ទិដ្ឋភាពអគារចងចាំសង្គ្រាមលោកលើកទីពីរ ដែលរងការបំផ្លិចបំផ្លាញដោយសារការប្រយុទ្ធគ្នារវាងអ៊ុយក្រែននិងរុស្ស៊ីនៅភូមិ Dolyna ក្នុងតំបន់ Donetsk ប្រទេសអ៊ុយក្រែន ថ្ងៃទី ៣ ខែវិច្ឆិកា ឆ្នាំ២០២២។

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

២៦ កុម្ភៈ ២០២២

រុស្ស៊ីបានចូលឈ្លានពានអ៊ុយក្រែន តាំងពីថ្ងៃទី២៤ ខែកម្ភៈ មក។ សូមតាមដានព្រឹត្តិការណ៍ថ្មីៗប្រចាំថ្ងៃទាក់ទងនឹងវិបត្តិអ៊ុយក្រែន នៅលើទំព័រ Live Blog ដែលផ្សាយផ្ទាល់នេះ។

២១:៥៩ ២៦.៥.២០២២

ថ្ងៃព្រហស្បតិ៍ ទី ២៦ ខែឧសភា៖

អធិការបតីអាល្លឺម៉ង់លោក Olaf Scholz បាននិយាយនៅថ្ងៃព្រហស្បតិ៍នេះថា គេនឹងមិនអនុញ្ញាតឱ្យប្រធានាធិបតីរុស្ស៊ីលោក Vladimir Putin ធ្វើអ្វីស្រេចតែនឹងចិត្តដោយបង្អាក់ដល់សន្តិភាពសម្រាប់សង្គ្រាមនៅអ៊ុយក្រែនដែលលោក «នឹងមិនឈ្នះ» នោះទេ។ លោក Scholz បានបញ្ជាក់នៅក្នុងកិច្ចប្រជុំរបស់អង្គការវេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីសថា លោក Putin «បានបរាជ័យរួចហើយទាក់ទិននឹងគោលបំណងបែបយុទ្ធសាស្ត្ររបស់លោក»។ លោក Scholz បានបន្ថែមថា៖ «គោលបំណងរបស់យើងគឺច្បាស់យ៉ាងពិតប្រាកដថា លោក Putin មិនត្រូវឈ្នះសង្គ្រាមនេះឡើយ។ ហើយខ្ញុំជឿថា លោកនឹងមិនឈ្នះសង្គ្រាមនេះទេ»។ នេះបើយោងតាមទីភ្នាក់ងារព័ត៌មាន AFP។
សន្និបាតអង្គការសុខភាពពិភពលោក (WHO) នៅថ្ងៃព្រហស្បតិ៍នេះបានបោះឆ្នោតអនុម័តលើសេចក្ដីសម្រេចមួយដែលដឹកនាំដោយក្រុមបស្ចិមប្រទេស ដើម្បីថ្កោលទោសទង្វើរបស់ប្រទេសរុស្ស៊ីនៅក្នុងប្រទេសអ៊ុយក្រែន ដែលអង្គការសុខភាពពិភពលោកថា បានបណ្ដាលឱ្យមានភាពអាសន្នផ្នែកសុខភាពកើតឡើង។ លោក Hiroki Nakatani ដែលជាប្រធានសន្និបាតនេះ បាននិយាយថា សេចក្ដីសម្រេចនេះត្រូវបានអនុម័តដោយសំឡេងគាំទ្រចំនួន ៨៨ សំឡេង ប្រឆាំងចំនួន ១២ សំឡេង និងអនុបវាទ ៥៣ សំឡេង។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីបារាំងលោក Emmanuel Macron បានស្នើប្រធានាធិបតីតួកគីលោក Recep Tayyip Erdogan នៅថ្ងៃព្រហស្បតិ៍នេះឱ្យ «គោរពជម្រើសអធិបតេយ្យ» របស់ប្រទេសហ្វាំងឡង់និងប្រទេសស៊ុយអែត នៅក្នុងការចូលជាសមាជិកអង្គការអូតង់ (NATO)។ ខុទ្ទកាល័យរបស់លោក Macron បានបញ្ជាក់បន្ទាប់ពីលោក Macron បាននិយាយទូរស័ព្ទជាមួយនឹងលោក Erdogan ថា៖ «លោកប្រធានាធិបតី [Macron] បានគូសបញ្ជាក់អំពីតម្រូវការនៅក្នុងការគោរពជម្រើសអធិបតេយ្យរបស់ប្រទេសទាំងពីរនេះ ដែលបានលេចឡើងពីដំណើរការប្រជាធិបតេយ្យ និងជាប្រតិកម្មតបទៅនឹងការផ្លាស់ប្ដូរបរិយាកាសសន្តិសុខរបស់ប្រទេសទាំងពីរ»។ នេះបើយោងតាមទីភ្នាក់ងារព័ត៌មាន AFP។

ប្រធានាធិបតីអ៊ុយក្រែនលោក Voloydymyr Zelenskyy និងនាយករដ្ឋមន្ត្រីហ្វាំងឡង់អ្នកស្រី Sanna Marin ថតរូបរួមគ្នា មុនកិច្ចជំនួបពិភាក្សាគ្នា ខណៈការឈ្លានពានរបស់រុស្ស៊ីនៅតែបន្ត នៅរដ្ឋធានីកៀវ ប្រទេសអ៊ុយក្រែន ថ្ងៃទី ២៦ ខែឧសភា ឆ្នាំ ២០២២។

ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃព្រហស្បតិ៍នេះបានអរគុណប្រទេសហ្វាំងឡង់សម្រាប់ការគាំទ្ររបស់ប្រទេសនេះក្នុងអំឡុងពេលសង្គ្រាមប្រឆាំងនឹងរុស្ស៊ី នៅពេលដែលនាយករដ្ឋមន្ត្រីហ្វាំងឡង់លោកស្រី Sanna Marin ធ្វើទស្សនកិច្ចនៅក្នុងរដ្ឋធានីកៀវ ប្រទេសអ៊ុយក្រែន។ លោក Zelenskyy បានសរសេរនៅលើ Facebook បន្ទាប់ពីបានពិភាក្សាជាមួយនឹងលោកស្រី Marin ថា៖ «សម្រាប់យើងខ្ញុំ ជំនួយយោធារបស់ប្រទេសហ្វាំងឡង់គឺមានតម្លៃយ៉ាងខ្លាំង។ សព្វាវុធ គោលនយោបាយដាក់ទណ្ឌកម្ម និងសាមគ្គីភាពរបស់ដៃគូរបស់យើងទាក់ទិននឹងការចូលជាសមាជិករបស់អ៊ុយក្រែននៅក្នុងសហភាពអឺរ៉ុប គឺជាអ្វីដែលផ្ដល់កម្លាំងដល់ការការពារទឹកដីរបស់យើង»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលអ៊ុយក្រែនបានបញ្ជាក់នៅថ្ងៃព្រហស្បតិ៍នេះថា សង្គ្រាមនៅភាគខាងកើតប្រទេសអ៊ុយក្រែនបានឈានដល់កម្រិតពុះកញ្ជ្រោលខ្លាំងបំផុត។ អ៊ុយក្រែនលើកឡើងដូច្នេះ ស្របពេលដែលខ្លួនជំរុញឱ្យសម្ព័ន្ធមិត្តបស្ចិមប្រទេសផ្ដល់ការផ្គត់ផ្គង់តាមការសន្យារបស់ខ្លួនប្រឆាំងនឹងការឈ្លានពានរបស់កងកម្លាំងរុស្ស៊ី។ លោកស្រី Ganna Malyar អនុរដ្ឋមន្ត្រីការពារជាតិអ៊ុយក្រែន បានបញ្ជាក់នៅក្នុងសន្និសីទកាសែតមួយអំពីការប្រយុទ្ធក្នុងសមរភូមិនៅភាគខាងកើតប្រទេសអ៊ុយក្រែនថា៖ «ការប្រយុទ្ធបានឈានដល់កម្រិតខ្ពស់បំផុត»។ លោកស្រីបានបន្ថែមថា៖ «កងកម្លាំងរបស់សត្រូវបានវាយសង្គ្រប់លើទីតាំងរបស់កងទ័ពយើងក្នុងពេលតែមួយមកពីទិសផ្សេងៗជាច្រើន។ យើងមានដំណាក់កាលដ៏លំបាកនិងយូរបំផុតនៃការប្រយុទ្ធនៅពេលខាងមុខនេះ»។ នេះបើយោងតាមទីភ្នាក់ងារព័ត៌មាន AFP។
លោកនាយឧត្តមសេនីយ៍ Oleksiy Gromov របស់ប្រទេសអ៊ុយក្រែនបានទទួលស្គាល់នៅឯសន្និសីទកាសែតមួយនៅថ្ងៃព្រហស្បតិ៍នេះថា រុស្ស៊ីមានប្រៀបជាងនៅក្នុងការប្រយុទ្ធនៅក្នុងតំបន់ Luhansk នៃភាគខាងកើតប្រទេសអ៊ុយក្រែននៅពេលបច្ចុប្បន្ននេះ។ លោកនិយាយដូច្នេះថា៖ «រុស្ស៊ីមានប្រៀបជាង ប៉ុន្តែយើងនឹងធ្វើអ្វីៗទាំងអស់ដែលយើងអាចធ្វើបាន [ដើម្បីទប់ទល់នឹងរុស្ស៊ី]»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin បាននិយាយនៅក្នុងការសន្ទនាតាមទូរស័ព្ទជាមួយនឹងនាយករដ្ឋមន្ត្រីអ៊ីតាលីលោក Mario Draghi ថា រដ្ឋាភិបាលរុស្ស៊ីត្រៀមលក្ខណៈរួចរាល់នៅក្នុងការ «រួមចំណែកយ៉ាងសំខាន់» នៅក្នុងការបញ្ចៀសកុំឱ្យមានវិបត្តិស្បៀងអាហារកើតឡើង ប្រសិនបើក្រុមបស្ចិមប្រទេសដកទណ្ឌកម្មដែលដាក់លើខ្លួនទាក់ទិននឹងរឿងអ៊ុយក្រែនចេញ។ រដ្ឋាភិបាលរុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយបន្ទាប់ពីការសន្ទនាតាមទូរស័ព្ទនោះបានបញ្ចប់ទៅថា៖ «លោក Vladimir Putin សង្កត់ធ្ងន់ថា សហព័ន្ធរុស្ស៊ីត្រៀមលក្ខណៈរួចរាល់នៅក្នុងការរួមចំណែកយ៉ាងសំខាន់ដើម្បីកុំឱ្យមានវិបត្តិស្បៀងអាហារកើតឡើងតាមរយៈការនាំចេញធញ្ញជាតិនិងជី ប្រសិនបើក្រុមបស្ចិមប្រទេសដកទណ្ឌកម្មដែលមានលក្ខណៈនយោបាយទាំងនេះចេញ»។ នេះបើយោងតាមទីភ្នាក់ងារព័ត៌មាន AFP។

ប្រធានាធិបតីរុស្ស៊ីលោក Vladimir Putin ថ្លែងនៅក្នុងកិច្ចប្រជុំជាវីដេអូ ជាមួយប្រមុខរដ្ឋនៃប្រទេសជាសមាជិករបស់វេទិកាសេដ្ឋកិច្ចអាស៊ីអឺរ៉ុប នៅទីក្រុងមូស្គូ ប្រទេសរុស្ស៊ី ថ្ងៃទី ២៦ ខែឧសភា ឆ្នាំ ២០២២។

រដ្ឋមន្ត្រីការបរទេសរុស្ស៊ីលោក Sergei Lavrov នៅថ្ងៃព្រហស្បតិ៍នេះបានច្រានចោលគម្រោងសម្រាប់សន្តិភាពនៅក្នុងប្រទេសអ៊ុយក្រែន ដែលស្នើឡើងដោយប្រទេសអ៊ីតាលី។ លោក Lavrov បាននិយាយថា លោកដឹងអំពីអត្ថន័យនៃគម្រោងនេះតាមរយៈតែប្រព័ន្ធផ្សព្វផ្សាយតែប៉ុណ្ណោះ ដោយសារតែរដ្ឋាភិបាលរុស្ស៊ីមិនទាន់ទទួលបានសំណៅនេះនៅឡើយទេ។ លោក Lavrov បានបញ្ជាក់នៅក្នុងកិច្ចសម្ភាសន៍មួយជាមួយនឹងទូរទស្សន៍ RT របស់រុស្ស៊ីថា គម្រោងនេះសម្លឹងទុកជាមុននូវការភ្ជាប់យកតំបន់ Crimea និងតំបន់ផ្សេងទៀតដែលគ្រប់គ្រងដោយក្រុមផ្ដាច់ខ្លួនដែលគាំទ្រដោយរុស្ស៊ីនៅភាគខាងកើតអ៊ុយក្រែនដើម្បីធ្វើ «ជាផ្នែកមួយនៃប្រទេសអ៊ុយក្រែនក្រោមស្វ័យភាពដ៏ទូលំទូលាយ»។ នេះបើយោងតាមទីភ្នាក់ងារព័ត៌មាន AFP។
រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍ថា ខ្លួនរំពឹងថារដ្ឋាភិបាលអ៊ុយក្រែន នឹងធ្វើតាមការទាមទាររបស់ខ្លួន និងបានបន្ថែមថា អ៊ុយក្រែនចាំបាច់ត្រូវយល់អំពីស្ថានការណ៍ដើម្បីឱ្យការចរចាសន្តិភាពអាចកើតឡើងបាន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានមានប្រតិកម្ម ដូច្នេះតបទៅនឹងការលើកឡើងរបស់អតីតរដ្ឋមន្ត្រីការបរទេសអាមេរិកលោក Henry Kissinger ដែលបានស្នើនៅក្នុងសប្ដាហ៍នេះ នៅឯកិច្ចប្រជុំរបស់អង្គការវេទិកាសេដ្ឋកិច្ចពិភពលោក នៅក្នុងទីក្រុង Davos ប្រទេសស្វីស ថា អ៊ុយក្រែនគួរតែទុកឱ្យរុស្ស៊ីរក្សាការគ្រប់គ្រងលើតំបន់ Crimea ដែលជាតំបន់រុស្ស៊ីបានភ្ជាប់យកកាលពីឆ្នាំ ២០១៤។ រដ្ឋាភិបាលរុស្ស៊ីកំពុងទាមទារឱ្យអ៊ុយក្រែនទទួលស្គាល់តំបន់ Crimea ថា ជាដែនដីរបស់រុស្ស៊ី និងទទួលស្គាល់តំបន់ផ្ដាច់ខ្លួនដែលគាំទ្រដោយរុស្ស៊ីនៅភាគខាងកើតប្រទេសអ៊ុយក្រែនថា ជារដ្ឋឯករាជ្យក្នុងចំណោមការទាមទារផ្សេងៗទៀត។ ប៉ុន្តែអ៊ុយក្រែនមិនបានឯកភាពជាដាច់ខាតជាមួយនឹងការអះអាងរបស់រុស្ស៊ីទាំងនេះ។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីនៅថ្ងៃព្រហស្បតិ៍បានច្រានចោលការអះអាងរបស់សហរដ្ឋអាមេរិកនិងរបស់សហភាពអឺរ៉ុបដែលថា ប្រទេសរុស្ស៊ីបានរាំងខ្ទប់ការនាំចេញធញ្ញជាតិពីប្រទេសអ៊ុយក្រែន និងបានចោទប្រកាន់ក្រុមបស្ចិមប្រទេសថា ជាអ្នកដែលបានធ្វើឱ្យស្ថានការណ៍ដូចនេះកើតឡើង តាមរយៈការដាក់ទណ្ឌកម្ម។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅក្នុងសន្និសីទកាសែតតាមអនឡាញជាមួយនឹងអ្នកយកព័ត៌មាននៅថ្ងៃព្រហស្បតិ៍ថា៖ «យើងមិនទទួលយកការចោទប្រកាន់ទាំងនេះជាដាច់ខាត។ ផ្ទុយមកវិញ យើងបន្ទោសក្រុមបស្ចិមប្រទេសថាបានចាត់វិធានការដែលបណ្ដាលឱ្យបញ្ហានេះកើតឡើង»។ នេះបើយោងតាមទីភ្នាក់ងារព័ត៌មាន Reuters។

បុរសម្នាក់ឈរនៅមុខអគារដែលត្រូវបានបំផ្លាញដោយការវាយប្រហារនៅក្រុង Hostomel ជាយរដ្ឋធានីកៀវ ប្រទេសអ៊ុយក្រែន ថ្ងៃទី ២៦ ខែឧសភា ឆ្នាំ ២០២២។

មន្ត្រីជាន់ខ្ពស់រដ្ឋាភិបាលតួកគីមួយរូបបានប្រាប់ទីភ្នាក់ងារព័ត៌មាន Reuters នៅថ្ងៃព្រហស្បតិ៍ថា ប្រទេសតួកគីកំពុងចរចាជាមួយនឹងប្រទេសរុស្ស៊ីនិងប្រទេសអ៊ុយក្រែន ដើម្បីបើកច្រករបៀងមួយតាមច្រកសមុទ្រ Bosphorus សម្រាប់ការនាំចេញធញ្ញជាតិពីអ៊ុយក្រែន។ មន្ត្រីដែលថ្លែងក្នុងលក្ខខណ្ឌមិនបញ្ចេញឈ្មោះនេះ បាននិយាយថា៖ «តួកគីកំពុងចរចាជាមួយទាំងប្រទេសរុស្ស៊ីនិងទាំងប្រទេសអ៊ុយក្រែន សម្រាប់ការនាំចេញធញ្ញជាតិពីប្រទេសអ៊ុយក្រែន»។
អ្នកនាំពាក្យក្រសួងការបរទេសរុស្សីអ្នកស្រី Maria Zakharova បាននិយាយនៅថ្ងៃព្រហស្បតិ៍ថា អ្នកយកព័ត៌មានពីបស្ចិមប្រទេសនឹងត្រូវបណ្តេញចេញពីរុស្ស៊ី ប្រសិនបើក្រុមហ៊ុនបច្ចេកវិទ្យា YouTube ដ៏ធំរបស់សហរដ្ឋអាមេរិកបិទការចូលមើលការផ្តល់ព័ត៌មានដោយក្រសួងការបរទេសរុស្ស៊ី។ នេះបើយោងតាមទីភ្នាក់ងារព័ត៌មាន Reuters ដែលបានយោងលើប្រភពមកពីទីភ្នាក់ងារព័ត៌មាន TASS របស់រុស្ស៊ី។
ជនស៊ីវិលយ៉ាងហោចណាស់ ៤៣១ នាក់បានស្លាប់ និង ១.១៦៨ នាក់ទៀតបានរងរបួសនៅក្នុងតំបន់ Donetsk ភាគខាងកើតប្រទេសអ៊ុយក្រែន តាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក។ នេះបើយោងតាមសេចក្ដីរាយការណ៍របស់បណ្ដាញព័ត៌មាន Al Jazeera នៅថ្ងៃព្រហស្បតិ៍។
ទីភ្នាក់ងារព័ត៌មាន RIA Novosti របស់រុស្ស៊ីបានរាយការណ៍ថា មេដឹកនាំនៃក្រុមផ្ដាច់ខ្លួនដែលគាំទ្រដោយរុស្ស៊ីនៅក្នុងតំបន់ផ្ដាច់ខ្លួន Donetsk បានអំពាវនាវនៅថ្ងៃព្រហស្បតិ៍ឱ្យមានការបង្កើនប្រតិបត្តិការយោធានៅក្នុងតំបន់ Donbas នៅភាគខាងកើតប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ប្រទេសរុស្សីនឹងស្នើសេចក្តីសម្រេចមួយនៅក្នុងកិច្ចប្រជុំរបស់អង្គការសុខភាពពិភពលោក (WHO) នៅថ្ងៃព្រហស្បតិ៍នេះ ដើម្បីជាការឆ្លើយតបដោយផ្ទាល់ទៅនឹងសំណៅនៃសំណើសេចក្ដីសម្រេចដែលគាំទ្រដោយប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន។ សំណើរបស់រុស្សីនេះដែលគាំទ្រដោយប្រទេសស៊ីរី ហើយដែលបន្ទរតាមភាសានៃសំណើដើមដែលផ្តួចផ្តើមដោយបស្ចិមប្រទេស នឹងត្រូវសម្រេចនៅក្នុងកិច្ចប្រជុំអង្គការសុខភាពពិភពលោក។ លោក Iaremenko Oleksii មន្ត្រីក្រសួងសុខាភិបាលអ៊ុយក្រែនបាននិយាយថា៖ «អ្វីដែលរុស្ស៊ីធ្វើគឺយកតាមសំណៅរបស់យើង ហើយលុបចោលប្រភពនៃបញ្ហា»។
សំណើស្នើឱ្យមានសេចក្តីសម្រេចមួយរបស់អង្គការសហប្រជាជាតិដែលថ្កោលទោសប្រទេសរុស្សីអំពីគ្រោះអាសន្នផ្នែកសុខភាពដែលបណ្តាលមកពីការឈ្លានពានរបស់រុស្សីក្នុងប្រទេសអ៊ុយក្រែន ត្រូវគេរំពឹងថានឹងដាក់ជូនសន្និបាតអង្គការសុខភាពពិភពលោក (WHO) នៅថ្ងៃព្រហស្បតិ៍។ នេះបើយោងតាមទីភ្នាក់ងារព័ត៌មាន Reuters។ លោក Adam Niedzielski រដ្ឋមន្ត្រីសុខាភិបាលរបស់ប្រទេសប៉ូឡូញដែលគាំទ្រសំណើនេះ បានថ្លែងប្រាប់សន្និបាទនេះថា៖ «សកម្មភាពយោធាដ៏បំផ្លិចបំផ្លាញរបស់រុស្ស៊ីនេះ ធ្វើឱ្យអន្តរាយដល់បេសកកម្មរបស់អង្គការសុខភាពពិភពលោក»។ សំណើដើមដែលគាំទ្រដោយសហរដ្ឋអាមេរិកនិងប្រទេសជាង ៤០ ផ្សេងទៀតថ្កោលទោសសកម្មភាពរបស់រុស្ស៊ី។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vassily Nebenzia បាននិយាយកាលពីថ្ងៃពុធម្សិលមិញថា មន្ត្រីជាន់ខ្ពស់អង្គការសហប្រជាជាតិមួយរូបគ្រោងធ្វើទស្សនកិច្ចទៅកាន់រដ្ឋធានីមូស្គូ ប្រទេសរុស្ស៊ី នៅក្នុងពេលប៉ុន្មានថ្ងៃខាងមុខដើម្បីពិភាក្សាអំពីការស្ដារឡើងវិញនូវការនាំចេញពីរុស្ស៊ី។ លោក Nebenzia បានសង្កត់ធ្ងន់ថា ការពិភាក្សានោះនឹងមិនពាក់ព័ន្ធទៅនឹងការបន្តឡើងវិញនូវការនាំចេញធញ្ញជាតិពីអ៊ុយក្រែននោះទេ។ នេះបើយោងតាមទីភ្នាក់ងារព័ត៌មាន Reuters។

២៣:១៣ ២៥.៥.២០២២

ថ្ងៃពុធ ទី ២៥ ខែឧសភា៖

ប្រធានាធិបតីអ៊ុយក្រែនលោក Volodymyr Zelenskyy បានរិះគន់ខ្លាំងៗដល់ក្រុមបស្ចិមប្រទេសនៅថ្ងៃពុធនេះថាខ្វះសាមគ្គីភាព ស្របពេលដែលការឈ្លានពានរបស់រុស្ស៊ីលើអ៊ុយក្រែនឈានចូលដល់ខែទី ៤ និងស្របពេលដែលកងទ័ពរុស្ស៊ីរុលចូលនៅភាគខាងកើតប្រទេសអ៊ុយក្រែន។ លោក Zelenskyy បានថ្លែងតាមវីដេអូអនឡាញនៅក្នុងព្រឹត្តិការណ៍មួយនៅក្រៅកិច្ចប្រជុំរបស់អង្គការវេទិកាសេដ្ឋកិច្ចពិភពលោកក្នុងទីក្រុង Davos ប្រទេសស្វីសថា៖ «សាមគ្គីភាពគឺអំពីសព្វាវុធ។ សំណួររបស់ខ្ញុំគឺថា តើមានសាមគ្គីភាពបែបនេះនៅក្នុងការអនុវត្តជាក់ស្ដែងទេ? ខ្ញុំមិនបានឃើញវាទេ។ ផលចំណេញដ៏ធំបំផុតរបស់យើងលើប្រទេសរុស្ស៊ីគឺនៅពេលណាដែលយើងមានសាមគ្គីភាពពិតប្រាកដ»។ នេះបើយោងតាមទីភ្នាក់ងារព័ត៌មាន AFP។
អ្នកនាំពាក្យក្រសួងការបទេសរុស្ស៊ីអ្នកស្រី Maria Zakharova បាននិយាយនៅថ្ងៃពុធនេះថា គម្រោងសន្តិភាពរបស់ប្រទេសអ៊ីតាលីសម្រាប់សង្គ្រាមនៅអ៊ុយក្រែនគឺជា «គំនិតរវើរវាយ»។ អ្នកស្រីបានបញ្ជាក់នៅក្នុងសន្និសីទកាសែតប្រចាំសប្ដាហ៍ ដោយយោងទៅលើគម្រោងផ្ដួចផ្ដើម [សន្តិភាព] របស់ប្រទេសអ៊ីតាលីនេះថា៖ «អ្នកមិនអាចផ្គត់ផ្គង់សព្វាវុធឱ្យអ៊ុយក្រែនដោយដៃម្ខាង ហើយដៃម្ខាងទៀតលើកឡើងនូវគម្រោងសម្រាប់ដំណោះស្រាយដោយសន្តិវិធីនៃស្ថានការណ៍នេះបានទេ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសអ៊ុយក្រែនលោក Dmytro Kuleba នៅថ្ងៃពុធនេះបានអំពាវនាវឱ្យក្រុមបស្ចិមប្រទេស «ផ្ដាច់ដង្ហើមនៃការនាំចេញរបស់រុស្ស៊ី» ដើម្បីឱ្យរុស្ស៊ីរងផលវិបាកសម្រាប់ការឈ្លានពានរបស់ខ្លួនលើអ៊ុយក្រែន ដោយលោកបានស្នើឱ្យពិភពលោកធ្វើយ៉ាងណាកុំឱ្យរដ្ឋាភិបាលរុស្ស៊ីបានថវិកាផ្គត់ផ្គង់ដល់ «ធនធានធ្វើសង្គ្រាម» របស់ខ្លួន។ លោក Kuleba បាននិយាយនៅឯវេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីសថា៖ «សាររបស់ខ្ញុំគឺសាមញ្ញបំផុត ដែលនោះគឺ ចូរផ្ដាច់ដង្ហើមនៃការនាំចេញរបស់រុស្ស៊ី»។ លោកបានបន្ថែមថា៖ «ចូរឈប់ទិញពីរុស្ស៊ី។ ឈប់អនុញ្ញាតឱ្យរុស្ស៊ីរកចំណូលបាន ដោយសាររុស្ស៊ីអាចប្រើចំណូលនោះដើម្បីវិនិយោគលើធនធានធ្វើសង្គ្រាមដែលបំផ្លាញ សម្លាប់ ចាប់រំលោភ និងធ្វើទារុណកម្មលើប្រជាពលរដ្ឋនៅក្នុងប្រទេសអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសអ៊ុយក្រែនលោក Dmytro Kuleba នៅថ្ងៃពុធនេះបានចោទប្រកាន់អង្គការអូតង់ (NATO) ថា «មិនបានធ្វើអ្វីទាល់តែសោះ» ក្នុងស្ថានការណ៍ដែលរុស្ស៊ីកំពុងឈ្លានពានអ៊ុយក្រែន និងបានសរសើរសហភាពអឺរ៉ុបសម្រាប់ការសម្រេចចិត្តដែល «ខុសពីធម្មតាទាំងស្រុង» នៅក្នុងការគាំទ្ររដ្ឋាភិបាលអ៊ុយក្រែន។ លោក Kuleba បានបញ្ជាក់ប្រាប់វេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីសថា៖ «អង្គការអូតង់ក្នុងនាមជាសម្ព័ន្ធភាពមួយ ក្នុងនាមជាស្ថាប័នមួយ បានបញ្ឈប់សកម្មភាពទាំងស្រុងនិងមិនបានធ្វើអ្វីទាល់តែសោះ។ ខ្ញុំខកចិត្តណាស់»។ ស្របពេលនោះដែរ លោកបានសរសើរសហភាពអឺរ៉ុបសម្រាប់ «ការសម្រេចចិត្តខុសពីធម្មតាថ្មីស្រឡាងទាំងស្រុង ដែលសូម្បីតែសហភាពអឺរ៉ុបខ្លួនឯងក៏មិនរំពឹងថាអាចធ្វើបានដែរ»។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ រដ្ឋមន្ត្រីការបរទេសអ៊ុយក្រែន លោក Dmytro Kuleba ធ្វើសន្និសីទសារព័ត៌មានមួយ បន្ទាប់ពីជំនួបជាមួយនឹងក្រុមរដ្ឋមន្ត្រីការបរទេសសហភាពអឺរ៉ុបនៅក្នុងអគារក្រុមប្រឹក្សាសហភាពអឺរ៉ុប ក្នុងទីក្រុងព្រុចសែល ប្រទេសប៊ែលហ្សិក ថ្ងៃទី ១៦ ខែឧសភា ឆ្នាំ២០២២។

រដ្ឋាភិបាលស្វីសបានបញ្ជាក់នៅថ្ងៃពុធនេះថា ខ្លួនមានគម្រោងរឹបអូសទ្រព្យសម្បត្តិរបស់លោក Yuriy Ivanyushchenko ដែលជាសហការីរបស់អតីតប្រធានាធិបតីអ៊ុយក្រែនលោក Viktor Yanukovych ដែលមានទឹកប្រាក់ជាង ១០០ លានហ្វ្រង់ស្វីស ដែលស្មើនឹង ១០៤ លានដុល្លារអាមេរិក។ រដ្ឋាភិបាលស្វីសបានបន្ថែមថា នីតិវិធីនេះពាក់ព័ន្ធនឹងទ្រព្យសម្បត្តិរបស់លោក Ivanyushchenko និងក្រុមគ្រួសាររបស់លោកដែលត្រូវបានបង្កកនៅក្រោយបរិវត្តន៍ឆ្នាំ ២០១៤ នៅអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
គណៈកម្មការអឺរ៉ុបនៃសហភាពអឺរ៉ុបបានស្នើនៅថ្ងៃពុធនេះថា ការរំលោភលើទណ្ឌកម្មដែលសហភាពអឺរ៉ុបដាក់លើប្រទេសរុស្ស៊ីគឺជាអំពើឧក្រិដ្ឋ ដែលនេះគឺជាវិធានការមួយដែលនឹងអនុញ្ញាតឱ្យរដ្ឋាភិបាលនៃបណ្ដាប្រទេសជាសមាជិកសហភាពអឺរ៉ុបរឹបអូសទ្រព្យសម្បត្តិរបស់ក្រុមហ៊ុននិងបុគ្គលណាដែលគេចពីទណ្ឌកម្មដែលសហភាពអឺរ៉ុបដាក់លើរុស្ស៊ីបាន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
រដ្ឋមន្ត្រីការពារជាតិចក្រភពអង់គ្លេសលោក Ben Wallace បានអំពាវនាវនៅថ្ងៃពុធនេះឱ្យប្រទេសរុស្ស៊ីអនុញ្ញាតឱ្យប្រទេសអ៊ុយក្រែននាំចេញធញ្ញជាតិរបស់ខ្លួនដើម្បីជួយប្រទេសនានាដែលជួបប្រទះបញ្ហាកង្វះធញ្ញជាតិ ដែលបញ្ហានេះអាចបណ្ដាលឱ្យមានគ្រោះអត់ឃ្លានកើតឡើង។ លោក Wallace បានប្រាប់អ្នកសារព័ត៌មាននៅក្នុងទីក្រុងម៉ាឌ្រីដ ប្រទេសអេស្ប៉ាញថា រុស្ស៊ីត្រូវតែ «ធ្វើរឿងត្រឹមត្រូវ»។ ជាងនេះទៀត លោក Wallace បានច្រានចោលគំនិតដែលចង់ឱ្យមានការដកទណ្ឌកម្មប្រឆាំងនឹងរុស្ស៊ីចេញដើម្បីជាថ្នូរនឹងការអនុញ្ញាតឱ្យអ៊ុយក្រែនអាចនាំចេញធញ្ញជាតិរបស់ខ្លួនបាន។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃពុធនេះថា ប្រទេសរុស្ស៊ីបានព្យាយាម «គំរាមបោកយកប្រយោជន៍» ពីសហគមន៍អន្តរជាតិតាមរយៈការលើកឡើងនូវសំណើមួយនៅក្នុងការបញ្ឈប់ការរាំងខ្ទប់កំពង់ផែនៅសមុទ្រខ្មៅជាថ្នូរនឹងការទទួលបានការបន្ធូរបន្ថយការដាក់ទណ្ឌកម្ម។ នៅមុនហ្នឹង ទីភ្នាក់ងារព័ត៌មាន Interfax របស់រុស្ស៊ីបានដកស្រង់សម្ដីរបស់អនុរដ្ឋមន្ត្រីការបរទេសរុស្ស៊ីលោក Andrey Rudenko ដែលបាននិយាយថា រដ្ឋាភិបាលរុស្ស៊ីត្រៀមលក្ខណៈរួចរាល់ហើយនៅក្នុងការផ្ដល់ច្រករបៀងមនុស្សធម៌សម្រាប់កប៉ាល់ដឹកស្បៀងអាហារនានាចាកចេញពីប្រទេសអ៊ុយក្រែនជាថ្នូរនឹងការដកចេញនូវទណ្ឌកម្មមួយចំនួន។ នេះបើយោងតាមទីភ្នាក់ងារព័ត៌មាន Reuters។
ទីភ្នាក់ងារព័ត៌មាន TASS របស់រុស្ស៊ីបានរាយការណ៍ថា មន្ត្រីម្នាក់ដែលគាំទ្រដោយរុស្ស៊ីនៅឯកំពង់ផែក្រុង Mariupol ដែលរុស្ស៊ីកំពុងកាន់កាប់នៅក្នុងប្រទេសអ៊ុយក្រែន បាននិយាយនៅថ្ងៃពុធនេះថា កប៉ាល់ដំបូងបង្អស់ចាប់តាំងពីពេលដែលកងកម្លាំងដែលមានទំនោរទៅរករុស្ស៊ីបានដណ្ដើមកាន់កាប់ទាំងស្រុងនូវទីក្រុង Mariupol មក នឹងចាកចេញពីកំពង់ផែនៃទីក្រុងនេះនៅក្នុងរយៈពេលប៉ុន្មានថ្ងៃខាងមុខ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy និយាយនៅថ្ងៃពុធថា លោកស្វាគមន៍ការចរចាជាមួយនឹងប្រទេសរុស្ស៊ី ប៉ុន្តែគឺស្វាគមន៍តែការចរចាដោយផ្ទាល់ជាមួយនឹងប្រធានាធិបតីរុស្ស៊ីលោក Vladimir Putin តែប៉ុណ្ណោះ។ នៅក្នុងការថ្លែងតាមវីដេអូអនឡាញទៅកាន់អង្គការវេទិកាសេដ្ឋកិច្ចពិភពលោក លោក Zelenskyy បានបញ្ជាក់ថា មានសក្ដានុពលសម្រាប់ការស្វែងរកដំណោះស្រាយការទូតសម្រាប់សង្គ្រាមនេះ ប្រសិនបើលោក Putin «យល់អំពីតថភាព»។ លោក Zelenskyy បានបន្ថែមថា ជំហានដំបូងឆ្ពោះទៅកាន់ការចរចាជាមួយនឹងប្រទេសរុស្ស៊ីគឺកងទ័ពរុស្ស៊ីត្រូវតែដកចេញទៅកាន់ទីតាំងដើមវិញមុនពេលរុស្ស៊ីបានចាប់ផ្ដើមការឈ្លានពានរបស់ខ្លួនលើអ៊ុយក្រែនកាលពីថ្ងៃទី ២៤ ខែកុម្ភៈ។
នាយករដ្ឋមន្ត្រីអេស្តូនីអ្នកស្រី Kaja Kallas បាននិយាយនៅថ្ងៃពុធថា ប្រទេសអ៊ុយក្រែនត្រូវតែអាចចរចាជាមួយនឹងរុស្ស៊ីនៅក្នុងគោលជំហរនៃភាពរឹងមាំដើម្បីកុំឱ្យរដ្ឋាភិ បាលរុស្ស៊ីមានទឹកចិត្តចាត់វិធានការបែបគឃ្លើនបន្ថែមទៀត។ អ្នកស្រី Kallas បានថ្លែងនៅក្នុងសុន្ទរកថាមួយនៅក្នុងទីក្រុងស្តុកខុល ប្រទេសស៊ុយអែតថា៖ «យើងត្រូវ តែចៀសវាងពីសន្តិភាពមិនល្អ។ សន្តិភាពដែលចរចាមិនល្អសម្រាប់ប្រទេសអ៊ុយក្រែនគឺជាសន្តិភាពមិនល្អសម្រាប់យើងទាំងអស់គ្នា»។ នេះបើយោងតាមទីភ្នាក់ងារព័ត៌មាន Reuters។

នាយករដ្ឋមន្ត្រីអេស្ដូនី អ្នកស្រី Kaja Kallas (ឆ្វេង) និងនាយករដ្ឋមន្ត្រីស៊ុយអែត អ្នកស្រី Magdalena Andersson ធ្វើសន្និសីទសារព័ត៌មានរួមគ្នានៅទីក្រុងស្ដុកខុល ប្រទេសស៊ុយអែត ថ្ងៃទី ២៥ ខែឧសភា ឆ្នាំ២០២២។ (TT News Agency/Fredrik Sandberg via REUTERS)

ប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Charles Michel បានបង្ហាញនូវទំនុកចិត្តនៅថ្ងៃពុធថា សហភាពអឺរ៉ុបនឹងអាចសម្រេចបានកិច្ចព្រមព្រៀងលើការហាមឃាត់ការនាំចូលប្រេងឥន្ធនៈពីរុស្ស៊ីមុនពេលកិច្ចប្រជុំរបស់ក្រុមប្រឹក្សាអឺរ៉ុបចូលមកដល់នៅសប្ដាហ៍ក្រោយ បើទោះបីជាមានការជំទាស់ពីប្រទេសហុងគ្រីក៏ដោយ។ លោក Michel បាននិយាយនៅក្នុងអំឡុងពេលសន្និសីទកាសែតរួមគ្នាមួយជាមួយនឹងនាយករដ្ឋមន្ត្រីស៊ុយអែតអ្នកស្រី Magdalena Andersson ក្នុងទីក្រុងស្តុកខុល ប្រទេសស៊ុយអែតថា៖ «ខ្ញុំនៅតែមានទំនុកចិត្តថា យើងអាចដោះស្រាយរឿងនេះមុនពេលកិច្ចប្រជុំរបស់ក្រុមប្រឹក្សាអឺរ៉ុប» ចូលមកដល់នៅក្នុងទីក្រុងព្រុចសែល ប្រទេសបែលហ្ស៊ិកនៅថ្ងៃចន្ទនិងថ្ងៃអង្គារសប្ដាហ៍ក្រោយ។ នេះបើយោងតាមទីភ្នាក់ងារព័ត៌មាន AFP។
លោក Mykhailo Podolyak ទីប្រឹក្សារបស់ប្រធានាធិបតីអ៊ុយក្រែនបានជំរុញរដ្ឋាភិបាលបរទេសនានាឱ្យចាត់វិធានការដើម្បីដាក់សម្ពាធលើរុស្ស៊ីឱ្យបញ្ចប់សង្គ្រាមរបស់ខ្លួននៅក្នុងប្រទេសអ៊ុយក្រែន។ លោក Podolyak បានបញ្ជាក់នៅលើ Twitter នៅថ្ងៃពុធថា៖ «រយៈពេលនៃសង្គ្រាមនេះគឺអាស្រ័យលើល្បឿននៃការដាក់ទណ្ឌកម្មលើថាមពលរបស់រុស្ស៊ីនិងលើការផ្គត់ផ្គង់សព្វាវុធដល់អ៊ុយក្រែន»។
នាយករដ្ឋមន្ត្រីស៊ុយអែតអ្នកស្រី Magdalena Andersson បាននិយាយនៅថ្ងៃពុធថា ប្រទេសស៊ុយអែតមិនបានផ្ដល់ថវិកាឬក៏ផ្ដល់អាវុធដល់អង្គការភេរវកម្មណាមួយទេ ដោយអ្នកស្រីបានជំទាស់ទៅនឹងការអះអាងរបស់ប្រទេសតួកគីដែលថា ស៊ុយអែតគាំទ្រក្រុមសកម្មប្រយុទ្ធ Kurd។ អ្នកស្រីបានបញ្ជាក់នៅក្នុងសន្និសីទកាសែតមួយក្នុងទីក្រុងស្ដុកខុល ប្រទេសស៊ុយអែតថា៖ «ជាការពិត យើងមិនបានបញ្ជូនថវិកាឬក៏សព្វា វុធណាមួយទៅឱ្យអង្គការភេរវកម្មណាមួយនោះទេ»។ នេះបើយោងតាមទីភ្នាក់ងារព័ត៌មាន AFP។
ក្រសួងការពារជាតិប្រទេសលីទុយអានីបានបញ្ជាក់នៅថ្ងៃពុធថា ខ្លួននឹងបញ្ជូនរថពាសដែកប្រភេទM113 ចំនួន២០គ្រឿង រថយន្តដឹកកងទ័ព និងរថយន្តដោះមីនទៅឱ្យប្រទេសអ៊ុយក្រែន។ ទីភ្នាក់ងារព័ត៌មាន Reuters បានរាយការណ៍ដោយយោងលើសេចក្ដីថ្លែងការណ៍របស់រដ្ឋមន្ត្រីការពារជាតិលីទុយអានីលោក Arvydas Anusauskas ដែលបានបញ្ជាក់ថា៖ «ការជួយជ្រោមជ្រែងដែលមានការសម្របសម្រួលរបស់យើងនិងសម្ព័ន្ធមិត្តគឺជាកត្តាសម្រេចសម្រាប់ជ័យជម្នះរបស់ប្រទេសអ៊ុយក្រែន»។
រដ្ឋសភារុស្ស៊ីបានអនុម័តលើច្បាប់មួយនៅថ្ងៃពុធដែលដកចេញនូវអាយុកំណត់សម្រាប់ការចូលបម្រើកងទ័ពដែលមានកិច្ចសន្យានៅក្នុងវិស័យយោធារបស់ប្រទេសរុស្ស៊ី។ នៅពេលបច្ចុប្បន្ននេះ មានតែពលរដ្ឋរុស្ស៊ីដែលមានអាយុពី ១៨ ដល់ ៤០ ឆ្នាំ និងជនបរទេសដែលមានអាយុពី ១៨ ដល់ ៣០ ឆ្នាំតែប៉ុណ្ណោះដែលអាចចុះឈ្មោះជាទាហានអាជីពបាននៅក្នុងជួរកងទ័ពរុស្ស៊ី។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ ប្រធានាធិបតីរុស្ស៊ី លោក Vladimir Putin ចូលរួមក្នុងពិធីបំពាក់កម្រងផ្កាមួយនៅ Tomb of the Unknown Soldier ក្នុងទីក្រុងមូស្គូ ប្រទេសរុស្ស៊ី ថ្ងៃទី ៩ ខែឧសភា ឆ្នាំ២០២២។ (Sputnik, Kremlin Pool Photo via AP)

ប្រធានាធិបតីរុស្ស៊ីលោក Vladimir Putin បានចុះហត្ថលេខាលើអនុក្រឹត្យមួយនៅថ្ងៃពុធ ដោយធ្វើឱ្យដំណើរការមានភាពងាយស្រួលសម្រាប់ពលរដ្ឋនៃតំបន់ Kherson និងតំបន់ Zaporizhzhia ដែលកាន់កាប់ដោយរុស្ស៊ីនៅក្នុងប្រទេសអ៊ុយក្រែន ទទួលបានសញ្ជាតិនិងលិខិតឆ្លងដែនរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
អនុរដ្ឋមន្ត្រីការបរទេសរុស្ស៊ីលោក Andrey Rudenko បាននិយាយនៅថ្ងៃពុធថា ទណ្ឌកម្មអន្តរជាតិដែលដាក់លើរុស្ស៊ីទាក់ទិននឹងយុទ្ធនាការយោធារបស់រុស្ស៊ីនៅអ៊ុយក្រែនចាំបាច់ត្រូវតែដកចេញដើម្បីចៀសវាងកុំឱ្យមានវិបត្តិស្បៀងអាហារនៅលើពិភពលោកកើតឡើងបាន។ លោក Rudenko បានលើកឡើងដូច្នេះថា៖ «ការដោះស្រាយបញ្ហាស្បៀងអាហារតម្រូវឱ្យមានមធ្យោបាយទូលំទូលាយមួយ ដែលក្នុងនោះរួមមានទាំងការដកចេញទណ្ឌកម្មដែលបានដាក់លើការនាំចេញរបស់រុស្ស៊ីនិងលើប្រតិបត្តិការទូទាត់ហិរញ្ញវត្ថុផងដែរ»។ នេះបើយោងតាមទីភ្នាក់ងារព័ត៌មាន AFP។
អនុរដ្ឋមន្ត្រីការបរទេសរុស្ស៊ីលោក Andrey Rudenko បាននិយាយនៅថ្ងៃពុធថា ប្រទេសរុស្ស៊ីត្រៀមលក្ខណៈរួចរាល់ហើយនៅក្នុងការផ្ដល់ច្រករបៀងមនុស្សធម៌សម្រាប់កប៉ាល់ដឹកស្បៀងអាហារនានាចាកចេញពីប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ដែលយោងលើទីភ្នាក់ងារព័ត៌ មានInterfax របស់រុស្ស៊ី។
ក្រសួងការពារជាតិរុស្ស៊ីបានបញ្ជាក់នៅថ្ងៃពុធថា កំពង់ផែនៅក្នុងទីក្រុង Mariupol ប្រទេសអ៊ុយក្រែនកំពុងដំណើរការធម្មតា។ ទីក្រុង Mariupol គឺជាទីក្រុងដែលរុស្ស៊ីទើបដណ្ដើមត្រួតត្រាបានកាលពីពេលថ្មីៗនេះ។ ក្រសួងការពារជាតិរុស្ស៊ីបានបន្ថែមថា រដ្ឋា ភិបាលរុស្ស៊ីកំពុងទាក់ទងជាមួយនឹងអង្គការសហប្រជាជាតិ និងថា រដ្ឋាភិបាលរុស្ស៊ី «មិនបានដកចេញនូវលទ្ធភាពនៃការពិភាក្សាជាសាកលដើម្បីបញ្ឈប់ការរាំងខ្ទប់កំពង់ ផែនានារបស់អ៊ុយក្រែននោះទេ»។ នេះបើយោងតាមទីភ្នាក់ងារព័ត៌មាន Reuters។

២២:៣១ ២៤.៥.២០២២

ថ្ងៃអង្គារ ទី ២៤ ខែឧសភា៖

រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយជាមួយនឹងរដ្ឋមន្ត្រីការបរទេសអ៊ុយក្រែនលោក Dmytro Kuleba នៅថ្ងៃអង្គារនេះ និងបានពិភាក្សាអំពីកិច្ចប្រឹងប្រែងការទូតជាបន្តដើម្បីដោះស្រាយផលវិបាកនៃសង្គ្រាមរបស់រុស្ស៊ីនៅអ៊ុយក្រែន និង «ដើម្បីធ្វើឱ្យរដ្ឋាភិបាលរុស្ស៊ីទទួលខុសត្រូវចំពោះទង្វើរបស់ខ្លួន»។ នេះបើយោងតាមការបញ្ជាក់របស់អ្នកនាំពាក្យក្រសួងការបរទេសអាមេរិកលោក Ned Price នៅក្នុងសេចក្ដីថ្លែងការណ៍មួយ។ លោក Price បានលើកឡើងបន្តថា៖ «លោករដ្ឋមន្ត្រី [Blinken] បានកត់សម្គាល់ឃើញថា វិបត្តិសន្តិសុខស្បៀងអាហារនៅលើពិភពលោកដែលបណ្ដាលមកពីសង្គ្រាមដ៏ឃោរឃៅរបស់ប្រធានាធិបតី [រុស្ស៊ីលោក Vladimir] Putin តម្រូវឱ្យមានការឆ្លើយតបជាសាកល ហើយពួកគេ [លោក Blinken និងលោក Kuleba] បានពិភាក្សាអំពីមធ្យោបាយដែលអាចទៅរួចនៅក្នុងការនាំចេញធញ្ញជាតិរបស់អ៊ុយក្រែនទៅកាន់ទីផ្សារអន្តរជាតិ»។ លោក Price បានបន្ថែមថា ពួកគេក៏បានពិភាក្សាផងដែរអំពីច្បាប់បម្រុងទុកថវិកាបន្ថែមចំនួន ៤០,១០០ លានដុល្លារ ដែលប្រធានាធិបតីអាមេរិកលោក Joe Biden បានចុះហត្ថលេខាកាលពីថ្ងៃទី ២១ ខែឧសភា «ដែលច្បាប់នេះនឹងផ្ដល់ថវិកាបន្ថែមសម្រាប់ជំនួយផ្នែកសន្តិសុខ សេដ្ឋកិច្ច និងមនុស្សធម៌ទៅឱ្យប្រទេសអ៊ុយក្រែននិងប្រទេសផ្សេងទៀតដែលរងផលប៉ះពាល់ដោយសារសង្គ្រាមនេះ»។

រូបឯកសារ៖ រដ្ឋមន្ត្រីការបរទេសសហរដ្ឋអាមេរិក លោក Antony Blinken (ឆ្វេង) និងរដ្ឋមន្ត្រីការបរទេសអ៊ុយក្រែន លោក Dmytro Kuleba ថ្លែងសុន្ទរកថារួមគ្នា នៅទីស្នាក់ការអង្គការអូតង់ ក្នុងទីក្រុងព្រុចសែល ប្រទេសប៊ែលហ្សិក ថ្ងៃទី ៧ ខែមេសា ឆ្នាំ២០២២។ (REUTERS)

រដ្ឋាភិបាលឥណ្ឌាបានបញ្ជាក់នៅថ្ងៃអង្គារនេះថា មេដឹកនាំនៃប្រទេសសមាជិកផ្សេងទៀតនៃក្រុមប្រទេស Quad បានយល់អំពីគោលជំហររបស់ឥណ្ឌាចំពោះសង្គ្រាមរបស់រុស្ស៊ីនៅអ៊ុយក្រែន នៅពេលមេដឹកនាំទាំងនោះបានជួបពិភាក្សាគ្នានៅក្នុងទីក្រុងតូក្យូ ប្រទេសជប៉ុន។ រដ្ឋមន្ត្រីការបរទេសឥណ្ឌាលោក Vinay Mohan Kwatra បានប្រាប់អ្នកសារព័ត៌មាននៅក្នុងទីក្រុងតូក្យូថា៖ «យើងឃើញមានការទទួលយកបានជាទូទៅចំពោះគោលជំហររបស់ឥណ្ឌាទាក់ទិននឹងរឿងអ៊ុយក្រែន»។ លោកបាននិយាយថា ឥណ្ឌាចង់ឱ្យមានការបញ្ចប់អរិភាពនេះឱ្យបានឆាប់និងចង់ឱ្យមានវិធីបែបការទូតនិងការចរចាដើម្បីដោះស្រាយវិបត្តិនេះ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសថ្មីនៃប្រទេសបារាំងលោកស្រី Catherine Colonna បាននិយាយនៅថ្ងៃអង្គារនេះថា កញ្ចប់ទណ្ឌកម្មថ្មីរបស់សហភាពអឺរ៉ុបដែលនឹងឈានទៅដល់ការបញ្ចប់ការនាំចូលប្រេងឥន្ធនៈពីរុស្ស៊ីទៅកាន់ទ្វីបអឺរ៉ុបចាំបាច់ត្រូវតែកើតឡើងឱ្យបានឆាប់ ហើយលោកស្រីមានទំនុកចិត្តថាភាពស្ទាក់ស្ទើរណាមួយនឹងត្រូវបានដកចេញ។ លោកស្រី Colonna បានបញ្ជាក់នៅក្នុងសន្និសីទកាសែតមួយអមជាមួយនឹងរដ្ឋមន្ត្រីការបរទេសអាល្លឺម៉ង់លោកស្រី Annalena Baerbock នៅក្នុងទីក្រុងប៊ែរឡាំង ប្រទេសអាល្លឺម៉ង់ថា៖ «យើងត្រូវតែអនុម័តឱ្យបានឆាប់តាមដែលអាចធ្វើទៅបាននូវកញ្ចប់ទណ្ឌកម្មលើកទី ៦ ដែលនឹងរំពឹងទុកនូវការបញ្ចប់ជាលំដាប់ទៅមុខនូវការនាំចូលប្រេងឥន្ធនៈពីរុស្ស៊ី និងដកចេញនូវភាពស្ទាក់ស្ទើរដែលនៅសេសសល់។ យើងសង្ឃឹមថានឹងធ្វើវាឱ្យបានឆាប់ ហើយខ្ញុំមានសុទិដ្ឋិនិយមចំពោះរឿងនេះ»។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីហុងគ្រីលោក Viktor Orban បានសរសេរលិខិតមួយច្បាប់ទៅកាន់ប្រធានក្រុមប្រឹក្សាអឺរ៉ុបនៃសហភាពអឺរ៉ុបថា សំណើទណ្ឌកម្មថ្មីរបស់សហភាពអឺរ៉ុបដែលរួមបញ្ចូលទាំងការហាមឃាត់ការនាំចូលប្រេងឥន្ធនៈពីរុស្ស៊ីផងនោះ មិនគួរលើកយកមកពិភាក្សានៅក្នុងកិច្ចប្រជុំរបស់បណ្ដាមេដឹកនាំសហភាពអឺរ៉ុបនៅសប្ដាហ៍ក្រោយនេះទេ។ នៅក្នុងលិខិតចុះថ្ងៃទី ២៣ ខែឧសភាដែលទីភ្នាក់ងារព័ត៌មាន Reuters ទើបទទួលបាន លោក Orban បានបញ្ជាក់ថា វាទំនងជាទៅមិនរូចនោះទេដែលគេអាចរកដំណោះស្រាយបានចំពោះរឿងនេះនៅសប្ដាហ៍ក្រោយ និងថាប្រទេសហុងគ្រីមិនទាន់មានជំហរគាំទ្រចំពោះសំណើទណ្ឌកម្មរបស់សហភាពអឺរ៉ុបនេះនៅឡើយទេរហូតទាល់តែបញ្ហានៅសេសសល់ទាំងឡាយត្រូវបានដោះស្រាយ។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីហុងគ្រីលោក Viktor Orban បានបញ្ជាក់នៅក្នុងវីដេអូមួយតាម Facebook នៅថ្ងៃអង្គារនេះថា រដ្ឋាភិបាលហុងគ្រីបានប្រកាសដាក់ប្រទេសនៅក្នុងស្ថានភាពអាសន្នចាប់ពីថ្ងៃពុធស្អែកតទៅ ដោយសារតែសង្គ្រាមនៅក្នុងប្រទេសអ៊ុយក្រែន។ លោក Orban បានបន្ថែមថា គណៈរដ្ឋមន្ត្រីរបស់លោកត្រូវការពេលដើម្បីត្រៀមលក្ខណៈនៅក្នុងការឆ្លើយតបទៅនឹងការប្រឈមនានាឱ្យបានលឿន។ ការប្រកាសដាក់ប្រទេសទៅក្នុងភាពអាសន្ននេះផ្ដល់អំណាចដល់រដ្ឋាភិបាលរបស់លោក Orban នៅក្នុងការអនុម័តវិធានការណាមួយបានលឿនតាមរយៈការចេញអនុក្រឹត្យ។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ នាយករដ្ឋមន្ត្រី ហុង គ្រី លោក Viktor Orban ទទួលស្វាគមន៍ក្រុមអ្នកគាំទ្រលោក ក្នុងអំឡុងពេលនៃការបោះឆ្នោតនៅទីក្រុង Budapest ប្រទេសហុងគ្រី ថ្ងៃទី ៣ ខែមេសា ឆ្នាំ២០២២។ (AP)

មេដឹកនាំនៃគណបក្សជាតិនិយមតួកគីដែលមានសម្ព័ន្ធភាពជាមួយនឹងប្រធានាធិបតីតួកគីលោក Recep Tayyip Erdogan បាននិយាយនៅថ្ងៃអង្គារនេះថា ប្រទេសតួកគីគួរតែពិចារណាចាកចេញពីអង្គការអូតង់ (NATO) ប្រសិនបើ «ស្ថានការណ៍មិនអាចដោះស្រាយបាន» ហើយប្រសិនបើប្រទេសតួកគីត្រូវបានបង្ខំឱ្យយល់ព្រមចំពោះសមាជិកភាពរបស់ប្រទេសស៊ុយអែតនិងប្រទេសហ្វាំងឡង់នៅក្នុងអង្គការអូតង់។ នេះបើយោងតាមទីភ្នាក់ងារព័ត៌មាន Associated Press។
ទីភ្នាក់ងារព័ត៌មាន Interfax របស់រុស្ស៊ីបានរាយការណ៍ថា មេដឹកនាំនៃសាធារណរដ្ឋប្រជាមានិត Donetsk ដែលជាតំបន់ផ្ដាច់ខ្លួននៅភាគខាងកើតប្រទេសអ៊ុយក្រែន បាននិយាយនៅថ្ងៃអង្គារនេះថា អ្នកតំណាងបរទេស ដែលក្នុងនោះមានទាំងអ្នកតំណាងមកពីបស្ចិមប្រទេសផងដែរ នឹងត្រូវអញ្ជើញឱ្យចូលរួមនៅក្នុងសវនាការកាត់ទោសយុទ្ធជនអ៊ុយក្រែននៅទីនោះ។ នេះបើយោងតាមទីភ្នាក់ងារព័ត៌មាន Reuters។
មន្ត្រីមួយរូបដែលតែងតាំងដោយរុស្ស៊ីនៅក្នុងតំបន់ Kherson ប្រទេសអ៊ុយក្រែន បាននិយាយថា រដ្ឋបាលដែលមានទំនោរទៅរករុស្ស៊ីនៅក្នុងតំបន់ Kherson នឹងស្នើរដ្ឋាភិបាលរុស្ស៊ីឱ្យបង្កើតមូលដ្ឋានយោធាមួយនៅទីនោះ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ ទីភ្នាក់ងារព័ត៌មាន RIA Novosti របស់រុស្ស៊ីបានដកស្រង់នៅថ្ងៃអង្គារនេះនូវសម្ដីរបស់លោក Kirill Stremousov អនុប្រធានរដ្ឋបាលដែលតែងតាំងដោយរុស្ស៊ីនៅក្នុងតំបន់ Kherson ដែលបាននិយាយថា៖ «មូលដ្ឋានយោធារបស់រុស្ស៊ីគួរតែមាននៅក្នុងតំបន់ Kherson»។
អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅថ្ងៃអង្គារថា ប្រទេសរុស្ស៊ីមិនទាន់ទទួលបានគម្រោងសន្តិភាពរបស់ប្រទេសអ៊ីតាលីសម្រាប់សង្គ្រាមនៅអ៊ុយក្រែននៅឡើយទេ ប៉ុន្តែលោកថា រដ្ឋាភិបាលរុស្ស៊ីសង្ឃឹមថានឹងទទួលបានគម្រោងសន្តិភាពនេះតាមច្រកការទូត។ លោក Peskov បានបញ្ជាក់ដូច្នេះថា៖ «យើងមិនទាន់បានឃើញគម្រោងនេះនៅឡើយទេ។ យើងសង្ឃឹមថាគេនឹងបញ្ជូនគម្រោងនេះមកឱ្យយើងតាមច្រកការទូត ហើយយើងនឹងស្វែងយល់អំពីគម្រោងនេះ»។ នេះបើយោងតាមទីភ្នាក់ងារព័ត៌មាន Reuters។
ប្រធានគណៈកម្មការអឺរ៉ុបនៃសហភាពអឺរ៉ុបអ្នកស្រី Ursula von der Leyen បានប្រាប់មេដឹកនាំអាជីវកម្មនានាមកពីជុំវិញពិភពលោកនៅក្នុងទីក្រុង Davos ប្រទេសស្វីសនៅថ្ងៃអង្គារថា រដ្ឋាភិបាលអ៊ុយក្រែនត្រូវតែឈ្នះសង្គ្រាមប្រឆាំងនឹងរុស្ស៊ីនេះ។ អ្នកស្រីបានបញ្ជាក់ដូច្នេះថា៖ «អ៊ុយក្រែនត្រូវតែឈ្នះសង្គ្រាមនេះ ហើយភាពគឃ្លើនរបស់លោក Putin ត្រូវតែជាការបរាជ័យផ្នែកយុទ្ធសាស្ត្រ»។ នេះបើយោងតាមទីភ្នាក់ងារព័ត៌មាន Reuters។

ប្រធានគណៈកម្មការអឺរ៉ុបនៃសហភាពអឺរ៉ុបអ្នកស្រី Ursula von der Leyen កំពុងផ្ដល់បទសម្ភាសន៍ដល់ទីភ្នាក់ងារព័ត៌មាន Reuters ក្នុងទីក្រុង Davos ប្រទេសស្វីស ថ្ងៃទី ២៤ ខែឧសភា ឆ្នាំ២០២២៕ (REUTERS)

ប្រធានាធិបតីសហរដ្ឋអាមេរិកលោក Joe Biden បានជួបជាមួយនឹងមេដឹកនាំនៃប្រទេសជប៉ុន ឥណ្ឌានិងអូស្ត្រាលីនៅថ្ងៃអង្គារហើយបាននិយាយថា សង្គ្រាមនៅក្នុងប្រទេសអ៊ុយក្រែនគឺ «លើសពីបញ្ហារបស់ទ្វីបអឺរ៉ុបទៅទៀត។ វាជាបញ្ហាសាកលលោក»។ ដោយយោងលើផលប៉ះពាល់ដ៏ទូលំទូលាយនៃសង្គ្រាមនេះ ដែលក្នុងនោះរួមមានទាំងផលប៉ះពាល់លើការផ្គត់ផ្គង់ស្បៀងអាហារនៅលើពិភពលោកផងដែរ លោក Biden បានសន្យាផ្ដល់ការគាំទ្ររបស់សហរដ្ឋអាមេរិកជាបន្តដោយបានបញ្ជាក់ថា៖ «ដរាបណារុស្ស៊ីនៅបន្តធ្វើសង្គ្រាម សហរដ្ឋអាមេរិកនឹងធ្វើការជាមួយនឹងដៃគូរបស់ខ្លួនដើម្បីជួយដល់ការឆ្លើយតបជាសាកល ដោយសារតែសង្គ្រាមនេះនឹងប៉ះពាល់គ្រប់ផ្នែកទាំងអស់នៃពិភពលោក»។
អនុរដ្ឋមន្ត្រីការពារជាតិសហរដ្ឋអាមេរិកអ្នកស្រី Kathleen Hicks បាននិយាយនៅថ្ងៃអង្គារថា សហរដ្ឋអាមេរិកមានទំនុកចិត្តថា ប្រទេសហ្វាំងឡង់និងប្រទេសស៊ុយអែតនឹងអាចដោះស្រាយក្ដីបារម្ភរបស់ប្រទេសតួកគីបានទាក់ទិននឹងរឿងសមាជិកភាពរបស់ពួកគេនៅក្នុងអង្គការអូតង់។ អ្នកស្រី Hicks លើកឡើងដូច្នេះថា៖ «យើងមានទំនុកចិត្តថា ប្រទេសហ្វាំងឡង់និងប្រទេសស៊ុយអែតនឹងអាចដោះស្រាយក្ដីបារម្ភទាំងនោះជាមួយនឹងប្រទេសតួកគីដោយផ្ទាល់»។ នេះបើយោងតាមទីភ្នាក់ងារព័ត៌មាន Reuters។
អធិការបតីអាល្លឺម៉ង់លោក Olaf Scholz បានបញ្ជាក់នៅក្នុងកិច្ចសម្ភាសន៍មួយជាមួយនឹងប្រព័ន្ធផ្សព្វផ្សាយ Deutsche Welle ថា សហភាពអឺរ៉ុបនិងសហរដ្ឋអាមេរិកកំពុងព្យាយាមបញ្ចុះបញ្ចូលបណ្ដាប្រទេសផលិតប្រេងឥន្ធនៈនិងឧស្ម័នឱ្យបង្កើនផលិតកម្មរបស់ខ្លួនដើម្បីជួយធ្វើឱ្យតម្លៃប្រេងឥន្ធនៈនៅលើពិភពលោកចុះថោក។ លោកនិយាយដូច្នេះថា៖ «ឥឡូវនេះយើងកំពុងពិភាក្សាជាមួយនឹងប្រទេសទាំងអស់ដែលកំពុងរុករកប្រេងឥន្ធនៈនិងឧស្ម័ន និងកំពុងព្យាយាមបញ្ចុះបញ្ចូលពួកគេឱ្យបង្កើនចំណុះ [ផលិតកម្ម] របស់ខ្លួន ដើម្បីជួយទីផ្សារពិភពលោក»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសអ៊ុយក្រែនលោក Dmytro Kuleba បានបញ្ជាក់នៅលើ Twitter នៅថ្ងៃអង្គារថា រុស្ស៊ីកំពុងលួចធញ្ញជាតិរបស់អ៊ុយក្រែននិងបានជំរុញពិភពលោកកុំឱ្យទិញអ្វីដែលរុស្ស៊ីបានលួច។

ប្រធានាធិបតីប៉ូឡូញលោក Andrzej Duda បាននិយាយនៅថ្ងៃអង្គារថា ប្រសិនបើសង្គ្រាមនៅអ៊ុយក្រែនបណ្ដាលឱ្យមានបញ្ហាកង្វះស្បៀងអាហារនៅតំបន់អាហ្វ្រិកខាងជើង នោះវានឹងបណ្ដាលឱ្យមានការធ្វើចំណាកស្រុកទ្រង់ទ្រាយធំទៅកាន់ទ្វីបអឺរ៉ុប។ លោក Duda បានថ្លែងប្រាប់គណៈកម្មាធិការមួយនៅក្នុងទីក្រុង Davos ប្រទេសស្វីសថា៖ «ប្រសិនបើមានគ្រោះអត់ឃ្លាននៅតំបន់អាហ្វ្រិកខាងលិច ទាំងប្រទេសអេស្ប៉ាញនិងទាំងទ្វីបអឺរ៉ុបទាំងមូលនឹងមានបញ្ហាចំណាកស្រុកដ៏ធំ។ ថ្ងៃនេះ យើងគួរផ្ដោតលើការធ្វើយ៉ាងណាឱ្យអ៊ុយក្រែនអាចនាំចេញធញ្ញជាតិរបស់ខ្លួនបាន»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីក្រសួងដឹកជញ្ជូនចក្រភពអង់គ្លេសលោក Grant Shapps បាននិយាយនៅថ្ងៃអង្គារថា ចក្រភពអង់គ្លេសកំពុងពិភាក្សាជាមួយនឹងប្រទេសអ៊ុយក្រែនអំពីការស្វែងរកវិធីនាំចេញធញ្ញជាតិពីប្រទេសអ៊ុយក្រែន បន្ទាប់ពីរុស្ស៊ីបានរាំងខ្ទប់កំពង់ផែសមុទ្រចម្បងៗរបស់អ៊ុយក្រែនមក។ លោកបញ្ជាក់ដូច្នេះថា៖ «យើងកំពុងសម្លឹងមើលលើជម្រើសផ្សេងៗទាំងអស់។ មានវិធីដែលអាចទៅរួចផ្សេងៗជាច្រើននៅក្នុងការនាំចេញធញ្ញជាតិនិងទំនិញផ្សេងទៀតចេញពីប្រទេសអ៊ុយក្រែន។ វាជាការសំខាន់បំផុតដែលយើងធ្វើ បើមិនដូច្នេះទេនឹងមានភាពអត់ឃ្លានជាច្រើនហើយនឹងអាចមានគ្រោះទុរ្ភិក្សទៀតផង»។ នេះបើយោងតាមទីភ្នាក់ងារព័ត៌មាន Reuters។
លោក Alexei Navalny មេដឹកនាំគណបក្សប្រឆាំងរបស់រុស្ស៊ីដែលកំពុងជាប់ពន្ធនាគារ នៅថ្ងៃអង្គារបានរិះគន់ខ្លាំងៗលើប្រធានាធិបតីរុស្ស៊ីលោក Vladimir Putin នៅក្នុងសវនាការមួយដែលមានការផ្សាយផ្ទាល់ ដោយបានហៅលោក Putin ថាជាមនុស្សឆ្កួតដែលបានចាប់ផ្ដើមធ្វើ «សង្គ្រាមលីលា» នៅក្នុងប្រទេសអ៊ុយក្រែនដោយផ្អែកលើការកុហក។ នេះបើយោងតាមទីភ្នាក់ងារព័ត៌មាន Reuters។

មេដឹកនាំគណបក្សប្រឆាំងនៅរុស្ស៊ី លោក Alexei Navalny កំពុងនៅក្នុងសវនាការកាត់ក្ដីលោក នៅទីក្រុងមូស្គូ ប្រទេសរុស្ស៊ី ថ្ងៃទី ២៤ ខែឧសភា ឆ្នាំ២០២២។ (REUTERS)

ប្រធានក្រុមប្រឹក្សាសន្តិសុខរបស់ប្រទេសរុស្ស៊ីលោក Nikolai Patrushev បាននិយាយនៅថ្ងៃអង្គារថា រុស្ស៊ីនឹងសម្រេចបាននូវគោលបំណងរបស់ខ្លួននៅក្នុងប្រទេសអ៊ុយក្រែន។ លោក Patrushev បានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត Argumenty i Fankty របស់រុស្ស៊ីថា៖ «គោលដៅទាំងអស់ដែលលោកប្រធានាធិបតី Vladimir Putinបានកំណត់នឹងត្រូវសម្រេចបាន។ វាមិនអាចផ្ទុយពីនេះបានទេ ដោយ សារតែសច្ចភាព ដែលក្នុងនោះរួមទាំងសច្ចភាពប្រវត្តិសាស្ត្រផងដែរ គឺនៅខាងយើង»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយបន្ទាប់ពីបញ្ចប់ការប្រជុំលើកទីពីររបស់ក្រុមទាក់ទងផ្នែកការពារអ៊ុយក្រែនថា ប្រទេសប្រហែល ២០ នឹងបញ្ជូនកញ្ចប់ជំនួយផ្នែកសន្តិសុខថ្មីឱ្យប្រទេសអ៊ុយក្រែន។ លោក Austin បានប្រាប់អ្នកសារព័ត៌មាននៅឯក្រសួងការពារជាតិអាមេរិកកាលពីថ្ងៃចន្ទថា៖ «ប្រទេសជាច្រើននឹងបរិច្ចាគគ្រាប់កាំភ្លើងធំដែលអ៊ុយក្រែនត្រូវការចាំបាច់ជាទីបំផុត ប្រព័ន្ធការពារតាមផ្លូវសមុទ្រ រថក្រោះ និងរថពាសដែកផ្សេងទៀត។ ប្រទេសផ្សេងទៀតបានស្ម័គ្រ ចិត្តដោយការតាំងចិត្តថ្មីនៅក្នុងការបណ្ដុះបណ្ដាលកងទ័ពអ៊ុយក្រែននិងទ្រទ្រង់ប្រព័ន្ធយោធារបស់អ៊ុយក្រែន»។
រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយកាលពីថ្ងៃចន្ទថា ប្រទេសរុស្ស៊ីនឹងពិចារណាអំពីសំណើណាមួយនៃការបង្កើតទំនាក់ទំនងឡើងវិញជាមួយនឹងក្រុមបស្ចិមប្រទេស ហើយនឹងគិតថាតើការបង្កើតទំនាក់ទំនងឡើងវិញនេះចាំបាច់ឬក៏អត់ ប៉ុន្តែនឹងផ្ដោតលើការអភិវឌ្ឍទំនាក់ទំនងជាមួយនឹងប្រទេសចិន។ លោក Lavrov បានបញ្ជាក់នៅក្នុងសុន្ទរកថាមួយដូច្នេះថា៖ «ប្រសិនបើក្រុមបស្ចិមប្រទេសចង់ស្នើអ្វីមួយទាក់ទិននឹងការចាប់ផ្ដើមឡើងវិញនូវទំនាក់ទំនង នោះយើងនឹងពិចារណាឱ្យបានម៉ឺងម៉ាត់ថាតើយើងនឹងត្រូវការចាប់ផ្ដើមឡើងវិញនូវទំនាក់ទំនងនេះឬក៏អត់»។ លោកបានបន្ថែមថា៖ «ឥឡូវនេះដោយសារតែក្រុមបស្ចិមប្រទេសប្រកាន់ «ជំហរបែបផ្ដាច់ ការ» ទំនាក់ទំនងសេដ្ឋកិច្ចរបស់យើងជាមួយនឹងប្រទេសចិននឹងរីកចម្រើនលឿនជាងនេះទៅទៀត»។ នេះបើយោងតាមទីភ្នាក់ងារព័ត៌មាន Reuters។

២២:០៦ ២៣.៥.២០២២

ថ្ងៃចន្ទ ទី ២៣ ខែឧសភា៖

ថ្នាក់ដឹកនាំគណបក្សប្រជាធិបតេយ្យនិងថ្នាក់ដឹកនាំគណបក្សសាធារណរដ្ឋនៃព្រឹទ្ធសភាសហរដ្ឋអាមេរិកបានស្នើនូវសេចក្ដីសម្រេចមួយនៅថ្ងៃចន្ទនេះដើម្បីគាំទ្រកិច្ចប្រឹងប្រែងរបស់ប្រទេសស៊ុយអែតនិងប្រទេសហ្វាំងឡង់នៅក្នុងការចូលជាសមាជិកអង្គការអូតង់ (NATO)។ លោក Mitch McConnell មេដឹកនាំគណបក្សសាធារណរដ្ឋនៃព្រឹទ្ធសភាអាមេរិក និងលោក Jim Risch សមាជិកកំពូលខាងគណបក្សសាធារណរដ្ឋនៃគណៈកម្មាធិការទំនាក់ទំនងបរទេសនៃព្រឹទ្ធសភាអាមេរិក បានចូលរួមជាមួយនឹងលោក Chuck Schumer មេដឹកនាំគណបក្សប្រជាធិបតេយ្យនៃព្រឹទ្ធសភាអាមេរិក និងលោក Bob Menendez ប្រធានគណៈកម្មាធិការទំនាក់ទំនងបរទេសនៃព្រឹទ្ធសភាអាមេរិកនិងសមាជិកព្រឹទ្ធសភាផ្សេងទៀតនៅក្នុងការស្នើសេចក្ដីសម្រេចនេះ។ លោក Menendez បានបញ្ជាក់នៅក្នុងសេចក្ដីថ្លែងការណ៍មួយថា៖ «យើងគាំទ្រទាំងស្រុងលើពាក្យសុំរបស់ពួកគេនៅក្នុងការចូលជាសមាជិកអង្គការអូតង់ និងទន្ទឹងរង់ចាំនូវការចូលជាសមាជិកនេះបានលឿននៅក្នុងរយៈពេលប៉ុន្មានខែខាងមុខ»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីតួកគីលោក Recep Tayyip Erdogan ដែលប្រទេសរបស់លោកបានជំទាស់ទៅនឹងកិច្ចប្រឹងប្រែងរបស់ប្រទេសស៊ុយអែតនិងប្រទេសហ្វាំងឡង់នៅក្នុងការចូលជាសមាជិកអង្គការអូតង់ (NATO) បានអំពាវនាវនៅថ្ងៃចន្ទនេះឱ្យរដ្ឋាភិបាលស៊ុយអែតចាត់ «វិធានការច្បាស់លាស់» ដែលនឹងកាត់បន្ថយក្ដីបារម្ភផ្នែកសន្តិសុខរបស់តួកគី។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ កន្លងមក ប្រទេសតួកគីបានបញ្ជាក់ថា ខ្លួនជំទាស់ទៅនឹងការចូលជាសមាជិករបស់ប្រទេសទាំងពីរនៅក្នុងអង្គការអូតង់ ដោយសារតែប្រទេសទាំងពីរគាំទ្រក្រុម Kurdistan Workers' Party (PKK) និងក្រុមផ្សេងទៀតដែលប្រទេសតួកគីចាត់ទុកថាជាក្រុមភេរវករ។

រូបឯកសារ៖ ប្រធានាធិបតីតួកគី លោក Recep Tayyip Erdogan ចូលរួមក្នុងពិធីមួយនៅវិមានប្រធានាធិបតីក្នុងទីក្រុងអង់ការ៉ា ប្រទេសតួកគី ថ្ងៃទី ១៦ ខែឧសភា ឆ្នាំ២០២២។ (AP)

ប្រទេសលីទុយអានី ស្លូវ៉ាគី ឡេតូនី និងអេស្ដូនីនឹងអំពាវនាវនៅថ្ងៃអង្គារស្អែកឱ្យមានការរឹបអូសទ្រព្យសម្បត្តិរបស់ប្រទេសរុស្ស៊ីដែលសហភាពអឺរ៉ុបបានបង្កក ដើម្បីផ្គត់ផ្គង់ដល់ការកសាងប្រទេសអ៊ុយក្រែនឡើងវិញនៅពេលណាដែលការឈ្លានពានរបស់រុស្ស៊ីបានបញ្ចប់។ នេះបើយោងតាមលិខិតរួមគ្នាមួយច្បាប់របស់ប្រទេសទាំង ៤ ដែលបានបង្ហាញឡើងនៅថ្ងៃចន្ទនេះ។
បណ្ដាញព័ត៌មាន BBC បានដកស្រង់សម្ដីរបស់ឧបនាយករដ្ឋមន្ត្រីទីមួយនៃប្រទេសអ៊ុយក្រែនអ្នកស្រី Yulia Svyrydenko ដែលបាននិយាយនៅថ្ងៃចន្ទនេះថា សហគមន៍អន្តរជាតិគួរតែជួយធានាធ្វើយ៉ាងណាឱ្យមានការឆ្លងកាត់ប្រកបដោយសុវត្ថិភាពនៅក្នុងច្រករបៀងមួយសម្រាប់កប៉ាល់នានាដែលដឹកស្បៀងអាហារចេញពីកំពង់ផែនៃទីក្រុង Odesa ដើម្បីជួយប្រទេសអ៊ុយក្រែននិងដើម្បីបញ្ចៀសមិនឱ្យមានគ្រោះទុរ្ភិក្សកើតឡើងនៅលើពិភពលោក។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីបេឡារុសលោក Alexander Lukashenko បាននិយាយនៅថ្ងៃចន្ទនេះថា លោកមានក្ដីបារម្ភអំពីអ្វីដែលលោកហៅថាជាវិធានការរបស់ក្រុមបស្ចិមប្រទេសនៅក្នុងការ «បំបែក» ប្រទេសអ៊ុយក្រែន និងបានចោទប្រកាន់ប្រទេសប៉ូឡូញថាបានស្វះស្វែងដណ្ដើមត្រួតត្រាផ្នែកភាគខាងលិចនៃប្រទេសអ៊ុយក្រែន។ លោកមិនបានផ្ដល់ភស្តុតាងណាមួយសម្រាប់ការអះអាងរបស់លោកទាំងនេះទេ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានជួបជាមួយនឹងរដ្ឋមន្ត្រីការបរទេសជប៉ុនលោក Hayashi Yoshimasa នៅក្នុងទីក្រុងតូក្យូ ប្រទេសជប៉ុននៅថ្ងៃចន្ទនេះ។ អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានបញ្ជាក់នៅក្នុងសេចក្ដីថ្លែងការណ៍មួយថា៖ «លោករដ្ឋមន្ត្រី [Blinken] និងរដ្ឋមន្ត្រីការបរទេស [ជប៉ុន] បានសរសើរសម្ព័ន្ធភាពរវាងសហរដ្ឋអាមេរិកនិងប្រទេសជប៉ុនថាជាមូលដ្ឋាននៃសន្តិភាព សន្តិសុខ និងវិបុលភាពនៅក្នុងតំបន់ឥណ្ឌូប៉ាស៊ីហ្វិក»។ លោក Price បានបន្ថែមថា៖ «លោកទាំងពីរបានបញ្ជាក់ជាថ្មីអំពីការគាំទ្រយ៉ាងមុតមាំរបស់ពួកគេចំពោះអធិបតេយ្យភាពនិងឯករាជ្យភាពរបស់ប្រទេសអ៊ុយក្រែន និងបានតាំងចិត្តនៅក្នុងការធ្វើឱ្យរដ្ឋាភិបាលរុស្ស៊ីទទួលខុសត្រូវចំពោះសង្គ្រាមនៃភាពគឃ្លើនរបស់ខ្លួននៅក្នុងប្រទេសអ៊ុយក្រែន»។
ប្រធានាធិបតីរុស្ស៊ីលោក Vladimir Putin បាននិយាយថា សេដ្ឋកិច្ចរបស់រុស្ស៊ីអាច «ទ្រាំទ្រ» នឹងការដាក់ទណ្ឌកម្មរបស់អន្តរជាតិបានយ៉ាងល្អ បើទោះបីជាវា «មិនងាយស្រួល» ក៏ដោយ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ លោក Putin នៅថ្ងៃចន្ទនេះបានទទួលជួបពិភាក្សាជាមួយនឹងប្រធានាធិបតីបេឡារុសលោក Alexander Lukashenko នៅរមណីយដ្ឋាន Sochi នៅសមុទ្រខ្មៅ។ លោក Putin ថ្លែងដូច្នេះថា៖ «សេដ្ឋកិច្ចរបស់រុស្ស៊ីអាចទ្រាំទ្រការដាក់ទណ្ឌកម្មបាន។ វាអាចទ្រាំទ្របានយ៉ាងប្រសើរបំផុត»។
រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ខ្លួនកំពុងសម្លឹងមើលលើសំណើគម្រោងសន្តិភាពរបស់ប្រទេសអ៊ីតាលីនៅក្នុងការបញ្ចប់សង្គ្រាមនៅអ៊ុយក្រែន។ អនុរដ្ឋមន្ត្រីការបរទេសរុស្ស៊ីលោក Andrey Rudenko បានប្រាប់អ្នកសារព័ត៌មានថា៖ «យើងបានទទួលសំណើនេះកាលពីពេលថ្មីៗនេះនិងកំពុងសិក្សាលើសំណើនេះ»។ លោកបានបដិ សេធមិនផ្ដល់ព័ត៌មានលំអិតណាមួយទេ។ នេះបើយោងតាមទីភ្នាក់ងារព័ត៌មាន AFP។
ទីភ្នាក់ងារព័ត៌មាន RIA របស់រុស្ស៊ីបានដកស្រង់សម្ដីរបស់អនុរដ្ឋមន្ត្រីការបរទេសរុស្ស៊ីលោក Andrey Rudenko ដែលបាននិយាយនៅថ្ងៃចន្ទថា ប្រទេសរុស្ស៊ីនឹងត្រៀមលក្ខណៈរួចរាល់នៅក្នុងការត្រឡប់ទៅរកការចរចាវិញជាមួយនឹងប្រទេសអ៊ុយក្រែន «ឱ្យបានឆាប់នៅពេលណាដែលរដ្ឋាភិបាលអ៊ុយក្រែនបង្ហាញនូវជំហរដែលមានប្រយោជន៍»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ ប្រធានាធិបតីរុស្ស៊ី លោក Vladimir Putin ចូលរួមនៅក្នុងកិច្ចប្រជុំកំពូល (CSTO) នៅវិមានក្រឹមឡាំង ក្នុងទីក្រុងមូស្គូ ប្រទេសរុស្ស៊ី ថ្ងៃទី ១៦ ខែឧសភា ឆ្នាំ២០២២។ (Sputnik/Sergei Guneev/Pool via REUTERS)

ប្រធានាធិបតីសហរដ្ឋអាមេរិកលោក Joe Biden បាននិយាយនៅថ្ងៃចន្ទថា ប្រធានាធិបតីរុស្ស៊ីលោក Vladimir Putin «ត្រូវតែទទួលរងនូវផលវិបាកធ្ងន់ធ្ងរសម្រាប់ភាពសាហាវយង់ឃ្នងរបស់ខ្លួននៅអ៊ុយក្រែន»។ នៅក្នុងការថ្លែងក្នុងអំឡុងពេលទស្សនកិច្ចទៅកាន់ប្រទេសជប៉ុន លោក Biden បានលើកឡើងអំពីសារៈសំខាន់នៃការបញ្ជូនសារដោយមានការដាក់ទណ្ឌកម្មរយៈពេលវែងសម្រាប់ប្រទេសរុស្ស៊ី។
អ្នកនាំពាក្យរបស់នាយករដ្ឋមន្ត្រីចក្រភពអង់គ្លេសបានបញ្ជាក់នៅថ្ងៃចន្ទថា លោកនាយករដ្ឋមន្ត្រី Boris Johnson បានឯកភាពជាមួយនឹងនាយករដ្ឋមន្ត្រីថ្មីរបស់ប្រទេសអូស្ត្រាលីលោក Anthony Albanese ថា សង្គ្រាមនៅអ៊ុយក្រែនមិនត្រូវលើកទឹកចិត្តប្រទេសផ្សេងទៀតឱ្យបំផ្លាញដល់ស្ថិរភាពរបស់ពិភពលោកនោះទេ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅថ្ងៃចន្ទថា មនុស្ស៨៧នាក់ត្រូវបានសម្លាប់នៅក្នុងការវាយប្រហាររបស់រុស្ស៊ីកាលពីដើមខែនេះលើមូលដ្ឋានយោធាមួយកន្លែងនៅក្នុងតំបន់មួយនៅភាគខាងជើងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ក្រុមបស្ចិមប្រទេសបានបង្កឱ្យមានវិបត្តិស្បៀងអាហារនៅលើពិភពលោកតាមរយៈការដាក់ទណ្ឌកម្មតឹងតែងបំផុតនៅក្នុងប្រវត្តិសាស្ត្រសម័យទំនើបនេះលើប្រទេសរុស្ស៊ីទាក់ទិននឹងរឿងសង្គ្រាមនៅអ៊ុយក្រែន។ រដ្ឋាភិបាលរុស្ស៊ីបានលើកឡើងថា ប្រធានាធិបតីរុស្ស៊ីលោក Vladimir Putin បានឯកភាពជាមួយនឹងការវាយតម្លៃរបស់អង្គការសហប្រជាជាតិដែលថា ពិភពលោកបានប្រឈមនឹងវិបត្តិស្បៀងអាហារដែលវិបត្តិនេះអាចនឹងបណ្ដាលឱ្យមានគ្រោះទុរ្ភិក្សកើតឡើង។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវនៅថ្ងៃចន្ទឱ្យមានការផ្ដល់សព្វាវុធបន្ថែមទៀតដល់ប្រទេសអ៊ុយក្រែន។ លោកអំពាវនាវដូច្នេះនៅក្នុងកិច្ចប្រជុំរបស់អង្គការវេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីស។ លោក Zelenskyy បានថ្លែងសុន្ទរកថាតាមអនឡាញទៅកាន់វេទិកាសេដ្ឋកិច្ចពិភព លោកថា កន្លងមក ជីវិតមនុស្សរាប់ម៉ឺននាក់អាចត្រូវបានជួយសង្គ្រោះ ប្រសិនបើអ៊ុយ ក្រែនបានទទួល «១០០% នូវអ្វីដែលយើងត្រូវការក្នុងពេលតែមួយកាលពីខែកុម្ភៈ» នៅពេលដែលរុស្ស៊ីបានឈ្លានពានអ៊ុយក្រែន។ លោកបានបន្ថែមថា៖ «ហេតុដូច្នេះហើយបានជាអ៊ុយក្រែនត្រូវការសព្វាវុធទាំងអស់ដែលយើងស្នើ មិនមែនគ្រាន់តែសព្វាវុធដែលត្រូវបានផ្ដល់ឱ្យប៉ុណ្ណោះទេ»។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ ទាហានអ៊ុយក្រែនម្នាក់ឈរមើលរថពាសដែកមួយគ្រឿងនៅតាមផ្លូវក្នុងទីក្រុង Kharkiv ប្រទេសអ៊ុយក្រែន ថ្ងៃទី ១៧ ខែឧសភា ឆ្នាំ២០២២ ក្នុងអំឡុងពេលដែលរុស្ស៊ីឈ្លានពានអ៊ុយក្រែន។ (AFP)

ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃចន្ទបានថ្លែងប្រាប់កិច្ចប្រជុំរបស់បណ្ដាមេដឹកនាំអាជីវកម្មនៅលើពិភពលោកនៅក្នុងទីក្រុង Davos ប្រទេសស្វីសថា ពិភពលោកបានប្រឈមនឹងចំណុចរបត់មួយនិងត្រូវតែបង្កើនការដាក់ទណ្ឌ កម្មប្រឆាំងនឹងរុស្ស៊ី។ លោក Zelenskyy បានថ្លែងនៅក្នុងសុន្ទរកថាមួយថា៖ «ប្រវត្តិ សាស្ត្រកំពុងស្ថិតនៅចំណុចរបត់។ ...នេះគឺពិតជាពេលវេលាដែលត្រូវសម្រេចថាតើកម្លាំងតិរច្ឆាននឹងត្រួតត្រាពិភពលោកឬក៏យ៉ាងណានោះ»។ នេះបើយោងតាមទីភ្នាក់ ងារព័ត៌មាន Reuters។
រដ្ឋមន្ត្រីសេដ្ឋកិច្ចអាល្លឺម៉ង់លោក Robert Habeck បានព្រមានប្រទេសហុងគ្រីមិនឱ្យរារាំងកិច្ចប្រឹងប្រែងរបស់សហភាពអឺរ៉ុបនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ីដើម្បីឆ្លើយតបទៅនឹងសង្គ្រាមរបស់រុស្ស៊ីនៅក្នុងប្រទេសអ៊ុយក្រែន។ លោក Habeck បានបញ្ជាក់នៅក្នុងកិច្ចប្រជុំរបស់អង្គការវេទិកាសេដ្ឋកិច្ចពិភពលោកនៅក្នុងទីក្រុង Davos ប្រទេសស្វីសនៅថ្ងៃចន្ទថា៖ «ប្រទេសផ្សេងៗមានដំណោះស្រាយខុស ៗគ្នា»។ លោកបានបន្ថែមថា៖ «ខ្ញុំរំពឹងថា ប្រទេសនីមួយៗ ដែលក្នុងនោះរួមទាំងប្រ ទេសហុងគ្រីផងដែរនឹងធ្វើការដើម្បីរកដំណោះស្រាយ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីផ្នែកអាកាសធាតុរបស់ប្រទេសប៉ូឡូញអ្នកស្រី Anna Moskwa បានបញ្ជាក់នៅលើ Twitter នៅថ្ងៃចន្ទថា ប្រទេសប៉ូឡូញបានសម្រេចបញ្ចប់កិច្ចព្រមព្រៀងអន្តររដ្ឋាភិ បាលមួយជាមួយនឹងប្រទេសរុស្ស៊ីទាក់ទិននឹងបំពង់ឧស្ម័ន Yamal។ អ្នកស្រី Moskwa បានលើកឡើងដូច្នេះថា៖ «ភាពគឃ្លើនរបស់រុស្ស៊ីលើអ៊ុយក្រែនបានធ្វើឱ្យរដ្ឋាភិបាលប៉ូឡូញតាំងចិត្តជាក់ច្បាស់ថានឹងត្រូវតែមានភាពឯករាជ្យទាំងស្រុងពីឧស្ម័នរបស់រុស្ស៊ី។ យើងតែងតែដឹងថា ក្រុមហ៊ុន Gazprom [ក្រុមហ៊ុនឧស្ម័នរបស់រុស្ស៊ី] មិនមែនជាដៃគូដ៏គួរឱ្យទុកចិត្តនោះទេ»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីបានបញ្ជាក់នៅថ្ងៃចន្ទថា ខ្លួនមានការព្រួយបារម្ភអំពីសវនាការកាត់ទោសទាហានរុស្ស៊ីម្នាក់ដែលរងការចោទប្រកាន់ពីបទឧក្រិដ្ឋកម្មសង្គ្រាមនៅក្នុងរដ្ឋធា នីកៀវ ប្រទេសអ៊ុយក្រែន និងបានបន្ថែមថា ខ្លួនមិនអាចការពារផលប្រយោជន៍របស់ទាហានរុស្ស៊ីនោះដោយផ្ទាល់បាន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅក្នុងសន្និសីទកាសែតតាមអនឡាញជាមួយនឹងអ្នកសារព័ត៌ មានថា៖ «ជាការពិត យើងមានការបារម្ភអំពីវាសនារបស់ពលរដ្ឋយើង ប៉ុន្តែ ខ្ញុំនិយាយឡើងវិញ យើងមិនមានសមត្ថភាពនៅក្នុងការការពារប្រយោជន៍របស់ពលរដ្ឋនោះដោយផ្ទាល់នោះទេ»។ នេះបើយោងតាមទីភ្នាក់ងារព័ត៌មាន Reuters។

ទាហានរុស្ស៊ី លោក Vadim Shishimarin វ័យ ២១ ឆ្នាំ ដែលត្រូវបានសង្ស័យថាបំពានច្បាប់ និងបទបញ្ញត្តិសង្គ្រាម កំពុងអង្គុយនៅក្នុងបន្ទប់បិទជិតមួយ ក្នុងអំឡុងពេលនៃសវនាការមួយនៅទីក្រុងកៀវ ប្រទេសអ៊ុយក្រែន ថ្ងៃទី ២៣ ខែឧសភា ឆ្នាំ២០២២។ (REUTERS)

មេដឹកនាំនៃតំបន់ Donetsk ដែលជាតំបន់ផ្ដាច់ខ្លួនចេញពីអ៊ុយក្រែន បាននិយាយនៅថ្ងៃចន្ទថា យុទ្ធជនដែលចុះចាញ់នៅរោងចក្រដែកថែប Azovstal ក្នុងទីក្រុង Mariupol នឹងប្រឈមនឹងការកាត់ទោសនៅក្នុងតំបន់ផ្ដាច់ខ្លួននេះ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Interfax របស់រុស្ស៊ី។ សេចក្ដីរាយការណ៍នេះមិនបានបញ្ជាក់អំពីបទចោទប្រកាន់អ្វីដែលយុទ្ធជនទាំងនោះនឹងប្រឈមនោះទេ។ នេះបើយោងតាមទីភ្នាក់ងារព័ត៌មាន Reuters។
ទីភ្នាក់ងារជនភៀសខ្លួនអង្គការសហប្រជាជាតិបានបញ្ជាក់នៅថ្ងៃចន្ទថា មនុស្សជាង ៦លាន៥សែននាក់បានភៀសខ្លួនចេញពីប្រទេសអ៊ុយក្រែន តាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន Reuters។
ប្រទេសអ៊ុយក្រែននិងប៉ូឡូញបានឯកភាពគ្នាកាលពីថ្ងៃអាទិត្យនៅក្នុងការបង្កើតការគ្រប់គ្រងគយរួមគ្នានៅតាមព្រំដែន និងធ្វើការលើក្រុមហ៊ុនផ្លូវដែករួមគ្នាដើម្បីសម្រួលដល់ការធ្វើដំណើររបស់ប្រជាពលរដ្ឋនិងបង្កើនសក្កានុពលនៃការនាំចេញរបស់ប្រ ទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
អ្នកតំណាងមកពីប្រទេសចំនួន៧ដែលក្នុងនោះរួមមានទាំងប្រទេសដែលដើរចេញពិកិច្ចប្រជុំថ្នាក់រដ្ឋមន្ត្រីពាណិជ្ជកម្មរបស់វេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ី ហ្វិក(APEC)នៅក្នុងទីក្រុងបាងកក ប្រទេសថៃ ដើម្បីតវ៉ាប្រឆាំងនឹងការឈ្លានពានរបស់រុស្ស៊ីលើអ៊ុយក្រែនផងដែរ បានបញ្ជាក់នៅក្នុងសេចក្ដីថ្លែងការណ៍រួមកាលពីថ្ងៃអាទិត្យថា ពួកគេមាន «ក្ដីបារម្ភធ្ងន់ធ្ងរ» ទាក់ទិននឹងវិបត្តិមនុស្សធម៌នៅក្នុងប្រទេសអ៊ុយក្រែន។ បណ្ដាប្រទេសទាំងនេះបានលើកឡើងដូច្នេះថា៖ «ដោយបញ្ជាក់ឡើងវិញអំពីសារៈសំខាន់នៃប្រព័ន្ធរៀបរយអន្តរជាតិដែលផ្អែកលើច្បាប់ ដែលទ្រទ្រង់នូវតំបន់អាស៊ីប៉ាស៊ីហ្វិកមួយដែលមានលក្ខណៈបើកចំហ ស្វាហាប់ ធន់ និងមានសន្តិភាព យើងជំរុញខ្លាំងក្លាឱ្យប្រទេសរុស្ស៊ីបញ្ឈប់ការប្រើកម្លាំងរបស់ខ្លួនជាបន្ទាន់និងដកចេញទាំងស្រុងនិងគ្មានលក្ខខណ្ឌនូវកងទ័ពរបស់ខ្លួនទាំងអស់ពីប្រទេសអ៊ុយក្រែន»។ ប្រទេសទាំង ៧ នោះគឺសហរដ្ឋអាមេរិក អូស្ត្រាលី កាណាដា ឈីលី ជប៉ុន សាធារណ រដ្ឋកូរ៉េ និងនូវែលសេឡង់។ រីឯប្រទេសដែលដើរចេញពីកិច្ចប្រជុំនេះកាលពីថ្ងៃសៅរ៍ដើម្បីតវ៉ានឹងការឈ្លានពានរបស់រុស្ស៊ីលើអ៊ុយក្រែនគឺសហរដ្ឋអាមេរិក កាណាដា នូវែលសេឡង់ ជប៉ុន និងអូស្ត្រាលី។ នេះបើយោងតាមទីភ្នាក់ងារព័ត៌មាន Reuters។

ព័ត៌មានផ្សេងទៀត

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃព្រហស្បតិ៍ ទី ២៦ ខែឧសភា៖

ថ្ងៃពុធ ទី ២៥ ខែឧសភា៖

ថ្ងៃអង្គារ ទី ២៤ ខែឧសភា៖

ថ្ងៃ​ចន្ទ ទី ២៣ ខែឧសភា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

ថ្ងៃចន្ទ ទី ២៣ ខែឧសភា៖