ការបំផ្ទុះគ្រាប់បែកក្នុងប្រទេសតួកគីក្នុងសប្តាហ៍នេះកំពុងបង្កើនជម្លោះរវាងរដ្ឋាភិបាលតួកគី និងពួកទាមទារបំបែករដ្ឋ Kurd។ ការណ៍នេះក៏នាំឱ្យមានសំណួរថ្មីៗថាតើ ស.រ.អា.គាំទ្រនរណានៅក្នុងជម្លោះនៅក្នុងប្រទេសស៊ីរី និងអំពីទំហំនៃគោលដៅរបស់ស.រ.អា.។
ក្រុមអ្នកវិភាគបានព្រមានថា ការវាយប្រហារទាំងនេះក៏អាចនាំឱ្យមានការទាក់ទិនច្រើនជាងមុនរបស់កងកម្លាំងតួកគីនៅក្នុងប្រទេសស៊ីរី ហើយនាំឱ្យទំនាក់ទំនងរវាងស.រ.អា. និងប្រទេសតួកគីមានភាពតានតឹងថែមទៀត។
ការវាយប្រហារធំបំផុតក្នុងបណ្តាការវាយប្រហារទាំងនេះគឺការបំផ្ទុះគ្រាប់បែកអត្តឃាតក្នុងឡានមួយគ្រឿងនៅកណ្តាលរដ្ឋធានីអង់ការ៉ា (Ankara) នៃប្រទេសតួកគី កាលពីថ្ងៃពុធបាននាំឱ្យមានការសន្យាជាបន្ទាន់ប្រកបដោយកំហឹងពីលោកប្រធានាធិបតីតួកគី Recep Tayyip Erdogan ដែលបានបន្ទោសក្រុមទាមទារបំបែករដ្ឋតួកគី និងក្រុមអ្នកគាំទ្រអ្នកទាមទារបំបែករដ្ឋនៅខាងក្រៅប្រទេសតួកគីដែលជាការនិយាយសំដៅដល់ប្រទេសស៊ីរី។
លោក Erdogan បាននិយាយនៅក្នុងសុន្ទរកថាមួយតាមទូរទស្សន៍ថា «ទោះណាជាជនដែលដឹកនាំ PYD និង PKK និយាយថាពួកគេគ្មានការទាក់ទិននឹងការវាយប្រហារទាំងនេះក៏ដោយក៏ផ្អែកលើព័ត៌មានដែលរដ្ឋមន្ត្រីមហាផ្ទៃយើងនិងទីភ្នាក់ងារស៊ើបការណ៍សម្ងាត់របស់យើងបានទទួលបញ្ជាក់ថាពួក PYD និងពួក PKK ជាអ្នកធ្វើការវាយប្រហារទាំងនេះ»។
កងកម្លាំងតួកគីបានធ្វើសង្គ្រាមប្រឆាំងនឹងពួក PKK ឬគណបក្សកម្មករ Kurdistan ច្រើនទសវត្សរ៍មកហើយ។ ចាប់តាំងពីឆ្នាំទៅមក តំបន់អាគ្នេយ៍នៃប្រទេសតួកគីបានក្លាយទៅជាសមរភូមិមួយនៅពេលដែលលោក Erdogan បង្កើនការបង្ក្រាបលើពួកទាមទារបំបែករដ្ឋ Kurd នៅក្រោយការបរាជ័យបទឈប់បាញ់គ្នាដែលមិនមាំទាំមួយ។
លោក Erdogan ក៏បានពង្រីកការប្រយុទ្ធចូលទៅក្នុងប្រទេសស៊ីរីដែរ ដោយកងរថក្រោះតួកគីនៅតាមព្រំដែនបានបាញ់ចូលទៅក្នុងដែនដីស៊ីរីដែលនៅទីនោះកងកម្លាំង Kurd ធ្វើកិច្ចប្រតិបត្តិការ។
ក្រុមអ្នកវិភាគនិយាយថា ការវាយប្រហារបំផ្ទុះគ្រាប់បែកកាលពីពេលថ្មីៗនេះផ្តល់ឱ្យលោក Erdogan នូវហេតុផលមួយសម្រាប់បង្កើនការវាយលុករបស់កងកម្លាំងប្រទេសលោក៕
