លោក Jamal Khashoggi ជាអ្នកកាសែតដែលត្រូវបានសម្លាប់ គឺជា បុគ្គលម្នាក់ស្ថិតក្នុងចំណោមក្រុមអ្នកកាសែត ដែលត្រូវបានដាក់ឈ្មោះក្នុងទស្សនាវដ្តី Time Magazine កាលពីថ្ងៃអង្គារថាជាបុគ្គលប្រចាំឆ្នាំ។ ការប្រកាសនេះគឺជាការទទួលស្គាល់ចំពោះបុគ្គលឬក្រុមណាដែលមានឥទ្ធិពលបំផុតនៅតាមសារព័ត៌មាន និងកិច្ចការពិភពលោកកាលពីឆ្នាំកន្លងមកមិនថាជារឿងរ៉ាវល្អឬអាក្រក់នោះទេ។
លោក Edward Felsenthalដែលជា និពន្ធនាយកបានប្រកាសនៅក្នុងកម្មវិធីរបស់បណ្តាញសារព័ត៌មាន NBC ថាបុគ្គលប្រចាំឆ្នាំ២០១៨គឺជាអ្នកការពារនិងជាអ្នកធ្វើសង្គ្រាមលើសេចក្តីពិត។ ក្រៅពីលោក Khashoggi ក៏មានបុគ្គលមួយចំនួនផ្សេងទៀតដែលត្រូវបានដាក់ឈ្មោះថាជា អ្នកការពារផងដែរនោះ គឺជាបុគ្គលិករបស់សារព័ត៌មានCapital Gazette នៅទីក្រុង Annapolis រដ្ឋ Maryland ជាទីកន្លែងដែលមានបុគ្គលិក៥នាក់ត្រូវបានសម្លាប់នៅក្នុងហេតុការណ៍បាញ់សម្លាប់នៅក្នុងការិយាល័យរបស់សារព័ត៌មាននេះកាលពីខែមិថុនា។
ចំណែកឯបុគ្គលដែលទទួលបានកតិ្តយសមានដូចជាអ្នកស្រី Maria Ressa អ្នកកាសែតជនជាតិហ្វីលីពីនម្នាក់ដែលត្រូវបានចាប់ខ្លួនក្រោមបទចោទថាបានបំពានលើច្បាប់ពន្ធ និងអ្នកសារព័ត៌មានReuters ពីរនាក់គឺលោក Wa Lone និងលោក Kyaw Soe Ooអ្នកដែលត្រូវបានជាប់ឃុំឃាំងក្នុងប្រទេសមីយ៉ាន់ម៉ាជិតមួយឆ្នាំមកហើយ។
ទស្សនាវដ្តីនេះក៏បានផ្សព្វផ្សាយអំពីស្ថិតិរបស់គណកម្មាធិការការពារអ្នកសារព័ត៌មានហៅកាត់ថា CPJ ដែលបានគូសបញ្ជាក់ថា អ្នករាយការណ៍ចំនួន២៦២នាក់ត្រូវបានជាប់ក្នុងពន្ធនាគារកាលពីឆ្នាំ២០១៧ និងរំពឹងថាចំនួននេះនឹងកើនឡើងខ្ពស់ម្តងទៀតនៅឆ្នាំនេះ៕
