- ដោយ Reuters
សហរដ្ឋអាមេរិកថា ចិននឹងប្រឈមនឹងផលវិបាកបើហ៊ានជួយរុស្ស៊ីបញ្ចៀសពីទណ្ឌកម្ម
លោក Jake Sullivan ទីប្រឹក្សាសន្ដិសុខជាតិសហរដ្ឋអាមេរិក បានព្រមានដល់រដ្ឋាភិបាលក្រុងប៉េកាំងថា ចិននឹងប្រឈមនឹងផលវិបាក «យ៉ាងពិតប្រាកដ» ប្រសិនបើហ៊ានជួយរដ្ឋាភិបាលក្រុងមូស្គូបញ្ចៀសពីទណ្ឌកម្មទាក់ទិននឹងសង្គ្រាមនៅក្នុងប្រទេសអ៊ុយក្រែន។ នេះបើយោងតាមសេចក្ដី រាយការណ៍របស់ទីភ្នាក់ងារព័ត៌មាន Reuters។
លោក Sullivan គ្រោងនឹងជួបជាមួយនឹងមន្ត្រីការទូតកំពូលរបស់ចិនលោក Yang Jiechi នៅក្នុងទីក្រុងរ៉ូម ប្រទេសអ៊ីតាលី នៅថ្ងៃចន្ទនេះ។
លោក Sullivan បានថ្លែងប្រាប់បណ្ដាញព័ត៌មាន CNN ថា សហរដ្ឋអាមេរិកជឿថា ចិនបានដឹងថារុស្ស៊ីមានគម្រោងធ្វើសកម្មភាពនៅក្នុងប្រទេសអ៊ុយក្រែន នៅមុនការឈ្លានពានរបស់រុស្ស៊ីលើអ៊ុយក្រែនកើតឡើងទៅទៀត បើទោះបីជារដ្ឋាភិបាលក្រុងប៉េកាំងប្រហែលជាមិនបានដឹងលម្អិតអំពីសកម្មភាពដែលគ្រោងនឹងធ្វើនោះក៏ដោយ។
លោក Sullivan បានបញ្ជាក់ថា ឥឡូវនេះ រដ្ឋាភិបាលក្រុងវ៉ាស៊ីនតោនកំពុងតាមដានមើលយ៉ាងយកចិត្តទុកដាក់ថាតើរដ្ឋាភិបាលក្រុងប៉េកាំងនឹងផ្ដល់ការគាំទ្រផ្នែកសេដ្ឋកិច្ចឬផ្នែកយោធាដល់រុស្ស៊ីក្នុងកម្រិតណា ហើយបន្ទាប់មក សហរដ្ឋអាមេរិកនឹងធ្វើឲ្យចិនមានផលវិបាកប្រសិនបើរឿងនេះកើតឡើងមែននោះ៕
- ដោយ Reuters
រុស្ស៊ីថា ទ្រព្យបម្រុងទុករបស់ខ្លួនជិតពាក់កណ្ដាលត្រូវបានបង្កក ហើយខ្លួនត្រូវពឹងលើចិន
រដ្ឋាភិបាលរុស្ស៊ីបានឲ្យដឹងនៅថ្ងៃអាទិត្យនេះថា ខ្លួនកំពុងពឹងផ្អែកលើចិនដើម្បីជួយទប់ទល់នឹងវិបត្តិសេដ្ឋកិច្ចដែលកើតឡើងដោយសារការដាក់ទណ្ឌកម្មរបស់ក្រុមបស្ចិមប្រទេស ដែលបានបង្កកមាស និងរូបិយប័ណ្ណបរទេសបម្រុងទុករបស់ខ្លួនជិតពាក់កណ្ដាល។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
លោក Anton Siluanov រដ្ឋមន្ត្រីហិរញ្ញវត្ថុរុស្ស៊ី បានថ្លែងថា៖ «យើងមានមាសនិងរូបិយប័ណ្ណបរទេសបម្រុងទុកមួយចំនួនជាប្រាក់យ៉ន់របស់ចិន។ យើងឃើញថា បណ្ដាបស្ចិមប្រទេសកំពុងតែដាក់សម្ពាធលើចិនឲ្យរឹតត្បិតពាណិជ្ជកម្មទ្វេភាគី [របស់យើង] ជាមួយនឹងចិន។ ពិតណាស់ ពិតជាមានការដាក់សម្ពាធឲ្យរឹតត្បិតលើការទទួលបានទ្រព្យសម្បត្តិបម្រុងទុកទាំងនោះមែន»។
ការលើកឡើងរបស់លោក Siluanov នៅក្នុងកិច្ចសម្ភាសន៍មួយតាមទូរទស្សន៍នេះ គឺជាការបញ្ជាក់យ៉ាងច្បាស់បំផុតរបស់រដ្ឋាភិបាលរុស្ស៊ីដែលថា ខ្លួននឹងស្វែងរកជំនួយពីចិនដើម្បីទប់ទល់នឹងផលប៉ះពាល់ដែលកើតចេញពីទណ្ឌកម្មរបស់បស្ចិមប្រទេស។
បណ្ដាបស្ចិមប្រទេសបានដាក់ទណ្ឌកម្មមិនធ្លាប់មានពីមុនមកលើសាជីវកម្មនិងប្រព័ន្ធហិរញ្ញវត្ថុរបស់រុស្ស៊ី ចាប់តាំងពីពេលរុស្ស៊ីបានឈ្លានពានអ៊ុយក្រែនកាលពីថ្ងៃទី ២៤ ខែកុម្ភៈមក៕
- ដោយ Reuters
សហរដ្ឋអាមេរិកផ្ដល់ជំនួយសព្វាវុធបន្ថែមចំនួន ២០០ លានដុល្លារដល់អ៊ុយក្រែន
សហរដ្ឋអាមេរិកបានឲ្យដឹងកាលពីថ្ងៃសៅរ៍ថា ខ្លួននឹងផ្ដល់ជំនួយសព្វាវុធបន្ថែមទៀតជាបន្ទាន់ចំនួន ២០០ លានដុល្លារដល់ប្រទេសអ៊ុយក្រែន។ ជំនួយបន្ថែមទាំងនេះមានដូចជា អាវុធធុនស្រាល អាវុធបាញ់រថក្រោះ និងអាវុធបាញ់យន្ដហោះ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ការផ្ដល់ជំនួយនេះគឺជាការឆ្លើយតបទៅនឹងការអំពាវនាវរបស់រដ្ឋាភិបាលអ៊ុយក្រែន ដែលស្នើសុំសព្វាវុធបន្ថែមទៀតដើម្បីការពារប្រទេសទប់ទល់នឹងការបាញ់ផ្លោងខ្លាំងក្លារបស់កងកម្លាំងរុស្ស៊ី។
សេតវិមានបានឲ្យដឹងថា ប្រធានាធិបតីសហរដ្ឋអាមេរិកលោក Joe Biden បានអនុញ្ញាតឲ្យផ្ដល់ជំនួយសន្ដិសុខបន្ថែមនេះកាលពីថ្ងៃសៅរ៍ ដោយបើកផ្លូវឲ្យមានការបញ្ជូនសព្វាវុធយោធាថ្មីៗ «ជាបន្ទាន់» ទៅកាន់ប្រទេសអ៊ុយក្រែន។ នេះបើតាមការបញ្ជាក់របស់មន្ត្រីជាន់ខ្ពស់ម្នាក់នៃរដ្ឋបាលរបស់លោក Biden។
ការសម្រេចរបស់លោក Biden ក្នុងការផ្ដល់ជំនួយយោធាបន្ថែមដល់អ៊ុយក្រែននេះធ្វើឲ្យជំនួយយោធាសរុបរបស់សហរដ្ឋអាមេរិកដែលផ្ដល់ឲ្យអ៊ុយក្រែនកើនដល់ ១.២០០ លានដុល្លារ ចាប់តាំងពីខែមករា ឆ្នាំ ២០២១ មក និងកើនដល់ ៣.២០០ លានដុល្លារចាប់តាំងពីឆ្នាំ ២០១៤ មក ដែលជាពេលដែលរុស្ស៊ីភ្ជាប់យកតំបន់ Crimea របស់អ៊ុយក្រែន។ នេះបើយោងតាមការបញ្ជាក់របស់ក្រុមមន្ត្រីជាន់ខ្ពស់នៃរដ្ឋបាលរបស់លោក Biden៕
រុស្ស៊ីបានបាញ់មីស៊ីលលើមូលដ្ឋានយោធាអ៊ុយក្រែន
ក្រុមមន្ត្រីអ៊ុយក្រែនបាននិយាយថា រុស្ស៊ីបានបាញ់មីស៊ីលកាលពីព្រឹកព្រលឹមថ្ងៃអាទិត្យទៅលើមជ្ឈមណ្ឌលអន្តរជាតិសម្រាប់កិច្ចការរក្សាសន្ដិភាពនិងសន្ដិសុខ (International Center for Peacekeeping and Security) ដែលជាមូលដ្ឋានយោធាមួយនៅប៉ែកខាងលិចប្រទេសអ៊ុយក្រែននៅក្បែរព្រំប្រទល់រវាងអ៊ុយក្រែននិងប៉ូឡូញ។ កងកម្លាំងអង្គការអូតង់ (NATO) នៅក្នុងប្រទេសប៉ូឡូញស្ថិតនៅចម្ងាយត្រឹមតែ ២៥ គីឡូម៉ែត្រពីនេះប៉ុណ្ណោះ។
សារព័ត៌មាន The New York Times បានរាយការណ៍ថា មីស៊ីលមួយចំនួនត្រូវបានគេស្ទាក់បង្អាក់បាន ប៉ុន្តែមីស៊ីលមួយចំនួនទៀតបានបាញ់ចំមូលដ្ឋានយោធានោះ ដែលបានបណ្ដាលឲ្យមានមនុស្សរងគ្រោះ។ មនុស្សចំនួន ៣៥ នាក់បានស្លាប់ ហើយមនុស្សចំនួន ១៣៤ នាក់ទៀតបានរងរបួស។
ទីភ្នាក់ងារព័ត៌មាន Reuters បានរាយការណ៍ថា មូលដ្ឋានយោធានោះគឺជា «មូលដ្ឋានយោធាធំបំផុតមួយរបស់អ៊ុយក្រែន និងជាមូលដ្ឋានយោធាធំបំផុតនៅប៉ែកខាងលិចប្រទេសអ៊ុយក្រែន» ហើយក៏ជាទីតាំងដែល «អ៊ុយក្រែនធ្វើសមយុទ្ធយោធាភាគច្រើនបំផុតជាមួយនឹងបណ្ដាប្រទេសជាសមាជិកអង្គការអូតង់» ផងដែរ។
កាលពីថ្ងៃសៅរ៍ យោធារុស្ស៊ីបានបន្ដវាយប្រហារលើទីក្រុងនានារបស់អ៊ុយក្រែនដោយប្រើកាំភ្លើងធំ និងការវាយប្រហារតាមអាកាស៕
