ប្រជាពលរដ្ឋរស់នៅក្នុងតំបន់ភ្នំ១៥០០ នៃស្រុកវាលវែង ខេត្តពោធិ៍សាត់ ក្បែរតំបន់អន្ទង់អាំង បានអំពាវនាវឱ្យអាជ្ញាធរខេត្តផ្តល់កម្មសិទ្ធិដីធ្លីស្របច្បាប់ ខណៈពួកគេកំពុងប្រឈមនឹងការបណ្តេញចេញតាមចំណាត់ការរបស់រដ្ឋបាលខេត្ត។
ពលរដ្ឋដែលរស់នៅតាមដងផ្លូវជាតិលេខ ៥៥ ចន្លោះគីឡូម៉ែត្រ ១៣៦ និង ១៣៨ ក្នុងស្រុកវាលវែង អះអាងថា ពួកគេទទួលបានព័ត៌មានថា តំបន់ដែលពួកគេកំពុងរស់នៅជាតំបន់បៃតងដែលត្រូវការពារដោយរដ្ឋ។
អ្នកស្រី ភិន ផល្លា អាយុ ៥ ៤ឆ្នាំ ដែលមានមុខរបរជាអ្នកកាត់ស្លឹកចេកនិងចងអំបោស ប្រាប់វីអូអេថា អ្នកស្រីទទួលបានព័ត៌មានថា រដ្ឋាភិបាលត្រូវការពារតំបន់ផ្លូវអន្ទង់អាំងដែលជាតំបន់នៅប៉ែកខាងលើមានចម្ងាយប្រមាណពីរគីឡូម៉ែត្រ ពីតំបន់ដែលប្រជាជនរស់នៅ។ អ្នកស្រីបន្តថា អាជ្ញាធរខេត្តពោធិ៍សាត់ក៏បានចេញលិខិតដកហូតដីរស់នៅនិងដីអាស្រ័យផលរបស់ប្រជាពលរដ្ឋទាំងអស់ ដោយអះអាងថា តំបន់ទាំងនោះស្ថិតក្នុងដែនតំបន់បៃតងដែលត្រូវការពារ។ អ្នកស្រីបង្ហាញការព្រួយបារម្ភអំពីការបាត់បង់ដីធ្លីដែលអ្នកស្រីរស់នៅយូរឆ្នាំមកហើយ។
អ្នកស្រីថ្លែងថា៖ «ចា៎ អារម្មណ៍របស់ខ្ញុំនៅតែមានភាពភ័យខ្លាច។ បើនិយាយរួមទៅ បើចេញពីខេត្តមកតែម្តងទៅថា ឥឡូវកាត់ឆ្វៀលឱ្យប្រជាពលរដ្ឋហើយ។ ហ្នឹង ក៏វាស្រុះស្រួលតាមហ្នឹង។ ក្តីសង្ឃឹមច្រើន»។
កាលពីថ្ងៃទី ២៥ ខែមិថុនា ឆ្នាំ ២០២៤ រដ្ឋបាលខេត្តពោធិ៍សាត់បានចេញសេចក្តីជូនដំណឹងដល់ប្រជាពលរដ្ឋដែលរស់នៅក្នុងឃុំអន្លង់រាប ស្រុកវាលវែង ខេត្តពោធិ៍សាត់ ឱ្យផ្លាស់ទីចេញពីតំបន់ជិតផ្លូវអន្ទង់អាំងជាដាច់ខាត និងដកហូតទីតាំងដីនោះទុកជាសម្បត្តិរដ្ឋ។ រដ្ឋបាលខេត្តពោធិ៍សាត់បញ្ជាក់ថា ប្រជាជនរស់នៅលើដីនោះ ដោយខុសច្បាប់ ហើយអាជ្ញាធរត្រូវរៀបចំដោះស្រាយតំបន់អន្ទង់អាំង ភ្នំ១៥០០ ឱ្យទៅជាតំបន់បៃតង។
ពលរដ្ឋរូបនោះបន្ថែមថា ពួកគេធ្លាប់បានស្នើសុំអន្តរាគមន៍ពីស្ថាប័នព្រឹទ្ធសភាដែលមានអតីតនាយករដ្ឋមន្រ្តី លោក ហ៊ុន សែន ជាប្រធាន។ ព្រឹទ្ធសភាធ្លាប់បានចេញលិខិតមួយច្បាប់បញ្ជូនទៅរដ្ឋបាលខេត្តពោធិ៍សាត់ ដោយលើកឡើងអំពីការស្នើសុំអន្តរាគមន៍របស់ប្រជាពលរដ្ឋទាំង ២៤ គ្រួសារ ដែលកំពុងបារម្ភអំពីការបាត់បង់ដីធ្លី។ នេះបើតាមលិខិតព្រឹទ្ធសភា ចុះថ្ងៃទី ១៦ ខែសីហា ឆ្នាំ ២០២៤ ដែលវីអូអេទទួលបាន។
ពលរដ្ឋអះអាងថា ពួកគេបានបញ្ជូនលិខិតរបស់ព្រឹទ្ធសភាទៅរដ្ឋបាលខេត្ត ប៉ុន្តែមកទល់ពេលនេះពុំទាន់មានការឆ្លើយតបនៅឡើយទេ។
យោងតាមលិខិតរបស់រដ្ឋបាលខេត្តពោធិ៍សាត់ ចុះថ្ងៃទី ៦ ខែសីហា ឆ្នាំ ២០២៤ ដែលវីអូអេទទួលបាន រដ្ឋបាលខេត្តបានទុកពេលឱ្យប្រជាពលរដ្ឋ ៣០ ថ្ងៃ សម្រាប់ការរុះរើ និងចេញពីតំបន់អន្ទង់អាំង ដោយខ្លួនឯង ហើយក្នុងករណីប្រជាពលរដ្ឋមិនព្រមរើចេញ រដ្ឋបាលខេត្តនឹងចាត់វិធានការតាមផ្លូវច្បាប់។ នៅក្នុងលិខិតនោះ រដ្ឋបាលខេត្តបានលើកឡើងមាត្រា ៨៥០ នៃក្រមបរិស្ថាន និងធនធានធម្មជាតិដែលកំណត់ទោស ជនល្មើស ដោយដាក់ពន្ធនាគារពី ១ឆ្នាំទៅ ៥ឆ្នាំ និងពិន័យជាប្រាក់ពី ១០០លានរៀលទៅ ៥០០លានរៀល។
ពលរដ្ឋម្នាក់ទៀត អ្នកស្រី សេន ពិសី អាយុ ៥៥ ឆ្នាំ ជាម្ចាស់អាហារដ្ឋានមួយកន្លែងនៅតំបន់ជិតផ្លូវអន្ទង់អាំង ប្រាប់វីអូអេថា ប្រជាពលរដ្ឋរស់នៅតំបន់ជិតផ្លូវអន្ទង់អាំងច្រើនឆ្នាំមកហើយ និងមិនដែលមានបញ្ហាអ្វីឡើយ។ អ្នកស្រីបន្ថែមថា កាលពីខែមេសា អាជ្ញាធរបានចុះវាស់វែងដី និងជូនដំណឹងពីរលើកមកហើយ ឱ្យប្រជាពលរដ្ឋត្រូវតែរើចេញជាដាច់ខាត ប៉ុន្តែប្រជាពលរដ្ឋទាំងអស់មិនបានចាកចេញពីផ្ទះសម្បែងនិងដីធ្លីឡើយ។
អ្នកស្រីបញ្ជាក់ថា៖ «ពួកខ្ញុំទទួលរងអយុត្តិធម៌ពេក ព្រោះអីផ្លូវអន្ទង់អាំងហ្នឹង តាំងពីដើមឡើយមក មិនមែនត្រឹមឥឡូវទេដូចជា ៧ ឬ៨ឆ្នាំហើយ អន្ទង់អាំងហ្នឹង គឺពួកគាត់មានតែ ៦៨ គ្រួសារតាំងពីដើមឡើយមក»។
អ្នកស្រីបន្ថែមថា៖ «មានតែសុំឱ្យលោកចៅហ្វាយខេត្តហើយឬមួយក៏ថ្នាក់ដឹកនាំហើយនឹងសម្តេចបវរមេត្តាពួកយើង ដើម្បីការរស់នៅបន្ត តែប៉ិនហ្នឹង គឺសុំរស់នៅបន្ត។ សុំឱ្យយើងអាចស្របច្បាប់ដូចប្រជាជនទូទៅ»។
វីអូអេមិនទាន់អាចសុំការអត្ថាធិប្បាយពីលោក ហៀម ឃួន អភិបាលរងខេត្តពោធិ៍សាត់បាននៅឡើយទេ ដោយលោកឱ្យទាក់ទងទៅលោក ពៅ ពិសិដ្ឋ ដែលលោកថា ជាមន្រ្តីជំនាញធ្វើការលើរឿងនេះ។
ប៉ុន្តែវីអូអេមិនទាន់អាចសុំការអត្ថាធិប្បាយពីលោក ពៅ ពិសិដ្ឋ បាននៅឡើយទេ។
លោក ធាង ឡេង អភិបាលស្រុកវាលវែង បានបដិសេធមិនអត្ថាធិប្បាយ ដោយលោកថា លោកនៅថ្នាក់ស្រុកមិនមានសិទ្ធិឆ្លើយតបអ្វីឡើយ ព្រោះរឿងនេះជាកិច្ចការថ្នាក់ជាតិ៕
វេទិកាបញ្ចេញមតិ