២១:៣០ ១០.៥.២០២២

ថ្ងៃអង្គារ ទី ១០ ខែឧសភា៖

នាយករដ្ឋមន្ត្រីអ៊ីតាលីលោក Mario Draghi បានធ្វើដំណើរទៅកាន់រដ្ឋធានីវ៉ាស៊ីនតោន សហរដ្ឋអាមេរិកនៅថ្ងៃអង្គារនេះដើម្បីពិភាក្សាជាមួយនឹងប្រធានាធិបតីអាមេរិកលោក Joe Biden ដែលបញ្ហានៃការឈ្លានពានរបស់រុស្ស៊ីលើអ៊ុយក្រែនគ្របដណ្ដប់លើការពិភាក្សានោះ។ ជំនួបនៅសេតវិមាននេះធ្វើឡើងនៅមុនកិច្ចប្រជុំកំពូលដ៏សំខាន់របស់ក្រុមប្រទេស G-7 និងរបស់អង្គការអូតង់ (NATO) នៅក្នុងទ្វីបអឺរ៉ុបចូលមកដល់នៅខែក្រោយ។ នេះបើយោងតាមទីភ្នាក់ងារព័ត៌មាន AFP។
លោក Chuck Schumer មេដឹកនាំគណបក្សប្រជាធិបតេយ្យនៃព្រឹទ្ធសភាសហរដ្ឋអាមេរិក បាននិយាយនៅថ្ងៃអង្គារនេះថា ព្រឹទ្ធសភាសហរដ្ឋអាមេរិកនឹងចាត់វិធានការលើកញ្ចប់ជំនួយសម្រាប់អ៊ុយក្រែនឱ្យបានកាន់តែឆាប់តាមដែលអាចធ្វើទៅបាន នៅពេលណាដែលរដ្ឋសភាបានអនុម័តលើសំណើច្បាប់នេះ។ សភាសហរដ្ឋអាមេរិកកំពុងពិចារណាបញ្ជូនជំនួយបន្ថែមជិត ៤០ ពាន់លានដុល្លារទៀតទៅឱ្យប្រទេសអ៊ុយក្រែន ដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ មេដឹកនាំគណបក្សប្រជាធិបតេយ្យនៃព្រឹទ្ធសភាសហរដ្ឋអាមេរិក ស្ថិតនៅវិមានសភាសហរដ្ឋអាមេរិក ក្នុងរដ្ឋធានីវ៉ាស៊ីនតោន ថ្ងៃទី ៥ ខែមេសា ឆ្នាំ២០២២។ (AP Photo/J. Scott Applewhite)

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃអង្គារនេះថា សមាជិកភាពរបស់ប្រទេសអ៊ុយក្រែននៅក្នុងសហភាពអឺរ៉ុបគឺជាសំណួរនៃ «សង្គ្រាមនិងសន្តិភាព» នៅទ្វីបអឺរ៉ុប។ លោកបានបញ្ជាក់នៅក្នុងសន្និសីទកាសែតមួយថា៖ «ខ្ញុំចង់សង្កត់ធ្ងន់ថា សមាជិកភាពរបស់អ៊ុយក្រែននៅក្នុងសហភាពអឺរ៉ុបគឺជារឿងនៃសង្គ្រាមនិងសន្តិភាពនៅក្នុងទ្វីបអឺរ៉ុប»។ លោកបានបន្ថែមថា៖ «មូលហេតុមួយដែលសង្គ្រាមនេះបានចាប់ផ្ដើមឡើងគឺថា [ប្រធានាធិបតីរុស្ស៊ីលោក Vladimir] Putin បានជឿថា ទ្វីបអឺរ៉ុបមិនត្រូវការអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
លោកស្រី Avril Haines ប្រធានផ្នែកស៊ើបការណ៍សម្ងាត់ជាតិរបស់សហរដ្ឋអាមេរិក បាននិយាយនៅថ្ងៃអង្គារនេះថា សហរដ្ឋអាមេរិកជឿថាប្រធានាធិបតីរុស្ស៊ីលោក Vladimir Putin កំពុងត្រៀមលក្ខណៈសម្រាប់សង្គ្រាមរយៈពេលយូរនៅក្នុងប្រទេសអ៊ុយក្រែន ហើយជ័យជម្នះរបស់រុស្ស៊ីនៅក្នុងតំបន់ Donbas នៅភាគខាងកើតប្រទេសអ៊ុយក្រែនប្រហែលជានឹងមិនអាចបញ្ចប់សង្គ្រាមនេះបានទេ។ លោកស្រី Haines បានប្រាប់សមាជិកសភាសហរដ្ឋអាមេរិកថា៖ «យើងវាយតម្លៃថា លោកប្រធានាធិបតី Putin កំពុងត្រៀមលក្ខណៈសម្រាប់សង្គ្រាមរយៈពេលវែងនៅក្នុងប្រទេសអ៊ុយក្រែន ដែលនៅក្នុងអំឡុងពេលសង្គ្រាមនេះលោកនៅមានបំណងសម្រេចឱ្យបានគោលដៅផុតពីតំបន់ Donbas ទៅទៀត»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយនៅថ្ងៃអង្គារនេះថា ប្រទេសរុស្ស៊ីបានចាប់ផ្ដើមវាយប្រហារតាមប្រព័ន្ធអ៊ីនធឺណិតកាលពីចុងខែកុម្ភៈលើបណ្ដាញសារគមនាគមន៍ផ្កាយរណបពាណិជ្ជកម្ម ដើម្បីបង្អាក់ដល់ប្រព័ន្ធបញ្ជានិងគ្រប់គ្រងរបស់អ៊ុយក្រែនក្នុងអំឡុងពេលនៃការឈ្លានពានរបស់រុស្ស៊ីលើអ៊ុយក្រែន។ លោក Blinken បានបញ្ជាក់នៅក្នុងសេចក្ដីថ្លែងការណ៍មួយថា សកម្មភាពទាំងនេះជះផលប៉ះពាល់ដល់បណ្ដាប្រទេសផ្សេងទៀតនៅអឺរ៉ុប។ លោក Blinken បានបន្តថា សហរដ្ឋអាមេរិកនិងសម្ព័ន្ធមិត្តនិងដៃគូរបស់ខ្លួនកំពុងចាត់វិធានការដើម្បីទប់ទល់នឹងសកម្មភាពទាំងនេះរបស់រុស្ស៊ី។ លោក Blinken បានបន្ថែមថា សហរដ្ឋអាមេរិកបានបង្កើតយន្តការថ្មីដើម្បីជួយអ៊ុយក្រែននៅក្នុងការកំណត់រកការគំរាមកំហែងតាមប្រព័ន្ធអ៊ីនធឺណិតនិងការងើបចេញពីហេតុការណ៍នានាដែលកើតឡើងតាមប្រព័ន្ធអ៊ីនធឺណិត។ នេះបើយោងតាមទីភ្នាក់ងារព័ត៌មាន Reuters។
ក្រសួងការបរទេសរុស្ស៊ីបានបញ្ជាក់នៅថ្ងៃអង្គារថា រុស្ស៊ីនឹងមិនចូលរួមនៅក្នុងកិច្ចប្រជុំពិសេសរបស់ក្រុមប្រឹក្សាសិទ្ធិមនុស្សអង្គការសហប្រជាជាតិអំពីអ៊ុយក្រែននៅថ្ងៃព្រហស្បតិ៍ខាងមុខនេះទេ។ អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយនៅថ្ងៃអង្គារថា៖ «គណៈប្រតិភូរុស្ស៊ីនឹងមិនផ្ដល់ភាពស្របច្បាប់តាមរយៈវត្តមានរបស់ខ្លួនចំពោះឆាកល្ខោននយោបាយថ្មីដែលរៀបចំក្រោមរូបភាពកិច្ចប្រជុំពិសេសនេះទេ»។ អ្នកស្រីបានបញ្ជាក់នៅក្នុងសេចក្ដីថ្លែងការណ៍មួយថា៖ «ជាអកុសល ការអះអាងនិងការពន្យល់របស់យើងអំពីគោលបំណងពិតប្រាកដនៃប្រតិបត្តិការយោធាពិសេសនេះនិងអំពីស្ថានការណ៍ពិតប្រាកដនៅសមរភូមិត្រូវបានគេធ្វើព្រងើយកន្តើយដាក់ទាំងស្រុង»។ ក្រុមប្រឹក្សាសិទ្ធិមនុស្សអង្គការសហប្រជា ជាតិបានប្រកាសកាលពីថ្ងៃចន្ទម្សិលមិញថា ខ្លួននឹងរៀបចំកិច្ចប្រជុំពិសេសមួយនៅថ្ងៃព្រហស្បតិ៍ខាងមុខតាមសំណើរបស់រដ្ឋាភិបាលអ៊ុយក្រែនដើម្បីពិនិត្យលើ«ស្ថានភាពសិទ្ធិមនុស្សដែលកាន់តែដុនដាបឡើងនៅក្នុងប្រទេសអ៊ុយក្រែនដែលកើតឡើងដោយសារភាពគឃ្លើនរបស់រុស្ស៊ី»។ នេះបើយោងតាមទីភ្នាក់ងារព័ត៌មាន AFP។
ប្រទេសរុស្ស៊ីគ្មានគម្រោងបិទស្ថានទូតរបស់ខ្លួននៅទ្វីបអឺរ៉ុបដើម្បីឆ្លើយតបទៅនឹងវិធានការអមិត្តរបស់ក្រុមបស្ចិមប្រទេសនិងការពង្រីកទណ្ឌកម្មប្រឆាំងនឹងរុស្ស៊ីនោះទេ។ នេះបើយោងតាមសេចក្ដីរាយការណ៍នៅថ្ងៃអង្គារនេះរបស់ទីភ្នាក់ងារព័ត៌មាន RIA របស់រុស្ស៊ីដែលបានយោងលើសម្ដីរបស់អនុរដ្ឋមន្ត្រីការបរទេសរុស្ស៊ីលោក Alexander Grushko។ លោក Grusko និយាយដូច្នេះថា៖ «នេះមិនមែនជាទម្លាប់របស់យើងនោះឡើយ»។ លោកបានបន្ថែមថា៖ «យើងជឿថា កិច្ចការរបស់ការិយាល័យអ្នកតំណាងការទូតគឺសំខាន់»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសអាល្លឺម៉ង់លោកស្រី Annalena Baerbock និងរដ្ឋមន្ត្រីការបរទេសហូឡង់លោក Wopke Hoekstra បានធ្វើទស្សនកិច្ចដ៏ភ្ញាក់ផ្អើលទៅកាន់តំបន់នានាដែលខ្ទេចខ្ទាំដោយសារសង្គ្រាមនៅជុំវិញរដ្ឋធានីកៀវ ប្រទេសអ៊ុយក្រែននៅថ្ងៃអង្គារ។ នេះបើយោងតាមទីភ្នាក់ងារព័ត៌មាន AFP។

រដ្ឋមន្ត្រីការបរទេសអ៊ុយក្រែន លោក Dmytro Kuleba (ស្ដាំ) ថ្លែងសុន្ទរកថាក្នុងអំឡុងពេលនៃការធ្វើសន្និសីទសារព័ត៌មានរួមគ្នាមួយជាមួយនឹងរដ្ឋមន្ត្រីការបរទេសអាល្លឺម៉ង់ អ្នកស្រី Annalena Baerbock ខណៈដែលការវាយប្រហាររបស់រុស្ស៊ីលើអ៊ុយក្រែននៅតែបន្ដ ទីក្រុងកៀវ ប្រទេសអ៊ុយក្រែន ថ្ងៃទី ១០ ខែឧសភា ឆ្នាំ២០២២។ (REUTERS/Valentyn Ogirenko/Pool)

ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអង្គារថា កញ្ចប់ទណ្ឌកម្មលើកទី៦របស់សហភាពអឺរ៉ុបដែលគ្រោងឡើងដើម្បីប្រឆាំងនឹងរុស្ស៊ី ដែលក្នុងនោះរួមមានទាំងការហាមឃាត់ការនាំចូលប្រេងឥន្ធនៈពីរុស្ស៊ីផងដែរ គឺត្រូវការជាចាំបាច់។ លោក Zelenskyy បានប្រាប់រដ្ឋសភាស្លូវ៉ាគីនៅក្នុងសុន្ទរកថាតាមវីដេអូថា៖ «ឥឡូវនេះកញ្ចប់ទណ្ឌកម្មលើកទី ៦ [របស់សហភាពអឺរ៉ុប]នឹងត្រូវអនុម័ត ហើយវាគឺពិតជាកញ្ចប់ទណ្ឌកម្មដែលយើងត្រូវការ ហើយជាងនេះទៀត ការដាក់ទណ្ឌកម្មលើថាមពល [របស់រុស្ស៊ី] ក៏ត្រូវការផងដែរ»។ នេះបើយោងតាមទីភ្នាក់ងារព័ត៌មាន Reuters។
លោក Clement Beaune រដ្ឋលេខាធិការក្រសួងការបរទេសបារាំងទទួលបន្ទុកកិច្ចការទ្វីបអឺរ៉ុបបាននិយាយថា បណ្ដាប្រទេសសមាជិកសហភាពអឺរ៉ុបអាចសម្រេចបាននូវកិច្ចព្រមព្រៀងមួយនៅសប្ដាហ៍នេះអំពីសំណើរបស់គណៈកម្មការអឺរ៉ុបនៃសហភាពអឺរ៉ុបនៅក្នុងការរារាំងការនាំចូលប្រេងឥន្ធនៈទាំងអស់ពីប្រទេសរុស្ស៊ី។ លោកបានប្រាប់ទូរទស្សន៍ LCI ថា៖ «ខ្ញុំគិតថា យើងអាចសម្រេចបាននូវកិច្ចព្រមព្រៀងមួយនៅសប្ដាហ៍នេះ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីឧស្សាហកម្មជប៉ុនលោក Koichi Hagiuda បាននិយាយនៅថ្ងៃអង្គារថា ជប៉ុននឹងសម្រេចអំពីពេលវេលានិងវិធីនៃការហាមឃាត់ការនាំចូលប្រេងឥន្ធនៈពីរុស្ស៊ី ហើយស្របពេលនោះដែរនឹងពិចារណាអំពីស្ថានភាពពិតប្រាកដ។ លោក Hagiuda ថ្លែងដូច្នេះ បន្ទាប់ពីជប៉ុនបានឯកភាពលើការហាមឃាត់ប្រេងឥន្ធនៈរបស់រុស្ស៊ីនេះជាមួយនឹងបណ្ដាប្រទេសនៃក្រុមប្រទេស G-7 ផ្សេងទៀតដើម្បីប្រឆាំងនឹងការឈ្លាន ពានរបស់រុស្ស៊ីលើអ៊ុយក្រែន។ លោក Hagiuda បានបញ្ជាក់នៅក្នុងសន្និ សីទកាសែតដូច្នេះថា ដើម្បីជួយធានាថាមានស្ថិរភាពនៃការផ្គត់ផ្គង់ថាមពលនៅលើសាកលលោក សហរដ្ឋអាមេរិកមានតួនាទីសំខាន់ក្នុងនាមជាអ្នកផលិតប្រេងឥន្ធនៈនិងឧស្ម័នធម្ម ជាតិ។ នេះបើយោងតាមទីភ្នាក់ងារព័ត៌មាន Reuters។
ប្រធានបេសកកម្មតាមដានស្ថានភាពសិទ្ធិមនុស្សរបស់អង្គការសហប្រជាជាតិប្រចាំនៅប្រទេសអ៊ុយក្រែនបាននិយាយនៅថ្ងៃអង្គារថា ជនស៊ីវិលរាប់ពាន់នាក់ទៀតត្រូវបានសម្លាប់នៅក្នុងប្រទេសអ៊ុយក្រែនតាំងពីពេលដែលរុស្ស៊ីបានឈ្លានពានអ៊ុយ ក្រែនមក ដែលចំនួននេះគឺច្រើនជាងតួលេខផ្លូវការរបស់ខ្លួនទៅទៀត ដែលតួលេខផ្លូវការនោះគឺមានចំនួន ៣.៣៨១ នាក់។ នេះបើយោងតាមសេចក្ដីរាយការណ៍របស់ទីភ្នាក់ ងារព័ត៌មាន Reuters។
រដ្ឋាភិបាលអ៊ុយក្រែនបានបញ្ជាក់នៅថ្ងៃអង្គារថា ទាហានអ៊ុយក្រែនជាង១.០០០នាក់ ដែលភាគច្រើនបានរងរបួស កំពុងស្ថិតនៅក្នុងរោងចក្រដែកថែប Azovstal ក្នុងទីក្រុង Mariupol នៅឡើយ។ ឧបនាយករដ្ឋមន្ត្រីអ៊ុយក្រែនអ្នកស្រី Iryna Vereshchuk បានប្រាប់ទីភ្នាក់ងារព័ត៌មាន AFP ថា ទាហានអ៊ុយក្រែន «ជាងមួយពាន់នាក់» នៅស្ថិតក្នុងរោងចក្រនោះនៅឡើយ។ អ្នកស្រីបានបន្ថែមថា៖ «ទាហានរាប់រយនាក់បានរងរបួស។ មានមនុស្សរងរបួសធ្ងន់ធ្ងរដែលតម្រូវឱ្យមានការជម្លៀសចេញជាបន្ទាន់។ ស្ថានការណ៍គឺកាន់តែដុនដាបទៅៗពីមួយថ្ងៃទៅមួយថ្ងៃ»។
ប្រធានាធិបតីសហរដ្ឋអាមេរិកលោក Joe Biden បាននិយាយកាលពីថ្ងៃចន្ទថា លោកមានការព្រួយបារម្ភថា ប្រធានាធិបតីរុស្ស៊ីលោក Vladimir Putin មិនមានវិធីដកខ្លួនចេញពីសង្គ្រាមនៅ អ៊ុយក្រែននោះទេ និងថា លោកកំពុងព្យាយាមគិតគូរថាតើត្រូវធ្វើដូចម្ដេចចំពោះរឿងនេះ។ នៅក្នុងការថ្លែងនៅឯពិធីរៃអង្គាសថវិកាផ្នែកនយោបាយមួយនៅជាយរដ្ឋធានីវ៉ាស៊ីនតោន លោក Biden បាននិយាយថា លោក Putin បានជឿទាំងយល់ច្រឡំថា ការឈ្លានពានអ៊ុយក្រែនអាចធ្វើឱ្យអង្គការអូតង់បែកបាក់ និងអាចធ្វើឱ្យសហភាពអឺរ៉ុបបែកបាក់។ ប៉ុន្តែផ្ទុយទៅវិញ សហរដ្ឋអាមេរិកនិងបណ្ដាប្រទេសជាច្រើននៅអឺរ៉ុបបានរួមគ្នាគាំទ្រអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ក្រុមប្រឹក្សាសន្តិសុខអង្គការសហប្រជាជាតិគ្រោងនឹងរៀបចំកិច្ចប្រជុំសាធារណៈថ្មីមួយនៅថ្ងៃព្រហស្បតិ៍ខាងមុខអំពីសង្គ្រាមរបស់រុស្ស៊ីនៅអ៊ុយក្រែន ដោយសារតែស្ថាន ភាពមនុស្សធម៌នៅក្នុងប្រទេសអ៊ុយក្រែនកាន់តែយ៉ាប់យ៉ឺនឡើង។ នេះបើតាមការបញ្ជាក់របស់មន្ត្រីការទូតនានាកាលពីថ្ងៃចន្ទ។ កិច្ចប្រជុំនេះដែលស្នើឡើងដោយប្រ ទេសបារាំងនិងម៉ិកស៊ិកនឹងក្លាយជាកិច្ចប្រជុំលើកទី ១៦ ដែលក្រុមប្រឹក្សាសន្តិសុខអង្គការសហប្រជាជាតិធ្វើឡើងតាំងពីរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន AFP។

២០:៥៩ ៩.៥.២០២២

ថ្ងៃចន្ទ ទី ៩ ខែឧសភា៖

ក្រុមប្រឹក្សាសិទ្ធិមនុស្សអង្គការសហប្រជាជាតិនឹងរៀបចំកិច្ចប្រជុំពិសេសមួយអំពីអ៊ុយក្រែននៅសប្ដាហ៍នេះ។ នេះបើតាមការបញ្ជាក់របស់មន្ត្រីមួយរូបនៅថ្ងៃចន្ទនេះ បន្ទាប់ពីរដ្ឋាភិបាលអ៊ុយក្រែនបានអំពាវនាវឱ្យមានការពិនិត្យឡើងវិញលើស្ថានភាពនៅអ៊ុយក្រែន ដែលក្នុងនោះរួមមានទាំងការរាយការណ៍អំពីចំនួនមនុស្សស្លាប់និងរងរបួសទ្រង់ទ្រាយធំនៅក្នុងទីក្រុង Mariupol ផងដែរ។ មន្ត្រីការទូតនានាបានប្រាប់ទីភ្នាក់ងារព័ត៌មាន Reuters ថា កិច្ចប្រជុំដែលគ្រោងនឹងធ្វើឡើងនៅថ្ងៃព្រហស្បតិ៍ខាងមុខនេះ អាចមាននូវសេចក្ដីសម្រេចមួយដែលតម្រូវឱ្យគណៈកម្មការស៊ើបអង្កេតលើសង្គ្រាមនៅអ៊ុយក្រែនដែលទើបបង្កើតថ្មីមួយផ្ដល់នូវរបាយការណ៍ពិស្ដារជូនក្រុមប្រឹក្សាសិទ្ធិមនុស្សនៅពេលក្រោយនៅក្នុងឆ្នាំនេះ។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ ប្រជាជនកំពុងត្រូវបានជម្លៀសចេញពីតំបន់រោងចក្រផលិតដែកថែប Azovstal នៅក្នុងប្រតិបត្តិការដែលដឹកនាំដោយអង្គការសហប្រជាជាតិ នៅក្នុងទីក្រុង Mariupol ប្រទេសអ៊ុយក្រែន ថ្ងៃទី ១ ខែឧសភា ឆ្នាំ២០២២។ (David Arakhamia/Azov Regiment/Handout via REUTERS)

ប្រទេសអ៊ុយក្រែនបានអំពាវនាវឱ្យក្រុមប្រឹក្សាសិទ្ធិមនុស្សអង្គការសហប្រជាជាតិរៀបចំកិច្ចប្រជុំពិសេសមួយអំពីអ៊ុយក្រែន ដោយយោងលើតម្រូវការចាំបាច់សម្រាប់ឱ្យក្រុមប្រឹក្សានេះពិនិត្យឡើងវិញលើស្ថានការណ៍ដែល «កាន់តែយ៉ាប់យ៉ឺនឡើងជាបន្ត» នៅអ៊ុយក្រែន។ នេះបើយោងលើលិខិតមួយច្បាប់ចុះថ្ងៃទី ៩ ខែឧសភានេះ ដែលឯកអគ្គរដ្ឋទូតអ៊ុយក្រែនប្រចាំអង្គការសហប្រជាជាតិអ្នកស្រី Yevheniia Filipenko បានផ្ញើជូនប្រធានក្រុមប្រឹក្សាសិទ្ធិមនុស្សអង្គការសហប្រជាជាតិ។ លិខិតនោះក៏មានការចុះហត្ថលេខាពីប្រទេសចំនួន ៥៥ ផ្សេងទៀតផងដែរ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីម៉ិកស៊ិកលោក Andres Manuel Lopez Obrador បាននិយាយនៅក្នុងសន្និសីទកាសែតជាប្រចាំមួយនៅថ្ងៃចន្ទនេះថា កិច្ចព្រមព្រៀងសន្តិភាពរវាងរុស្ស៊ីនិងអ៊ុយក្រែនគឺជាជម្រើសដ៏ល្អបំផុតដើម្បីកាត់បន្ថយអតិផរណា។ លោក Obrador ថ្លែងដូច្នេះថា៖ «ចំណុចសំខាន់បំផុតគឺថាកិច្ចព្រមព្រៀងសន្តិភាពរវាងរុស្ស៊ីនិងអ៊ុយក្រែនត្រូវតែសម្រេចឱ្យបាន។ ករណីនេះនឹងជួយបានច្រើន ដោយសារតែសង្គ្រាមរវាងរុស្ស៊ីនិងអ៊ុយក្រែនគឺជាអ្វីដែលធ្វើឱ្យមានវិបត្តិសេដ្ឋកិច្ចកើតឡើងយ៉ាងឆាប់ដូចនេះ»។ នេះបើយោងតាមទីភ្នាក់ងារព័ត៌មាន Reuters។
ប្រធានសហភាពអឺរ៉ុបអ្នកស្រី Ursula von der Leyen បានធ្វើដំណើរទៅប្រទេសហុងគ្រីនៅថ្ងៃចន្ទនេះដើម្បីជួបពិភាក្សាជាមួយនឹងនាយករដ្ឋមន្ត្រីហុងគ្រីលោក Viktor Orban។ កន្លងមក លោក Orban បានបង្អាក់ដល់ផែនការរបស់សហភាពអឺរ៉ុបនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ី។ លោក Eric Mamer អ្នកនាំពាក្យរបស់អ្នកស្រី von der Leyen បាននិយាយថា៖ «ពួកគេនឹងពិភាក្សាអំពីបញ្ហានានាទាក់ទិននឹងសន្តិសុខនៃការផ្គត់ផ្គង់ថាមពលនៅទ្វីបអឺរ៉ុប»។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីអ៊ុយក្រែនលោក Denys Shmyhal បាននិយាយនៅថ្ងៃចន្ទនេះថា ប្រទេសអ៊ុយក្រែនបានខាតបង់ថវិកាចំនួន ១៧០ លានដុល្លារជារៀងរាល់ថ្ងៃ ដោយសារតែរុស្ស៊ីបានកាត់ផ្ដាច់លទ្ធភាពរបស់អ៊ុយក្រែននៅក្នុងការប្រើប្រាស់កំពង់ផែសមុទ្រ ហើយសមត្ថភាពនាំចេញរបស់អ៊ុយក្រែនបានបាត់បង់ជាងពាក់កណ្ដាល។ លោក Shmyhal បានបញ្ជាក់ថា៖ «ផលិតផលកសិកម្ម ៩០ លានតោន ដែលអ៊ុយក្រែនមានគម្រោងនាំចេញទៅកាន់បណ្ដាប្រទេសនៅទ្វីបអាស៊ី អាហ្វ្រិក និងអឺរ៉ុប ត្រូវបានរាំងខ្ទប់»។ លោកថ្លែងដូច្នេះនៅពេលលោកឈរជិតប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Charles Michel នៅក្នុងទីក្រុង Odesa ប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Charles Michel បាននិយាយថា ប្រទេសរុស្ស៊ីនឹងបរាជ័យនៅក្នុងការ «សម្លាប់សេរីភាព» របស់អ៊ុយក្រែន។ លោកថ្លែងដូច្នេះនៅពេលលោកធ្វើទស្សនកិច្ចដ៏ភ្ញាក់ផ្អើលទៅកាន់ទីក្រុង Odesa ប្រទេសអ៊ុយក្រែននៅថ្ងៃចន្ទនេះ។ លោក Michel បានបញ្ជាក់នៅក្នុងវីដេអូមួយនៅលើ Twitter ថា៖ «រដ្ឋាភិបាលរុស្ស៊ីចង់សម្លាប់ស្មារតីនៃសេរីភាពនិងលទ្ធិប្រជាធិបតេយ្យរបស់អ្នក»។ លោកបានបន្ថែមថា៖ «ខ្ញុំជឿជាក់យ៉ាងមុតមាំថា រុស្ស៊ីនឹងមិនទទួលជោគជ័យជាដាច់ខាត»។ ជាងនេះទៀត លោក Michel បានសន្យាថា សហភាពអឺរ៉ុបនឹងជួយ «កសាង» អ៊ុយក្រែនឱ្យក្លាយជា «ប្រទេសមួយដែលមានភាពទំនើបនិងមានប្រជាធិបតេយ្យ»។ នេះបើយោងតាមទីភ្នាក់ងារព័ត៌មាន AFP។

ប្រធានក្រុមប្រឹក្សាអឺរ៉ុបលោក Charles Michel និងនាយករដ្ឋមន្ត្រីអ៊ុយក្រែន លោក Denys Shmyhal ធ្វើទស្សនកិច្ចទៅកាន់អគារស្នាក់នៅមួយកន្លែងដែលត្រូវបានបំផ្លិចបំផ្លាញដោយការវាយប្រហារដោយគ្រាប់មីស៊ីលរបស់រុស្ស៊ី នៅទីក្រុង Odesa ប្រទេសអ៊ុយក្រែន ថ្ងៃទី ៩ ខែឧសភា ឆ្នាំ២០២២។(Ukrainian Governmental Press Service/Handout via REUTERS)

ប្រធានាធិបតីបារាំងលោក Emmanuel Macron បាននិយាយថា ទ្វីបអឺរ៉ុបត្រូវតែដកបទពិសោធន៍ពីកំហុសកាលពីអតីតកាលរបស់ខ្លួន និងធ្វើយ៉ាងណាធានាថាគ្មានភាគីណាមួយត្រូវបានគេធ្វើឱ្យអាម៉ាស់មុខនៅពេលដែលរុស្ស៊ីនិងអ៊ុយក្រែនចរចាគ្នាដើម្បីសន្តិភាព។ លោក Macron ថ្លែងដូច្នេះ បន្ទាប់ពីលោកបាននិយាយថា សុន្ទរកថារបស់ប្រធានាធិបតីរុស្ស៊ីលោក Vladimir Putin អំពីខួបសង្គ្រាមលោកលើកទីពីរមានលក្ខណៈ «គំរាមកំហែង» និង «បែបបង្កសង្គ្រាម»។ នៅក្នុងការថ្លែងទៅកាន់អ្នកកាសែតនៅរដ្ឋសភាអឺរ៉ុប លោក Macron បាននិយាយថា ទិវាជ័យជម្នះថ្ងៃទី ៩ ខែឧសភានេះប្រារព្ធធ្វើឡើងក្នុងបែបបទពីរផ្សេងគ្នា។ ចំណុចមួយគឺថា លោក Putin មានបំណង «បង្ហាញកម្លាំង ការគំរាមកំហែង» និងបានថ្លែង «សុន្ទរកថាបែបបង្កសង្គ្រាមដោយឥតញញើត»។ រីឯចំណុចមួយផ្សេងទៀតគឺថា សហភាពអឺរ៉ុបកំពុងធ្វើការលើការពង្រឹងគម្រោងសន្តិភាពដែលដឹកនាំដយប្រជាពលរដ្ឋ។ នេះបើយោងតាមទីភ្នាក់ងារព័ត៌មាន Reuters។
លោក Vladimir Medinsky ដែលជាប្រធានក្រុមចរចារបស់រុស្ស៊ីបាននិយាយនៅថ្ងៃចន្ទនេះថា ការចរចាសន្តិភាពជាមួយនឹងអ៊ុយក្រែនមិនបានបញ្ឈប់នោះទេ ហើយកំពុងធ្វើតាមអនឡាញ។ នេះបើយោងតាមទីភ្នាក់ងារព័ត៌មាន Interfax របស់រុស្ស៊ី។ នៅពេលគេសួរថាតើការចរចាដោយផ្ទាល់មុខអាចធ្វើឡើងជាមួយនឹងក្រុមអ្នកចរចាខាងអ៊ុយក្រែននៅពេលណា លោក Medinsky បានបញ្ជាក់ថា៖ «យើងត្រូវការព័ត៌មានជាក់លាក់បន្ថែមទៀត មុននឹងយើងអាចជួបចរចាទល់មុខបាន»។ អ៊ុយក្រែននិងរុស្ស៊ីមិនបានចរចាដោយទល់មុខតាំងពីថ្ងៃទី ២៩ ខែមីនាមក បើទោះជាយ៉ាងណាភាគីទាំងពីរបានជួបចរចាគ្នាតាមវីដេអូអនឡាញ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin នៅថ្ងៃចន្ទនេះ បានរំឭកអនុស្សាវរីយ៍នៃវីរភាពរបស់សហភាពសូវៀតនៅក្នុងសម័យសង្គ្រាមលោកលើកទីពីរដើម្បីជំរុញកងទ័ពរបស់លោកឱ្យទទួលបានជោគជ័យនៅក្នុងប្រទេសអ៊ុយក្រែន។ នៅក្នុងការថ្លែងទៅកាន់កងទ័ពដែលប្រមូលផ្ដុំគ្នាតម្រៀបជាជួរនៅទីលាន Red Square នៅចំខួបទី៧៧ឆ្នាំនៃជ័យជម្នះលើរបបណាហ្ស៊ីអាល្លឺម៉ង់ លោក Putin បានថ្កោលទោសអ្វីដែលលោកហៅថាជាការគំរាមកំហែងពីខាងក្រៅដែលធ្វើឱ្យរុស្ស៊ីចុះខ្សោយនិងបែកបាក់ និងបានបញ្ជាក់ម្ដងទៀតអំពីការអះអាងដែលលោកបានប្រើដើម្បីផ្ដល់ហេតុផលសម្រាប់ការឈ្លានពានប្រទេសអ៊ុយក្រែនគឺអង្គការអូតង់ (NATO) បានបង្កើតការគំរាមកំហែងជាប់ព្រំដែនរបស់រុស្ស៊ី។ លោក Putin និយាយដូច្នេះថា៖ «ការការពារមាតុភូមិនៅពេលដែលត្រូវសម្រេចអំពីវាសនារបស់មាតុភូមិនោះគឺតែងតែជារឿងដ៏ពិសិដ្ឋ។ ថ្ងៃនេះ អ្នកកំពុងប្រយុទ្ធដើម្បីប្រជាជនរបស់យើងនៅក្នុងតំបន់ Donbas [ប្រទេសអ៊ុយក្រែន] ដើម្បីសន្តិសុខរបស់ប្រទេសរុស្ស៊ីដែលជាមាតុភូមិរបស់យើង»។ នេះបើយោងតាមទីភ្នាក់ងារព័ត៌មាន Reuters។

ប្រធានាធិបតីរុស្ស៊ី លោក Vladimir Putin ចូលរួមក្នុងពិធីដាក់កម្រងផ្កានៅចេតិយទាហាន បន្ទាប់ពីការដើរក្បួនព្យុហយាត្រាខួបទី ៧៧ នៃការបញ្ចប់សង្គ្រាមលោកលើកទីពីរ នៅទីក្រុងមូស្គូ ប្រទេសរុស្ស៊ី ថ្ងៃទី៩ ខែឧសភា ឆ្នាំ២០២២។ (Sputnik, Kremlin Pool Photo via AP)

នៅក្នុងការប្រារព្ធទិវាជ័យជម្នះលើរបបហាហ្ស៊ីអាល្លឺម៉ង់ក្នុងសម័យសង្គ្រាមលោកលើកទីពីរ ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទនេះថា ប្រទេសរបស់លោកកំពុងប្រយុទ្ធដើម្បីជ័យជម្នះថ្មី ហើយនឹងឈ្នះសង្គ្រាមលើរុស្ស៊ី។ លោក Zelenskyy បានបញ្ជាក់នៅក្នុងសេចក្ដីថ្លែងការណ៍មួយថា៖ «ផ្លូវឆ្ពោះទៅកាន់ជ័យជម្នះគឺលំបាក។ ប៉ុន្តែ យើងប្រាកដណាស់ថាយើងនឹងឈ្នះ»។ លោក Zelenskyy បានលើកឡើងថា ជនជាតិអ៊ុយក្រែនគឺជាមនុស្សសេរីនិយម ដែលបានប្រយុទ្ធដើម្បីការពារទឹកដីរបស់ខ្លួនជាច្រើនដងរួចមកហើយនៅក្នុងប្រវត្តិសាស្ត្រ ហើយមាន «មាគ៌ាខ្លួនឯងផ្ទាល់»។ លោកបញ្ជាក់ដូច្នេះថា៖ «ថ្ងៃនេះ យើងកំពុងធ្វើសង្គ្រាមនៅលើមាគ៌ានេះ។ យើងនឹងមិនប្រគល់ទឹកដីមួយចំណែកណាមួយរបស់យើងឱ្យនរណាម្នាក់នោះទេ …ហើយយើងនឹងមិនប្រគល់ចំណែកនៃប្រវត្តិសាស្ត្រណាមួយរបស់យើងឱ្យនរណាម្នាក់នោះឡើយ»។ នេះបើយោងតាមទីភ្នាក់ងារព័ត៌មាន Reuters។
អ្នកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បាននិយាយនៅថ្ងៃចន្ទនេះថា គណៈកម្មការអឺរ៉ុបនឹងឆ្លើយតបចំពោះពាក្យសុំរបស់ប្រទេសអ៊ុយក្រែនដែលហែកហួរដោយសង្គ្រាមនៅក្នុងការចូលជាសមាជិករបស់សហភាពអឺរ៉ុបនៅខែមិថុនាខាងមុខ។ នេះបើយោងតាមទីភ្នាក់ងារព័ត៌មាន AFP។
លោក Josep Borrell ប្រធានផ្នែកគោលនយោបាយការបរទេសនៃសហភាពអឺរ៉ុប បានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត Financial Times ដែលចេញផ្សាយនៅថ្ងៃចន្ទនេះថា សហភាពអឺរ៉ុបគួរតែពិចារណារឹបអូសទុនបម្រុងទុកអន្តរជាតិរបស់រុស្ស៊ីដើម្បីជួយបង់ថ្លៃចំណាយលើការកសាងប្រទេសអ៊ុយក្រែនឡើងវិញនៅពេលណាដែលសង្គ្រាមបានបញ្ចប់។ នេះបើយោងតាមទីភ្នាក់ងារព័ត៌មាន Reuters។
លោកស្រី Jill Biden ភរិយារបស់ប្រធានាធិបតីសហរដ្ឋអាមេរិកលោក Joe Biden បានជួបជាមួយប្រធានាធិបតីស្លូវ៉ាគីអ្នកស្រី Zuzana Caputova នៅថ្ងៃចន្ទនេះដើម្បីពិភាក្សាអំពីអ្វីដែលលោកស្រីបាននិយាយថាជា «ការគាំទ្ររបស់សហរដ្ឋអាមេរិកចំពោះប្រជាពលរដ្ឋស្លូវ៉ាគីនិងអ៊ុយក្រែន និងវិធីដែលយើងអាចរួបរួមគ្នាជួយប្រជាពលរដ្ឋអ៊ុយក្រែន»។

អ្នកស្រី Jill Biden (ឆ្វេង) និងប្រធានាធិបតីស្លូវ៉ាគី អ្នកស្រី Zuzana Caputova ឈរថតរូបជាមួយគ្នា មុនពេលជំនួបរបស់ពួកគេទាំងពីរនៅវិមានប្រធានាធិបតីក្នុងទីក្រុង Bratislava ប្រទេសស្លូវ៉ាគី ថ្ងៃទី ៩ ខែឧសភា ឆ្នាំ២០២២។ (AP Photo/Susan Walsh, Pool)

នាយករដ្ឋមន្ត្រីកាណាដាលោក Justin Trudeau បាននិយាយកាលពីយប់ថ្ងៃអាទិត្យម្សិលមិញថា ពិភពលោកនឹងធ្វើអ្វីៗទាំងអស់ដែលអាចធ្វើបានដើម្បីធានាថាប្រធានាធិបតីរុស្ស៊ីលោក Vladimir Putin ចាញ់សង្គ្រាមរបស់លោកនៅក្នុងប្រទេសអ៊ុយក្រែន ដែលក្នុងនោះរួមមានទាំងការធ្វើឱ្យរដ្ឋាភិបាលរុស្ស៊ីរងទណ្ឌកម្មជាយូរឆ្នាំផងដែរ។ នៅក្នុងកិច្ចសម្ភាសន៍មួយ លោក Trudeau បានប្រាប់ទីភ្នាក់ងារព័ត៌មាន Reutersថា៖ «អ្វីដែលលោក Putin ចាំបាច់ត្រូវយល់គឺថា ក្រុមបស្ចិមប្រទេសមានការប្ដេជ្ញាចិត្តនិងការតាំងចិត្តមុតមាំនៅក្នុងការប្រឆាំងនឹងអ្វីដែលលោកកំពុងធ្វើ»។
នាយករដ្ឋមន្ត្រីជប៉ុនលោក Fumio Kishida បានបញ្ជាក់នៅក្រោយកិច្ចប្រជុំតាមអនឡាញរបស់ក្រុមប្រទេស G-7 កាលពីថ្ងៃអាទិត្យម្សិលមិញថា ប្រទេសជប៉ុននឹងហាមឃាត់ «ជាគោលការណ៍» នូវការនាំចូលប្រេងឆៅពីរុស្ស៊ី ដែលនេះគឺជាផ្នែកមួយនៃយុទ្ធនាការរបស់ក្រុមប្រទេស G-7 នៅក្នុងការប្រឆាំងនឹងការឈ្លានពានរបស់រុស្ស៊ីលើអ៊ុយក្រែន។ លោក Kishida បានថ្លែងនៅក្នុងសេចក្ដីថ្លែងការណ៍មួយដែលចេញផ្សាយដោយរដ្ឋាភិបាលជប៉ុនថា៖ «សម្រាប់ប្រទេសមួយដែលពឹងផ្អែកខ្លាំងក្លាលើការនាំចូលថាមពល វាគឺជាការសម្រេចចិត្តដ៏ពិបាកបំផុត។ ប៉ុន្តែការសម្របសម្រួលរបស់ក្រុមប្រទេស G-7 គឺមានសារៈសំខាន់បំផុតនៅពេលដូចឥឡូវនេះ»។ នេះបើយោងតាមទីភ្នាក់ងារព័ត៌មាន Reuters។
ក្រុមប្រទេស G-7 បានប្ដេជ្ញាចិត្តកាលពីថ្ងៃអាទិត្យម្សិលមិញនៅក្នុងការហាមឃាត់ ឬក៏បញ្ឈប់ជាដំណាក់កាលនូវការនាំចូលប្រេងឥន្ធនៈពីរុស្ស៊ី ហើយសហរដ្ឋអាមេរិកបានបង្ហាញនូវការដាក់ទណ្ឌកម្មលើថ្នាក់ដឹកនាំធនាគារ Gazprombank និងលើអាជីវកម្មផ្សេងៗទៀតដើម្បីដាក់ទណ្ឌកម្មលើរដ្ឋាភិបាលរុស្ស៊ីសម្រាប់ការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

២០:៤៩ ៨.៥.២០២២

ថ្ងៃអាទិត្យ ទី ៨ ខែឧសភា៖

បណ្ដាមេដឹកនាំនៃក្រុមប្រទេស G-7 បានបញ្ជាក់នៅក្នុងសេចក្ដីថ្លែងការណ៍រួមមួយនៅថ្ងៃអាទិត្យនេះថា ពួកគេនឹងធ្វើឲ្យប្រទេសរុស្ស៊ីកាន់តែឯកោផ្នែកសេដ្ឋកិច្ចបន្ថែមទៀត ហើយនឹង «បង្កើន» យុទ្ធនាការប្រឆាំងនឹងឥស្សរជនរុស្ស៊ីរូបណាដែលគាំទ្រប្រធានាធិបតីរុស្ស៊ីលោក Vladimir Putin។ បន្ទាប់ពីបានជួបប្រជុំតាមអនឡាញជាមួយនឹងប្រធានាធិបតីអ៊ុយក្រែនលោក Volodymyr Zelenskyy រួចមក បណ្ដាមេដឹកនាំនៃក្រុមប្រទេស G-7 បាននិយាយថា ពួកគេនឹងកាត់ផ្ដាច់សេវាសំខាន់ៗដែលរុស្ស៊ីពឹងលើ ដោយធ្វើឲ្យរុស្ស៊ីកាន់តែឯកោបន្ថែមទៀត «នៅគ្រប់ផ្នែកទាំងអស់នៃសេដ្ឋកិច្ចរបស់ខ្លួន»។ នេះបើយោងតាមទីភ្នាក់ងារព័ត៌មាន Reuters។/
ប្រធានរដ្ឋសភាសហរដ្ឋអាមេរិកអ្នកស្រី Nancy Pelosi បានបញ្ជាក់ប្រាប់ទូរទស្សន៍ CBS នៅថ្ងៃអាទិត្យនេះថា សភាសហរដ្ឋអាមេរិកចាំបាច់ត្រូវអនុម័តនៅត្រឹមចុងខែនេះលើសំណើច្បាប់មួយដែលនឹងផ្ដល់ឲ្យប្រទេសអ៊ុយក្រែននូវជំនួយយោធានិងមនុស្សធម៌ចំនួន ៣៣ ពាន់លានដុល្លារ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃអាទិត្យនេះថា លោកបានពិភាក្សាជាមួយនឹងរដ្ឋមន្ត្រីការបរទេសសហរដ្ឋអាមេរិកលោក Antony Blinken អំពីវិធីធ្វើយ៉ាងណាកុំឲ្យមានការរារាំងដល់ការនាំចេញស្បៀងអាហាររបស់ប្រទេសអ៊ុយក្រែន និងអំពីវិធីធានានូវសន្តិសុខស្បៀងអាហារសាកលលោក។ ប្រទេសអ៊ុយក្រែនដែលជាប្រទេសសម្បូរទៅដោយធញ្ញជាតិនិងគ្រាប់ដំណាំប្រេងដ៏ចម្បងមួយនៅលើពិភពលោក ធ្លាប់បាននាំចេញធញ្ញជាតិភាគច្រើនបំផុតរបស់ខ្លួនតាមរយៈកំពង់ផែនៅសមុទ្រខ្មៅ ដែលកំពង់ផែទាំងនេះត្រូវបានរាំងខ្ទប់ដោយរុស្ស៊ី តាំងពីពេលដែលរុស្ស៊ីបានចាប់ផ្ដើមឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ រដ្ឋមន្ត្រីការបរទេសអ៊ុយក្រែនលោក Dmytro Kuleba (ស្ដាំ) និងរដ្ឋមន្ត្រីការបរទេសសហរដ្ឋអាមេរិកលោក Antony Blinken ថ្លែងសុន្ទរកថាបន្ទាប់ពីជំនួបមួយរវាងរដ្ឋមន្ត្រីការបរទេសអង្គការអូតង់ នៅទីស្នាក់ការអង្គការអូតង់ក្នុងទីក្រុងព្រុចសែល ប្រទេសបែលហ្សិក ថ្ងៃទី៧ ខែមេសា ឆ្នាំ២០២២។ (REUTERS)

ប្រធានរដ្ឋសភាអាល្លឺម៉ង់អ្នកស្រី Baerbel Bas បានជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy នៅក្នុងរដ្ឋធានីកៀវ ប្រទេសអ៊ុយក្រែននៅថ្ងៃអាទិត្យនេះ ដើម្បីរំឭកដល់ជនរងគ្រោះនៃសម័យសង្គ្រាមលោកលើកទីពីរ និងដើម្បីពិភាក្សាអំពីការផ្ដល់សព្វាវុធនិងមហិច្ឆតារបស់អ៊ុយក្រែននៅក្នុងការចូលជាសមាជិករបស់សហភាពអឺរ៉ុប។ នៅក្នុងវីដេអូមួយអំពីជំនួបជាមួយនឹងអ្នកស្រី Bas លោក Zelenskyy បាននិយាយថា ការទទួលបានការយល់ព្រមពីរដ្ឋសភាអាល្លឺម៉ង់នៅក្នុងការផ្ដល់សព្វាវុធធុនធ្ងន់ដើម្បីជួយអ៊ុយក្រែននៅក្នុងការទប់ទល់នឹងការវាយប្រហាររបស់រុស្ស៊ីគឺជា «អាទិភាពកំពូល» មួយរបស់ប្រទេសរបស់លោក។ លោក Zelenskyy ក៏បានស្នើអ្នកស្រី Bas និងរដ្ឋសភាអាល្លឺម៉ង់ផងដែរឲ្យគាំទ្រអ៊ុយក្រែននៅក្នុងកិច្ចប្រឹងប្រែងដើម្បីបានចូលជាសមាជិកសហភាពអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
ប៉ូលិសអាល្លឺម៉ង់នៅថ្ងៃអាទិត្យនេះបានដកចេញនូវទង់ជាតិអ៊ុយក្រែនដ៏ធំមួយដែលបាតុករបានដាក់បង្ហាញនៅបូជនីយដ្ឋានសង្គ្រាមសូវៀតនៅកណ្ដាលទីក្រុងប៊ែរឡាំង ដោយបាននិយាយថាការធ្វើដូច្នេះគឺដើម្បីធានាថាពិធីរំឭកសង្គ្រាមលោកលើកទីពីរធ្វើឡើងដោយសន្តិវិធី។ ប៉ូលិសក្រុងប៊ែរឡាំងបានដាក់បម្រាមមិនឲ្យតាំងបង្ហាញនូវទង់ជាតិឬក៏និមិត្តសញ្ញាយោធាណាមួយនៅឯបូជនីយដ្ឋានទាំង ១៥ នៅទូទាំងក្រុងប៊ែរឡាំង។ នេះបើយោងតាមទីភ្នាក់ងារព័ត៌មាន AFP។
លោកស្រី Jill Biden ភរិយារបស់ប្រធានាធិបតីសហរដ្ឋអាមេរិកលោក Joe Biden បានធ្វើទស្សនកិច្ចដោយមិនបានប្រកាសឲ្យដឹងជាមុនទៅកាន់ប្រទេសអ៊ុយក្រែននៅថ្ងៃអាទិត្យនេះ ដោយឆ្លងព្រំដែនពីប្រទេសស្លូវ៉ាគី ដើម្បីទៅជួបជាមួយនឹងលោកស្រី Olena Zelenska ភរិយារបស់ប្រធានាធិបតីអ៊ុយក្រែនលោក Volodymyr Zelenskyy នៅឯសាលារៀនមួយកន្លែងដែលគេប្រើជាទីជម្រកសម្រាប់ជនភៀសខ្លួន។ នេះបើតាមការបញ្ជាក់របស់អ្នកនាំពាក្យរបស់លោកស្រី។ លោកស្រី Biden បានប្រាប់អ្នកកាសែតថា៖ «ខ្ញុំចង់មកនៅចំទិវាអ្នកម្ដាយ។ ខ្ញុំគិតថាវាជាការសំខាន់នៅក្នុងការបង្ហាញដល់ប្រជាពលរដ្ឋអ៊ុយក្រែនថា សង្គ្រាមនេះត្រូវតែបញ្ឈប់ ហើយសង្គ្រាមនេះមានភាពឃោរឃៅ និងថាប្រជាពលរដ្ឋអាមេរិកាំងគាំទ្រប្រជាពលរដ្ឋអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។

អ្នកស្រី Jill Biden ភរិយារបស់ប្រធានាធិបតីសហរដ្ឋអាមេរិក(ឆ្វេង) ជួបជាមួយនឹងអ្នកស្រី Olena Zelenska ភរិយារបស់ប្រធានាធិបតីអ៊ុយក្រែន នៅទីក្រុង Uzhhorod ប្រទេសអ៊ុយក្រែន ថ្ងៃទី ៨ ខែឧសភា ឆ្នាំ២០២២។ (Susan Walsh/Pool via REUTERS)

លោកស្រី Jill Biden ភរិយារបស់ប្រធានាធិបតីសហរដ្ឋអាមេរិកលោក Joe Biden បានជួបជាមួយនឹងជនភៀសខ្លួនអ៊ុយក្រែននៅភាគខាងកើតនៃប្រទេសស្លូវ៉ាគីនៅថ្ងៃអាទិត្យនេះ ដែលជាថ្ងៃចុងក្រោយនៃដំណើរទស្សនកិច្ចរបស់អ្នកស្រីទៅកាន់ប្រទេសរូម៉ានីនិងស្លូវ៉ាគីដើម្បីសួរសុខទុក្ខទាហានអាមេរិកាំងដែលឈរជើងនៅទីនោះនិងស្ត្រីនិងកុមារដែលភៀសខ្លួនពីការឈ្លានពានរបស់រុស្ស៊ីនៅអ៊ុយក្រែន។ លោកស្រី Biden បាននិយាយជាមួយនឹងក្រុមគ្រួសារជនភៀសខ្លួន អ្នកស្ម័គ្រចិត្ត និងមន្ត្រីអាជ្ញាធរមូលដ្ឋាននៅឯមណ្ឌលជនភៀសខ្លួនក្នុងទីក្រុង Kosice នៅភាគខាងកើតប្រទេសស្លូវ៉ាគី ដែលជាចំណុចឆ្លងកាត់ចម្បងមួយសម្រាប់ជនភៀសខ្លួនជាង ៤០០.០០០ នាក់ ដែលបានឆ្លងព្រំដែនទៅកាន់ប្រទេសស្លូវ៉ាគីតាំងពីពេលដែលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអាទិត្យនេះថា អំពើអាក្រក់បានត្រឡប់មកកាន់ប្រទេសអ៊ុយក្រែនវិញហើយ។ លោកលើកឡើងដូច្នេះនៅពេលដែលលោកថ្លែងសុន្ទរកថាដ៏រំជួលចិត្តមួយសម្រាប់ទិវាជ័យជម្នះ ដែលជាថ្ងៃដែលទ្វីបអឺរ៉ុបរំឭកអំពីការចុះចាញ់ជាផ្លូវការរបស់ប្រទេសអាល្លឺម៉ង់ចំពោះភាគីសម្ព័ន្ធមិត្តនៅក្នុងសម័យសង្គ្រាមលោកលើកទីពីរ។ លោក Zelenskyy ថ្លែងដូច្នេះថា៖ «អំពើអាក្រក់បានត្រឡប់មកវិញម្ដងទៀតហើយក្នុងទម្រង់ផ្សេង នៅក្រោមពាក្យស្លោកផ្សេង ប៉ុន្តែក្នុងគោលបំណងដូចគ្នា»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin បានសច្ចានៅថ្ងៃអាទិត្យនេះថា៖ «ដូចនៅក្នុងឆ្នាំ ១៩៤៥ ដែរ យើងនឹងទទួលជ័យជម្នះ»។ លោកថ្លែងដូច្នេះ នៅពេលដែលលោកអបអរសាទរបណ្ដាប្រទេសដែលធ្លាប់ស្ថិតក្រោមអតីតសហភាពសូវៀតនៅខួបទី ៧៧ នៃការបរាជ័យរបស់អាល្លឺម៉ង់ក្នុងសម័យសង្គ្រាមលោកលើកទីពីរ។ លោក Putin បញ្ជាក់ដូច្នេះថា៖ «ថ្ងៃនេះ ទាហានរបស់យើង ដូចទៅនឹងបុព្វបុរសរបស់ពួកគេដែរ កំពុងប្រយុទ្ធកៀកស្មាគ្នាដើម្បីរំដោះទឹកដីកំណើតរបស់ពួកគេពីអំពើអាក្រក់របស់ពួកណាហ្ស៊ី ពោរពេញដោយភាពជឿជាក់ថា ដូចនៅក្នុងឆ្នាំ ១៩៤៥ ដែរ យើងនឹងទទួលជ័យជម្នះ»។ នេះបើយោងតាមទីភ្នាក់ងារព័ត៌មាន AFP។
ប្រធានរដ្ឋសភាអាល្លឺម៉ង់អ្នកស្រី Baerbel Bas បានធ្វើដំណើរទៅដល់រដ្ឋធានីកៀវ ប្រទេសអ៊ុយក្រែននៅថ្ងៃអាទិត្យនេះ ដើម្បីរំឭកដល់ជនរងគ្រោះក្នុងសម័យសង្គ្រាមលោកលើកទីពីរ និងដើម្បីពិភាក្សាផ្នែកនយោបាយ។ នេះបើតាមការបញ្ជាក់របស់លោក Enrico Brissa ប្រធានផ្នែកពិធីការនៃរដ្ឋសភាអាល្លឺម៉ង់ នៅលើ Twitter។ លោក Brissa បានបង្ហោះរូបថតមួយចំនួននៅលើ Twitter ដែលបង្ហាញអំពីអ្នកស្រី Baerbel ធ្វើដំណើរតាមរថភ្លើងទៅដល់រដ្ឋធានីកៀវ និងអំពីជំនួបរបស់អ្នកស្រីជាមួយនឹងនាយករដ្ឋមន្ត្រីអ៊ុយក្រែនលោក Denys Shmyhal។ នេះបើយោងតាមទីភ្នាក់ងារព័ត៌មាន Reuters។

ប្រធានសភាអាល្លឺម៉ង់ អ្នកស្រី Baerbel Bas (ឆ្វេង) ដែលត្រូវបានអមដំណើរដោយប្រធានសភាអ៊ុយក្រែន លោក Ruslan Stefanchuk ចូលរួមក្នុងពិធីបំពាក់កម្រងផ្កានៅចេតិយទាហានអ៊ុយក្រែន ខណៈដែលរុស្ស៊ីបន្ដវាយប្រហារលើអ៊ុយក្រែន នៅទីក្រុងកៀវ ប្រទេសអ៊ុយក្រែន ថ្ងៃទី ៨ ខែឧសភា ឆ្នាំ២០២២។ (Reuters)

មន្ត្រីការទូតអឺរ៉ុបបានជាប់គាំងនៅក្នុងការចរចាដ៏តឹងតែងអំពីលក្ខខណ្ឌនៃទណ្ឌកម្មជុំទី ៦ របស់សហភាពអឺរ៉ុបប្រឆាំងនឹងរុស្ស៊ីនៅថ្ងៃអាទិត្យនេះ ដោយប្រទេសសមាជិកសហភាពអឺរ៉ុបមួយចំនួនស្វះស្វែងចង់បានការធានាចំពោះការផ្គត់ផ្គង់ប្រេងឥន្ធនៈរបស់ពួកគេ។ នៅក្នុងកញ្ចប់ទណ្ឌកម្មជុំទី ៦ ដែលស្នើឡើងដោយគណៈកម្មការអឺរ៉ុបនៃសហភាពអឺរ៉ុបកាលពីសប្ដាហ៍មុននេះ ប្រទេសជាសមាជិកសហភាពអឺរ៉ុបភាគច្រើននឹងបញ្ឈប់ការនាំចូលប្រេងឥន្ធនៈពីរុស្ស៊ីនៅត្រឹមចុងឆ្នាំនេះ ដើម្បីដាក់ទណ្ឌកម្មលើរុស្ស៊ីសម្រាប់ការឈ្លានពានរបស់រុស្ស៊ីលើអ៊ុយក្រែន។ ប៉ុន្តែប្រទេសជាសមាជិកមួយចំនួន ជាពិសេសប្រទេសហុងគ្រី បានទាមទារឲ្យមានការលើកលែងពីការហាមឃាត់នេះ។ មន្ត្រីការទូតអឺរ៉ុបនានាបានជួបប្រជុំគ្នាម្ដងទៀតនៅថ្ងៃអាទិត្យនេះ ប៉ុន្តែក្ដីសង្ឃឹមដែលថាកញ្ចប់ទណ្ឌកម្មនេះនឹងរួចរាល់មុនថ្ងៃចន្ទស្អែកបានធ្លាក់ចុះ។ លោក Josep Borrell ប្រធានផ្នែកគោលនយោបាយការបរទេសនៃសហភាពអឺរ៉ុបបាននិយាយថា ប្រសិនបើគ្មានការព្រមព្រៀងណាមួយនៅចុងសប្ដាហ៍នេះ លោកនឹងកោះហៅរដ្ឋមន្ត្រីការបរទេសនៃបណ្ដាប្រទេសជាសមាជិកសហភាពអឺរ៉ុបឲ្យប្រជុំម្ដងទៀតនៅសប្ដាហ៍ក្រោយ។ នេះបើយោងតាមទីភ្នាក់ងារព័ត៌មាន AFP។
ក្រុមហ៊ុន Gazprom ដែលជាក្រុមហ៊ុនផលិតប្រេងឥន្ធនៈរបស់រុស្ស៊ី បានបញ្ជាក់ថា ខ្លួនបានផ្គត់ផ្គង់ឧស្ម័នធម្មជាតិទៅកាន់ទ្វីបអឺរ៉ុបតាមរយៈប្រទេសអ៊ុយក្រែននៅថ្ងៃអាទិត្យនេះ ស្របតាមសំណើរបស់អតិថិជននៅអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិរុស្ស៊ីបានបញ្ជាក់នៅថ្ងៃអាទិត្យនេះថា ខ្លួនបានបំផ្លាញនាវាចម្បាំងធុនតូចមួយគ្រឿងរបស់អ៊ុយក្រែននៅជិតទីក្រុង Odesa ប្រទេសអ៊ុយក្រែន ដោយការវាយប្រហារដោយមីស៊ីលកាលពីយប់មិញ។ ក្រសួងនេះក៏បានបន្ថែមផងដែរថា កងទ័ពជើងអាកាសរបស់ខ្លួនបានបាញ់ទម្លាក់យន្តហោះទម្លាក់គ្រាប់បែក SU-24 របស់អ៊ុយក្រែនចំនួនពីរគ្រឿងនិងឧទ្ធម្ភាគចក្រមួយគ្រឿងនៅពីលើកោះ Snake នៅក្នុងសមុទ្រខ្មៅ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃសៅរ៍ថា លោកអស់វាចានឹងថ្លែង បន្ទាប់ពីការបាញ់ផ្លោងរបស់រុស្ស៊ីបានបំផ្លាញសារមន្ទីរមួយកន្លែងដែលឧទ្ទិសដល់លោក Hryhoriy Skovoroda ដែលជាទស្សនវិទូនិងជាកវីនៅសតវត្សទី ១៨។ លោក Zelenskyy បានថ្លែងនៅក្នុងសុន្ទរកថាតាមវីដេអូកាលពីយប់ថ្ងៃសៅរ៍ថា៖ «ជារៀងរាល់ថ្ងៃនៅក្នុងសង្គ្រាមនេះ កងទ័ពរុស្ស៊ីបានធ្វើរឿងដែលធ្វើឲ្យខ្ញុំអួលដើមក។ បន្ទាប់មក នៅថ្ងៃបន្ទាប់ កងទ័ពរុស្ស៊ីបានធ្វើរឿងផ្សេងទៀតដែលធ្វើឲ្យអ្នកមានអារម្មណ៍ដូច្នេះម្ដងទៀត»។ នេះបើយោងតាមទីភ្នាក់ងារព័ត៌មាន Reuters។

១៩:៣៤ ៧.៥.២០២២

ថ្ងៃសៅរ៍ ទី ៧ ខែឧសភា៖

បញ្ជាការយោធាអ៊ុយក្រែនបានថ្លែងនៅថ្ងៃសៅរ៍ថា រុស្ស៊ីបានបន្តវាយប្រហារលើតំបន់រោងចក្រដែកថែប Azovstal នៅទីក្រុងកំពង់ផែ Mariupol។ សារមួយរបស់យោធាអ៊ុយក្រែនដែលបានបង្ហោះលើបណ្តាញសង្គម Facebook រាល់ល្ងាច បានឲ្យដឹងថា៖ «ដោយមានការគាំទ្រជាការបាញ់កាំភ្លើងធំ និងរថក្រោះ (សត្រូវ) បានបន្តសកម្មភាពវាយប្រហាររបស់ខ្លួន»។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានជួបពិភាក្សាជាមួយសមាជិករដ្ឋាភិបាលរបស់លោក កាលពីថ្ងៃសៅរ៍ ដើម្បីពិភាក្សាអំពីសេដ្ឋកិច្ចរបស់អ៊ុយក្រែន។ លោក Zelenskyy បានថ្លែងអំពីការខ្វះខាតប្រេងឥន្ធនៈ ដែលកំពុងប៉ះពាល់ដល់អ៊ុយក្រែន ចាប់តាំងពីការឈ្លានពានរបស់រុស្ស៊ីបានកើតឡើង។ នេះបើតាមទីភ្នាក់ងារព័ត៌មាន AP។
ទីភ្នាក់ងារព័ត៌មាន Reuters បានរាយការណ៍ថា លោកស្រី Jill Biden ភរិយារបស់ប្រធានាធិបតីសហរដ្ឋអាមេរិកលោក Joe Biden បានជួបជាមួយក្រុមស្ត្រីជាម្តាយនិងជាអ្នកបម្រើការងារក្នុងវិស័យអប់រំ នៅទីក្រុង Bucharest ប្រទេសរូម៉ានី កាលពីថ្ងៃសៅរ៍នៅសាលារៀនមួយ ដោយបានសរសើរពីភាពរឹងមាំនិងការតស៊ូជម្នះរបស់ស្ត្រីទាំងនោះ។ លោកស្រី Jill Biden ក៏បានជួបក្មេងៗជនជាតិអ៊ុយក្រែននិងរូម៉ានី ដែលកំពុងគូររូបបាតដៃពួកគេលើក្រដាសដែលមានពណ៌តំណាងឲ្យទង់ជាតិរបស់ប្រទេសពួកគេ។ លោកស្រីបានធ្វើដំណើរទៅកាន់សាលារៀននេះ ដោយមានការអមដំណើរដោយលោកស្រី Carmen Iohannis ភរិយារបស់ប្រធានាធិបតីរូម៉ានី ដែលជាគ្រូបង្រៀនម្នាក់ផងដែរ។

លោកស្រី Jill Biden និយាយជាមួយសិស្សអ៊ុយក្រែន នៅពេលលោកស្រីធ្វើទស្សនកិច្ចនៅសាលារៀន Uruguay នៅរដ្ឋធានី Bucharest ប្រទេសរូម៉ានី ថ្ងៃទី ៧ ខែឧសភា ឆ្នាំ ២០២២។

លោក Dmytro Zhyvytskyi អភិបាលតំបន់ បានឲ្យដឹងថា មីស៊ីលជាច្រើនគ្រាប់របស់រុស្ស៊ីដែលបាញ់តាមអាកាស បានធ្លាក់ចំទីតាំងពីរនៅក្បែរព្រំដែនរុស្ស៊ីក្នុងតំបន់ Sumy ភាគខាងជើងប្រទេសអ៊ុយក្រែន កាលពីថ្ងៃសៅរ៍។ មន្ត្រីយាមល្បាតព្រំដែនម្នាក់បានរងរបួស នៅក្នុងសង្កាត់ Myropilske និងសង្កាត់ Khotin។ លោក Zhyvytskyi បានសរសេរបែបនេះតាមកម្មវិធីផ្ញើសារ Telegram។ នេះបើតាមទីភ្នាក់ងារព័ត៌មាន Reuters។
ក្រសួងការពារជាតិអ៊ុយក្រែន ឲ្យដឹងថា យោធាអ៊ុយក្រែនបានបំផ្លាញនាវាចម្បាំងមួយរបស់រុស្ស៊ី នៅកោះពស់នៃតំបន់សមុទ្រខ្មៅ ដោយបានបង្ហោះវីដេអូតាមបណ្តាញសង្គមបង្ហាញទិដ្ឋភាពផ្ទុះឡើងលើផ្ទាំងមួយ។ រុស្ស៊ីមិនទាន់បញ្ជាក់ពីការវាយប្រហារនេះនៅឡើយទេ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មានបារាំង AFP។
ការបាញ់គ្រាប់ផ្តក់របស់ទាហានរុស្ស៊ីបានធ្លាក់ចំសារមន្ទីរមួយ ដែលឧទ្ទិសដល់ទស្សនវិទូនិងអ្នកនិពន្ធកំណាព្យអ៊ុយក្រែន Hryhoriy Skovoroda នៅភូមិ Skovorodynivka ក្នុងប្រទេសអ៊ុយក្រែន ដោយបណ្តាលឲ្យមានអគ្គិភ័យឆាបឆេះហើយបានបំផ្លាញអគារនោះ។ នេះបើតាមការលើកឡើងរបស់លោក Oleh Sinegubov អភិបាលតំបន់ Kharkiv កាលពីថ្ងៃសៅរ៍។ នេះបើតាមទីភ្នាក់ងារព័ត៌មាន Reuters។
ស្នងការសិទ្ធិមនុស្សរបស់ក្រុមប្រឹក្សាអឺរ៉ុបលោកស្រី Dunja Mijatovic បានចាត់ទុកសកម្មភាពរំលោភសិទ្ធិមនុស្សរបស់រុស្ស៊ីលើប្រទេសអ៊ុយក្រែនថា «តក់ស្លុត» បន្ទាប់ពីលោកស្រីបានធ្វើទស្សនកិច្ចរយៈពេល ៤ ថ្ងៃនៅក្នុងប្រទេសអ៊ុយក្រែន។ ក្រុមប្រឹក្សាអឺរ៉ុបបានថ្លែងតាមសេចក្តីថ្លែងការណ៍មួយថា ដំណើរទស្សនកិច្ចនៅតាមតំបន់ជាយរដ្ឋធានីកៀវ បានបង្ហាញឲ្យឃើញ «ភស្តុតាងកាន់តែច្រើនឡើងអំពីការសម្លាប់តាមតែអំពើចិត្ត ការធ្វើទារុណកម្ម និងការបាត់ខ្លួនមនុស្សទាំងបង្ខំ»។ នេះបើតាមទីភ្នាក់ងារព័ត៌មានបារាំង AFP។
រដ្ឋមន្ត្រីការបរទេសសហរដ្ឋអាមេរិក Antony Blinkey បានថ្លែងនៅថ្ងៃសៅរ៍ថា ប្រធានាធិបតីរុស្ស៊ីលោក Vladimir Putin បានព្យាយាម «កែប្រែប្រវត្តិសាស្ត្រ» ដោយប្រៀបធៀបអ៊ុយក្រែនទៅនឹងអាល្លឺម៉ង់ក្រោមការគ្រប់គ្រងរបស់ពួកណាហ្ស៊ី នៅក្នុងកិច្ចប្រឹងប្រែងមួយដើម្បីធ្វើជាមូលហេតុត្រឹមត្រូវសម្រាប់សកម្មភាពឈ្លានពានរបស់ខ្លួនលើប្រទេសអ៊ុយក្រែន ដែលជាប្រទេសជិតខាង។ នៅក្នុងសេចក្តីប្រកាសព័ត៌មានមួយមុនខួបទី ៧៧ នៃទិវាជ័យជម្នះក្នុងថ្ងៃអឺរ៉ុប លោក Blinken បានលើកឡើងអំពីសង្គ្រាមចុងក្រោយដែលបានកើតឡើងនៅក្នុងទ្វីបអឺរ៉ុប។ ក្នុងការធ្វើដូច្នេះ លោក Blinken បានថ្លែងថា ពិភពលោកចាំបាច់ត្រូវ «បង្កើនការតាំងចិត្តរបស់យើងដើម្បីជម្នះនឹងជនដែលបច្ចុប្បន្នព្យាយាមកែប្រែការចងចាំបែបប្រវត្តិសាស្ត្រ ដើម្បីតែមហិច្ឆតារបស់ខ្លួន»។ នេះបើតាមសេចក្តីរាយការណ៍របស់កាសែត The Washington Post។
ទីភ្នាក់ងារព័ត៌មាន Reuters បានរាយការណ៍ថា តំណាងរាស្ត្រជាន់ខ្ពស់រុស្ស៊ីម្នាក់បានចោទប្រកាន់ថា រដ្ឋាភិបាលអាមេរិកបានរៀបចំប្រតិបត្តិការយោធានៅក្នុងប្រទេសអ៊ុយក្រែន ដោយចាត់ទុកសកម្មភាពនេះថាជាការលូកដៃពាក់ព័ន្ធដោយផ្ទាល់របស់សហរដ្ឋអាមេរិកនៅក្នុងសកម្មភាពយោធាប្រឆាំងនឹងរុស្ស៊ី។ លោក Vyacheslav Volodin បានសរសេរនៅតាមបណ្តាញ Telegram ថា «រដ្ឋាភិបាលអាមេរិកកំពុងរៀបចំនិងបង្កើតប្រតិបត្តិការយោធា ដូច្នេះវាស្មើនឹងការចូលរួមដោយផ្ទាល់ក្នុងសកម្មភាពយោធាប្រឆាំងនឹងប្រទេសរបស់យើង»។ រដ្ឋាភិបាលអាមេរិកនិងប្រទេសនៅអឺរ៉ុបដែលជាសមាជិកសម្ព័ន្ធភាពអូតង់ បានផ្តល់អាវុធធុនធ្ងន់ដល់រដ្ឋាភិបាលអ៊ុយក្រែន ដើម្បីជួយទប់ទល់នឹងការវាយប្រយុទ្ធរបស់រុស្ស៊ី ដែលអាចធ្វើឲ្យរុស្ស៊ីក្តោបក្តាប់ផ្នែកខ្លះនៃតំបន់ភាគខាងកើតនិងភាគខាងត្បូងប្រទេសអ៊ុយក្រែន ប៉ុន្តែបរាជ័យក្នុងការវាយកាន់កាប់រដ្ឋធានីកៀវ។
គ្រាប់មីស៊ីលជាច្រើនបានបាញ់ចំទីក្រុងកំពង់ផែ Odesa ដែលស្ថិតនៅភាគខាងត្បូង អ៊ុយក្រែនកាលពីសៅរ៍។ នេះបើតាមសេចក្តីថ្លែងការណ៍តាមទូរទស្សន៍របស់លោក Serhiy Bratchuk អ្នកនាំពាក្យរដ្ឋបាលតំបន់។ លោក Bratchuk បានថ្លែងថា គ្រាប់មីស៊ីលទាំងនេះបានបាញ់ចំទីក្រុង បន្ទាប់ពីមីស៊ីល ៤ គ្រាប់ បានបាញ់ចំទីតាំងនៅជុំវិញតំបន់ក្រុង Odesa កាលពីពេលព្រឹកថ្ងៃសៅរ៍។ នេះបើតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានគោរពវិញ្ញាណក្ខន្ធរបស់លោក Oleksandr Makhov អ្នកកាសែតអ៊ុយក្រែន ដែលបានស្លាប់នៅក្នុងសមរភូមិប្រយុទ្ធមួយក្បែរក្រុង Izyum នៃតំបន់ Kharkiv។ លោក Makhov អាយុ ៣៦ ឆ្នាំ គឺជាអ្នកកាសែតយោធាដ៏ឆ្នើមមួយរូបនៅក្នុងប្រទេសអ៊ុយក្រែន ដែលបានចូលបម្រើក្នុងជួរកងទ័ពអ៊ុយក្រែន គ្រាដែលរុស្ស៊ីបានចាប់ផ្តើមធ្វើសង្គ្រាមជាមួយអ៊ុយក្រែន។ នេះបើតាមទីភ្នាក់ងារព័ត៌មាន AP។

ពលរដ្ឋម្នាក់ជិះកង់កាត់អគារដែលត្រូវបានបំផ្លាញ ក្រោយទាហានរុស្ស៊ីបានបាញ់គ្រាប់ផ្តក់នៅក្រុង Irpin ប្រទេសអ៊ុយក្រែន ថ្ងៃទី ៧ ខែឧសភា ឆ្នាំ ២០២២។

អភិបាលតំបន់នៅក្នុងប្រទេសអ៊ុយក្រែន ឲ្យដឹងថា មនុស្សម្នាក់ត្រូវបានរាយការណ៍ថា បានស្លាប់ និងបីនាក់ទៀតបានរងរបួសកាលពីថ្ងៃសុក្រ ដោយសារតែការបាញ់គ្រាប់ផ្តក់របស់ទាហានរុស្ស៊ីនៅទីក្រុង Lyman ដែលស្ថិតនៅក្នុងតំបន់ Donetsk ភាគខាងកើតប្រទេសអ៊ុយក្រែន។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។
ប្រធានាធិបតីអ៊ុយក្រែន លោក Volodymyr Zelenskyy បានថ្លែងថា កិច្ចប្រឹងប្រែងផ្នែកការទូត កំពុងដំណើរការដើម្បីជួយសង្គ្រោះទាហានអ៊ុយក្រែនដែលជាប់គាំងនៅក្នុងរោងចក្រដែកថែប Azovstal នៅទីក្រុងកំពង់ផែ Mariupol ស្របពេលដែលជនស៊ីវិលជាបន្តបន្ទាប់ ត្រូវបានជម្លៀសចេញពីរោងចក្រដែលរងការវាយប្រហារយ៉ាង ធ្ងន់ធ្ងរ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
មន្ត្រីជាន់ខ្ពស់អ៊ុយក្រែនម្នាក់ប្រចាំក្រសួងមហាផ្ទៃ បានព្រមានអំពី«ការចាប់ផ្តើមសកម្មភាពបំផ្លិចបំផ្លាញនិងឧក្រិដ្ឋកម្មផ្សេងៗ» មុនថ្ងែជ័យជម្នះរបស់រស្ស៊ី ដែលនឹងធ្វើឡើងនៅថ្ងៃចន្ទ។ រដ្ឋាភិបាលរុស្ស៊ីប្រារព្ធទិវាជ័យជម្នះសូវៀតលើក្រុមណាហ្ស៊ីអាល្លឺម៉ង់ នៅក្នុងសង្គ្រាមលោកលើកទី ២ ដែលធ្វើឡើងជារៀងរាល់ឆ្នាំនៅថ្ងៃទី ៩ ខែឧសភា។ នេះបើតាមទីភ្នាក់ងារព័ត៌មាន AP។
ជនស៊ីវិល ៥០ នាក់ ត្រូវបានជម្លៀសកាលពីថ្ងៃសុក្រ ចេញពីរោងចក្រដែកថែប Azovstal នៅទីក្រុង Mariupol ប្រទេសអ៊ុយក្រែន ដែលត្រូវបានហ៊ុមព័ទ្ធដោយទាហានរុស្ស៊ី។ នេះបើតាមទីភ្នាក់ងារព័ត៌មាន AP។
សមាជិកនៃក្រុមប្រឹក្សាសន្តិសុខប្រចាំអង្គការសហប្រជាជាតិ រួមទាំងរុស្ស៊ី បានព្រមព្រៀងគ្នាអនុម័តលើសេចក្តីថ្លែងការណ៍មួយ ដែលបង្ហាញ «ការគាំទ្រដ៏ខ្លាំងក្លា» ដល់កិច្ចប្រឹងប្រែងរបស់អគ្គលេខាធិការអង្គការសហប្រជាជាតិលោក Antonio Guterres ដើម្បីស្វែងរកដំណោះស្រាយដោយសន្តិភាពមួយដល់«ជម្លោះ»នៅក្នុងប្រទេសអ៊ុយក្រែន។ នេះបើតាមទីភ្នាក់ងារព័ត៌មាន AP។
កាសែត The Washington Post រាយការណ៍ថា អគ្គលេខាធិការអង្គការសហប្រជាជាតិលោក Antonio Guterres នឹងធ្វើដំណើរទស្សនកិច្ចទៅប្រទេសម៉ុលដាវីនៅថ្ងៃចន្ទបន្ទាប់ពីមន្ត្រីការទូតជាន់ខ្ពស់ម្នាក់របស់សហភាពអឺរ៉ុប បានបង្ហាញក្តីបារម្ភពីមហិច្ឆតារបស់រុស្ស៊ី នៅក្នុងការពង្រីកការក្តោបក្តាប់រស់ខ្លួន ហួសពីព្រំដែនអ៊ុយក្រែន ហើយធ្លាយចូលទៅប្រទេសអឺរ៉ុបដែលនៅជិតខាងនោះ។
ទីភ្នាក់ងារព័ត៌មានរបស់រដ្ឋាភិបាលរុស្ស៊ី បានរាយការណ៍កាលពីថ្ងៃសុក្រថា សាធារណរដ្ឋប្រកាសផ្តាច់ខ្លួនពីរក្នុងតំបន់ឧស្សាហកម្មនាផ្នែកខាងកើតនៃប្រទេសអ៊ុយក្រែន បានចាត់តាំងឲ្យមានឯកអគ្គរដ្ឋទូតវិសាមញ្ញប្រចាំប្រទេសរុស្ស៊ី។ នេះបើតាមទីភ្នាក់ងារព័ត៌មាន AP។

រណ្តៅដ៏ជ្រៅមួយបានកើតឡើង ក្រោយគ្រាប់មីស៊ីលរុស្ស៊ីបានបាញ់ចំតំបន់រស់នៅរបស់ប្រជាពលរដ្ឋនៅភូមិ Bakhmut នៃតំបន់ Donetsk ថ្ងៃទី ៧ ខែឧសភា ឆ្នាំ ២០២២។

មន្ត្រីប្រចាំក្រុមប្រឹក្សាសន្តិសុខជាតិនៃប្រទេសអ៊ុយក្រែន កាលពីថ្ងៃសុក្រ បានព្រមានពលរដ្ឋក្នុងក្រុង អំពីការកើនឡើងនៃករណីបាញ់គ្រាប់ផ្តក់ នៅថ្ងៃអាទិត្យ និងថ្ងៃចន្ទ ដែលត្រូវនឹងពិធីអបអរសាទរថ្ងៃជ័យជម្នះរបស់រុស្ស៊ី។ នេះបើតាមទីភ្នាក់ងារព័ត៌មាន AP។
កាសែត The Washington Post បានរាយការណ៍ថា ជនជាតិអ៊ុយក្រែន ៤១ នាក់ រួមទាំងមន្ត្រីយោធា ២៨ នាក់ និងប្រធានព្រះវិហារគ្រិស្តនិកាយ Orthodox ម្នាក់ ត្រូវបានដោះលែង ក្រោយកិច្ចចរចាប្តូរអ្នកទោសជាមួយរុស្ស៊ី។ នាយករដ្ឋមន្ត្រីអ៊ុយក្រែន លោកស្រី Iryna Vereshchuk បានប្រកាសដូច្នេះ តាមបណ្តាញ Telegram។
លោកស្រី Jen Psaki អ្នកនាំពាក្យសេតវិមាន ថ្លែងថា លោកប្រធានាធិបតី Joe Biden នឹងជួបពិភាក្សាតាមប្រព័ន្ធអ៊ីនធឺណិតជាមួយមេដឹកនាំប្រទេសជាសមាជិក G-7 និងលោក Volodymyr Zelenskyy នៅថ្ងៃអាទិត្យ។ ថ្លែងកាលពីថ្ងៃសុក្រនៅលើយន្តហោះប្រធានាធិបតីអាមេរិក Air Force One លោកស្រី Psaki និយាយថា ប្រទេស G-7 នឹងពិភាក្សាគ្នាអំពីសង្គ្រាម ផលប៉ះពាល់ជាសកលលោក អនាគតរបស់ប្រទេសអ៊ុយក្រែន និងការពង្រីកការដាក់ទណ្ឌកម្មបន្ថែម។ នេះបើតាមទីភ្នាក់ងារព័ត៌មាន AP។
កាលពីថ្ងៃសុក្រ ប្រធានាធិបតីសហរដ្ឋអាមេរិកលោក Joe Biden បានអនុម័តឲ្យមានការដឹកជញ្ជូនជំនួយយោធាជាគ្រាប់កាំភ្លើងធំ និងប្រព័ន្ធរ៉ាដា ដែលមានតម្លៃជាទឹកប្រាក់ប្រមាណ ១៥០ លានដុល្លារ ទៅឲ្យប្រទេសអ៊ុយក្រែន ដើម្បីជួយអ៊ុយក្រែនវាយប្រយុទ្ធទប់ទល់នឹងកងកម្លាំងឈ្លានពានរបស់រុស្ស៊ី។ នេះបើតាមទីភ្នាក់ងារព័ត៌មាន AP។
ក្រុមផ្តាច់ខ្លួនដែលគាំទ្ររុស្ស៊ីនៅប្រទេសម៉ុលដាវី បានថ្លែងនៅថ្ងៃសៅរ៍ថា តំបន់ដែលខ្លួនបានកាន់កាប់ ត្រូវបានវាយប្រហារបួនលើកដោយដ្រូន នៅក្បែរព្រំដែនអ៊ុយក្រែន កាលពីយប់ថ្ងៃសុក្ររំលងអធ្រាត។ ក្នុងរយៈពេលជិតពីរសប្តាហ៍កន្លងមកនេះ ករណីវាយប្រហារស្រដៀងគ្នានេះដែលបានកើតឡើងនៅតំបន់ Transdniestria បានបង្កឲ្យមានក្តីបារម្ភជាអន្តរជាតិថា សង្គ្រាមរបស់រុស្ស៊ីនៅក្នុងប្រទេសអ៊ុយក្រែន អាចនឹងរីករាលដាលហួសព្រំដែនប្រយុទ្ធអ៊ុយក្រែន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
យោធាអ៊ុយក្រែនបានថ្លែងកាលពីថ្ងៃសុក្រថា ខ្លួនបានបោះជំហានទៅមុខនៅក្នុងតំបន់ Kharkiv ដោយវាយយកភូមិចំនួន ៥ និងផ្នែកខ្លះនៃភូមិទី ៦ មកវិញ។ នេះបើតាមទីភ្នាក់ងារព័ត៌មាន AP។
កាសែត The Washington Post បានរាយការណ៍ថា កាលពីថ្ងៃសៅរ៍ អ៊ុយក្រែនបានចោទទាហានរុស្ស៊ីថា បានបំផ្លាញស្ពានចំនួន ៣ នៅទីក្រុង Kharkiv ដែលជាទីក្រុងធំបង្អស់ទី ២ របស់អ៊ុយក្រែន ក្នុងគោលបំណងរារាំងការវាយប្រហារតទល់វិញពីទាហានអ៊ុយក្រែន។
ទីភ្នាក់ងារព័ត៌មាន AP រាយការណ៍ថា ភូមិមួយនៅតំបន់ Belgorod ភាគខាងត្បូងប្រទេសរុស្ស៊ី ដែលជាប់ព្រំដែនប្រទេសអ៊ុយក្រែន កំពុងជម្លៀសមនុស្សចេញពីទីនោះ ដោយសារការបាញ់គ្រាប់ផ្តក់ចេញពីតំបន់កាន់កាប់ដោយទាហានអ៊ុយក្រែន។ នេះបើតាមការអះអាងរបស់អភិបាលក្នុងតំបន់។
រដ្ឋមន្ត្រីហិរញ្ញវត្ថុអ៊ីតាលី បានអនុម័តលើប្រកាសមួយដែលនឹងរារាំងមិនឲ្យនាវាកម្សាន្តធំមួយគ្រឿង ធ្វើដំណើរចេញពីកំពង់ផែ Tuscan បន្ទាប់ពីការស៊ើបអង្កេត បានបង្ហាញឲ្យដឹងថា នាវា Scheherazade ដ៏ទំនើបនេះ មានជាប់ពាក់ព័ន្ធនឹង «សមាជិកសំខាន់ៗនៅក្នុងជួររដ្ឋាភិបាលរុស្ស៊ី»។ នេះបើតាមទីភ្នាក់ងារព័ត៌មាន AP។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃ​អង្គារ ទី ១០ ខែឧសភា៖

ថ្ងៃ​ចន្ទ ទី ៩ ខែឧសភា៖

ថ្ងៃអាទិត្យ ទី ៨ ខែឧសភា៖

ថ្ងៃសៅរ៍ ទី ៧ ខែឧសភា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

ថ្ងៃអង្គារ ទី ១០ ខែឧសភា៖

ថ្ងៃចន្ទ ទី ៩ ខែឧសភា៖