តុលាការរាជធានីភ្នំពេញបានសម្រេចឃុំខ្លួនជាបណ្ដោះអាសន្នបុគ្គលឈ្មោះ ព្រហ្ម វិចិត្រសុសក្ដា ជាអ្នកបើកបររថយន្ត ក្នុងករណីបុកអ្នកធ្វើដំណើរតាមម៉ូតូម្នាក់ស្លាប់ ក្រោមបទចោទធ្វេសប្រហែសក្នុងការបើកបរ និងបទរត់គេចខ្លួន។ នេះបើតាមដីការបស់ចៅក្រម ហុង ម៉ារីណិច ដែលវីអូអេទទួលបាន។
ជនត្រូវចោទឈ្មោះ ព្រហ្ម វិចិត្រសុសក្ដា ដែលគេចខ្លួនពេលកើតហេតុគ្រោះថ្នាក់ចរាចរណ៍ បានចូលសារភាពនៅតុលាការ កាលពីថ្ងៃអាទិត្យ ក្រោយសមត្ថកិច្ចតាមចាប់ខ្លួន។ ក្រោយការសាកសួរ តុលាការបានសម្រេចឃុំខ្លួនរូបលោកនៅពន្ធនាគាររាជធានីភ្នំពេញ (PJ) កាលពីថ្ងៃទី ២៤ ខែធ្នូ ឆ្នាំ ២០២៣។
ប្រសិនបើតុលាការកឃើញកំហុស បុគ្គលនោះអាចជាប់ពន្ធនាគារពី ១ឆ្នាំទៅ ៣ឆ្នាំ តាមមាត្រា ៨៥ នៃក្រមព្រហ្មទណ្ឌ ពីបទបើកបរដោយធ្វេសប្រហែស ខ្ចីខ្ចា និងមិនប្រុងប្រយ័ត្ន និងតាមមាត្រា៥៤៣ ពីបទរត់គេចខ្លួន ដែលអាចត្រូវផ្ដន្ទាទោសដាក់ពន្ធនាគារពី ៦ខែ ទៅ ១ឆ្នាំ។
គួរបញ្ជាក់ថា ក្រុមគ្រួសារជនរងគ្រោះបានទាមទារសំណងជំងឺចិត្ដ ២០ ម៉ឺនដុល្លារអាមេរិកពីជនបង្ក និងស្នើឱ្យផ្ដន្ទាទោសតាមច្បាប់លើអ្នកបើកបរថយន្តនោះ។
គួរបញ្ជាក់ថា បុគ្គលឈ្មោះ ព្រហ្ម វិចិត្រសុសក្ដា ត្រូវបានចោទពីបទបើករថយន្តម៉ាក Jeep ពណ៌ខ្មៅ បុកបុរសជិះម៉ូតម្នាក់ ឈ្មោះ សៀង គឹមហុង ស្លាប់នៅលើផ្លូវ ៥៦៦ កែង៣១៧ សង្កាត់បឹងកក់ ២ ខណ្ឌទួលគោក កាលពីវេលាម៉ោង ១០និង២០នាទីយប់ថ្ងៃទី ១៤ ខែធ្នូ ឆ្នាំ ២០២៣។
ករណីគ្រោះថ្នាក់ចរាចរណ៍នេះត្រូវបានរដ្ឋមន្រ្តីក្រសួងយុត្តិធម៌ លោក កើត រិទ្ធ ស្នើឱ្យតុលាការពិនិត្យ ស្រាវជ្រាវ និងដោះស្រាយឱ្យបានត្រឹមត្រូវ និងម៉ឺងម៉ាត់តាមផ្លូវច្បាប់៕
