ក្រុមរុករកនិងជួយសង្គ្រោះឥណ្ឌូនេស៊ីនិយាយថា ពួកគេបានរកឃើញផ្នែកនៃកន្ទុយរបស់យន្តហោះនៃក្រុមហ៊ុនអាកាសចរណ៍ AirAsia ជើងហោះហើរលេខ៨៥០១ ដែលបានធ្លាក់នៅក្នុងសមុទ្រជ្វាកាលពីថ្ងៃទី២៨ ខែធ្នូ ឆ្នាំ២០១៤។
ប្រធានទីភ្នាក់ងាររុករកនិងជួយសង្គ្រោះជាតិរបស់ឥណ្ឌូនេស៊ីបានប្រាប់ក្រុមអ្នកយកព័ត៌មាននៅថ្ងៃពុធនេះថា ផ្នែកកន្ទុយរបស់យន្តហោះត្រូវបានរកឃើញបន្ទាប់ពីក្រុមមន្រ្តីបានប្រកាសពីការពង្រីកតំបន់រុករកកាលពីថ្ងៃអង្គារ។ វាស្ថិតនៅបាតសមុទ្រជម្រៅ៣០ម៉ែត្រ ដែលក្នុងនោះមានប្រអប់ខ្មៅនិងប្រដាប់ថតទិន្នន័យជើងហោះហើរ។
ប្រដាប់ថតសំឡេងនិងទិន្នន័យត្រូវបានគេរំពឹងថានឹងជួយកំណត់ពីមូលហេតុនៃការធ្លាក់នេះ។
យន្តហោះនោះមានមនុស្ស១៦២នាក់ស្ថិតនៅ ពេលដែលវាធ្លាក់នៅផ្ទៃទឹកទល់មុខឆ្នេរសមុទ្រកោះ Borneo។ គ្មានអ្នកនៅរស់រានមានជីវិតត្រូវបានគេរកឃើញនោះទេ ហើយមានសាកសពមនុស្សមិនដល់៤០នាក់ផងត្រូវបានគេរកឃើញ។
យន្តហោះធុន Airbus A320 ម៉ាស៊ីន២ បានបាត់ពីប្រព័ន្ធរ៉ាដាដោយគ្មានការហៅក្នុងគ្រាហ៍អាសន្ននៅពេលដែលហោះបានជិតពាក់កណ្តាលផ្លូវនៅក្នុងការហោះហើរដែលមានរយៈពេល២ម៉ោងពីប្រទេសឥណ្ឌូនេស៊ីទៅកាន់ប្រទេសសឹង្ហបុរី។
ក្រុមអ្នកជំនាញកោសលវិច័យមកពីប្រទេសអូស្រ្តាលីបានធ្វើការជាមួយប្រទេសឥណ្ឌូនេស៊ី ដើម្បីជួយនៅក្នុងការកំណត់អត្តសញ្ញាណសាកសព។
នៅក្នុងរដ្ឋធានីហ្សាការតាកាលពីថ្ងៃច័ន្ទនេះ រដ្ឋាភិបាលឥណ្ឌូនេស៊ីបានបញ្ឈប់មន្រ្តីអាកាសចរណ៍មួយចំនួនពីការងារ បន្ទាប់ពីបានបញ្ចេញព័ត៌មានថា ជើងហោះហើរលេខ៨៥០១របស់ក្រុមហ៊ុនអាកាសចរណ៍ AirAsia មិនមានការអនុញ្ញតិត្រឹមត្រូវ ដើម្បីហោះហើរនៅថ្ងៃដែលយន្តហោះនោះបានធ្លាក់។
ក្រសួងដឹកជញ្ជូនបានប្រាប់ឲ្យដឹងថា យន្តហោះនោះត្រូវបានអនុញ្ញាតិឲ្យហោះហើរនៅលើផ្លូវពីទីក្រុង Surabaya ទៅកាន់ប្រទេសសឹង្ហបុរីនៅថ្ងៃច័ន្ទ អង្គារ ពុធនិងថ្ងៃសៅរ៍ ក៏ប៉ុន្តែយន្តហោះនោះបានហោះនៅថ្ងៃអាទិត្យ។ ក្រសួងបានផ្អាកជើងហោះហើរក្រុមហ៊ុនអាកាសចរណ៍ AirAsia នៅផ្លូវហោះហើរនោះ ហើយនឹងធ្វើការស៊ើបអង្កេតពេញលេញមួយដាច់ដោយឡែកពីការស៊ើបអង្កេតយន្តហោះដែលធ្លាក់។
មុនពេលហោះឡើងនិងក្នុងអំឡុងពេលចុងក្រោយនៃការហោះហើរ អ្នកបើកបរយន្តហោះបានសុំហោះនៅរយៈកម្ពស់ខ្ពស់ជាងពេលកំពុងហោះហើរ ដើម្បីបញ្ចៀសព្យុះ។ សំណើរនោះមិនបានទទួលការយល់ព្រមទេ ពីព្រោះតែមានយន្តហោះស្ថិតនៅក្នុងតំបន់នោះដែរ៕
