ប្រទេសរុស្ស៊ីដែលបានធ្វើការវាយប្រហារតាមយន្តហោះក្នុងប្រទេសស៊ីរី បាននិយាយកាលពីថ្ងៃពុធនេះថា ខ្លួនបានប្រើប្រាស់នាវាចម្បាំង៤គ្រឿងក្នុងសមុទ្រ Caspian ដើម្បីបាញ់រុក្កែតលើទីតាំងរបស់ពួករដ្ឋឥស្លាម ក្នុងប្រទេសដែលហែកហូរដោយសារសង្គ្រាមមួយនេះ។
រដ្ឋមន្ត្រីក្រសួងការពារប្រទេស Sergei Shoigu បានថ្លែងប្រាប់ប្រធានាធិបតីរុស្ស៊ី Vladimir Putin ថា នាវាចម្បាំងទាំងនោះ បានបាញ់កាំជ្រួចមីស៊ីល២៦ លើទីតាំងពួករដ្ឋឥស្លាម១១កន្លែងដែលលោកបាននិយាយថា បានបំផ្លាញទីតាំងក្រុមរដ្ឋឥស្លាមដោយមិនបាននាំឲ្យមានការខូចខាតដល់ជនស៊ីវិលឡើយ។
ព័ត៌មានអំពីការវាយប្រហាររបស់កងនាវារុស្ស៊ីក្នុងប្រទេសស៊ីរី បានលេចឮស្របពេលដែលកងកម្លាំងរដ្ឋាភិបាលស៊ីរី បានចាប់ផ្តើមការវាយប្រហារនៅលើដីប្រឆាំងនិងពួកឧទ្ទាម។
អង្គការឃ្លាំមើលសិទ្ធិមនុស្សស៊ីរី ដែលមានទីស្នាក់ការនៅក្នុងប្រទេសអង់គ្លេស ដែលឃ្លាំមើលអំពើហិង្សាក្នុងប្រទេសស៊ីរីបាននិយាយថា ការវាយប្រហារតាមយន្តហោះរបស់រុស្ស៊ីនៅថ្ងៃពុធ បានកើតឡើងនៅតំបន់ Hama និងខេត្តជិតខាង ហើយថា កងទ័ពស៊ីរីបានប្រើប្រាស់កាំជ្រួចមីស៊ីលនៅតំបន់នោះ៕
