២២:២៧ ៦.៥.២០២២

ថ្ងៃសុក្រ ទី៦ ខែឧសភា៖

ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃសុក្រថា កិច្ចប្រជុំនៃរដ្ឋមន្ត្រីការបរទេសសហភាពអឺរ៉ុបនឹងធ្វើឡើងនៅសប្តាហ៍ក្រោយ ប្រសិនបើប្រទេសមកពីប្លុកនេះបរាជ័យក្នុងការឈានដល់កិច្ចព្រមព្រៀងស្តីពីហាមប្រាមការទិញប្រេងប្រឆាំងនឹងរុស្ស៊ីនៅចុងសប្តាហ៍នេះ។ នេះបើយោងតាមទៅភ្នាក់ងារព័ត៌មាន Reuters។
អ្នកនាំពាក្យរដ្ឋាភិបាលអាល្លឺម៉ង់ ថាអធិការបតីអាល្លឺម៉ង់ លោក Olaf Scholz នឹងចូលរួមក្នុងកិច្ចពិភាក្សាអនឡាញ G7 នៅថ្ងៃអាទិត្យ ស្តីពីស្ថានភាពក្នុងប្រទេសអ៊ុយក្រែន ដែលនឹងត្រូវចូលរួមដោយប្រធានាធិបតីអ៊ុយក្រែន លោក Volodymyr Zelenskyy នេះបើយោងតាមសារព័ត៌មាន Reuters។ អ្នកនាំពាក្យរូបនេះបានបន្ថែមថា លោក Scholz ក៏នឹងថ្លែងសុន្ទរកថាតាមទូរទស្សន៍ដល់ប្រជារាស្ត្រអាល្លឺម៉ង់នៅល្ងាចថ្ងៃទី៨ ខែឧសភា ដែលជាខួបនៃការបញ្ចប់សង្គ្រាមលោកលើកទីពីរ។ អ្នកនាំពាក្យរូបនេះបន្ថែមថា កាលបរិច្ឆេទនេះមានអត្ថន័យពិសេសនៅឆ្នាំនេះ ខណៈដែលប្រទេសពីរគឺអ៊ុយក្រែននិងរុស្ស៊ី ដែលធ្លាប់ជាជនរងគ្រោះនៃពួកណាស៊ីអាល្លឺម៉ង់ឥឡូវនេះកំពុងច្បាំងគ្នា។
មន្ត្រីអ៊ុយក្រែនបាននិយាយនៅថ្ងៃសុក្រថា ជនស៊ីវិលជាច្រើនទៀតត្រូវបានជួយសង្គ្រោះពីផ្លូវរូងក្រោមដីនៅក្រោមរោងចក្រដែកថែបដែលត្រូវបានឡោមព័ទ្ធក្នុងទីក្រុង Mariupol បើទោះបីជាក្រុមអ្នកប្រយុទ្ធអ៊ុយក្រែនបានជាប់នៅបរិវេណដ៏ធំនោះ ដើម្បីប្រឹងទប់ទល់ជាចុងក្រោយនឹងការកាន់កាប់ទីក្រុងកំពង់ផែយុទ្ធសាស្ត្រនេះទាំងស្រុងដោយរដ្ឋាភិបាលទីក្រុងម៉ូស្គូ។ នេះបើយោងតាមទីភ្នាក់ងារព័ត៌មាន AP។ ការប្រយុទ្ធនៅក្នុងទីក្រុងដ៏សំខាន់ចុងក្រោយរបស់អ៊ុយក្រែននេះហាក់ដូចជាកាន់តែអស់សង្ឃឹម។ យុទ្ធជនអ៊ុយក្រែនប្រហែល ២.០០០ នាក់ តាមការប៉ាន់ប្រមាណចុងក្រោយបង្អស់របស់រុស្ស៊ី ត្រូវបានជាប់នៅក្នុងផ្លូវរូងក្រោមដី និងលេណដ្ឋាននៅក្រោមរោងចក្រដែកថែប Azovstal ដ៏ធំល្វឹងល្វើយ ហើយពួកគេបានបដិសេធមិនព្រមចុះចាញ់ម្តងហើយម្តងទៀត។

រូបឯកសារ៖ ទាហានរុស្ស៊ីបានបាញ់ពីរថក្រោះអំឡុងពេលប្រយុទ្ធគ្នាក្នុងជម្លោះអ៊ុយក្រែននិងរុស្ស៊ីក្បែររោងចក្រដែក Azovstal ក្នុងក្រុងកំពង់ផែ Mariupol ភាគខាងត្បូង ប្រទេសអ៊ុយក្រែន កាលពីថ្ងៃទី៥ ខែឧសភា ឆ្នាំ២០២២។

ទីភ្នាក់ងារព័ត៌មាន Reuters បានរាយការណ៍ថា អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃសុក្រថា មានវោហាសាស្ត្រអរិភាពចេញពីប្រទេសប៉ូឡូញ ហើយថារដ្ឋាភិបាលក្រុងវ៉ាសូវី អាចជា «ប្រភពនៃការគំរាមកំហែង»។ ប្រទេសប៉ូឡូញបានដឹកនាំការអំពាវនាវឱ្យសហភាពអឺរ៉ុបពង្រឹងការដាក់ទណ្ឌកម្ម និងឱ្យសម្ព័ន្ធមិត្តអូតង់ផ្តល់អាវុធដល់អ៊ុយក្រែន ខណៈដែលខ្លួនព្យាយាមទប់ទល់នឹងកងកម្លាំងរុស្ស៊ី ដែលបានហូរចូលភាគខាងកើតរបស់ខ្លួន។ រដ្ឋមន្ត្រីក្រសួងបរិស្ថាននិងអាកាសធាតុប៉ូឡូញ លោកស្រី Anna Moskwa បាននិយាយកាលពីថ្ងៃចន្ទថា «ប៉ូឡូញមានមោទនភាពដែលមានឈ្មោះនៅក្នុងបញ្ជីប្រទេសដែលមិនរួសរាយរាក់ទាក់របស់លោក Putin»។
អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅថ្ងៃសុក្រថា ព័ត៌មានដែលថារុស្ស៊ីកំពុងលួចគ្រាប់ធញ្ញជាតិពីអ៊ុយក្រែនទំនងជាក្លែងក្លាយ។ លោក Peskov ថ្លែងដូច្នេះ បន្ទាប់ពីមន្ត្រីទីភ្នាក់ងារអាហាររបស់អង្គការសហប្រជាជាតិបាននិយាយថា មានសញ្ញាបង្ហាញថា រុស្ស៊ីបាននឹងកំពុងដឹកជញ្ជូនគ្រាប់ធញ្ញជាតិចេញពីតំបន់កាន់កាប់នៃប្រទេសជិតខាងរបស់ខ្លួន។ លោក Peskov បាននិយាយថា «យើងមិនមានព័ត៌មានទេ វាជាព័ត៌មានក្លែងក្លាយ»។ នេះបើយោងតាមសារព័ត៌មាន Reuters។
សារព័ត៌មាន Reuters រាយការណ៍ថា លោក Josef Schmidhuber នាយករងអង្គការស្បៀងអាហារ និងកសិកម្មអង្គការសហប្រជាជាតិផ្នែកទីផ្សារនិងពាណិជ្ជកម្ម បានប្រាប់សន្និសីទសារព័ត៌មានទីក្រុងហ្សឺណែវតាមរយៈ Zoom នៅថ្ងៃសុក្រថា គ្រាប់ធញ្ញជាតិជិត ២៥ លានតោនត្រូវបានជាប់គាំងនៅក្នុងប្រទេសអ៊ុយក្រែន ហើយមិនអាចចាកចេញពីប្រទេស ដោយសារតែបញ្ហាប្រឈមផ្នែកហេដ្ឋារចនាសម្ព័ន្ធ និងការបានបិទបណ្តាកំពង់ផែសមុទ្រខ្មៅរួមទាំងកំពង់ផែ Mariupol។ ការស្ទះនេះត្រូវបានគេមើលឃើញថា ជាកត្តាដែលបណ្តាលឲ្យតម្លៃអាហារឡើងថ្លៃខ្ពស់។ យោងតាមទិន្នន័យរបស់ក្រុមប្រឹក្សាធញ្ញជាតិអន្តរជាតិ អ៊ុយក្រែនជាប្រទេសនាំចេញពោតធំជាងគេទី ៤ របស់ពិភពលោកក្នុងរដូវកាលឆ្នាំ ២០២០/២១ និងជាប្រទេសនាំចេញស្រូវសាលីទី ៦។
អ៊ុយក្រែនបានទទួលការសន្យាចំនួន ៦,៥ ពាន់លានដុល្លារនៅក្នុងសន្និសីទម្ចាស់ជំនួយអន្តរជាតិនៅក្រុងវ៉ាសូវីប្រទេសប៉ូឡូញ កាលពីថ្ងៃព្រហស្បតិ៍។ ប្រធានការិយាល័យ VOA អឺរ៉ុបខាងកើត លោក Myroslava Gongadze បានពិភាក្សាអំពីលទ្ធផលពីសន្និសីទ និងបញ្ហាផ្សេងទៀត ជាមួយនាយករដ្ឋមន្ត្រីអ៊ុយក្រែន លោក Denys Shmyhal នៅរដ្ឋធានីរបស់ប៉ូឡូញ។
នាយករដ្ឋមន្ត្រីហុងគ្រីបានអះអាងសារជាថ្មីអំពីជំហររបស់រដ្ឋាភិបាលរបស់លោកថា ខ្លួននឹងមិន គាំទ្រកញ្ចប់ទណ្ឌកម្មថ្មីរបស់សហភាពអឺរ៉ុប ដែលបានស្នើឡើងប្រឆាំងនឹងរុស្ស៊ី ដែលរួមមានការហាមប្រាមលើការនាំចូលប្រេង។ ថ្លែងតាមវិទ្យុរដ្ឋនៅថ្ងៃសុក្រ លោក Viktor Orban បាននិយាយថា ការហាមប្រាមនឹងដូចជាការទម្លាក់ «គ្រាប់បែកបរមាណូ» ទៅលើសេដ្ឋកិច្ចហុងគ្រី។ ប៉ុន្តែលោកក៏បាននិយាយដែរថា រដ្ឋាភិបាលទីក្រុង Budapest បើកចំហចំពោះសំណើផ្សេងទៀត ប្រសិនបើពួកគេមិនប៉ះពាល់ដល់ផលប្រយោជន៍របស់ហុងគ្រី។ នេះបើយោងតាមសេចក្តីរាយការណ៍របស់ វិទ្យុអឺរ៉ុបសេរី/វិទ្យុសេរីភាព។

រូបឯកសារ៖ នាយករដ្ឋមន្ត្រីហុងគ្រី លោក Viktor Orban ទទួលស្គាល់អ្នកគាំទ្រក្នុងពេលការប្រមូលផ្តុំពេលយប់នៃការបោះឆ្នោតក្នុងទីក្រុង Budapest ប្រទេសហុងគ្រី ថ្ងៃទី៣ ខែមេសា ឆ្នាំ២០២២។

ទីភ្នាក់ងារព័ត៌មាន Reuters បានរាយការណ៍ថា ប្រទេសអ៊ុយក្រែនបានអំពាវនាវទៅកាន់ អង្គការវេជ្ជបណ្ឌិតគ្មានព្រំដែន ដើម្បីជួយជម្លៀសអ្នកប្រយុទ្ធដែលជាប់នៅក្នុងរោងចក្រដែកថែប Azovstal ដ៏ធំនៅក្នុងទីក្រុង Mariupol ដែលត្រូវបានហ៊ុំព័ទ្ធដោយកងកម្លាំងរុស្ស៊ី។
កងកម្លាំងរុស្ស៊ីបានបន្តការវាយលុករបស់ពួកគេឡើងវិញលើរោងចក្រដែកថែបដ៏ធំសម្បើមមួយនៅក្នុងកំពង់ផែ Mariupol របស់ប្រទេសអ៊ុយក្រែនដែលត្រូវបានបំផ្លិចបំផ្លាញ ដោយប្រើយន្តហោះដើម្បីវាយប្រហារអ្នកប្រយុទ្ធអ៊ុយក្រែនដែលកំពុងកាន់នៅទីនោះ។ យុទ្ធជនអ៊ុយក្រែនរហូតដល់ ២.០០០ នាក់ រួមទាំងជនស៊ីវិលរាប់រយនាក់ ត្រូវបានគេជឿថានៅស្នាក់នៅក្នុងរោងចក្រ Azovstal ដែលប្រព័ន្ធការពាររបស់ពួកគេត្រូវបានទម្លាយកាលពីដើមសប្តាហ៍នេះដោយកងកម្លាំងរុស្ស៊ី។ អង្គការសហប្រជាជាតិបាននិយាយថា កិច្ចខិតខំប្រឹងប្រែងជម្លៀសមួយផ្សេងទៀតកំពុងដំណើរការ ហើយមន្ត្រីជាន់ខ្ពស់អ៊ុយក្រែនបាននិយាយថា ជនស៊ីវិលជិត ៥០០នាក់ ត្រូវបានជម្លៀសរហូតមកដល់ពេលនេះ។ អគ្គសេនាធិការអ៊ុយក្រែនបាននិយាយនៅក្នុងការវាយតម្លៃប្រចាំថ្ងៃរបស់ខ្លួននៅថ្ងៃសុក្រថា ជនជាតិរុស្ស៊ីកំពុងប្រើប្រាស់យន្តហោះជាផ្នែកនៃការវាយប្រហារជាថ្មីលើរោងចក្រដែកថែបនេះ។ នេះបើយោងតាមសេចក្តីរាយការណ៍របស់ វិទ្យុអឺរ៉ុបសេរី/វិទ្យុសេរីភាព។
រដ្ឋមន្ត្រីការពារជាតិអាល្លឺម៉ង់លោកស្រី Christine Lambrecht បានបញ្ជាក់នៅថ្ងៃសុក្រថា អាល្លឺម៉ង់នឹងផ្គត់ផ្គង់អ៊ុយក្រែនជាមួយនឹងកាំភ្លើងធំបាញ់ស្វ័យប្រវត្តិដ៏មានឥទ្ធិពលចំនួន៧គ្រឿងដើម្បីជួយការពារខ្លួនប្រឆាំងនឹងប្រទេសរុស្ស៊ី។ លោកស្រី Lambrecht បាននិយាយថា ទាហានអ៊ុយក្រែននឹងត្រូវបានបណ្តុះបណ្តាលនៅក្នុងប្រទេសអាល្លឺម៉ង់ដើម្បីប្រើប្រាស់កាំភ្លើងធំស្វ័យប្រវត្តិ Panzerhaubitze 2000 ដែលមានលក្ខណៈស្រដៀងនឹងរថក្រោះហើយមានរយៈចម្ងាយបាញ់ដល់ទៅ៤០គីឡូម៉ែត្រ។ អាល្លឺម៉ង់បានបង្កើនការគាំទ្រផ្នែកសម្ភារៈរបស់ខ្លួនសម្រាប់អ៊ុយក្រែនក្នុងប៉ុន្មានសប្តាហ៍ថ្មីៗនេះ បន្ទាប់ពីការស្ទាក់ស្ទើរពីដំបូងក្នុងការផ្តល់អាវុធធុនធ្ងន់របស់ខ្លួនបានទាក់ទាញការរិះគន់យ៉ាងទូលំទូលាយ។

រូបឯកសារ៖ កាំភ្លើងធំស្វ័យប្រវត្តិ Panzerhaubitze 2000 របស់អាល្លឺម៉ង់ត្រូវបានផ្ទុកទៅលើយានដឹកជញ្ជូនធុនធ្ងន់នៅក្នុងបន្ទាយ Hindenburg ក្នុងក្រុង Munster នៅថ្ងៃទី១៤ ខែកុម្ភៈ ឆ្នាំ២០២២។

ទីភ្នាក់ងារព័ត៌មាន Reuters រាយការណ៍ថា រុស្ស៊ីនឹងមិនប្រើប្រាស់អាវុធនុយក្លេអ៊ែរនៅអ៊ុយក្រែនទេ នេះបើតាមអ្នកនាំពាក្យក្រសួងការបរទេសរុស្ស៊ីលោក Alexei Zaitsevបាននិយាយនៅថ្ងៃសុក្រ។ លោក Zaitsev បានប្រាប់អ្នកយកព័ត៌មានថា ការប្រើប្រាស់អាវុធនុយក្លេអ៊ែររបស់រុស្ស៊ីជាហានិភ័យមួយដែលមន្ត្រីលោកខាងលិចបានពិភាក្សាជាសាធារណៈគឺមិនត្រូវបានអនុវត្តក្នុងអ្វីដែលរដ្ឋាភិបាលក្រុងម៉ូស្គូហៅថា ប្រតិបត្តិការយោធាពិសេសរបស់ខ្លួនក្នុងប្រទេសអ៊ុយក្រែននោះទេ។ នាយកទីភ្នាក់ងារស៊ើបការណ៍ព័ត៌មានសម្ងាត់អាមេរិក CIA លោក William Burns បាននិយាយកាលពីថ្ងៃទី១៤ ខែមេសាថា ដោយសារឧបសគ្គនានាដែលរុស្ស៊ីបានជូបនៅអ៊ុយក្រែន «គ្មាននរណាម្នាក់ក្នុងចំណោមពួកយើង អាចមិនទទួលស្គាល់ការគំរាមកំហែងដែលបង្កឡើងដោយលទ្ធភាពនៃការប្រើប្រាស់អាវុធនុយក្លេអ៊ែរយុទ្ធសាស្ត្រឬអាវុធនុយក្លេអ៊ែរកម្រិតស្រាលនោះទេ»។
កាសែត The New York Times រាយការណ៍ថា ជនស៊ីវិលជិត៥០០នាក់ត្រូវបានជម្លៀសចេញពីទីក្រុង Mariupol និងរោងចក្រដែក Azovstal ។
ទីប្រឹក្សាអភិបាលក្រុង Mariupol ប្រទេសអ៊ុយក្រែន និយាយថា ការប្រើប្រាស់មជ្ឈមណ្ឌលឃុំឃាំង «ជំរុំសួរចម្លើយ» របស់រុស្ស៊ី បានប្រែក្លាយទីក្រុងនេះទៅជា «ជំរុំពិឃាត» នេះបើយោងតាមសេចក្តីរាយការណ៍របស់សារព័ត៌មាន Al Jazeera។
ក្រសួងការពារជាតិអាមេរិកបាននិយាយថា មិនមានការចង្អុលបង្ហាញណាមួយដែលបេឡារុសមានគម្រោងចូលរួមក្នុងជម្លោះក្នុងប្រទេសអ៊ុយក្រែននោះទេ។នេះបើយោងតាមសេចក្តីរាយការណ៍របស់ទូរទស្សន៍ Al Jazeera។
ទូរទស្សន៍ CNN រាយការណ៍ថា មន្ទីរបញ្ចកោណបានបដិសេធសេចក្តីរាយការណ៍ព័ត៌មានដែលនិយាយថា សហរដ្ឋអាមេរិកបានផ្តល់ការស៊ើបការណ៍ សម្ងាត់ដែលបានជួយអ៊ុយក្រែនបាញ់ពន្លិចនាវាចម្បាំងរុស្ស៊ី Moskva។ អ្នកនាំពាក្យក្រសួងការពារជាតិលោក John Kirby បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា «យើងមិនបានផ្តល់ឱ្យអ៊ុយក្រែននូវព័ត៌មានកំណត់គោលដៅជាក់លាក់សម្រាប់ វាយប្រហារនាវាចម្បាំង Moskva នោះទេ។ យើងមិនពាក់ព័ន្ធនឹងការសម្រេចចិត្តរបស់អ៊ុយក្រែនក្នុងការវាយប្រហារលើនាវានេះឬនៅក្នុងប្រតិបត្តិការដែលពួកគេបានអនុវត្តនោះទេ។ យើងមិនបានដឹងជាមុន អំពីចេតនារបស់អ៊ុយក្រែនក្នុងការវាយប្រហារនាវាចម្បាំង Moskva នោះទេ»។
ព័ត៌មានស៊ើបការណ៍សម្ងាត់ចុងក្រោយបំផុតពីក្រសួងការពារជាតិរបស់ចក្រភពអង់គ្លេសឲ្យដឹងថា កិច្ចខិតខំប្រឹងប្រែងរបស់រុស្ស៊ីដើម្បីសម្រេចការគ្រប់គ្រងទីក្រុងMariupol រួមទាំងរោងចក្រដែកថែប Azovstal ទំនងជាផ្សារភ្ជាប់ទៅនឹងផែនការរបស់រុស្ស៊ីក្នុងការប្រារព្ធទិវាជ័យជំនះនៅថ្ងៃទី៩ ខែឧសភា។ ទិវាជ័យជំនះគឺជាការអបអរសាទរជ័យជម្នះឆ្នាំ ១៩៤៥ របស់សហភាពសូវៀតលើ ណាស៊ីអាល្លឺម៉ង់។ ព័ត៌មានស៊ើបការណ៍សម្ងាត់ដដែលឲ្យដឹងថា លោក Putin ចង់ទទួលបានជោគជ័យជានិមិត្តរូបនៅអ៊ុយក្រែន។
កាសែត Washington Post រាយការណ៍ថា ទីក្រុង Ivan-Frankivsk ភាគខាងលិចអ៊ុយក្រែនកំពុងព្រមានអ្នកស្រុករបស់ខ្លួន អំពីការបាញ់ផ្លោងដែលអាចកើតមានឡើង នៅមុនការប្រារព្ធទិវាជ័យជម្នះ ៩ ឧសភា របស់រុស្ស៊ី។
ប្រទេសរុស្ស៊ីប្រើទិវាជ័យជំនះដែលជាពិធីបុណ្យប្រពៃណីនៃមោទនភាពជាតិដើម្បីអបអរសាទរជ័យជំនះរបស់សហភាពសូវៀតលើពួកណាស៊ីអាល្លឺម៉ង់។ មេដឹកនាំនៅទីក្រុង Ivano-Frankivsk ប្រទេសអ៊ុយក្រែន ភ័យខ្លាចថានៅ ពិធីឆ្នាំនេះនឹងនាំឱ្យមានការកើនឡើងនៃការវាយប្រហាររបស់រុស្ស៊ី។ មេដឹកនាំអ៊ុយក្រែនទាំងនេះ កំពុងប្រាប់អ្នកស្រុកឱ្យជម្លៀសចេញ ឬឱ្យស្នាក់នៅខាងក្នុង ហើយពួកគេបានលុបចោលព្រឹត្តិការណ៍សាធារណៈទាំងអស់។ នេះបើតាមកាសែត The Washington Post។

២១:៥០ ៥.៥.២០២២

ថ្ងៃព្រហស្បតិ៍ ទី ៥ ខែឧសភា៖

ប្រធានាធិបតីអ៊ុយក្រែនលោក Volodymyr Zelenskyy បានអញ្ជើញអធិការបតីអាល្លឺម៉ង់លោក Olaf Scholz និងប្រធានាធិបតីអាល្លឺម៉ង់លោក Frank-Walter Steinmeier ឱ្យធ្វើទស្សនកិច្ចទៅកាន់ប្រទេសអ៊ុយក្រែន។ នេះបើតាមការបញ្ជាក់របស់ខុទ្ទកាល័យប្រធានាធិបតីអាល្លឺម៉ង់នៅថ្ងៃព្រហស្បតិ៍នេះ។ លោក Zelenskyy បានផ្ដល់ការអញ្ជើញដូចនេះនៅក្នុងអំឡុងពេលសន្ទនាតាមទូរស័ព្ទជាមួយនឹងលោក Steinmeier នៅថ្ងៃព្រហស្បតិ៍នេះ។ នេះបើយោងតាមប្រភពមួយមកពីខុទ្ទកាល័យប្រធានាធិបតីអាល្លឺម៉ង់ដែលបានប្រាប់ទីភ្នាក់ងារព័ត៌មាន AFP។
នាយករដ្ឋមន្ត្រីអ៊ីស្រាអែលលោក Naftali Bennett បាននិយាយនៅថ្ងៃព្រហស្បតិ៍នេះថា ប្រធានាធិបតីរុស្ស៊ីលោក Vladimir Putin បានសុំទោសចំពោះការលើកឡើងរបស់រដ្ឋមន្ត្រីការបរទេសរុស្ស៊ីដែលថាមេដឹកនាំផ្ដាច់ការណាហ្ស៊ីលោក Adolf Hitler មានដើមកំណើតជាជាតិសាសន៍ជ្វីហ្វ។ បន្ទាប់ពីបានសន្ទនាតាមទូរស័ព្ទជាមួយនឹងលោក Putin មក លោក Bennett បានបញ្ជាក់ថា លោកទទួលយកការសុំទោសរបស់លោក Putin នេះ និងបានអរគុណលោក Putin ចំពោះការបញ្ជាក់អំពីគោលជំហររបស់លោក។ លោក Bennett ក៏បាននិយាយផងដែរថា លោកបានស្នើលោក Putin ឱ្យពិចារណាអនុញ្ញាតឱ្យមានការជម្លៀសជនស៊ីវិលចេញពីរោងចក្រដែកថែប Azovstal ក្នុងទីក្រុង Mariupol ប្រទេសអ៊ុយក្រែន។ លោក Bennett បានលើកឡើងថា លោកបានស្នើដូច្នេះបន្ទាប់ពីលោកបានសន្ទនានៅមុនការស្នើនេះជាមួយនឹងប្រធានាធិបតីអ៊ុយក្រែនលោក Volodymyr Zelenskyy និងថា លោក Putin បានសន្យាថានឹងបង្កើតច្រករបៀងសម្រាប់ជម្លៀសជនស៊ីវិល។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីរុស្ស៊ីលោក Vladimir Putin និងនាយករដ្ឋមន្ត្រីអ៊ីស្រាអែលលោក Naftali Bennett នៅថ្ងៃព្រហស្បតិ៍នេះបានពិភាក្សាគ្នាអំពីវិបត្តិអ៊ុយក្រែននិងអំពីអំពើប្រល័យពូជសាសន៍ Holocaust ក្នុងសម័យសង្គ្រាមលោកលើកទីពីរ នៅចំពេលដែលមានភាពតានតឹងទាក់ទិននឹងការលើកឡើងរបស់រដ្ឋមន្ត្រីការបរទេសរុស្ស៊ីកាលពីថ្ងៃអាទិត្យដែលថាមេដឹកនាំផ្ដាច់ការណាហ្ស៊ីលោក Adolf Hitler មានឈាមជ័រជាជាតិសាសន៍ជ្វីហ្វ។ រដ្ឋាភិបាលរុស្ស៊ីបានបញ្ជាក់ដូច្នេះថា៖ «ការផ្ដោះប្ដូរយោបល់គ្នាបែបស៊ីជម្រៅអំពីស្ថានភាពនៅក្នុងប្រទេសអ៊ុយក្រែនបានបន្តធ្វើឡើង»។ រដ្ឋាភិបាលរុស្ស៊ីបានបន្ថែមថា មេដឹកនាំទាំងពីរក៏បានពិភាក្សាគ្នាផងដែរអំពី «អនុស្សាវរីយ៍ជាប្រវត្តិសាស្ត្រ» និងអំពីអំពើប្រល័យពូជសាសន៍ Holocaust។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ ប្រធានាធិបតីរុស្ស៊ី លោក Vladimir Putin ពិភាក្សាជាមួយនាយករដ្ឋមន្ត្រីអ៊ីស្រាអែល លោក Naftali Bennett ក្នុងអំឡុងកិច្ចប្រជុំរបស់ពួកគេក្នុងទីក្រុង Sochi ប្រទេសរុស្ស៊ី កាលពីថ្ងៃទី២២ ខែតុលា ឆ្នាំ២០២១។

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅថ្ងៃព្រហស្បតិ៍នេះថា រដ្ឋមន្ត្រីការបរទេសរុស្ស៊ីលោក Sergei Lavrov គួរតែសុំទោសជាសាធារណៈចំពោះជាតិសាសន៍ជ្វីហ្វទាំងអស់នៅជុំវិញពិភពលោកទាក់ទិននឹងការលើកឡើងរបស់លោកដែលថាមេដឹកនាំផ្ដាច់ការហាហ្ស៊ីលោក Adolf Hitler មានឈាមជ័រជាជាតិសាសន៍ជ្វីហ្វ។ លោក Kuleba បានសរសេរនៅលើ Twitter ដូច្នេះថា៖ «រដ្ឋមន្ត្រីការបរទេសអ៊ីស្រាអែលលោក Yair Lapid និងខ្ញុំមានការខឹងសម្បារនឹងការលើកឡើងរបស់រដ្ឋមន្ត្រីការបរទេសរុស្ស៊ីដែលមានលក្ខណៈប្រឆាំងនឹងជាតិសាសន៍ជ្វីហ្វ។ ខ្ញុំសង្កត់ធ្ងន់ថា គំនិតបែបប្រឆាំងនឹងជាតិសាសន៍ជ្វីហ្វរបស់ឥស្សរជនរុស្ស៊ីមានប្រវត្តិជាយូរមកហើយ។ វិធីកែខ្លួនតែមួយគត់សម្រាប់លោក Lavrov គឺលោកត្រូវសុំទោសជាសាធារណៈចំពោះជាតិសាសន៍ជ្វីហ្វទាំងអស់។ ពាក្យប្រឆាំងនឹងជាតិសាសន៍ជ្វីហ្វណាមួយគឺមិនអាចអត់ឱនឱ្យបាននោះទេ»។ នេះបើយោងតាមបណ្ដាញទូរទស្សន៍ CNN។
បណ្ដាប្រទេសជាសមាជិកអង្គការសុខភាពពិភពលោក (WHO) នឹងពិចារណាលើសេចក្ដីសម្រេចមួយប្រឆាំងនឹងរុស្ស៊ីនៅសប្ដាហ៍ក្រោយ បន្ទាប់ពីរុស្ស៊ីបានឈ្លានពានអ៊ុយក្រែន។ សេចក្ដីសម្រេចនោះក៏រួមមានទាំងលទ្ធភាពដែលអាចឈានទៅដល់ការបិទទីស្នាក់ការអង្គការសុខភាពពិភពលោកប្រចាំតំបន់ដ៏ចម្បងមួយនៅក្នុងទីក្រុងមូស្គូផងដែរ។ នេះបើយោងតាមឯកសារមួយដែលទីភ្នាក់ងារព័ត៌មាន Reuters បានទទួលនៅថ្ងៃព្រហស្បតិ៍នេះ។ សេចក្ដីព្រាងនៃសេចក្ដីសម្រេចនេះ ដែលរៀបចំឡើងភាគច្រើនដោយមន្ត្រីការទូតសហភាពអឺរ៉ុបនិងបានដាក់ជូនការិយាល័យអង្គការសុខភាពពិភពលោកប្រចាំទ្វីបអឺរ៉ុបនៅសប្ដាហ៍នេះ បានធ្វើឡើងបន្ទាប់ពីមានសំណើពីប្រទេសអ៊ុយក្រែន។ សេចក្ដីព្រាងនេះត្រូវបានចុះហត្ថលេខាដោយប្រទេសជាសមាជិកអង្គការសុខភាពពិភពលោកយ៉ាងតិច ៣៨ ដែលក្នុងនោះរួមមានទាំងប្រទេសតួកគី បារាំង និងអាល្លឺម៉ង់ផងដែរ។ នេះបើយោងតាមទីភ្នាក់ងារព័ត៌មាន Reuters។
អគ្គមេបញ្ជាការកងទ័ពអ៊ុយក្រែនលោកនាយឧត្តមសេនីយ៍ Valeriy Zaluzhnyi បាននិយាយនៅថ្ងៃព្រហស្បតិ៍នេះថា ប្រទេសរបស់លោកត្រូវការប្រព័ន្ធបាញ់រ៉ុក្កែត (MLRS) ជាច្រើន ដើម្បីការពារប្រឆាំងនឹងមីស៊ីលស្វ័យនាំផ្លូវរបស់រុស្ស៊ី។ លោក Zaluzhnyi បានបញ្ជាក់ដូច្នេះ បន្ទាប់ពីលោកបានប្រាប់ប្រធានក្រុមនាយសេនាធិការកងទ័ពសហរដ្ឋអាមេរិកលោកនាយឧត្តមសេនីយ៍ Mark Milley អំពីស្ថានភាពយោធានៅក្នុងប្រទេសអ៊ុយក្រែនថា រុស្ស៊ីបានចាប់ផ្ដើមប្រើការវាយប្រហារជាថ្មីដោយមីស៊ីលស្វ័យនាំផ្លូវ។ នេះបើយោងតាមទីភ្នាក់ងារព័ត៌មាន Reuters។
អគ្គលេខាធិការអង្គការអូតង់ (NATO) លោក Jens Stoltenberg បានបញ្ជាក់ប្រាប់ទូរទស្សន៍ SVT របស់ប្រទេសស៊ុយអែតនៅថ្ងៃព្រហស្បតិ៍នេះថា អង្គការអូតង់នឹងបង្កើនវត្តមានរបស់ខ្លួននៅជុំវិញព្រំដែនរបស់ស៊ុយអែតនិងនៅក្នុងសមុទ្របាល់ទិក នៅពេលណាដែលប្រទេសស៊ុយអែតដាក់ពាក្យសុំចូលជាសមាជិករបស់អង្គការអូតង់ហើយពាក្យសុំនោះកំពុងដំណើរការ។ ប្រទេសស៊ុយអែតនិងប្រទេសហ្វាំងឡង់មិនទាន់ចូលជាសមាជិករបស់អង្គការអូតង់នៅឡើយទេ ប៉ុន្តែដោយសារតែរុស្ស៊ីបានភ្ជាប់យកតំបន់ Crimea របស់ប្រទេសអ៊ុយក្រែនកាលពីឆ្នាំ ២០១៤ និងដោយសារតែការឈ្លានពានរបស់រុស្ស៊ីលើអ៊ុយក្រែននៅពេលបច្ចុប្បន្ននេះ បានធ្វើឱ្យស៊ុយអែតនិងហ្វាំងឡង់ពិចារណាឡើងវិញអំពីគោលនយោបាយសន្តិសុខរបស់ពួកគេ ដោយពួកគេនឹងទំនងជាចូលជាសមាជិករបស់អង្គការអូតង់។ លោក Stoltenberg និយាយដូច្នេះថា៖ «ខ្ញុំជឿថា យើងនឹងស្វែងរកដំណោះស្រាយសម្រាប់តម្រូវការផ្នែកសន្តិសុខដែលប្រទេសស៊ុយអែតនឹងមាននៅក្នុងដំណាក់កាលអន្តរកាលមួយ»។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអ៊ុយក្រែនលោក Denys Shmyhal បាននិយាយនៅថ្ងៃព្រហស្បតិ៍នេះថា ប្រទេសអ៊ុយក្រែនទទួលបានជំនួយជាង ១២ ពាន់លានដុល្លារជាសព្វាវុធនិងហិរញ្ញវត្ថុ តាំងពីពេលដែលរុស្ស៊ីបានចាប់ផ្ដើមឈ្លានពានពេញទំហឹងលើខ្លួនកាលពីថ្ងៃទី ២៤ ខែកុម្ភៈមក។ នៅក្នុងការថ្លែងនៅឯសន្និសីទកម្រិតខ្ពស់របស់អ្នកបរិច្ចាគជំនួយនៅក្នុងរដ្ឋធានីវ៉ាសូវី ប្រទេសប៉ូឡូញ រួមជាមួយនឹងមេដឹកនាំនៃប្រទេសប៉ូឡូញ ស៊ុយអែត និងប្រធានគណៈកម្មការអឺរ៉ុបនៃសហភាពអឺរ៉ុប លោក Shmyhal បានថ្លែងអំណរគុណដល់មេដឹកនាំទាំងនេះសម្រាប់ការគាំទ្រមិនងាករេរបស់ពួកគេចំពោះប្រទេសអ៊ុយក្រែននៅក្នុងអំឡុងពេលសង្គ្រាមនេះ។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីប៉ូឡូញលោក Mateusz Morawiecki បាននិយាយថា ថវិកាចំនួន ៦.៥០០ លានដុល្លារអាមេរិកត្រូវបានរៃអង្គាសនៅក្នុងសន្និសីទអ្នកបរិច្ចាគជំនួយអន្តរជាតិមួយនៅក្នុងទីក្រុងវ៉ាសូវី ប្រទេសប៉ូឡូញ ដើម្បីផ្ដល់ការជួយជ្រោមជ្រែងផ្នែកមនុស្សធម៌ដល់ប្រទេសអ៊ុយក្រែនដែលហែកហួរដោយសារសង្គ្រាម។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។ សន្និសីទនេះបានធ្វើឡើងនៅថ្ងៃព្រហស្បតិ៍នេះនិងបានសហរៀបចំដោយប្រទេសប៉ូឡូញនិងស៊ុយអែត និងមានការចូលរួមពីនាយករដ្ឋមន្ត្រីនិងឯកអគ្គរដ្ឋទូតតំណាងឱ្យបណ្ដាប្រទេសជាច្រើននៅអឺរ៉ុប ក៏ដូចជាពីប្រទេសដែលនៅឆ្ងាយពីអឺរ៉ុបនឹងពីក្រុមហ៊ុនជំនួញមួយចំនួនផងដែរ។
ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃព្រហស្បតិ៍បានចាប់ផ្ដើមវេទិការៃអង្គាសប្រាក់ជាសាកលមួយដើម្បីជួយរដ្ឋាភិបាលអ៊ុយក្រែនឱ្យឈ្នះសង្គ្រាមប្រឆាំងនឹងរុស្ស៊ី និងកសាងហេដ្ឋារចនាសម្ព័ន្ធរបស់ប្រទេសអ៊ុយក្រែនឡើងវិញ។ លោក Zelenskyy បាននិយាយនៅក្នុងវីដេអូមួយដែលបង្ហោះនៅលើទំព័រ Twitter របស់លោកថា៖ «ដោយគ្រាន់តែចុចប៊ូតុងមួយប៉ុណ្ណោះ អ្នកអាចបរិច្ចាគថវិកាដើម្បីជួយការពារអ្នកការពាររបស់យើង ដើម្បីជួយសង្គ្រោះជនស៊ីវិលរបស់យើង និងដើម្បីកសាងប្រទេសអ៊ុយក្រែនឡើងវិញ»។ វេទិកាដែលលោក Zelenskyy បានចាប់ផ្ដើមអនុវត្តនេះមានឈ្មោះ «United24» ដែលមានវេបសាយ u24.gov.ua។ នេះបើយោងតាមទីភ្នាក់ងារព័ត៌មាន AFP។

លោក Charles Michel ប្រធានក្រុមប្រឹក្សាអឺរ៉ុបនៃសហភាពអឺរ៉ុបបានបញ្ជាក់នៅក្នុងកិច្ចសម្ភាសន៍មួយដែលចេញផ្សាយនៅថ្ងៃព្រហស្បតិ៍ថា សហភាពអឺរ៉ុបគួរលក់ទ្រព្យសម្បត្តិរបស់រុស្ស៊ីដែលខ្លួនរឹបអូសបានដើម្បីបានថវិកាយកទៅជួយកសាងប្រទេសអ៊ុយក្រែនដែលខ្ទេចខ្ទាំដោយសារសង្គ្រាមរបស់រុស្ស៊ី។ លោក Michel បានប្រាប់ទីភ្នាក់ ងារព័ត៌មាន Intefax-Ukraine ថា៖ «តាមទស្សនៈផ្ទាល់ខ្លួនរបស់ខ្ញុំ ខ្ញុំជឿថា នេះគឺពិត ជាសំខាន់ដោយសារតែមិនត្រឹមតែបង្កកទ្រព្យសម្បត្តិប៉ុណ្ណោះទេ ប៉ុន្តែថែមទាំងរឹប អូសទ្រព្យសម្បត្តិនិងលក់យកថវិកាដើម្បីកសាងប្រទេសអ៊ុយក្រែនឡើងវិញផងដែរ»។ នេះបើយោងតាមទីភ្នាក់ងារព័ត៌មាន AFP។
លោកស្រី Barbara Pompili រដ្ឋមន្ត្រីក្រសួងបរិស្ថាននិងថាមពលនៃប្រទេសបារាំង បានបញ្ជាក់នៅ ថ្ងៃព្រហស្បតិ៍ថា លោកស្រីមានទំនុកចិត្តថា បណ្ដាប្រទេសសមាជិកសហភាពអឺរ៉ុបនឹងសម្រេចបាននូវការមូលមតិគ្នានៅត្រឹមចុងសប្ដាហ៍នេះលើវិធីបញ្ចប់ការនាំចូលប្រេងឥន្ធនៈពីរុស្ស៊ី។ លោកស្រីបានថ្លែងប្រាប់វិទ្យុFrance Infoរបស់បារាំងថា៖ «ប្រទេសខ្លះពឹងផ្អែកលើប្រេងឥន្ធនៈរបស់រុស្ស៊ីជាងប្រទេសផ្សេងទៀត។ ដូច្នេះហើយ យើងត្រូវតែព្យាយាមស្វែងរកដំណោះស្រាយ ដើម្បីឱ្យប្រទេសទាំងនោះអាចចូលរួមមូលមតិគ្នាបានលើទណ្ឌកម្មទាំងនេះ។ ខ្ញុំគិតថា យើងគួរតែអាចធ្វើវាបាន»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីនៅថ្ងៃព្រហស្បតិ៍នេះបានចោទប្រកាន់ក្រុមបស្ចិមប្រទេសថាបានរារាំងមិនឱ្យយុទ្ធនាការយោធារបស់រុស្ស៊ីនៅក្នុងប្រទេសអ៊ុយក្រែនបញ្ចប់ទៅ «បានលឿន» ដោយសារក្រុមបស្ចិមប្រទេសបានផ្គត់ផ្គង់សព្វាវុធដល់អ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីជប៉ុនលោកFumio Kishida បាននិយាយនៅថ្ងៃព្រហស្បតិ៍ថា លោកបានថ្កោលទោសខ្លាំងក្លាបំផុតចំពោះការឈ្លានពានរបស់រុស្ស៊ីលើអ៊ុយក្រែន។ លោកបានបន្ថែមថាការឈ្លានពានរបស់រុស្ស៊ីនេះគឺស្មើនឹងឧក្រិដ្ឋកម្មសង្គ្រាម។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Kishida ថ្លែងដូច្នេះនៅក្នុងទីក្រុងឡុងដ៍ ចក្រភពអង់គ្លេស បន្ទាប់ពីលោកបានធ្វើទស្សនកិច្ចរយៈពេលវែងមួយទៅកាន់តំបន់អាស៊ីអាគ្នេយ៍។ មន្ត្រីរដ្ឋាភិបាលជប៉ុនបានបញ្ជាក់ថា រដ្ឋាភិបាលជប៉ុនបានសង្ឃឹមថានឹងរៀបចំការពិភាក្សាអំពីការឈ្លានពានរបស់រុស្ស៊ី និងកៀរគរការឆ្លើយតបនៅក្នុងតំបន់អាស៊ីអាគ្នេយ៍ចំពោះការឈ្លានពាននេះ ដែលនៅក្នុងតំបន់អាស៊ីអាគ្នេយ៍នោះគឺមានតែប្រទេសសិង្ហបុរីមួយតែប៉ុណ្ណោះដែលបានចូលរួមដាក់ទណ្ឌកម្មប្រឆាំងនឹងរុស្ស៊ី។
លោក Koichi Hagiuda រដ្ឋមន្ត្រីក្រសួងសេដ្ឋកិច្ច ពាណិជ្ជកម្មនិងឧស្សាហកម្មនៃប្រ ទេសជប៉ុន បាននិយាយនៅថ្ងៃព្រហស្បតិ៍នេះថា ប្រទេសជប៉ុននឹងប្រឈមនឹង «ការលំបាក» ប្រសិនបើអនុវត្តតាមភ្លាមៗនូវវិធានការនៃការកាត់ផ្ដាច់ការនាំចូលប្រេងឥន្ធនៈពីប្រទេសរុស្ស៊ីទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ លោក Hagiudaបានថ្លែងដូច្នេះនៅក្នុងអំឡុងដំណើរទស្សនកិច្ចរបស់លោកនៅរដ្ឋធានីវ៉ាស៊ីន តោន សហរដ្ឋអាមេរិក បន្ទាប់ពីគណៈកម្មការអឺរ៉ុបនៃសហភាពអឺរ៉ុបបានស្នើកាលពីថ្ងៃពុធនូវកញ្ចប់ទណ្ឌកម្មតឹងតែងបំផុតប្រឆាំងនឹងរុស្ស៊ី ដែលក្នុងនោះរួមមានទាំងការហាមឃាត់ការនាំចូលប្រេងឆៅពីរុស្ស៊ីផងដែរ។ នេះបើយោងតាមទីភ្នាក់ងារព័ត៌មាន Reuters។
នៅក្នុងកិច្ចសម្ភាសន៍មួយជាមួយនឹងទីភ្នាក់ងារព័ត៌មាន Associated Press នៅក្នុងរដ្ឋធានីមីនស្កិ៍ ប្រទេសបេឡារុស នៅថ្ងៃព្រហស្បតិ៍ ប្រធានាធិបតីបេឡារុសលោក Alexander Lukashenko បាននិយាយថា លោកមិនគិតថាសកម្មភាពយោធារបស់រុស្ស៊ីនៅក្នុងប្រទេសអ៊ុយក្រែន «អូសបន្លាយយូរដូច្នេះទេ»។ ស្របពេលនោះដែរ លោក Lukashenko បានចោទប្រកាន់ប្រទេសអ៊ុយក្រែនថាបាន «បង្កហេតុជាមួយរុស្ស៊ី» និងមិនចាប់អារម្មណ៍ចំពោះការចរចាសន្តិភាព។
ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃព្រហស្បតិ៍ថា ដោយសារកងកម្លាំងនៅក្នុងប្រទេសបេឡារុសធ្វើសមយុទ្ធយោធាជាប្រចាំ រុស្ស៊ីទំនងជា «ពង្រីកការគំរាមកំហែង» ដែលបេឡារុសបានបង្កឡើង«ចំពោះអ៊ុយក្រែន» នេះ ក្នុងគោលបំណងធ្វើឱ្យអ៊ុយក្រែនរក្សាកងកម្លាំងរបស់ខ្លួនបន្ថែមទៀតនៅភាគខាងជើងប្រទេសដើម្បីកុំឱ្យអ៊ុយក្រែនអាចពង្រាយកងទ័ពទៅកាន់ផ្នែកភាគខាងកើតនៃប្រទេសបាន។
រុស្ស៊ីបានបញ្ជាក់នៅថ្ងៃព្រហស្បតិ៍នេះថា កាំភ្លើងធំរបស់ខ្លួនបានបាញ់ចំទីតាំងនិងបន្ទាយរបស់ប្រទេសអ៊ុយក្រែនជាច្រើនកន្លែងកាលពីយប់មិញ ដោយបានសម្លាប់យុទ្ធជនអ៊ុយក្រែនជាង ៦០០ នាក់។ នេះបើយោងតាមទីភ្នាក់ងារព័ត៌មាន Reuters។
លោក Vyacheslav Gladkov អភិបាលតំបន់ Belgorod នៃប្រទេសរុស្ស៊ី បាននិយាយនៅថ្ងៃព្រហស្បតិ៍នេះថា ភូមិពីរនៅក្នុងតំបន់ Belgorod ជាប់នឹងព្រំដែនប្រទេសអ៊ុយ ក្រែន ត្រូវបានកងកម្លាំងអ៊ុយក្រែនបាញ់ផ្លោងដាក់។ លោកបានបន្ថែមថា មិនមានជនស៊ីវិលណាម្នាក់បានស្លាប់និងរងរបួសដោយសារការបាញ់ផ្លោងរបស់អ៊ុយក្រែននេះទេ។ នេះបើយោងតាមទីភ្នាក់ងារព័ត៌មាន Reuters។
លោក Serhiy Gaidai អភិបាលតំបន់ Luhansk នៃប្រទេសអ៊ុយក្រែន បាននិយាយនៅថ្ងៃព្រហស្បតិ៍នេះថា ជនស៊ីវិល៥នាក់ ត្រូវបានសម្លាប់ដោយសារការបាញ់ផ្លោងរបស់កងទ័ពរុស្ស៊ីនៅក្នុងតំបន់ Luhansk នៅក្នុងរយៈពេល ២៤ ម៉ោងចុងក្រោយនេះ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃព្រហស្បតិ៍ថា លោកបាននិយាយជាមួយនឹងនាយករដ្ឋមន្ត្រីអ៊ីស្រាអែលលោក Naftali Bennett និងបានពិភាក្សាអំពី «ការលើកឡើងដែលធ្វើឱ្យមានការខឹងសម្បារនិងមិនអាចទទួលយកបានទាំងស្រុង» របស់រដ្ឋមន្ត្រីការបរទេសរុស្ស៊ីលោក Sergei Lavrov កាលពីថ្ងៃអាទិត្យកន្លងទៅនេះ ដែលថាមេដឹកនាំផ្ដាច់ការណាហ្ស៊ីលោក Adolf Hitler មានឈាម ជ័រជាជាតិសាសន៍ជ្វីហ្វ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅក្នុងសុន្ទរកថាមួយនៅព្រឹកថ្ងៃព្រហស្បតិ៍ថា កិច្ចឈប់វាយប្រយុទ្ធគ្នារយៈពេលវែងគឺត្រូវការជាចាំបាច់ ដើម្បីជម្លៀសជនស៊ីវិលដែលនៅសេសសល់នៅក្នុងទីក្រុង Mariupol។ លោកនិយាយដូច្នេះថា៖ «វាត្រូវការពេលដើម្បីជម្លៀសមនុស្សចេញពីជម្រកក្រោមដីទាំង នោះ។ ក្នុងស្ថានភាពបច្ចុប្បន្ន យើងមិនអាចប្រើឧបករណ៍ធុនធ្ងន់ដើម្បីរើកកាយចេញនូវកម្ទេចកម្ទីបាក់បែកនោះឡើយ។ ទាំងអស់នេះគឺត្រូវធ្វើដោយដៃ»។
រដ្ឋាភិបាលរុស្ស៊ីបានច្រានចោលការចោទប្រកាន់ដែលថាកងទ័ពរុស្ស៊ីបានសម្រុកចូលរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន និងបានបញ្ជាក់ថា ច្រករបៀងមនុស្សធម៌មានដំណើរការនៅទីនោះនៅថ្ងៃព្រហស្បតិ៍។ នៅពេលសួរថាតើការអះអាងរបស់មន្ត្រីជាន់ខ្ពស់អ៊ុយក្រែនម្នាក់ដែលថាកងទ័ពរុស្ស៊ីបានទម្លាយចូលទៅក្នុងបរិវេណរបស់រោងចក្រនោះគឺជារឿងពិតឬក៏យ៉ាងណានោះ អ្នកនាំពាក្យរដ្ឋាភិបាលរុស្ស៊ីលោកDmitry Peskov បានឱ្យអ្នកសារព័ត៌មានយោងលើបទបញ្ជារបស់ប្រធានាធិបតីរុស្ស៊ីលោក Vladimir Putin កាលពីលើកមុន ដែលបញ្ជាមិនឱ្យកងទ័ពរុស្ស៊ីសម្រុកចូលក្នុងរោងចក្រនោះ។ នេះបើយោងតាមទីភ្នាក់ងារព័ត៌មាន Reuters។

ផ្សែងហុយចេញពីរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន ក្នុងទឹកដីក្រោមរដ្ឋាភិបាលនៃសាធារណរដ្ឋប្រជាមានិត Donetsk ភាគខាងកើតអ៊ុយក្រែន ថ្ងៃពុធ ទី ៤ ឧសភា ឆ្នាំ ២០២២។

រដ្ឋាភិបាលរុស្ស៊ីបានបញ្ជាក់នៅថ្ងៃព្រហស្បតិ៍នេះថា ខ្លួនបានដឹងថាសហរដ្ឋអាមេរិក ចក្រភពអង់គ្លេស និងប្រទេសសមាជិកអង្គការអូតង់ (NATO) ផ្សេងទៀតបានផ្ដល់ព័ត៌ មានស៊ើបការណ៍សម្ងាត់ជាបន្តរហូតដល់កងទ័ពអ៊ុយក្រែន និងថាករណីនេះនឹងមិនអាចបញ្ឈប់រុស្ស៊ីនៅក្នុងការសម្រេចឱ្យបានតាមគោលបំណងរបស់ខ្លួនឡើយ។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov មានប្រតិកម្មបែបនេះតបទៅនឹងសេចក្ដីរាយការណ៍របស់កាសែត New York Times ដែលថា សហរដ្ឋអាមេរិកបានផ្ដល់ព័ត៌ មានស៊ើបការណ៍សម្ងាត់ដែលអាចជួយកងកម្លាំងអ៊ុយក្រែនឱ្យសម្លាប់នាយឧត្តម សេនីយ៍យោធារុស្ស៊ីជាច្រើននាក់នៅក្នុងសង្គ្រាមនៅអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
សហរដ្ឋអាមេរិកបានផ្ដល់ព័ត៌មានស៊ើបការណ៍សម្ងាត់ដែលអាចជួយកងកម្លាំងអ៊ុយ ក្រែនឱ្យសម្លាប់នាយឧត្តមសេនីយ៍យោធារុស្ស៊ីជាច្រើននាក់នៅក្នុងសង្គ្រាមនៅអ៊ុយ ក្រែន។ នេះបើយោងតាមសេចក្ដីរាយការណ៍របស់កាសែត The New York Times កាលពីថ្ងៃពុធ ដោយយោងលើមន្ត្រីជាន់ខ្ពស់សហរដ្ឋអាមេរិក។ កាសែតនេះបានរាយ ការណ៍ថា រដ្ឋាភិបាលអាមេរិកបានផ្ដល់ឱ្យអ៊ុយក្រែននូវព័ត៌មានលំអិតអំពីការចល័តកងទ័ពរបស់រុស្ស៊ីដែលគេរំពឹងទុក និងអំពីទីតាំងនិងព័ត៌មានលំអិតផ្សេងទៀតអំពីបញ្ជាការដ្ឋានយោធាចល័តរបស់រុស្ស៊ី ហើយអ៊ុយក្រែនបានបញ្ចូលព័ត៌មានទាំងនេះជាមួយនឹងព័ត៌មានស៊ើបការណ៍សម្ងាត់របស់ខ្លួនដើម្បីធ្វើការវាយប្រហារដោយកាំភ្លើងធំនិងការវាយប្រហារផ្សេងៗទៀតដែលបានសម្លាប់មន្ត្រីយោធារុស្ស៊ី។ នេះបើយោងតាមទីភ្នាក់ងារព័ត៌មាន Reuters។

២១:៥៧ ៤.៥.២០២២

ថ្ងៃពុធ ទី ៤ ខែឧសភា៖

រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen បាននិយាយនៅថ្ងៃពុធនេះថា សហរដ្ឋអាមេរិកបានពិភាក្សាឥតឈប់ឈរជាមួយនឹងដៃគូរបស់ខ្លួនអំពីការដាក់ទណ្ឌកម្មបន្ថែមទៀតលើរុស្ស៊ី និងអាចចាត់ «វិធានការបន្ថែមទៀត» ដើម្បីដាក់សម្ពាធលើរដ្ឋាភិបាលរុស្ស៊ីឱ្យបញ្ឈប់ការឈ្លានពានរបស់ខ្លួនលើអ៊ុយក្រែន។ លោកស្រី Yellen បានបញ្ជាក់នៅក្នុងសន្និសីទរបស់កាសែត Wall Street Journal ថា លោកស្រីនឹងមិនបង្ហាញអំពីវិធានការជាក់លាក់ណាមួយមុនពេលប្រកាសផ្លូវការនោះទេ ប៉ុន្តែបានលើកឡើងថា វិធានការបន្ថែមនឹងទំនងជាធ្វើឡើង «ប្រសិនបើរុស្ស៊ីនៅបន្តសង្គ្រាមនេះប្រឆាំងនឹងអ៊ុយក្រែន»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen ថ្លែងទៅកាន់ក្រុមប្រឹក្សាអាត្លង់ទិក ក្នុងរដ្ឋធានីវ៉ាស៊ីនតោន ថ្ងៃទី ១៣ ខែមេសា ឆ្នាំ២០២២។ (AP Photo/Jacquelyn Martin)

ប្រធានាធិបតីសហរដ្ឋអាមេរិកលោក Joe Biden បាននិយាយនៅថ្ងៃពុធនេះថា លោក «បើកចំហ» ចំពោះការដាក់ទណ្ឌកម្មបន្ថែមលើរុស្ស៊ី ហើយនឹងពិភាក្សាអំពីវិធានការនានាជាមួយនឹងសម្ព័ន្ធមិត្តមកពីក្រុមប្រទេស G-7 នៅក្នុងរយៈពេលប៉ុន្មានថ្ងៃខាងមុខ។ លោក Biden បញ្ជាក់ដូច្នេះថា៖ «យើងតែងតែបើកចំហចំពោះការដាក់ទណ្ឌកម្មបន្ថែមទៀត»។ លោកថ្លែងដូច្នេះក្នុងពេលមិនយូរប៉ុន្មាន បន្ទាប់ពីសហភាពអឺរ៉ុបបានប្រកាសអំពីគម្រោងនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ី និងអំពីវិធានការថ្មីៗផ្សេងទៀតដើម្បីដាក់ទណ្ឌកម្មលើរដ្ឋាភិបាលរុស្ស៊ីសម្រាប់ការឈ្លានពានដោយបង្ហូរឈាមរបស់រុស្ស៊ីលើអ៊ុយក្រែន។ លោក Biden បានប្រាប់អ្នកកាសែតថា៖ «ខ្ញុំនឹងនិយាយទៅកាន់សមាជិកនៃក្រុមប្រទេស G-7 នៅសប្ដាហ៍នេះអំពីអ្វីដែលយើងនឹងធ្វើឬក៏មិនធ្វើ»។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីជប៉ុនលោក Fumio Kishida បាននិយាយនៅថ្ងៃពុធនេះថា លោកមិនអាចទទួលយកបាននោះទេនូវការសម្រេចរបស់រដ្ឋាភិបាលរុស្ស៊ីដែលហាមឃាត់លោកនិងពលរដ្ឋជប៉ុន ៦២ នាក់ផ្សេងទៀតមិនឱ្យចូលទឹកដីរុស្ស៊ី និងថា រុស្ស៊ីគឺជាអ្នកទទួលខុសត្រូវទាំងស្រុងសម្រាប់ការធ្វើឱ្យទំនាក់ទំនងទ្វេភាគីរវាងជប៉ុននិងរុស្ស៊ីឈានមកដល់ចំណុចនេះ។ លោក Kishida បានបញ្ជាក់បន្ទាប់ពីលោកបានពិភាក្សាជាមួយនាយករដ្ឋមន្ត្រីអ៊ីតាលីលោក Mario Draghi នៅក្នុងទីក្រុងរ៉ូម ប្រទេសអ៊ីតាលីថា៖ «រុស្ស៊ីគឺជាភាគីដែលឈានទៅរកការធ្វើសង្គ្រាមនិងធ្វើឱ្យមានស្ថានភាពដូចសព្វថ្ងៃនេះ។ ...ការប្រកាសរបស់រុស្ស៊ី [លើការហាមឃាត់ពលរដ្ឋជប៉ុនចំនួន ៦៣ នាក់មិនឱ្យចូលទឹកដីរុស្ស៊ី] គឺពិតជាមិនអាចទទួលយកបាននោះទេ»។ នេះបើយោងតាមទីភ្នាក់ងារព័ត៌មាន Reuters។
ចក្រភពអង់គ្លេសបានហាមឃាត់រាល់ការនាំចេញផ្នែកសេវាកម្មទាំងអស់ទៅកាន់ប្រទេសរុស្ស៊ីនៅថ្ងៃពុធនេះ និងបានប្រកាសអំពីការដាក់ទណ្ឌកម្មលើបុគ្គលនិងអង្គភាពសរុបចំនួន ៦៣ ដែលក្នុងនោះរួមមានទាំងក្រុមហ៊ុនប្រព័ន្ធផ្សព្វផ្សាយនិងជនល្បីល្បាញនានាដែលខ្លួនបានចោទថាបានផ្សព្វផ្សាយព័ត៌មានប្រឌិតផងដែរ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីម៉ិកស៊ិកលោក Andres Manuel Lopez Obrador បាននិយាយនៅថ្ងៃពុធនេះថា រដ្ឋបាលរបស់លោកនឹងមិនដាក់ទណ្ឌកម្មលើរុស្ស៊ីដោយសារតែការឈ្លានពានរបស់រុស្ស៊ីលើអ៊ុយក្រែននោះទេ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Lopez Obrador បានបញ្ជាក់ថា «យើងចង់រក្សាភាពអព្យាក្រឹត្យ» និងបានអំពាវនាវឱ្យមានការចរចា។
ក្រសួងការពារជាតិអ៊ុយក្រែនបានបញ្ជាក់នៅថ្ងៃពុធនេះថា រុស្ស៊ីបានប៉ុនប៉ងបង្កើនកម្រិតនៃការវាយប្រហាររបស់ខ្លួននៅភាគខាងកើតប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ អ្នកនាំពាក្យក្រសួងការពារជាតិអ៊ុយក្រែនលោក Oleksandr Motuzyanyk បាននិយាយថា រដ្ឋាភិបាលរុស្ស៊ីបានធ្វើការវាយប្រហារតាមអាកាសជិត ៥០ ដងកាលពីថ្ងៃអង្គារ។ លោកក៏បានលើកឡើងផងដែរថា ការវាយប្រហារដោយកាំភ្លើងធំនិងការវាយប្រហារតាមអាកាសរបស់រុស្ស៊ីបានបន្តយូរៗម្ដងលើរោងចក្រដែកថែប Azovstal នៅក្នុងទីក្រុង Mariupol។
រដ្ឋាភិបាលរុស្ស៊ីបានបញ្ជាក់នៅថ្ងៃពុធនេះថា មិនមានកិច្ចព្រមព្រៀងណាមួយត្រូវបានសម្រេចឡើងអំពីជំនួបដែលអាចទៅរួចណាមួយរវាងប្រធានាធិបតីរុស្ស៊ីលោក Vladimir Putin និងសម្ដេចប៉ាប Francis សម្រាប់ការពិភាក្សាអំពីវិបត្តិអ៊ុយក្រែននោះទេ។ សម្ដេចប៉ាប Francis បានថ្លែងនៅក្នុងកិច្ចសម្ភាសន៍មួយដែលចេញផ្សាយកាលពីថ្ងៃអង្គារថា ព្រះអង្គបានស្នើសុំជួបជាមួយនឹងលោក Putin ដើម្បីព្យាយាមបញ្ឈប់សង្គ្រាមនៅក្នុងប្រទេសអ៊ុយក្រែន ប៉ុន្តែមិនទាន់ទទួលបានការឆ្លើយតបណាមួយនៅឡើយទេ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។

សម្ដេចប៉ាប Francis យាងថ្លែងសុន្ទរកថានៅទីលានប្រជុំជនក្នុងទីក្រុង St. Peter នៅវ៉ាទីកង់ ថ្ងៃទី ៤ ខែឧសភា ឆ្នាំ២០២២។

ឧបនាយករដ្ឋមន្ត្រីប៊ុលហ្គារីលោក Assen Vassilev បាននិយាយនៅថ្ងៃពុធនេះថា ប្រទេសប៊ុយហ្គារីនឹងស្វះស្វែងសុំការលើកលែង ប្រសិនបើសហភាពអឺរ៉ុបយល់ព្រមអនុញ្ញាតឱ្យមានការលើកលែងលើការហាមឃាត់ណាមួយលើការនាំចូលប្រេងឥន្ធនៈពីរុស្ស៊ី។ លោកបានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត Capital ថា៖ «តាមលក្ខណៈជាក់ស្ដែង ប្រទេសប៊ុយហ្គារីអាចធ្វើបានដោយមិនចាំបាច់ពឹងលើប្រេងឆៅរបស់រុស្ស៊ី ប៉ុន្តែករណីនេះនឹងធ្វើឱ្យតម្លៃប្រេងឥន្ធនៈឡើងថ្លៃខ្លាំង។ ដូច្នេះ ប្រសិនបើគណៈកម្មការអឺរ៉ុបនៃសហភាពអឺរ៉ុបពិចារណាអំពីការលើកលែង យើងចង់ទទួលបានការលើកលែងដូចនេះ»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីសេដ្ឋកិច្ចស្លូវ៉ាគីលោក Richard Sulik បាននិយាយនៅថ្ងៃពុធនេះថា ប្រទេសស្លូវ៉ាគីចង់បានដំណាក់កាលអន្តរកាលរយៈពេល ៣ ឆ្នាំ សម្រាប់ខ្លួននៅក្នុងការចាប់ផ្ដើមអនុវត្តដោយសន្សឹមៗតាមសំណើទណ្ឌកម្មរបស់សហភាពអឺរ៉ុបនៅក្នុងការហាមឃាត់ការនាំចូលប្រេងឥន្ធនៈពីរុស្ស៊ី។ ប្រទេសស្លូវ៉ាគីទទួលបានប្រេងឆៅដែលនាំចូលពីរុស្ស៊ីជាចម្បងតាមបំពង់បង្ហូរប្រេង Druzhba សម័យសហភាពសូវៀត។ នេះបើយោងតាមទីភ្នាក់ងារព័ត៌មាន Reuters។
តម្លៃប្រេងឥន្ធនៈបានកើនឡើងនៅថ្ងៃពុធនេះ នៅពេលដែលសហភាពអឺរ៉ុប ដែលជាប្លុកធ្វើពាណិជ្ជកម្មច្រើនជាងគេបំផុតនៅលើពិភពលោក បានបង្ហាញអំពីគម្រោងនៅក្នុងហាមឃាត់ការនាំចូលប្រេងឥន្ធនៈពីរុស្ស៊ីជាដំណាក់កាល។ នេះបើយោងតាមទីភ្នាក់ងារព័ត៌មាន Reuters។
លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បានស្នើនៅថ្ងៃពុធឱ្យមានការចាប់ផ្ដើមនូវកញ្ចប់ជំនួយជួយស្ដារប្រទេសអ៊ុយក្រែនដើម្បីជួយកសាងអ៊ុយក្រែនឡើងវិញ នៅពេលណាដែលសង្គ្រាមរបស់រុស្ស៊ីនៅអ៊ុយក្រែនបានបញ្ចប់។ លោកស្រីបានថ្លែងប្រាប់សភាសហភាពអឺរ៉ុបថា៖ «កញ្ចប់ជំនួយនេះគួរ តែជំរុញឱ្យមានការវិនិយោគជាច្រើន [នៅអ៊ុយក្រែន] ដើម្បីបំពេញតម្រូវការនិងការកែទម្រង់ចាំបាច់នានា»។ លោកស្រីបានបន្ថែមថា៖ «នៅទីបំផុត វានឹងត្រួសត្រាយផ្លូវសម្រាប់អនាគតរបស់អ៊ុយក្រែននៅក្នុងសហភាពអឺរ៉ុប»។ នេះបើយោងតាមទីភ្នាក់ងារព័ត៌មាន Reuters។
លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុបបាននិយាយនៅថ្ងៃពុធថា សហភាពអឺរ៉ុបនឹងហាមឃាត់ស្ថានីយទូរទស្សន៍ចំនួន៣ដែលគ្រប់គ្រងដោយរដ្ឋរបស់រុស្ស៊ី ដែលនេះគឺជាផ្នែកមួយនៃកញ្ចប់ទណ្ឌកម្មលើកទី៦របស់សហភាពអឺរ៉ុបទាក់ទិននឹងការធ្វើសង្គ្រាមរបស់រុស្ស៊ីនៅអ៊ុយក្រែន។ លោកស្រីបានថ្លែងប្រាប់សភាសហភាពអឺរ៉ុបថា៖ «ស្ថានីយទូរទស្សន៍ទាំងនេះនឹងមិនត្រូវបានអនុញ្ញាតឱ្យចែកផ្សាយព័ត៌មានរបស់ខ្លួនជាបន្តទៀតឡើយនៅក្នុងសហភាពអឺរ៉ុប មិនថាក្នុងទម្រង់បែបណានោះទេ ទោះតាមខ្សែកាប តាមផ្កាយរណប តាមអ៊ីនធឺណិត ឬក៏តាម apps ក្នុងទូរស័ព្ទ smartphone ក៏ដោយ»។ លោកស្រីបានហៅស្ថានីយទូរទស្សន៍ទាំងនេះថាជា «កន្លែងបំពងសំឡេងខ្លាំងក្លានៃការកុហកនិងការឃោសនារបស់ប្រធា នាធិបតីរុស្ស៊ីលោក Vladimir] Putin»។ នេះបើយោងតាមទីភ្នាក់ងារព័ត៌មាន Reuters។
គណៈកម្មការអឺរ៉ុបនៃសហភាពអឺរ៉ុបបានស្នើឱ្យមានការដាក់ទណ្ឌកម្មលើធនាគារ Credit Bank of Moscow និងធនាគារ Russian Agricultural Bank របស់រុស្ស៊ី។ នេះបើយោងតាមប្រភពមួយពីសហភាពអឺរ៉ុបដែលបានប្រាប់ទីភ្នាក់ងារព័ត៌មានReuters នៅថ្ងៃពុធ។ នៅមុនហ្នឹងក្នុងថ្ងៃពុធនេះផងដែរ លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បាននិយាយថា ធនាគារ Sberbank របស់រុស្ស៊ីក៏នឹងត្រូវរងទណ្ឌកម្មផងដែរ។

រូបឯកសារ៖ លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប ថ្លែងសុន្ទរកថានៅទីស្នាក់ការសហភាពអឺរ៉ុប ក្នុងទីក្រុងព្រុចសែល ប្រទេសប៊ែលហ្សិក ថ្ងៃទី ២៧ ខែមេសា ឆ្នាំ២០២២។ (AP)

អឺរ៉ុបនឹងនៅបន្តទិញប្រេងឥន្ធនៈពីរុស្ស៊ីតាមរយៈប្រទេសទីបី នៅពេលដែលដែលសហភាពអឺរ៉ុបដាក់ស្នើនូវការហាមឃាត់ការនាំចូលប្រេងឥន្ធនៈពីរុស្ស៊ី។ នេះបើយោងតាមសេចក្ដីរាយការណ៍របស់ទីភ្នាក់ងារ RIA របស់រុស្ស៊ីដែលយោងលើសម្ដីរបស់លោក Vladimir Dzhabarov អនុប្រធានទីមួយនៃគណៈកម្មាធិការកិច្ចការអន្តរជាតិនៃព្រឹទ្ធសភារុស្ស៊ី ដែលបាននិយាយនៅថ្ងៃពុធនេះ។ នេះបើយោងតាមទីភ្នាក់ងារព័ត៌មាន Reuters។
ប្រទេសហុងគ្រីនិងប្រទេសស្លូវ៉ាគីនឹងអាចបន្តទិញប្រេងឆៅពីរុស្ស៊ីរហូតដល់ដំណាច់ឆ្នាំ ២០២៣នៅក្រោមកិច្ចសន្យាដែលមានស្រាប់ ដែលនេះគឺជាការលើកលែងនៅក្នុងការហាមឃាត់ការនាំចូលប្រទេសឥន្ធនៈពីរុស្ស៊ីដែលគណៈកម្មការអឺរ៉ុបនៃសហភាពអឺរ៉ុបបានស្នើឡើងនៅថ្ងៃពុធ។ នេះបើយោងតាមប្រភពមួយពីសហភាពអឺរ៉ុបដែលបានប្រាប់ទីភ្នាក់ងារព័ត៌មាន Reuters នៅថ្ងៃពុធ។
នៅក្នុងការស្នើការដាក់ទណ្ឌកម្មជុំទី៦ប្រឆាំងនឹងរុស្ស៊ីទាក់ទិននឹងការធ្វើសង្គ្រាមរបស់រុស្ស៊ីនៅអ៊ុយក្រែន លោកស្រី Ursula von der Leyen ប្រធានគណៈកម្មការអឺរ៉ុបនៃសហភាពអឺរ៉ុប បាននិយាយនៅថ្ងៃពុធនេះថា បណ្ដាប្រទេសសហភាពអឺរ៉ុបនឹងឈប់នាំចូលប្រេងឥន្ធនៈនិងប្រេងចម្រាញ់ពីរុស្ស៊ី។ លោកស្រីបានបញ្ជាក់ប្រាប់សភាអឺរ៉ុបថា៖ «យើងនឹងបញ្ឈប់ការនាំចូលប្រេងឆៅពីរុស្ស៊ីជាដំណាក់កាលនៅក្នុងអំឡុងពេល ៦ ខែ និងការនាំចូលប្រេងចម្រាញ់នៅត្រឹមចុងឆ្នាំនេះ»។ អ្នកស្រីបានបន្តថា៖ «នេះគឺជាការហាមឃាត់ការនាំចូលទាំងស្រុងនូវប្រេងឥន្ធនៈរបស់រុស្ស៊ីទាំងអស់ ទាំងតាមផ្លូវសមុទ្រនិងតាមបំពង់បង្ហូរប្រេង ទាំងប្រេងឆៅនិងប្រេងចម្រាញ់»។ អ្នកស្រីបានបន្ថែមថា៖ «វានឹងមិនងាយស្រួលនោះទេ។ សមាជិក [សហភាពអឺរ៉ុប] ខ្លះពឹងផ្អែកខ្លាំងលើប្រេងឥន្ធនៈរបស់រុស្ស៊ី។ ប៉ុន្តែយើងត្រូវតែធ្វើការលើរឿងនេះ»។ សំណើទណ្ឌកម្មនេះតម្រូវឱ្យមានការយល់ព្រមពីប្រទេសទាំង ២៧ នៃសហភាពអឺរ៉ុបដើម្បីអាចចូលជាធរមានបាន។ នេះបើយោងតាមទីភ្នាក់ងារព័ត៌មាន Reuters។
ប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Charles Mechel បានសន្យានៅថ្ងៃពុធថានឹងបង្កើនជំនួយយោធារបស់សហភាពអឺរ៉ុបដល់ប្រទេសម៉ុលដាវី ដែលនៅជាប់នឹងប្រទេសអ៊ុយក្រែន។ កាលពីពេលថ្មីៗនេះ ប្រទេសម៉ុលដាវីបានប្រឈមនឹងការវាយប្រហារជាច្រើននៅក្នុងតំបន់ផ្ដាច់ខ្លួនដែលមានទំនោរទៅរករុស្ស៊ី។ នេះបើយោងតាមទីភ្នាក់ងារព័ត៌មាន AFP។
សាកសពជនស៊ីវិល២០នាក់ទៀតត្រូវបានរកឃើញនៅក្នុងរយៈពេល២៤ម៉ោងចុងក្រោយនេះនៅក្នុងតំបន់រដ្ឋធានីកៀវ ប្រទេសអ៊ុយក្រែន។ នេះបើតាមការបញ្ជាក់របស់ប៉ូលិសនៅថ្ងៃពុធនេះ។ ការរកឃើញនេះបានធ្វើឱ្យចំនួនសាកសពសរុបដែលបានរកឃើញកន្លងមកកើនដល់ ១.២៣៥ នាក់។ នេះបើយោងតាមទីភ្នាក់ងារព័ត៌មាន AFP។
ក្បួនរថយន្តក្រុងបានចាកចេញពីទីក្រុង Mariupol ប្រទេសអ៊ុយក្រែន នៅថ្ងៃពុធដែលនេះគឺជាការព្យាយាមថ្មីមួយរបស់ប្រទេសអ៊ុយក្រែន អង្គការសហប្រជាជាតិនិងគណៈ កម្មាធិការអន្តរជាតិកាកបាទក្រហម (ICRC) នៅក្នុងការជម្លៀសជនស៊ីវិលចេញពីទីក្រុងនេះ។ នេះបើតាមការបញ្ជាក់របស់អភិបាលតំបន់ Donetsk លោក Pavlo Kyrylenko។ លោកបានបន្ថែមថា រថយន្តក្រុងទាំងនេះធ្វើដំណើរឆ្ពោះទៅទីក្រុង Zaporizhzhia ដែលគ្រប់គ្រងដោយអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

ប្រជាជនអ៊ុយក្រែនហូបអាហារក្រោយពីរត់ភៀសខ្លួនពីក្រុង Mariupol មកដល់មជ្ឈមណ្ឌលសម្រាប់ជនភៀសខ្លួននៅក្រុង Zaporizhzhia ប្រទេសអ៊ុយក្រែន ថ្ងៃទី ៣ ខែឧសភា ឆ្នាំ២០២២។ (AP Photo/Evgeniy Maloletka)

ក្រសួងការបរទសរុស្ស៊ីបានប្រកាសនៅថ្ងៃពុធនេះអំពីការដាក់ទណ្ឌកម្មលើមន្ត្រីរដ្ឋាភិបាល អ្នកកាសែតនិងសាស្ត្រាចារ្យនៃប្រទេសជប៉ុនទាំងអស់ចំនួន៦៣នាក់ចំពោះការប្រឡូកនៅក្នុងអ្វីដែលរុស្ស៊ីហៅថាជា «វោហាសាស្ត្រដែលមិនអាចទទួលយកបាន» ប្រឆាំងនឹងរដ្ឋាភិបាលរុស្ស៊ី។ បញ្ជីឈ្មោះអ្នកដែលរងទណ្ឌកម្មរបស់រុស្ស៊ីនេះរួមមានទាំងនាយករដ្ឋមន្ត្រីជប៉ុនលោក Fumio Kishida រដ្ឋមន្ត្រីការបរទេសជប៉ុនលោក Yoshimasa Hayashi និងរដ្ឋមន្ត្រីការពារជាតិជប៉ុនលោក Nobuo Kishi ផងដែរក្នុងចំណោមមន្ត្រីផ្សេងៗទៀត។ ក្រសួងការបរទេសរុស្ស៊ីបញ្ជាក់ថា ទណ្ឌកម្មនេះរារាំងបុគ្គលទាំងនោះមិនឱ្យចូលមកក្នុងប្រទេសរុស្ស៊ីដោយគ្មានកាលកំណត់។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលអ៊ុយក្រែនបានចោទប្រកាន់រដ្ឋាភិបាលរុស្ស៊ីនៅថ្ងៃពុធថាមានគម្រោងរៀបចំក្បួនព្យុះហយាត្រាយោធានៅក្នុងទីក្រុងMariupol នៅថ្ងៃទី៩ ខែឧសភាខាងមុខដើម្បីប្រារព្ធជ័យជម្នះលើពួកណាហ្ស៊ីកាលពីសម័យសង្គ្រាមលោកលើកទីពីរ។ រដ្ឋាភិបាលអ៊ុយក្រែនបានបញ្ជាក់ថា មន្ត្រីម្នាក់នៃរដ្ឋបាលប្រធានាធិបតីរុស្ស៊ីបានទៅដល់ទីក្រុង Mariupolហើយ។ នេះបើយោងតាមទីភ្នាក់ងារព័ត៌មាន AFP។
ចក្រភពអង់គ្លេសបានបញ្ជាក់នៅថ្ងៃពុធនេះថា រុស្ស៊ីបានដាក់ពង្រាយក្រុមយុទ្ធសាស្ត្រកងវរសេនាតូចចំនួន ២២ ក្រុមនៅជិតទីក្រុង Izium នៅភាគខាងកើតប្រទេសអ៊ុយ ក្រែន ដើម្បីរុលទៅមុខតាមបណ្ដោយអ័ក្សនៅភាគខាងជើងនៃតំបន់ Donbas។ ផ្នែកស៊ើបការណ៍សម្ងាត់យោធារបស់ចក្រភពអង់គ្លេសបានបញ្ជាក់នៅលើ Twitter ថា រុស្ស៊ីទំនងជាអាចមានបំណងរំកិលផុតពីទីក្រុង Izium ដើម្បីដណ្ដើមកាន់កាប់ទីក្រុង Kramatorsk និងទីក្រុង Severodonetsk។ នេះបើយោងតាមទីភ្នាក់ងារព័ត៌មាន Reuters។
កងកម្លាំងនៃប្រទេសបេឡារុសបានចាប់ផ្ដើមការធ្វើសមយុទ្ធបន្ទាន់នៅថ្ងៃពុធដើម្បីសាកសមត្ថភាពត្រៀមប្រយុទ្ធរបស់ខ្លួន។ នេះបើយោងតាមទីភ្នាក់ងារព័ត៌មាន TASS របស់រុស្ស៊ី ដែលបានយោងលើការលើកឡើងរបស់ក្រសួងការពារជាតិបេឡារុស។ នៅក្នុងស្ថានភាពនៃការឈ្លានពានរបស់រុស្ស៊ីលើអ៊ុយក្រែន ក្រសួងការពារជាតិបេឡា រុសថា ការធ្វើសមយុទ្ធនេះមិនបង្កជាការគំរាមកំហែងចំពោះប្រទេសជិតខាងខ្លួនឬក៏ចំពោះសហគមន៍ជាទូទៅនៅទ្វីបអឺរ៉ុបនោះទេ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសសហរដ្ឋអាមេរិកលោកAntony Blinkenនិងរដ្ឋមន្ត្រីការបរទេសចក្រភពអង់គ្លេសលោកស្រី Liz Truss បានពិភាក្សាគ្នាតាមទូរស័ព្ទកាលពីថ្ងៃអង្គារអំពីការគាំទ្រប្រទេសអ៊ុយក្រែន។ អ្នកនាំពាក្យក្រសួងការបរទេសអាមេរិកលោក Ned Price បាននិយាយថា ប្រមុខការទូតទាំងពីរបានពិភាក្សាអំពី«ជំនួយផ្នែកសន្តិសុខនិងផ្នែកមនុស្សធម៌បន្ថែមទៀតសម្រាប់អ៊ុយក្រែននិងសាមគ្គីភាពរវាងបណ្ដាប្រទេសនៅជុំវិញមហាសមុទ្រអាត្លង់ទិកជាបន្ត»ក៏ដូចជា «ផលវិបាកផ្នែកសេដ្ឋកិច្ចលើប្រទេសណាដែលនៅបន្តផ្ដល់ការគាំទ្រផ្នែកហិរញ្ញវត្ថុនិងសម្ភារដែលជួយដល់ការធ្វើសង្គ្រាមរបស់រុស្ស៊ីប្រឆាំងនឹងអ៊ុយក្រែន» ផងដែរ។
ប្លុកពីរនៃបណ្ដាប្រទេសនៅតំបន់អាមេរិកកណ្ដាលនិងតំបន់ការ៉ាអ៊ីបកាលពីថ្ងៃអង្គារបានថ្កោលទោសការវាយប្រហាររបស់រុស្ស៊ីលើអ៊ុយក្រែនហើយបានព្រមានអំពីផលប៉ះពាល់នៃសង្គ្រាមនេះលើតំបន់អាមេរិកកណ្ដាលនិងតំបន់ការ៉ាអ៊ីប។ នៅក្នុងការថ្លែងសម្រាប់សហគមន៍ប្រទេសតំបន់ការ៉ាអ៊ីប(CARICOM)ដែលជាអង្គការអន្តររដ្ឋាភិបាលតំណាងឱ្យប្រទេសភាគច្រើននៃតំបន់ការ៉ាអ៊ីប រដ្ឋមន្ត្រីការបរទេសប្រទេសបេលីលោក Eamon Courtenay បាននិយាយនៅក្នុងសន្និសីទកាសែតថា៖ «យើងទាមទារឱ្យមានការបញ្ឈប់អរិភាពពាក់ព័ន្ធទៅនឹងបូរណភាពទឹកដីនិងអធិបតេយ្យភាពរបស់ប្រទេសអ៊ុយក្រែន»។ ចំណែកឯរដ្ឋមន្ត្រីការបរទេសប៉ាណាម៉ាវិញបានថ្លែងថា អង្គការប្រព័ន្ធសមាហរណកម្មតំបន់អាមេរិកកណ្ដាល (SICA) ដែលមានប្រទេសទាំងអស់នៅក្នុងតំបន់ជាសមាជិក «ថ្កោលទោសខ្លាំងក្លាលើការប្រើកម្លាំងនិងអំពើហិង្សា» របស់រុស្ស៊ី។ នេះបើយោងតាមទីភ្នាក់ងារព័ត៌មាន Reuters។

២២:២៧ ៣.៥.២០២២

ថ្ងៃអង្គារ ទី ៣ ខែឧសភា៖

រដ្ឋាភិបាលរុស្ស៊ីបានបញ្ជាក់ថា ប្រធានាធិបតីរុស្ស៊ីលោក Vladimir Putin បានប្រាប់ប្រធានាធិបតីបារាំងលោក Emmanuel Macron នៅថ្ងៃអង្គារនេះថា បស្ចិមប្រទេសត្រូវតែបញ្ឈប់ការផ្គត់ផ្គង់សព្វាវុធដល់អ៊ុយក្រែន និងបានចោទប្រកាន់រដ្ឋាភិបាលអ៊ុយក្រែនថាគ្មានភាពម៉ឺងម៉ាត់នៅក្នុងការចរចាដើម្បីបញ្ចប់សង្គ្រាម។ នេះបើយោងតាមទីភ្នាក់ងារព័ត៌មាន AFP។
ខុទ្ទកាល័យប្រធានាធិបតីបារាំងបានបញ្ជាក់ថា លោកប្រធានាធិបតី Emmanuel Macron បានប្រាប់ប្រធានាធិបតីរុស្ស៊ីលោក Vladimir Putin នៅក្នុងការសន្ទនាតាមទូរស័ព្ទនៅថ្ងៃអង្គារនេះថា លោកមានឆន្ទៈនៅក្នុងការធ្វើការជាមួយនឹងអង្គការអន្តរជាតិនានាដើម្បីជួយឱ្យមានការដកចេញនូវការហាមឃាត់របស់រុស្ស៊ីលើការនាំចេញស្បៀងអាហាររបស់អ៊ុយក្រែនតាមរយៈសមុទ្រខ្មៅ។ នេះបើយោងតាមទីភ្នាក់ងារព័ត៌មាន Reuters។
ខុទ្ទកាល័យវិមានប្រធានាធិបតីបារាំងបានបញ្ជាក់ថា នៅក្នុងការសន្ទនាតាមទូរស័ព្ទរយៈពេល ២ ម៉ោងជាមួយនឹងប្រធានាធិបតីរុស្ស៊ីលោក Vladimir Putin នៅថ្ងៃអង្គារនេះ ក្រៅពីការអំពាវនាវឡើងវិញឱ្យរុស្ស៊ីបញ្ចប់ការវាយប្រហារលើអ៊ុយក្រែនតាមរយៈកិច្ចឈប់វាយប្រយុទ្ធគ្នានិងការចរចាសន្តិភាព ប្រធានាធិបតីបារាំងលោក Emmanuel Macron បានជំរុញលោក Putin ឱ្យអនុញ្ញាតឱ្យមានការជម្លៀសមនុស្សចេញពីរោងចក្រដែកថែប Azovstal ក្នុងទីក្រុង Mariupol ជាបន្តទៀត។ នេះបើយោងតាមទីភ្នាក់ងារព័ត៌មាន AFP។
ប្រធានគណៈកម្មាធិការអន្តរជាតិកាកបាទក្រហមប្រចាំប្រទេសអ៊ុយក្រែនបាននិយាយនៅថ្ងៃអង្គារនេះថា ជនស៊ីវិលក្នុងចំនួនមិនច្បាស់នៅជាប់គាំងនៅឡើយនៅក្នុងទីក្រុង Mariupol និងតំបន់ជុំវិញនានា បន្ទាប់ពីអង្គការកាកបាទក្រហមនេះបានជម្លៀសជនស៊ីវិលជាង ១០០ នាក់ចេញពីរោងចក្រដែកថែប Azovstal រួចហើយ។ នេះបើយោងតាមទីភ្នាក់ងារព័ត៌មាន Reuters។

ប្រជាជនអ៊ុយក្រែនត្រូវបានជម្លៀសចេញពីតំបន់រោងចក្រដែកថែបក្នុងក្រុង Mariupol។ ពួកគេបានធ្វើដំណើរមកដល់ទីក្រុងZaporizhzhia ប្រទេសអ៊ុយក្រែន ថ្ងៃទី៣ ខែឧសភា ឆ្នាំ២០២២។ (AFP)

មន្ត្រីផ្នែកមនុស្សធម៌ម្នាក់របស់អង្គការសហប្រជាជាតិបាននិយាយនៅថ្ងៃអង្គារនេះថា អង្គការសហប្រជាជាតិបានជម្លៀសដោយជោគជ័យនូវមនុស្ស ១០១ នាក់ចេញពីរោងចក្រដែកថែប Azovstal ដោយបាននិយាយថា ជនដែលត្រូវជម្លៀសចេញភាគច្រើនបានស្ថិតនៅក្នុងទីក្រុង Zaporizhzhia ដែលនៅទីនោះពួកគេបានទទួលជំនួយមនុស្សធម៌។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ អ្នកស្រី Osnat Lubrani អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិទទួលបន្ទុកកិច្ចការប្រទេសអ៊ុយក្រែន បានបញ្ជាក់នៅក្នុងសេចក្ដីថ្លែងការណ៍មួយដែលផ្ញើទៅកាន់អ្នកកាសែតថា៖ «ដោយសារតែប្រតិបត្តិការនេះ ស្ត្រី បុរស កុមារ និងមនុស្សវ័យចំណាស់ទាំងអស់ចំនួន ១០១ នាក់ នៅទីបំផុតអាចចាកចេញពីលេណដ្ឋាននៅក្រោមរោងចក្រដែកថែប Azovstal និងអាចមើលឃើញពន្លឺថ្ងៃហើយក្នុងពេលពីរខែក្រោយមក»។
អភិបាលតំបន់ Donetsk លោក Pavlo Kyrylenko បានបញ្ជាក់តាម Telgram នៅថ្ងៃអង្គារនេះថា យ៉ាងហោចណាស់មានមនុស្ស ១០ នាក់ត្រូវបានសម្លាប់ និង ១៥ នាក់ទៀតរងរបួសនៅក្នុងការវាយប្រហាររបស់រុស្ស៊ីលើរោងចក្រភេសជ្ជៈកូកាកូឡាក្នុងទីក្រុង Avdijvka នៅភាគខាងកើតប្រទេសអ៊ុយក្រែន។ លោកបានព្រមានថា ចំនួនជនរងគ្រោះអាចកើនឡើង។ នេះបើយោងតាមទីភ្នាក់ងារព័ត៌មាន AFP។
នៅក្នុងការប្រជុំនៅថ្ងៃអង្គារនេះនៅក្នុងរដ្ឋធានីកៀវ រដ្ឋសភាអ៊ុយក្រែនបានអនុម័តច្បាប់មួយរារាំងសកម្មភាពរបស់គណបក្សនយោបាយដែលមានទំនោរទៅរករដ្ឋាភិបាលរុស្ស៊ី។ នេះបើយោងតាមសេចក្ដីថ្លែងការណ៍ផ្លូវការមួយដែលចែកផ្សាយនៅលើ Twitter។
អធិការបតីអាល្លឺម៉ង់លោក Olaf Scholz បាននិយាយនៅថ្ងៃអង្គារនេះថា គ្មាននរណាម្នាក់អាចសន្មតថារុស្ស៊ីនឹងមិនវាយប្រហារលើប្រទេសដទៃទៀតនោះទេ ដោយសារតែរុស្ស៊ីបានរំលោភលើច្បាប់អន្តរជាតិរួចទៅហើយនៅក្នុងប្រទេសអ៊ុយក្រែន។ លោកបានបន្ថែមថា ប្រទេសអាល្លឺម៉ង់នឹងគាំទ្រប្រទេសហ្វាំងឡង់និងប្រទេសស៊ុយអែត ប្រសិនបើប្រទេសទាំងពីរសម្រេចចូលជាសមាជិករបស់អង្គការអូតង់ (NATO)។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីបានបញ្ជាក់នៅថ្ងៃអង្គារថា ប្រធានាធិបតីរុស្ស៊ីលោក Vladimir Putin បានចុះហត្ថលេខាលើអនុក្រឹត្យមួយស្ដីពីទណ្ឌកម្មសេដ្ឋកិច្ចបែបសងសឹកដើម្បីឆ្លើយតបទៅនឹង «ទង្វើអមិត្តរបស់ប្រទេសនិងអង្គការអន្តរជាតិមួយចំនួន»។ នៅក្រោមអនុក្រឹត្យនេះ រដ្ឋាភិបាលរុស្ស៊ីមានពេល១០ថ្ងៃដើម្បីរៀបចំបញ្ជីបុគ្គលនិងក្រុមហ៊ុនបរ ទេសដែលត្រូវរងទណ្ឌកម្មក៏ដូចជាកំណត់ «លក្ខណៈវិនិច្ឆ័យបន្ថែមទៀត» សម្រាប់ប្រតិបត្តិការហិរញ្ញវត្ថុមួយចំនួនដែលអាចត្រូវដាក់កំហិត។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីចក្រភពអង់គ្លេសលោក Boris Johnson បាននិយាយនៅថ្ងៃអង្គារនៅក្នុងសុន្ទរកថាមួយតាមអនឡាញទៅកាន់រដ្ឋសភាអ៊ុយក្រែនថា អ៊ុយក្រែននឹងយកឈ្នះលើប្រទេសរុស្ស៊ី ហើយនឹងក្លាយជាប្រទេសដែលមានសេរីភាពជាថ្មីម្ដងទៀត។ លោក Johnson ថ្លែងដូច្នេះថា៖ «ខ្ញុំមានសារមួយសម្រាប់អ្នកនៅថ្ងៃនេះ។ អ៊ុយក្រែននឹងឈ្នះ។ អ៊ុយក្រែននឹងមានសេរីភាព»។ នៅក្នុងការថ្លែងនោះផងដែរ លោក Johnson ក៏បានប្រកាសអំពីការផ្ដល់ជំនួយយោធាបន្ថែមចំនួន៣៧៥លានដុល្លារអាមេ រិកដល់អ៊ុយក្រែន និងបានបញ្ជាក់ថា ចក្រភពអង់គ្លេសនឹងបន្តផ្គត់ផ្គង់ប្រទេសអ៊ុយ ក្រែន។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីឥណ្ឌាលោក Narendra Modi នៅថ្ងៃអង្គារបានអំពាវនាវឱ្យមានការឈប់វាយប្រយុទ្ធគ្នានៅក្នុងប្រទេសអ៊ុយក្រែននិងឱ្យមានការចរចាសន្តិភាពរវាងរដ្ឋាភិ បាលអ៊ុយក្រែននិងរដ្ឋាភិបាលរុស្ស៊ី។ លោក Modi បាននិយាយនៅក្នុងសន្និសីទកាសែតក្នុងរដ្ឋធានីកូប៉ិនហាកប្រទេសដាណឺម៉ាកថា៖ «យើងអំពាវនាវឱ្យមានកិច្ចឈប់វាយប្រយុទ្ធគ្នាជាបន្ទាន់នៅក្នុងប្រទេសអ៊ុយក្រែន និងឱ្យប្រើការសន្ទនានិងការទូតដើម្បីដោះស្រាយបញ្ហា»។ នេះបើយោងតាមទីភ្នាក់ងារព័ត៌មាន Reuters។

នាយករដ្ឋមន្ត្រីឥណ្ឌា លោក Narendra Modi (ស្ដាំ) ឈរថ្លែងសុន្ទរកថានៅជិតនាយករដ្ឋមន្ត្រីដាណាម៉ាក អ្នកស្រី Mette Frederiksen ក្នុងអំឡុងពេលនៃសន្និសីទសារព័ត៌មានរួមគ្នាមួយនៅក្រុង Kongens Lyngby ប្រទេសដាណាម៉ាក ថ្ងៃទី ៣ ខែឧសភា ឆ្នាំ២០២២។ (Ritzau Scanpix/Martin Sylvest via REUTERS)

ក្រសួងការពារជាតិរុស្ស៊ីបានបញ្ជាក់នៅថ្ងៃអង្គារថា កងទ័ពរុស្ស៊ីបានចាប់ផ្ដើមបាញ់ផ្លោងនិងទម្លាក់គ្រាប់បែកលើរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន បន្ទាប់ពីកងទ័ពអ៊ុយក្រែនបានប្រើកិច្ចឈប់វាយប្រយុទ្ធគ្នាដើម្បីត្រៀមជំហរប្រយុទ្ធនៅទីនោះ។ នេះបើយោងតាមទីភ្នាក់ងារព័ត៌មាន Reuters។
អភិបាលក្រុង Mariupol លោក Vadym Boychenko បាននិយាយនៅថ្ងៃអង្គារថា ជនស៊ីវិលជាង២០០នាក់នៅតស៊ូជាមួយនឹងអ្នកប្រយុទ្ធនៅក្នុងរោងចក្រដែកថែប Azovstal ក្នុងទីក្រុង Mariupol នៅភាគខាងត្បូងប្រទេសអ៊ុយក្រែន។ លោក Boychenko បានបន្ថែមថា ជនស៊ីវិលសរុបចំនួនប្រហែល ១០០.០០០ នាក់នៅជាប់នៅក្នុងទីក្រុង Mariupol នៅឡើយ។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិរុស្ស៊ីបានបញ្ជាក់នៅថ្ងៃអង្គារថា មីស៊ីលដែលអាចបាញ់ចំគោលដៅក្នុងកម្រិតខ្ពស់របស់ខ្លួនបានបាញ់ចំមជ្ឈមណ្ឌលភស្ដុភារមួយកន្លែងនៅវាលយន្ត ហោះយោធាជិតទីក្រុង Odesa របស់អ៊ុយក្រែន ដែលមជ្ឈមណ្ឌលនេះត្រូវបានប្រើសម្រាប់បញ្ជូនសព្វាវុធពីបស្ចិមប្រទេសឱ្យអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីនៅថ្ងៃអង្គារបានចោទប្រកាន់ប្រទេសអ៊ីស្រាអែលថាបានគាំទ្រ«របបណាហ្ស៊ីបែបថ្មីនៅក្នុងប្រទេសអ៊ុយក្រែន»។ តាមរយៈការចោទប្រកាន់នេះ រដ្ឋាភិបាលរុស្ស៊ីបានគាំទ្រការចោទប្រកាន់របស់រដ្ឋមន្ត្រីការបរទេសរុស្ស៊ីលោក Sergei Lavrov ដែលថាលោក Adolf Hitler ប្រហែលជា «មានឈាមជ័រជាជាតិសាសន៍ជ្វីហ្វ»។ រដ្ឋមន្ត្រីការបរទេសអ៊ីស្រាអែលលោក Yair Lapid បានថ្កោលទោសការលើកឡើងរបស់លោក Lavrov នេះកាលពីថ្ងៃចន្ទ។ ក្រសួងការបរទេសរុស្ស៊ីបានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃអង្គារថា៖ «យើងបានផ្ដោតការយកចិត្តទុកដាក់លើការលើកឡើងបែបប្រឆាំងប្រវត្តិសាស្ត្ររបស់រដ្ឋមន្ត្រីការបរទេសអ៊ីស្រាអែលលោក Yair Lapid ដែលការលើកឡើងនេះមួយផ្នែកធំបានបង្ហាញឱ្យឃើញអំពីការសម្រេចចិត្តរបស់រដ្ឋាភិបាល [អ៊ីស្រាអែល] បច្ចុប្បន្ននៅក្នុងការគាំទ្ររបបណាហ្ស៊ីបែបថ្មីក្នុងប្រ ទេសអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
អ្នកនាំពាក្យអង្គការសុខភាពពិភពលោក (WHO) លោក Tarik Jasarevic បានបញ្ជាក់នៅថ្ងៃអង្គារថា ផ្នែកតំបន់អឺរ៉ុបរបស់ខ្លួននឹងរៀបចំកិច្ចប្រជុំពិសេសនៅសប្ដាហ៍ក្រោយអំពីផលប៉ះពាល់នៃការឈ្លានពានរបស់រុស្ស៊ីលើអ៊ុយក្រែនលើសុខភាពនិងសេវាសុខា ភិបាល។ លោក Jasarevic បាននិយាយនៅក្នុងសន្និសីទកាសែតមួយនៅក្នុងទីក្រុងហ្សឺណែវ ប្រទេសស្វីសថា៖ «នឹងមានកិច្ចប្រជុំមួយនៅថ្ងៃទី ១០ ខែឧសភា អំពីផលប៉ះពាល់នៃសង្គ្រាមលើប្រព័ន្ធសុខាភិបាលរបស់អ៊ុយក្រែន»។ នេះបើយោងតាមទីភ្នាក់ ងារព័ត៌មាន Reuters។
សម្ដេចប៉ាប Francis បានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត Corriere Della Sera របស់អ៊ីតាលីដែលបានចេញផ្សាយនៅថ្ងៃអង្គារនេះថា ព្រះអង្គបានស្នើសុំជួបជាមួយនឹងប្រធានាធិបតីរុស្ស៊ីលោក Vladimir Putin នៅក្នុងទីក្រុងមូស្គូ ប្រទេសរុស្ស៊ី ដើម្បីព្យាយាមបញ្ឈប់សង្គ្រាមនៅអ៊ុយក្រែន ប៉ុន្តែព្រះអង្គមិនទាន់ទទួលបានចម្លើយណាមួយនៅឡើយទេ។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិតៃវ៉ាន់បានបញ្ជាក់នៅថ្ងៃអង្គារថា ការបញ្ជូនមីស៊ីលបាញ់យន្តហោះពីលើស្មាពីសហរដ្ឋអាមេរិកមកឱ្យខ្លួនអាចត្រូវបានពន្យារពេល។ ក្រសួងនេះបានលើកឡើងថា ខ្លួនបានជំរុញសហរដ្ឋអាមេរិកឱ្យបញ្ជូនមីស៊ីលនេះតាមកាលកំណត់ ដោយសារតែសង្គ្រាមនៅអ៊ុយក្រែនអាចធ្វើឱ្យប៉ះពាល់ដល់ការផ្គត់ផ្គង់នេះ។ មីស៊ីលប្រភេទនេះគឺត្រូវការខ្លាំងនៅក្នុងប្រទេសអ៊ុយក្រែន ដោយកងទ័ពអ៊ុយក្រែនបានប្រើវាដើម្បីទប់ទល់នឹងយន្តហោះចម្បាំងរបស់រុស្ស៊ីដោយជោគជ័យ។ នេះបើយោងតាមទីភ្នាក់ងារព័ត៌មាន Reuters។
របាយការណ៍ស៊ើបការណ៍សម្ងាត់នៅសមរភូមិប្រចាំថ្ងៃរបស់ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃអង្គារនេះថា ដោយសារតែ «ការបរាជ័យ» របស់រុស្ស៊ី «ទាំងការរៀបចំផែនការយុទ្ធសាស្ត្រនិងទាំងការអនុវត្តប្រតិបត្តិការ» យោធារបស់រុស្ស៊ី «ឥឡូវនេះគឺខ្សោយជាងមុនខ្លាំងទាំងផ្នែកសម្ភារនិងផ្នែកគំនិត ដោយសារតែការឈ្លានពានរបស់ខ្លួនលើអ៊ុយក្រែន»។

កងកម្លាំងគាំទ្ររុស្ស៊ីបាញ់គ្រាប់រ៉ុក្កែតប្រភេទ BM-21 ក្នុងអំឡុងពេលនៃការប្រយុទ្ធគ្នារវាងរុស្ស៊ីនិងអ៊ុយក្រែននៅក្បែររោងចក្រផលិតដែកថែប Azovstal ក្នុងទីក្រុង Mariupol ប្រទេសអ៊ុយក្រែន ថ្ងៃទី ២ ខែឧសភា ឆ្នាំ២០២២។ (REUTERS/Alexander Ermochenko)

រដ្ឋមន្ត្រីការបរទេសហុងគ្រីលោក Peter Szijjarto បញ្ជាក់នៅក្នុងសេចក្ដីថ្លែងការណ៍មួយនៅថ្ងៃអង្គារនេះថា ប្រទេសហុងគ្រីនឹងមិនគាំទ្រទណ្ឌកម្មណាដែលបង្អាក់ដល់ការនាំចូលប្រទេសឥន្ធនៈនិងឧស្ម័នពីរុស្ស៊ីឱ្យហុងគ្រីនោះឡើយ។ លោក Szijjarto បានថ្លែងនៅក្នុងប្រទេសកាហ្សាក់ស្ថានថា ការបញ្ជូនប្រេងឥន្ធនៈរបស់រុស្ស៊ីតាមបំពង់បង្ហូរប្រេង Druzhba មានចំនួនប្រហែល៦៥% នៃប្រេងឥន្ធនៈដែលប្រទេសហុងគ្រីត្រូវការ ហើយគ្មានជម្រើសផ្គត់ផ្គង់ផ្សេងទៀតដែលអាចជំនួសជម្រើសនេះបានទេ។ នេះបើយោងតាមទីភ្នាក់ងារព័ត៌មាន Reuters។
លោក Roberto Cingolani រដ្ឋមន្ត្រីអន្តរកាលអេកូឡូស៊ីប្រទេសអ៊ីតាលី បានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត La Repubblica ដែលបានចេញផ្សាយនៅថ្ងៃអង្គារនេះថា ប្រទេសអ៊ីតាលីមានបំណងកាត់ផ្ដាច់ការពឹងផ្អែករបស់ខ្លួនលើឧស្ម័នរបស់រុស្ស៊ីនៅត្រឹមឆមាសទីពីរនៃឆ្នាំ ២០២៤។ លោក Cingolani បាននិយាយដូច្នេះថា៖ «យើងគួរតែមានស្វ័យភាពដោយខ្លួនឯងនៅត្រឹមឆមាសទីពីរនៃឆ្នាំ ២០២៤។ យើងអាចធ្វើបានដោយមិនចាំបាច់នាំចូលឧស្ម័នពីរុស្ស៊ី»។ នេះបើយោងតាមទីភ្នាក់ងារព័ត៌មាន Reuters។
មន្ត្រីការទូតកំពូលរបស់សហភាពអឺរ៉ុបលោក Josep Borrell បាននិយាយកាលពីថ្ងៃចន្ទថា សហភាពអឺរ៉ុបសង្ឃឹមថានឹងអនុម័តទណ្ឌកម្មជុំទី៦ប្រឆាំងនឹងរុស្ស៊ីនៅក្នុងការប្រជុំបន្ទាប់របស់ក្រុមប្រឹក្សាកិច្ចការបរទេសនៃសហភាពអឺរ៉ុប។ គណៈកម្មការអឺរ៉ុប ដែលជាអង្គនីតិប្រតិបត្តិនៃសហភាពអឺរ៉ុប គ្រោងនឹងស្នើនូវកញ្ចប់ទណ្ឌកម្មរបស់សហភាពអឺរ៉ុបនេះនៅក្នុងសប្ដាហ៍នេះ។ នេះបើយោងតាមទីភ្នាក់ងារព័ត៌មាន Reuters។
លោក Michael Carpenter ដែលជាឯកអគ្គរដ្ឋទូតសហរដ្ឋអាមេរិកប្រចាំអង្គការសន្តិសុខនិងកិច្ចសហប្រតិបត្តិការអឺរ៉ុប (OSCE) បានព្រមានថា ប្រទេសរុស្ស៊ីមានផែនការភ្ជាប់យកផ្នែកដ៏ធំនៃតំបន់ភាគខាងកើតប្រទេសអ៊ុយក្រែននៅពេលក្រោយក្នុងខែនេះ។ លោក Carpenter បាននិយាយថា សហរដ្ឋអាមេរិកជឿថារដ្ឋាភិបាលរុស្ស៊ីក៏មានផែនការទទួលស្គាល់ទីក្រុង Kherson នៅភាគខាងត្បូងប្រទេសអ៊ុយក្រែនជាសាធារណរដ្ឋឯករាជ្យផងដែរ។ លោកបានបន្ថែមថា សហរដ្ឋអាមេរិកឬក៏សម្ព័ន្ធមិត្តរបស់អាមេរិកនឹងមិនទទួលស្គាល់វិធានការណាមួយរបស់រុស្ស៊ីនេះទេ។ នេះបើយោងតាមទីភ្នាក់ងារព័ត៌មាន Associated Press។
ក្រសួងការពារជាតិរុស្ស៊ីបានបញ្ជាក់កាលពីថ្ងៃចន្ទថា មនុស្សជាងមួយលាននាក់ ដែលក្នុងនោះរួមមានទាំងកុមារជិត ២០០.០០០ នាក់ផងដែរ ត្រូវបានបញ្ជូនពីប្រទេសអ៊ុយក្រែនទៅកាន់ប្រទេសរុស្ស៊ីនៅក្នុងរយៈពេលពីរខែចុងក្រោយនេះ។ នេះបើយោងតាមទីភ្នាក់ងារព័ត៌មាន Associated Press។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃសុក្រ ទី៦ ខែឧសភា៖

ថ្ងៃព្រហស្បតិ៍ ទី ៥ ខែឧសភា៖

ថ្ងៃពុធ ទី ៤ ខែឧសភា៖

ថ្ងៃអង្គារ ទី ៣ ខែឧសភា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២