២៣:១១ ៧.៦.២០២២

ថ្ងៃអង្គារ ទី ៧ ខែមិថុនា៖

ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអង្គារនេះថា ប្រទេសអ៊ុយក្រែននឹងប្រយុទ្ធរហូតទាល់តែដណ្ដើមបានមកវិញទាំងអស់នូវទឹកដីរបស់ខ្លួនដែលកងទ័ពរុស្ស៊ីបានកាន់កាប់។ លោក Zelenskyy បញ្ជាក់ដូច្នេះថា៖ «យើងត្រូវតែសម្រេចឱ្យបាននូវការកាន់កាប់ឡើងវិញទាំងស្រុងនូវទឹកដីរបស់យើងទាំងអស់»។ ការលើកឡើងរបស់លោក Zelenskyy នេះគឺជាការឆ្លើយតបដ៏ខ្លាំងក្លាចំពោះការស្នើដែលថាអ៊ុយក្រែនត្រូវតែប្រគល់ទឹកដីឱ្យរុស្ស៊ីដើម្បីបញ្ចប់សង្គ្រាម។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីហិរញ្ញវត្ថុសហរដ្ឋអាមេរិកអ្នកស្រី Janet Yellen បាននិយាយនៅថ្ងៃអង្គារនេះថា សហរដ្ឋអាមេរិកកំពុងប្រឡូកនៅក្នុងការពិភាក្សា «យ៉ាងសកម្មបំផុត» ជាមួយនឹងបណ្ដាប្រទេសនៅអឺរ៉ុបក្នុងគោលបំណងដាក់កំហិតលើចំណូលដែលរុស្ស៊ីអាចរកបានតាមរយៈការលក់ប្រេងឥន្ធនៈរបស់ខ្លួន។ នេះបើយោងតាមទីភ្នាក់ងារព័ត៌មាន Reuters។
ក្រសួងហិរញ្ញវត្ថុសហរដ្ឋអាមេរិកបានចេញផ្សាយនូវការណែនាំសម្រាប់ក្រុមហ៊ុនឬអ្នកគ្រប់គ្រងថវិកានានានៅក្នុងសហរដ្ឋអាមេរិកថា ការទិញបំណុលឬក៏ភាគហ៊ុនណាមួយដែលជាកម្មសិទ្ធិរបស់ក្រុមហ៊ុនរុស្ស៊ីគឺត្រូវបានហាមឃាត់នៅក្រោមទណ្ឌកម្មដែលសហរដ្ឋអាមេរិកដាក់លើរុស្ស៊ី។ អ្នកនាំពាក្យក្រសួងហិរញ្ញវត្ថុសហរដ្ឋអាមេរិកបាននិយាយថា៖ «ស្របទៅតាមគោលបំណងរបស់សហរដ្ឋអាមេរិកនៅក្នុងការធ្វើឱ្យរុស្ស៊ីមិនទទួលបានធនធានហិរញ្ញវត្ថុដែលខ្លួនត្រូវការដើម្បីបន្តសង្គ្រាមដ៏ឃោរឃៅរបស់ខ្លួនប្រឆាំងនឹងអ៊ុយក្រែន ក្រសួងហិរញ្ញវត្ថុអាមេរិកបានបញ្ជាក់យ៉ាងច្បាស់ថា ពលរដ្ឋអាមេរិកាំងត្រូវបានហាមឃាត់មិនឱ្យធ្វើការវិនិយោគថ្មីណាមួយដែលធ្វើឱ្យរុស្ស៊ីអាចសម្រេចបានតាមបំណងរបស់ខ្លួននោះឡើយ ដែលក្នុងនោះរួមមានទាំងតាមរយៈការទិញនៅក្នុងទីផ្សារបន្ទាប់បន្សំផងដែរ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសរុស្ស៊ីលោក Sergei Lavrov បានចាប់ផ្ដើមដំណើរទស្សនកិច្ចរយៈពេលពីរថ្ងៃទៅកាន់ប្រទេសតួកគីនៅថ្ងៃអង្គារនេះដើម្បីពិភាក្សាអំពីការបញ្ឈប់ការរាំងខ្ទប់ការនាំចេញធញ្ញជាតិពីប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
ទីភ្នាក់ងារព័ត៌មាន Interfax របស់រុស្ស៊ីបានរាយការណ៍នៅថ្ងៃអង្គារនេះ ដោយយោងលើការលើកឡើងរបស់ក្រសួងការពារជាតិរុស្ស៊ីថា រដ្ឋមន្ត្រីការពារជាតិរុស្ស៊ីនិងរដ្ឋមន្ត្រីការពារជាតិតួកគីបានពិភាក្សាគ្នាតាមទូរស័ព្ទអំពីការនាំចេញធញ្ញជាតិពីប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
អង្គការសិទ្ធិមនុស្ស Human Rights Watch នៅថ្ងៃអង្គារនេះបានចេញផ្សាយនូវរបាយការណ៍មួយដែលកត់ត្រាអំពីការប្រព្រឹត្តមិនស្មើភាពគ្នាចំពោះជនភៀសខ្លួន ជនចំណាកស្រុក និងអ្នកស្វែងរកសិទ្ធិជ្រកកោននៅឯព្រំដែនប្រទេសប៉ូឡូញ។ អ្នកស្រី Lydia Gall អ្នកស្រាវជ្រាវជាន់ខ្ពស់ផ្នែកកិច្ចការអឺរ៉ុបនិងអាស៊ីកណ្ដាលនៃអង្គការ Human Rights Watch បាននិយាយថា៖ «វាជារឿងដែលមិនអាចទទួលយកបាននោះទេដែលប្រទេសមួយនៅទ្វីបអឺរ៉ុប [ប៉ូឡូញ] បង្ខំប្រជាពលរដ្ឋ ដែលពួកគេជាច្រើនបានរត់គេចពីសង្គ្រាមនិងការជិះជាន់សង្កត់សង្កិន ឱ្យត្រឡប់ចូលទៅក្នុងស្ថានភាពដែលអាចរៀបរាប់បានថាមានលក្ខណៈដូចឋាននរកនៅក្នុងប្រទេសបេឡារុស»។

រូបឯកសារ៖ ស្ត្រីម្នាក់ដែលធ្វើដំណើរមកពីក្រុង Kharkiv ប្រទេសអ៊ុយក្រែន យំនៅពេលដែលគាត់តម្រង់ជួររត់ភៀសខ្លួនចេញពីសង្គ្រាមនៅក្នុងប្រទេសនេះ នៅក្រុង Medyka ប្រទេសប៉ូឡូញ ថ្ងៃទី ២៩ ខែមីនា ឆ្នាំ២០២២។

រដ្ឋសភារុស្ស៊ីនៅថ្ងៃអង្គារនេះបានអនុម័តលើសំណើច្បាប់ពីរដើម្បីបញ្ចប់យុត្តាធិការរបស់តុលាការសិទ្ធិមនុស្សអឺរ៉ុប (ECHR) នៅក្នុងប្រទេសរុស្ស៊ី។ ការអនុម័តនេះបានធ្វើឡើង បន្ទាប់ពីរដ្ឋាភិបាលរុស្ស៊ីបានប្រកាសអំពីផែនការនៅក្នុងការដកខ្លួនចេញពីតុលាការនេះនៅចំពេលដែលមានសង្គ្រាមជាមួយនឹងអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
អង្គការអូតង់ (NATO) បានបញ្ជាក់ថា ខ្លួននឹងធ្វើសមយុទ្ធហ្វឹកហ្វឺនសម្រាប់កងទ័ពការពារដែនអាកាសដែលជាសម្ព័ន្ធមិត្តនៅក្នុងតំបន់សមុទ្របាល់ទិកនៅក្នុងសប្ដាហ៍នេះ។ លោកនាយឧត្តមសេនីយ៍ Jeff Harrigian មេបញ្ជាការនៃបញ្ជាការដ្ឋានកងទ័ពសម្ព័ន្ធមិត្តជើងអាកាសរបស់អង្គការអូតង់ បាននិយាយនៅថ្ងៃអង្គារនេះថា៖ «ដោយសារតែស្ថានការណ៍សន្តិសុខនៅពេលបច្ចុប្បន្នបន្ទាប់ពីមានការឈ្លានពានរបស់រុស្ស៊ីលើអ៊ុយក្រែន ការធ្វើសមយុទ្ធហ្វឹកហ្វឺនទ្រង់ទ្រាយធំដូចនេះនៅពេលឥឡូវនេះគឺមានសារៈសំខាន់សម្រាប់អង្គការអូតង់ជាងពេលណាៗទាំងអស់»។
រដ្ឋាភិបាលអាល្លឺម៉ង់និងរដ្ឋាភិបាលលីទុយអានីនឹងរៀបចំចាត់ចែងដើម្បីពង្រីកកងប្រយុទ្ធពហុជាតិរបស់អង្គការអូតង់ (NATO) នៅក្នុងប្រទេសលីទុយអានីឱ្យមានទំហំស្មើនឹងកងពលតូច។ នេះបើយោងតាមការបញ្ជាក់របស់មេដឹកនាំនៃប្រទេសទាំងពីរនៅក្នុងសេចក្ដីថ្លែងការណ៍រួមមួយនៅថ្ងៃអង្គារនេះ។ សេចក្ដីថ្លែងការណ៍នេះត្រូវបានផ្សព្វផ្សាយ បន្ទាប់ពីអធិការបតីអាល្លឺម៉ង់លោក Olaf Scholz បានជួបប្រជុំជាមួយនឹងប្រធានាធិបតីលីទុយអានីលោក Gitanas Nauseda និងនាយករដ្ឋមន្ត្រីនៃប្រទេសឡេតូនីនិងប្រទេសអេស្តូនី។ នេះបើយោងតាមទីភ្នាក់ងារព័ត៌មាន Reuters។
អធិការបតីអាល្លឺម៉ង់លោកOlaf Scholz បាននិយាយនៅថ្ងៃអង្គារក្នុងអំឡុងពេលទស្សនកិច្ចទៅកាន់រដ្ឋធានីវីលនីញូស ប្រទេសលីទុយអានីថា ប្រទេសអាល្លឺម៉ង់ត្រៀមខ្លួនរួចរាល់នៅក្នុងការបង្កើនបេសកកម្មយោធារបស់ខ្លួននៅក្នុងប្រទេសលីទុយអានី។ លោក Scholz បានប្រាប់អ្នកសារព័ត៌មានថា៖ «យើងត្រៀមលក្ខណៈរួចរាល់នៅក្នុងការពង្រឹងការប្រឡូករបស់យើង និងនៅក្នុងការអភិវឌ្ឍវាឱ្យក្លាយទៅជាកងពលតូចដ៏រឹងមាំផ្នែកប្រយុទ្ធ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយនៅថ្ងៃអង្គារថា កំពង់ផែរបស់អ៊ុយក្រែននៅក្នុងទីក្រុង Berdvansk និងទីក្រុង Mariupol ដែលកងទ័ពរុស្ស៊ីបានដណ្ដើមកាន់កាប់ ឥឡូវនេះត្រូវបានដោះមីនចេញអស់ហើយនិងត្រៀមរួចរាល់នៅក្នុងការបន្តឡើងវិញនូវការនាំចេញធញ្ញជាតិ។ នេះបើយោងតាមទីភ្នាក់ងារព័ត៌មាន Reuters។
លោក Taras Vysotskyi អនុរដ្ឋមន្ត្រីទីមួយនៃក្រសួងគោលនយោបាយកសិកម្មនិងស្បៀងអាហាររបស់អ៊ុយក្រែន បាននិយាយនៅថ្ងៃអង្គារថា អ៊ុយក្រែនអាចនាំចេញធញ្ញជាតិជាអតិបរមាបានចំនួនតែ២លានតោនក្នុងមួយខែតែប៉ុណ្ណោះ ប្រសិនបើរុស្ស៊ីនៅតែរាំងខ្ទប់កំពង់ផែរបស់អ៊ុយក្រែននៅសមុទ្រខ្មៅ។
រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយនៅថ្ងៃអង្គារថា កងទ័ពរុស្ស៊ីបានដណ្ដើមគ្រប់គ្រងទាំងស្រុងលើតំបន់រស់នៅនៃទីក្រុង Sievierodonetsk ដែលជាទីក្រុងសំខាន់នៅភាគខាងកើតប្រទេសអ៊ុយក្រែន។ លោក Shoigu បានបញ្ជាក់នៅក្នុងការប្រជុំមួយរបស់ក្រសួងការពារជាតិរុស្ស៊ីថា៖ «តំបន់រស់នៅក្នុងទីក្រុង Sievierodonetsk ត្រូវបានរំដោះទាំងស្រុង»។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ អគារស្នាក់នៅមួយរងការខូចខាតយ៉ាងធ្ងន់ធ្ងរក្រោយការវាយប្រហាររបស់រុស្ស៊ីនៅក្រុង Bakhmut ប៉ែកខាងកើតអ៊ុយក្រែន ថ្ងៃទី ២៨ ខែឧសភា ឆ្នាំ២០២២។

លោក Oleksandr Stryuk បានបញ្ជាក់នៅថ្ងៃអង្គារថា អ្នកការពារអ៊ុយក្រែនកំពុងធ្វើអ្វីគ្រប់យ៉ាងទាំងអស់ដែលអាចទៅរួចដើម្បីរក្សាជំហររបស់ពួកគេនៅក្នុងទីក្រុង Sievierodonetsk ដែលជាទីក្រុងសមរភូមិជួរមុខនៅភាគខាងកើតប្រទេសអ៊ុយក្រែន ដែលនៅទីនោះស្ថានការណ៍នៅតែមានភាពតានតឹងខ្លាំង។ លោកបានបន្ថែមថា រុស្ស៊ីបានបញ្ជូនកងទ័ពមកបន្ថែមទៀតក្នុងគោលបំណងដណ្ដើមកាន់កាប់ទីក្រុងនេះទាំងមូល។ នេះបើយោងតាមទីភ្នាក់ងារព័ត៌មាន Reuters។
ក្រុមហ៊ុន Energoatom ដែលជាក្រុមហ៊ុនថាមពលនុយក្លេអ៊ែររបស់ប្រទេសអ៊ុយក្រែន បានបញ្ជាក់នៅនៅថ្ងៃអង្គារថា ខ្លួននឹងមិនស្វាគមន៍បេសកកម្មដែលទីភ្នាក់ងារថាម ពលនុយក្លេអ៊ែរអន្តរជាតិ (IAEA) បានស្នើឡើងចំពោះរោងចក្រថាមពលនុយក្លេអ៊ែរនៃទីក្រុង Zaporizhzhia របស់ប្រទេសអ៊ុយក្រែននោះទេ និងថាបេសកកម្មនេះមានតែធ្វើឱ្យការត្រួតត្រារបស់រុស្ស៊ីក្លាយជាស្របច្បាប់តែប៉ុណ្ណោះ។ ក្រុមហ៊ុននេះបានសរសេរតាម Telegram ថា៖ «យើងចាត់ទុកសាររបស់ប្រធានទីភ្នាក់ងារ IAEA ថាជាការប៉ុន ប៉ងមួយទៀតនៅក្នុងការចូលទៅកាន់ [រោងចក្រថាមពល] នោះតាមគ្រប់មធ្យោបាយទាំងអស់ដើម្បីផ្ដល់ភាពស្របច្បាប់ដល់វត្តមានរបស់ពួកអ្នកឈ្លានពានត្រួតត្រានៅទីនោះ និងជាពិសេសដើម្បីលើកលែងទោសចំពោះទង្វើទាំងអស់របស់ពួកគេ»។
ក្រសួងការបរទេសជប៉ុនបានបញ្ជាក់នៅថ្ងៃអង្គារថា ប្រទេសជប៉ុននឹងបង្កកទ្រព្យសម្បត្តិរបស់ធនាគាររុស្ស៊ីពីរបន្ថែមទៀតនិងធនាគារបេឡារុសមួយទៀត ដែលជាផ្នែកមួយនៃការដាក់ទណ្ឌកម្មបន្ថែមលើរុស្ស៊ី បន្ទាប់ពីរុស្ស៊ីបានឈ្លានពានអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ក្រសួងការបរទេសរុស្ស៊ីបានប្រកាសកាលពីថ្ងៃចន្ទអំពីការដាក់ទណ្ឌកម្មលើបុគ្គលអា មេរិកាំងចំនួន៦១នាក់។ ក្រសួងនេះបានបញ្ជាក់ថា វិធានការនេះត្រូវបានធ្វើឡើង «ដើម្បីឆ្លើយតបទៅនឹងការដាក់ទណ្ឌកម្មជាបន្តកាន់តែច្រើនឡើងរបស់សហរដ្ឋអាមេ រិកលើបុគ្គលនយោបាយនិងបុគ្គលសាធារណៈរបស់រុស្ស៊ី ក៏ដូចជាលើអ្នកតំណាងអាជីវកម្មក្នុងប្រទេសរុស្ស៊ី»។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ បញ្ជីឈ្មោះបុគ្គលដែលរងទណ្ឌកម្មរបស់រុស្ស៊ីលើកនេះរួមមានមន្ត្រីរដ្ឋាភិបាលអាមេរិកនិងអ្នកគ្រប់គ្រងកំពូលៗទាំងបច្ចុប្បន្ននិងអតីតកាលនៃក្រុមហ៊ុនធំៗរបស់សហរដ្ឋអាមេរិក ដូចជារដ្ឋមន្ត្រីហិរញ្ញវត្ថុអាមេរិកអ្នកស្រី Janet Yellen រដ្ឋមន្ត្រីថាមពលអាមេរិកអ្នកស្រី Jennifer Granholm ប្រធានផ្នែកសារគមនា គមន៍នៃសេតវិមានអ្នកស្រី Kate Bedingfield និងនាយកប្រតិបត្តិក្រុមហ៊ុន Netflix លោក Reed Hastings ជាដើម។
ប្រធានាធិបតីអ៊ុយក្រែនលោក Volodymyr Zelenskyy បាននិយាយថា លោក «សប្បាយចិត្តយ៉ាងខ្លាំង» ដោយសារលោក Boris Johnson នៅតែធ្វើជានាយករដ្ឋមន្ត្រីចក្រភពអង់គ្លេស។ លោក Zelenskyy ថ្លែងដូច្នេះ បន្ទាប់ពីលោក Johnson បានរួចផុតពីការបោះឆ្នោតដកសេចក្ដីទុកចិត្តកាលពីថ្ងៃចន្ទម្សិលមិញ ដោយទទួលបានការគាំទ្រគ្រប់គ្រាន់ពីគណបក្សអភិរក្សនិយមរបស់លោកឱ្យលោកនៅកាន់តំណែងជាបន្តទៀត។ លោក Zelenskyy បញ្ជាក់ថា លោក «សប្បាយចិត្តដោយសារអ៊ុយក្រែនមិនបានបាត់បង់សម្ព័ន្ធមិត្តដ៏សំខាន់បំផុតមួយ។ នេះគឺជាដំណឹងដ៏ល្អបំផុត»។

រូបឯកសារ៖ ប្រធានាធិបតីអ៊ុយក្រែន លោក Volodymyr Zelenskyy (ស្ដាំ) និងនាយករដ្ឋមន្ត្រីអង់គ្លេស លោក Boris Johnson (ឆ្វេង) ដើរជាមួយគ្នានៅកណ្ដាលក្រុងកៀវ ប្រទេសអ៊ុយក្រែន ថ្ងៃទី ៩ ខែមេសា ឆ្នាំ២០២២។ (Ukrainian Presidential Press Office via AP)

ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃចន្ទថា ចក្រភពអង់គ្លេសបានផ្ដល់សព្វាវុធដល់អ៊ុយក្រែនដែលត្រូវការជាចាំបាច់នៅក្នុងការប្រយុទ្ធនៅក្នុងសង្គ្រាមជាមួយនឹងរុស្ស៊ី និងបានថ្លែងអំណរគុណដល់នាយករដ្ឋមន្ត្រីចក្រភពអង់គ្លេសលោក Boris Johnson សម្រាប់ «ការយោគយល់អំពីតម្រូវការទាំងនេះ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការពារជាតិតួកគីលោក Hulusi Akar បាននិយាយកាលពីថ្ងៃចន្ទថា ប្រទេសតួកគីកំពុងសម្របសម្រួលយ៉ាងដិតដល់ជាមួយនឹងប្រទេសរុស្ស៊ីនិងប្រទេសអ៊ុយក្រែនដើម្បីឱ្យមានការឯកភាពគ្នាលើផែនការមួយដែលនឹងចាប់ផ្ដើមឡើងវិញនូវការនាំចេញធញ្ញជាតិពីកំពង់ផែរបស់អ៊ុយក្រែន បើទោះបីជាសង្គ្រាមនៅរាលដាលនៅកន្លែងផ្សេងទៀតនៅក្នុងប្រទេសអ៊ុយក្រែនក៏ដោយ។ លោក Akar បានប្រាប់អ្នកសារព័ត៌មាន បន្ទាប់ពីការប្រជុំគណៈរដ្ឋមន្ត្រីបានបញ្ចប់ទៅកាលពីយប់ថ្ងៃចន្ទម្សិលមិញថា៖ «យើងកំពុងប្រឹងប្រែងធ្វើយ៉ាងណាឱ្យរឿងនេះសម្រេចឱ្យបានកាន់តែឆាប់កាន់តែប្រសើរ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយកាលពីថ្ងៃចន្ទថាមាន «សេចក្ដីរាយការណ៍ដ៏គួរឱ្យទុកចិត្ត» ដែលថារុស្ស៊ី «កំពុងលួច» នាំចេញធញ្ញ ជាតិរបស់អ៊ុយក្រែនដើម្បីលក់បានកម្រៃ។ លោក Blinken បញ្ជាក់ដូច្នេះថា៖ «ដូចដែលយើងបានឃើញនៅក្នុងសារព័ត៌មាននាំមុខមួយរបស់សហរដ្ឋអាមេរិកនៅថ្ងៃនេះ យើងឃើញមានសេចក្ដីរាយការណ៍ដ៏គួរឱ្យទុកចិត្តដែលថារុស្ស៊ីកំពុងលួចនាំចេញធញ្ញជាតិរបស់អ៊ុយក្រែន … ដើម្បីលក់សម្រាប់ផលចំណេញផ្ទាល់ខ្លួន»។ នេះបើយោងតាមទីភ្នាក់ងារព័ត៌មាន Reuters។

២១:៥៥ ៦.៦.២០២២

ថ្ងៃចន្ទ ទី ៦ ខែមិថុនា៖

លោកនាយឧត្តមសេនីយ៍ Mark Milley ដែលជាប្រធានក្រុមនាយសេនាធិការកងទ័ពរបស់សហរដ្ឋអាមេរិក បានប្រើពាក្យពេចន៍ធ្ងន់ៗនៅថ្ងៃចន្ទនេះអំពីសង្គ្រាមនៅអ៊ុយក្រែននៅឯពិធីរំឭកខួបលើកទី ៧៨ នៃថ្ងៃ D-Day។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ លោក Milley បានថ្លែងនៅឯទីបញ្ចុះសពទាហានអាមេរិកនៅឃុំ Colleville-sur-Mer ក្នុងប្រទេសបារាំងថា៖ «រដ្ឋធានីកៀវ ប្រទេសអ៊ុយក្រែនប្រហែលជាស្ថិតនៅចម្ងាយ ២.០០០ គីឡូម៉ែត្រពីទីនេះ។ នៅពេលឥឡូវនេះ ពលរដ្ឋអ៊ុយក្រែនក៏រងគ្រោះនូវភាពរន្ធត់តក់ស្លុតដូចទៅនឹងអ្វីដែលពលរដ្ឋបារាំងបានរងគ្រោះនៅក្នុងសម័យសង្គ្រាមលោកលើកទីពីរផងដែរ»។
កងទ័ពអ៊ុយក្រែនបានបញ្ជាក់នៅថ្ងៃចន្ទនេះថា ខ្លួនបានរុញច្រានកងនាវារបស់រុស្ស៊ីឱ្យថយក្រោយទៅវិញជាង ១០០ គីឡូម៉ែត្រពីឆ្នេរសមុទ្រខ្មៅរបស់អ៊ុយក្រែន ដែលនៅទីនោះ នាវាទាហានជើងទឹករបស់រុស្ស៊ីបានរាំងខ្ទប់អស់រយៈពេលជាច្រើនសប្ដាហ៍មកហើយ។ ក្រសួងការពារជាតិអ៊ុយក្រែនបានបញ្ជាក់តាម Telegram ថា៖ «ជាលទ្ធផលនៃសកម្មភាពជាសកម្មរបស់យើងក្នុងគោលបំណងផ្ដួលកងទ័ពជើងទឹករបស់សត្រូវ ក្រុមនាវារបស់កងនាវារុស្ស៊ីនៅសមុទ្រខ្មៅត្រូវបានរុញច្រានត្រឡប់ទៅវិញចម្ងាយជាង ១០០ គីឡូម៉ែត្រពីឆ្នេរសមុទ្រអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទនេះថា កងទ័ពរុស្ស៊ីមានប្រៀបផ្នែកបរិមាណនៅក្នុងការប្រយុទ្ធដើម្បីដណ្ដើមកាន់កាប់ទីក្រុង Sievierodonetsk នៅភាគខាងកើតប្រទេសអ៊ុយក្រែន ប៉ុន្តែកងទ័ពអ៊ុយក្រែនមាន «ឱកាសគ្រប់ពេល» នៅក្នុងការប្រយុទ្ធតបតទៅវិញ។ លោក Zelenskyy បានប្រាប់អ្នកសារព័ត៌មាននៅក្នុងសន្និសីទសារព័ត៌មានមួយក្នុងរដ្ឋធានីកៀវថា ស្ថានការណ៍នឹងកាន់តែពិបាកខ្លាំងសម្រាប់អ៊ុយក្រែន ប្រសិនបើរុស្ស៊ីអាចបំបែកចូលតំបន់ Donbas នៅភាគខាងកើតបាន។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ ទាហានស្ម័គ្រចិត្តពីបរទេសរបស់អ៊ុយក្រែនឈរជិតយានយន្ដមួយគ្រឿងនៅក្នុងក្រុង Sievierodonetsk តំបន់ Luhansk ប្រទេសអ៊ុយក្រែន ថ្ងៃទី ២ ខែមិថុនា ឆ្នាំ២០២២។

ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទនេះថា នៅត្រឹមរដូវស្លឹកឈើជ្រុះខាងមុខ បរិមាណធញ្ញជាតិរហូតដល់ ៧៥ លានតោនអាចជាប់គាំងនៅក្នុងប្រទេសអ៊ុយក្រែន និងថារដ្ឋាភិបាលអ៊ុយក្រែនចង់បានអាវុធបាញ់នាវាដែលអាចធានាសុវត្ថិភាពចំពោះដំណើរឆ្លងកាត់នៃការនាំចេញធញ្ញជាតិរបស់ខ្លួន។ លោក Zelenskyy បានបញ្ជាក់នៅក្នុងសន្និសីទសារព័ត៌មានមួយនៅក្នុងរដ្ឋធានីកៀវថា ប្រទេសអ៊ុយក្រែនបានពិភាក្សាជាមួយនឹងចក្រភពអង់គ្លេសនិងប្រទេសតួកគី អំពីគំនិតដែលថាទាហានជើងទឹករបស់ប្រទេសទីបីអាចធានាសុវត្ថិភាពចំពោះដំណើរឆ្លងកាត់នៃការនាំចេញធញ្ញជាតិរបស់អ៊ុយក្រែនកាត់តាមសមុទ្រខ្មៅដែលរុស្ស៊ីកំពុងមានឥទ្ធិពលគ្របដណ្ដប់បាន។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin បានចុះហត្ថលេខាលើអនុក្រឹត្យមួយដោយបញ្ជាឱ្យមានការផ្ដល់ថវិកាចំនួន ៥ លានរូប ដែលស្មើនឹង ៨១.៥០០ ដុល្លារអាមេរិកដល់ក្រុមគ្រួសារនៃឆ្នាំការពារជាតិណាម្នាក់របស់រុស្ស៊ីដែលបានស្លាប់នៅក្នុងប្រទេសអ៊ុយក្រែននិងប្រទេសស៊ីរី។ នេះបើយោងតាមទីភ្នាក់ងារព័ត៌មាន Reuters ដែលបានយោងលើសេចក្ដីរាយការណ៍របស់ទីភ្នាក់ងារព័ត៌មាន TASS របស់រុស្ស៊ីនៅថ្ងៃចន្ទនេះ។
ការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំប្រទេសអ៊ុយក្រែនបានសរសេរនៅលើ Twitter នៅថ្ងៃចន្ទនេះថា គិតត្រឹមថ្ងៃទី ១០០ នៃសង្គ្រាមនៅអ៊ុយក្រែន មនុស្សជាង ៧ លាន ១ សែននាក់បានបង្ខំខ្លួនភៀសខ្លួនពីផ្ទះសម្បែងនៅពេលការប្រយុទ្ធនៅបន្ត។
រដ្ឋមន្ត្រីការបរទេសរុស្ស៊ីលោក Sergei Lavrov នៅថ្ងៃចន្ទបានព្រលះដាក់បណ្ដាប្រទេសនៅអឺរ៉ុបថាបានរាំងខ្ទប់យន្តហោះរបស់លោកមិនឱ្យហោះហើរទៅកាន់ប្រទេសស៊ែប៊ី ដោយលោកបាននិយាយថា៖ «ស្ថានការណ៍ដែលគិតមិនដល់បានកើតឡើង»។ លោក Lavrov បានបញ្ជាក់នៅក្នុងសន្និសីទសារព័ត៌មានមួយតាមអនឡាញនៅក្នុងទីក្រុងមូស្គូ ប្រទេសរុស្ស៊ីថា៖ «នេះគឺជាការបំបិទសិទ្ធិនៃប្រទេសអធិបតេយ្យមួយនៅក្នុងការអនុវត្តគោលនយោបាយការបរទេស»។ នេះបើយោងតាមទីភ្នាក់ងារព័ត៌មាន AFP។
រដ្ឋាភិបាលអ៊ីតាលីបានកោះហៅឯកអគ្គរដ្ឋទូតរុស្ស៊ីប្រចាំប្រទេសអ៊ីតាលីនៅថ្ងៃចន្ទ បន្ទាប់ពីរដ្ឋាភិបាលរុស្ស៊ីបានចោទប្រកាន់ថាប្រព័ន្ធផ្សព្វផ្សាយអ៊ីតាលីធ្វើយុទ្ធនាការប្រឆាំងនឹងការឃោសនារបស់រុស្ស៊ីតាមរយៈការរាយការណ៍ព័ត៌មានអំពីសង្គ្រាមនៅអ៊ុយក្រែន។ ក្រសួងការបរទេសអ៊ីតាលីបានបញ្ជាក់ថា ខ្លួនបានកោះហៅលោកឯកអគ្គរដ្ឋទូត Sergey Razov ឱ្យច្រានចោលនូវ «ពាក្យបញ្ឆិតបញ្ឆៀងទាក់ទិននឹងការចោទប្រកាន់ដែលថាប្រព័ន្ធផ្សព្វផ្សាយរបស់ប្រទេសរបស់យើងមានការពាក់ព័ន្ធនៅក្នុងយុទ្ធនាការប្រឆាំងនឹងរុស្ស៊ី»។ នេះបើយោងតាមទីភ្នាក់ងារព័ត៌មាន AFP។
រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ខ្លួននឹងឆ្លើយតបចំពោះការបញ្ជូនរបស់ក្រុមបស្ចិមប្រទេសនូវសព្វាវុធដែលបាញ់បានចម្ងាយឆ្ងាយទៅឱ្យប្រទេសអ៊ុយក្រែន តាមរយៈការរុញច្រានកងទ័ពអ៊ុយក្រែនឱ្យចេញឆ្ងាយបន្ថែមទៀតពីព្រំដែនរបស់រុស្ស៊ី។ រដ្ឋមន្ត្រីការបរទេសរុស្ស៊ីលោក Sergei Lavrov បានបញ្ជាក់នៅក្នុងសន្និសីទសារព័ត៌ មានមួយថា៖ «ប្រព័ន្ធអាវុធដែល [ក្រុមបស្ចិមប្រទេស] បញ្ជូនឱ្យអ៊ុយក្រែនបាញ់បានចម្ងាយឆ្ងាយប៉ុណ្ណា រុស្ស៊ីនឹងវាយបកពួកណាហ្ស៊ី [កងទ័ពអ៊ុយក្រែន] ឱ្យចេញឆ្ងាយប៉ុណ្នឹងដែរពីខ្សែបន្ទាត់ដែលអ្នកនិយាយភាសារុស្ស៊ីនិងប្រទេសរុស្ស៊ីអាចរងការគំរាម កំហែង»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ សមាជិកក្រុមការងារស្ម័គ្រចិត្តបរទេសដែលចូលធ្វើជាយោធាអ៊ុយក្រែនជិះយានយន្ដយោធាមួយគ្រឿង នៅក្រុង Sievierodonetsk តំបន់ Luhansk ប្រទេសអ៊ុយក្រែន ថ្ងៃទី ២ ខែមិថុនា ឆ្នាំ២០២២។

ចក្រភពអង់គ្លេសបានបញ្ជាក់នៅថ្ងៃចន្ទថា ខ្លួននឹងបញ្ជូនឱ្យប្រទេសអ៊ុយក្រែននូវប្រព័ន្ធបាញ់រ៉ុក្កែតច្រើនគ្រាប់ដែលអាចវាយប្រហារលើគោលដៅរហូតដល់ចម្ងាយប្រ ហែល៨០គីឡូម៉ែត្រ។ នាយករដ្ឋមន្ត្រីចក្រភពអង់គ្លេសលោក Boris Johnson បាននិយាយនៅថ្ងៃចន្ទថា៖ «យើងមិនអាចឈរនៅស្ងៀម នៅពេលដែលរុស្ស៊ីបាញ់កាំភ្លើងធំរយៈចម្ងាយឆ្ងាយលើទីក្រុងនានានិងសម្លាប់ជនស៊ីវិលស្លូតត្រង់នោះទេ»។ នេះបើយោងតាមសារព័ត៌មាន Washington Post។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទថា នាយករដ្ឋមន្ត្រីចក្រភពអង់គ្លេសលោក Boris Johnson បានបញ្ជាក់អះអាងអំពីកញ្ចប់ជំនួយយោធាថ្មីរបស់អង់គ្លេសសម្រាប់ប្រទេសអ៊ុយក្រែននៅក្នុងការសន្ទនាតាមទូរស័ព្ទរវាងមេដឹកនាំទាំងពីរ។ លោក Zelenskyy បានបន្ថែមថា លោកនិងលោក Johnson «កំពុងស្វែងរកវិធីដើម្បីបញ្ចៀសវិបត្តិស្បៀងអាហារនិងបញ្ឈប់ការរាំងខ្ទប់ [របស់រុស្ស៊ីលើ] កំពង់ផែ [របស់អ៊ុយក្រែន]»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ខ្លួនមានចំណាប់អារម្មណ៍នៅក្នុងការចរចាជាមួយនឹងសហរដ្ឋអាមេរិកអំពីបញ្ហាអាវុធនុយក្លេអ៊ែរ ប៉ុន្តែបានលើកឡើងថាការចរចានេះទំនងជានឹងមិនកើតឡើងនៅពេលនេះទេ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានថា៖ «យើងមានចំណាប់អារម្មណ៍និងជឿលើការចរចានិងការពិភាក្សាជាបន្តលើប្រធានបទនេះ ដោយសារតែការប្រែប្រួលយ៉ាងសំខាន់ដែលយើងកំពុងមើលឃើញ។ ...ពិភពលោកទាំងមូលត្រូវការការពិភាក្សាបែបនេះ»។ នេះបើយោងតាមទីភ្នាក់ងារព័ត៌មាន Reuters។
ឯកអគ្គរដ្ឋទូតសហរដ្ឋអាមេរិកប្រចាំប្រទេសរុស្ស៊ីលោក John Sullivan ត្រូវបានគេដកស្រង់សម្ដីដែលបាននិយាយថា រុស្ស៊ីមិនគួរបិទស្ថានទូតសហរដ្ឋអាមេរិកនោះទេ បើទោះបីជាមានវិបត្តិដែលកើតឡើងដោយសារសង្គ្រាមនៅអ៊ុយក្រែនក៏ដោយ ដោយសារតែសហរដ្ឋអាមេរិកនិងរុស្ស៊ីដែលជាមហាអំណាចនុយក្លេអ៊ែរដ៏ធំជាងគេបំផុតទាំងពីរនៅលើពិភពលោកត្រូវតែបន្តការចរចាគ្នា។ នៅក្នុងការប៉ុនប៉ងយ៉ាងច្បាស់មួយដើម្បីបញ្ជូនសារទៅឱ្យរដ្ឋាភិបាលរុស្ស៊ី លោក Sullivan បានប្រាប់ទីភ្នាក់ងារព័ត៌មាន TASS របស់រុស្ស៊ីថា រដ្ឋាភិបាលអាមេរិកនិងរដ្ឋាភិបាលរុស្ស៊ីមិនគួរកាត់ផ្ដាច់ទំនាក់ទំនងការទូតទេ។ លោកបានប្រាប់ទីភ្នាក់ងារព័ត៌មាន TASS នៅក្នុងកិច្ចសម្ភាសន៍មួយថា៖ «យើងត្រូវតែរក្សាលទ្ធភាពនៅក្នុងការនិយាយរកគ្នាទៅវិញទៅមក»។

រូបឯកសារ៖ ឯកអគ្គរដ្ឋទូតសហរដ្ឋអាមេរិកប្រចាំប្រទេសរុស្ស៊ីលោក John Sullivan ថ្លែងទៅកាន់ប្រព័ន្ធផ្សព្វផ្សាយ នៅទីក្រុងមូស្គូ ប្រទេសរុស្ស៊ី ថ្ងៃទី ២៨ ខែមិថុនា ឆ្នាំ២០២១។

ប្រធានទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បាននិយាយនៅថ្ងៃចន្ទថា ទីភ្នាក់ងារ IAEA «កំពុងបង្កើតទម្រង់បែបបទ» ដើម្បីបញ្ជូនតាមសំណើរបស់អ៊ុយក្រែននូវក្រុមបេសកកម្មអ្នកជំនាញអន្តរជាតិមួយក្រុមទៅកាន់រោង ចក្រថាមពលនុយក្លេអ៊ែរដែលកាន់កាប់ដោយរុស្ស៊ីនៅក្នុងទីក្រុង Zaporizhzhia ប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Grossi បានបញ្ជាក់ថា គេឃើញមានការលើកឡើងពីខាងអ៊ុយ ក្រែនទាក់ទិននឹងក្ដីបារម្ភរបស់ពួកគេអំពីដំណើរបង្អាក់ផ្នែកខ្សែសង្វាក់ផ្គត់ផ្គង់នៃគ្រឿងបន្លាស់ទៅកាន់ទីក្រុង Zaporizhzhia។
លោក Pavlo Kyrylenko ប្រធានរដ្ឋបាលយោធាតំបន់ Donetsk នៃប្រទេសអ៊ុយក្រែនបាននិយាយនៅថ្ងៃចន្ទថា ជនស៊ីវិលកាន់តែច្រើនឡើងឥឡូវនេះត្រៀមលក្ខណៈរួច រាល់នៅក្នុងការជម្លៀសចេញពីតំបន់ Donetsk ដែលអ៊ុយក្រែនកំពុងត្រួតត្រា។ លោក Kyrylenko បានបញ្ជាក់ប្រាប់ទូរទស្សន៍មួយរបស់អ៊ុយក្រែនថា៖ «អ្នកដែលមិនបានព្យាយាមនិងមិនចង់ចាកចេញតាំងពីដំបូងនៅពេលដែលស្ថានការណ៍មានសុវត្ថិភាពជាងពេលបច្ចុប្បន្ន ឥឡូវនេះកំពុងចាកចេញហើយ»។ នេះបើយោងតាមបណ្ដាញទូរទស្សន៍ CNN។
លោក Serhiy Haidai អភិបាលតំបន់ Luhansk នៃប្រទេសអ៊ុយក្រែន បាននិយាយនៅថ្ងៃចន្ទថា បន្ទាប់ពីបានវាយបកកងទ័ពរុស្ស៊ីទៅវិញនៅក្នុងរយៈពេលប៉ុន្មានថ្ងៃចុងក្រោយនេះ យុទ្ធជនអ៊ុយក្រែនដែលប្រយុទ្ធនៅក្នុងទីក្រុង Sievierodonetsk បានបាត់ បង់ការត្រួតត្រាផ្នែកមួយចំនួនទៅឱ្យរុស្ស៊ី។ លោក Haidai បញ្ជាក់ដូច្នេះថា៖ «អ្នកការ ពាររបស់យើងអាចធ្វើការវាយប្រហារតបតទៅវិញបានមួយរយៈ។ ពួកគេបានរំដោះទីក្រុង [Sievierodonetsk] ស្ទើរតែពាក់កណ្ដាល។ ប៉ុន្តែឥឡូវនេះស្ថានការណ៍គឺអាក្រក់ឡើងបន្តិចម្ដងទៀតហើយសម្រាប់ពួកយើង»។
ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីយប់ថ្ងៃអាទិត្យម្សិលមិញថា កាលពីថ្ងៃអាទិត្យលោកបានទៅសួរសុខទុក្ខទាហានអ៊ុយក្រែននៅក្នុងតំបន់សមរភូមិមុខមួយចំនួនដែលរងការទម្លាក់គ្រាប់បែកធ្ងន់ធ្ងរបំផុត។ លោក Zelenskyy បានថ្លែងនៅក្នុងសុន្ទរកថាកាលពីយប់ថ្ងៃអាទិត្យថា៖ «យើងបានស្ថិតនៅក្នុងក្រុង Lysychansk និងក្រុង Soledar»។ ក្រុងទាំងពីរនេះបានរងការវាយប្រហារខ្លាំងក្លាពីកងទ័ពរុស្ស៊ីអស់រយៈពេលជាច្រើនសប្ដាហ៍មកហើយ ដោយរងការបាញ់ផ្លោងដោយមីស៊ីលនិងរ៉ុក្កែតនិងការទម្លាក់គ្រាប់បែកពីលើអាកាស។ នេះបើយោងតាមបណ្ដាញទូរទស្សន៍ CNN។

២០:២៥ ៥.៦.២០២២

ថ្ងៃអាទិត្យ ទី ៥ ខែមិថុនា៖

ការវាយប្រហាររបស់រុស្ស៊ីបានបំផ្លាញរថក្រោះនិងរថពាសដែកនៅខាងក្រៅរដ្ឋធានីកៀវដែលរថក្រោះនិងរថពាសដែកទាំងនោះត្រូវបានប្រទេសនានានៅអឺរ៉ុបបានផ្តល់ឱ្យអ៊ុយក្រែន។ នេះបើតាមក្រសួងការពារជាតិរុស្ស៊ីកាលពីថ្ងៃអាទិត្យ។ សេចក្តីថ្លែងការណ៍របស់ក្រសួងការពារជាតិរុស្ស៊ីបានកើតមានឡើងបន្ទាប់ពីរដ្ឋធានីអ៊ុយក្រែនបានញ័ររង្គើដោយសារការផ្ទុះកាលពីព្រឹកថ្ងៃអាទិត្យ។ បើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ជនស៊ីវិលយ៉ាងតិចណាស់ក៏១១នាក់ដែរ ដែលត្រូវបានគេរាយការណ៍ថា បានត្រូវសម្លាប់នៅក្នុងទីក្រុង Severodonetsk នៃតំបន់ Lugansk នៅជិតតំបន់ Donetsk ប្រទេសអ៊ុយក្រែន ហើយនឹងនៅក្នុងទីក្រុង Mykolaive ភាគខាងត្បូង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។

ស្ត្រីម្នាក់រត់ចេញពីផ្ទះរបស់គាត់ដែលបានឆេះដោយសារការវាយប្រហាររបស់រុស្ស៊ីនៅតំបន់ Donetsk ប្រទេសអ៊ុយក្រែន ថ្ងៃទី ៣ ខែមិថុនា ឆ្នាំ២០២២។

សម្តេចប៉ាប Francisបានអំពាវនាវកាលពីថ្ងៃអាទិត្យឱ្យមាន«ការចរចាពិតប្រាកដ»ដើម្បីបញ្ចប់នូវអ្វីដែលព្រះអង្គបានហៅថា«ជាការរាលដាលប្រកបដោយគ្រោះថ្នាក់កាន់តែកើនឡើង»នៃជម្លោះនៅក្នុងប្រទេសអ៊ុយក្រែន។ រយៈពេលជាង ១០០ ថ្ងៃចាប់តាំងពីសង្គ្រាមបានចាប់ផ្តើមមក សម្តេចប៉ាបបានអំពាវនាវឱ្យមានការចរចាពិតប្រាកដដើម្បីឱ្យមានការឈប់បាញ់គ្នាដើម្បីបញ្ចប់សង្គ្រាមនេះ។ កាលពីថ្ងៃសៅរ៍ សម្តេចប៉ាបដែលមានព្រះជន្ម ៨៥ ឆ្នាំបានបញ្ជាក់ពីបំណងរបស់ព្រះអង្គយាងទៅប្រទេសអ៊ុយក្រែន ក៏ប៉ុន្តែបានមានព្រះរាជបន្ទូលថា ព្រះអង្គចង់រង់ចាំពេលវេលាត្រឹមត្រូវសិន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ការដាក់ទណ្ឌកម្មរបស់រុស្ស៊ីប្រឆាំងនឹងក្រុមហ៊ុន Gazprom Germania និងសាខារបស់ក្រុមហ៊ុននោះអាចធ្វើឱ្យខាតបង់ប្រាក់អ្នកបង់ពន្ធដារនិងអ្នកប្រើប្រាស់ឧស្ម័នអាល្លឺម៉ង់បន្ថែម ៥ ពាន់៤រយលានដុល្លារក្នុងមួយឆ្នាំដើម្បីបង់ប្រាក់តម្លៃឧស្ម័នជំនួសឱ្យឧស្ម័នរុស្ស៊ី។ នេះបើតាមកាសែត Welt am Sonntag ដែលបានដកស្រង់សម្តីអ្នកតំណាងឧស្សាហកម្ម។ កាលពីខែឧសភា រុស្ស៊ីបានសម្រេចបញ្ឈប់ការផ្គត់ផ្គង់ដល់ក្រុមហ៊ុនGazprom Germania ដែលជាសាខារបស់ក្រុមហ៊ុន Gazprom របស់អាល្លឺម៉ង់ បន្ទាប់ពីរដ្ឋាភិបាលក្រុងប៊ែរឡាំងបានដាក់ក្រុមហ៊ុននោះស្ថិតនៅក្រោមការរៀបចំចាត់ចែងរបស់ trustee ដែលបណ្តាលមកពីការឈ្លានពានរបស់រុស្ស៊ីលើប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin បានព្រមាននៅថ្ងៃអាទិត្យថា រដ្ឋាភិបាលក្រុងមូស្គូនឹងវាយប្រហារគោលដៅថ្មីៗ ប្រសិនបើប្រទេសលោកខាងលិចផ្គត់ផ្គង់កាំជ្រួចមីស៊ីលវង់ប្រតិបត្តិការវែងទៅឱ្យអ៊ុយក្រែន។ លោកPutin ថ្លែងដូច្នេះក្នុងរយៈពេលប៉ុន្មានម៉ោងបន្ទាប់ពីមានការផ្ទុះជាច្រើនដែលធ្វើឱ្យរង្គើរដ្ឋធានីកៀវនៃប្រទេសអ៊ុយក្រែន។ អត្ថាធិប្បាយរបស់លោក Putin ធ្វើឡើងបន្ទាប់ពីសហរដ្ឋអាមេរិកកាលពីសប្តាហ៍មុនបានប្រកាសថា ខ្លួននឹងផ្គត់ផ្គង់ប្រព័ន្ធកាំជ្រួចមីស៊ីលទំនើបទៅឱ្យអ៊ុយក្រែន។ ពួកមន្ត្រីអ៊ុយក្រែនបាននិយាយនៅព្រឹកថ្ងៃអាទិត្យថា កាំជ្រួចមីស៊ីលរបស់រុស្ស៊ីបានបាញ់ត្រូវចំទីកន្លែងហេដ្ឋារចនាសម្ព័ន្ធផ្លូវដែកនៅក្នុងការវាយប្រហាររបៀបនេះលើកទី១ចាប់តាំងពីថ្ងៃទី២៨ ខែមេសាមក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។

ប្រធានាធិបតីរុស្ស៊ី លោក Vladimir Putin ថ្លែងក្នុងអំឡុងពេលផ្ដល់បទសម្ភាសន៍មួយដល់ទូរទស្សន៍ Russia-1 ក្រុង Sochi ប្រទេសរុស្ស៊ី ថ្ងៃទី ៣ ខែមិថុនា ឆ្នាំ២០២២។ (Mikhail Klimentyev, Sputnik, Kremlin Pool Photo via AP)

ឧត្តមសេនីយ៍កំពូលសហរដ្ឋអាមេរិកលោក Mark Milley បាននិយាយកាលពីថ្ងៃសៅរ៍ថា សហរដ្ឋអាមេរិកត្រូវតែធ្វើការតាំងចិត្តគាំទ្រប្រទេសស៊ុយអែតនិងហ្វាំងឡង់នៅពេលដែលប្រទេសទាំង២នេះស្វះស្វែងចង់ក្លាយជាសមាជិករបស់អង្គការអូតង់។ នេះបើយោងតាមសេចក្តីថ្លែងការណ៍មួយនៅក្នុងដំណើរទស្សនកិច្ចរបស់លោកទៅកាន់នាវាចម្បាំង USS Kearsarge បន្ទាប់ពីនាវានោះបានក្លាយជានាវាចម្បាំងដ៏ធំបំផុតរបស់សហរដ្ឋអាមេរិកដែលបានចតនៅកំពង់ផែក្នុងក្រុងស្តុកខុល ប្រទេសស៊ុយអែត។ លោក Milley បានថ្លែងនៅមុនសមយុទ្ធនាវាប្រចាំឆ្នាំរបស់អង្គការអូតង់នៅសមុទ្របាល់ទិកថា៖ «វាជាការសំខាន់សម្រាប់យើង ហើយវាក៏ជាការសំខាន់សម្រាប់ប្រទេសផ្សេងទៀតរបស់អង្គការអូតង់ផងដែរក្នុងការបង្ហាញនូវសាមគ្គីភាពជាមួយ ស៊ុយអែតនិងហ្វាំងឡង់នៅក្នុងសមយុទ្ធនេះ»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
កងទ័ពរុស្ស៊ីបានបាត់បង់ការត្រួតត្រានៅក្នុងទីក្រុង Severodonetsk ដែលជាទីក្រុងដ៏សំខាន់មួយនៅផ្នែកខាងកើតនៃប្រទេសអ៊ុយក្រែនដែលមានការប្រយុទ្ធគ្នាយ៉ាងខ្លាំងនៅពេលដែលរដ្ឋាភិបាលក្រុងមូស្គូស្វះស្វែងបង្កើនការត្រួតត្រាតំបន់ Donbas។ នេះបើតាមអភិបាលតំបន់នោះនៅថ្ងៃអាទិត្យ។ ទីភ្នាក់ងារព័ត៌មាន AFP បានរាយការណ៍ថា អភិបាលតំបន់លោក Lugansk បានសរសេរនៅលើ Telegram ថា៖ «កងទ័ពរុស្ស៊ីបានត្រួតត្រាទីក្រុងនោះប្រហែល៧០ភាគរយ ក៏ប៉ុន្តែត្រូវបានរុញច្រានឱ្យដកថយទៅវិញក្នុងរយៈពេល២ថ្ងៃកន្លងមកនេះ»។
នាយករដ្ឋមន្ត្រីជប៉ុនលោក Fumio Kishida កំពុងពិចារណាចូលរួមសន្និសីទកំពូលរបស់ក្រុមមេដឹកនាំនៃអង្គការអូតង់នៅចុងខែមិថុនាដើម្បីជំរុញឱ្យមានការសម្របសម្រួលជាមួយប្រទេសលោកខាងលិចអំពីការឈ្លានពានរបស់រុស្ស៊ីលើប្រទេសអ៊ុយក្រែន។ នេះបើតាមប្រភពដែលបានដឹងអំពីបញ្ហានេះ។ចំណាត់ការនេះនឹងកត់សម្គាល់នូវជំហរដ៏គឃ្លើនមិនប្រក្រតីមួយសម្រាប់មេដឹកនាំជប៉ុន ថ្វីបើលោក Kishida បានថ្កោលទោសប្រទេសរុស្ស៊ីម្តងហើយម្តងទៀតចំពោះអ្វីដែលលោកបានពណ៌នាថាជា«ឧក្រិដ្ឋកម្មសង្គ្រាម»ប្រឆាំងនឹងអ៊ុយក្រែនក៏ដោយ។ រដ្ឋាភិបាលក្រុងមូស្គូបានហៅសកម្មភាពរបស់ខ្លួនថាជាកិច្ចប្រតិបត្តិការពិសេស។ កាលពីអតីតកាល មេដឹកនាំជប៉ុនបានរក្សាបន្ទាត់គោលនយោបាយប្រកបដោយការប្រុងប្រយ័ត្នអំពីទំនាក់ទំនងរបស់ពួកគេជាមួយរុស្ស៊ីនៅពេលដែលប្រទេសទាំង២ មានជម្លោះទឹកដីអស់រាប់ទសវត្សរ៍។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។

រូបឯកសារ៖ នាយករដ្ឋមន្ត្រីជប៉ុនលោក Fumio Kishida ថ្លែងសុន្ទរកថាក្នុងសន្និសីទសារព័ត៌មានមួយ បន្ទាប់ពីជួបប្រជុំជាមួយក្រុមមេដឹកនាំ Quad នៅទីក្រុងតូក្យូ ប្រទេសជប៉ុន ថ្ងៃទី ២៤ ខែឧសភា ឆ្នាំ២០២២។

ប្រទេសបារាំងកំពុងធ្វើការចរចាជាមួយប្រទេសអេមីរ៉ាតអារ៉ាប់រួមដើម្បីជំនួសការទិញប្រេងពីប្រទេសរុស្ស៊ី ដែលនឹងបញ្ឈប់បន្ទាប់ពីការដាក់ទណ្ឌកម្មរបស់សហភាពអឺរ៉ុបដែលហាមឃាត់ការទិញប្រេងឆៅរបស់រុស្ស៊ី។ នេះបើរដ្ឋមន្ត្រីហិរញ្ញវត្ថុបារាំងលោក Bruno Le Maire នៅថ្ងៃអាទិត្យ។ លោក Le Maire បានប្រាប់វិទ្យុបារាំង Europe 1ថា៖ «មានការពិភាក្សាជាមួយនឹងអេមីរ៉ាតអារ៉ាប់រួម។ យើងត្រូវតែស្វែងរកប្រភពផ្សេងក្រៅពីប្រេងរបស់រុស្ស៊ី»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ប្រទេសអេស៉្បាញនឹងផ្គត់ផ្គង់កាំជ្រួចមីស៊ីលបាញ់យន្តហោះនិងរថក្រោះ Leopard ទៅឱ្យអ៊ុយក្រែននៅក្នុងការបង្កើនការជួយឧបត្ថម្ភខាងផ្នែកយោធារបស់ខ្លួនដល់អ៊ុយក្រែន។ នេះបើតាមប្រភពរដ្ឋាភិបាលដែលត្រូវបានទីភ្នាក់ងារព័ត៌មាន El Pais ដកស្រង់សម្តីមកចុះផ្សាយនៅថ្ងៃអាទិត្យ។ អេស៉្បាញក៏នឹងផ្តល់ការហ្វឹកហាត់សំខាន់ៗដល់យោធាអ៊ុយក្រែនអំពីរបៀបប្រើរថក្រោះផងដែរ។ ការហ្វឹកហាត់នេះនឹងធ្វើឡើងនៅក្នុងប្រទេសឡេតូនី ជាទីកន្លែងដែលទាហានអេស្ប៉ាញត្រូវបានដាក់ពង្រាយចំនួន ៥០០ នាក់នៅក្នុងក្របខណ្ឌរបស់អង្គការអូតង់។ ដំណាក់កាលទី២នៃការហ្វឹកហាត់អាចធ្វើឡើងនៅក្នុងប្រទេសអេស្ប៉ាញ។ នេះបើតាមប្រភពនានាដែលត្រូវបានដកស្រង់ដោយកាសែត El Paise ហើយត្រូវបានរាយការណ៍ដោយទីភ្នាក់ងារព័ត៌មាន Reuters។
រដ្ឋមន្ត្រីការបរទេសរុស្ស៊ីលោក Sergey Lavrov កាលពីថ្ងៃសៅរ៍បាននិយាយថា ការដាក់ទណ្ឌកម្មរបស់ប្រទេសលោកខាងលិចនឹងមិនមានផលប៉ះពាល់លើការនាំប្រេងចេញរបស់រុស្ស៊ីទេ ហើយលោកបានទស្សន៍ទាយពីការទទួលបានការចំណេញដ៏ធំមកពីការដឹកជញ្ជូនថាមពលនៅឆ្នាំនេះ។

២១:១២ ៤.៦.២០២២

ថ្ងៃសៅរ៍ ទី៤ ខែមិថុនា៖

ប្រធានាធិបតីអ៊ុយក្រែនលោក Volodymyr Zelenskyy បានជំរុញអភិបាលក្រុងនានារបស់សហរដ្ឋអាមេរិកឱ្យកាត់ផ្ដាច់ទំនាក់ទំនង «ភាពជាបងប្អូន» ជាមួយនឹងទីក្រុងនានារបស់រុស្ស៊ី និងឱ្យចូលរួមនៅក្នុង «គម្រោងសេដ្ឋកិច្ចដ៏ធំបំផុតនៅពេលបច្ចុប្បន្ននេះ» តាមរយៈការជួយកសាងប្រទេសអ៊ុយក្រែនឡើងវិញនៅពេលណាដែលសង្គ្រាមបានបញ្ចប់។ លោក Zelenskyy បានបញ្ជាក់ដូច្នេះនៅក្នុងវីដេអូអនឡាញដែលថ្លែងទៅកាន់សន្និសីទប្រចាំឆ្នាំលើកទី ៩០ របស់អភិបាលក្រុងនានារបស់សហរដ្ឋអាមេរិកនៅថ្ងៃសៅរ៍។ នេះបើយោងតាមបណ្ដាញព័ត៌មានទូរទស្សន៍ CNN។

ប្រធានាធិបតីអ៊ុយក្រែនលោក Volodymyr Zelenskyy ថ្លែងតាមវីដេអូពីរដ្ឋធានីកៀវ កាលពីថ្ងៃទី២ ខែមិថុនា ឆ្នាំ២០២២ ដែលជាថ្ងៃទី៩៩ នៃសង្គ្រាមឈ្លានពានរបស់រុស្ស៊ីលើអ៊ុយក្រែន។

ប្រធានាធិបតីបារាំងលោក Emmanuel Macron បាននិយាយថា វាជារឿងសំខាន់ដែលគេត្រូវធ្វើយ៉ាងណាកុំឱ្យរុស្ស៊ីអាម៉ាស់មុខ ដើម្បីនៅពេលណាដែលការប្រយុទ្ធគ្នានៅអ៊ុយក្រែនបានបញ្ចប់ គេអាចស្វែងរកដំណោះស្រាយការទូតបាន។ លោកបានបន្ថែមថា លោកជឿថា បារាំងនឹងដើរតួជាអ្នកសម្របស្រួលដើម្បីបញ្ចប់សង្គ្រាមនេះ។ លោក Macron បានបញ្ជាក់នៅក្នុងកិច្ចសម្ភាសន៍មួយជាមួយនឹងសារព័ត៌មានក្នុងតំបន់នានាដែលបានចេញផ្សាយនៅថ្ងៃសៅរ៍ថា៖ «យើងត្រូវតែធ្វើយ៉ាងណាកុំឱ្យរុស្ស៊ីអាម៉ាស់មុខ ដូច្នេះនៅថ្ងៃដែលការប្រយុទ្ធគ្នាបានបញ្ចប់ យើងអាចបង្កើតច្រកចេញមួយតាមរយៈមធ្យោបាយការទូត។ ខ្ញុំជឿថា វាគឺជាតួនាទីរបស់បារាំងនៅក្នុងការធ្វើជាអំណាចសម្របសម្រួល»។ នេះបើយោងតាមទីភ្នាក់ងារព័ត៌មាន Reuters។
ប្រធានផ្នែកសេដ្ឋកិច្ចនៃសហភាពអឺរ៉ុបលោក Paolo Gentiloni បាននិយាយនៅថ្ងៃសៅរ៍ថា បណ្ដាប្រទេសជាសមាជិកសហភាពអឺរ៉ុបនឹងត្រូវបានអនុញ្ញាតឱ្យប្រើថវិកាដែលបានមកពីមូលនិធិសម្រាប់ការរើបឡើងវិញរបស់សហភាពអឺរ៉ុប ដែលបានបង្កើតឡើងដើម្បីគាំទ្រដល់ការរីកចម្រើនសេដ្ឋកិច្ចនៅក្រោយវិបត្តិជំងឺកូវីដ១៩ ក្នុងគោលបំណងបង្កើនចំណុះឧស្ម័នធម្មជាតិរាវ (LNG)។ តាំងពីពេលដែលរុស្ស៊ីបានឈ្លានពានអ៊ុយក្រែនមក បណ្ដាប្រទេសជាសមាជិកសហភាពអឺរ៉ុបបានប្រឹងប្រែងកាត់ផ្ដាច់ការពឹងផ្អែករបស់ខ្លួនលើការនាំចូលឧស្ម័នពីប្រទេសរុស្ស៊ី។ ការសាងសង់ហេដ្ឋារចនាសម្ព័ន្ធថ្មីសម្រាប់នាំចូលឧស្ម័នធម្មជាតិរាវបន្ថែមទៀតគឺជាផ្នែកមួយនៃយុទ្ធសាស្ត្ររបស់សហភាពអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
លោក Vadym Lyakh ប្រធានរដ្ឋបាលយោធានៃទីក្រុង Sloviansk ក្នុងប្រទេសអ៊ុយក្រែន បាននិយាយនៅថ្ងៃសៅរ៍ ថា មនុស្សរាប់រយនាក់កំពុងភៀសខ្លួនចេញពីទីក្រុង Sloviansk នៅភាគខាងកើតប្រទេសអ៊ុយក្រែនជារៀងរាល់ថ្ងៃ ដោយនៅសប្ដាហ៍នេះអ្នកដែលបានជម្លៀសខ្លួនចេញមានចំនួនកើនឡើងស្ទើរតែពីរដង។ នេះបើយោងតាមបណ្ដាញព័ត៌មានទូរទស្សន៍ CNN។

រូបឯកសារ៖ សមាជិកទាហានបរទេសស្ម័គ្រចិត្ត ដែលចូលរួមច្បាំងជាមួយទ័ពអ៊ុយក្រែន ប្រុងប្រៀបខ្លួននៅក្នុងទីក្រុង Sievierodonetsk នៃតំបន់ Luhansk ភាគខាងកើតអ៊ុយក្រែន ខណៈរុស្ស៊ីបន្តវាយប្រហារឈ្លានពានអ៊ុយក្រែន កាលពីថ្ងៃទី២ ខែមិថុនា ឆ្នាំ២០២២។

រដ្ឋាភិបាលអ៊ុយក្រែនបានបញ្ជាក់នៅថ្ងៃសៅរ៍ថា រុស្ស៊ីបានប្រើកម្លាំងដែលខ្លួនមានទាំងអស់ដើម្បីដណ្ដើមកាន់កាប់ទីក្រុងឧស្សាហកម្ម Severodonetsk ក្នុងកិច្ចប្រឹងប្រែងដើម្បីត្រួតត្រាលើតំបន់ Donbas ទាំងមូលនៅភាគខាងកើតប្រទេសអ៊ុយក្រែន។ លោក Sergiy Gaidai អភិបាលតំបន់ Lugansk នៃប្រទេសអ៊ុយក្រែន បាននិយាយនៅក្នុងកិច្ចសម្ភាសន៍មួយដែលបង្ហោះនៅលើបណ្ដាញសង្គមអនឡាញផ្លូវការរបស់លោកថា៖ «ស្ថានការណ៍ជារួមនៅក្នុងតំបន់មានភាពតានតឹងខ្លាំង។ ការប្រយុទ្ធនៅពេលឥឡូវនេះគឺផ្ដោតនៅលើទីក្រុង Severodonetsk ដោយសារតែបើតាមការស្វែងយល់របស់យើង យោធារុស្ស៊ីកំពុងប្រើកម្លាំងទាំងអស់និងធនធានបម្រុងទាំងអស់របស់ខ្លួននៅក្នុងទិសដៅនេះ»។ នេះបើយោងតាមការរាយការណ៍របស់ទីភ្នាក់ងារព័ត៌មាន AFP។
ក្រសួងការពារជាតិរុស្ស៊ីបានបញ្ជាក់នៅថ្ងៃសៅរ៍ថា កងទ័ពរបស់ខ្លួនបានបាញ់ទម្លាក់យន្តហោះដឹកសព្វាវុធមួយគ្រឿងរបស់អ៊ុយក្រែននៅជិតទីក្រុងកំពង់ផែ Odesa នៅសមុទ្រខ្មៅ។ ក្រសួងនេះបានលើកឡើងទៀតថា មីស៊ីលរបស់រុស្ស៊ីក៏បានបាញ់ចំមជ្ឈមណ្ឌលហ្វឹកហ្វឺនកាំភ្លើងធំមួយកន្លែងផងដែរនៅក្នុងតំបន់ Sumy នៃប្រទេសអ៊ុយក្រែន។ ក្រសួងនេះបានបន្ថែមថា ការវាយប្រហារមួយទៀតបានបំផ្លាញប៉ុស្តិ៍យោធារបស់ «ទាហានស៊ីឈ្នួលបរទេស» នៅក្នុងតំបន់ Odesa។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃសៅរ៍នេះថា សកម្មភាពវាយប្រហារយោធារបស់រុស្ស៊ីតាមផ្លូវអាកាសនៅលើតំបន់ Donbas ប្រទេសអ៊ុយក្រែន នៅតែមានកម្រិតខ្ពស់ ដោយរុស្ស៊ីបានប្រើអាវុធយុទ្ធភណ្ឌទាំងអាចបញ្ជាបាននិងមិនអាចបញ្ជាបាន ពេលកំពុងធ្វើប្រតិបត្តិការដើម្បីវាយប្រហារ។ ក្រសួងនេះបានលើកឡើងនៅលើបណ្តាញ Twitter ថា៖ «ការកើនឡើងនូវការប្រើប្រាស់អាវុធយុទ្ធភណ្ឌដែលមិនអាចបញ្ជាបានពេលកំពុងធ្វើប្រតិបត្តិការបានបណ្ដាលឱ្យមានការបំផ្លិចបំផ្លាញយ៉ាងរាលដាលលើតំបន់ទីប្រជុំជនមានសំណង់អាគារនានានៅក្នុងតំបន់ Donbas និងស្ទើរតែប្រាកដថាបានបណ្ដាលឱ្យមានការបំផ្លិចបំផ្លាញខុសគោលដៅច្រើនគួរសមនិងការស្លាប់និងរងរបួសរបស់ជនស៊ីវិល»។ នេះបើយោងតាមទីភ្នាក់ងារព័ត៌មាន Reuters។

ប្រភពពីរដ្ឋាភិបាលជប៉ុនបានបញ្ជាក់នៅថ្ងៃសៅរ៍ថា នាយករដ្ឋមន្ត្រីជប៉ុនលោក Fumio Kishida ប្រហែលជានឹងចូលរួមនៅក្នុងកិច្ចប្រជុំកំពូលរបស់អង្គការអូតង់ (NATO) នៅចុងខែមិថុនាខាងមុខ ដើម្បីពិភាក្សាអំពីបញ្ហាសង្គ្រាមនៅអ៊ុយក្រែន។ កិច្ចប្រជុំកំពូលរបស់អង្គការអូតង់នេះគ្រោងនឹងធ្វើឡើងពីថ្ងៃទី ២៩ ដល់ថ្ងៃទី ៣០ ខែមិថុនានេះនៅក្នុងទីក្រុងម៉ាឌ្រីដ ប្រទេសអេស្ប៉ាញ។ នេះបើយោងតាមបណ្ដាញព័ត៌មានទូរទស្សន៍ Al Jazeera។
អគ្គលេខាធិការអង្គការសហប្រជាជាតិលោក Antonio Guterres បានអំពាវនាវសាជាថ្មី នៅក្នុងសេចក្ដីថ្លែងការណ៍មួយ ឱ្យមានការបញ្ចប់សង្គ្រាមរបស់រុស្ស៊ីនៅអ៊ុយក្រែន នៅពេលដែលសង្គ្រាមនេះបានឈានចូលដល់ថ្ងៃទី ១០០។ លោក Guterres បានបញ្ជាក់នៅក្នុងសេចក្ដីថ្លែងការណ៍នោះកាលពីថ្ងៃសុក្រថា៖ «ខ្ញុំអំពាវនាវជាថ្មីឱ្យមានការបញ្ចប់ជាបន្ទាន់នូវសង្គ្រាមនេះ ឱ្យមានការដឹកជញ្ជូនជំនួយមនុស្សធម៌ដោយគ្មានការរារាំងចូលទៅឱ្យអ្នកដែលត្រូវការជំនួយនេះ ឱ្យមានការជម្លៀសចេញដោយសុវត្ថិភាពនូវជនស៊ីវិលដែលជាប់គាំងនៅក្នុងតំបន់ប្រយុទ្ធនានា និងឱ្យមានការការពារជាបន្ទាន់លើជនស៊ីវិលនិងការគោរពសិទ្ធិមនុស្សស្របទៅតាមបទដ្ឋានអន្តរជាតិ»។ នេះបើយោងតាមបណ្ដាញព័ត៌មានទូរទស្សន៍ CNN។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃអង្គារ ទី ៧ ខែមិថុនា៖

ថ្ងៃចន្ទ ទី ៦ ខែមិថុនា៖

ថ្ងៃអាទិត្យ ទី ៥ ខែមិថុនា៖

ថ្ងៃសៅរ៍ ទី៤ ខែមិថុនា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២