អនុប្រធានគណបក្សភ្លើងទៀន លោក រ៉ុង ឈុន នៅថ្ងៃព្រហស្បតិ៍នេះ បានប្រកាសចាកចេញពីគណបក្សជំទាស់មួយនេះ ដោយងាកទៅចូលរួមជាមួយគណបក្សកម្លាំងជាតិ ដែលទើបត្រូវបានក្រសួងមហាផ្ទៃអនុញ្ញតឱ្យបង្កើតឡើង កាលពីខែពាក់កណ្តាលខែតុលា។
ការប្រកាសរបស់លោក រ៉ុង ឈុន ធ្វើឡើងនៅក្នុងសន្និសីទសារព័ត៌មាន នៅទីស្នាក់ការសមាគមគ្រូបង្រៀនកម្ពុជាឯករាជ្យ ក្នុងសង្កាត់ចាក់អង្រែ ខណ្ឌមានជ័យ រាជធានីភ្នំពេញ នៅថ្ងៃព្រហស្បតិ៍នេះ ដែលកៀកនឹងថ្ងៃដែលគណបក្សកម្លាំងជាតិ គ្រោងរៀបចំក្បាលម៉ាស៊ីន ឬហៅថា«សមាជបក្ស» នៅចុងសប្តាហ៍នេះ។
ក្នុងសន្និសីទសារព័ត៌មាននោះ លោក រ៉ុង ឈុន អតីតមេដឹកនាំសហជីពមួយរូប បញ្ជាក់មូលហេតុនៃការចាកចេញនោះថា ដោយសារតែ គណបក្សភ្លើងទៀន មិនអាចចូលរួមការបោះឆ្នោតនានា នៅពេលខាងមុខទៀតបាន និងដោយសារតែចរន្តនយោបាយថ្មីនៃគណបក្សកម្លាំងជាតិ អាចនឹងស្នងតំណែងពីគណបក្សប្រឆាំង។ លោកបន្ថែមថាការសម្រេចចិត្តបែបនេះ ក៏ដោយយោងតាមគំនិតដើមនៃថ្នាក់ដឹកនំាំគណបក្សភ្លើងទៀន និងស្តាប់តាមសកម្មជន ថ្នាក់ដឹកនាំគណបក្សភ្លើងទៀនថ្នាក់ក្រោមជាតិ និងអ្នកគាំទ្រភាគច្រើន ដែលគាំទ្រឱ្យលោកចូលរួមជាមួយគណបក្សថ្មី។
លោកថ្លែងថា៖ «អ៊ីចឹងការសម្រេចចិត្តរបស់ខ្ញុំ គឺទៅតាមគំនិតដើម និងទៅតាមសំឡេងថ្នាក់ក្រោមជាតិ ភាគច្រើនដែលចង់ទៅផ្ទះថ្មី»។
លោកបន្ថែមថា៖ «ហើយយើងមើលឃើញច្បាស់ថា មានតែគណបក្សកម្លាំងជាតិខ្មែរតែមួយទេ ដែលជាអ្នកបន្តដំណើរពីគណបក្សភ្លើងទៀន ហើយនិងបន្តនូវឆន្ទៈដើម ស្មារតីដើម អ្នកប្រជាធិបតេយ្យ ហើយក៏ជានិមិត្តរូបមួយ សម្រាប់គណបក្សប្រជាធិបតេយ្យ។ អ៊ីចឹងហើយបានជាខ្ញុំសម្រេចចិត្ត ចូលជាមួយគណបក្សកម្លាំងជាតិ»។
លោក រ៉ុង ឈុន បន្ថែមថាគណបក្សភ្លើងទៀនមិនត្រូវបានអនុញ្ញាតឱ្យចូលរួមការបោះឆ្នោតកាលពីខែកក្កដា ឆ្នាំ២០២៣ ដោយសារបាត់ឯកសារដើមនៃការចុះបញ្ជីគណបក្សនៅក្រសួងមហាផ្ទៃ ដូច្នេះលោកថា បើសិនជាលោកបន្តឱបក្រសោបជាមួយគណបក្សភ្លើងទៀន ជា«ការសម្លាប់ប្រជាធិបតេយ្យ»។
លោកថ្លែងថា៖ «បើគណបក្សភ្លើងទៀនមិនបានចូលរួមការបោះឆ្នោត ហើយយើងនៅឱបជាមួយគណបក្ស មានន័យថា យើងស្រឡាញ់ណាស់ ប៉ុន្តែយើងកំពុងតែសម្លាប់ប្រជាធិបតេយ្យ»។
លោក រ៉ុង ឈុន អតីតមេដឹកនាំសហជីព និងប្រធាននៃសមាគមគ្រូបង្រៀនកម្ពុជាឯករាជ្យ និងជាអតីតសមាជិកម្នាក់នៃគណៈកម្មាធិការជាតិរៀបចំការបោះឆ្នោត (គ.ជ.ប) បានចូលរួមជាមួយគណបក្សភ្លើងទៀន បានរយៈពេលជិត១០ខែ ដែលចាប់ពីថ្ងៃទី៣១ខែមករា ឆ្នាំ២០២៣។
លោក រ៉ុង ឈុន ថ្លែងថាការចាកចេញរបស់លោកមិនមែនមកពីការអក់អន់ស្រពន់ចិត្តជាមួយគណបក្សភ្លើងទៀន និងក៏មិនមែនជាការបំបែកសំឡេងអង្គបោះឆ្នោត សម្រាប់ការបោះឆ្នោតជ្រើសរើសសមាជិកព្រឹទ្ធសភា និងក្រុមប្រឹក្សារាជធានី ខេត្ត ក្រុង ស្រុក នាឆ្នាំ២០២៤ នោះទេ។
ទោះជាយ៉ាងណា លោក រ៉ុង ឈុន មិនទាន់អាចបញ្ជាក់ថាតើលោកនឹងមានតួនាទីអ្វីនៅក្នុងគណបក្សកម្លាំងជាតិឡើយ ខណៈគណបក្សថ្មីនេះ គ្រោងធ្វើសមាជគណបក្សលើកដំបូង នៅថ្ងៃទី១២ ខែវិច្ឆិកា ឆ្នាំ២០២៣ ដើម្បីរៀបចំក្បាលម៉ាស៊ីនថ្នាក់ដឹកនាំ និងរចនាសម្ព័ន្ធគណបក្ស។
លោក ស៊ុន ចន្ធី អតីតប្រធានគណៈកម្មាធិការប្រតិបត្តិគណបក្សភ្លើងទៀនខេត្តកំពង់ធំ ដែលទើបចាកចេញពីគណបក្សភ្លើងទៀន និងទៅបង្កើតគណបក្សកម្លាំងជាតិ ប្រាប់វីអូអេនៅថ្ងៃព្រហស្បតិ៍ថា លោកស្វាគមន៍យ៉ាងកក់ក្តៅចំពោះវត្តមានរបស់លោក រ៉ុង ឈុន។ លោកមិនទាន់អាចបញ្ជាក់អំពីតួនាទីរបស់លោក រ៉ុង ឈុន ក្នុងគណបក្សនៅឡើយទេ លុះត្រាដល់ថ្ងៃ«សមាជបក្ស» ទើបមានការប្រកាសជាផ្លូវការ។
លោកថ្លែងថា៖ «គណបក្សកម្លាំងជាតិគោរព និងឱ្យតម្លៃខ្ពស់ចំពោះលោក រ៉ុង ឈុន ដែលមានវីរភាពធ្លាប់ចេញមុខតស៊ូមតិ ដោយសន្តិវិធី អង់អាចក្លាហាន លះបង់ផលប្រយោជន៍ផ្ទាល់ខ្លួន ស្មោះត្រង់ បម្រើការពារផលប្រយោជន៍គ្រូបង្រៀន កម្មករ សហជីព សកម្មជនសិទ្ធិមនុស្ស និងសកម្មជននយោបាយ នាពេលកន្លងទៅ»។
ចំណែកលោក គីមសួរ ភិរិទ្ធ អ្នកនាំពាក្យគណបក្សភ្លើងទៀន ប្រាប់វីអូអេថាការចាកចេញរបស់លោក រ៉ុង ឈុន ជាសិទ្ធិបុគ្គល និងមិនប៉ះពាល់អ្វីដល់គណបក្សភ្លើងទៀនឡើយ ព្រោះគណបក្សថ្មីក៏បានបង្ហាញជំហរ និងគោលដៅ«ស្តារលទ្ធិប្រជាធិបតេយ្យ»ដូចគណបក្សភ្លើងទៀនដែរ។
លោកថ្លែងថា៖ «ខ្ញុំជឿថាបន្តិចទៀត គណបក្សដែលគាត់[រ៉ុង ឈុន]នឹងចូលរួមហ្នឹង គាត់អាចវិលត្រឡប់ មកចូលរួមក្នុងសម្ពន្ធភាពឆ្ពោះទៅអនាគត នឹងធ្វើកិច្ចការជាមួយគ្នា ដើម្បីស្តារលទ្ធិប្រជាធិបតេយ្យនៅកម្ពុជា។ ដូច្នេះអត់មានអ្វីធ្វើឱ្យប៉ះពាល់ដល់ផលប្រយោជន៍ ឬដល់ការងារស្តារប្រជាធិបតេយ្យរបស់គណបក្សភ្លើងទៀន ឬក៏គណបក្សផ្សេងៗទៀតនៅក្នុងសម្ពន្ធភាពដែរ»។
លោក រ៉ុង ឈុន ប្រាប់អ្នកសារព័ត៌មាននៅក្នុងសន្និសីទសារព័ត៌មាននាថ្ងៃព្រហស្បតិ៍ថា លោកក៏នឹងពិភាក្សាជាមួយក្បាលម៉ាស៊ីនថ្នាក់ដឹកនាំគណបក្សកម្លាំងជាតិ អំពីសម្ពន្ធភាពជាមួយគណបក្សជំទាស់ផ្សេងទៀតផងដែរ៕
