អតីតរដ្ឋមន្ត្រីការពារជាតិកូរ៉េខាងត្បូងបានត្រូវចាប់ខ្លួនជាផ្លូវការណ៍នៅថ្ងៃពុធនេះអំពីការចោទប្រកាន់ការគប់គិតរបស់លោកជាមួយលោកប្រធានាធិបតី Yoon Suk Yeol និងមន្ត្រីផ្សេងទៀតនៅក្នុងការដាក់ច្បាប់អាជ្ញាសឹកកាលពីសប្តាហ៍មុន នៅពេលដែលពួកអាជ្ញាធរស៊ើបអង្កេតទៅលើថាតើសកម្មភាពរបស់ពួកគេសន្មត់ថាជាការបះបោរឬទេ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ច្បាប់អាជ្ញាសឹកដែលបានធ្វើឡើងជាលើកដំបូងនៅក្នុងរយៈពេលជាង៤០ឆ្នាំនេះមានរយៈពេលប្រហែល៦ម៉ោង ក៏ប៉ុន្តែបានបណ្តាលឱ្យការខឹងសម្បារក្នុងស្រុកនិងការតវ៉ាប្រឆាំងដ៏នៅតាមផ្លូវ។ លោក Yoon និងសហការីរបស់លោកបានប្រឈមការស៊ើបអង្កេតព្រហ្មទណ្ឌនិងការប៉ុនប៉ងប្តឹងទម្លាក់ចេញពីតំណែង។ ក្រសួងយុត្តិធម៌បានហាមឃាត់លោក Yoon និងមន្ត្រី៨នាក់ផ្សេងទៀតមិនឱ្យចាកចេញពីប្រទេសនៅពេលដែលពួកអាជ្ញាធរមើលឃើញពួកគេថាជាជនសង្ស័យសំខាន់នៅក្នុងរឿងក្តីច្បាប់អាជ្ញាសឹកនេះ។ វាជាលើកទី១ដែលប្រធានាធិបតីកំពុងកាន់តំណែងនៅក្នុងប្រទេសកូរ៉េខាងត្បូងបានទទួលការហាមឃាត់ការធ្វើដំណើរនេះ។
តុលាការស្រុកភាគកណ្តាលក្រុងសេអ៊ូលបាននិយាយថាខ្លួនបានយល់ព្រមឱ្យមានដីការចាប់ខ្លួនលោក Kim Yong Hyun អតីតរដ្ឋមន្ត្រីការពារជាតិលើបទចោទប្រកាន់ពីការបះបោរនិងការរំលោភអំណាច។
លោក Kimបានត្រូវឃុំខ្លួនចាប់តាំងពីថ្ងៃអាទិត្យមក។ រដ្ឋអាជ្ញាមានរយៈពេលរហូតដល់៦០ថ្ងៃដើម្បីសម្រេចថាតើធ្វើការចោទប្រកាន់លោកឬក៏អត់។ ការកាត់ទោសលើការចោទប្រកាន់ពីការបះបោរអាចធ្វើឱ្យមានទោសប្រហារជីវិត។
លោក Kim បានក្លាយជាមនុស្សមុនដំបូងដែលត្រូវបានចាប់ខ្លួនអំពីរឿងក្តីនេះ។ លោកបានត្រូវចោទប្រកាន់ពីការស្នើច្បាប់អាជ្ញាសឹកជូនលោក Yoon ហើយបានបញ្ជូនកងទ័ពទៅកាន់សភាជាតិដើម្បីរារាំងពួកសមាជិករដ្ឋសភាមិនឱ្យបោះឆ្នោតលើច្បាប់អាជ្ញាសឹកនេះ។ នៅទីបញ្ចប់ សមាជិករដ្ឋសភាដែលមានចំនួនល្មមគ្រប់គ្រាន់អាចចូលក្នុងសភាហើយបានច្រានចោលក្រឹត្យច្បាប់របស់លោកប្រធានាធិបតី Yoonដែលបានបង្ខំឱ្យគណរដ្ឋមន្ត្រីលប់ចោលក្រិត្យច្បាប់នោះមុនពេលឈប់សម្រាកនៅថ្ងៃទី៤ ខែធ្នូ។
លោក Kimបានបញ្ជាក់ក្នុងសេចក្តីថ្លែងការណ៍កាលពីថ្ងៃអង្គារថាលោក«សុំអភ័យ ទោសចំពោះការរសាប់រសល់និងភាពមិនសមរម្យនេះ។ លោកបាននិយាយទៀតថាការទទួលខុសត្រូវទាំងអស់ចំពោះការដាក់ច្បាប់អាជ្ញាសឹកនេះសម្រាប់តែលោកម្នាក់ឯងហើយបានអង្វរសុំឱ្យអត់ឱនទាហានដែលត្រូវបានបញ្ជូនឱ្យអនុវត្តច្បាប់នោះដោយនិយាយថាពួកគេធ្វើទៅតាមបញ្ជារបស់លោកតែប៉ុណ្ណោះ៕
