មុនជំនួបនៅសប្តាហ៍នេះជាមួយពួកមេដឹកនាំរបស់អង្គការអូតង់ លោកប្រធានាធិបតីសហរដ្ឋអាមេរិក ដូណាល់ ត្រាំបានហៅភេរវកម្មថាជាបញ្ហាទី១ដែលពិភពលោកកំពុងប្រឈមមុខនៅពេលបច្ចុប្បន្ននេះ ហើយបាននិយាយទៀតថា យើងកំពុងធ្វើឲ្យជឿនលឿនយ៉ាងខ្លាំងនៅក្នុងការវាយប្រហារប្រឆាំងភេរវកម្មនេះ។
ក្នុងជំនួបរបស់លោកប្រធានាធិបតីត្រាំកាលពីថ្ងៃពុធជាមួយលោក Charles Michel នាយករដ្ឋមន្រ្តីនៃប្រទេសប៊ែលហ្ស៊ិក លោកត្រាំបាននិយាយថា សហរដ្ឋអាមេរិកនិងអង្គការអូតង់ នឹងធ្វើការលើបញ្ហានានា ក៏ប៉ុន្តែ លោកប្រធានាធិបតីត្រាំ បានចង្អុលបង្ហាញដល់ការបំផ្ទុះគ្រាប់បែកអត្តឃាតកាលពីថ្ងៃចន្ទនៅក្នុងប្រទេសអង់គ្លេសហើយបានកត់សម្គាល់ថា ភេរវកម្មស្ថិតនៅលើគេនៅក្នុងបញ្ជី។
លោកប្រធានាធិបតីត្រាំបានមានប្រសាសន៍ទៀតថា «នៅពេលដែលអស់ លោកអ្នក ឃើញអ្វីដែលបានកើតមានឡើងកាលពី៣ឬ៤ថ្ងៃមុន លោកអ្នកដឹងថា តើមានសារៈសំខាន់យ៉ាងដូចម្តេចដើម្បីឲ្យឈ្នះការប្រយុទ្ធនេះ។ ហើយយើងនឹងឈ្នះនៅក្នុងការប្រយុទ្ធនេះ»។
លោកប្រធានាធិបតីត្រាំ បានអញ្ជើញទៅដល់រដ្ឋធានីប្រ៊ុចសែល កាលពីរសៀលថ្ងៃពុធបន្ទាប់ពីចរចាជាមួយសម្តេចរ៉ូម៉ាំងកាតូលិកប៉ាបនៅឯវិមានវ៉ាទីកង់ក្នុងទីក្រុងរ៉ូម។លោកប្រធានាធិបតីអាមេរិក ដូណាល់ ត្រាំបាននិយាយនៅក្នុងប្រព័ន្ធ Twitter ថា «លោកបានតាំងចិត្តកាន់តែខ្លាំងឡើងដើម្បីស្វែងរកសន្តិភាពនៅក្នុងពិភពលោករបស់យើងនេះ»។
នៅលើយន្តហោះប្រធានាធិបតី Air Force One នៅពេលហោះចេញពីប្រទេសអ៊ីតាលីមកកាន់ប្រទេសប៊ែលហ្ស៊ិក លោករដ្ឋមន្រ្តីការបរទេសសហរដ្ឋអាមេរិកRex Tillerson បាននិយាយថា លោកប្រធានាធិបតីត្រាំនឹងមានការម៉ឺងម៉ាត់ជាមួយសម្ព័ន្ធមិត្តអង្គការអូតង់នៅថ្ងៃព្រហស្បតិ៍នេះហើយប្រាប់ពួកគេថា «ពួកគេចាំបាច់ធ្វើចំណែកខាងសន្តិ សុខរបស់ពួកគេដែរ»៕
