ប្រទេសអ៊ុយក្រែននឹងទទួលជំនួយយោធាថ្មីចំនួនជាងមួយពាន់លានដុល្លារពីប្រទេសបែលហ្ស៊ិកនៅក្នុងកិច្ចព្រមព្រៀងមួយនៅថ្ងៃអង្គារនេះ ដែលក្នុងនោះរួមមានទាំងយន្តហោះចម្បាំង F-16 ចំនួន ៣០ គ្រឿងផងដែរ។
កិច្ចព្រមព្រៀងនេះបានធ្វើឡើងនៅពេលដែលប្រធានាធិបតីអ៊ុយក្រែនលោក Volodymyr Zelenskyy បានធ្វើដំណើរទៅកាន់ទីក្រុងព្រុចសែលនៃប្រទេសបែលហ្ស៊ិកក្នុងទស្សនកិច្ចដែលរួមមានការធ្វើដំណើរទៅកាន់ប្រទេសអេស្ប៉ាញនិងប្រទេសព័រទុយហ្គាល់ផងដែរ។ ក្នុងដំណើរទស្សនកិច្ចនោះ លោក Zelenskyy មានបំណងស្វែងរកជំនួយថ្មីដើម្បីប្រយុទ្ធតតាំងនឹងការឈ្លានពានរបស់រុស្ស៊ីដែលបានចាប់ផ្ដើមតាំងពីដើមឆ្នាំ ២០២២ មក។
លោក Zelenskyy បានបញ្ជាក់នៅលើបណ្ដាញសង្គមអនឡាញ X ថា៖ «កិច្ចព្រមព្រៀងនេះធានានូវជំនួយសន្តិសុខទាន់ពេលវេលារបស់ប្រទេសបែលហ្ស៊ិក រថពាសដែកទំនើប យុទ្ធោបករណ៍ដែលបំពេញតម្រូវការកងទ័ពជើងអាកាសនិងប្រព័ន្ធការពារដែនអាកាសរបស់អ៊ុយក្រែន សន្តិសុខកងទ័ពជើងទឹក ការដោះមីន ការចូលរួមនៅក្នុងសម្ព័ន្ធភាពគ្រាប់កាំភ្លើងធំ និងការបណ្ដុះបណ្ដាលផ្នែកយោធា»។
លោក Zelenskyy បានបញ្ជាក់ថា កិច្ចព្រមព្រៀងរយៈពេល១០ឆ្នាំនេះក៏រួមមានផងដែរនូវកិច្ចសហប្រតិបត្តិការជាមួយនឹងប្រទេសបែលហ្ស៊ិកលើផ្នែកស៊ើបការណ៍សម្ងាត់ សន្តិសុខអ៊ីនធឺណិត ការប្រយុទ្ធប្រឆាំងនឹងព័ត៌មានប្រឌិត និងឧស្សាហកម្មផ្នែកការពារ។
មួយវិញទៀត ប្រទេសអ៊ុយក្រែននិងប្រទេសអេស្ប៉ាញបានប្រកាសនូវកិច្ចព្រមព្រៀងមួយកាលពីថ្ងៃចន្ទអំពីជំនួយយោធាចំនួន ១,១ ពាន់លានដុល្លារសម្រាប់ឆ្នាំនេះនិងជាង ៥ ពាន់លានដុល្លារនៅត្រឹមឆ្នាំ ២០២៧ ដោយអេស្ប៉ាញនឹងបញ្ជូនរថក្រោះ Leopard និងគ្រាប់កាំភ្លើងធំឱ្យប្រទេសអ៊ុយក្រែន។
នៅក្នុងសន្និសីទកាសែតក្នុងទីក្រុង Madrid នៃប្រទេសអេស្ប៉ាញ លោក Zelenskyy បានជំរុញសម្ព័ន្ធមិត្តបស្ចិមប្រទេសឱ្យអនុញ្ញាតឱ្យអ៊ុយក្រែនប្រើអាវុធរយៈចម្ងាយឆ្ងាយដែលបស្ចិមប្រទេសផ្ដល់ឱ្យដើម្បីវាយប្រហារគោលដៅយោធានៅក្នុងប្រទេសរុស្ស៊ីក្នុងបំណងការពារខ្លួន។
អគ្គលេខាធិការអង្គការអូតង់ (NATO) លោក Jens Stoltenberg បាននិយាយក្នុងអំឡុងទស្សនកិច្ចកាលពីថ្ងៃចន្ទទៅកាន់ប្រទេសប៊ុយហ្គារីថា រដ្ឋាភិបាលនានាគួរតែគិតឡើងវិញអំពីការដាក់កំហិតរបស់ខ្លួនលើអ៊ុយក្រែនទាក់ទិននឹងការប្រើអាវុធដែលផ្ដល់ឱ្យដើម្បីវាយប្រហារនៅក្នុងប្រទេសរុស្ស៊ី។ លោកបានអះអាងថា អ៊ុយក្រែនមានសិទ្ធិការពារខ្លួន ដែលក្នុងនោះរួមមានទាំងការវាយប្រហារលើ «គោលដៅស្របច្បាប់នៅក្រៅប្រទេសអ៊ុយក្រែនផងដែរ»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
វេទិកាបញ្ចេញមតិ