ការបង្ក្រាបកាលពីពេលថ្មីៗនេះលើកិច្ចប្រតិបត្តិការឆបោកតាមអនឡាញដែលបានចាប់ផ្តើមកាលពីដើមឆ្នាំនេះបានបន្សល់ទុកមនុស្សជាង៧ពាន់នាក់មកពីប្រទេសនានាឱ្យជាប់គាំងនៅទីក្រុងមួយជាប់ព្រំដែនប្រទេសមីយ៉ាន់ម៉ាដែលកំពុងរង់ចាំបញ្ជូនត្រឡប់ទៅកាន់ប្រទេសវិញ។
កិច្ចប្រតិបត្តិការមួយដែលត្រូវបានសម្របសម្រួលដោយប្រទេសថៃ មីយ៉ាន់ម៉ានិងចិនបានចាប់ផ្តើមបន្ទាប់ពីដំណើរទស្សនកិច្ចរបស់នាយករដ្ឋមន្ត្រីថៃអ្នកស្រី Paetongtarn Shinawatraទៅកាន់រដ្ឋធានីប៉េកាំងប្រទេសចិនកាលពីខែកុម្ភៈជាទីកន្លែងដែលអ្នកស្រីបានបញ្ជាក់ប្រាប់មេដឹកនាំចិនលោក Xi Jinpingថាប្រទេសថៃ នឹងចាត់វិធានការប្រឆាំងនឹងក្រុមឆបោកតាមអនឡាញនេះ។
ខណៈដែលការដាក់សម្ពាធរបស់ចិនបានបង្កើនល្បឿនការបញ្ជូនពលរដ្ឋចិនត្រឡប់ទៅប្រទេសវិញនោះ ពួកអ្នករិះគន់ជជែកឱ្យហេតុផលថាគោលដៅចម្បងរបស់ខ្លួន នឹងការពារពលរដ្ឋរបស់ខ្លួនជាជាងកម្ចាត់ចោលបណ្តាញឧក្រិដ្ឋកម្មទាំងមូល។
នៅក្នុងកិច្ចសម្ភាសន៍ផ្តាច់មុខមួយជាមួយវីអូអេ សមាជិកសភាលោក Rangsiman Rome ដែលជាប្រធានគណៈកម្មាធិការស្តីពីសន្តិសុខជាតិរបស់រដ្ឋសភាថៃនិងជាអនុប្រធាននៃគណបក្សប្រជាជនដែលជាគណបក្សប្រឆាំងមានការមន្ទិលសង្ស័យពីប្រសិទ្ធិភាពនៃការបង្ក្រាបនេះ ដោយបានហៅវាថាជានិមិត្តរូបច្រើនជាងរចនាសម្ពន្ធ។
លោក Rome បាននិយាយទៀតថាដោយគ្មានកំណែទម្រង់ស៊ីជម្រៅ គ្មានការចែករំលែកការស៊ើបការណ៍សម្ងាត់និងគ្មានកិច្ចសហប្រតិបត្តិការជាសាកល ក្រុមឆបោកទាំងនេះ នឹងបន្តធ្វើការផ្លាស់ប្តូរនិងប្រតិបត្តិការក្នុងទីកន្លែងផ្សេងទៀតដែលកំពុងធ្វើឱ្យកិច្ចប្រឹងប្រែងនៅពេលបច្ចុប្បន្នកែតម្រូវសម្រាប់រយៈពេលខ្លីជាជាងដំណោះស្រាយយូរអង្វែង។
ខណៈដែលមនុស្សរាប់ពាន់នាក់ត្រូវបានជួយសង្គ្រោះក្នុងអំឡុងនៃការបង្ក្រាបកំពុងបន្តធ្វើឡើងនោះ អង្គការសហប្រជាជាតិកាលពីពេលមុនបានប៉ាន់ស្មានថាមនុស្សជាង២សែននាក់បានត្រូវគេបង្ខំឱ្យធ្វើការនៅក្នុងមជ្ឈមណ្ឌលឆបោកនេះ៕
