០០:០២ ១៣.៦.២០២២

ថ្ងៃអាទិត្យ ទី ១២ ខែមិថុនា៖

ប្រធានាធិបតីអ៊ុយក្រែនលោក Volodymyr Zelenskyy បាននិយាយថា មិនមាននរណាដឹងថា តើសង្គ្រាមនៅក្នុងប្រទេសរបស់លោកមានរយៈពេលយូរប៉ុន្មាននោះទេ ក៏ប៉ុន្តែថា កងទ័ពអ៊ុយក្រែនកំពុងជម្នះក្តីរំពឹងដោយការរារាំងកងទ័ពរុស្ស៊ីមិនឱ្យត្រួតត្រាតំបន់ភាគខាងកើតអ៊ុយក្រែនជាទីកន្លែងដែលការប្រយុទ្ធគ្នាដ៏ខ្លាំងក្លាអស់ជាច្រើនសប្តាហ៍មកហើយ។ ក្នុងសុន្ទរកថាតាមវីដេអូរបស់លោកកាលពីពេលយប់ លោក Zelenskyy បាននិយាយថា លោកមានមោទនភាពចំពោះពួកអ្នកការពារអ៊ុយក្រែនដែលអាចទប់ទល់ពួកទាមទារបំបែករដ្ឋដែលគាំទ្រដោយរដ្ឋាភិបាលក្រុងមូស្គូដែលបានត្រួតត្រាផ្នែកភាគច្រើននៃទឹកដីនោះអស់រយៈពេល៨ឆ្នាំ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។

ប្រធានាធិបតីអ៊ុយក្រែន លោក Volodymyr Zelenskyy ត្រូវបានគេមើលឃើញបានកញ្ចក់ទូរទស្សន៍ ថ្លែងសុន្ទរកថាពិសេសមួយអំឡុងពេលនៃកិច្ចប្រជុំ International Institute for Strategic Studies (IISS) Shangri-la លើកទី ១៩ ក្នុងប្រទេសសិង្ហបុរី ថ្ងៃទី ១១ ខែមិថុនា ឆ្នាំ២០២២។

ពួកទាមទារបំបែករដ្ឋដែលគាំទ្រដោយរុស្ស៊ីនៅក្នុងតំបន់ភាគខាងកើតអ៊ុយក្រែនបាននិយាយនៅថ្ងៃអាទិត្យថា ពួកគេនឹងមិនកែប្រែការកាត់ទោសប្រហារជីវិតជនជាតិអង់គ្លេស២នាក់និងជនជាតិម៉ារ៉ុក១នាក់ចំពោះការចូលរួមការប្រយុទ្ធជាមួយនឹងកងទ័ពអ៊ុយក្រែននោះទេ។ លោក Denis Pushilin មេដឹកនាំតំបន់ទាមទារបំបែករដ្ឋ Donetsk ដែលបានកាត់ទោសជនទាំង៣នាក់នោះបានប្រាប់ពួកអ្នកយកព័ត៌មានថា៖ «ពួកគេបានមកប្រទេសអ៊ុយក្រែនដើម្បីសម្លាប់ជនស៊ីវិលដើម្បីប្រាក់។ ដោយហេតុដូច្នេះហើយបានជាខ្ញុំមិនឃើញមានលក្ខខណ្ឌដើម្បីបន្ធូរបន្ថយឬកែប្រែការកាត់ទោសនោះទេ។ លោកក៏បានចោទប្រកាន់នាយករដ្ឋមន្ត្រីចក្រភពអង់គ្លេសលោក Boris Johnsonពីការមិនអើពើអំពីជោគវាសនារបស់ពួកគេនិងការមិនទាក់ទងជាមួយពួកអាជ្ញាធរទាមទារបំបែករដ្ឋផងដែរ។ កាលពីថ្ងៃសៅរ៍ អ្នកនាំពាក្យរបស់លោក Johnson បាននិយាយថា លោកមានការតក់ស្លុតអំពីការកាត់ទោសប្រហារជីវិតជនជាតិអង់គ្លេសគឺលោក Aiden Aslin និងលោក Shaun Pinner និងជនជាតិម៉ារ៉ុកគឺលោក Brahim Saadun។ នេះបើតាមសេចក្តីរាយការណ៍របស់ទីភ្នាក់ងារព័ត៌ មាន AFP។
កងទ័ពរុស្ស៊ីបាននិយាយនៅថ្ងៃអាទិត្យថា ពួកគេបានវាយប្រហារទីកន្លែងស្តុកទុកអាវុធដ៏ធំមួយនៅភាគខាងលិចអ៊ុយក្រែនដែលត្រូវបានផ្គត់ផ្គង់ដោយសហរដ្ឋអាមេរិកនិងប្រទេសនានានៅអឺរ៉ុប នៅពេលដែលការប្រយុទ្ធបានរីកកាន់តែធំឡើងនៅក្នុងទីក្រុង Severodonetsk ភាគខាងកើត។ អភិបាលតំបន់នោះបាននិយាយថា ការវាយប្រហារលើទីប្រជុំជន Chortkiv ជាការវាយប្រហារដ៏កម្រមួយដោយរុស្ស៊ីនៅផ្នែកខាងលិចនៃប្រទេសអ៊ុយក្រែនដែលបានធ្វើឱ្យមនុស្ស ២២ នាក់រងរបួស។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។

រូបឯកសារ៖ រថក្រោះមួយគ្រឿងរបស់អ៊ុយក្រែនកំពុងត្រៀមក្នុងអំឡុងពេលប្រយុទ្ធជាមួយរុស្ស៊ីនៅក្រុង Severodonetsk ប្រទេសអ៊ុយក្រែន ថ្ងៃទី ៨ ខែមិថុនា ឆ្នាំ២០២២។

ការស្វះស្វែងរបស់ប្រទេសអ៊ុយក្រែនដើម្បីក្លាយជាសមាជិកសហភាពអឺរ៉ុបនឹងទទួលបានសញ្ញាដ៏ច្បាស់នៅសប្តាហ៍ក្រោយ។ នេះបើតាមលោកស្រី Ursula von der Leyen ប្រធានសហភាពអឺរ៉ុបដែលបាននិយាយកាលពីថ្ងៃសៅរ៍នៅក្នុងដំណើរទស្សនកិច្ចមិនប្រាប់ឱ្យដឹងជាមុនមួយទៅកាន់រដ្ឋធានីកៀវ។ លោកស្រី Von der Leyenបាននិយាយថា ការចរចាដែលលោកស្រីបានធ្វើជាមួយប្រធានាធិបតីអ៊ុយក្រែនលោក Volodymyr Zelenskyy «នឹងអាចឱ្យយើងធ្វើការវាយតម្លៃចុងក្រោយនៅចុងសប្តាហ៍ក្រោយ»។ ភ្លាមៗបន្ទាប់ពីការឈ្លានពានរបស់រុស្ស៊ីនៅខែកុម្ភៈ លោក Zelenskyy បានចាប់ផ្តើមជំរុញឱ្យមានការអនុញ្ញាតឱ្យអ៊ុយក្រែនចូលជាសមាជិកសហភាពអឺរ៉ុប ហើយបានទាមទារឱ្យមានចម្លើយអំពីបេក្ខភាពរបស់ខ្លួនមុនដំណាច់ខែនេះ។ ក៏ប៉ុន្តែ ពួកមន្ត្រីនិងមេដឹកនាំនៅក្នុងប្លុកនោះបានព្រមានថា ទោះបីមានឋានៈភាពជាបេក្ខជនក៏ដោយ ក៏ការក្លាយជាសមាជិករបស់សហភាពអឺរ៉ុបអាចចំណាយពេលរាប់សិបឆ្នាំឬរាប់ទសវត្សរ៍។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ពួកអាជ្ញាធរនៅក្នុងទីក្រុង Kherson ដែលត្រួតត្រាដោយរដ្ឋាភិបាលក្រុងមូស្គូនៅភាគខាងកើតប្រទេសអ៊ុយក្រែនបានចែកចាយលិខិតឆ្លងដែនរុស្ស៊ីទៅឱ្យពួកអ្នកស្រុកជាលើកដំបូងកាលពីថ្ងៃសៅរ៍។ នេះបើតាមសេចក្តីរាយការណ៍របស់ទីភ្នាក់ងារព័ត៌មានTASS។ ទីភ្នាក់ងារព័ត៌មាន TASS របស់រុស្ស៊ីបានរាយការណ៍ថា ពួកអ្នកក្រុង Kherson ចំនួន២៣នាក់បានទទួលលិខិតឆ្លងដែនរុស្ស៊ីនៅឯពិធីមួយតាមរយៈនីតិវិធីដែលមានការសម្របសម្រួលដែលត្រូវបានចុះហត្ថលេខាដោយប្រធានាធិបតីរុស្ស៊ីលោក Vladimir Putin កាលពីខែឧសភា។ ប្រធានរដ្ឋបាលតំបន់ដែលលម្អៀងទៅរដ្ឋាភិបាលក្រុងមូស្គូលោក Vladimir Saldo ត្រូវបានទីភ្នាក់ងារព័ត៌មាន TASS ដកស្រង់សម្តីមកចុះផ្សាយថា«អ្នកក្រុង Khersonទាំងអស់ចង់បានទទួលលិខិតឆ្លងដែននិងសញ្ជាតិរុស្ស៊ីឱ្យបានឆាប់រហ័សទៅតាមលទ្ធភាពដែលអាចធ្វើបាន»។ លោក Saldo បានប្រាប់ទីភ្នាក់ងារព័ត៌មានRIA Novostiថា៖ «វាជាសករាជថ្មីមួយដែលកំពុងចាប់ផ្តើមសម្រាប់យើង។ វាជាឯកសារដ៏មានសារៈសំខាន់បំផុតដែលមនុស្សអាចមាននៅក្នុងមួយជីវិតរបស់ពួកគេ»។ នេះបើតាមសេចក្តីរាយការណ៍ទីភ្នាក់ងារព័ត៌មាន AFP។
សាកសពរបស់ពួកអ្នកប្រយុទ្ធអ៊ុយក្រែនដែលត្រូវបានសម្លាប់ក្នុងអំឡុងនៃការឡោមព័ទ្ធរោងចក្រដែកថែប Azovstal ក្នុងទីក្រុង Mariupol ភាគខាងកើតនៅតែកំពុងរង់ចាំទាញយកចេញ។ នេះបើតាមអតីតមេបញ្ជាការកងវរសេនាធំឆ្មាំការពារជាតិក្រុងAzov របស់អ៊ុយក្រែននៅថ្ងៃអាទិត្យ។ លោក Maksym Zhorin បាននិយាយថា នៅក្រោមលក្ខខណ្ឌនៃការដោះដូរកាលពីពេលថ្មីៗ នេះ សាកសពប្រហែល ២២០ នៃអ្នកដែលត្រូវបានសម្លាប់នៅក្នុងរោងចក្រដែកថែប Azovstal បានត្រូវបញ្ជូនទៅកាន់រដ្ឋធានីកៀវរួចហើយ ក៏ប៉ុន្តែ មានសាកសពជាច្រើនទៀតនៅស្ថិតក្នុងទីក្រុង Mariupol នៅឡើយ។ លោកZhorinបាននិយាយនៅក្នុងវីដេអូដែលបានចុះផ្សាយនៅលើ Telegram របស់លោកថា៖ «ការចរចាកំពុងបន្តធ្វើឡើងអំពីការផ្លាស់ប្តូរសាកសពដើម្បីបញ្ជូនសាកសពទាំងនោះទៅផ្ទះវិញ។ សាកសពទាំងអស់នោះត្រូវតែបញ្ជូនត្រឡប់ទៅផ្ទះវិញហើយនេះជាអ្វីដែលយើងនឹងធ្វើការងារនោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។

រូបឯកសារ៖ ទិដ្ឋភាពនៅតំបន់រោងចក្រដែកថែប Azovstal ក្នុងក្រុង Mariupol ប្រទេសអ៊ុយក្រែន ថ្ងៃទី ២២ ខែឧសភា ឆ្នាំ២០២២។

កងកម្លាំងរុស្ស៊ីបានបាញ់កាំជ្រួចមីស៊ីល Kalibr Cruise ដើម្បីកម្ទេចកន្លែងផ្ទុកអាវុធដ៏ធំមួយរបស់សហរដ្ឋអាមេរិកនិងអឺរ៉ុបនៅក្នុងតំបន់ Ternopil នៃប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Interfax នៅថ្ងៃអាទិត្យដែលបានដកស្រង់សម្តីរបស់ក្រសួងការពារជាតិរុស្ស៊ី។ កងកម្លាំងរុស្ស៊ីក៏បានបាញ់ទម្លាក់យន្តហោះចម្បាំងអ៊ុយក្រែនធន់ SU-25មួយគ្រឿងនៅជិតតំបន់ Donetsk និងក្រុង Kharkiv នៅផ្នែកខាងកើតនៃប្រទេសអ៊ុយក្រែនផងដែរ។ នេះបើតាមទីភ្នាក់ងារព័ត៌មាន Interfax របស់រុស្ស៊ី ដែលបានដកស្រង់សម្តីរបស់ក្រសួងការពារជាតិរុស្ស៊ីហើយត្រូវបានរាយការណ៍ដោយទីភ្នាក់ងារព័ត៌មាន Reuters។
ការព្រួយកង្វល់អំពីសន្តិសុខបានលើកឡើងដោយប្រទេសតួកគីនៅក្នុងការជំទាស់ប្រឆាំងរបស់ខ្លួនដល់ការដាក់ពាក្យចូលជាសមាជិករបស់ប្រទេសហ្វាំងឡង់និងស៊ុយអែតជាការត្រឹមត្រូវតាមច្បាប់។ នេះបើតាមការបញ្ជាក់របស់អគ្គលេខាអង្គការអូតង់លោក Jens Stoltenberg នៅថ្ងៃអាទិត្យក្នុងដំណើរទស្សនកិច្ចទៅកាន់ប្រទេសហ្វាំងឡង់។ លោក Stoltenberg បានប្រាប់សន្និសីទកាសែតរួមគ្នាមួយជាមួយប្រធានាធិបតីហ្វាំងឡង់លោក Sauli Niinisto ខណៈដែលលោកទៅសួរសុខទុកលោកប្រធានាធិបតីនៅឯគេហដ្ឋានរដូវក្តៅរបស់លោកនៅក្រុង Naantali ប្រទេសហ្វាំងឡង់ថា៖ «នេះជាការព្រួយកង្វល់ត្រឹមត្រូវតាមផ្លូវច្បាប់។ នេះជាសកម្មភាពភេរវកម្ម។ វាជាការនាំអាវុធចេញ»។ ប្រទេសស៊ុយអែតនិងហ្វាំងឡង់បានដាក់ពាក្យសុំចូលក្នុងសម្ពន្ធភាពការពារជាតិប្រទេសលោកខាងលិចនៅក្នុងការឆ្លើយតបដល់ការឈ្លានពានរបស់រុស្ស៊ីលើប្រទេសអ៊ុយក្រែន។ ក៏ប៉ុន្តែ ប្រទេសទាំង២បានត្រូវប្រឈមការជំទាស់ប្រឆាំងពីប្រទេសតួកគីដែលបានចោទប្រកាន់ប្រទេសទាំង ២ ពីការគាំទ្រនិងផ្តល់ទីជម្រកដល់ពួកជនសកម្មប្រយុទ្ធ Kurd និងក្រុមផ្សេងទៀតដែលតួកគីចាត់ទុកជាភេរវជន។ លោក Stoltenberg បាននិយាយថា តួកគីជាសម្ពន្ធមិត្តដ៏សំខាន់បណ្តាលមកពីទីកន្លែងយុទ្ធសាស្ត្រនៅសមុទ្រខ្មៅដែលស្ថិតនៅរវាងអឺរ៉ុបនិងតំបន់មជ្ឈិមបូព៌ា ហើយបានលើកឡើងពីការគាំទ្ររបស់តួកគីដែលបានជួយឧបត្ថម្ភគាំទ្រអ៊ុយក្រែនចាប់តាំងពីរុស្ស៊ីបានបញ្ជូនកងទ័ពចូលក្នុងប្រទេសអ៊ុយក្រែននៅថ្ងៃទី២៤ ខែកុម្ភៈមក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។

២៣:២៩ ១០.៦.២០២២

ថ្ងៃសុក្រ ទី ១០ ខែមិថុនា

ទីភ្នាក់ងារព័ត៌មាន AP រាយការណ៍ថា ការិយាល័យសិទ្ធិមនុស្សរបស់អង្គការសហប្រជាជាតិបានសម្តែងការព្រួយបារម្ភអំពីការកាត់ទោសប្រហារជីវិត ដែលធ្វើឡើងដោយតុលាការក្រុមឧទ្ទាមគាំទ្ររដ្ឋាភិបាលក្រុងមូស្គូក្នុងប្រទេសអ៊ុយក្រែន លើជនបរទេសបីនាក់ដែលត្រូវបានចាប់ខ្លួនពេលកំពុងប្រយុទ្ធនៅខាងអ៊ុយក្រែន។ ហើយ ប្រទេសអ៊ុយក្រែននិងលោកខាងលិច ក៏បានថ្កោលទោសតុលាការចំពោះការកាត់ទោសប្រហារជីវិតពលរដ្ឋអង់គ្លេសពីរនាក់ និងជនជាតិម៉ារ៉ុកម្នាក់នេះ ដោយហៅដំណើរការនីតិវិធីថាជាការក្លែងបន្លំ និងការបំពានច្បាប់សង្គ្រាម។ ទីភ្នាក់ងារព័ត៌មាន Reuters បានរាយការណ៍ថា រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយកាលពីថ្ងៃសុក្រថា ជនជាតិបរទេស៣ម្នាក់ ដែលត្រូវបានកាត់ទោសប្រហារជីវិតកាលពីថ្ងៃព្រហស្បតិ៍ នៅសាធារណរដ្ឋប្រជាមានិត Donetsk បានប្រព្រឹត្តបទឧក្រិដ្ឋនៅលើទឹកដីនៃរដ្ឋដែលប្រកាសផ្តាច់ខ្លូន បំបែកចេញពីអ៊ុយក្រែន។ លោក Lavrov បាននិយាយថា «នៅពេលនេះ ការកាត់ក្តីដែលអ្នក បានលើកឡើងកំពុងត្រូវបានធ្វើឡើងដោយផ្អែកលើច្បាប់នៃសាធារណរដ្ឋប្រជាមានិត Donetsk ពីព្រោះឧក្រិដ្ឋកម្មដែលកំពុងចោទត្រូវបានប្រព្រឹត្តនៅលើទឹកដីរបស់សាធារណរដ្ឋប្រជាមានិត Donetsk»។

ពលរដ្ឋអង់គ្លេសពីរនាក់ លោក Aiden Aslin (ឆ្វេង) និង លោក Shaun Pinner (ស្តាំ) និងជនជាតិម៉ារ៉ុក លោក Saaudun Brahim (កណ្តាល) អង្គុយនៅក្នុងបន្ទប់សវនាការក្នុងទីក្រុង Donetsk ក្នុងទឹកដីដែលស្ថិតនៅក្រោមការគ្រប់គ្រងរបស់រដ្ឋាភិបាលនៃសាធារណរដ្ឋប្រជាមានិត Donetsk ភាគខាងកើតអ៊ុយក្រែនកាលពីថ្ងៃព្រហស្បតិ៍ ថ្ងៃទី៩ ខែមិថុនា ឆ្នាំ២០២២។

សហរដ្ឋអាមេរិកនិងសម្ព័ន្ធមិត្តបានផ្តល់អាវុធរាប់ពាន់លានដុល្លារដល់អ៊ុយក្រែន។ អឺរ៉ុបបានទទួលយកមនុស្សរាប់លាននាក់ភៀសខ្លួនដោយសង្គ្រាម។ ហើយមានការរួបរួមដែលមិនធ្លាប់មានពីមុនមក នៅអឺរ៉ុបក្រោយសង្គ្រាមលោកលើកទីពីរក្នុងការដាក់ទណ្ឌកម្មលើប្រធានាធិបតីរុស្សី លោក Vladimir Putin និង ប្រទេសរុស្សី។ ប៉ុន្តែនៅពេលដែលភាពតក់ស្លុតនៃការលុក លុយថ្ងៃទី២៤ ខែកុម្ភៈបានថយចុះ អ្នកវិភាគនិយាយថា វិមានក្រឹមឡាំងអាចកេងចំណេញពីជម្លោះដ៏រឹងមាំនិងអូសបន្លាយ និងការចូលរួមនិងចំណាប់អារម្មណ៍ដែលអាចធ្លាក់ចុះក្នុងចំណោមមហាអំណាចលោកខាងលិចដែលអាចនាំឱ្យមានការគាបសង្កត់អ៊ុយក្រែនឱ្យឈានទៅរកដំណោះស្រាយចុះចាញ់មួយ។ នេះបើយោងតាមទីភ្នាក់ងារព័ត៌មាន AP។
ប្រធានាធិបតីអ៊ុយក្រែន លោក Volodymyr Zelenskyy បាននិយាយថា កងកម្លាំងអ៊ុយក្រែន «កំពុងបន្តទប់ទល់»នៅទីក្រុងSievierodonetsk ភាគខាងកើតប្រទេសដែលការប្រយុទ្ធគ្នាតាមដងផ្លូវដ៏ខ្លាំងក្លាជាមួយកងទ័ពរុស្ស៊ីនៅទីនោះ អាចកំណត់ជោគវាសនានៃតំបន់ Donbas។ នេះបើយោងតាមទីភ្នាក់ងារព័ត៌មាន AFP។
អ្នកនាំពាក្យក្រសួងការពារជាតិអ៊ុយក្រែន លោក Oleksandr Motuzyanyk បាននិយាយនៅថ្ងៃសុក្រថា ប្រទេសរុស្ស៊ីកំពុងស្វែងរកចំណុចខ្សោយនៅក្នុងវិស័យការពាររបស់អ៊ុយក្រែន នៅជិតទន្លេ Siverskyi Donets នៅភាគខាងកើតអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ី លោក Vladimir Putin ប្រហែលបានឲ្យសញ្ញាថា មហិច្ឆតារបស់លោក អាចលាតសន្ធឹងហួសពីអ៊ុយក្រែន ដោយលោកបានប្រាប់ក្រុមសហគ្រិនវ័យក្មេងក្នុងអំឡុងពេលវគ្គសំណួរចម្លើយតាមទូរទស្សន៍ថា រុស្ស៊ីនឹងមិនឲ្យគេកំណត់ព្រំដែនខ្លួនឡើយ។ លោក Putin និយាយថា៖ «វាមិនអាចទៅរួចទេ តើអ្នកយល់ទេ? គេមិនអាចកំណត់ព្រំដែនឲ្យប្រ ទេសដូចរុស្ស៊ីទេ។ ហើយយើងមិនមានបំណងសាងសង់របងព្រំដែននោះឡើយ»។

រូបឯកសារ៖ ប្រធានាធិបតីរុស្ស៊ី លោក Vladimir Putin មើលក្បួនដង្ហែយោធានៅថ្ងៃជ័យជម្នះ ដែលជាខួបលើកទី ៧៧ នៃជ័យជម្នះលើពួកណាស៊ីអាល្លឺម៉ង់ក្នុងសង្គ្រាមលោកលើកទី ២ នៅទីលានក្រហមកណ្តាលក្រុងមូស្គូ ប្រទេសរុស្ស៊ី ថ្ងៃទី ៩ ខែ ឧសភា ឆ្នាំ ២០២២។

កាសែត Washington Post រាយការណ៍ថា សកម្មជនសិទ្ធិអ្នកប្តូរភេទនិងយេនឌ័រ (LGBTQ) នៅក្នុងប្រទេសអ៊ុយក្រែនសង្ឃឹមថា លទ្ធផលវិជ្ជមានមួយពីសង្គ្រាមដ៏ឃោរឃៅជាមួយរុស្ស៊ី គឺថា សិទ្ធិអ្នកប្តូរភេទនិងយេនឌ័រនៅអ៊ុយក្រែននឹងរីកចម្រើន។ ហើយមិនត្រឹមតែដោយសារតែ ការកើនឡើងនៃអារម្មណ៍រួបរួមជាតិនៅក្នុងអ៊ុយក្រែនចាប់តាំងពីរុស្ស៊ីបានឈ្លានពាន:នោះទេ តែប្រសិនបើសហភាពអឺរ៉ុបទទួលស្គាល់អ៊ុយក្រែនជាសមាជិក អ៊ុយក្រែននឹងត្រូវបានទាមទារឱ្យផ្តល់សិទ្ធិនិងការការពារបន្ថែមទៀតដល់សហគមន៍អ្នកប្តូរភេទនិងយេនឌ័រ (LGBTQ)។
ក្រុមបាល់ទាត់កំពូលរបស់អ៊ុយក្រែនShakhtar Donetskមិនបានប្រកួតក្នុងទីក្រុងខ្លួនក្នុងរយៈពេល៨ឆ្នាំចុងក្រោយនេះ។ បន្ទាប់ពីរុស្ស៊ីបានលុកលុយតំបន់ Donbas របស់អ៊ុយក្រែនក្នុងឆ្នាំ ២០១៤ ក្រុមនេះបានរស់នៅ និងលេងបាល់នៅក្នុងទីក្រុងនានានៅទូទាំងប្រទេសអ៊ុយក្រែន។ ប៉ុន្តែសូម្បីតែហ្គេមទាំងនោះ ក៏ត្រូវបានលុបចោលកាលពីចុងឆ្នាំមុន ដោយសារភាពតានតឹងរវាងអ៊ុយក្រែននិងរុស្ស៊ី ដែលបានរាលដាលទៅជាសង្រ្គាមដែលកំពុងបន្ត។ ក្រុមបាល់ទាត់នេះសង្ឃឹមថា នឹងអាចលេងម្តងទៀតនៅអ៊ុយក្រែនក្នុងខែកញ្ញា នៅពេលដែលការប្រកួត Champions League ចាប់ផ្តើម។ ក្រុម Shakhtar Donetsk នឹងហាត់សមនៅខែក្រោយ នៅឯបណ្តាជំរុំហ្វឹកហាត់នៅប្រទេសហូឡង់ និងស្លូវេនី។ នេះបើយោងតាមទីភ្នាក់ងារព័ត៌មាន AP។
កងទ័ពនិងឧស្សាហកម្មការពារជាតិអ៊ុយក្រែនដែលធ្លាប់ជាផ្នែកមួយនៃសហភាពសូវៀត ត្រូវបានសាងសង់ដោយប្រើឧបករណ៍ អាវុធធុនតូច រថក្រោះ អាវុធបាញ់ចម្ងាយឆ្ងាយ ស្តង់ដាសូវៀតនិងរុស្ស៊ី ហើយនិងអាវុធផ្សេងទៀតដែលមិនអាចប្រើចូលគ្នាបានជាមួយអាវុធរបស់ប្រទេសជិតខាងដែលជាប់លោកខាងលិច។ ប្រភពរបស់សហរដ្ឋអាមេរិកបាននិយាយថា ជាងបីខែនៅក្នុងជម្លោះដែលបានផ្ទុះឡើងនៅពេលដែលរុស្ស៊ីបានឈ្លានពានអ៊ុយក្រែននៅថ្ងៃទី២៤ ខែកុម្ភៈ ឧបករណ៍ស្តង់ដារសូវៀតនិងរុស្ស៊ីទាំងនោះ ត្រូវបានប្រើប្រាស់អស់ឬត្រូវបានបំផ្លាញនៅក្នុងសមរភូមិ។ ឥឡូវនេះ កងកម្លាំងរបស់រដ្ឋាភិបាលក្រុងកៀវ កំពុងប្រើប្រាស់ឬរៀនប្រើ ប្រាស់អាវុធដែលផលិតដោយសហរដ្ឋអាមេរិកនិងសម្ព័ន្ធមិត្តអឺរ៉ុបអូតង់ (NATO)។ នេះបើយោងតាមទីភ្នាក់ងារព័ត៌មាន AFP។

១៩:១២ ៩.៦.២០២២

ថ្ងៃព្រហស្បតិ៍ ទី ៩ ខែមិថុនា

ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃព្រហស្បតិ៍ថា ការឈ្លានពានរបស់រុស្ស៊ីលើប្រទេសរបស់លោក គឺជាការគំរាមកំហែងចំពោះបរិស្ថាននិងអាចឈានទៅដល់ការបំពុលបរិស្ថានដ៏គ្រោះថ្នាក់នៅក្នុងសមុទ្រ Azov និងសមុទ្រខ្មៅ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មានAssociated Press។ លោក Zelenskyy បានលើកឡើងដូច្នេះ នៅឯកិច្ចប្រជុំថ្នាក់រដ្ឋមន្ត្រីរបស់អង្គការកិច្ចសហប្រតិបត្តិការសេដ្ឋកិច្ចនិងអភិវឌ្ឍន៍ (OECD) ដែលមានមូលដ្ឋាននៅក្នុងទីក្រុងប៉ារីស ប្រទេសបារាំង។ លោកបានប្រើប្រាស់វេទិកានៃកិច្ចប្រជុំនេះដើម្បីទាក់ទាញចំណាប់អារម្មណ៍របស់រដ្ឋមន្ត្រីនៃបណ្ដាប្រទេសនានា ឱ្យផ្ដោតលើតម្រូវការនៅក្នុងបញ្ឈប់ការប្រើប្រាស់ឧស្ម័នធម្មជាតិរបស់រុស្ស៊ីដោយងាកទៅប្រើថាមពលកកើតឡើងវិញជំនួសវិញ។
អ្នកនាំពាក្យរដ្ឋាភិបាលអាល្លឺម៉ង់បាននិយាយនៅថ្ងៃព្រហស្បតិ៍ថា អធិការបតីអាល្លឺម៉ង់លោក Olaf Scholz បានពិភាក្សាតាមទូរស័ព្ទជាមួយនឹងអគ្គលេខាធិការអង្គការអូតង់ លោក Jens Stoltenberg អំពីការធ្វើបច្ចុប្បន្នភាពគោលបំណងយុទ្ធសាស្ត្ររបស់អង្គការអូតង់ ដោយសារតែការឈ្លានពានរបស់រុស្ស៊ីលើអ៊ុយក្រែន។ អ្នកនាំពាក្យរូបនោះបានបញ្ជាក់ថា នៅក្នុងការសន្ទនានោះ លោក Scholz បានបង្ហាញអំពីការត្រៀមលក្ខណៈសម្រាប់កិច្ចប្រជុំរបស់អង្គការអូតង់នៅចុងខែមិថុនានេះ ក្នុងទីក្រុងម៉ាឌ្រីដ ប្រទេសអេស្ប៉ាញ ហើយបានបញ្ជាក់ជាថ្មីអំពីការតាំងចិត្តរបស់រដ្ឋាភិបាលអាល្លឺម៉ង់ នៅក្នុងការរួមចំណែកចំពោះអង្គការអូតង់ដើម្បីជួយសម្ព័ន្ធភាពនេះឱ្យសម្រេចបានតាមគោលបំណងរបស់ខ្លួននៅក្នុងទសវត្សរ៍ខាងមុខ។ នេះបើយោងតាមទីភ្នាក់ងារព័ត៌មាន Reuters។
នាវារុស្ស៊ីរាប់សិបគ្រឿងបានចូលរួមនៅក្នុងសមយុទ្ធយោធានៅថ្ងៃព្រហស្បតិ៍នៅសមុទ្របាល់ទិកដែលជាសមុទ្រយុទ្ធសាស្ត្រមួយ បន្ទាប់ពីប្រទេសស៊ុយអែតនិងប្រទេសហ្វាំងឡង់បានប្រកាសកាលពីពេលថ្មីៗនេះ អំពីការដាក់ពាក្យចូលជាសមាជិកអង្គការអូតង់។ ក្រសួងការពារជាតិរុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយថា នាវានៃកងនាវារុស្ស៊ីប្រចាំសមុទ្របាល់ទិកនឹង «ធ្វើប្រតិបត្តិការហ្វឹកហ្វឺនសម្រាប់ការការពារដែនសមុទ្រនិងមូលដ្ឋានរបស់កងនាវា»។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ រថយន្តដឹកស្រូវសាឡីនៅភូមិ Bogatoye នៃក្រុង Izmail ប្រទេសអ៊ុយក្រែន កាលពីថ្ងៃទី ២៤ ខែមីនា ឆ្នាំ ២០២២។

អង្គការសហប្រជាជាតិបានបញ្ជាក់នៅថ្ងៃព្រហស្បតិ៍ថា ការវិនិយោគដោយផ្ទាល់ពីបរទេសត្រូវគេរំពឹងថា នឹងធ្លាក់ចុះនៅក្នុងឆ្នាំនេះ ដោយវិបត្តិស្បៀងអាហារ វិបត្តិប្រេងឥន្ធនៈ និងវិបត្តិហិរញ្ញវត្ថុដែលបង្កឡើងដោយសារសង្គ្រាមរបស់រុស្ស៊ីនៅអ៊ុយក្រែនបានបង្អាក់ទឹកចិត្តដល់បរិយាកាសអាជីវកម្ម។ ទីភ្នាក់ងារពាណិជ្ជកម្មនិងការអភិវឌ្ឍន៍របស់អង្គការសហប្រជាជាតិ (UNCTAD) បានលើកឡើងថា ការវិនិយោគដោយផ្ទាល់ពីបរទេសបានរើបឡើងវិញកាលពីឆ្នាំ ២០២១ ទៅដល់កម្រិតមុនវិបត្តិជំងឺកូវីដ១៩ ដោយកើនដល់ជិត ១,៦ លានលានដុល្លារអាមេរិក ប៉ុន្តែស្ថានការណ៍នេះទំនងជានឹងមិនបន្តដូច្នេះនោះទេ នៅក្នុងឆ្នាំ ២០២២ នេះ។ នេះបើយោងតាមទីភ្នាក់ងារព័ត៌មាន AFP។
រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍ថា មិនមានកិច្ចព្រមព្រៀងណាមួយត្រូវបានសម្រេចឡើងជាមួយនឹងប្រទេសតួកគីអំពីការនាំចេញធញ្ញជាតិរបស់ប្រទេសអ៊ុយក្រែនកាត់តាមសមុទ្រខ្មៅនោះទេ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានថា កិច្ចការនេះកំពុងបន្តធ្វើ។ កន្លងមក ប្រទេសតួកគីបានជំរុញឱ្យមានកិច្ចព្រមព្រៀងរវាងរុស្ស៊ីនិងអ៊ុយក្រែនលើផែនការបន្តឡើងវិញនូវការនាំចេញធញ្ញជាតិពីកំពង់ផែអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃព្រហស្បតិ៍បានអំពាវនាវឱ្យមានការដកប្រទេសរុស្ស៊ីចេញពីអង្គការស្បៀងអាហារនិងកសិកម្ម (FAO) របស់អង្គការសហប្រជាជាតិ ដោយលោកបានរិះគន់រដ្ឋាភិបាលរុស្ស៊ីថាបានបង្កឱ្យមានវិបត្តិធញ្ញជាតិកើតឡើងនៅលើពិភពលោក ដោយសារតែការឈ្លានពានប្រទេសរបស់លោក។ លោក Zelenskyy បានថ្លែងនៅក្នុងអំឡុងពេលកិច្ចប្រជុំរបស់អង្គការកិច្ចសហប្រតិបត្តិការសេដ្ឋកិច្ចនិងអភិវឌ្ឍន៍(OECD) ថា៖ «យើងមិនអាចមានការពិភាក្សាណាមួយទៀតអំពីការបន្តសមាជិកភាពរបស់ប្រទេសរុស្ស៊ីនៅក្នុងអង្គការ FAO នោះឡើយ។ តើសមាជិកភាពរបស់រុស្ស៊ីនៅក្នុងអង្គការ FAO មានន័យអ្វី ប្រសិនបើរុស្ស៊ីបង្កឱ្យមានភាពអត់ឃ្លានសម្រាប់មនុស្សយ៉ាងតិច ៤០០ លាននាក់ ឬក៏អាចលើសពី ១.០០០ លាននាក់នោះ?»។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីអ៊ីតាលីលោក Mario Draghi បាននិយាយនៅថ្ងៃព្រហស្បតិ៍ថា ដើម្បីបញ្ចៀសមិនឱ្យមានវិបត្តិស្បៀងអាហារកើតឡើងនៅលើពិភពលោក កិច្ចប្រឹងប្រែងគឺត្រូវចាប់ផ្ដើមដំបូងនៅឯកំពង់ផែរបស់ប្រទេសអ៊ុយក្រែននៅសមុទ្រខ្មៅ ហើយអ៊ុយក្រែនត្រូវការការធានាថា ពួកគេនឹងមិនត្រូវបានវាយប្រហារនៅពេលដែលពួកគេបន្តឡើងវិញនូវការនាំចេញធញ្ញជាតិ។ ការនាំចេញធញ្ញជាតិពីប្រទេសអ៊ុយក្រែនបានធ្លាក់ចុះយ៉ាងខ្លាំងតាំងពីពេលដែលរុស្ស៊ីបានឈ្លានពានអ៊ុយក្រែនមក ដោយករណីនេះបង្កឱ្យមានការភ័យខ្លាចថាកង្វះស្បៀងអាហារអាចកើតមាននៅក្នុងបណ្ដាប្រទេសងាយរងគ្រោះបំផុត។ លោក Draghi បានបញ្ជាក់នៅក្នុងសុន្ទរកថានៅឯកិច្ចប្រជុំថ្នាក់រដ្ឋមន្ត្រីរបស់អង្គការកិច្ចសហប្រតិបត្តិការសេដ្ឋកិច្ចនិងអភិវឌ្ឍន៍ (OECD) នៅក្នុងទីក្រុងប៉ារីស ប្រទេសបារាំងថា៖ «យើងត្រូវតែរកវិធីបញ្ឈប់ការរាំងខ្ទប់ធញ្ញជាតិរាប់លានតោនដែលជាប់គាំងនៅទីនោះដោយសារសង្គ្រាម។ កិច្ចប្រឹងប្រែងសម្របសម្រួលរបស់អង្គការសហប្រជាជាតិនិងរបស់ប្រទេសតួកគី គឺជាជំហានដ៏សំខាន់»។ នេះបើយោងតាមទីភ្នាក់ងារព័ត៌មាន Reuters។

បដាគ្រោះថ្នាក់ដោយគ្រាប់មីន ត្រូវបានដាក់នៅលើដើមឈើមួយ ខណៈក្រុមដោះមីនអ៊ុយក្រែនពិនិត្យមើលតំបន់ដែលមានគ្រាប់មីនមិនទាន់ផ្ទុះ នៅជាយរដ្ឋធានីកៀវ ប្រទេសអ៊ុយក្រែន ថ្ងៃទី ៩ ខែមិថុនា ឆ្នាំ ២០២២។

ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃព្រហស្បតិ៍ថា មនុស្សរាប់លាននាក់អាចគ្មានអាហារបរិភោគដោយសារតែការរាំងខ្ទប់របស់រុស្ស៊ីលើកំពង់ផែរបស់អ៊ុយក្រែននៅសមុទ្រខ្មៅ។ លោកបានព្រមានថា ពិភពលោកជិតធ្លាក់ចូលទៅក្នុង «វិបត្តិស្បៀងអាហារដ៏អាក្រក់»។ លោកបានបញ្ជាក់នៅក្នុងសេចក្ដីថ្លែងការណ៍មួយដែលផ្សាយតាមទូរទស្សន៍ថា អ៊ុយក្រែនមិនអាចនាំចេញស្រូវសាឡី ពោត ប្រេងសណ្ដែកនិងប្រេងបន្លែ និងទំនិញផ្សេងៗទៀត និងបានបន្ថែមថា៖ «មនុស្សរាប់លាននាក់ប្រហែលជានឹងគ្មានអាហារបរិភោគ ប្រសិនបើការរាំងខ្ទប់របស់រុស្ស៊ីនៅសមុទ្រខ្មៅនៅបន្តទៅមុខ»។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិអ៊ុយក្រែនបានបញ្ជាក់នៅថ្ងៃព្រហស្បតិ៍ថា កងទ័ពអ៊ុយក្រែនបានដណ្ដើមកាន់កាប់មកវិញនូវទឹកដីមួយចំនួនពីកងទ័ពរុស្ស៊ីនៅក្នុងការវាយប្រហារតបតទៅវិញក្នុងតំបន់ Kherson នៅភាគខាងត្បូងប្រទេសអ៊ុយក្រែន។ ក្រសួងនេះមិនបានផ្ដល់ព័ត៌មានលម្អិតណាមួយទេ ប៉ុន្តែបានលើកឡើងថា កងទ័ពរុស្ស៊ីបាន «រងគ្រោះបាត់បង់ទាហាននិងសព្វាវុធ»។ នេះបើយោងតាមទីភ្នាក់ងារព័ត៌មាន Reuters។
លោក Oleksandr Stryuk អភិបាលក្រុង Sievierodonetsk នៃប្រទេសអ៊ុយក្រែន បាននិយាយនៅថ្ងៃព្រហស្បតិ៍ថា កងទ័ពអ៊ុយក្រែននៅរក្សាការគ្រប់គ្រងលើតំបន់ឧស្សាហកម្មនិងតំបន់ក្បែរៗនោះនៅក្នុងទីក្រុង Sievierodonetsk ហើយថា ស្ថានការណ៍គឺ «លំបាក ប៉ុន្តែអាចគ្រប់គ្រងបាន»។ លោកបានបន្ថែមថា ជនស៊ីវិលប្រហែល ១០.០០០ នាក់ នៅស្ថិតក្នុងទីក្រុងនេះនៅឡើយ ដែលឥឡូវនេះទីក្រុងនេះគឺជាចំណុចផ្ដោតជាចម្បងនៃការវាយប្រហាររបស់រុស្ស៊ីនៅក្នុងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

០០:៣៥ ៩.៦.២០២២

ថ្ងៃពុធ ទី ៨ ខែមិថុនា៖

ប្រធានាធិបតីសហរដ្ឋអាមេរិកលោក Joe Biden នឹងជួបជាមួយនឹងសម្ព័ន្ធមិត្តនៅក្នុងប្រទេស អាល្លឺម៉ង់និងប្រទេសអេស្ប៉ាញនៅចុងខែមិថុនាខាងមុខ ស្របពេលដែលលោកព្យាយាមបង្រួបបង្រួមសម្ព័ន្ធភាពដែលមានការប្រេះស្រាំនេះ នៅក្នុងការប្រឆាំងនឹងការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ សេតវិមានបានប្រកាសនៅថ្ងៃពុធនេះថា លោក Biden នឹងធ្វើដំណើរទៅកាន់ភាគខាងត្បូងនៃប្រទេសអាល្លឺម៉ង់នៅថ្ងៃទី ២៥ ខែមិថុនាខាងមុខ ដើម្បីចូលរួមក្នុងកិច្ចប្រជុំរបស់បណ្ដាមេដឹកនាំនៃក្រុមប្រទេស G-7 ដែលជាក្រុមប្រទេសមានឧស្សាហកម្មជឿនលឿននៅលើពិភពលោក។ បន្ទាប់ពីចូលរួមនៅក្នុងកិច្ចប្រជុំនៅតំបន់ Bavarian Alps នេះរួច លោក Biden នឹងធ្វើដំណើរទៅកាន់រដ្ឋធានីម៉ាឌ្រីដ ប្រទេសអេស្ប៉ាញនៅថ្ងៃទី ២៨ ខែមិថុនា ដើម្បីចូលរួមនៅក្នុងការជួបជុំរបស់បណ្ដាប្រទេសជាសមាជិកអង្គការអូតង់ (NATO)។

លោកប្រធានាធិបតី Joe Biden មកដល់អាកាសយានដ្ឋានអន្តរជាតិ Los Angeles ដើម្បីចូលរួមកិច្ចប្រជុំកំពូលនៃទ្វីបអាមេរិក នៅក្នុងទីក្រុង Los Angeles រដ្ឋ California ថ្ងៃទី ៨ ខែ មិថុនា ឆ្នាំ ២០២២។

មនុស្សជាង ៧ លាននាក់បានភៀសខ្លួនចេញពីប្រទេសអ៊ុយក្រែនតាំងពីពេលដែលសង្គ្រាមបានផ្ទុះឡើងនៅទីនោះមក។ នេះបើយោងតាមទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួន។ តួលេខរបស់ទីភ្នាក់ងារនេះបានបង្ហាញនៅថ្ងៃពុធនេះថា មនុស្សសរុបចំនួន ៧.០២៣.៥៥៩ នាក់បានភៀសខ្លួនពីប្រទេសអ៊ុយក្រែនតាំងពីពេលដែលរុស្ស៊ីបានឈ្លានពានអ៊ុយក្រែននៅថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន Reuters។
អគ្គរដ្ឋអាជ្ញាអ៊ុយក្រែនអ្នកស្រី Iryna Venediktova បាននិយាយនៅថ្ងៃពុធនេះថា ប្រទេសអ៊ុយក្រែនបានដាក់ពាក្យបណ្ដឹងទាក់ទិននឹងឧក្រិដ្ឋកម្មសង្គ្រាមចំនួន ៨ ករណីបន្ថែមទៀតទៅតុលាការ បន្ថែមពីលើការកាត់ទោសរួចហើយចំនួន ៣ ករណីលើទាហានរុស្ស៊ីកន្លងមក។ អ្នកស្រី Venediktova បានបញ្ជាក់តាមទូរទស្សន៍ថា ប្រទេសអ៊ុយក្រែនបានបើកការស៊ើបអង្កេតជាង ១៦.០០០ ករណីលើករណីឧក្រិដ្ឋកម្មសង្គ្រាមដែលអាចកើតមានឡើងក្នុងអំឡុងពេលនៃការឈ្លានពានរបស់រុស្ស៊ីលើអ៊ុយក្រែនដែលបានចាប់ផ្ដើមតាំងពីថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន Reuters។
ក្រសួងសមាហរណកម្មឡើងវិញរបស់ប្រទេសអ៊ុយក្រែនបានបញ្ជាក់នៅថ្ងៃពុធនេះថា អ៊ុយក្រែននិងរុស្ស៊ីបានដោះដូរសាកសពទាហានរបស់ពួកគេចំនួន ៥០ នាក់ទៅវិញទៅមក ដែលក្នុងនោះរួមមានទាំងសាកសពរបស់ទាហានអ៊ុយក្រែនចំនួន ៣៧ នាក់ដែលត្រូវបានសម្លាប់នៅឯរោងចក្រដែកថែប Azovstal ក្នុងទីក្រុង Mariupol ប្រទេសអ៊ុយក្រែនផងដែរ។ នេះបើយោងតាមទីភ្នាក់ងារព័ត៌មាន Reuters។
ប្រទេសកាណាដាបានបញ្ជាក់នៅថ្ងៃពុធនេះថា ខ្លួនបានដាក់ទណ្ឌកម្មថ្មីលើប្រទេសរុស្ស៊ី ដោយហាមឃាត់ការនាំចេញសេវាកម្មចំនួន ២៨ ប្រភេទដូចជាផ្នែកគណនេយ្យនិងការផ្សព្វផ្សាយពាណិជ្ជកម្មជាដើម ដែលផ្នែកទាំងនេះគឺជាផ្នែកដែលគេត្រូវការជាចាំបាច់សម្រាប់ប្រតិបត្តិការនៃឧស្សាហកម្មប្រេងឥន្ធនៈ ឧស្ម័ន និងគីមីរបស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ នាយករដ្ឋមន្ត្រីកាណាដា លោក Justin Trudeau ក្នុងអំឡុងពេលសន្និសីទសារព័ត៌មានរួមជាមួយប្រធានាធិបតីឈីលី Gabriel Boric (មិនមានក្នុងរូបភាព) នៅទីក្រុង Ottawa រដ្ឋ Ontario ប្រទេសកាណាដា កាលពីថ្ងៃទី៦ ខែមិថុនា ឆ្នាំ២០២២។ (Reuters)

លោក Denys Marchuk អនុប្រធានសហជីពកសិករអ៊ុយក្រែន UAC បាននិយាយនៅថ្ងៃពុធនេះថា រុស្ស៊ីបានលួចធញ្ញជាតិប្រហែល ៦០០.០០០ តោនពីទឹកដីរបស់អ៊ុយក្រែនដែលរុស្ស៊ីបានត្រួតត្រា និងបាននាំចេញធញ្ញជាតិទាំងនោះមួយចំនួន។ លោក Marchuk បានបញ្ជាក់ប្រាប់ទូរទស្សន៍អ៊ុយក្រែនថា អ៊ុយក្រែននឹងទាមទារឱ្យរុស្ស៊ីសងនូវសំណងសម្រាប់ធញ្ញជាតិដែលខ្លួនបានលួចនិងការបំផ្លិចបំផ្លាញដែលខ្លួនបានប្រព្រឹត្តិលើទ្រព្យសម្បត្តិរបស់កសិករ។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលអ៊ុយក្រែនបានបញ្ជាក់នៅថ្ងៃពុធនេះថា ការឈ្លានពានរបស់រុស្ស៊ីបានធ្វើឱ្យមានវិបត្តិធញ្ញជាតិសាកលលោកកើតឡើង និងបានច្រានចោលការអះអាងរបស់រុស្ស៊ីដែលថាទណ្ឌកម្មរបស់ក្រុមបស្ចិមប្រទេសដែលដាក់លើរុស្ស៊ីជាអ្វីដែលបានធ្វើឱ្យថ្លៃទំនិញកើនឡើង។ រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅក្នុងអំឡុងពេលសន្និសីទសារព័ត៌មានមួយដែលផ្សព្វផ្សាយនៅលើបណ្ដាញសង្គមអនឡាញថា៖ «លោកប្រធានាធិបតីនិងរូបខ្ញុំផ្ទាល់បានទាក់ទងពិភាក្សាគ្នាយ៉ាងសកម្មអំពីបុព្វហេតុពិតប្រាកដនៃវិបត្តិនេះ ដែលនោះគឺភាពគឃ្លើនរបស់រុស្ស៊ី មិនមែនការដាក់ទណ្ឌកម្មនោះទេ»។ នេះបើយោងតាមទីភ្នាក់ងារព័ត៌មាន AFP។
រដ្ឋាភិបាលអ៊ុយក្រែនបានបញ្ជាក់នៅថ្ងៃពុធនេះថា ខ្លួននឹងមិនដោះមីនចេញពីដែនទឹកជុំវិញកំពង់ផែទីក្រុង Odesa នៅសមុទ្រខ្មៅដើម្បីអនុញ្ញាតឱ្យមានការនាំចេញធញ្ញជាតិនោះទេ ដោយសារតែខ្លាចរុស្ស៊ីវាយប្រហារលើទីក្រុងនេះ។ លោក Sergiy Bratchuk អ្នកនាំពាក្យរដ្ឋបាលតំបន់ទីក្រុង Odesa បានលើកឡើងនៅក្នុងសេចក្ដីថ្លែងការណ៍ជាវីដេអូមួយតាមបណ្ដាញសង្គមអនឡាញថា៖ «នៅពេលណាដែលយើងបើកឱ្យមានលទ្ធភាពចូលទៅកាន់កំពង់ផែនៃទីក្រុង Odesa នៅពេលនោះកងនាវារបស់រុស្ស៊ីនឹងចូលទៅដល់»។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយនៅថ្ងៃពុធថា រដ្ឋាភិបាលរុស្ស៊ីនឹងមិនប្រើស្ថានការណ៍ពាក់ព័ន្ធនឹងការដឹកជញ្ជូនធញ្ញជាតិនៅក្នុងនិងនៅជុំវិញសមុទ្រខ្មៅដើម្បីធ្វើឱ្យប្រសើរទៅមុខនូវ «ប្រតិបត្តិការយោធាពិសេស» របស់ខ្លួននោះទេ ដរាបណាអ៊ុយក្រែនអនុញ្ញាតឱ្យកប៉ាល់ដឹកធញ្ញជាតិទាំងនោះចាកចេញដោយសុវត្ថិ ភាព។ លោក Lavrov បានបន្ថែមថា៖ «នេះគឺជាការធានាពីប្រធានាធិបតីនៃប្រទេសរុស្ស៊ី»។ នេះបើយោងតាមទីភ្នាក់ងារព័ត៌មាន Reuters។
ទីភ្នាក់ងារព័ត៌មាន TASS របស់រុស្ស៊ីបានរាយការណ៍ដោយផ្អែកលើអាជ្ញាធរមូលដ្ឋានដែលបាននិយាយនៅថ្ងៃពុធនេះថា ការដឹកជញ្ជូនធញ្ញជាតិចេញពីកំពង់ផែទីក្រុង Berdyansk នៃប្រទេសអ៊ុយក្រែននៅសមុទ្រខ្មៅដែលរុស្ស៊ីកំពុងត្រួតត្រានឹងចាប់ផ្ដើមឡើងវិញនៅសប្ដាហ៍នេះ បន្ទាប់ពីតំបន់នោះត្រូវបានដោះមីនចេញរួចរាល់។ នេះបើយោងតាមទីភ្នាក់ងារព័ត៌មាន Reuters។

ក្រុមការងារពន្លត់អគ្គីភ័យកំពុងពន្លត់អគ្គីភ័យ ក្រោយពីរុស្ស៊ីវាយប្រហារលើក្រុង Kharkiv ប្រទេសអ៊ុយក្រែន ថ្ងៃទី ៨ ខែមិថុនា ឆ្នាំ២០២២។

ប្រទេសអ៊ីតាលីកំពុងទាមទារឱ្យប្រទេសរុស្ស៊ីអនុញ្ញាតឱ្យមានការនាំចេញធញ្ញជាតិពីឃ្លាំងផ្ទុកធញ្ញជាតិរបស់អ៊ុយក្រែនដើម្បីបន្ធូរបន្ថយវិបត្តិស្បៀងអាហារពិភពលោក ដោយបានលើកឡើងថា ការរាំងខ្ទប់ជាបន្តលើកំពង់ផែរបស់អ៊ុយក្រែន «គឺជាការកាត់ ទោសប្រហារជីវិតលើកុមារ ស្ត្រី និងបុរសរាប់លាននាក់ដែលស្ថិតនៅឆ្ងាយពីសមរភូមិប្រយុទ្ធនេះ»។ នេះបើយោងតាមទីភ្នាក់ងារព័ត៌មាន Associated Press។ នៅក្នុងការថ្លែងនៅឯសន្និសីទកាសែតមួយនៅក្នុងទីក្រុងរ៉ូម ប្រទេសអ៊ីតាលីនៅថ្ងៃពុធ រដ្ឋ មន្ត្រីការបរទេសអ៊ីតាលីលោក Luigi Di Maio ក៏បានព្រមានផងដែរថា បញ្ហាអសន្តិសុខស្បៀងអាហារដែលកើនឡើងនៅក្នុងបណ្ដាប្រទេសកំពុងអភិវឌ្ឍន៍នឹងបង្កឱ្យមានអស្ថិរភាពនយោបាយនិងលំហូរចំណាកស្រុក។
លោក Serhiy Ivashchenko ប្រធានសហជីពពណិជ្ជករធញ្ញជាតិអ៊ុយក្រែន UGA បាននិយាយនៅថ្ងៃពុធថា ប្រទេសតួកគីដែលកំពុងចរចាជាមួយនឹងប្រទេសរុស្ស៊ីនៅក្នុងការធានាឱ្យមានផ្លូវសុវត្ថិភាពសម្រាប់ការនាំចេញធញ្ញជាតិពីកំពង់ផែសមុទ្ររបស់អ៊ុយក្រែនដែលរុស្ស៊ីបានរាំងខ្ទប់ គឺមិនមានឥទ្ធិពលគ្រប់គ្រាន់នៅក្នុងការធ្វើជាអ្នកធានានោះឡើយ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសតួកគីលោក Mevlut Cavusoglu បាននិយាយនៅថ្ងៃពុធថា ផែនការរបស់អង្គការសហប្រជាជាតិនៅក្នុងការចាប់ផ្ដើមឡើងវិញនូវការនាំចេញធញ្ញជាតិរបស់ប្រទេសអ៊ុយក្រែនតាមច្រករបៀងសមុទ្រមួយគឺ «សមហេតុផល» និងតម្រូវឱ្យមានការពិភាក្សាបន្ថែមទៀតជាមួយនឹងរដ្ឋាភិបាលរុស្ស៊ីនិងរដ្ឋាភិបាលអ៊ុយក្រែនដើម្បីធានាយ៉ាងណាឱ្យមានសុវត្ថិភាពសម្រាប់កប៉ាល់ដឹកជញ្ជូនធញ្ញជាតិទាំងនោះ។ នេះបើយោងតាមទីភ្នាក់ងារព័ត៌មាន Reuters។
អ្នកនាំពាក្យរដ្ឋាភិបាលអាល្លឺម៉ង់បាននិយាយនៅថ្ងៃពុធថា អធិការបតីអាល្លឺម៉ង់លោក Olaf Scholz បានពិភាក្សាតាមទូរស័ព្ទជាមួយនឹងប្រធានាធិបតីអ៊ុយក្រែនលោក Volodymyr Zelenskyy អំពីការសន្ទនាតាមទូរស័ព្ទរបស់លោកកាលពីថ្ងៃទី ២៨ ខែឧសភាជាមួយប្រធានាធិបតីរុស្ស៊ីលោក Vladimir Putin។ អ្នកនាំពាក្យរូបនោះបានបន្ថែមថា លោក Zelenskyy និងលោក Scholz ក៏បានពិភាក្សាផងដែរអំពីស្ថានការណ៍នៅក្នុងប្រទេសអ៊ុយក្រែន និងបានឯកភាពគ្នាថាគេត្រូវធ្វើអ្វីៗគ្រប់យ៉ាងទាំងអស់ដើម្បីឱ្យអ៊ុយក្រែនអាចនាំចេញធញ្ញជាតិរបស់ខ្លួនបាន ជាពិសេសតាមផ្លូវសមុទ្រ។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ អធិការបតីអាល្លឺម៉ង់ លោក Olaf Scholz ចូលរួមក្នុងសន្និសីទសារព័ត៌មានរួមគ្នាមួយ បន្ទាប់ពីជួបជាមួយមេដឹកនាំកាតា នៅទីក្រុងប៊ែរឡាំង ប្រទេសអាល្លឺម៉ង់ ថ្ងៃទី ២០ ខែឧសភា ឆ្នាំ២០២២។ (AP Photo/Michael Sohn)

លោក Serhiy Gaidai អភិបាលតំបន់ Lugansk នៃប្រទេសអ៊ុយក្រែនបាននិយាយថា យោធាអ៊ុយក្រែនប្រហែលជាត្រូវដកថយទៅកាន់ទីតាំងដែលមានជំហរខ្លាំងជាងមុននៅក្នុងទីក្រុង Sievierodonetsk នៅភាគខាងកើតប្រទេសអ៊ុយក្រែន ប៉ុន្តែពួកគេនឹងមិនបោះបង់ចោលទីក្រុងនេះនោះទេ ហើយការប្រយុទ្ធខ្លាំងក្លាបានរីករាលដាលនៅទីនោះនៅថ្ងៃពុធនេះ។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិន័រវែសបានបញ្ជាក់នៅថ្ងៃពុធថា ប្រទេសន័រវែសបានបរិច្ចាគកាំភ្លើងធំធុនធ្ងន់ដែលចល័តដោយខ្លួនឯងចំនួន ២២ គ្រឿងដល់ប្រទេសអ៊ុយក្រែន ដែលក្នុងនោះរួមមានទាំងគ្រឿងបន្លាស់ គ្រាប់រំសេវ និងប្រដាប់ប្រដាផ្សេងៗទៀតផងដែរ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅក្នុងសុន្ទរកថាជាវីដេអូកាលពីយប់ថ្ងៃអង្គារថា៖ «មិនថាពួកអ្នកឈ្លានពានត្រួតត្រាមានផែនការអ្វីសម្រាប់ខ្លួនពួកគេផ្ទាល់នោះទេ យើងត្រូវតែត្រៀមលក្ខណៈសម្រាប់រដូវរងាខាងមុខនៅក្នុងប្រទេសរបស់យើង នៅលើទឹកដីរបស់យើងសម្រាប់ពលរដ្ឋទាំងអស់»។
ក្រុមប្រឹក្សាប្រតិបត្តិរបស់ធនាគារពិភពលោកបានអនុម័តលើហិរញ្ញប្បទានបន្ថែមចំនួន ១.៤៩០ លានដុល្លារសម្រាប់ប្រទេសអ៊ុយក្រែនកាលពីថ្ងៃអង្គារដើម្បីជួយចំណាយលើការបើកប្រាក់បៀវត្សរ៍ដល់របស់មន្ត្រីរដ្ឋាភិបាលនិងមន្ត្រីកិច្ចការសង្គម។ ហិរញ្ញប្បទានបន្ថែមនេះបានធ្វើឱ្យការផ្គត់ផ្គង់សរុបរបស់ធនគារពិភពលោកដែលបានសន្យាកន្លងមកសម្រាប់ប្រទេសអ៊ុយក្រែនមានចំនួនជាង ៤ ពាន់លានដុល្លារ។ នេះបើយោងតាមទីភ្នាក់ងារព័ត៌មាន Reuters។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃអាទិត្យ ទី ១២ ខែមិថុនា៖

ថ្ងៃសុក្រ ទី ១០ ខែមិថុនា

ថ្ងៃព្រហស្បតិ៍ ទី ៩ ខែមិថុនា

ថ្ងៃពុធ ទី ៨ ខែមិថុនា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២