ទាហានអាមេរិកាំងដែលប្តូរភេទនឹងត្រូវបញ្ឈប់ពីយោធាសហរដ្ឋអាមេរិក លើកលែងតែអ្នកដែលទទួលបានការលើកលែងណាមួយ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើអនុស្សារណៈរបស់ក្រសួងការពារជាតិអាមេរិកដែលដាក់ជូនតុលាការកាលពីថ្ងៃពុធ។ អនុស្សារណៈនោះមានបំណងហាមឃាត់អ្នកដែលប្តូរភេទមិនឲ្យចូលបម្រើកងទ័ព។
ប្រធានាធិបតីអាមេរិកលោក Donald Trump បានចុះហត្ថលេខាលើបទបញ្ជាប្រធានាធិបតីមួយកាលពីខែមុនដែលមានបំណងលក្ខណៈរឿងផ្ទាល់ខ្លួនសំដៅលើទាហានប្តូរភេទ ដោយក្នុងពេលមួយលោកនិយាយថាបុរសដែលកំណត់ខ្លួនឯងថាជាស្ត្រីគឺ «មិនស្របជាមួយនឹងភាពចេះដាក់ខ្លួននិងភាពមិនអត្តនោម័តដែលតម្រូវឲ្យមានសម្រាប់ទាហាននោះទេ»។
នៅក្នុងខែនេះ ក្រសួងការពារជាតិអាមេរិកបានបញ្ជាក់ថា យោធាអាមេរិកនឹងមិនអនុញ្ញាតឲ្យអ្នកដែលប្តូរភេទចូលបម្រើកងទ័ពឡើយ ហើយក្រសួងនឹងបញ្ឈប់នីតិវិធីអនុវត្តឬសម្របសម្រួលដែលពាក់ព័ន្ធនឹងការបញ្ជាក់អំពីភេទដោយបុគ្គលខ្លួនឯងសម្រាប់ទាហាននីមួយៗ។
អនុស្សារណៈរបស់ក្រសួងការពារជាតិអាមេរិកកាលពីថ្ងៃពុធនោះគឺមានលើសពីនេះទៅទៀត។
អនុស្សារណៈនេះបានបញ្ជាក់ថា ក្រសួងការពារជាតិអាមេរិកត្រូវតែបង្កើតនីតិវិធីដើម្បីកំណត់ទាហានណាដែលជាជនប្តូរភេទក្នុងរយៈពេល ៣០ ថ្ងៃ ហើយបន្ទាប់មកក្នុងអំឡុងពេល ៣០ ថ្ងៃ ក្រសួងនេះត្រូវតែបញ្ឈប់អ្នកទាំងនោះពីយោធាសហរដ្ឋអាមេរិក៕
ក្រសួងការពារជាតិអាមេរិកថា ទាហានដែលប្តូរភេទនឹងត្រូវបញ្ឈប់ពីយោធា
- Reuters
វេទិកាបញ្ចេញមតិ