លោកប្រធានាធិបតីសហរដ្ឋអាមេរិក ដូណាល់ ត្រាំ បាននិយាយកាលពីថ្ងៃសៅរ៍ថា នាយកការិយាល័យស៊ើបអង្កេតសហព័ន្ធ FBI អាចត្រូវបានជ្រើសតាំងនៅសប្តាហ៍ក្រោយនេះ។
លោកប្រធានាធិបតី បានប្រាប់ក្រុមអ្នកយកព័ត៌មាននៅលើយន្តហោះប្រធានាធិបតី Air Force One នៅពេលដែលកំពុងហោះទៅកាន់ទីក្រុង Lynchburg រដ្ឋ Virginia ដើម្បីធ្វើសុន្ទរកថានៅឯសាកលវិទ្យាល័យ Liberty University ដោយលោកបាននិយាយថា «យើងអាចធ្វើការសម្រេចចិត្តយ៉ាងឆាប់រហ័ស»។
កំណត់សម្គាល់របស់លោកប្រធានាធិបតីកើតមានឡើង៤ថ្ងៃក្រោយពីការបណ្តេញដ៏ចម្រូងចម្រាស់លោក James Comey នាយកការិយាល័យស៊ើបអង្កេតសហព័ន្ធ FBI ចេញពីតំណែង ដែលជាចំណាត់ការមួយកំពុងល្បីលាន់រំពងនៅឡើយនៅក្នុងរដ្ឋធានីវ៉ាស៊ីនតោន។
នៅពេលដែលក្រុមអ្នកកាសែតសួរថា តើលោកប្រធានាធិបតីអាចប្រកាសអ្នកទទួលបានការតែងតាំងនៅថ្ងៃសុក្រសប្តាហ៍ក្រោយបានឬទេ នៅពេលដែលលោកប្រធានាធិបតីមានគម្រោងចាកចេញទៅបំពេញទស្សនកិច្ចនៅតំបន់មជ្ឈិមបូព៌ា និងអឺរ៉ុបដែលជាដំណើរទស្សនកិច្ចលើកទី១របស់លោកក្នុងឋានៈជាប្រធានាធិបតីនោះ លោកប្រធានាធិបតីត្រាំ បានឆ្លើយតបថា ការណ៍នេះអាចទៅរួច។ មនុស្សជិត១២នាក់ត្រូវបានគេពិចារណា រួមមានមេធាវី មន្រ្តីពង្រឹងច្បាប់និងសមាជិកសភាផងដែរ។
លោកប្រធានាធិបតីត្រាំ បានមានប្រសាសន៍ថា៖ «អ្នកទទួលបានការតែងតាំងទាំងនោះត្រូវបានគេពិនិត្យមើលពីប្រវត្តិរបស់ពួកគេ ក៏ប៉ុន្តែជាមនុស្សល្បីល្បាញមានការគោរពខ្លាំងនិងមានទេពកោសល្យបំផុត»៕
