សមត្ថកិច្ចរាជធានីភ្នំពេញអះអាងថា ខ្លួនកំពុងតាមចាប់អ្នកបើកបររថយន្ត ដែលសង្ស័យថា បុកម៉ូតូមួយគ្រឿង កាលពីយប់ថ្ងៃអាទិត្យ បណ្ដាលឱ្យមនុស្សពីរនាក់ស្លាប់ និងម្នាក់រងរបួសធ្ងន់។ ហេតុការណ៍នេះ កើតឡើងកាលពីយប់រំលងអធ្រាត្រ នៅលើផ្លូវព្រះស៊ីសុវត្ថិ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ហើយថតបានដោយកាមេរ៉ាសុវត្ថិភាពផងដែរ។ នេះបើតាមការបង្ហោះសារនៅលើបណ្ដាញសង្គមហ្វេសប៊ុករបស់ស្នងការដ្ឋាននគរបាលរាជធានីភ្នំពេញ នៅថ្ងៃចន្ទនេះ។
បើតាមសារនោះ ស្នងការនគរបាលរាជធានីភ្នំពេញ លោក ជួន ណារិន្ទ បានបញ្ជាឱ្យសមត្ថកិច្ចចម្រុះស្រាវជ្រាវស្វែងរកចាប់អ្នកបើករថយន្តបង្ក និងរត់គេចខ្លួន ក្រោយបុកជនរងគ្រោះជិះម៉ូតូមួយគ្រឿង បណ្តាលឱ្យស្រ្តី និងកូនតូចស្លាប់ និងស្វាមីដែលជាអ្នកបើកម៉ូតូរបួសធ្ងន់។
លោក សំ វិច្ឆិកា អ្នកនាំពាក្យស្នងការរាជធានីភ្នំពេញ ប្រាប់វីអូអេកាលពីព្រឹកថ្ងៃចន្ទថា សមត្ថកិច្ចមិនទាន់អាចកំណត់អត្តសញ្ញាណអ្នកបើករថយន្ដបាននៅឡើយទេ។ លោកបញ្ជាក់ថា បុរសដែលជាអ្នកបើកម៉ូតូកំពុងស្ថិតក្នុងបន្ទប់សង្រ្គោះបន្ទាន់នៅមន្ទីរពេទ្យកាល់ម៉ែត។
សារព័ត៌មានក្នុងស្រុកបានចុះផ្សាយថា រថយន្តបង្កនោះសង្ស័យជាប្រភេទរថយន្ដ Hammer ដែលបើកបរទិសដៅស្របគ្នា ហើយបានបុកម៉ូតូពីខាងក្រោយពេញទំហឹង។
នេះជាគ្រោះថ្នាក់ចរាចរណ៍មួយផ្សេងទៀតនៅរាជធានីភ្នំពេញ ដែលជនបង្ករត់គេចហើយត្រូវបានផ្សព្វផ្សាយតាមហ្វេសប៊ុក បន្ទាប់ពីគ្រោះថ្នាក់ចរាចរណ៍មួយដែលកើតឡើងកាលពីថ្ងៃទី ១៤ ខែធ្នូ ដែលជនបង្កដែលរត់គេចតែត្រូវបានចាប់ខ្លួន ហើយតុលាការសម្រេចឃុំខ្លួនបណ្តោះអាសន្ននៅពន្ធនាគារកាលពីថ្ងៃអាទិត្យ៕
