កាលពីថ្ងៃអង្គារ លោក Yoon Suk Yeol ប្រធានាធិបតីកូរ៉េខាងត្បូងដែលត្រូវបានដកពីតំណែង បានថ្លែងការពារការសម្រេចប្រើច្បាប់អាជ្ញាសឹករបស់លោកថាជាកិច្ចប្រឹងប្រែងដោយអស់សង្ឃឹមនៅក្នុងជំរុញសាធារណជនកូរ៉េខាងត្បូងឲ្យយល់ពីគ្រោះថ្នាក់នៃការមានរដ្ឋសភាដែលគ្រប់គ្រងដោយគណបក្សប្រឆាំង និងបានប្តេជ្ញាថានឹងជំរុញឲ្យមានកំណែទម្រង់នយោបាយ ប្រសិនបើលោកត្រូវបានផ្តល់តំណែងប្រធានាធិបតីវិញ។ នេះបើយោងតាមទីភ្នាក់ងារសារព័ត៌មាន AP។
លោក Yoon បានថ្លែងជាចុងក្រោយបែបនេះនៅឯតុលាការធម្មនុញ្ញ គ្រាដែលតុលាការនេះបញ្ចប់សវនាការជជែកដេញដោលក្នុងសំណុំរឿងដកលោកពីតំណែង។
ក្នុងសក្ខីកម្មដែលមានរយៈពេលជាងមួយម៉ោងកាលពីថ្ងៃអង្គារ លោក Yoon បានបញ្ជាក់ថា លោកអាចចុះចេញពីតំណែងមុនអាណត្តិរយៈពេល ៥ ឆ្នាំរបស់លោកផុតកំណត់នៅឆ្នាំ ២០២៧ ដើម្បីជំរុញមាគ៌ាលើកកម្ពស់កំណែទម្រង់នយោបាយ។ គេនៅមិនទាន់ច្បាស់ថាតើការថ្លែងរបស់លោក Yoon បែបនេះអាចនឹងជះឥទ្ធិពលបែបណាលើសេចក្តីសម្រេចរបស់តុលាការធម្មនុញ្ញ។
តុលាការនេះគ្រោងនឹងចេញសេចក្តីសម្រេចរបស់ខ្លួននៅពាក់កណ្តាលខែមីនាថាតើនឹងដកលោក Yoon ចេញពីតំណែង ឬសម្រេចឲ្យលោកឡើងកាន់តំណែងជាប្រធានាធិបតីកូរ៉េខាងត្បូងវិញ៕
វេទិកាបញ្ចេញមតិ