ចលនាសង្គ្រោះជាតិដែលត្រូវបានបង្កើតឡើងដោយលោក សម រង្ស៊ី ត្រូវបានប្រកាសដំណើរការជាផ្លូវការ បើទោះបីជាមេទាហាននិងមេនគរបាលជាន់ខ្ពស់នៅកម្ពុជា បានហៅចលនានេះថាជា «ភេរវកម្ម» និងប្រកាសជាបន្តបន្ទាប់ថាត្រូវតែកម្ទេច ប្រសិនបើកើតមាននៅកម្ពុជា។
លោក សម រង្ស៊ី អតីតប្រធានគណបក្សសង្គ្រោះជាតិដែលកំពុងនិរទេសខ្លួននៅបរទេសកាលពីល្ងាចថ្ងៃអាទិត្យ បានប្រកាសជាផ្លូវការ ដំណើរការចលនាសង្គ្រោះជាតិរបស់ខ្លួនក្នុងទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក ដោយមានការចូលរួមពីក្រុមអតីតមន្រ្តីជាន់ខ្ពស់ តំណាងរាស្ត្រ និងសកម្មជនរបស់គណបក្សសង្គ្រោះជាតិមួយចំនួន។ នេះបើតាមវីដេអូរយៈពេលជិតពីរម៉ោង ដែលត្រូវបានបង្ហោះលើទំព័រ Facebook របស់លោក សម រង្ស៊ី នៅព្រឹកថ្ងៃច័ន្ទ។
ក្នុងវីដេអូនោះ លោក សម រង្ស៊ី លើកឡើងជាថ្មីថា ការបង្កើតចលនាសង្គ្រោះជាតិ គឺមានគោលបំណងទាមទារឲ្យមានការដោះលែងលោក កឹម សុខា ដោះលែងអ្នកទោសនយោបាយជាច្រើនរូបទៀតដែលកំពុងជាប់ឃុំក្នុងពន្ធនាគារ និងទាមទារឲ្យគណបក្សសង្គ្រោះជាតិរស់ឡើងវិញ ដើម្បីអាចចូលរួមការបោះឆ្នោតនាពេលខាងមុខ។ លោកបន្ថែមថា ឆ្នាំ២០១៨ នឹងក្លាយជាឆ្នាំដែលត្រូវតែមានការផ្លាស់ប្តូរ។
លោកបញ្ជាក់ថា៖ «ខ្ញុំជឿថា ឆ្នាំ២០១៨នេះ គឺជាឆ្នាំផ្តាច់ព្រ័ត្រ។ បន្តិចទៀតនេះយើងនឹងនិយាយអំពីផែនការសកម្មភាពរបស់យើង ប៉ុន្តែខ្ញុំសុំប្រកាសពីការប្តេជ្ញាចិត្តរបស់ខ្ញុំ ថាឲ្យឆ្នាំ២០១៨នេះ ឃើញនូវការផ្លាស់ប្តូរដែលប្រជារាស្រ្តខ្មែររងចាំយូរណាស់មកហើយ»។
លោក សម រង្ស៊ី និងអតីតតំណាងរាស្រ្តគណបក្សប្រឆាំងមួយចំនួនទៀតដែលកំពុងស្ថិតនៅក្រៅប្រទេស ចាប់ផ្តើមបង្កើតចលនាសង្រ្គោះជាតិ កាលពីថ្ងៃទី១២ ខែមករា ឆ្នាំ២០១៨ ដោយអះអាងថា ដើម្បីតស៊ូដោយសន្តិវិធី តាមរយៈការរៀបចំបណ្តាញរបស់ខ្លួននៅទូទាំងប្រទេស។ លោក សម រង្ស៊ី បានអំពាវនាវកុំឲ្យថ្នាក់ដឹកនាំសំខាន់ៗរបស់គណបក្សសង្រ្គោះជាតិ ប្រកាសការគាំទ្ររបស់ខ្លួនចំពោះចលនានេះជាសាធារណៈ ដើម្បីធានាសុវត្ថិភាព និងធានាប្រសិទ្ធភាពការងាររបស់ចលនានេះ។
ចលនាសង្រ្គោះជាតិនេះ មិនត្រូវបានគាំទ្រដោយមន្រ្តីដែលមានអតីតភាពជាមួយគណបក្សសិទ្ធិមនុស្ស ដែលបង្កើតឡើងដោយលោក កឹម សុខា នោះទេ។ លោក កឹម សុខា ផ្ទាល់ ក៏បានប្រកាសមិនគាំទ្រចលនានេះដែរ។
ក្រោយការប្រកាសបង្កើតចលនាសង្គ្រោះជាតិនេះ គេឃើញមន្រ្តីជាន់ខ្ពស់ដែលជាមេទាហាន និងមេនគរបាលជាច្រើនរូប រួមមាន លោក ទៀ បាញ់ រដ្ឋមន្រ្តីក្រសួងការពារជាតិ លោក ស ខេង រដ្ឋមន្រ្តីក្រសួងមហាផ្ទៃ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសជាដើម បានហៅចលនានោះថា ជាភេរវកម្ម និងបានប្តេជ្ញាបង្រ្កាបចលនានោះ មិនឲ្យកើតមាននៅកម្ពុជា។
លោក សុខ ឥសាន អ្នកនាំពាក្យគណបក្សកាន់អំណាចបានប្រាប់ក្រុមអ្នកសារព័ត៌មានតាមបណ្តាញសង្គម Telegram នាល្ងាចថ្ងៃច័ន្ទនេះថា ការប្រកាសបង្កើតចលនាសង្គ្រោះជាតិជាផ្លូវការ បង្ហាញពីទំនាស់រវាងក្រុមនិយមលោក កឹម សុខា និងក្រុមនិយមលោក សម រង្ស៊ី។ លោកបន្ថែមថា ការប្រកាសបង្កើតចលនាណាមួយក្នុងគោលបំណងប្រឆាំងនឹងរដ្ឋាភិបាលកម្ពុជា គឺជាការដាក់បន្ទុកផ្លូវច្បាប់បន្ថែមលើក្រុមរបស់លោក សម រង្ស៊ី។
អ្នកនាំពាក្យរូបនេះបានសរសេរក្នុងន័យដើមថា៖
«ការយល់ឃើញប្រកបដោយចិត្តលោភលន់ និងអំណាចនេះរបស់ក្រុមនិយម សម រង្សី ភ្លេចគិតថា របស់ដែលហៅថា ចលនាសង្គ្រោះជាតិស្អីនេះ គឺជាក្រុមខុសច្បាប់ ទោះបីនៅក្រៅប្រទេសធ្វើសកម្មភាពប្រឆាំងនឹងរាជរដ្ឋាភិបាលស្របច្បាប់នៃប្រទេសកម្ពុជា វាកាន់តែបង្កើនបទល្មើសឲ្យខ្លួន កាន់តែមានពិរុទ្ធភាពធ្ងន់ទៅៗ ដែលនាំឲ្យកាន់តែទទួលទោសកាន់តែធ្ងន់ថែមទៀតប៉ុណ្ណោះ»។
លោកបណ្ឌិត ឡៅ ម៉ុងហៃ អ្នកវិភាគនយោបាយឯករាជ្យ ប្រាប់ VOA ថា ការបង្កើតចលនាថ្មីរបស់លោក សម រង្ស៊ី នឹងមិនអាចទទួលបានផ្លែផ្កាដូចការរំពឹងទុករបស់អតីតប្រធានគណបក្សប្រឆាំងរូបនេះឡើយ។ លោកបន្ថែមថា លោក សម រង្ស៊ី គួរតែរៀបចំយុទ្ធសាស្រ្តរបស់ខ្លួនតាមរយៈការឈរលើជំហររបស់គណបក្សសង្គ្រោះជាតិ មិនគួរបង្កើតចលនាអ្វីថ្មីនោះទេ។
លោកមានប្រសាសន៍ថា៖
«តែកាលណាគេធ្វើនយោបាយ គឺគេត្រូវការការគាំទ្រពីប្រជាពលរដ្ឋ។ ហើយការរួបរួមគ្នាគឺបានលទ្ធផលវិជ្ជមានយ៉ាងធំធេង គឺបានទទួលការគាំទ្រពីមតិមហាជនជាច្រើន ហើយក៏លេចចេញជាសន្លឹកឆ្នោតនៅឆ្នាំ២០១៣ និងឆ្នាំ២០១៧។ ហើយគេគួរតែបន្តទៅទៀត ពង្រឹងទៅវិញ មិនមែនទៅបង្កើតចលនាអីមួយផ្សេងនោះទេ។ អ្វីដែលមានស្រាប់គេពង្រឹង ហើយកែលម្អ ដើម្បីឲ្យមានឯកភាពគ្នាបន្ថែមទៅទៀតនៅក្នុងជួរបក្សហ្នឹង សូម្បីតែបក្សហ្នឹងរលាយក៏ដោយ»។
ចលនាសង្គ្រោះជាតិត្រូវបានប្រកាសបង្កើត បន្ទាប់ពីគណបក្សសង្គ្រោះជាតិត្រូវបានតុលាការកំពូលរំលាយកាលពីពាក់កណ្តាលខែវិច្ឆិកាឆ្នាំមុន ហើយមន្រ្តីជាន់ខ្ពស់ និងតំណាងរាស្រ្តជាង១០០នាក់ ត្រូវបានហាមឃាត់សិទ្ធិធ្វើនយោបាយម្នាក់ៗចំនួន៥ឆ្នាំ ទៅតាមបណ្តឹងរបស់ក្រសួងមហាផ្ទៃដោយចោទថា គណបក្សនេះមានជាប់ពាក់ព័ន្ធជាមួយបរទេសរៀបចំគម្រោងផ្តួលរំលំរដ្ឋាភិបាល៕
