២១:១៩ ២.៥.២០២២

ថ្ងៃចន្ទ ទី ២ ខែឧសភា៖

អធិការបតីអាល្លឺម៉ង់លោក Olaf Scholz បានអំពាវនាវឱ្យប្រធានាធិបតីរុស្ស៊ីលោក Vladimir Putin បញ្ចប់ការឈ្លានពានរបស់រុស្ស៊ីលើអ៊ុយក្រែន និងបញ្ចប់ «ការសម្លាប់បែបឆ្កួតលីលា» នៅសមរភូមិ។ នៅក្នុងការថ្លែងក្នុងសន្និសីទកាសែតជាមួយនាយករដ្ឋមន្ត្រីឥណ្ឌាលោក Narendra Modi ក្នុងទីក្រុងប៊ែរឡាំងនៃប្រទេសអាល្លឺម៉ង់នៅថ្ងៃចន្ទនេះ លោក Scholz បាននិយាយថាអ្វី «ដែលសំខាន់គឺការសម្រេចឱ្យបាននូវអនាគតដ៏ប្រសើរមួយទាំងអស់គ្នា មិនមែនតាមរយៈការធ្វើសង្គ្រាមប្រឆាំងគ្នាទៅវិញទៅមកនោះទេ ប៉ុន្តែតាមរយៈការធ្វើឱ្យមានការអភិវឌ្ឍសេដ្ឋកិច្ចនិងការអភិវឌ្ឍរួមគ្នា»។ លោក Scholz ក៏បានអំពាវនាវផងដែរឱ្យលោក Putin «ដកកងទ័ពរបស់ខ្លួនចេញពីប្រទេសអ៊ុយក្រែន» ដោយលោកបានបន្ថែមថា «ព្រំដែនមិនគួរត្រូវបានកែប្រែតាមរយៈការប្រើអំពើហិង្សានោះទេ»។ នេះបើយោងតាមបណ្ដាញព័ត៌មាន CNN។

អធិការបតីអាល្លឺម៉ង់ លោក Olaf Scholz (ស្ដាំ) និងនាយករដ្ឋមន្ត្រីឥណ្ឌា លោក Narendra Modi ចូលរួមក្នុងសន្និសីទសារព័ត៌មានមួយ ក្នុងអំឡុងពេលនៃជំនួបពិភាក្សារវាងអ្នកទាំងពីរនៅទីក្រុងប៊ែរឡាំង ប្រទេសអាល្លឺម៉ង់ ថ្ងៃទី ២ ខែឧសភា ឆ្នាំ២០២២។ (REUTERS)

នៅក្នុងការចាប់ផ្ដើមដំណើរទស្សនកិច្ចរបស់លោកនៅទ្វីបអឺរ៉ុបនៅថ្ងៃចន្ទនេះ នាយករដ្ឋមន្ត្រីឥណ្ឌាលោក Narendra Modi បានអំពាវនាវឱ្យមានការចរចាគ្នាដើម្បីបញ្ចប់សង្គ្រាមនៅក្នុងប្រទេសអ៊ុយក្រែន ប៉ុន្តែមិនបានលើកឡើងអំពីការថ្កោលទោសណាមួយលើការឈ្លានពានរបស់រុស្ស៊ីលើអ៊ុយក្រែននោះទេ។ លោក Modi បានប្រាប់អ្នកសារព័ត៌មាន បន្ទាប់ពីលោកបានជួបពិភាក្សាជាមួយនឹងអធិការបតីអាល្លឺម៉ង់លោក Olaf Scholz នៅក្នុងទីក្រុងប៊ែរឡាំង ប្រទេសអាល្លឺម៉ង់ថា៖ «យើងបានទទូចឱ្យមានកិច្ចឈប់វាយប្រយុទ្ធគ្នានិងបានអំពាវនាវឱ្យមានការចរចាគ្នា ដែលនេះជាមធ្យោបាយតែមួយគត់ដើម្បីដោះស្រាយជម្លោះតាំងពីពេលដែលវិបត្តិអ៊ុយក្រែននេះបានចាប់ផ្ដើមមក»។ លោកបានបន្ថែមថា៖ «យើងជឿថានឹងគ្មានអ្នកឈ្នះនៅក្នុងសង្គ្រាមនេះទេ ហើយភាគីទាំងអស់នឹងចាញ់។ ហេតុដូច្នេះហើយ យើងគាំទ្រសន្តិភាព»។ នេះបើយោងតាមទីភ្នាក់ងារព័ត៌មាន AFP។
ក្រសួងការបរទេសអ៊ុយក្រែនបានបង្ហាញសាមគ្គីភាពជាមួយនឹងជាតិសាសន៍ជ្វីហ្វទាក់ទិននឹងការលើកឡើងបែបប្រឆាំងនឹងជាតិសាសន៍ជ្វីហ្វរបស់រដ្ឋមន្ត្រីការបរទេសរុស្ស៊ីលោក Sergei Lavrov និងបានអំពាវនាវឱ្យរដ្ឋាភិបាលនៃប្រទេសទាំងអស់ធ្វើយ៉ាងណាឱ្យរុស្ស៊ីកាន់តែឯកោបន្ថែមទៀត។ នៅក្នុងសេចក្ដីថ្លែងការណ៍មួយដែលបានចេញផ្សាយនៅថ្ងៃចន្ទនេះ ក្រសួងការបរទេសអ៊ុយក្រែនបានបញ្ជាក់ថា ការលើកឡើងរបស់លោក Lavrov គឺជាការវាយប្រហារប្រឆាំងនឹងប្រធានាធិបតីអ៊ុយក្រែននិងជាតិសាសន៍ជ្វីហ្វ និងបានហៅការលើកឡើងរបស់លោក Lavrov នេះថា «មិនអាចទទួលយកបានទាំងស្រុង»។ លោក Lavrov បានលើកឡើងកាលពីចុងសប្ដាហ៍កន្លងទៅនេះថា មេដឹកនាំណាហ្ស៊ីអាល្លឺម៉ង់លោក Adolf Hitler មាន «ឈាមជ័រជាជាតិសាសន៍ជ្វីហ្វ»។ នេះបើយោងតាមបណ្ដាញព័ត៌មាន CNN។
ស្ថានទូតសហរដ្ឋអាមេរិកប្រចាំប្រទេសអ៊ុយក្រែនសង្ឃឹមថានឹងអាចវិលត្រឡប់ទៅកាន់រដ្ឋធានីកៀវវិញនៅត្រឹមចុងខែឧសភានេះ ប្រសិនបើលក្ខខណ្ឌអំណោយផល។ នេះបើតាមការបញ្ជាក់របស់ភារធារីស្ថានទូតនៅថ្ងៃចន្ទនេះ។ មន្ត្រីស្ថានទូតអាមេរិកបានចាកចេញពីស្ថានទូតនៅរដ្ឋធានីកៀវក្នុងពេលជិតពីរសប្ដាហ៍មុនពេលរុស្ស៊ីចាប់ផ្ដើមឈ្លានពានអ៊ុយក្រែននៅថ្ងៃទី ២៤ ខែកុម្ភៈ ដោយផ្ទេរមុខងារមួយចំនួនទៅទីក្រុង Lviv នៅភាគខាងលិចប្រទេស មុនពេលប្ដូរទីតាំងស្ថានទូតទៅកាន់ប្រទេសប៉ូឡូញ។ អ្នកស្រីភារធារី Kristina Kvien បាននិយាយនៅក្នុងសន្និសីទសារព័ត៌មានមួយថា៖ «យើងស្ដាប់តាមអ្នកជំនាញផ្នែកសន្តិសុខ ហើយនៅពេលណាដែលពួកគេប្រាប់យើងថាយើងអាចត្រឡប់ទៅវិញ យើងនឹងទៅវិញ»។ នេះបើយោងតាមទីភ្នាក់ងារព័ត៌មាន Reuters។
ប្រទេសស៊ុយអែតនឹងបើកស្ថានទូតរបស់ខ្លួននៅក្នុងរដ្ឋធានីកៀវ ប្រទេសអ៊ុយក្រែនឡើងវិញនៅថ្ងៃពុធខាងមុខ បន្ទាប់ពីបានបិទជាបណ្ដោះអាសន្ននៅក្រោយពេលដែលរុស្ស៊ីបានឈ្លានពានអ៊ុយក្រែន។ នេះបើតាមការបញ្ជាក់របស់រដ្ឋមន្ត្រីការបរទេសស៊ុយអែតអ្នកស្រី Ann Linde នៅលើ Twitter នៅថ្ងៃចន្ទនេះ។ អ្នកស្រីបានសរសេរដូច្នេះថា៖ «ប្រទេសស៊ុយអែតនឹងបន្តឈរជាមួយអ៊ុយក្រែន (#StandWithUkraine) និងមានសេចក្ដីរីករាយដែលវត្តមានការទូតរបស់ស៊ុយអែតនៅក្នុងប្រទេសអ៊ុយក្រែននឹងត្រឡប់ទៅកាន់ទីតាំងដើមរបស់ខ្លួនវិញ»។ នេះបើយោងតាមទីភ្នាក់ងារព័ត៌មាន Reuters។
ប្រទេសហុងគ្រីបានផ្លាស់ទីតាំងស្ថានទូតរបស់ខ្លួននៅក្នុងប្រទេសអ៊ុយក្រែនពីទីក្រុង Lviv ទៅកាន់រដ្ឋធានីកៀវវិញ ដោយសារស្ថានការណ៍សន្តិសុខនៅក្នុងរដ្ឋធានីកៀវកាន់តែមានភាពប្រសើរឡើង។ នេះបើតាមការបញ្ជាក់របស់រដ្ឋមន្ត្រីការបរទេសហុងគ្រីលោក Peter Szijjarto នៅថ្ងៃចន្ទនេះ។ នៅក្នុងវីដេអូមួយតាម Facebook លោក Szijjarto បាននិយាយថា ការប្ដូរទីតាំងស្ថានទូតនេះបានបញ្ចប់រួចរាល់ហើយកាលពីចុងសប្ដាហ៍ ហើយស្ថានទូតហុងគ្រីនៅក្នុងរដ្ឋធានីកៀវបានបើកដំណើរការរួចហើយ។ នេះបើយោងតាមទីភ្នាក់ងារព័ត៌មាន Reuters។
យោធាអ៊ុយក្រែនបានបញ្ជាក់នៅថ្ងៃចន្ទនេះថា កងទ័ពអ៊ុយក្រែនបានដណ្ដើមត្រួតត្រាមកវិញនូវទីតាំងមួយចំនួននៅភាគខាងជើងនិងភាគខាងកើតនៃទីក្រុង Kharkiv។ ករណីនេះអាចនឹងធ្វើឱ្យកងទ័ពរុស្ស៊ីមានការលំបាកនៅក្នុងការវាយប្រហារដោយមីស៊ីលនិងកាំភ្លើងធំលើទីក្រុងនេះ។ យោធាអ៊ុយក្រែនបានលើកឡើងដូច្នេះថា ភូមិ Ruska Lozova នៅភាគខាងជើងទីក្រុង Kharkiv «បានត្រឡប់មកស្ថិតក្រោមការត្រួតត្រារបស់យើងវិញហើយ បើទោះបីជារងការខូចខាតនិងបំផ្លិចបំផ្លាញក៏ដោយ»។ នេះបើយោងតាមបណ្ដាញព័ត៌មាន CNN។
ពលរដ្ឋអាមេរិកាំងភាគច្រើនទាំងអ្នកគាំទ្រគណបក្សប្រជាធិបតេយ្យនិងអ្នកគាំទ្រគណបក្សសាធារណរដ្ឋបាននិយាយថា ពួកគេគាំទ្រការដាក់ទណ្ឌកម្មលើរុស្ស៊ីនិងការផ្ដល់ជំនួយយោធានិងជំនួយមនុស្សធម៌ដល់អ៊ុយក្រែន។ នេះបើយោងតាមការស្ទង់មតិរួមគ្នាមួយរបស់កាសែត The Washington Post និងបណ្ដាញព័ត៌មាន ABC News ដែលបានចេញផ្សាយនៅថ្ងៃចន្ទនេះ។ នៅក្នុងការស្ទង់មតិនោះ ពលរដ្ឋប្រហែល ៧២% បានបញ្ជាក់ថា ពួកគេមិនចង់ឱ្យសហរដ្ឋអាមេរិកចាត់វិធានការបែបយោធាដោយផ្ទាល់ណាមួយលើរុស្ស៊ីទេ។ រីឯពលរដ្ឋប្រហែល ២១% បាននិយាយថា ពួកគេនឹងគាំទ្រចំណាត់ការបែបនេះ។ នេះបើយោងតាមសេចក្ដីរាយការណ៍របស់កាសែត The Washington Post។
ការិយាល័យសិទ្ធិមនុស្សរបស់អង្គការសហប្រជាជាតិ (OHCHR) បានបញ្ជាក់នៅថ្ងៃចន្ទនេះថា ចំនួនជនស៊ីវិលដែលត្រូវបានសម្លាប់នៅក្នុងប្រទេសអ៊ុយក្រែនតាំងពីពេលដែលរុស្ស៊ីបានឈ្លានពានកាលពីថ្ងៃទី ២៤ ខែកុម្ភៈមក បានកើនលើស ៣.០០០ នាក់ហើយ។ ជនស៊ីវិលដែលត្រូវបានសម្លាប់ចំនួន ៣.១៥៣ នាក់ក្នុងពេលកន្លងមកនេះមានការកើនឡើងចំនួន ២៥៤ នាក់តាំងពីថ្ងៃសុក្រសប្ដាហ៍មុនមក។ អង្គការ OHCHR បានបន្ថែមថា តួលេខអ្នកស្លាប់ពិតប្រាកដអាចខ្ពស់ជាងនេះច្រើន ដោយសារតែមានការពិបាកនៅក្នុងការទទួលបានតួលេខអ្នកស្លាប់និងដោយសារតែកិច្ចសហប្រតិបត្តិការនៅកំពុងបន្តធ្វើឡើង។ នេះបើយោងតាមទីភ្នាក់ងារព័ត៌មាន Reuters។
ពលរដ្ឋអ៊ុយក្រែនជាង៥លាន៥សែននាក់ បានភៀសខ្លួនពីប្រទេសតាំងពីសង្គ្រាមបានចាប់ផ្ដើមកាលពីថ្ងៃទី ២៤ ខែកុម្ភៈមក។ នេះបើតាមការបញ្ជាក់របស់ទីភ្នាក់ងារជនភៀសខ្លួនអង្គការសហប្រជាជាតិ (UNHCR) នៅថ្ងៃចន្ទ។ ទីភ្នាក់ងារ UNHCR បានបន្ថែមថា តួលេខនេះប្រមូលបានមកពីប្រភពផ្សេងៗជាច្រើន ដែលភាគច្រើនបានមកពីទិន្នន័យដែលផ្ដល់ឱ្យដោយអាជ្ញាធរប្រចាំការនៅច្រកឆ្លងកាត់ព្រំដែន។ នេះបើយោងតាមទីភ្នាក់ងារព័ត៌មាន Reuters។
រថយន្តក្រុងដឹកជនស៊ីវិលដែលជម្លៀសចេញពីទីក្រុង Mariupol ប្រទេសអ៊ុយក្រែន បានចាកចេញពីទីក្រុងនេះនៅព្រឹកថ្ងៃចន្ទ។ នេះបើតាមការបញ្ជាក់របស់ទីប្រឹក្សារបស់អភិបាលទីក្រុង Mariupol។ ផ្ទុយពីក្រុមជនស៊ីវិលដែលត្រូវបានជម្លៀសចេញពីទីក្រុង Mariupol កាលពីថ្ងៃអាទិត្យ ជនស៊ីវិលដែលស្ថិតនៅលើរថយន្តក្រុងលើកនេះមិនមែនជម្លៀសចេញពីរោងចក្រដែកថែក Azovstal នោះទេ។ ជនស៊ីវិលនិងអ្នកប្រយុទ្ធក្នុងចំនួនមិនច្បាស់មួយនៅស្ថិតនៅក្នុងរោងចក្រ Azovstal នៅឡើយ។ នេះបើយោងតាមទីភ្នាក់ងារព័ត៌មាន Reuters។

ជនស៊ីវិលអ៊ុយក្រែនដែលត្រូវបានអមដំណើរដោយបុគ្គលិកកាកបាទក្រហមដើរនៅក្នុងតំបន់មួយដែលគ្រប់គ្រងដោយកងកម្លាំងផ្ដាច់ខ្លួនដែលគាំទ្រដោយរុស្ស៊ីនៅក្នុងក្រុង Bezimenne ប៉ែកខាងកើតក្រុង Mariupol ប្រទេសអ៊ុយក្រែន ថ្ងៃទី ៣០ ខែមេសា ឆ្នាំ២០២២។ (AP)

គណៈកម្មការអឺរ៉ុបនៃសហភាពអឺរ៉ុបប្រហែលជាលើកលែងឱ្យប្រទេសហុងគ្រីនិងប្រទេសស្លូវ៉ាគីពីការហាមឃាត់ការទិញប្រេងឥន្ធនៈពីរុស្ស៊ីដោយគិតគូរអំពីកម្រិតនៃការពឹងផ្អែករបស់ប្រទេសទាំងពីរលើប្រេងឆៅរបស់រុស្ស៊ី។ នេះបើតាមការបញ្ជាក់របស់មន្ត្រីសហភាពអឺរុបពីររូបនៅថ្ងៃចន្ទនេះ។ គណៈកម្មការអឺរ៉ុបគ្រោងនឹងបញ្ចប់កិច្ចការរៀបចំទណ្ឌកម្មជុំទី៦របស់សហភាពអឺរ៉ុបប្រឆាំងនឹងរុស្ស៊ីនៅថ្ងៃអង្គារស្អែកដែលនៅក្នុងកញ្ចប់ទណ្ឌកម្មនោះក៏មានការហាមឃាត់លើការទិញប្រេងឥន្ធនៈរបស់រុស្ស៊ីផង ដែរ។ នេះបើយោងតាមទីភ្នាក់ងារព័ត៌មាន Reuters។
ប្រទេសប៉ូឡូញចង់ឱ្យសហភាពអឺរ៉ុបកំណត់កាលបរិច្ឆេទឱ្យបានច្បាស់សម្រាប់ឱ្យបណ្ដាប្រទេសជាសមាជិកឈប់នាំចូលប្រេងឥន្ធនៈពីរុស្ស៊ី។ នេះបើតាមការបញ្ជាក់របស់រដ្ឋមន្ត្រីអាកាសធាតុប៉ូឡូញនៅថ្ងៃចន្ទនេះ ដោយអ្នកស្រីបានបន្ថែមថា អ្នកស្រីសង្ឃឹមថាការហាមឃាត់លើការនាំចូលប្រេងឥន្ធនៈពីរុស្ស៊ីនេះអាចចូលជាធរមាននៅមុនដំណាច់ឆ្នាំនេះ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីថាមពលមកពីបណ្ដាប្រទេសជាសមាជិកសហភាពអឺរ៉ុបបានជួបពិភាក្សាគ្នាបន្ទាន់នៅថ្ងៃចន្ទនេះ ស្របពេលដែលសហភាពអឺរ៉ុបប្រឹងប្រែងដើម្បីឱ្យមានការឆ្លើយ តបរួមគ្នាចំពោះការទាមទាររបស់រដ្ឋាភិបាលរុស្ស៊ីដែលចង់ឱ្យអតិថិជនអឺរ៉ុបបង់ថ្លៃចំណាយលើការទិញឧស្ម័នរបស់រុស្ស៊ីជាប្រាក់រូប បើមិនដូច្នេះទេនឹងប្រឈមនឹងការកាត់ផ្ដាច់ការផ្គត់ផ្គង់។ រុស្ស៊ីបានផ្អាកការផ្គត់ផ្គង់ឧស្ម័នដល់ប្រទេសប៊ុលហ្គារីនិងប្រ ទេសប៉ូឡូញកាលពីសប្ដាហ៍មុន បន្ទាប់ពីប្រទេសទាំងពីរបដិសេធមិនព្រមធ្វើតាមការទាមទាររបស់រុស្ស៊ីនៅក្នុងការបង់ថ្លៃចំណាយជាប្រាប់រូប។ នេះបើយោងតាមទីភ្នាក់ ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃចន្ទនេះថា ប្រទេសអ៊ុយក្រែនអាចបាត់បង់ធញ្ញជាតិរាប់សិបតោនដោយសារតែរុស្ស៊ីបានគ្រប់គ្រងការដឹកជញ្ជូនតាមផ្លូវសមុទ្រនៅសមុទ្រខ្មៅ ដែលករណីនេះអាចបណ្ដាលឱ្យមានវិបត្តិស្បៀងអាហារដែលនឹងប៉ះពាល់ដល់ទ្វីបអឺរ៉ុប អាស៊ី និងអាហ្វ្រិក។ លោក Zelenskyy បានបញ្ជាក់នៅក្នុងកម្មវិធីព័ត៌មាន«60 Minutes»របស់អូស្ត្រាលីថា៖«រុស្ស៊ីមិនអនុញ្ញាតឱ្យនាវានានាចូលឬចេញពីកំពង់ផែ។ រុស្ស៊ីកំពុងត្រួតត្រាការដឹកជញ្ជូនតាមសមុទ្រខ្មៅ»។ លោកបានបន្ថែមថា៖ «រុស្ស៊ីចង់រាំងខ្ទប់សេដ្ឋកិច្ចរបស់អ៊ុយក្រែនទាំងស្រុងតែម្ដង»។ នេះបើយោងតាមទីភ្នាក់ងារព័ត៌មាន Reuters។
ក្រសួងកសិកម្មអ៊ុយក្រែនបានបញ្ជាក់នៅថ្ងៃចន្ទនេះថា អ៊ុយក្រែនបានបិទជាផ្លូវការនូវកំពង់ផែ ៤ របស់ខ្លួននៅសមុទ្រខ្មៅនិងសមុទ្រ Azov ដែលកងទ័ពរុស្ស៊ីបានដណ្ដើមកាន់កាប់។ ក្រសួងនេះបានលើកឡើងនៅក្នុងសេចក្ដីថ្លែងការណ៍មួយថា កំពង់ផែទី ក្រុងMariupol កំពង់ផែទីក្រុង Berdiansk និងកំពង់ផែទីក្រុង Skadovsk នៃសមុទ្រ Azov និងកំពង់ផែទីក្រុង Kherson នៃសមុទ្រខ្មៅត្រូវបានបិទ «រហូតទាល់តែដល់ពេលស្ដារការត្រួតត្រាបានវិញ»។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីឥណ្ឌាលោក Narendra Modi បានធ្វើដំណើរទៅកាន់ទ្វីបអឺរ៉ុបនៅថ្ងៃចន្ទដើម្បីពិភាក្សាជាមួយនឹងមេដឹកនាំនានានៅក្នុងតំបន់។ ចំណុចសំខាន់នៃការពិភាក្សាទាំងនោះអាចនឹងផ្ដោតលើការបដិសេធរបស់ឥណ្ឌានៅក្នុងការថ្កោលទោសការឈ្លានពានរបស់រុស្ស៊ីលើអ៊ុយក្រែន។ លោក Modi បានបញ្ជាក់នៅក្នុងសេចក្ដីថ្លែង ការណ៍មួយដែលចេញផ្សាយមុនពេលលោកធ្វើដំណើរទៅប្រទេសអាល្លឺម៉ង់ដាណឺ ម៉ាក និងបារាំងថា៖ «ដំណើរទស្សនកិច្ចរបស់ខ្ញុំទៅអឺរ៉ុបនេះធ្វើឡើងនៅចំពេលដែលតំបន់អឺរ៉ុបប្រឈមនឹងបញ្ហានិងជម្រើស»។ សេចក្ដីថ្លែងការណ៍នេះបន្ថែមថា លោក Modi មានបំណង «ពង្រឹងស្មារតីនៃកិច្ចសហប្រតិបត្តិការ» ជាមួយបណ្ដាដៃគូនៅទ្វីបអឺរ៉ុប «ដែលជាដៃគូដ៏មានសារៈសំខាន់សម្រាប់ដំណើរស្វែងរកសន្តិភាពនិងវិបុលភាពរបស់ប្រទេសឥណ្ឌា»។ នេះបើយោងតាមទីភ្នាក់ងារព័ត៌មាន AFP។

រូបឯកសារ៖ ប្រធានគណៈកម្មករអឺរ៉ុបអ្នកស្រី Ursula von der Leyen (ឆ្វេង) និងនាយករដ្ឋមន្ត្រីឥណ្ឌា លោក Narendra Modi អង្គុយជជែកពិភាក្សាគ្នាក្នុងជំនួបមួយក្នុងទីក្រុងញូវដែលី ប្រទេសឥណ្ឌា ថ្ងៃទី ២៥ ខែមេសា ឆ្នាំ២០២២។ (Press Information Bureau via AP)

ប្រទេសដាណឺម៉ាកបានបើកស្ថានទូតរបស់ខ្លួនឡើងវិញនៅក្នុងរដ្ឋធានីកៀវ ប្រទេសអ៊ុយក្រែននៅថ្ងៃចន្ទ។ នេះបើតាមការប្រកាសរបស់រដ្ឋមន្ត្រីការបរទេសដាណឺម៉ាកលោកJeppe Kofodនៅក្នុងអំឡុងពេលដំណើរទស្សនកិច្ចដ៏ភ្ញាក់ផ្អើលរបស់លោកទៅកាន់រដ្ឋធានីកៀវ។ លោកបានលើកឡើងនៅក្នុងសេចក្ដីថ្លែងការណ៍មួយដូច្នេះថា៖ «វាគឺជានិមិត្តរូបដ៏ខ្លាំងក្លានៃការគាំទ្ររបស់ដាណឺម៉ាកចំពោះប្រទេសនិងប្រជាពលរដ្ឋអ៊ុយក្រែន ដែលថ្ងៃនេះយើងនឹងបើកទ្វារស្ថានទូតរបស់ដាណឺម៉ាកឡើងវិញ»។ នេះបើយោងតាមទីភ្នាក់ងារព័ត៌មាន AFP។
ប្រទេសអ៊ីស្រាអែលបានថ្កោលទោសការលើកឡើងរបស់រដ្ឋមន្ត្រីការបរទេសរុស្ស៊ីលោក Sergei Lavrov កាលពីថ្ងៃចន្ទដែលថាមេដឹកនាំណាហ្ស៊ីលោក Adolf Hitler មានដើមកំណើតជាជាតិសាសន៍ជ្វីហ្វ។ អ៊ីស្រាអែលថា ការលើកឡើងរបស់លោក Lavrov នេះមានលក្ខណៈប្រឆាំងនឹងជាតិសាសន៍ជ្វីហ្វនិងមានគ្រោះថ្នាក់។ រដ្ឋមន្ត្រីការបរទេសអ៊ីស្រាអែលលោក Yair Lapid បាននិយាយថា ឯកអគ្គរដ្ឋទូតរុស្ស៊ីប្រចាំអ៊ីស្រាអែលនឹងត្រូវកោះហៅសម្រាប់ «ការពិភាក្សាតឹងតែង» ទាក់ទិននឹងការលើក ឡើងរបស់លោក Lavrov ដែលបានធ្វើឡើងកាលពីថ្ងៃអាទិត្យនៅក្នុងកិច្ចសម្ភាសន៍មួយជាមួយនឹងទូរទស្សន៍អ៊ីតាលីនេះ។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយថា រុស្ស៊ីនឹងមិនពិចារណាអំពីការបញ្ចប់សង្គ្រាមនៅអ៊ុយក្រែននៅថ្ងៃទី ៩ ខែឧសភាដែលជាទិវាជ័យជម្នះនោះ ទេ។ ទិវាជ័យជម្នះ ៩ ឧសភានេះគឺជាទិវាដែលប្រារព្ធអំពីព្រឹត្តិការណ៍ដែលពួកណា ហ្ស៊ីអាល្លឺម៉ង់បានចុះចាញ់កងទ័ពសម្ព័ន្ធមិត្ត ដែលក្នុងនោះមានទាំងសហភាពសូវៀតផងដែរ នៅក្នុងឆ្នាំ១៩៤៥។ លោក Lavrov បានថ្លែងប្រាប់ប្រព័ន្ធផ្សព្វផ្សាយ Mediaset របស់អ៊ីតាលីកាលពីថ្ងៃអាទិត្យថា រដ្ឋាភិបាលរុស្ស៊ីនឹងមិនប្រញាប់ប្រញាល់បញ្ចប់ «ប្រ តិបត្តិការយោធាពិសេស» របស់ខ្លួនឱ្យទាន់ទិវាជ័យជម្នះនេះទេ។ នេះបើយោងតាមទីភ្នាក់ងារព័ត៌មាន AFP។
សេតវិមានបានប្រកាសថា អ្នកស្រី Jill Biden ដែលជាភរិយារបស់ប្រធានាធិបតីសហ រដ្ឋអាមេរិកលោក Joe Biden នឹងចាប់ផ្ដើមដំណើរទស្សនកិច្ចនៅថ្ងៃព្រហស្បតិ៍ខាងមុខទៅកាន់ប្រទេសរូម៉ានីនិងប្រទេសស្លូវ៉ាគី ដែលនៅក្នុងដំណើរទស្សនកិច្ចនោះ អ្នក ស្រីនឹងជួបជាមួយនឹងពលរដ្ឋអ៊ុយក្រែនដែលភៀសខ្លួនពីការឈ្លានពានរបស់រុស្ស៊ីផង ដែរ។ អ្នកស្រី Biden ក៏នឹងជួបជាមួយនឹងបុគ្គលិកជំនួយមនុស្សធម៌ ក្រុមគ្រួសារនៅមូលដ្ឋានដែលជួយផ្គត់ផ្គង់ជនភៀសខ្លួនអ៊ុយក្រែន និងអ្នកអប់រំនានាដែលកំពុងជួយផ្ដល់ការអប់រំដល់កុមារអ៊ុយក្រែនផងដែរ។

២១:៤០ ១.៥.២០២២

ថ្ងៃអាទិត្យ ទី ១ ខែឧសភា៖

មេដឹកនាំគណបក្សប្រជាធិបតេយ្យនៃព្រឹទ្ធសភាសហរដ្ឋអាមេរិកលោក Chuck Schumer បាននិយាយនៅថ្ងៃអាទិត្យនេះថា លោកនឹងបន្ថែមខមួយចំនួនទៅក្នុងកញ្ចប់ជំនួយចំនួន ៣៣ ពាន់លានដុល្លារសម្រាប់ប្រទេសអ៊ុយក្រែន។ ខទាំងនោះនឹងអនុញ្ញាតឲ្យសហរដ្ឋអាមេរិករឹបអូសទ្រព្យសម្បត្តិរបស់មហាសេដ្ឋីរុស្ស៊ីនិងបញ្ជូនថវិកាដែលបានមកពីទ្រព្យសម្បត្តិទាំងនោះឲ្យអ៊ុយក្រែន។ លោក Schumer និយាយដូច្នេះថា៖ «ប្រទេសអ៊ុយក្រែនត្រូវការជំនួយទាំងអស់ដែលខ្លួនអាចទទួលបាន ហើយនៅពេលជាមួយគ្នានេះដែរ យើងត្រូវការទ្រព្យសម្បត្តិទាំងអស់ដែលយើងអាចដាក់បញ្ចូលគ្នាដើម្បីប្រគល់ឲ្យអ៊ុយក្រែននូវជំនួយដែលអ៊ុយក្រែនត្រូវការ»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់ថា ក្រុមជនស៊ីវិលអ៊ុយក្រែនដំបូងចំនួន ១០០ នាក់ ដែលត្រូវបានជម្លៀសពីរោងចក្រដែកថែប Azovstal ក្នុងទីក្រុង Mariupol នឹងទៅដល់ទីក្រុង Zaporizhzhia ដែលគ្រប់គ្រងដោយអ៊ុយក្រែននៅថ្ងៃចន្ទស្អែក។ លោក Zelenskyy សរសេរនៅលើ Twitter ដូច្នេះថា៖ «សូមអរគុណដល់ក្រុមរបស់យើង! ឥឡូវនេះពួកគេ រួមជាមួយនឹង (អង្គការសហប្រជាជាតិ) កំពុងធ្វើការជម្លៀសជនស៊ីវិលផ្សេងទៀតចេញពីរោងចក្រនោះ»។ នេះបើយោងតាមទីភ្នាក់ងារព័ត៌មាន Reuters។

រូបឯកសារ៖ មជ្ឈមណ្ឌល Lakhta ដែលជាទីស្នាក់ការក្រុមហ៊ុនប្រេង Gazprom របស់រុស្ស៊ី ក្នុងទីក្រុង St. Petersburg ប្រទេសរុស្ស៊ី ថ្ងៃទី ១៣ ខែមករា ឆ្នាំ២០២២។ (AP Photo/Dmitri Lovetsky)

សហភាពអឺរ៉ុបនឹងស្នើឲ្យមានការហាមឃាត់ជាដំណាក់កាលនូវការនាំចូលប្រេងឥន្ធនៈពីរុស្ស៊ីនៅក្នុងផ្នែកមួយនៃទណ្ឌកម្មជុំថ្មីរបស់ខ្លួនប្រឆាំងនឹងរុស្ស៊ីទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមប្រភពមួយចំនួនដែលបានបញ្ជាក់នៅថ្ងៃអាទិត្យនេះ។ អ្នកការទូតនានាបាននិយាយថា គណៈកម្មការអឺរ៉ុបនៃសហភាពអឺរ៉ុប ដែលជាអ្នកព្រាងសំណើដាក់ទណ្ឌកម្មនេះសម្រាប់ប្រទេសជាសមាជិកសហភាពអឺរ៉ុបទាំង ២៧ នៅពេលបច្ចុប្បន្ននេះ កំពុងតាក់តែងសំណើទណ្ឌកម្មនេះ ដែលអាចនឹងដាក់ជូនប្រទេសជាសមាជិកសហភាពអឺរ៉ុបយ៉ាងលឿនបំផុតនៅថ្ងៃពុធខាងមុខ។ នេះបើយោងតាមទីភ្នាក់ងារព័ត៌មាន AFP។
រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយថា លោកបានប្រាប់មន្ត្រីការទូតកំពូលរបស់សហភាពអឺរ៉ុបលោក Josep Borrell នៅថ្ងៃអាទិត្យនេះថា ទណ្ឌកម្មជុំបន្ទាប់របស់សហភាពអឺរ៉ុបលើប្រទេសរុស្ស៊ីត្រូវតែរួមបញ្ចូលនូវការហាមឃាត់ប្រេងឥន្ធនៈរបស់រុស្ស៊ី។ លោក Kuleba បានសរសេរនៅលើ Twitter បន្ទាប់ពីលោកបានសន្ទនាតាមទូរស័ព្ទជាមួយនឹងលោក Borrell រួចថា៖ «ខ្ញុំក៏បានសង្កត់ធ្ងន់ផងដែរថាគ្មានជម្រើសណាផ្សេងក្រៅពីការផ្ដល់ឋានៈឲ្យប្រទេសអ៊ុយក្រែនជាបេក្ខភាពប្រទេសសម្រាប់សមាជិកភាពរបស់សហភាពអឺរ៉ុបនោះទេ»។ នេះបើយោងតាមទីភ្នាក់ងារព័ត៌មាន Reuters។
ប្រទេសអាល្លឺម៉ង់បានបញ្ជាក់នៅថ្ងៃអាទិត្យនេះថា ខ្លួនមានការវិវឌ្ឍទៅមុខនៅក្នុងការកាត់បន្ថយខ្លាំងក្លានូវការពឹងផ្អែករបស់ខ្លួនលើថាមពលរបស់រុស្ស៊ី ដែលនេះគឺជាការផ្លាស់ប្ដូរបែបយុទ្ធសាស្ត្រដែលប្រទេសមានសេដ្ឋកិច្ចធំជាងគេបំផុតនៅអឺរ៉ុបមួយនេះបានធ្វើតាំងពីពេលដែលរុស្ស៊ីបានឈ្លានពានអ៊ុយក្រែនមក។ ក្រសួងសេដ្ឋកិច្ចអាល្លឺម៉ង់បានបញ្ជាក់នៅក្នុងសេចក្ដីថ្លែងការណ៍មួយថា ការនាំចូលប្រេងឥន្ធនៈរបស់អាល្លឺម៉ង់ពីរុស្ស៊ីនៅពេលឥឡូវនេះមានចំនួន ១២% បើធៀបទៅនឹងតួលេខកាលពីលើកមុនដែលមានចំនួន ៣៥%។ នេះបើយោងតាមទីភ្នាក់ងារព័ត៌មាន AFP។
អ៊ុយក្រែនបានចោទប្រកាន់កងទ័ពរុស្ស៊ីថាបានលួចវត្ថុបុរាណមានតម្លៃពីសារមន្ទីរមួយកន្លែងនៅក្នុងទីក្រុង Melitopol នៅភាគខាងត្បូងប្រទេសអ៊ុយក្រែន ស្របពេលដែលការវាយប្រយុទ្ធគ្នានិងការវាយប្រហារតាមមីស៊ីលបានបន្តនៅភាគខាងត្បូងនិងភាគខាងកើតប្រទេសអ៊ុយក្រែន។
អង្គការសហប្រជាជាតិកំពុងធ្វើ «ប្រតិបត្តិការសម្រាប់ការឆ្លងកាត់ដោយសុវត្ថិភាព» សម្រាប់ជនស៊ីវិលនៅក្នុងការចាកចេញពីរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន។ នេះបើតាមការបញ្ជាក់របស់អ្នកនាំពាក្យការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិលោក Saviano Abreu នៅថ្ងៃអាទិត្យនេះ។ លោក Abreu បាននិយាយថា ប្រតិបត្តិការនេះបានចាប់ផ្ដើមកាលពីថ្ងៃទី ២៩ ខែមេសា និងកំពុងត្រូវបានសម្របសម្រួលជាមួយនឹងគណៈកម្មាធិការអន្តរជាតិកាកបាទក្រហម ប្រទេសរុស្ស៊ី និងប្រទេសអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។

ជនស៊ីវិលដែលបានចាកចេញពីតំបន់ក្បែររោងចក្រផលិតដែកថែប Azovstal ក្នុងទីក្រុង Mariupol ដើរដោយអមដំណើរដោយសមាជិកគណៈកម្មាធិការអន្តរជាតិកាកបាទក្រហមនៅមជ្ឈមណ្ឌលស្នាក់នៅបណ្ដោះអាសន្នមួយ ក្នុងភូមិ Bezimenne តំបន់ Donetsk ប្រទេសអ៊ុយក្រែន ថ្ងៃទី ១ ខែឧសភា ឆ្នាំ២០២២។ (REUTERS)

ឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិកអ្នកស្រី Oksana Markarova បានបញ្ជាក់នៅក្នុងកិច្ចសម្ភាសន៍មួយជាមួយនឹងទូរទស្សន៍ ABC News នៅថ្ងៃអាទិត្យនេះថា អ្នកស្រីស្វាគមន៍ដំណើរទស្សនកិច្ចរបស់គណៈប្រតិភូសភាសហរដ្ឋអាមេរិកដែលដឹកនាំដោយប្រធានសភាអ្នកស្រី Nancy Polosi ទៅកាន់រដ្ឋធានីកៀវ ប្រទេសអ៊ុយក្រែន។
អធិការបតីអាល្លឺម៉ង់លោក Olaf Scholz នៅថ្ងៃអាទិត្យនេះបានច្រានចោលការរិះគន់ដែលថា ប្រទេសអាល្លឺម៉ង់មិនបានបង្ហាញភាពជាអ្នកដឹកនាំនៅក្នុងកិច្ចប្រឹងប្រែងរបស់ក្រុមបស្ចិមប្រទេសដើម្បីផ្គត់ផ្គង់សព្វាវុធធុនធ្ងន់ដល់អ៊ុយក្រែន ដោយលោកបាននិយាយថា លោកស៊ូមានការប្រយ័ត្នប្រយែងជាជាងធ្វើសម្រេចចិត្តដោយប្រញាប់ប្រញាល់។ លោក Scholz កំពុងរងសម្ពាធទាំងក្នុងនិងក្រៅប្រទេសឲ្យផ្គត់ផ្គង់សព្វាវុធធុនធ្ងន់ដូចជារថក្រោះនិងកាំភ្លើងធំធុនធ្ងន់ដល់អ៊ុយក្រែន និងឲ្យគាំទ្រការហាមឃាត់ជាបន្ទាន់របស់សហភាពអឺរ៉ុបលើការនាំចូលប្រេងឥន្ធនៈពីរុស្ស៊ី។ នេះបើយោងតាមទីភ្នាក់ងារព័ត៌មាន Reuters។
សហភាពអឺរ៉ុបមានទំនោរទៅរកការហាមឃាត់ការនាំចូលប្រេងឥន្ធនៈពីរុស្ស៊ីឲ្យបាននៅត្រឹមចុងឆ្នាំនេះ។ នេះបើតាមការបញ្ជាក់របស់អ្នកការទូតសហភាពអឺរ៉ុបពីរនាក់ បន្ទាប់ពីមានការពិភាក្សារវាងគណៈកម្មការអឺរ៉ុបនិងបណ្ដាប្រទេសដែលជាសមាជិកសហភាពអឺរ៉ុបនៅចុងសប្ដាហ៍នេះ។ សហភាពអឺរ៉ុបកំពុងត្រៀមកញ្ចប់ទណ្ឌកម្មទី ៦ របស់ខ្លួនប្រឆាំងនឹងរុស្ស៊ីទាក់ទិននឹងការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារព័ត៌មាន Reuters។
ក្រុមហ៊ុន Gazprom ដែលជាក្រុមហ៊ុនផលិតឧស្ម័នរបស់រុស្ស៊ីបានបញ្ជាក់នៅថ្ងៃអាទិត្យនេះថា ខ្លួននៅបន្តផ្គត់ផ្គង់ឧស្ម័នធម្មជាតិដល់ទ្វីបអឺរ៉ុបតាមរយៈប្រទេសអ៊ុយក្រែន ស្របតាមសំណើរបស់អតិថិជននៅអឺរ៉ុប។ នេះបើយោងតាមទីភ្នាក់ងារព័ត៌មាន Reuters។
រុស្ស៊ីបានស្នើនៅថ្ងៃអាទិត្យនេះថា ខ្លួនអាចរឹបអូសយកទ្រព្យសម្បត្តិនៅក្នុងប្រទេសរុស្ស៊ីរបស់ប្រទេសណាដែលខ្លួនចាត់ទុកថាជាសត្រូវ ដើម្បីជាការសងសឹកនឹងការស្នើឡើងរបស់សហរដ្ឋអាមេរិកនៅក្នុងការលក់ទ្រព្យសម្បត្តិរបស់មហាសេដ្ឋីរុស្ស៊ីដែលបស្ចិមប្រទេសរឹបអូសយកបានក្នុងពេលកន្លងមកដើម្បីបានថវិកាឲ្យអ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
ក្រសួងការពារជាតិរុស្ស៊ីបានបញ្ជាក់នៅថ្ងៃអាទិត្យនេះថា ជនស៊ីវិលជិត ៥០ នាក់ត្រូវបានជម្លៀសចេញពីរោងចក្រដែកថែប Azovstal នៅក្នុងទីក្រុង Mariupol ប្រទេសអ៊ុយក្រែន។ ក្រសួងការពារជាតិរុស្ស៊ីបានលើកឡើងតាម Telegram ដូច្នេះថា៖ «កាលពីថ្ងៃទី ៣០ ខែមេសា បន្ទាប់ពីមានការអនុវត្តកិច្ចឈប់វាយប្រយុទ្ធគ្នានិងការបើកនូវច្រករបៀងមនុស្សធម៌ ជនស៊ីវិលពីរក្រុមបានចាកចេញពីអាគារស្នាក់នៅដែលនៅក្បែរទីតាំងរោងចក្រដែកថែប Azovstal»។ នេះបើយោងតាមទីភ្នាក់ងារព័ត៌មាន AFP។
សម្ដេចប៉ាប Francis នៅថ្ងៃអាទិត្យនេះ បានបញ្ជាក់ថា សង្គ្រាមនៅអ៊ុយក្រែនគឺជា «ដំណើរថយក្រោយគួរឲ្យរន្ធត់នៃមនុស្សធម៌» ដែលធ្វើឲ្យព្រះអង្គ «ឈឺចាប់និងស្រក់ទឹកនេត្រា» ដោយព្រះអង្គបានអំពាវនាវឲ្យមានច្រករបៀងដើម្បីជម្លៀសមនុស្សចេញពីរោងចក្រដែកថែបនៅក្នុងទីក្រុង Mariupol។ នេះបើយោងតាមទីភ្នាក់ងារព័ត៌មាន Reuters។
ក្រសួងការបរទេសចក្រភពអង់គ្លេសបានបញ្ជាក់នៅថ្ងៃអាទិត្យនេះថា រុស្ស៊ីកំពុងប្រើក្រុមអុចអាលតាមអ៊ីនធឺណិតដើម្បីផ្សព្វផ្សាយព័ត៌មានប្រឌិតអំពីសង្គ្រាមនៅអ៊ុយក្រែនលើបណ្ដាញសង្គមអនឡាញ និងដើម្បីវាយប្រហារសំដៅលើអ្នកនយោបាយនៅតាមប្រទេសមួយចំនួនដែលរួមមានទាំងចក្រភពអង់គ្លេសនិងប្រទេសអាហ្វ្រិកខាងត្បូងផងដែរ។ នេះបើយោងតាមទីភ្នាក់ងារព័ត៌មាន Reuters។
ប្រធានរដ្ឋសភាសហរដ្ឋអាមេរិកអ្នកស្រី Nacy Pelosi បានធ្វើទស្សនកិច្ចទៅកាន់រដ្ឋធានីកៀវ ប្រទេសអ៊ុយក្រែននិងបានជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy។ នេះបើយោងតាមទីភ្នាក់ងារព័ត៌មាន Associated Press។ ទីភ្នាក់ងារ Associated Press បានបញ្ជាក់ថា រូបភាពដែលខុទ្ទកាល័យរបស់លោក Zelenskyy បានផ្សព្វផ្សាយនៅថ្ងៃអាទិត្យនេះបានបង្ហាញអំពីអ្នកស្រី Pelosi រួមជាមួយនឹងគណៈប្រតិភូសភាអាមេរិកដែលរួមមានដូចជាលោក Jason Crow លោក Jim McGovern និងលោក Adam Schiff ស្ថិតនៅក្នុងរដ្ឋធានីកៀវ។ អ្នកស្រី Pelosi បានប្រាប់លោក Zelenskyy ថា៖ «យើងជឿថា យើងមកជួបអ្នកដើម្បីថ្លែងអំណរគុណដល់អ្នកសម្រាប់ការប្រយុទ្ធរបស់អ្នកដើម្បីសេរីភាព»។ អ្នកស្រីបានបន្ថែមថា៖ «យើងកំពុងស្ថិតនៅព្រំដែននៃសេរីភាព ហើយការប្រយុទ្ធរបស់អ្នកគឺជាការប្រយុទ្ធសម្រាប់មនុស្សគ្រប់គ្នា។ សហរដ្ឋអាមេរិកនៅតែតាំងចិត្តគាំទ្រអ្នករហូតទាល់តែការប្រយុទ្ធនេះបញ្ចប់រួចរាល់»។

ប្រធានាធិបតីអ៊ុយក្រែន លោក Volodymyr Zelenskyy ផ្ដល់មេដាយ 'Order of Princess Olga' ដល់អ្នកស្រី Nancy Pelosi ប្រធានរដ្ឋសភាសហរដ្ឋអាមេរិក បន្ទាប់ពីជំនួបរបស់ពួកគេ ក្នុងទីក្រុងកៀវ ប្រទេសអ៊ុយក្រែន ថ្ងៃទី ៣០ ខែមេសា ឆ្នាំ២០២២។ (Ukrainian Presidential Press Service/Handout via REUTERS)

ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃអាទិត្យនេះថា រុស្ស៊ីព្យាយាមបង្កើតរដ្ឋបាលដែលមានទំនោររករុស្ស៊ីនៅក្នុងទីក្រុង Kherson ប្រទេសអ៊ុយក្រែន ដែលខ្លួនបានដណ្ដើមកាន់កាប់កាលពីខែមីនា។
រដ្ឋាភិបាលរុស្ស៊ីបានបញ្ជាក់នៅថ្ងៃអាទិត្យនេះថា ការបាញ់ផ្លោងរបស់កងទ័ពអ៊ុយក្រែនលើតំបន់ Kherson ក្នុងប្រទេសអ៊ុយក្រែន បានធ្វើឲ្យជនស៊ីវិលស្លាប់និងរងរបួស។ ក្រសួងការពារជាតិរុស្ស៊ីបានលើកឡើងថា អ៊ុយក្រែនបានបាញ់ផ្លោងលើសាលារៀនមួយកន្លែង សាលាមត្តេយ្យមួយកន្លែង និងទីបញ្ចុះសពមួយកន្លែង។ នេះបើយោងតាមបណ្ដាញព័ត៌មាន Al Jazeera។
មន្ត្រីយោធានិងមន្ត្រីរដ្ឋាភិបាលអ៊ុយក្រែនបានបញ្ជាក់ថា ការវាយប្រហារដោយមីស៊ីលរបស់រុស្ស៊ីកាលពីថ្ងៃសៅរ៍បានបំផ្លាញផ្លូវរត់ដែលទើបសាងសង់ថ្មីរបស់របស់យន្តហោះនៅឯអាកាសយានដ្ឋានចម្បងមួយកន្លែងនៅក្នុងទីក្រុង Odesa នៃប្រទេសអ៊ុយក្រែន ដែលជាទីក្រុងកំពង់ផែយុទ្ធសាស្ត្ររបស់អ៊ុយក្រែននៅសមុទ្រខ្មៅ។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីសហរដ្ឋអាមេរិកលោក Joe Biden បានសរសើរអ្នកសារព័ត៌មានដែលរាយការណ៍អំពីការឈ្លានពានរបស់រុស្ស៊ីលើអ៊ុយក្រែន។ លោកថ្លែងដូច្នេះនៅពេលដែលលោកបានចាប់ផ្ដើមឡើងវិញនូវទំនៀមទម្លាប់របស់រដ្ឋាភិបាលអាមេរិកនៅក្នុងថ្លែងនៅក្នុងពិធីពិសាអាហារពេលល្ងាចរបស់សមាគមអ្នកឆ្លើយឆ្លងព័ត៌មានកាលពីយប់ថ្ងៃសៅរ៍។ នេះបើយោងតាមទីភ្នាក់ងារព័ត៌មាន Reuters។
លោក Ibrahim Kalin ដែលជាអ្នកនាំពាក្យប្រធានាធិបតីតួកគី បានជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy នៅក្នុងរដ្ឋធានីកៀវ ប្រទេសអ៊ុយក្រែនកាលពីថ្ងៃសៅរ៍។ នេះបើតាមការបញ្ជាក់របស់ការិយាល័យរបស់លោក Kalin។ គេមិនទាន់ដឹងអំពីសេចក្ដីលម្អិតណាមួយនៃជំនួបរវាងលោកទាំងពីរនៅឡើយទេ ប៉ុន្តែកន្លងមក រដ្ឋាភិបាលតួកគីបានព្យាយាមសម្រុះសម្រួលរវាងអ៊ុយក្រែននិងរុស្ស៊ីដើម្បីបញ្ចប់សង្គ្រាម។ នេះបើយោងតាមទីភ្នាក់ងារព័ត៌មាន AFP។
នាយករដ្ឋមន្ត្រីចក្រភពអង់គ្លេសលោក Boris Johnson បានប្រាប់ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសៅរ៍ថា លោកមានការតាំងចិត្តជាងពេលណាៗទាំងអស់ដើម្បីពង្រឹងប្រទេសអ៊ុយក្រែន។ នេះបើយោងតាមការបញ្ជាក់របស់អ្នកនាំពាក្យខុទ្ទកាល័យរបស់លោក Johnson បន្ទាប់ពីលោក Johnson បាននិយាយទូរស័ព្ទជាមួយនឹងលោក Zelenskyy រួចមក។ អ្នកនាំពាក្យរូបនោះបាននិយាយដូច្នេះថា៖ «លោក [Johnson] បានបញ្ជាក់ថា ចក្រភពអង់គ្លេសនឹងបន្តផ្ដល់ជំនួយយោធាបន្ថែមដើម្បីផ្ដល់ឲ្យអ៊ុយក្រែននូវសព្វាវុធដែលខ្លួនត្រូវការដើម្បីការពារខ្លួន»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការបរទេសអ៊ុយក្រែនលោក Dmytro Kuleba បានស្នើប្រទេសចិនឲ្យផ្ដល់ការធានាផ្នែកសន្តិសុខសម្រាប់រដ្ឋាភិបាលអ៊ុយក្រែន។ ការស្នើនេះបានធ្វើឡើងនៅក្នុងកិច្ចសម្ភាសន៍ដ៏វែងមួយដែលប្រព័ន្ធផ្សព្វផ្សាយរបស់ចិនបានផ្សព្វផ្សាយកាលពីថ្ងៃសៅរ៍។ ទីភ្នាក់ងារព័ត៌មាន Xinhua របស់ចិនបានដកស្រង់សម្ដីរបស់លោក Kuleba ដែលថា៖ «នៅពេលបច្ចុប្បន្ននេះ ប្រទេសអ៊ុយក្រែនកំពុងសិក្សាអំពីលទ្ធភាពនៅក្នុងការទទួលបានការធានាផ្នែកសន្តិសុខពីសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ដែលក្នុងនោះរួមមានទាំងប្រទេសចិនផងដែរ និងពីបណ្ដាប្រទេសមហាអំណាចផ្សេងទៀត»។ នេះបើយោងតាមទីភ្នាក់ងារព័ត៌មាន AFP។

១៩:៣០ ៣០.៤.២០២២

ថ្ងៃសៅរ៍ ទី ៣០ ខែមេសា៖

ទាហានរុស្ស៊ីនិងទាហានអ៊ុយក្រែននៅរោងចក្រដែកថែប Azovstal នៃទីក្រុងកំពង់ផែ Mariupol បានឈប់ប្រយុទ្ធគ្នា «តាំងពីព្រឹក [ថ្ងៃសៅរ៍]» ខណៈការចរចាគ្នាកំពុងធ្វើឡើង ដើម្បីបង្កើតផ្លូវរបៀងសុវត្ថិភាពមួយដើម្បីជម្លៀសមនុស្សចេញពីរោងចក្រ។ នេះបើយោងតាមការលើកឡើងរបស់ទាហានអ៊ុយក្រែនម្នាក់ នៅថ្ងៃសៅរ៍នេះ។ ព័ត៌មាននេះមិនត្រូវបានបញ្ជាក់ថាត្រឹមត្រូវនៅឡើយទេ ហើយមន្ត្រីអ៊ុយក្រែនបានបដិសេធមិនធ្វើអត្ថាធិប្បាយ។ នេះបើយោងតាមសេចក្តីរាយការណ៍ព័ត៌មានរបស់កាសែត The Washington Post។
កាសែត The New York Times រាយការណ៍ថា ប្រទេសអ៊ុយក្រែនបានកម្រិតការនាំចេញប្រេងផ្កាឈូករ័ត្ន ស្រូវសាឡី ធញ្ញជាតិ oat និងសត្វគោ ដើម្បីការពារសេដ្ឋកិច្ចរបស់ខ្លួននៅក្នុងអំឡុងពេលមានសង្គ្រាម។ រុស្ស៊ីក៏បានហាមឃាត់មិនឲ្យមានការលក់ជី ស្ករ និងគ្រាប់ធញ្ញជាតិទៅប្រទេសឯទៀតផងដែរ។
ប្រធានាធិបតីអ៊ុយក្រែនលោក Volodymyr Zelenskyy បានថ្លែងថា ឱកាសនៃការបញ្ចប់កិច្ចចរចាដើម្បីសន្តិភាពជាមួយរុស្ស៊ី មាន«ខ្ពស់» ពីព្រោះតែ «អ្វីដែលពួកគេ [រុស្ស៊ី] បានបន្សល់ទុក គឺសកម្មភាពបង្ហាញឲ្យឃើញថា ពួកគេមានយុទ្ធសាស្ត្រមួយស្តីពីការសម្លាប់មនុស្ស»។ នេះបើតាមសេចក្តីរាយការណ៍របស់កាសែត The Wasington Post។ លោក Zelenskyy បានថ្លែងដូច្នេះនៅក្នុងសន្និសីទសារព័ត៌មានតាមប្រព័ន្ធអ៊ីនធឺណែតជាមួយក្រុមអ្នកសារព័ត៌មានប៉ូឡូញកាលពីយប់ថ្ងៃសុក្រ។
បណ្តាញទូរទស្សន៍ CNN បានរាយការណ៍ថា រូបភាពតាមប្រព័ន្ធផ្កាយរណបកាលពីថ្ងៃសុក្រ បង្ហាញថា រាល់សំណង់អគារស្ទើរតែទាំងអស់នៅក្នុងបរិវេណរោងចក្រដែកថែប Azovstal នៃទីក្រុងកំពង់ផែ Mariupol ត្រូវបានបំផ្លាញ។
រុស្សីជឿថា គ្រោះថ្នាក់ដែលកើតចេញពីសង្គ្រាមអាវុធនុយក្លេអ៊ែរ គួររក្សាឱ្យមានទាបបំផុត ហើយថា រាល់ជម្លោះប្រដាប់អាវុធណាមួយរវាងប្រទេសដែលមានអាវុធនុយក្លេអ៊ែរ គួរតែត្រូវបានរារាំង។ នេះបើយោងតាមទីភ្នាក់ងារព័ត៌មាន TASS របស់រុស្ស៊ី ដែលបានដកស្រង់សម្តីរបស់មន្ត្រីប្រចាំក្រសួងការបរទេសរុស្ស៊ី ដែលបានលើកឡើងនៅថ្ងៃសៅរ៍នេះ។ លោក Vladimir Yermakov ប្រធានផ្នែកទប់ស្កាត់ការបង្កើនអាវុធនុយក្លេអ៊ែរប្រចាំក្រសួងការបរទេសរុស្ស៊ី បានថ្លែងថា ប្រទេសដែលមានអាវុធនុយក្លេអ៊ែរទាំងអស់ ត្រូវតែដើរតាមភាពសមហេតុផលដែលមានចែងនៅក្នុងឯកសារផ្លូវការស្តីពីការរារាំងសង្គ្រាមនុយក្លេអ៊ែរ។ លោកបានថ្លែងថា «រុស្ស៊ីគោរពតាមខ្លឹមសារនេះយ៉ាងច្បាស់លាស់»។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន Reuters។

មនុស្សដើរកាត់តំបន់រោងចក្រដែលរងការបំផ្លិចបំផ្លាញដោយសារការបាញ់ផ្តក់របស់ទាហានរុស្ស៊ីនៅទីក្រុង Kharkiv ប្រទេសអ៊ុយក្រែន ថ្ងៃទី ៣០ ខែមេសា ឆ្នាំ ២០២២។

ប្រធានាធិបតីបារាំងលោក Emmanuel Macron បានថ្លែងនៅថ្ងៃសៅរ៍ថា បារាំងនឹង «បង្កើន» ការផ្គត់ផ្គង់ជំនួយយោធានិងមនុស្សធម៌របស់ខ្លួនបន្ថែមទៀត ដល់ប្រទេសអ៊ុយក្រែន ក្រោយពីលោកបានសន្ទនាជាមួយប្រធានាធិបតីអ៊ុយក្រែនលោក Volodymyr Zelenskyy។ លោក Macron បានថ្លែងថា លោក Zelenskyy បានអរគុណដល់ប្រទេសបារាំងសម្រាប់ «ការដឹកជញ្ជូនសម្ភារៈយោធាទ្រង់ទ្រាយធំ» ដែលជួយដល់ការប្រយុទ្ធរបស់ទាហានអ៊ុយក្រែនប្រឆាំងនឹងទាហានរុស្ស៊ី» ដោយលោកបានបន្ថែមថា «ការគាំទ្រយោធានេះនឹង កើនឡើងតទៅទៀតហើយជំនួយមនុស្សធម៌ដែលបារាំងបានផ្តល់ឲ្យ ក៏នឹងកើនឡើងផងដែរ»។ នេះបើតាមទីភ្នាក់ងារព័ត៌មានបារាំង AFP។
ទីភ្នាក់ងារព័ត៌មាន Reuters រាយការណ៍ថា ការដកទណ្ឌកម្មដែលបានដាក់មកលើរុស្ស៊ី គឺជាផ្នែកមួយនៃការចរចាដើម្បីសន្តិភាពរវាងរដ្ឋាភិបាលរុស្ស៊ីនិងរដ្ឋាភិបាលអ៊ុយក្រែន ដែលកំពុងស្ថិតក្នុងស្ថានភាព «លំបាក» ប៉ុន្តែនៅតែបន្តទៅមុខជារៀងរាល់ថ្ងែ។ រដ្ឋមន្ត្រីការបរទេសរុស្ស៊ី លោក Sergey Lavrov បានថ្លែងដូច្នេះនៅក្នុងសេចក្តីថ្លែងការណ៍ដែលត្រូវបានចេញផ្សាយកាលពីព្រឹកថ្ងៃសៅរ៍។
ប៉ូលិសអ៊ុយក្រែនបានថ្លែងនៅថ្ងៃសៅរ៍ថា សាកសពរបស់បុរសបីនាក់ដែលដៃរបស់ពួកគេត្រូវបានចង និងមានស្នាមរបួស ត្រូវបានរកឃើញនៅក្នុងរណ្តៅមួយក្បែរទីក្រុង Bucha ជាប់ជាយរដ្ឋធានីកៀវ ប្រទេសអ៊ុយក្រែន។ ទីក្រុងនេះត្រូវបានផ្សារភ្ជាប់ទៅនឹងការចោទប្រកាន់ថា ទាហានរុស្ស៊ីបានឧក្រិដ្ឋកម្មសង្គ្រាមនៅទីនោះ។ នេះបើយោងតាមទីភ្នាក់ងារព័ត៌មានបារាំង AFP។
កាសែត The Washington Post រាយការណ៍ថា អង្គការសហប្រជាជាតិបន្តព្យាយាមសម្រួលឲ្យមានការជម្លៀសជនស៊ីវិលចេញពីតំបន់រងការវាយប្រហារបំផ្លិចបំផ្លាញដ៏ធ្ងន់ធ្ងរនៅក្នុងទីក្រុង Mariupol ដែលរុស្ស៊ីបានព្យាយាមក្តោបក្តាប់ ចាប់តាំងពីរុស្ស៊ីបានឈ្លានពានលើអ៊ុយក្រែនក្នុងរយៈពេលជាង ៩ សប្តាហ៍កន្លងមកនេះ។ ក្រុមអ្នកប្រយុទ្ធអ៊ុយក្រែនប្រមាណ ២០០០ នាក់ និងជនស៊ីវិលប្រមាណ ១០០០ នាក់ បន្តជាប់គាំងនៅក្នុងបរិវេណរោងចក្រដែកថែប Azovstal។
ទីភ្នាក់ងារព័ត៌មាន Reuters រាយការណ៍ថា ប្រធានរដ្ឋសភាសហរដ្ឋអាមេរិកលោកស្រី Nancy Pelosi បានថ្លែងកាលពីថ្ងៃសុក្រថា លោកស្រីសង្ឃឹមថា សភានឹងបោះឆ្នោតអនុម័តលើសំណើថវិកាចំនួន ៣៣ ពាន់លានដុល្លាររបស់រដ្ឋបាលលោក Biden «ឲ្យបានឆាប់តាមតែអាចធ្វើបាន»។
ការពិភាក្សាគ្នារវាងរដ្ឋាភិបាលរុស្ស៊ីនិងរដ្ឋាភិបាលអាមេរិកស្តីអំពីស្ថិរភាពយុទ្ធសាស្ត្រ ត្រូវបាន «ជាប់គាំង» ជាផ្លូវការ។ នេះបើតាមទីភ្នាក់ងារព័ត៌មានក្នុងស្រុក TASSS របស់រុស្ស៊ីដែលបានដកស្រង់សម្តីរបស់មន្ត្រីក្រសួងការបរទេសរុស្ស៊ី។ លោក Vladimir Yermakov ប្រធានផ្នែកទប់ស្កាត់ការបង្កើនអាវុធនុយក្លេអ៊ែរប្រចាំក្រសួងការបរទេសរុស្ស៊ី ថ្លែងថា ការទាក់ទងគ្នាអាចនឹងចាប់ផ្តើមឡើងវិញ នៅពេលដែលរុស្ស៊ីបញ្ចប់ «ប្រតិបត្តិការយោធាពិសេស» របស់ខ្លួន។ នេះបើតាមទីភ្នាក់ងារព័ត៌មាន Reuters។

មន្ត្រីយោធាអ៊ុយក្រែនពិនិត្យមើលអគារលំនៅដ្ឋានរបស់ពលរដ្ឋដែលត្រូវបានបំផ្លាញដោយគ្រាប់មីស៊ីលរបស់រុស្ស៊ី នៅក្រុង Dobropillia នៃតំបន់ Donetsk ប្រទេសអ៊ុយក្រែន ថ្ងៃទី ៣០ ខែមេសា ឆ្នាំ ២០២២។

ប្រធានាធិបតីអ៊ុយក្រែនលោក Volodymyr Zelenskyy បានថ្លែងថា ជំរឿនប្រជាជននឹងធ្វើឡើងនៅក្នុងប្រទេសអ៊ុយក្រែន ដើម្បីកំណត់ចំនួនមនុស្សដែលបានស្លាប់ ចាប់តាំងពីការឈ្លានពានរបស់រុស្ស៊ី ហើយដើម្បីជួយដល់កិច្ចប្រឹងប្រែងស្វែងរកមនុស្សដែលបានបាត់ខ្លួន។ នេះបើតាមសេចក្តីរាយការណ៍របស់កាសែត The Washington Post។ លោក Zelenskyy បានថ្លែងថា ទាហានរុស្ស៊ីបាន «លុបបំបាត់ដាន» របស់ខ្លួន។ លោកបានបន្ថែមថា នៅតាមទីក្រុងនានាដូចជាទីក្រុង Mariupol «ការស៊ើបអង្កេតអាចនឹងជួបការលំបាក។ តើមនុស្សប៉ុន្មាននាក់ត្រូវបានសម្លាប់នោះ គ្មាននរណាម្នាក់ដឹងឲ្យប្រាកដនោះទេ»។
កាសែត The New York Times រាយការណ៍ថា យោធាអ៊ុយក្រែនបានថ្លែងថា ទាហានដែលជាធម្មតាឈរជើងនៅភាគខាងកើតបំផុតនៃប្រទេសរុស្ស៊ីកំពុងត្រូវផ្លាស់ទីទៅខ្សែប្រយុទ្ធជួរមុខក្នុងសមរភូមិនៅតំបន់ភាគខាងកើតប្រទេសអ៊ុយក្រែន។ រដ្ឋាភិបាលរុស្ស៊ីកំពុងព្យាយាមប្រមូលកម្លាំងវាយប្រហារថែមទៀតរបស់ខ្លួន ដែលក្រសួងការពារជាតិរបស់សហរដ្ឋអាមេរិក បានចាត់ទុកថាជា ការប្រយុទ្ធបែប «មិនរាថយ»។
កាសែត The Washington Post រាយការណ៍ថា មន្ត្រីក្រុងកៀវកាលពីថ្ងៃសុក្របានអំពាវនាវឲ្យពលរដ្ឋរស់នៅក្នុងក្រុង កាត់បន្ថយការជិះយានយន្តផ្ទាល់ខ្លួន ដើម្បីជួយរក្សាទុកឧស្ម័នដែលមានកម្រិតដល់កងទ័ពអ៊ុយក្រែន ដែលកំពុងប្រយុទ្ធតទល់នឹងការឈ្លានពានរបស់រុស្ស៊ី។ នេះគឺជាសេចក្តីប្រកាសមួយដែលបង្ហាញពីភាពមិនប្រាកដប្រជានៃស្ថិរភាពថាមពលនៅក្នុងប្រទេសអ៊ុយក្រែន និងនៅទូទាំងទ្វីបអឺរ៉ុប។ រដ្ឋបាលក្រុងបានលើកទឹកចិត្តឲ្យពលរដ្ឋក្នុងក្រុងប្រើប្រាស់សេវាធ្វើដំណើរសាធារណៈ ដែលកំពុងដំណើរការឡើងវិញជាបណ្តើរ បន្ទាប់ពីទាហានរុស្ស៊ីបានព្យាយាមវាយកាន់កាប់យករដ្ឋធានីកៀវកាលពីមួយខែមុន។ មន្ត្រីយោធាអ៊ុយក្រែនបានថ្លែងតាមរយៈសារដែលចែករំលែកលើប្រព័ន្ធ Telegram ថា «ត្រូវចងចាំពីតម្រូវការរបស់យោធា»។
កាសែត The New York Times រាយការណ៍ថា លោកស្រី Olena Zelenska ភរិយារបស់ប្រធានាធិបតីអ៊ុយក្រែនលោក Volodymyr Zelensky បានប្រាប់កាសែតប៉ូឡូញ Rzeczpospolita ថា សកម្មភាពរបស់រុស្ស៊ីនៅក្នុងប្រទេសអ៊ុយក្រែន គឺបង្ហាញពីគោលបំណងដ៏ច្បាស់លាស់មួយរបស់រុស្ស៊ីនោះគឺ «ដើម្បីបំផ្លាញយើង»។
កាសែត The Washington Post រាយការណ៍ថា ទីក្រុងនានាក្បែរខ្សែប្រយុទ្ធជួរមុខ ដូចជាក្រុង Kramatorsk នៅភាគខាងកើតនៃតំបន់ Donetsk មួយផ្នែកធំត្រូវបានបោះបង់ចោល។ ក្រុមមន្ត្រីនៅក្នុងគ្រុង Kramatorsk បានប្រាប់កាសែត The Washington Post ថា ចំនួនពលរដ្ឋសរុបក្នុងក្រុងបានថយចុះពី ២ សែននាក់ មកត្រឹម ៤ ម៉ឺននាក់ប៉ុណ្ណោះ ហើយពួកគេភាគច្រើននៅបន្តរស់នៅទីនោះជាមនុស្សចាស់។
កាសែត The Washington Post រាយការណ៍ថា សេតវិមានបានថ្លែងថា តាមសារជាសាធារណៈនិងឯកជន សេតវិមានបានជំរុញឥណ្ឌូណេស៊ី មិនឲ្យរុស្ស៊ីចូលរួមក្នុងកិច្ចប្រជុំកំពុងរបស់ក្រុមប្រទេសមានសេដ្ឋកិច្ចធំទូលាយ G-20 ដែលនឹងធ្វើឡើងនៅខែវិច្ឆិកាខាងមុខនេះ។ កាលពីថ្ងៃសុក្រ រដ្ឋាភិបាលរុស្ស៊ីបានទទួលយកការអញ្ជើញរបស់ប្រទេសឥណ្ឌូណេស៊ី ឲ្យរុស្ស៊ីចូលរួមកិច្ចប្រជុំកំពូលនេះ។
បណ្តាញទូរទស្សន៍ CNN រាយការណ៍ថា ប្រទេសប៉ូឡូញបានបញ្ជូនសម្ភារៈយោធាឲ្យប្រទេសអ៊ុយក្រែន ដែលមានតម្លៃជាទឹកប្រាក់ប្រមាណ ១.៦ ពាន់លានដុល្លារ រួមទាំងរថក្រោះប្រភេទT-72 ជាង ២០០ គ្រឿង។
ទូរទស្សន៍ Al Jazeera រាយការណ៍ថា អនុរដ្ឋមន្ត្រីក្រសួងកសិកម្មអ៊ុយក្រែន ឲ្យដឹងថា ទាហានរុស្ស៊ីបានលួចយកគ្រាប់ធុញ្ញជាតិ «រាប់ពាន់» តោន នៅក្នុងប្រទេសអ៊ុយក្រែន។
ទីក្រុង Kharkiv នៃប្រទេសអ៊ុយក្រែន បានរងការបាញ់ផ្តក់ពីកងទ័ពរុស្ស៊ី ដោយបានសម្លាប់មនុស្សម្នាក់ ហើយមនុស្ស ៥ នាក់ទៀត បានរងរបួស។ នេះបើតាមសេចក្តីរាយការណ៍ព័ត៌មានរបស់ទូរទស្សន៍ Al Jazeera។ ទីក្រុងនេះជាទីក្រុងធំទី ២ របស់ប្រទេសអ៊ុយក្រែន។
ទូរទស្សន៍ Al Jazeera រាយការណ៍ថា ក្រោមច្បាប់ថ្មីនានានៅក្នុងប្រទេសអ៊ុយក្រែន ជនណាម្នាក់ដែលសហការ ឬបង្ហាញការគាំទ្រដល់រុស្ស៊ីជាសាធារណៈ មានទោសជាប់ពន្ធនាគារយ៉ាងយូរបំផុត ១៥ ឆ្នាំ។ មន្ត្រីអ៊ុយក្រែនថ្លែងថា ករណីបទឧក្រិដ្ឋជាង ២០០ ពាក់ព័ន្ធនឹងការសហការជាមួយរុស្ស៊ី ត្រូវបានបើកជាសំណុំរឿង។
កាសែត The Washington Post រាយការណ៍ថា មន្ត្រីអ៊ុយក្រែនកំពុងចោទប្រកាន់ទាហានរុស្ស៊ីថាបានលួចវិចិត្ររូបជាង ២០០០ ពីទីក្រុងកំពង់ផែ Mariupol។ ក្រុមប្រឹក្សាក្រុង Mariupol ថ្លែងថា ទាហានរុស្ស៊ីបានលុកលុយសារមន្ទីរសិល្បៈបីកន្លែងនៅក្នុងក្រុង ដោយបានប្រមូលយកវិចិត្ររូបជាង ២០០០ ទៅកាន់តំបន់ Donetsk ដែលរុស្ស៊ីកំពុងគ្រប់គ្រង។

ទាហានរុស្ស៊ីប្រមូលផ្តុំគ្នាត្រួតពិនិត្យតំបន់កំពង់ផែ Mariupol នៃទីក្រុង Mariupol នៅក្នុងតំបន់ដែនដីដែលស្ថិតនៅក្រោមរដ្ឋាភិបាលនៃសាធារណរដ្ឋប្រជាមានិត Donetsk ភាគខាងកើតប្រទេសអ៊ុយក្រែន កាលពីថ្ងៃទី ២៩ ខែមេសា ឆ្នាំ ២០២២។

នៅថ្ងៃសៅរ៍នេះ ទាហានរុស្ស៊ីបានវាយប្រហារលើតំបន់ Donbas នៃភាគខាងកើតប្រទេសអ៊ុយក្រែន ប៉ុន្តែបានបរាជ័យក្នុងការក្តោបក្តាប់តំបន់គោលដៅ ៣ ដែលខ្លួនចង់កាន់កាប់។ នេះបើតាមការអះអាងរបស់មន្ត្រីយោធាអ៊ុយក្រែន។ ជាមួយគ្នានោះ រដ្ឋាភិបាលរុស្ស៊ីបានថ្លែងថា ការដាក់ទណ្ឌកម្មរបស់បណ្តាប្រទេសលោកខាងលិចលើរុស្ស៊ី និងការដឹកជញ្ជូនអាវុធឲ្យអ៊ុយក្រែន កំពុងប៉ះពាល់ដល់ការចរចាសន្តិភាពរវាងរុស្ស៊ីនិងអ៊ុយក្រែន។ នេះបើតាមទីភ្នាក់ងារព័ត៌មាន Reuters។
អង្គការមជ្ឈឹមនៃកងយោធពលអ៊ុយក្រែន បានថ្លែងនៅក្នុងការផ្តល់ព័ត៌មានថ្មីប្រចាំថ្ងៃមួយថា កងទ័ពរុស្ស៊ីបានព្យាយាមវាយយកតំបន់ Lyman នៃតំបន់ Donetsk និងតំបន់ Sievierodonetsk និង Popasna នៃតំបន់ Luhansk។ ពួកគេថា «មិនជោគជ័យទេ [ការវាយយករបស់រុស្ស៊ី] ហើយការប្រយុទ្ធគ្នា នៅតែបន្ត»។
នៅថ្ងៃសៅរ៍នេះ រុស្ស៊ីបានឲ្យដឹងថា កងកាំភ្លើងធំរបស់ខ្លួនបានបាញ់ចំគោលដៅនៅក្នុងប្រទេសអ៊ុយក្រែនចំនួន ៣៨៩ កន្លែង ក្នុងអំឡុងពេលយប់រំលងអធ្រាត្រ រួមទាំងតំបន់កាន់កាប់ដោយទាហានអ៊ុយក្រែនចំនួន ៣៥ កន្លែង ឃ្លាំងស្តុកគ្រឿងផ្ទុះនិងអាវុធចំនួន ១៥ កន្លែង និងទីកន្លែងមួយចំនួនផ្សេងទៀត ដែលជាទីតាំងរបស់ទាហានអ៊ុយក្រែននិងមានសម្ភារៈយោធា។ ក្រសួងការពារជាតិរុស្ស៊ី បានថ្លែងថា មីស៊ីលរបស់ខ្លួនបានបាញ់ចំឃ្លាំងស្តុកគ្រឿងផ្ទុះនិងប្រេងឥន្ធនៈចំនួន ៤ កន្លែង។ ទីភ្នាក់ងារព័ត៌មាន Reuters មិនអាចបញ្ជាក់ពីភាពច្បាស់លាស់នូវសេចក្តីរាយការណ៍នេះបាននៅឡើយទេ។
កងការពារដែនអាកាសរុស្ស៊ីបានរារាំងយន្តហោះចម្បាំងរបស់អ៊ុយក្រែនមួយគ្រឿង មិនឲ្យហោះចូលតំបន់ Bryansk នៅថ្ងៃសៅរ៍នេះ។ នេះបើតាមសេចក្តីរាយការណ៍ព័ត៌មានក្នុងស្រុករបស់រុស្ស៊ី ដែលបានដកស្រង់សម្តីរបស់អភិបាលតំបន់ ដោយបន្ថែមថា ជាលទ្ធផលនៃការរារាំងនេះ តំបន់នៅក្បែរទីតាំងនោះនិងចំណតសម្រាប់ការដឹកប្រេងមួយកន្លែង ត្រូវបានរងការបាញ់ផ្តក់។ សារព័ត៌មាន RIA បានដកស្រង់សម្តីរបស់អភិបាលតំបន់លោក Alexander Bogomaz ថា «មិនមាននរណាម្នាក់រងគ្រោះថ្នាក់នោះទេ»។ អភិបាលតំបន់រូបនេះក៏បានថ្លែងបន្ថែមថា អគារស្តុកសម្ភារៈមួយនៅចំណតដឹកប្រេងមួយ ត្រូវបានរងការខូចខាត។ នេះបើយោងតាមសេចក្តីរាយការណ៍ព័ត៌មានរបស់ទីភ្នាកងារព័ត៌មាន Reuters។

ពលរដ្ឋក្នុងតំបន់ រួមទាំងគ្រូមតេយ្យម្នាក់គឺអ្នកស្រី Natalya Kalugina អាយុ ៦៤ ឆ្នាំ ឈរនិយាយគ្នា នៅក្បែរសំណង់អគារមួយ ដែលត្រូវបានបំផ្លាញនៅក្នុងអំឡុងជម្លោះរវាងរុស្ស៊ីនិងអ៊ុយក្រែន នៅភាគខាងត្បូងនៃទីក្រុង Mariupol ប្រទេសអ៊ុយក្រែន កាលពីថ្ងៃទី ២៩ ខែមេសា ឆ្នាំ ២០២២។

កាសែត The New York Times រាយការណ៍ថា ប៉ូលិសអ៊ុយក្រែនបានទទួលសេចក្តីរាយការណ៍អំពីករណីមនុស្សបាត់ខ្លួនចំនួន ៧០០០ ករណី ចាប់តាំងពីការឈ្លានពានរបស់រុស្ស៊ី។
ទីក្រុង Kharkiv ដែលជាទីក្រុងធំទី ២ របស់ប្រទេសអ៊ុយក្រែន បានរងការបាញ់ផ្តក់ជាច្រើនពីទាហានរុស្ស៊ី បើទោះបីជាប្រធានាធិបតីអ៊ុយក្រែនលោក Volodymyr Zelenskyy ថ្លែងថា ទាហានអ៊ុយក្រែន កំពុងទទួលបាន «ជោគជ័យយុទ្ធសាស្ត្រ» ខ្លះៗនៅក្នុងតំបន់នេះក៏ដោយ។ ទោះបីជាអ៊ុយក្រែនបន្តគ្រប់គ្រងទីក្រុង Kharkiv ទីក្រុងនេះត្រូវបានវាយប្រហារជាបន្តបន្ទាប់ដោយកងទ័ពរុស្ស៊ី ហើយនៅតែប្រឈមនឹងការវាយប្រហារប្រចាំថ្ងៃ។ នេះបើតាមទីភ្នាក់ងារព័ត៌មានបារាំង AFP។
រដ្ឋមន្ត្រីការបរទេសរុស្ស៊ី ថ្លែងថា រដ្ឋាភិបាលរុស្ស៊ីបានជម្លៀសមនុស្សជាង ១ លាននាក់ចេញពីប្រទេសអ៊ុយក្រែន ចាប់តាំងពីសង្គ្រាមបានចាប់ផ្តើម។ លោក Sergey Lavrov បានលើកឡើងបែបនេះនៅក្នុងបទសម្ភាសន៍ជាមួយសារព័ត៌មានរដ្ឋាភិបាលចិន Xinhua ស្របពេលដែលអ៊ុយក្រែនបានចោទប្រកាន់រដ្ឋាភិបាលរុស្ស៊ីថាបានបង្ខំពលរដ្ឋអ៊ុយក្រែនចាកចេញពីប្រទេសខ្លួន។ លោក Lavrov បានថ្លែងថា ចំនួនមនុស្សដែលត្រូវបានជម្លៀសចេញទាំងអស់នេះ រួមមានជនស៊ីវិលចិនចំនួន ៣០០ នាក់ផងដែរ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។
យោធាចក្រភពអង់គ្លេស ជឿថា កងទ័ពរុស្ស៊ីនៅក្នុងប្រទេសអ៊ុយក្រែន ទំនងជារង «កម្លាំងទឹកចិត្តចុះខ្សោយ»។ ក្រសួងការពារជាតិចក្រភពអង់គ្លេសបានធ្វើការសន្និដ្ឋានបែបនេះតាមសារបង្ហោះតាមបណ្តាញ Twitter នៅថ្ងៃសៅរ៍នេះ ដែលជាផ្នែកមួយនៃការធ្វើសេចក្តីរាយការណ៍ព័ត៌មានថ្មីប្រចាំថ្ងៃរបស់រដ្ឋាភិបាលចក្រភពអង់គ្លេស ស្តីអំពីសង្គ្រាមរបស់រុស្ស៊ីនៅក្នុងប្រទេសអ៊ុយក្រែន។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។

២១:២១ ២៩.៤.២០២២

ថ្ងៃសុក្រ ទី ២៩ ខែមេសា៖

អភិបាលក្រុងកំពង់ផែ Mariupol នៃប្រទេសអ៊ុយក្រែន ថ្លែងថា ជនស៊ីវិលដែលកំពុងលាក់ខ្លួននៅក្នុងរោងចក្រផលិតដែកថែបដ៏ធំមួយ កំពុងខ្វះស្បៀងអាហារ ទឹក និងថ្នាំសង្កូវ។ លោក Vadym Boichenko ថា ស្ថានភាពនៅរោងចក្រដែកថែប Avozstal ពិតជាយ៉ាប់យ៉ឺន។ រោងចក្រដែកថែបនេះ ជាទីតាំងចុងក្រោយមួយដែលទាហានអ៊ុយក្រែនកំពុងគ្រប់គ្រង នៅក្នុងទីក្រុង Mariupol ហើយទាហានទាំងនេះកំពុងស្ថិតនៅជាមួយជនស៊ីវិល។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។
ប្រធានធនាគារកណ្តលរបស់រុស្ស៊ី ថ្លែងថា ទស្សនវិស័យនៃសេដ្ឋកិច្ចរបស់រុស្ស៊ី គឺ«មិនប្រាកដប្រជាខ្លាំង» ស្របពេលដែលសេដ្ឋកិច្ចរុស្ស៊ីត្រូវបានសន្និដ្ឋានថានឹងថយចុះដល់ទៅ ១០ ភាគរយ នៅឆ្នាំនេះ។ ទណ្ឌកម្មអន្តរជាតិ និងតម្រូវការអ្នកប្រើប្រាស់ទាប កំពុងប៉ះពាល់ដល់សេដ្ឋកិច្ចរុស្ស៊ី ស្របពេលដែលអតិផរណាកើនឡើង។ នេះបើតាមទីភ្នាក់ងារព័ត៌មាន AP។
ប្រធានាធិបតីឥណ្ឌូណេស៊ីលោក Joko Widodo ថ្លែងថា ទាំងប្រធានាធិបតីអ៊ុយក្រែនលោក Volodymyr Zelenskyy និងប្រធានាធិបតីរុស្ស៊ីលោក Vladimir Putin នឹងចូលរួមកិច្ចប្រជុំកំពូល G-20 ដែលនឹងប្រារព្ធធ្វើឡើងនៅកោះ Bali ប្រទេសឥណ្ឌូណេស៊ី នៅខែវិច្ឆិកាខាងមុខនេះ។ នេះបើតាមទីភ្នាក់ងារព័ត៌មាន AP។
រុស្ស៊ីបានបញ្ជាក់នៅថ្ងៃសុក្រថា ខ្លួនបានវាយប្រហារលើទីក្រុងកៀវតាមអាកាស នៅក្នុងអំឡុងទស្សនកិច្ចរបស់អគ្គលេខាធិការអង្គការសហប្រជាជាតិ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មានបារាំង AFP។ នេះជាករណីវាយប្រហារលើកដំបូងលើរដ្ឋធានីរបស់ប្រទេសអ៊ុយក្រែន បន្ទាប់ពីទាហានរុស្ស៊ីមិនបានធ្វើការវាយប្រហារណាមួយក្នុងរយៈពេលពីរសប្តាហ៍មកហើយលើទីក្រុងនេះ។ ការវាយប្រហារនេះក៏បានសម្លាប់អ្នកសារព័ត៌មានម្នាក់ផងដែរ។

ក្រុមអ្នកពន្លត់អគ្គិភ័យកំពុងប្រតិបត្តិការពន្លត់អគ្គិភ័យមួយ បន្ទាប់ពីមានករណីផ្ទុះនៅទីក្រុងកៀវ កាលពីល្ងាចថ្ងៃព្រហស្បតិ៍ ទី ២៨ ខែមេសា ឆ្នាំ ២០២២។ រុស្ស៊ីបានវាយប្រហារជាបន្តបន្ទាប់នៅតាមតំបន់នានាក្នុងប្រទេសអ៊ុយក្រែន ជាពិសេសរដ្ឋធានីកៀវ ក្នុងអំឡុងដំណើរទស្សនកិច្ចរបស់អគ្គលេខាធិការអង្គការសហប្រជាជាតិ។

វិទ្យុអឺរ៉ុបសេរី/វិទ្យុសេរីភាព បានឲ្យដឹងថា អ្នកស្រី Vera Gyrych ផលិតករប្រចាំវិទ្យុអឺរ៉ុបសេរី/វិទ្យុសេរីភាពដែលទទួលមូលនិធិគាំទ្រដោយរដ្ឋាភិបាលអាមេរិក បានស្លាប់ នៅពេលដែលគ្រាប់មីស៊ីលរបស់រុស្ស៊ីបានបាញ់ចំអគារដែលអ្នកស្រីបានរស់នៅក្នុងទីក្រុងកៀវ។ នេះបើតាមទីភ្នាក់ងារព័ត៌មានបារាំង AFP។
ប្រធានាធិបតីអ៊ុយក្រែនលោក Volodymyr Zelenskyy បានថ្លែងថា ការវាយប្រហាររបស់ទាហានរុស្ស៊ីលើទីក្រុងកៀវ ភ្លាមៗបន្ទាប់ពីលោកបានជួបពិភាក្សាជាមួយអគ្គលេខាធិការអង្គការសហប្រជាជាតិលោក Antonio Guterres ជាគោលបំណងរបស់រុស្ស៊ី «ដើម្បីមាក់ងាយលើអង្គការសហប្រជាជាតិ និងអ្វីៗគ្រប់យ៉ាងដែលអង្គការនេះតំណាងឲ្យ»។ នេះបើតាមទីភ្នាក់ងារព័ត៌មានបារាំង AFP។
ប្រទេសអាល្លឺម៉ង់ បានថ្កោលទោសការវាយប្រហារ «ដ៏អមនុស្សធម៌» ដែលបង្ហាញឲ្យឃើញថា ប្រធានាធិបតីរុស្ស៊ីលោក Vladmir Putin «គ្មានសេចក្តីគោរពអ្វីទាល់តែសោះដល់ច្បាប់អន្តរជាតិ»។ នេះបើតាមទីភ្នាក់ងារព័ត៌មានបារាំង AFP។
អតីតទាហានម៉ារីនអាមេរិកម្នាក់ត្រូវបានសម្លាប់ជាមួយកងទ័ពអ៊ុយក្រែនផ្សេងទៀតនៅក្នុងសមរភូមិប្រយុទ្ធជាមួយរុស្ស៊ី។ សាច់ញាតិរបស់ទាហានម្នាក់នេះបានប្រាប់បណ្តាញសារព័ត៌មានអំពីករណីស្លាប់នេះ ដែលជាករណីស្លាប់ដំបូងគេនៃជនជាតិអាមេរិកនៅក្នុងប្រទេសអ៊ុយក្រែន។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។ អ្នកស្រី Rebecca Cabrera បានប្រាប់បណ្តាញទូរទស្សន៍ CNN ថា កូនប្រុសរបស់អ្នកស្រីគឺលោក Willy Joseph Cancel អាយុ ២២ ឆ្នាំ ត្រូវបានសម្លាប់កាលពីថ្ងៃចន្ទ ក្នុងអំឡុងពេលធ្វើការឲ្យក្រុមហ៊ុនយោធាជាប់កុងត្រាមួយដែលបានបញ្ជូនរូបលោកទៅកាន់ប្រទេសអ៊ុយក្រែន។
សហរដ្ឋអាមេរិកមិនជឿថា នឹងមានគ្រោះថ្នាក់ពីប្រទេសរុស្ស៊ីតាមរយៈការប្រើប្រាស់អាវុធនុយក្លេអ៊ែរនោះទេ បើទោះបីជាមានភាពតានតឹងនាពេលថ្មីៗនេះតាមរយៈសេចក្តីថ្លែងការណ៍នានារបស់រដ្ឋាភិបាលរុស្ស៊ីក៏ដោយ។ នេះបើតាមការបញ្ជាក់របស់មន្ត្រីការពារជាតិសហរដ្ឋអាមេរិកម្នាក់ នៅថ្ងែសុក្រនេះ ហើយដែលត្រូវបានរាយការណ៍ដោយទីភ្នាក់ងារព័ត៌មាន Reuters។

ទិដ្ឋភាពទូទៅនៃតំបន់រោងចក្រដែកថែប Azovstal ដែលហ៊ុមព័ទ្ធសំណង់អគារបែកបាក់ដោយសារការវាយប្រហាររបស់ទាហានរុស្ស៊ី នៅទីក្រុងកំពង់ផែ Mariupol ប្រទេសអ៊ុយក្រែន កាលពីថ្ងៃទី ២៨ ខែមេសា ឆ្នាំ ២០២២។

ការិយាល័យប្រធានាធិបតីអ៊ុយក្រែនលោក Volodymyr Zelenskyy បានឲ្យដឹងកាលពីថ្ងៃសុក្រថា អ៊ុយក្រែនបានគ្រោងជម្លៀសជនស៊ីវិលចេញពីរូងក្រោមដីសុវត្ថិភាព នៅបរិវេណរោងចក្រដែកថែប Azovstal នៅទីក្រុងកំពង់ផែ Mariupol បើទោះបីជាមិនទាន់មានព័ត៌មានលម្អិតអំពីគម្រោងនៅឡើយក៏ដោយ។ កងកម្លាំងរុស្ស៊ីកំពុងឡោមព័ទ្ធរោងចក្រនេះ។ មិនទាន់មានការឆ្លើយតបអ្វីពីរុស្ស៊ីពាក់ព័ន្ធនឹងការលើកឡើងរបស់ការិយាល័យប្រធានាធិបតីអ៊ុយក្រែនយ៉ាងដូច្នេះទេ។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន Reuters។
លោកស្រី Olena Zelenska ភរិយារបស់លោកប្រធានាធិបតីអ៊ុយក្រែន Volodymyr Zelenskyy ថ្លែងថា សង្គ្រាមរបស់រុស្ស៊ីនៅក្នុងប្រទេសអ៊ុយក្រែន មិនបានផ្លាស់ប្តូរស្វាមីរបស់លោកស្រីនោះទេ ប៉ុន្តែបានបង្ហាញទៅកាន់ពិភពលោកពីការតាំងចិត្តរបស់លោក ក្នុងការតស៊ូជម្នះ និងការពិតដែលថា លោកជាមនុស្សដែលពលរដ្ឋអាចពឹងពាក់បាន។ នេះបើតាមទីភ្នាក់ងារព័ត៌មាន AP។
រដ្ឋាភិបាលអេស្ប៉ាញបានឲ្យដឹងនៅថ្ងៃសុក្រនេះថា មកទល់ពេលនេះ ការដឹកសម្ភារៈយោធាដ៏ធំបំផុតមួយរបស់ខ្លួនទៅកាន់ប្រទេសអ៊ុយក្រែន គឺដំណើរការទៅមុខដូចការរំពឹងទុក បន្ទាប់ពីកប៉ាល់ដឹកសម្ភារៈដែលមានទម្ងន់ជាង ២០០ តោន បានសំចតនៅកំពង់ផែមួយក្នុងប្រទេសប៉ូឡូញ។ នេះបើតាមទីភ្នាក់ងារព័ត៌មាន AP។
កងទ័ពរាប់ពាន់នាក់របស់អង្គការអូតង់ និងបណ្តាប្រទេសប្រចាំតំបន់អាត្លង់ទិកខាងជើង នឹងចូលរួមធ្វើសមយុទ្ធយោធានានា នៅទូទាំងទ្វីបអឺរ៉ុប នាប៉ុន្មានសប្តាហ៍ខាងមុខនេះ ស្របពេលដែលប្រទេសលោកខាងលិចព្យាយាមបំបាក់សកម្មភាពគឃ្លើនរបស់រុស្ស៊ី។ នេះបើតាមទីភ្នាក់ងារព័ត៌មាន AP។
ប្រទេសអ៊ុយក្រែនបានទទួលស្គាល់នៅថ្ងៃសុក្រនេះថា ប្រទេសមួយនេះបានខាតបង់ធ្ងន់ធ្ងរដោយសារការវាយប្រហាររបស់កងទ័ពរុស្ស៊ីនៅភាគខាងកើតប្រទេស ប៉ុន្តែថា ការខាតបង់របស់រុស្ស៊ីគឺធ្ងន់ធ្ងរជាងអ៊ុយក្រែនទៅទៀត។ ស្របពេលជាមួយគ្នានោះ ប្រធានាធិបតីសហរដ្ឋអាមេរិកលោក Joe Biden បានស្នើសុំសភាពបញ្ជូនទឹកប្រាក់ប្រមាណ ៣៣ ពាន់លានដុល្លារ ដើម្បីជួយដល់អ៊ុយក្រែននៅក្នុងការទប់ទល់ជាមួយនឹងការវាយប្រហាររបស់រុស្ស៊ី។ នេះបើតាមទីភ្នាក់ងារព័ត៌មាន Reuters។
អភិបាលក្រុងលោក Vitali Klitschko បានថ្លែងថា នៅថ្ងៃសុក្រថា ក្រុមអ្នកជួយសង្គ្រោះបន្ទាន់របស់អ៊ុយក្រែនបានរកឃើញសាកសពមួយដែលត្រូវបានកប់នៅក្នុងបំណែកសំណង់អគារមួយខ្នងនៅក្នុងរដ្ឋធានីកៀវ ដែលត្រូវបានបាញ់ដោយមីស៊ីលរបស់រុស្ស៊ី ស្របពេលដែលអគ្គលេខាធិការអង្គការសហប្រជាជាតិលោក Antonio Guterres ធ្វើទស្សនកិច្ចនៅរដ្ឋធានីកៀវ។ នេះបើតាមទីភ្នាក់ងារព័ត៌មាន Reuters។
ការិយាល័យប្រធានាធិបតីអ៊ុយក្រែនលោក Volodymyr Zelenskyy បានឲ្យដឹងថា រុស្ស៊ីបានវាយប្រហារខ្សែប្រយុទ្ធជួរមុខរបស់អ៊ុយក្រែន នៅតំបន់ Donetsk ភាគខាងកើតនៃប្រទេសអ៊ុយក្រែនដោយគ្រាប់រ៉ុក្កែត កាំភ្លើងធំ កាំភ្លើងត្បាល់ និងយន្តហោះចម្បាំងតាមអាកាស។ បុគ្គលិកខុទ្ទកាល័យអ៊ុយក្រែនបានថ្លែងថា រុស្ស៊ីបានវាយប្រហារទីតាំងយោធារបស់អ៊ុយក្រែនតាមបណ្តោយខ្សែរយៈយោធាអ៊ុយក្រែន ដើម្បីរារាំងមិនឲ្យយោធាអ៊ុយក្រែនប្រមូលផ្តុំគ្នាបាន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
រុស្ស៊ីបានឲ្យដឹងនៅថ្ងៃសុក្រថា កងទ័ពរបស់ខ្លួនបានបំផ្លាញអគារនានានៃរោងចក្រផលិតគ្រាប់រ៉ុក្កែតបាញ់សត្រូវតាមអាកាសរបស់អ៊ុយក្រែន ដែលស្ថិតនៅទីក្រុងកៀវ ដោយបានបាញ់គ្រាប់មីស៊ីលចម្ងាយឆ្ងាយ។ នេះបើតាមទីភ្នាក់ងារព័ត៌មាន Reuters។
កាលពីល្ងាចថ្ងៃព្រហស្បតិ៍ ក្រុមមន្ត្រីអ៊ុយក្រែនបានថ្លែងថារុស្ស៊ីបានបាញ់គ្រាប់មីស៊ីលចំនួនពីរទៅលើរដ្ឋធានីកៀវនៃប្រទេសអ៊ុយក្រែន ខណៈអគ្គលេខាធិការអង្គការសហប្រជាជាតិលោក Antonio Guterres ធ្វើទស្សនកិច្ចនៅទីនោះ។ ស្របពេលជាមួយគ្នានោះ ទាហានរុស្ស៊ីក៏បានបន្តការវាយប្រហាររបស់ខ្លួននៅភាគខាងកើតប្រទេសអ៊ុយក្រែន ដែលជំរុញឲ្យសហរដ្ឋអាមេរិកសន្យាផ្តល់ជំនួយផ្នែកយោធា និងផ្នែកមនុស្សធម៌បន្ថែមទៀតដល់អ៊ុយក្រែន។ នេះបើតាមទីភ្នាក់ងារព័ត៌មាន Reuters។

ប្រធានាធិបតីអ៊ុយក្រែនលោក Volodymyr Zelenskyy និងអគ្គលេខាធិការអង្គការសហប្រជាជាតិលោក Antonio Guterres ចូលរួមសន្និសីទសារព័ត៌មានរួមគ្នាមួយ ក្រោយពីបានជួបពិភាក្សាគ្នា នៅរដ្ឋធានីកៀវ ប្រទេសអ៊ុយក្រែន កាលពីថ្ងៃទី ២៨ ខែមេសា ឆ្នាំ ២០២២។

ក្រសួងការពារជាតិចក្រភពអង់គ្លេសថ្លែងថារុស្ស៊ីនៅតែផ្តោតយុទ្ធសាស្ត្រធ្វើសង្គ្រាមរបស់ខ្លួននៅតំបន់ Donbas នៃប្រទេសអ៊ុយក្រែន។ យោធាចក្រភពអង់គ្លេសបានថ្លែងថាការប្រយុទ្ធគ្នាយ៉ាងខ្លាំងក្លាបានកើតមានឡើង នៅជុំវិញតំបន់ Lysychansk និងតំបន់ Severodonetsk ហើយថា រុស្ស៊ីកំពុងព្យាយាមពង្រីកការវាយប្រហាររបស់ខ្លួនទៅភាគខាងត្បូងបន្ថែមទៀត គឺចាប់ពីតំបន់ Izium ឆ្ពោះទៅកាន់តំបន់ Slovyanks។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន AP។
រុស្ស៊ីបានវាយប្រហារនៅតាមទីតាំងជាច្រើននៅក្នុងប្រទេសអ៊ុយក្រែន រួមទាំងទីក្រុងកៀវ ដោយបានបាញ់គ្រាប់បែកលើទីក្រុងនេះ ខណៈពេលដែលអគ្គលេខា ធិការអង្គការសហប្រជាជាតិបានធ្វើទស្សនកិច្ចនៅទីនោះ។ នេះគឺជាសកម្មភាពវាយប្រហារដ៏គឃ្លើនបំផុតមួយរបស់រុស្ស៊ី ចាប់តាំងពីទាហានរុស្ស៊ីបានដកខ្លួនចេញពីទីក្រុងនេះកាលពីប៉ុន្មានសប្តាហ៍មុន។
ក្រុមអ្នកសង្គ្រោះបន្ទាន់បានឲ្យដឹងថា មនុស្សយ៉ាងហោចណាស់ ១០ នាក់ បានរងរបួស នៅពេលគ្រាប់មីស៊ីលរបស់រុស្ស៊ីបានបាញ់ចំអគារលំនៅដ្ឋាន២៥ជាន់មួយខ្នងនៅទីក្រុងកៀវ កាលពីល្ងាចថ្ងៃព្រហស្បតិ៍ ហើយបង្កឲ្យមានអគ្គិភ័យ ដែលបានដុតបំផ្លាញអគារជាន់ទី ១ និងជាន់ទី ២។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AP។
ការវាយប្រហាររបស់ទាហានរុស្ស៊ីនេះបានកើតឡើង ប៉ុន្មានម៉ោងប៉ុណ្ណោះបន្ទាប់ពីប្រធានាធិបតីអ៊ុយក្រែនលោក Volodymyr Zelenskyy និងអគ្គលេខាធិ ការអង្គការសហប្រជាជាតិលោក Antonio Guterres បានធ្វើសន្និសីទសារព័ត៌មានរួមគ្នាមួយ ដែលលោក Guterres បានថ្លែងថា ប្រទេសអ៊ុយក្រែនបានក្លាយជា «ទីកន្លែងមួយដែលពោរពេញដោយភាពឈឺចាប់និងខ្លោចផ្សារឥតឧបមា»។
ទូរទស្សន៍ Al Jazeera រាយការណ៍ថា ជនស៊ីវិលជិត ១.២០០ នាក់ត្រូវបានរកឃើញនៅតំបន់ជុំវិញទីក្រុងកៀវនៃប្រទេសអ៊ុយក្រែន។ ពួកគេភាគច្រើនត្រូវបានរកឃើញនៅស្រុក Bucha ជាប់ជាយក្រុងកៀវ។
ក្រសួងការបរទេសអ៊ុយក្រែន បានសរសេរសារបង្ហោះតាមបណ្តាញ Twitter ថា គ្រាប់បែករបស់ទាហានរុស្ស៊ីបានបាញ់ចំមន្ទីរពេទ្យបណ្តោះអាសន្នមួយនៅទីក្រុង Mariupol។ នេះបើតាមសេចក្តីរាយការណ៍ព័ត៌មានរបស់កាសែត The New York Times។ ក្រសួងមួយនេះក៏បានលើកឡើងថា ការសម្លាប់ឬបង្ករបួសដល់ទាហានអ៊ុយក្រែន រំលោភបំពានអនុសញ្ញារបស់ទីក្រុងហ្សឺណែវ។
ប្រធានាធិបតីអ៊ុយក្រែនលោក Zelenskyy បានថ្លែងថា លោកបាន «ពិភាក្សាគ្នាយ៉ាងកក់ក្តៅនិងយ៉ាងមានប្រយោជន៍» ជាមួយនាយករដ្ឋមន្ត្រីប៊ុលហ្គារីលោក Kiril Petkov ស្តីអំពីកិច្ចសហប្រតិបត្តិការលើវិស័យថាមពលនិងយោធា នៅក្នុងដំណើរទស្សនកិច្ចរបស់លោក Petkov ទៅកាន់ទីក្រុងកៀវ កាលពីថ្ងៃព្រហស្បតិ៍។ នេះបើតាមសេចក្តីរាយការណ៍ព័ត៌មានរបស់ទីភ្នាក់ងារព័ត៌មាន Reuters។ លោក Zelenskyy បានថ្លែងថា លោកនិងលោក Petkov បានព្រមព្រៀងគ្នាថា សម្ភាៈយោធារបស់អ៊ុយក្រែនដែលរងការខូចខាតអាចនឹងត្រូវបានជួសជុលឡើងវិញ នៅរោងចក្រយោធាប៊ុលហ្គារី ហើយបញ្ជូនមកឲ្យអ៊ុយក្រែនវិញ ពេលជួសជុលរួច។
ប្រធានាធិបតីអ៊ុយក្រែនលោក Volodymyr Zelenskyy ត្រូវបានអញ្ជើញឲ្យចូលរួមកិច្ចប្រជុំកំពូល G-20 នៅខែវិច្ឆិកាខាងមុខនេះ ដែលប្រធានាធិបតីរុស្ស៊ីលោក Vladimir Putin នឹងចូលរួមក្នុងកិច្ចប្រជុំនេះផងដែរ។ នេះបើតាមការបញ្ជាក់របស់ប្រទេសឥណ្ឌូណេស៊ីដែលជាប្រធាននៃក្រុមប្រទេសដែលមានសេដ្ឋកិច្ចធំ G-20 ក្នុងអាណត្តិនេះ។ លោក Joko Widodo ប្រធានាធិបតីឥណ្ឌូណេស៊ីបានថ្លែងនៅថ្ងៃសុក្រថា៖ «ខ្ញុំបានអញ្ជើញលោកប្រធានាធិបតី Zelenskyy ឲ្យចូលរួមកិច្ចប្រជុំកំពូល G-20» ដោយអះអាងថា ការសម្រួលមួយត្រូវសម្រេចបាន បន្ទាប់ពីមានសម្ពាធពីបណ្តាប្រទេសលោកខាងលិចជំរុញឲ្យឥណ្ឌូណេស៊ី ហាមឃាត់រុស្ស៊ីមិនឲ្យចូលរួមក្នុងកិច្ចប្រជុំលើកនេះ ដោយសារតែសកម្មភាពឈ្លានពានរបស់រុស្ស៊ីលើប្រទេសអ៊ុយក្រែន។ នេះបើតាមទីភ្នាក់ងារព័ត៌មានបារាំង AFP។

រូបថតដែលចេញផ្សាយដោយការិយាល័យប្រធានាធិបតីឥណ្ឌូណេស៊ី នាថ្ងៃទី ២៩ ខែមេសា ឆ្នាំ ២០២២ បង្ហាញឲ្យឃើញលោក Joko Widodo ប្រធានាធិបតីឥណ្ឌូណេស៊ី ថ្លែងសុន្ទរកថាអំពីស្ថានភាពនយោបាយក្នុងប្រទេស នៅវិមានរដ្ឋាភិបាលក្នុងទីក្រុង Bogor ជាទីដែលលោកបានអញ្ជើញប្រធានាធិបតីអ៊ុយក្រែនលោក Volodymyr Zelenskyy ឲ្យចូលរួមកិច្ចប្រជុំកំពូល G-20 ដែលនឹងធ្វើឡើងនៅទីក្រុង Bali ប្រទេសឥណ្ឌូណេស៊ី នៅខាងវិច្ឆិកាខាងមុខនេះ។ (Photo by Handout / PRESIDENTIAL PALACE / AFP)

រដ្ឋាភិបាលអង់គ្លេសថ្លែងថា ប្រទេសអង់គ្លេសកំពុងបញ្ជូនកម្លាំងទ័ព៨ពាន់នាក់ដើម្បីធ្វើសមយុទ្ធនៅភាគខាងកើតអឺរ៉ុបដើម្បីបង្ហាញភាពខ្លាំងក្លារបស់អឺរ៉ុប បន្ទាប់ពីរុស្ស៊ីបានឈ្លានពានលើអ៊ុយក្រែន។ នេះបើតាមទីភ្នាក់ងារព័ត៌មានបារាំង AFP។
អភិបាលក្រុង Kharkiv បានថ្លែងថា ជនស៊ីវិល ៥ នាក់ ត្រូវបានសម្លាប់កាលពីថ្ងៃព្រហស្បតិ៍នៅក្នុងសកម្មភាពបាញ់គ្រាប់ផ្តក់ឥតឈប់ឈររបស់ទាហានរុស្ស៊ី។ សំណង់អគារជាង ២ ពាន់ខ្នងនៅក្នុងក្រុងនេះ បានរងខូចខាត និងបំផ្លាញដោយសារអគ្គិភ័យចាប់តាំងពីពេលរុស្ស៊ីបានចាប់ផ្តើមឈ្លានពានលើអ៊ុយក្រែន តាំងពីចុងខែកុម្ភៈមក។ នេះបើតាមទីភ្នាក់ងារព័ត៌មានបារាំង AFP។
ក្រុមរដ្ឋអាជ្ញាអ៊ុយក្រែនថ្លែងថា ពួកគេបានកំណត់អត្តសញ្ញាណទាហានរុស្ស៊ីចំនួន ១០ នាក់ ដែលសង្ស័យថាបានប្រព្រឹត្តឧក្រិដ្ឋកម្មសង្គ្រាមនៅស្រុក Buchaជាយរដ្ឋធានីកៀវនៃប្រទេសអ៊ុយក្រែន។ នេះបើតាមទីភ្នាក់ងារព័ត៌មានបារាំង AFP។
ប្រទេសហូឡង់នឹងបើកដំណើរការស្ថានទូតរបស់ខ្លួនឡើងវិញនៅរដ្ឋធានីកៀវនៅថ្ងៃសុក្របន្ទាប់ពីបានបិទក្នុងរយៈពេលជាងពីរខែមកនេះ មុនពេលទាហានរុស្ស៊ីឈ្លានពានលើអ៊ុយក្រែន។ នេះបើតាមទីភ្នាក់ងារព័ត៌មានបារាំង AFP។
រដ្ឋាភិបាលរុស្ស៊ីចាត់ទុកជ័យជម្នះនៅក្នុង «ការប្រយុទ្ធដើម្បីតំបន់ Donbas» ថាសំខាន់ បើសិនជារុស្ស៊ីនឹងសម្រេចគោលដៅនានាដែលរុស្ស៊ីបានអះអាងថាដើម្បីគ្រប់គ្រងតំបន់ Donetsk និងតំបន់ Luhansk នៅភាគខាងកើតប្រទេសអ៊ុយក្រែន។ នេះបើតាមការលើកឡើងរបស់ក្រសួងការពារជាតិនៃចក្រភពអង់គ្លេសដែលត្រូវបានរាយការណ៍ព័ត៌មានដោយទីភ្នាក់ងារព័ត៌មាន Reuters។
ចក្រភពអង់គ្លេសនៅថ្ងៃសុក្រថា ខ្លួនបានបញ្ជូនក្រុមអ្នកជំនាញដើម្បីជួយអ៊ុយក្រែនប្រមូលភស្តុតាំង និងដើម្បីកាត់ទោសឧក្រិដ្ឋកម្មសង្គ្រាម។ ក្រុមអ្នកជំនាញនេះនឹងធ្វើដំណើរទៅដល់ប្រទេសប៉ូឡូញនៅដើមខែឧសភា។ នេះបើតាមទីភ្នាក់ងារព័ត៌មាន Reuters។
រុស្ស៊ីបានអះអាងថា ខ្លួនបានប្រើនាវាមុជទឹកនៅតំបន់សមុទ្រខ្មៅដើម្បីវាយប្រហារលើគោលដៅទាហានអ៊ុយក្រែនដោយប្រើមីស៊ីលបាញ់តាមនាវា Kalibr។ នេះជាលើកដំបូងហើយដែលរដ្ឋាភិបាលរុស្ស៊ីបានប្រកាសថាបានប្រើប្រាស់នាវាចម្បាំងមុជទឹក ដើម្បីវាយប្រហារលើប្រទេសអ៊ុយក្រែន។ នេះបើតាមទីភ្នាក់ងារព័ត៌មាន Reuters។

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃចន្ទ ទី ២ ខែឧសភា៖

ថ្ងៃ​អាទិត្យ ទី ១ ខែឧសភា៖

ថ្ងៃសៅរ៍ ទី ៣០ ខែមេសា៖

ថ្ងៃសុក្រ ទី ២៩ ខែមេសា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២

ថ្ងៃអាទិត្យ ទី ១ ខែឧសភា៖