មេដឹកនាំគណបក្សកែទម្រង់កម្ពុជាដែលជាគណបក្សជំទាស់មួយ បានឱ្យដឹងថា គណបក្សកំពុងស្វះស្វែងរកព័ត៌មានអំពីការចាប់ខ្លួនមន្រ្តីរបស់គណបក្សប្រចាំខេត្តសៀមរាប គឺលោក ប៉ែន វុទ្ធី ដែលជាខ្មែរអាមេរិកាំង។
លោក ប៉ែន វុទ្ធី ជាសមាជិកគណៈកម្មាធិការអចិន្ត្រៃយ៍ និងជាប្រធានក្រុមការងារគណបក្សកែទម្រង់កម្ពុជាប្រចាំខេត្តសៀមរាប ហើយលោកត្រូវបានចាប់ខ្លួនកាលពីសប្តាហ៍មុននៅក្នុងខេត្តសៀមរាប។
គណបក្សកែទម្រង់កម្ពុជាបានចេញសេចក្តីថ្លែងការណ៍មួយ ដោយលើកឡើងថា សមត្ថកិច្ចខេត្តសៀមរាបបានចាប់ខ្លួនមន្ត្រីគណបក្សកែទម្រង់កម្ពុជា លោក ប៉ែន វុទ្ធី កាលពីយប់ថ្ងៃទី ១៩ ខែកក្កដា ឆ្នាំ ២០២៤ នៅក្បែរផ្សាររាត្រី សង្កាត់ស្វាយដង្គុំ ក្រុងសៀមរាប ដោយពុំដឹងពីមូលហេតុ។
លោក អ៊ូ ច័ន្ទរ័ត្ន ស្ថាបនិកគណបក្សកែទម្រង់កម្ពុជា ប្រាប់វីអូអេនៅថ្ងៃពុធនេះថា បច្ចុប្បន្ននេះ លោក ប៉ែន វុទ្ធី ត្រូវបានឃុំខ្លួន និងដាក់ឱ្យធ្វើចត្តាឡីស័ក្តនៅពន្ធនាគារម១ព្រៃស ដោយមិនអនុញ្ញាតឱ្យជួបសួរសុខទុក្ខឡើយ។ លោកមិនមានព័ត៌មានថា តើមន្រ្តីរបស់លោករងការចោទប្រកាន់ពីបទអ្វីឡើយ។
លោកថ្លែងថា៖ «យើងបានអំពាវនាវឱ្យយ៉ាងណាឱ្យតុលាការផ្តល់យុត្តិធម៌ ហើយសូមឱ្យអាជ្ញាធរពិចារណាឡើងវិញថាការចាប់ខ្លួននេះ វាអាចមានភាពធ្ងន់ធ្ងរប៉ុនណា ទើបឈានទៅដល់ការចាប់ខ្លួនបែបហ្នឹង។ ហើយសុំឱ្យមានការដោះលែង ទី ១ ដោយសារគាត់ជាខ្មែរអាមេរិកកាំងផង មានសញ្ជាតិពីរ ហើយក្រុមគ្រួសារហាក់ដូចជាមិននៅជិតគាត់ទេ។ ម្លោះហើយ វាមានការពិបាកខ្លាំងចំពោះរូបគាត់ណាបាទ»។
លោក អ៊ូ ច័ន្ទរ័ត្ន បន្ថែមថា គណបក្សកែទម្រង់កម្ពុជាកំពុងតាមដាន និងព្យាយាមរកមធ្យោបាយចូលជួបលោក ប៉ែន វុទ្ធី នៅពន្ធនាគារព្រៃស។ បើតាមលោក អ៊ូ ច័ន្ទរ័ត្ន ក្រុមគ្រួសាររបស់លោក ប៉ែន វុទ្ធី កំពុងតែរស់នៅសហរដ្ឋអាមេរិក។ លោកបញ្ជាក់ថា លោកបានជូនដំណឹងទៅស្ថានទូតអាមេរិកប្រចាំនៅកម្ពុជារួចហើយអំពីការចាប់ខ្លួននេះ។
អ្នកនាំពាក្យរបស់ស្ថានទូតអាមេរិកប្រចាំនៅកម្ពុជា លោក Wesley Holzer ប្រាប់វីអូអេតាមសារអ៊ីម៉ែលនៅថ្ងៃពុធនេះថា ស្ថានទូតមិនអាចផ្តល់ព័ត៌មានអ្វីឡើយនាពេលនេះ ដោយសារវាពាក់ព័ន្ធនឹងបញ្ហាឯកជនភាពរបស់បុគ្គល។ អ្នកនាំពាក្យស្ថានទូតបញ្ជាក់ថា សហរដ្ឋអាមេរិករក្សាការប្តេជ្ញាចំពោះប្រជាជនកម្ពុជា និងក្តីស្រមៃដែលចង់ឃើញកម្ពុជាមានវិបុលភាព ប្រជាធិបតេយ្យ និងជាប្រទេសឯករាជ្យ ដែលសំឡេងទាំងអស់ត្រូវបានឮនិងគោរព។
វីអូអេមិនទាន់អាចសុំការអត្ថាធិប្បាយពីលោក ដា ចំរើន អធិការនគរបាលក្រុងសៀមរាប និងលោក ហួត សុធី ស្នងការនគរបាលខេត្តសៀមរាបបាននៅឡើយទេ។ លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃស្នើអ្នកសារព័ត៌មានទាក់ទងខាងសមត្ថកិច្ចវិញ។
លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់វីអូអេនៅថ្ងៃពុធនេះថា ការចាប់ខ្លួនលោក ប៉ែន វុទ្ធី ដោយសារការបង្ហោះសារលើបណ្តាញសង្គមដែលលោកថាមានលក្ខណៈញុះញង់ បង្កផលប៉ះពាល់ និងបង្កភាពវឹកវរធ្ងន់ធ្ងរដល់សន្តិសុខសង្គម។ ទោះជាយ៉ាងណា លោកមិនអាចបញ្ជាក់ថាតើជាសារបែបណាដែលបង្ហោះនៅលើបណ្តាញសង្គម រហូតដល់មានការចាប់ខ្លួន និងចោទប្រកាន់ពីបទញុះញង់។
លោកថ្លែងថា៖ «គឺមិនជាប់ពាក់ព័ន្ធនឹងរឿងនយោបាយទេ គឺពាក់ព័ន្ធរឿងសកម្មភាពរបស់គាត់ពាក់ព័ន្ធនឹងការផ្សព្វផ្សាយព័ត៌មានទៅលើបណ្តាញសង្គមញុះញង់ឱ្យមានភាពវឹកវរ ប៉ះពាល់សន្តិសុខសង្គមណា»។
លោក សំ វិច្ឆិកា បញ្ជាក់ថា ការចាប់ខ្លួនលោក ប៉ែន វុទ្ធី អនុវត្តតាមបញ្ជារបស់ព្រះរាជអាជ្ញារងអមសាលារាជធានីភ្នំពេញ។ លោកបន្ថែមថា ចៅក្រមស៊ើបសួរបានបញ្ជាឱ្យឃុំខ្លួន លោក ប៉ែន វុទ្ធី ជាបណ្តោះអាសន្ននៅមណ្ឌលកែប្រែម១ព្រៃស។
ទោះជាយ៉ាងណាក៏ដោយ គណបក្សកែទម្រង់កម្ពុជាបានលើកឡើងក្នុងសេចក្តីថ្លែងការណ៍របស់ខ្លួនថា គណបក្ស «តែងតែប្រកាន់ខ្ជាប់នូវគោលការណ៍អហិង្សា និងសន្តិវិធីក្នុងការធ្វើសកម្មភាពនយោបាយស្របតាមស្មារតីនៃរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ជាធរមាននានា ជាពិសេសច្បាប់ស្តីពីគណបក្សនយោបាយ»៕
វេទិកាបញ្ចេញមតិ