហភាពអឺរ៉ុបប្រាប់ទីភ្នាក់ងារព័ត៌មាន Reuters។
អតីតប្រធានាធិបតីរុស្ស៊ីលោក Dmitry Medvedev បានលើកឡើងនៅថ្ងៃពុធពីលទ្ធភាពនៃធ្វើសង្គ្រាមនុយក្លេអ៊ែរ ប្រសិនបើតុលាការព្រហ្មទណ្ឌអន្តរជាតិ (ICC)ចាត់វិធានការដាក់ទណ្ឌកម្មរដ្ឋាភិបាលក្រុងមូស្គូតាមការចោទប្រកាន់ពីបទឧក្រិដ្ឋកម្មនៅក្នុងប្រទេសអ៊ុយក្រែន។ លោក Medvedev ដែលជាសម្ព័ន្ធមិត្តដ៏ជិតស្និទ្ធរបស់លោកប្រធានាធិបតី Vladimir Putin បាននិយាយតាមសារនៅលើ Telegram ថា «គំនិតដាក់ទណ្ឌកម្មប្រទេសមួយដែលមានឃ្លាំងអាវុធនុយក្លេអ៊ែរដ៏ធំបំផុតនោះជាការមិនសមហេតុសមផលទេ»។
លោកMedvedevដែលបានធ្វើជាប្រធានាធិបតីជំនួសលោក Putin នៅចន្លោះឆ្នាំ២០០៨ និង២០១២នោះឥឡូវនេះជាអនុប្រធានក្រុមប្រឹក្សាសន្តិសុខ។ លោកបានចោទប្រកាន់សហរដ្ឋអាមេរិកពីការចង់កាត់ទោសរដ្ឋាភិបាលក្រុងមូស្គូនៅតុលាការអន្តរជាតិ ខណៈសហរដ្ឋអាមេរិកមិនដែលប្រឈមទណ្ឌកម្មចំពោះការធ្វើសង្គ្រាមរបស់ខ្លួន ដែលលោកចោទថា បានបណ្តាលឱ្យមានមនុស្សស្លាប់ចំនួន២០លាននាក់នៅទូទាំងពិភពលោក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
សហភាពអឺរ៉ុបកាលពីថ្ងៃពុធបានចាប់ផ្តើមផ្តោតកាន់តែខ្លាំងលើថាមពល ដោយសារសង្គ្រាមរបស់រុស្ស៊ីនៅក្នុងប្រទេសអ៊ុយក្រែន ខណៈសាធារណរដ្ឋឆែកបានដាក់ស្នើអាទិភាពរបស់ខ្លួនបន្ទាប់ពីបានកាន់តំណែងជាប្រធានរបស់ប្លុកនោះបន្តពីប្រទេសបារាំង។ ប្រធានគណៈកម្មការអឺរ៉ុបលោកស្រី Ursula von der Leyen បានប្រាប់សភាអឺរ៉ុបថា «យើងចាំបាច់ប្រុងប្រៀបរៀបចំសម្រាប់ការបង្អាក់នៃការផ្គត់ផ្គង់ថែមទៀត សូម្បីត្រូវបានកាត់ផ្តាច់ទាំងស្រុងពីប្រទេសរុស្ស៊ី»។ លោកស្រីបានមានប្រសាសន៍ថា គណៈកម្មការរបស់លោកស្រីនឹងផ្សព្វផ្សាយផែនការសន្តិសុខការផ្គត់ផ្គង់ថាមពលគ្រាអាសន្ននៅចុងសប្តាហ៍ក្រោយ ដែលនឹងជួយតម្រង់ទិសលំហូរឧស្ម័នឡើងវិញនៅក្នុងសហភាពអឺរ៉ុបទៅកាន់ទីកន្លែងដែលត្រូវការឧស្ម័ននេះបំផុត។ នាយករដ្ឋមន្ត្រីឆែកលោក Petr Fiala បានប្រាប់សភាអឺរ៉ុបថា ផែនការថាមពលនេះនឹងឆ្លុះបញ្ចាំងពីសាមគ្គីភាពរបស់សហភាពអឺរ៉ុបដូចដែលមានបង្ហាញក្នុងអំឡុងនៃវិបត្តិកូវីដដ៏ខ្លាំង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
អភិបាលខេត្ត Donetsk ភាគខាងកើតនៃប្រទេសអ៊ុយក្រែនបាននិយាយនៅថ្ងៃពុធថា ការបាញ់ផ្តក់របស់រុស្ស៊ីបានសម្លាប់ជនស៊ីវិល៥នាក់និងធ្វើឱ្យរបួស២១នាក់កាលពី២៤ម៉ោងមុន។ លោក Pavlo Kyrylenko បានចុះផ្សាយលើតេឡេក្រាមថា មនុស្សស្លាប់មាននៅក្នុងទីក្រុង Avdiivka, Sloviansk, Krasnohorivkaនិង Kurakhove។
ប្រទេសរុស្ស៊ីបានចាប់ផ្តើមនូវអ្វីដែលអភិបាលក្រុង Sloviansk លោក Vadim Lyakh ហៅថា «ការបាញ់ផ្លោងដ៏ធំ» លើទីក្រុងកាលពីថ្ងៃអង្គារ។ កងទ័ពរុស្ស៊ីបានត្រួតត្រាខេត្ត Luhansk ដែលជាខេត្តជិតខាងនៅសប្តាហ៍នេះហើយបានជំរុញការវាយប្រហារទៅលើទីក្រុង Sloviansk និង Bakhmut នៅពេលដែលពួកគេបានរុលទៅមុខនៅក្នុងខេត្ត Donetsk ដែលពាក់កណ្តាលត្រូវបានរុស្ស៊ីកាន់កាប់រួចហើយ។
កាលពីសង្គ្រាមមុនដំបូង រុស្ស៊ីបានបរាជ័យមិនអាចផ្តួលរំលំរដ្ឋាភិបាលរបស់ប្រធានាធិបតីអ៊ុយក្រែនលោក Volodymyr Zelenskyy ឬមិនអាចកាន់កាប់រដ្ឋធានីកៀវ ក៏ប៉ុន្តែចាប់តាំងពីពេលនោះមកបានផ្តោតលើការកាន់កាប់តំបន់ឧស្សាហកម្ម Donbas ភាគខាងកើតដែលរួមមាន ខេត្ត Luhansk និង Donetsk។
សន្តិសុខម្ហូបអាហារនិងថាមពលនឹងកា្លយជាផ្នែកដ៏សំខាន់មួយនៅជំនួបរបស់រដ្ឋមន្ត្រីការបរទេសរបស់ប្រទេសដែលមានសេដ្ឋកិច្ចជឿនលឿនទាំង ២០ ឬ G-20នៅលើកោះបាលី ប្រទេសឥណ្ឌូណេស៊ីនៅសប្តាហ៍នេះហើយប្រទេសជាសមាជិករបស់ក្រុមនោះទទូចឱ្យប្រ ទេសរុស្ស៊ីគាំទ្រការខំប្រឹងប្រែងរបស់អង្គការសហប្រជាជាតិបើកឡើងវិញនូវការដឹកជញ្ជូនតាមសមុទ្រដែលត្រូវបានរាំងខ្ទប់ដោយសារសង្គ្រាមរបស់រដ្ឋាភិបាលក្រុងមូស្គូនៅក្នុងប្រទេសអ៊ុយក្រែន។ នេះបើតាមមន្ត្រីជាន់ខ្ពស់ម្នាក់របស់សហរដ្ឋអាមេរិកហើយត្រូវបានរាយការណ៍ដោយទីភ្នាក់ងារព័ត៌មាន Reuters។
លោក Ramin Toloui ឧបការីរដ្ឋមន្ត្រីការបរទេសទទួលបន្ទុកកិច្ចការសេដ្ឋកិច្ចនិងពាណិជ្ជកម្មសហរដ្ឋអាមេរិកបានប្រាប់ពួកអ្នកយកព័ត៌មានថា រដ្ឋមន្ត្រីការបរទេសសហរដ្ឋអាមេរិកលោក Antony Blinken នឹងលើកអំពីសន្តិសុខថាមពលនៅក្នុងសម័យប្រជុំរបស់រដ្ឋមន្ត្រីការបរទេស G-20 នៅថ្ងៃសុក្រនិងនៅក្នុងជំនួបទ្វេភាគីនៅកោះបាលី។
ប្រធានាធិបតីតួកគីលោក Recep Tayyip Erdogan បាននិយាយកាលពីថ្ងៃអង្គារថា លោកមានបំណងពង្រីកការចរចាជាមួយរុស្ស៊ីនិងអ៊ុយក្រែននៅក្នុងក្តីសង្ឃឹមឈោងទៅដល់ការព្រមព្រៀងលើផែនការរបស់អង្គការសហប្រជាជាតិដើម្បីនាំចេញគ្រាប់ធញ្ញជាតិរបស់អ៊ុយ ក្រែនទៅកាន់ទីផ្សារពិភពលោក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
តួកគីកំពុងធ្វើការជាមួយអង្គការសហប្រជាជាតិ អ៊ុយក្រែននិងប្រទេសរុស្ស៊ីលើផែនការដែលនឹងអនុញ្ញាតឱ្យគ្រាប់ធញ្ញជាតិអ៊ុយក្រែនរាប់លានតោនដែលស្ថិតនៅក្នុងឃ្លាំងត្រូវបានដឹកជញ្ជូនតាមច្រកសុវត្ថិភាពនៅក្នុងសមុទ្រខ្មៅ។

អ្នកកាសែតអ៊ុយក្រែនដើរកាត់គំនរបាក់បែកនៃអគារសាកលវិទ្យាល័យជាតិគរុកោសល្យ ដែលរងការវាយប្រហារដោយរុស្ស៊ី នៅទីក្រុង Kharkiv ប្រទេសអ៊ុយក្រែន ថ្ងៃទី ៦ ខែកក្កដា ឆ្នាំ២០២២។

លោក Erdogan បានធ្វើអត្ថាធិប្បាយក្នុងអំឡុងពេលនៃសន្និសីទកាសែតរួមគ្នាមួយជាមួយនាយករដ្ឋមន្ត្រីអ៊ីតាលីលោក Mario Draghi។ លោក Draghi និយាយថា អង្គការសហប្រជា ជាតិមានគម្រោងនាំចេញគ្រាប់ធញ្ញជាតិរបស់អ៊ុយក្រែនកាត់តាមច្រកសមុទ្រសុវត្ថិភាពដែលអាចជួយសន្សំពេលវេលាដើម្បីយកគ្រាប់ធញ្ញជាតិចេញពីឃ្លាំងមុនពេលរដូវប្រមូលផល។
កាណាដាបានក្លាយជាប្រទេសមុនដំបូងគេដែលផ្តល់សច្ចានុម័តជាផ្លូវការដល់ការទទួលយកប្រទេសហ្វាំងឡង់និងស៊ុយអែដជាសមាជិកអង្គការអូតង់។ មុនពេលប្រើប្រាស់ដំណើរការរដ្ឋបាលផ្តល់សច្ចានុម័តជាផ្លូវការដល់សមាជិកភាពរបស់ប្រទេសទាំង២កាលពីថ្ងៃអង្គារម្សិលមិញ រដ្ឋមន្ត្រីការបរទេសកាណាដាលោកស្រី Melanie Joly បានថ្លែងទៅកាន់សមាជិកសភារបស់គណបក្សប្រឆាំងដើម្បីធ្វើឱ្យប្រាកដថា ពួកគេបានយល់ព្រម។ នេះបើតាមការបញ្ជាក់របស់អ្នកនាំពាក្យរដ្ឋមន្ត្រីការបរទេសកាណាដា។
ពួកមន្ត្រីមកពីការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ឬ OCHA បានស្ថិតនៅក្នុងទីក្រុង Serhiivka កាលពីថ្ងៃចន្ទជាទីកន្លែងដែលពួកគេបានឃើញស្ថានភាពក្រោយការវាយប្រហារដ៏រន្ធត់ដែលបានកើតឡើងនៅក្នុងតំបន់ដែលមានអ្នកស្រុករស់នៅកាលពីសប្តាហ៍មុន។ នេះបើតាមលោក Stephan Dujarric អ្នកនាំពាក្យអង្គការសហ ប្រជាជាតិដែលបានប្រាប់សន្និសីទកាសែតក្នុងទីក្រុងញូវយ៉ក។
កាលពីចុងសប្តាហ៍មុននិងកាលពីថ្ងៃចន្ទ អង្គការសហប្រជាជាតិបានទទួលសេចក្តីរាយ ការណ៍អំពីការប្រយុទ្ធគ្នាដ៏ខ្លាំងដែលបានសម្លាប់និងធ្វើឱ្យជនស៊ីវិលជាច្រើននៅផ្នែកទាំងសងខាងនៃសមរភូមិមុខនៅក្នុងតំបន់ Donestka។ ផ្ទះសម្បែងរាប់រយខ្នងនិងហេដ្ឋារចនាសម្ព័ន្ធស៊ីវិលជាច្រើនទៀតបានរងការវាយប្រហារក្នុងប៉ុន្មានថ្ងៃថ្មីៗនេះ រួមទាំងប្រព័ន្ធទឹកនៅក្នុងទីក្រុង Sloviansk ផងដែរ។
សមាជិកសភារុស្ស៊ីកាលពីថ្ងៃអង្គារម្សិលមិញបានអនុម័តសេចក្តីព្រាងច្បាប់មួយដើម្បីដាក់ទណ្ឌកម្មកាន់តែខ្លាំងឡើងចំពោះក្រុមហ៊ុន Internet បរទេសដែលមិនបានបើកការិ យាល័យនៅក្នុងប្រទេសរុស្ស៊ីដែលរួមមានការផាកពិន័យផង។ នេះបើតាមសេចក្តីរាយ ការណ៍របស់ទីភ្នាក់ងារព័ត៌មាន Reuters។

០០:០៧ ៦.៧.២០២២

ថ្ងៃអង្គារ ទី ៥ ខែកក្កដា៖

នៅក្នុងសុន្ទរកថាតាមវីដេអូពេលយប់ ប្រធានាធិបតីអ៊ុយក្រែនលោក Zelenskyy បាននិយាយថា «ផ្នែកមួយដ៏សំខាន់នៃសេដ្ឋកិច្ចត្រូវបានបំផ្លាញដោយសកម្មភាពអរិភាព និងការវាយប្រហាររបស់រុស្ស៊ី ហើយសហគ្រាសរាប់ពាន់ត្រូវបានបិទអាជីវកម្ម»។
នៅពេលដែលរុស្ស៊ីឈ្លានពានអ៊ុយក្រែន លោក Ilya Kostyukov បានចាប់ផ្តើមក្រុមសកម្មជនប្រឆាំងសង្រ្គាមនៅទីក្រុង Belgorod របស់រុស្ស៊ី។ ចាប់តាំងពីពេលនោះមក គាត់បានប្រឈមមុខនឹងការគំរាមកំហែងនៃការបណ្តេញចេញពីសាកលវិទ្យាល័យ ត្រូវប៉ូលិសតាមដល់ផ្ទះ ហើយបន្តលោកត្រូវប្រុងប្រយ័ត្នទាក់ទងនឹងច្បាប់ត្រួតពិនិត្យថ្មីរបស់ប្រទេសនេះ។ នេះបើតាមវិទ្យុសេរីអឺរ៉ុប/វិទ្យុសេរីភាព។ អ្នកស្រី Bridget Brink ឯកអគ្គរដ្ឋទូតសហរដ្ឋអាមេរិកប្រចាំនៅអ៊ុយក្រែន បានចំណាយពេលមួយផ្នែកនៃទិវាបុណ្យឯករាជ្យថ្ងៃទី៤ ខែកក្កដា របស់អ្នកស្រីជួបជាមួយទាហានអ៊ុយក្រែន។
លោក Zelenskyy បានបង្ហោះសារជូនពរ«សន្តិភាព និងវិបុលភាព» ចំពោះលោក Biden និងប្រជាជនអាមេរិកកាលពីថ្ងៃចន្ទ។ លោក Zelenskyy បានសរសេរថា៖ «ខ្ញុំកោតសរសើរជំនួយ ការដឹកនាំរបស់សហរដ្ឋអាមេរិកក្នុងការការពារតម្លៃរួមរបស់អ៊ុយក្រែនគឺសេរីភាព ប្រជាធិបតេយ្យ និងឯករាជ្យភាព»។

រូបឯកសារ៖ ប្រធានាធិបតីអ៊ុយក្រែន លោក Volodymyr Zelenskyy ថ្លែងសុន្ទរកថាតាមវីដេអូទៅកាន់បណ្ដាមេដឹកនាំអង្គការអូតង់នៅក្នុងកិច្ចប្រជុំកំពូលមួយក្នុងទីក្រុង Madrid ថ្ងៃទី២៩ ខែមិថុនា ឆ្នាំ២០២២។

ក្រសួងការពារជាតិចក្រភពអង់គ្លេសបាននិយាយនៅថ្ងៃអង្គារនេះថា ខ្លួនរំពឹងថា រុស្ស៊ីនឹងប្រើយុទ្ធសាស្ត្រដូចគ្នាដែលខ្លួនប្រើដើម្បីដណ្តើមយកស្ទើរតែទាំងអស់នៃខេត្ត Luhansk ភាគខាងកើតអ៊ុយក្រែន ខណៈរុស្ស៊ីជំរុញការកាន់កាប់ខេត្ត Donetsk និងឈានដល់គោលដៅដើម្បីកាន់កាប់តំបន់ Donbas ទាំងមូល។
រដ្ឋមន្ត្រីការពារជាតិរុស្ស៊ីលោក Sergei Shoigu បានរាយការណ៍ប្រាប់ប្រធានាធិបតីរុស្ស៊ីលោក Vladimir Putin នៅក្នុងកិច្ចប្រជុំតាមទូរទស្សន៍មួយកាលពីថ្ងៃចន្ទថា កងកម្លាំងរុស្ស៊ីបានកាន់កាប់ទីក្រុង Luhansk ។ ជាការឆ្លើយតបលោក Putin បាននិយាយថា អង្គភាពយោធា «ដែលបានចូលរួមក្នុងសកម្មប្រយុទ្ធនិងទទួលបានជ័យជម្នះ» នៅក្នុងតំបន់Luhansk «គួរតែសម្រាក ដើម្បីបង្កើនសមត្ថភាពប្រយុទ្ធរបស់ពួកគេ»។
សមាជិកអង្គការអូតង់នៅថ្ងៃអង្គារនេះគ្រោងនឹងចុះហត្ថលេខាលើពិធីសារជាធរមានសម្រាប់ប្រទេសហ្វាំងឡង់ និងស៊ុយអែតឱ្យចូលរួមសម្ពន្ធភាពយោធានេះ។ ប្រទេសទាំងពីរបានដាក់សំណើកាលពីខែឧសភា។ ការចូលរួមនេះ បានកែប្រែជំហរមិនចូលបក្ខសម្ពន្ធជាយូរយារមកហើយរបស់ប្រទេសទាំងពីរជាការឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។
អវកាសយានិករុស្ស៊ីនៅលើយន្តហោះ ISS បានកាន់ទង់ជាតិតំណាងឱ្យក្រុមបំបែកខ្លួនគាំទ្ររុស្ស៊ីនៅភាគខាងកើតអ៊ុយក្រែន និងអបអរសាទរកងកម្លាំងរបស់រដ្ឋាភិបាលក្រុងម៉ូស្គូក្នុងការដណ្តើមយកតំបន់ Lugansk នៃប្រទេសអ៊ុយក្រែន។ នេះបើតាមទីភ្នាក់ងារអវកាសរុស្ស៊ីនិយាយកាលពីថ្ងៃចន្ទ។
នាយករដ្ឋមន្ត្រីអង់គ្លេសលោក Boris Johnson បាននិយាយកាលពីថ្ងៃចន្ទថា ចាំបាច់ត្រូវរកផ្លូវរួមទាំងទន្លេ Danube របស់អឺរ៉ុបផង សម្រាប់ដឹកជញ្ជូនគ្រាប់ធញ្ញជាតិពីអ៊ុយក្រែន បើគេមិនអាចដឹកគ្រាប់ធញ្ញជាតិតាមរយៈច្រកសមុទ្រBosphorus ក្នុងប្រទេសតួកគីបាននោះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
ជនជាតិអង់គ្លេសពីរនាក់និងបុរសម៉ារ៉ុកម្នាក់ដែលត្រូវបានកាត់ទោសប្រហារជីវិតកាលពីខែមុនដោយពួកបំបែកខ្លួនដែលគាំទ្រដោយរុស្ស៊ី ខណៈកំពុងប្រយុទ្ធដើម្បីអ៊ុយក្រែននោះ បានប្តឹងឧទ្ធរណ៍ចំពោះការផ្តន្ទាទោសពួកគេ។ នេះបើតាមតុលាការមួយនៅក្នុងសាធារណរដ្ឋប្រជាមានិត Donetsk ដែលបំបែកពីអ៊ុយក្រែន។

ផ្សែងហុយចេញពីតំបន់មួយក្រោយពីរងការវាយប្រហារដោយគ្រាប់ផ្លោងពីរុស្ស៊ី នៅក្នុងតំបន់ Donetsk ប្រទេសអ៊ុយក្រែន ថ្ងៃទី ៥ ខែកក្កដា ឆ្នាំ២០២២។

លោក Thomas Bach ប្រធានគណៈកម្មាធិការអូឡាំពិកអន្តរជាតិ(IOC)បានជួបជាមួយប្រធានាធិបតីអ៊ុយក្រែនលោក Volodymyr Zelenskyy នៅទីក្រុងកៀវ កាលពីថ្ងៃចន្ទ ហើយបានសន្យាថា នឹងបង្កើនមូលនិធិរបស់ IOC បីដងសម្រាប់អត្តពលិកអ៊ុយក្រែន ហើយទង់ជាតិអ៊ុយក្រែននឹង «បង្ហោះខ្ពស់» នៅក្នុងព្រឹត្តិការណ៍កីឡាឆ្នាំ២០២៤ នៅទីក្រុងប៉ារីស។ នេះបើតាមទីភ្នាក់ងារសារព័ត៌មាន Agence France-Presse។ ទីភ្នាក់ងារសារព័ត៌មាន The Associated Press បានរាយការណ៍ថា លោក Zelenskyy បានថ្លែងអំណរគុណគណៈកម្មាធិការអូឡាំពិកអន្តរជាតិសម្រាប់ការគាំទ្រដល់ការហាមឃាត់ក្រុម និងអត្តពលិករុស្ស៊ី ក្នុងកីឡាអូឡាំពិកភាគច្រើន។
ចក្រភពអង់គ្លេសបាននិយាយថា នៅថ្ងៃអង្គារខ្លួននឹងដាក់ទណ្ឌកម្មសេដ្ឋកិច្ច ពាណិជ្ជកម្ម និងការដឹកជញ្ជូនថ្មីលើប្រទេសបេឡារុស ព្រោះប្រទេសនេះគាំទ្រការលុកលុយរបស់រុស្ស៊ីលើអ៊ុយក្រែន។ នេះបើតាមទីភ្នាក់ងារសារព័ត៌មាន Reuters។
នាយករដ្ឋមន្រ្តីអ៊ុយក្រែនបានប្រាប់សន្និសីទស្តីពីការស្តារប្រទេសអ៊ុយក្រែនឡើងវិញដែលរៀបចំដោយប្រទេសស្វីសថាប្រទេសរបស់លោកត្រូវការ៧៥០ពាន់លានដុល្លារសម្រាប់ផែនការស្តារឡើងវិញបីដំណាក់កាល បន្ទាប់ពីការឈ្លានពានរបស់រុស្ស៊ី។ នេះបើតាមទីភ្នាក់ងារសារព័ត៌មានReuters។ ប្រធានគណៈកម្មការអឺរ៉ុបអ្នកស្រី Ursula von der Leyen និយាយថា សហភាពអឺរ៉ុបនឹងបង្កើតវេទិកាដើម្បីសម្របសម្រួលការកសាងអ៊ុយក្រែនឡើងវិញ បន្ទាប់ពីសង្គ្រាមជាមួយរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអូស្ត្រាលីលោក Anthony Albanese បានទៅទស្សនាទីក្រុងនានារបស់អ៊ុយក្រែន ដែលរុស្ស៊ីត្រូវបានចោទប្រកាន់ពីបទឧក្រិដ្ឋកម្មសង្គ្រាមប្រឆាំងនឹងជនស៊ីវិល។ លោកក៏បានសន្យាថា នឹងផ្តល់ជំនួយយោធាបន្ថែមចំនួន ៧០លានដុល្លារអាមេរិកផងដែរ។ នេះបើតាមលោក Phil Mercer រាយការណ៍ពីទីក្រុងស៊ីដនីឱ្យ VOA។

២២:៣២ ៤.៧.២០២២

ថ្ងៃចន្ទ ទី ០៤ ខែកក្កដា៖

ការប្រយុទ្ធគ្នាយ៉ាងខ្លាំងក្លាបានកើតឡើងនៅក្នុងតំបន់ Donbas ភាគខាងកើតប្រទេសអ៊ុយក្រែនកាលពីថ្ងៃសៅរ៍ ខណៈកងកម្លាំងរុស្ស៊ីបានបង្កើនការទម្លាក់គ្រាប់បែកលើទីក្រុង Lysychansk។ រុស្ស៊ីកំពុងកំណត់គោលដៅវាយតំបន់នេះ ខណៈយោធារុស្ស៊ីចង់រុលចូលកាន់តែជ្រៅទៅក្នុងតំបន់ឧស្សាហកម្មដែលបានក្លាយជាការផ្តោតការវាយលុកចុងក្រោយបង្អស់ចាប់តាំងពីរុស្ស៊ីបរាជ័យក្នុងការដណ្តើមយកក្រុងកៀវ ក្រោយការឈ្លានពាន ថ្ងៃទី ២៤ ខែកុម្ភៈ។
មន្ត្រីយោធាអ៊ុយក្រែនបាននិយាយថា ជនស៊ីវិលយ៉ាងតិចណាស់ ៥០ នាក់ត្រូវបានសម្លាប់ដោយការវាយប្រហារដោយគ្រាប់រ៉ុក្កែត និងកាំជ្រួចរបស់រុស្ស៊ីកាលពីសប្តាហ៍មុន ក្នុងនោះមាន ១៩ នាក់ស្លាប់កាលពីថ្ងៃចន្ទនៅក្នុងផ្សារទំនើបមួយក្នុងទីក្រុង Kremenchuk។ បន្ទាប់ពីកាំជ្រួចបានវាយប្រហារអគារលំនៅដ្ឋានក្នុងទីក្រុង Odesa កាលពីថ្ងៃសុក្រ លោក Zelenskyy បានចោទប្រកាន់រុស្ស៊ីថាជារដ្ឋភេរវកម្ម។ អត្ថាធិប្បាយរបស់លោក Zelenskyy ត្រូវបានធ្វើឡើងនៅពេលដែលអាជ្ញាធរអ៊ុយក្រែនបានចេញផ្សាយវីដេអូកាលពីថ្ងៃសៅរ៍បង្ហាញពីយន្តហោះចម្បាំងរុស្ស៊ីទម្លាក់គ្រាប់បែកលើកោះពស់ក្នុងរយៈពេលមួយថ្ងៃក្រោយមក បន្ទាប់ពីរុស្ស៊ីបាននិយាយថាខ្លួនបានដកចេញដោយសារហេតុផលមនុស្សធម៌។
នៅពេលដែលសង្រ្គាមនៅអ៊ុយក្រែននៅតែបន្ត សហរដ្ឋអាមេរិកបានប្រកាសផែនការលម្អិតអំពីជំនួយយោធាបន្ថែមចំនួន ៨២០ លានដុល្លារសម្រាប់អ៊ុយក្រែន រួមទាំងប្រព័ន្ធមីស៊ីលថ្មីបាញ់ពីដីទៅអាកាស និងរ៉ាដាប្រឆាំងកាំភ្លើងធំផងដែរ។ កញ្ចប់ជំនួយយោធាទី ១៤ របស់សហរដ្ឋអាមេរិក រួមមានប្រព័ន្ធការពារដែនអាកាសចំនួនពីរ ដែលអាចជួយកងកម្លាំងអ៊ុយក្រែនប្រឆាំងនឹងកាំជ្រួចរត់តាមគន្លងបញ្ជា និងយន្តហោះចម្បាំងផងដែរ។
ប្រធានាធិបតីអ៊ុយក្រែនលោក Volodymyr Zelenskyy បានប្តេជ្ញាថានឹងដណ្តើមទឹកដីត្រឡប់មកវិញ ដោយមានការជួយពីអាវុធទំនើប បន្ទាប់ពីកងទ័ពរបស់លោកបានដកចេញពីទីក្រុង Lysychnask ដែលជាទឹកដីនៅសល់ចុងក្រោយបង្អស់ដែលគ្រប់គ្រងដោយអ៊ុយក្រែននៅក្នុងខេត្ត Luhansk ភាគខាងកើត។ ចាប់តាំងពីការឈ្លានពានទឹកដីអ៊ុយក្រែនចូលក្នុងខែទី ៤ ដើម្បីផ្តួលរំលំលោក Zelenskyy ឬកាន់កាប់រដ្ឋធានីកៀវមិនបានសម្រេចមកនោះ រុស្ស៊ីបានផ្តោតលើការដណ្តើមការត្រួតត្រាតំបន់ Donbas ដែលរួមមានខេត្ត Luhansk និង Donetsk។ អ៊ុយក្រែនរក្សាការកាន់កាប់ទីក្រុងខ្លះក្នុងខេត្ត Donetsk។

ក្រុមអ្នកជួយសង្គ្រោះកំពុងពិនិត្យមើលរណ្តៅមួយនៅក្បែរផ្ទះដែលត្រូវបានបំផ្លាញដោយការវាយប្រហារតាមរ៉ុក្កែតរបស់ទាហានរុស្ស៊ី នៅទីក្រុង Kramatorsk ថ្ងៃទី ៤ ខែកក្កដា ឆ្នាំ ២០២២។

រុស្ស៊ីបានអះអាងកាលពីថ្ងៃអាទិត្យថា ខ្លួនបានគ្រប់គ្រងទីក្រុងឧស្សាហកម្ម Lysychansk ដែលជាទឹកដីនៅសល់ចុងក្រោយដែលកាន់កាប់ដោយអ៊ុយក្រែនក្នុងខេត្ត Luhansk ភាគខាងកើត។ រដ្ឋមន្ត្រីការពារជាតិរុស្ស៊ីលោក Sergei Shoigu បានប្រាប់ប្រធានាធិបតីរុស្ស៊ីលោក Vladimir Putin ថា សាធារណរដ្ឋប្រជាមានិត Luhansk ត្រូវបាន«រំដោះ»។ នេះបើតាមក្រសួងការពារជាតិរុស្ស៊ីផ្សាយតាម Telegram។ ក្រសួងការពារជាតិអ៊ុយក្រែន នៅក្នុងបទសម្ភាសន៍មួយជាមួយបណ្ដាញព័ត៌មាន BBC បានជំទាស់ការអះអាងរបស់រុស្ស៊ី ដោយនិយាយថា ទីក្រុង Lysychansk មិនស្ថិតនៅក្រោម«ការគ្រប់គ្រងទាំងស្រុង» របស់កងកម្លាំងរុស្ស៊ី និងសម្ព័ន្ធមិត្តផ្តាច់ខ្លួនរបស់ពួកគេនោះទេ។
ទីក្រុង Kramatorsk ដែលជាទីក្រុងធំមួយនៅចំកណ្តាលតំបន់ Donbas ដែលជាកន្លែងនៅសេសសល់នៅក្រោមការគ្រប់គ្រងរបស់អ៊ុយក្រែននោះ កំពុងមានជីវិតរស់ឡើងវិញ ទោះបីជាកាំភ្លើងធំរបស់រុស្ស៊ីបានវាយលើនៅទីក្រុងជិតនោះ គឺក្រុង Sloviansk ក្រុង Siversk និងក្រុង Bakhmut ក៏ដោយ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
ប្រទេសស្វីសកំពុងរៀបចំសន្និសីទនៅថ្ងៃច័ន្ទ និងថ្ងៃអង្គារ ដោយផ្តោតលើតម្រូវការកសាងប្រទេសអ៊ុយក្រែនឡើងវិញ។ ឯកអគ្គរដ្ឋទូតអ៊ុយក្រែនប្រចាំប្រទេសស្វីស លោក Artem Rybchenko បាននិយាយថា សន្និសីទនេះនឹងជួយបង្កើតផែនទីបង្ហាញផ្លូវសម្រាប់ស្តារប្រទេសលោកឡើងវិញ។ លោក Volodymyr Zelenskyy ប្រធានាធិបតីអ៊ុយក្រែន ត្រូវគេរំពឹងថានឹងថ្លែងសុន្ទរកថានៅក្នុងសន្និសីទនេះតាមវីដេអូ រីឯនាយករដ្ឋមន្ត្រីអ៊ុយក្រែនលោក Denys Shmyhal បានធ្វើដំណើរដ៏កម្រនៅក្រៅប្រទេសអ៊ុយក្រែនដើម្បីចូលរួមដោយផ្ទាល់។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AP។

ប្រធានាធិបតីអ៊ុយក្រែនលោក Volodymyr Zenlenskyy ចូលរួមតាមវីដេអូនៅក្នុងសន្និសីទអន្តរជាតិរយៈពេលពីរថ្ងៃស្តីពីការស្ថាបនាប្រទេសអ៊ុយក្រែន ដែលធ្វើឡើងនៅទីក្រុង Lugano ប្រទេសស្វីស ថ្ងៃទី ៤ ខែកក្កដា ឆ្នាំ ២០២២។

អ្នកការទូតរុស្ស៊ីម្នាក់បាននិយាយថា យន្តហោះរុស្ស៊ីពីរគ្រឿងបានដឹកបុគ្គលិកការទូតរុស្ស៊ីជាច្រើននាក់ និងក្រុមគ្រួសាររបស់ពួកគេចេញពីប្រទេសប៊ុលហ្គារីកាលពីថ្ងៃអាទិត្យ ចំពេលមានការបណ្តេញចេញដ៏ធំ ដែលធ្វើឱ្យមានភាពតានតឹងរវាងប្រទេសទាំងពីរដែលជិតស្និទ្ធនឹងគ្នាជាប្រវត្តិសាស្ត្រ។ ការសម្រេចរបស់ប៊ុលហ្គារីក្នុងការបណ្តេញអ្នកការទូតរុស្ស៊ីនេះត្រូវបានប្រកាសដោយនាយករដ្ឋមន្ត្រីស្តីទីលោក Kiril Petkov ដែលប្រឆាំងនឹងរុស្ស៊ីបន្ទាប់ពីរុស្ស៊ីឈ្លានពានអ៊ុយក្រែនកាលពីថ្ងៃទី២៤ ខែកុម្ភៈ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AP។
នាយករដ្ឋមន្ត្រីអូស្ត្រាលីលោក Anthony Albanese កាលពីថ្ងៃអាទិត្យបានសន្យាផ្តល់ការគាំទ្រផ្នែកយោធាបន្ថែមទៀតដល់អ៊ុយក្រែនខណៈលោកជួបជាមួយប្រធានាធិបតីអ៊ុយក្រែនលោក Zelenskyy ក្នុងទីក្រុង កៀវ ប្រទេសអ៊ុយក្រែន។ លោកនាយករដ្ឋមន្ត្រីបានបញ្ជាក់ថា អូស្ត្រាលីនឹងផ្តល់ឧបករណ៍យោធាបន្ថែម ដែលស្នើដោយអ៊ុយក្រែន រួមមាន រថពាសដែក១៤គ្រឿង រថពាសដែក Bushmaster ចំនួន២០គ្រឿង និងយន្តហោះគ្មានមនុស្សបើកមួយចំនួន។ លោក Zelenskyy ថា អូស្ត្រាលីផ្តល់ជំនួយ«ច្រើនគួរសម»ដល់អ៊ុយក្រែន។ លោក Anthony ក៏បាននិយាយដែរថា ប្រធានាធិបតីរុស្ស៊ីលោក Vladimir Putin នឹងទទួលបានការស្វាគមន៍ «ដែលលោកសមនឹងទទួលបាន» បើលោកចូលរួមកិច្ចប្រជុំកំពូល G-20 នៅកោះបាលីក្នុងខែវិច្ឆិកានោះ។ លោកនាយករដ្ឋមន្ត្រីអូស្ត្រាលីបាននិយាយថា៖ «ប្រសិនបើលោកPutin ចូលរួមកិច្ចប្រជុំនោះ...លោកនឹងទទួលបានការស្វាគមន៍ដែលលោកសមនឹងទទួលបាន ដែលនោះគឺមិនមែនជាមិត្ត និងមិនមែនជាអ្នកដែលគោរពច្បាប់អន្តរជាតិ»។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
មន្ត្រីរុស្ស៊ីបាននិយាយថា ការបំផ្ទុះកាលពីថ្ងៃអាទិត្យនៅក្នុងទីក្រុងមួយក្នុងប្រទេសរុស្ស៊ីដែលនៅជាប់ព្រំដែនអ៊ុយក្រែន បានធ្វើឱ្យមនុស្សស្លាប់យ៉ាងតិចណាស់បីនាក់។ អគារលំនៅដ្ឋានរាប់សិបខ្នងត្រូវខូចខាតនៅក្នុងការផ្ទុះនៅទីក្រុង Belgorod នោះ។ សមាជិកសភារុស្ស៊ី លោក Andrei Klishas បានអំពាវនាវឱ្យមានការឆ្លើយតបផ្នែកយោធា។ មន្ត្រីអ៊ុយក្រែនជាទម្លាប់និយាយតិចតួចអំពីការវាយប្រហារលើរុស្ស៊ី។
ឯកអគ្គរដ្ឋទូតអ៊ុយក្រែនប្រចាំប្រទេសតួកគីបាននិយាយថា មន្ត្រីគយតួកគីបានឃាត់កប៉ាល់រុស្ស៊ីមួយគ្រឿងដែលដឹកគ្រាប់ធញ្ញជាតិពីតំបន់កាន់កាប់ដោយរុស្ស៊ីក្នុងប្រទេសអ៊ុយក្រែន។អ៊ុយក្រែនបានចោទរុស្ស៊ីថាបានលួចគ្រាប់ធញ្ញជាតិពីទឹកដីដែលរុស្ស៊ីកាន់កាប់តាំងពីបានធ្វើសង្រ្គាមនៅអ៊ុយក្រែនកាលពីចុងខែកុម្ភៈ។ រុស្ស៊ីបដិសេធការចោទប្រកាន់នេះ៕

២១:៣០ ១.៧.២០២២

ថ្ងៃសុក្រ ទី ១ ខែកក្កដា៖

ប្រទេសរុស្ស៊ីកំពុងប្រើមីស៊ីលពីស្តុកចាស់សម័យសហភាពសូវៀត ដែលបាញ់មិនចំគោលដៅជាក់លាក់ក្នុងការវាយប្រហារច្រើនជាង ៥០% នៅក្នុងប្រទេសអ៊ុយក្រែន ហើយអត្រានៃការវាយប្រហារប្រភេទនេះបានកើនឡើងច្រើនជាងទ្វេរដង ក្នុងរយៈពេលពីរសប្តាហ៍ចុងក្រោយនេះ។ នេះបើតាមឧត្តមសេនីយ៍ត្រីនៃកងកម្លាំងអ៊ុយក្រែន ម្នាក់ ដែលបាននិយាយកាលពីថ្ងៃព្រហស្បតិ៍។
ទីភ្នាក់ងារព័ត៌មាន Reuters បានរាយការណ៍ថា មីស៊ីលរុស្ស៊ីបានវាយប្រហារខុសគោលដៅជាច្រើនក្នុងប្រទេសអ៊ុយក្រែនក្នុងរយៈពេលប៉ុន្មានថ្ងៃថ្មីៗនេះ ដោយបានសម្លាប់ជនស៊ីវិលម្នាក់នៅផ្ទះល្វែងក្នុងទីក្រុងកៀវ កាលពីថ្ងៃសៅរ៍ និងសម្លាប់មនុស្សយ៉ាងហោចណាស់ ១៨ នាក់ទៀតនៅមជ្ឈមណ្ឌលផ្សារទំនើបមួយនៅកណ្តាលទីក្រុង Kremenchuk កាលពីថ្ងៃចន្ទ។
មេដឹកនាំអង្គការអូតង់បានបញ្ចប់កិច្ចប្រជុំរយៈពេលបីថ្ងៃរបស់ពួកគេនៅទីក្រុងម៉ាឌ្រីដ កាលពីថ្ងៃព្រហស្បតិ៍ ហើយសម្ព័ន្ធមិត្តសន្តិសុខលោកខាងលិចនេះសម្រេចពង្រឹងការការពារប្រឆាំងនឹងអំពើគឃ្លើនរបស់រុស្ស៊ី ក្រើនរំឭកអំពីបញ្ហាប្រឈមជាសកលដែលបង្កឡើងដោយប្រទេសចិន និងអញ្ជើញប្រទេសអព្យាក្រឹតហ្វាំងឡង់ និងស៊ុយអែតឱ្យចូលរួម។
ប្រទេសបារាំងបានប្រកាសពីផែនការបញ្ជូនប្រព័ន្ធកាំភ្លើងធំ Caesar រយៈចម្ងាយឆ្ងាយបន្ថែមឱ្យប្រទេសអ៊ុយក្រែន ដែលត្រូវបានគេរាយការណ៍ថា បានដាក់ពង្រាយប្រព័ន្ធកាំភ្លើងធំ Caesar នេះនៅលើឆ្នេរសមុទ្រខ្មៅក្បែរកោះពស់ ដែលកងកម្លាំងរុស្ស៊ីបានបោះបង់ចោលកាលពីថ្ងៃព្រហស្បតិ៍ បន្ទាប់ពីការវាយប្រហាររបស់អ៊ុយក្រែនម្តងហើយម្តងទៀត។
ប្រទេសអាល្លឺម៉ង់បានសន្យាថានឹងផ្តល់រថក្រោះប្រឆាំងយន្តហោះចំនួន ១៥គ្រឿងឱ្យប្រទេសអ៊ុយក្រែន នៅក្នុងខែកក្កដា បន្ទាប់ពីមានការពន្យារពេលម្តងហើយម្តងទៀត ខណៈពេលដែលប្រទេសអេស្ប៉ាញកំពុងពិចារណាក្នុងការបញ្ជូនរថក្រោះ Leopard ផលិតដោយអាល្លឺម៉ង់ប្រមាណ ៤០ គ្រឿង ទោះបីជាយ៉ាងណារដ្ឋាភិបាលទីក្រុងប៊ែកឡាំងមិនទាន់សម្រេចជាចុងក្រោយទេ។
ប្រទេសប៉ូឡូញបាននិយាយថា ខ្លួនបានផ្គត់ផ្គង់អាវុធ និងសម្ភារៈយោធាដែលមានតម្លៃប្រមាណ ១,៧ ពាន់លានដុល្លារដល់ប្រទេសអ៊ុយក្រែនរួចហើយ រួមទាំងរថក្រោះ T-72 សម័យសហភាពសូវៀត រថក្រោះ និងមីស៊ីលបាញ់ពីដីទៅអាកាស។ ប្រទេសស្លូវ៉ាគីបានបរិច្ចាគប្រព័ន្ធការពារដែនអាកាស S-300 របស់ខ្លួនឱ្យប្រទេសអ៊ុយក្រែនក្នុងខែមេសា។

រូបឯកសារ៖ ទាហានអ៊ុយក្រែនត្រៀមប្រយុទ្ធនៅក្បែរភូមិ Avdiivka ក្នុងតំបន់ Donetsk ប្រទេសអ៊ុយក្រែន កាលពីថ្ងៃទី ១៨ ខែមិថុនា ឆ្នាំ ២០២២។

ខណៈពេលដែលអង្គការអូតង់មិនបានផ្គត់ផ្គង់សព្វាវុធធុនធ្ងន់ឱ្យប្រទេសអ៊ុយក្រែនក៏ដោយ ក៏សម្ព័ន្ធមិត្តយោធាលោកសេរីនេះបានយល់ព្រមផ្តល់កញ្ចប់ជំនួយយោធារយៈពេលយូរសម្រាប់ប្រទេសអ៊ុយក្រែន នៅឯកិច្ចប្រជុំកំពូលនៅទីក្រុងម៉ាឌ្រីដ។ លោក Jens Stoltenberg អគ្គលេខាធិការអង្គការអូតង់បាននិយាយកាលពីថ្ងៃពុធនៅទីក្រុងម៉ាឌ្រីដថា ជំនួយនេះរួមមានសារគមនាគមន៍សន្តិសុខ ប្រេងឥន្ធនៈ ការផ្គត់ផ្គង់វេជ្ជសាស្រ្ត អាវក្រោះ ឧបករណ៍សម្រាប់ទប់ទល់នឹងមីន និងការគំរាមកំហែងពីអាវុធគីមី និងជីវសាស្រ្ត និងប្រព័ន្ធប្រឆាំងយន្តហោះគ្មានមនុស្សបើករាប់រយគ្រឿង»។
អតីតរដ្ឋមន្ត្រីការពារជាតិអាមេរិក លោក Jim Mattis នៅថ្ងៃសុក្របាននិយាយប្រមាថប្រធានាធិបតីរុស្ស៊ី លោក Vladimir Putin ហើយបានថ្កោលទោសការលុកលុយរបស់លោកលើអ៊ុយក្រែនថា «អសមត្ថភាព» និង «ឆ្កួតលីលា»។ ពេលគេសួរអំពីមេរៀនសង្គ្រាមនេះ លោកថា «កុំឱ្យមេទ័ពគ្មានសមត្ថភាពទទួលបន្ទុកប្រតិបត្តិការរបស់អ្នក»។
ការវាយប្រហារដោយមីស៊ីលរុស្ស៊ីលើតំបន់ Odesa របស់អ៊ុយក្រែន នៅព្រឹកព្រលឹមថ្ងៃសុក្រ បានសម្លាប់មនុស្សយ៉ាងហោចណាស់ ១៧ នាក់។ មនុស្សរាប់សិបនាក់បានរងរបួស។ យ៉ាងហោចណាស់ គោលដៅមួយគឺជាអគារលំនៅដ្ឋាន។ ក្រសួងការពារជាតិរុស្ស៊ីបាននិយាយកាលពីថ្ងៃព្រហស្បតិ៍ថា ខ្លួនបានដកថយពីកោះពស់របស់អ៊ុយក្រែន «ជានិមិត្តរូបនៃសុច្ឆន្ទៈ» បន្ទាប់ពីបញ្ចប់បេសកកម្មនៅទីនោះ។
ប្រធានាធិបតីឥណ្ឌូណេស៊ីលោក Joko Widodo ដែលជាប្រធានប្តូរវេននៃក្រុមប្រទេសអ្នកមាន និងប្រទេសសេដ្ឋកិច្ចជឿនលឿនចំនួន ២០ ហៅថា G-20 កំពុងបំពេញទស្សនកិច្ចនៅអ៊ុយក្រែន និងរុស្ស៊ីដើម្បីជួបជាមួយមេដឹកនាំប្រទេសទាំងពីរនេះដែលកំពុងច្បាំងគ្នា បន្ទាប់ពីចូលរួមកិច្ចប្រជុំកំពូលរបស់ក្រុមប្រទេសឧស្សាហម្មជឿនលឿនចំនួន ៧ (G7)នៅប្រទេសអាល្លឺម៉ង់។ នេះបើតាមទីភ្នាក់ងារសារព័ត៌មាន(AP)។
នៅពេលសង្រ្គាមកំពុងបន្តនៅអ៊ុយក្រែន សហគមន៍ដែលរងការខូចខាតយ៉ាងធ្ងន់ធ្ងរនៅដំណាក់កាលដំបូងនៃការលុកលុយកំពុងចាប់ផ្តើមកសាងឡើងវិញដូចជាភូមិ Yahidne នៅតំបន់ Chernihiv ភាគខាងជើងកំពុងមានជីវិតឡើងវិញជាបណ្តើរៗ ប៉ុន្មានខែបន្ទាប់ពីទាហានរុស្ស៊ីបានដកថយ។ នេះបើតាមទីភ្នាក់ងារសារព័ត៌មាន AP។

រូបឯកសារ៖ ប្រធានាធិបតីអ៊ុយក្រែនលោក Volodymyr Zelenskyy ថ្លែងតាមវីដេអូនៅក្នុងកិច្ចប្រជុំកំពូល G-7 នៅទីក្រុងម៉ាឌ្រីដ ប្រទេសអេស្ប៉ាញ កាលពីថ្ងៃទី ២៩ ខែមិថុនា ឆ្នាំ ២០២២។

ប្រធានាធិបតីតួកគីលោក Recep Tayyip Erdogan កាលពីថ្ងៃព្រហស្បតិ៍បានប្រាប់ប្រទេសស៊ុយអែត និងហ្វាំងឡង់ថា លោកនៅតែអាចរារាំងមិនឱ្យប្រទេសពីរនេះចូលរួមជាមួយអង្គការអូតង់ បើប្រទេសទាំងពីរនេះមិនអនុវត្តកិច្ចព្រមព្រៀងថ្មីជាមួយរដ្ឋាភិបាលក្រុងអង់ការ៉ា។ លោក Erdogan បានចេញការព្រមានចំៗនៅពេលបញ្ចប់កិច្ចប្រជុំកំពូលអូតង់។ នេះបើតាមទីភ្នាក់ងារសារព័ត៌មាន AFP។
ខណៈដែលមេដឹកនាំអូតង់ជួបប្រជុំគ្នានៅទីក្រុងម៉ាឌ្រីដក្នុងសប្តាហ៍នេះ ប្រទេសអ៊ុយក្រែនបានទាមទារអាវុធធុនធ្ងន់ថ្មីដើម្បីកម្ចាត់ការឈ្លានពានរបស់រុស្ស៊ី។ ថ្លែងទៅកាន់មេដឹកនាំអូតង់តាមវីដេអូ កាលពីថ្ងៃពុធ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា លោកត្រូវការជាបន្ទាន់នូវអាវុធទំនើបៗបន្ថែមទៀត។
ប្រធានាធិបតីសហរដ្ឋអាមេរិកលោក Joe Biden បាននិយាយថា កញ្ចប់ជំនួយយោធាថ្មីកំពុងត្រូវបានបញ្ជូនទៅកាន់ប្រទេសអ៊ុយក្រែន។ លោកBiden បានប្រាប់អ្នកយកព័ត៌មាននៅទីក្រុង ម៉ាឌ្រីដ កាលពីថ្ងៃព្រហស្បតិ៍ថា «ជាថ្មីម្តងទៀតសហរដ្ឋអាមេរិកនាំមុខ។ យើងបានផ្តល់ជំនួយសន្តិសុខជិត៧ពាន់លានដុល្លារដល់អ៊ុយក្រែន ចាប់តាំងពីខ្ញុំឡើងកាន់តំណែង»។
សហរដ្ឋអាមេរិកនិងចក្រភពអង់គ្លេសបានផ្គត់ផ្គង់ប្រព័ន្ធពហុរ៉ុក្កែតបាញ់បង្ហោះ(MLRS) ដល់ប្រទេសអ៊ុយក្រែន។ នៅប្រទេសអង់គ្លេសក្នុងសប្តាហ៍នេះ ទាហានអ៊ុយក្រែនជាង ៤៥០ នាក់បានបញ្ចប់ការហ្វឹកហ្វឺនប្រើប្រព័ន្ធទាំងនេះ ដែលត្រូវបានចាត់ទុកថា មានសារៈសំខាន់ក្នុងការទប់ទល់នឹងកាំភ្លើងធំរបស់រុស្ស៊ី។
ចក្រភពអង់គ្លេសបានសន្យាផ្តល់ជំនួយយោធាបន្ថែមចំនួន ១,៣ ពាន់លានដុល្លារសម្រាប់ប្រទេសអ៊ុយក្រែននៅឯកិច្ចប្រជុំកំពូល ដោយបង្កើនការរួមចំណែកសរុបរបស់អង់គ្លេសដល់ ២,៨ ពាន់លានដុល្លារគឺច្រើនបំផុត ទីពីរបន្ទាប់ពីសហរដ្ឋអាមេរិក។ នាយករដ្ឋមន្ត្រីអង់គ្លេសលោក Boris Johnson បាននិយាយថា វាមានសារៈសំខាន់ណាស់ដែលដៃគូលោកខាងលិចផ្សេងទៀត បង្កើនការគាំទ្រដល់ប្រទេសអ៊ុយក្រែន៕

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃពុធ ទី ៦​ ខែកក្កដា៖

ថ្ងៃអង្គារ ទី ៥ ខែកក្កដា៖

ថ្ងៃចន្ទ ទី ០៤ ខែ​កក្កដា៖

ថ្ងៃសុក្រ ទី ១ ខែកក្កដា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

ថ្ងៃពុធ ទី ៦ ខែកក្កដា៖

ថ្ងៃចន្ទ ទី ០៤ ខែកក្កដា៖