ក្រសួងកសិកម្ម រុក្ខាប្រមាញ់និងនេសាទ បានច្រានចោលមតិរិះគន់តាមបណ្តាញសង្គមហ្វេសប៊ុកដែលបានលើកឡើងថា ក្រសួងមិនមានមន្ត្រីបច្ចេកទេសដើម្បីចុះជួយស្វែងរកទីផ្សារ ដែលបណ្តាលឲ្យតម្លៃស្រូវអង្ករធ្លាក់ចុះទាប មិនស្របទៅនឹងតម្លៃនៃវត្ថុធាតុដើម និងថ្លៃពលកម្មសម្រាប់ប្រជាកសិករ។
ក្រសួងកសិកម្មបានបញ្ជាក់ក្នុងសេចក្តីប្រកាសព័ត៌មានមួយចេញផ្សាយជាសាធារណៈនៅដើមសប្តាហ៍នេះថា ការលើកឡើងថាក្រសួងមិនជួយសម្រួលទប់តម្លៃស្រូវអង្ករមិនឲ្យធ្លាក់ចុះនោះ «ផ្ទុយពីការណ៍ពិតដែលក្រសួងកំពុងនឹងបានយកចិត្តទុកដាក់លើបញ្ហានេះ ជាហេតុធ្វើឲ្យសាធារណជនដែលមិនយល់ហេតុផលមានការភាន់ច្រឡំមកលើរាជរដ្ឋាភិបាល ជាពិសេសមកលើក្រសួងកសិកម្ម រុក្ខាប្រមាញ់និងនេសាទ»។
សេចក្តីប្រកាសព័ត៌មាននោះបានបន្ថែមថា យោងតាមការស្រាវជ្រាវរបស់ក្រសួងកសិកម្ម «ស្រូវនៅមានតម្លៃសមរម្យនៅឡើយ លើកលែងតែស្រូវដែលមានគុណភាពអន់តែប៉ុណ្ណោះ»។
លោក ចាន់ ហេង នាយករងខុទ្ទកាល័យ និងជាអ្នកនាំពាក្យនៃក្រសួងកសិកម្ម បានប្រាប់ VOA នៅថ្ងៃពុធនេះថា ក្រសួងបានសហការជាមួយរោងម៉ាស៊ីនកិនស្រូវដើម្បីប្រមូលទិញស្រូវពីកសិករ ហើយតម្លៃស្រូវបានឡើងដល់កម្រិតដែលអាចទទួលយកបានហើយ។
«តាមពិតក្រសួងបានចាត់វិធានការជាបន្តបន្ទាប់ដែរ ប៉ុន្តែមានបណ្តាញសង្គមហ្វេសប៊ុកខ្លះហ្នឹងចេះតែចុះយកអាព័ត៌មានដដែល ចេះនាំគ្នាទៅចុះអ៊ីចឹងទៅណា អ៊ីចឹងបានក្រសួងចេញសេចក្តីប្រកាសព័ត៌មានឲ្យបានដឹងឲ្យបានជ្រាបហ្នឹងណា»។
យោងតាមតារាងតម្លៃស្រូវជាមធ្យមលើគណនីហ្វេសប៊ុករបស់សហព័ន្ធស្រូវអង្ករកម្ពុជា តម្លៃស្រូវក្រអូបប្រណិត ស្រូវសើម ក្នុងខេត្តពោធិ៍សាត់ ក្នុងខែវិច្ឆិកាគឺ ៩៤០រៀល ក្នុងមួយគីឡូក្រាម និងនៅក្នុងខែធ្នូត្រឹមថ្ងៃទី១៣ គឺ៩២៥រៀល។ ស្រូវសើមក្នុងខេត្តបាត់ដំបង មានតម្លៃ១០៧១រៀល ក្នុងមួយគីឡូក្រាមក្នុងខែវិច្ឆិកា និង១០៧៩រៀល ក្នុងមួយគីឡូក្រាមក្នុងខែធ្នូ ហើយស្រូវសើមក្នុងខេត្តបន្ទាយមានជ័យ មានតម្លៃ១០៦៩រៀល ក្នុងមួយគីឡូក្រាមក្នុងខែវិច្ឆិកា និង៩៨៥រៀលក្នុងមួយគីឡូក្រាមក្នុងខែធ្នូ។
លោក ចាន់ សុខឃាង អនុប្រធានសហព័ន្ធស្រូវអង្ករកម្ពុជា យល់ស្របជាមួយនឹងការលើកឡើងរបស់ក្រសួងកសិកម្ម រុក្ខាប្រមាញ់និងនេសាទ ដោយថា ស្រូវដែលមានគុណភាពមិនល្អគឺមានតម្លៃទាប ហើយស្រូវដែលមានគុណភាពល្អគឺនៅអាចលក់ក្នុងតម្លៃថ្លៃដដែល។
«អត់ទេ ស្រូវអត់ទាបទេ ស្រូវល្អតម្លៃអត់ខុសពីឆ្នាំមុនទេ ដ្បិតតែឥឡូវនេះតម្លៃទីផ្សារអង្កររាងស្រុតចុះបន្តិច នៅលើទីផ្សារអន្តរជាតិ ក៏ប៉ុន្តែក៏តម្លៃស្រូវវាអត់ខុសពីឆ្នាំមុនដែរ»។
លោកបានបន្ថែមថា បន្ទាប់ពីទទួលបានទុនចំនួន៥០លានដុល្លារសហរដ្ឋអាមេរិកពីរាជរដ្ឋាភិបាលកាលពីដើមខែធ្នូ រោងម៉ាស៊ីនកិនស្រូវនានាកំពុងរួសរាន់ប្រមូលទិញស្រូវពីកសិករគ្រប់តំបន់ទាំងអស់។
ទោះយ៉ាងណា លោក យ៉ង់ សាំងកុមា អ្នកជំនាញកសិកម្ម និងជាអតីតប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ CDAC មានប្រសាសន៍ថា រហូតមកដល់ពេលនេះ តម្លៃស្រូវនៅតែមានតម្លៃទាប ហើយមូលហេតុចម្បងនោះគឺដោយសារតែទីផ្សារអង្ករនាំចេញទៅកាន់សហភាពអឺរ៉ុបបានធ្លាក់ចុះ។
«អ្វីដែលសំខាន់ គឺការនាំអង្ករចេញទៅអឺរ៉ុបហ្នឹង វាធ្លាក់ចុះខ្លាំង អ៊ីចឹងវាប៉ះ វាប៉ះពាល់ដល់ផលចំណេញរបស់អ្នករកស៊ីរោងម៉ាស៊ីន អ្នករកស៊ីមួយចំនួនហ្នឹង ក៏គាត់មិនហ៊ានទិញស្រូវស្តុកទុកច្រើនទេសម្រាប់ក្នុងការនាំចេញអ៊ីចឹង»។
បន្ទាប់ពីសហគមន៍អឺរ៉ុបបានកំណត់ពន្ធរយៈពេល៣ឆ្នាំលើអង្ករពីកម្ពុជា និងភូមាក្នុងគោលបំណងការពារអ្នកផលិតអង្ករក្នុងសហគមន៍អឺរ៉ុប ដូចជាអ៊ីតាលី កាលពីខែមករា ឆ្នាំ២០១៩ ការនាំចេញអង្ករកម្ពុជាទៅកាន់អឺរ៉ុបបានធ្លាក់ចុះពី១៧ម៉ឺនតោន មកត្រឹម១២ម៉ឺនតោន ក្នុងរយៈពេលប្រាំបីខែនៃឆ្នាំ២០១៩ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមការបញ្ជាក់របស់តំណាងម្ចាស់រោងម៉ាស៊ីនកិនស្រូវកាលពីពេលកន្លងមក។
លោកចាន់ សុខឃាង អនុប្រធានសហព័ន្ធស្រូវអង្ករកម្ពុជា ក៏បានអំពាវនាវឲ្យសហគមន៍អឺរ៉ុប ជួយយោគយល់ដល់ការលំបាករបស់ប្រជាកសិករកម្ពុជាផងដែរ។
«សូមលោកជួយបើកទីផ្សារឲ្យប្រជាកសិករផង។ កុំយកបញ្ហានយោបាយជាមួយពាណិជ្ជកម្មយកមកដាក់ជាសម្ពាធ ដល់ហើយជួបបញ្ហាជាមួយទីផ្សារជួបបញ្ហាជាមួយនឹងកសិករ ឲ្យពួកយើងខ្ញុំជាពាណិជ្ជករទៅដោះរបៀបបែបម៉េច»។
យោងតាមរបាយការណ៍របស់ក្រសួងពាណិជ្ជកម្មនិងរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ ការនាំចេញអង្ករទៅកាន់ទីផ្សារអន្តរជាតិគិតត្រឹម១០ខែ ក្នុងឆ្នាំ២០១៩ គឺមានចំនួន ៤៥ម៉ឺនតោន ស្មើនឹងទឹកប្រាក់ចំនួន២៨៦លានដុល្លារអាមេរិក៕
