ស្ថាប័នអយ្យការនៃតុលាការរាជធានីភ្នំពេញបានចេញដីកាបញ្ជាឱ្យជនសង្ស័យដែលជាអ្នកបើកបររថយន្តចូលខ្លួនមកបំភ្លឺ នៅក្នុងករណីគ្រោះថ្នាក់ចរាចរណ៍មួយ ដែលគ្រួសារជនរងគ្រោះអះអាងថា រថយន្តបុកម៉ូតូបណ្តាលឱ្យអ្នកបើកបរម៉ូតូស្លាប់ កាលពីសប្តាហ៍មុន។
តុលាការបានឱ្យជនសង្ស័យឈ្មោះ ព្រហ្ម វិចិត្រសុសក្តា អាយុ ២៣ ឆ្នាំ ជាអ្នកបើករថយន្តJeep ពណ៌ខ្មៅ ចូលខ្លួនបំភ្លឺឱ្យបានមុនថ្ងៃទី ៩ ខែមករា ឆ្នាំ ២០២៤។ នេះបើតាមដីកាបញ្ជាឱ្យចូលខ្លួនរបស់លោក ប្លង់ សុផល ព្រះរាជអាជ្ញារង ចុះថ្ងៃទី ១៩ ខែធ្នូ ឆ្នាំ ២០២៣។ ព្រះរាជអាជ្ញារងបញ្ជាក់ថា ជនសង្ស័យបានរត់គេចខ្លួនពីកន្លែងកើតហេតុ ក្នុងគោលបំណងគេចវេះពីការទទួលខុសត្រូវ ហើយមិនដឹងថានៅទីណា។
ការចេញដីការបស់តុលាការកើតឡើងក្រោយរដ្ឋមន្ត្រីក្រសួងយុត្តិធម៌ លោក កើត រិទ្ធ បានស្នើឱ្យតុលាការពិនិត្យ ស្រាវជ្រាវ និងដោះស្រាយឱ្យបានត្រឹមត្រូវ និងម៉ឺងម៉ាត់តាមផ្លូវច្បាប់។ នេះបើយោងតាមលោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌។
លោក ជិន ម៉ាលីន ប្រាប់វីអូអេជាអក្សរតាមប្រព័ន្ធទំនាក់ទំនងតេឡេក្រាមថា៖ «ព្រះរាជអាជ្ញាកំពុងធ្វើការពិនិត្យនិងស្រាវជ្រាវករណីនេះ ដើម្បីស្វែងរកការណ៍ពិតនិងការទទួលខុសត្រូវតាមផ្លូវច្បាប់»។
ការកោះហៅរបស់តំណាងអយ្យការធ្វើឡើង ក្រោយតុលាការបានទទួលរបាយការណ៍របស់ការិយាល័យនគរបាលចរាចរណ៍ ចុះថ្ងៃទី ១៨ ខែធ្នូ ដែលក្រុមគ្រួសារជនរងគ្រោះបានប្តឹងអ្នកបើកបររថយន្តម៉ាក Jeep ពណ៌ខ្មៅ ដោយចោទថា បានបុកម៉ូតូម៉ាក Click ពណ៌ស លើផ្លូវ ៥៦៦ កែង ៣១៧ សង្កាត់បឹងកក់ ២ ខណ្ឌទួលគោក កាលពីវេលាម៉ោង ១០និង២០នាទីយប់ កាលពីថ្ងៃទី ១៤ ខែធ្នូ ឆ្នាំ ២០២៣។
បើតាមពាក្យបណ្តឹងនោះ ក្រុមគ្រួសារជនរងគ្រោះបានទាមទារសងជំងឺចិត្ត ២០ ម៉ឺនដុល្លារអាមេរិក និងស្នើឱ្យផ្តន្ទាទោសតាមច្បាប់។
លោក សំ វិច្ឆិកា អ្នកនាំពាក្យស្នងការរាជធានីភ្នំពេញ ប្រាប់វីអូអេនៅថ្ងៃអង្គារថា សមត្ថកិច្ចបានបញ្ជូនសំណុំរឿងនេះទៅកាន់សាលាដំបូងរាជធានីភ្នំពេញរួចហើយ។
លោកថ្លែងថា៖ «អ៊ីចឹងកិច្ចការងារនេះគឺកម្លាំងសមត្ថកិច្ចនឹងធ្វើការស្រាវជ្រាវ ដើម្បីស្វែងរកចាប់ឃាត់ខ្លួនជនបង្កយកមកអនុវត្តតាមផ្លូវច្បាប់ ហើយចំពោះកិច្ចការងារដែលជាលទ្ធផលយ៉ាងណាខ្ញុំបាទនឹងជម្រាបជូនទៅតាមក្រោយទៀត ព្រោះអីក្នុងដំណាក់កាលនេះសមត្ថកិច្ចកំពុងធ្វើការដើម្បីធ្វើយ៉ាងណានាំខ្លួនជនបង្កយកមកអនុវត្ត»។
គណនីហ្វេសប៊ុកដែលមានឈ្មោះថា Juppy និងត្រូវបានបញ្ជាក់ដោយក្រុមគ្រួសារថាជាហ្វេសប៊ុករបស់ភរិយារបស់ជនរងគ្រោះ បានបង្ហោះសារមួយ និងត្រូវបានលោក ជិន ម៉ាលីន អ្នកនាំពាក្យក្រសួងយុត្តិធម៌យកមកផ្សព្វផ្សាយបន្តថា៖ «លោក ព្រហ្ម វិចិត្រសុភា [ដែលជាឪពុករបស់ជនសង្ស័យ] លោកចូលបុណ្យសព ១០០០$ ហើយលោកសូមឱ្យដកពាក្យបណ្តឹង បើមិនដកនឹងខូចអនាគតទាំងសងខាង លោកចង់គំរាមហ៍? ហើយលោកមកប្រាប់ពួកខ្ញុំដែលជាគ្រួសារសពឱ្យកាត់ចិត្តទៅ? លោក ព្រហ្ម វិចត្រសុភា ខ្ញុំឱ្យលោកបែបនឹងវិញលោកព្រមអត់? បើសិនជារូបសពជារូបកូនលោក តើលោកមានអារម្មណ៍បែបណា?....ខ្ញុំមិនឱ្យប្តីល្អរបស់ខ្ញុំស្លាប់ទៅបែបនេះទេ។ យុត្តិធម៌ត្រូវតែមានសម្រាប់ប្តីខ្ញុំ...»។
លោក ព្រហ្ម វិចិត្រសុភា ដែលជាមេធាវីម្នាក់ ប្រាប់វីអូអេតាមទូរស័ព្ទនៅថ្ងៃអង្គារនេះថា កូនប្រុសរបស់លោកមិនពាក់ព័ន្ធឡើយ ដោយសារគេមិនមែនជាអ្នកបើកបររថយន្តនៅពេលនោះទេ។ លោកបញ្ជាក់ថា មានតៃកុងឡានម្នាក់ជាអ្នកបើកបររថយន្តក្នុងពេលគ្រោះថ្នាក់ចរាចរណ៍។
លោកថ្លែងថា៖ «តើអ្នកណាជាអ្នកបើកបរដែរនៅពេលនោះ លោក? ! ខ្ញុំដឹងថា តៃកុង»។
លោកបន្ថែមថា កូនរបស់លោកមិនបានរត់គេចខ្លួនឡើយ ហើយក៏មិនពាក់ព័ន្ធករណីនេះដែរ។ លោកថា តាំងពីគ្រោះថ្នាក់ចរាចរណ៍មក អ្នកបើករថយន្ត Jeep មិនដឹងទៅទីណាឡើយ។
លោកបន្ថែមថា៖ «អត់ពាក់ព័ន្ធនឹងគាត់ផង ដូច្នេះទុកឱ្យតៃកុង និងសមត្ថកិច្ចដោះស្រាយ»។
លោក ព្រហ្ម វិចិត្រសុភា បដិសេធថា លោកមិនបានប្រាប់ក្រុមគ្រួសារជនរងគ្រោះឱ្យដកពាក្យបណ្តឹងនោះទេ ដោយគ្រាន់តែលោកទៅចូលរួមបុណ្យសពជនរងគ្រោះ តាមប្រពៃណីតែប៉ុណ្ណោះ។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ ថ្លែងថា សំណងរដ្ឋប្បវេណីអាចបញ្ចប់ ប្រសិនបើជនរងគ្រោះយល់ព្រមទទួលយកទៅតាមអ្វីដែលពួកគេគិតថា សមរម្យ ប៉ុន្តែបណ្តឹងអាជ្ញាមិនអាចរលត់នោះទេ។
លោកបញ្ជាក់ថា៖ «អ៊ីចឹងបណ្តឹងអាជ្ញាមិនមែនជនរងគ្រោះជាអ្នកដក ឬមិនដកទេ វាស្ថិតនៅលើព្រះរាជអាជ្ញាដែលជាដើមបណ្ដឹងអាជ្ញា ក្នុងការអនុវត្តផ្លូវច្បាប់ ព្រោះបណ្ដឹងអាជ្ញានេះគឺគេបង្កើតឡើង ដើម្បីដាក់ទោសទណ្ឌទៅដល់អ្នកដែលប្រព្រឹត្តបទល្មើសហ្នឹង ដើម្បីឱ្យរាងចាលហើយនឹងការកែប្រែអប់រំ។ ប្រសិនជាគេរកឃើញថាជនហ្នឹងបានប្រព្រឹត្តបទល្មើសមែន អាហ្នឹងតុលាការគេធ្វើការផ្ដន្ទាទោស»។
គួរបញ្ជាក់ថា អ្នកបើកបរម៉ូតូដែលស្លាប់នោះមានឈ្មោះ សៀង គឹមហុង ដែលមានតួនាទីជាអនុប្រធានការិយាល័យត្រួតពិនិត្យ និងសវនកម្មកាស៊ីណូនៃនាយកដ្ឋានត្រួតពិនិត្យ និងគ្រប់គ្រងចំណូល និងជាកីឡាករវាយសីម្នាក់នៅក្លឹបក្រសួងសេដ្ឋកិច្ច និងហិរញ្ញវត្ថុ៕
