លោក រ៉ុង ឈុន ទីប្រឹក្សាគណបក្សកម្លាំងជាតិដែលជាគណបក្សជំទាស់មួយអះអាងថា លោកនឹងបង់ប្រាក់សំណងទៅឱ្យគណៈកម្មាធិការចម្រុះកិច្ចការព្រំដែន ក៏ប៉ុន្តែលោកស្នើសុំបង់ប្រាក់សំណងជំងឺចិត្តនោះ ជាដំណាក់កាលៗ។
លោក រ៉ុង ឈុន បញ្ជាក់បែបនេះនៅក្នុងសន្និសីទសារព័ត៌មានមួយ នៅទីស្នាក់ការសមាគមគ្រូបង្រៀនឯករាជ្យដែលស្ថិតក្នុងសង្កាត់ចាក់អង្រែក្រោម ខណ្ឌមានជ័យ នៅថ្ងៃពុធ។
លោកបញ្ជាក់ថា៖ «១០ម៉ឺនដុល្លារសម្រាប់បីនាក់ សម្បើមណាស់សម្រាប់ពួកខ្ញុំ។ យើងគ្មានចំណូល គ្មានមុខរបរពីព្រោះធ្វើកិច្ចការងារសង្គមរហូតមក ដូច្នេះយើងអត់មានលទ្ធភាព»។
លោកបន្ថែមថា៖ «បើសិនជាតុលាការប្រកាន់ជំហរថា ត្រូវតែគ្រប់ ឬមួយថាឥឡូវគិតម្នាក់ៗត្រូវតែគ្រប់ បើម្នាក់ៗយើងប្រមាណជាជាង ៣ម៉ឺនដុល្លារ...។ ទោះបីជា ៣ម៉ឺនជាង ក៏យើងអត់មានលទ្ធភាពបង់ដែរ។ បើតុលាការនៅតែទាមទារយកគ្រប់ អាហ្នឹងអត់មានទេ ហើយធ្វើបែបហ្នឹងមានន័យថាអាកខ្យងយកឈាមហើយ»។
ទោះជាយ៉ាងណា លោក រ៉ុង ឈុន ថា លោកនឹងអនុវត្តតាមការសម្រេចរបស់តុលាការ។ លោកថា លោកអាចប្រឈមនឹងការរឹបអូសផ្ទះ ឬជាប់ពន្ធនាគារ ប្រសិនបើតុលាការមិនយល់ព្រមតាមការស្នើសុំរបស់លោក។
លោកថ្លែងថា៖ «ខ្ញុំបានជម្រាបហើយថា ពន្ធនាគារដូចជាផ្ទះសំណាក់របស់ខ្ញុំ។ ខ្ញុំបានសម្រេចចិត្តហើយ។ ប៉ុន្តែខ្ញុំគិតថា រដ្ឋាភិបាលក៏គេមិនជ្រើសរើសយកករណីហ្នឹងដែរ»។
កាលពីខែកុម្ភៈ ចៅក្រមនៃសាលាដំបូងរាជធានីភ្នំពេញ លោក យី សុខវួច បានចេញដីកាបង្គាប់ឱ្យលោក រ៉ុង ឈុន កញ្ញា ស កណិការ និងលោក តុន និមល រួមគ្នាសងសំណងការខូចខាតប្រមាណជា ១០ ម៉ឺនដុល្លារអាមេរិក ឱ្យទៅគណៈកម្មាធិការចម្រុះកិច្ចការព្រំដែននៅក្នុងរយៈពេល ១ខែ។ ក្នុងករណីមិនអនុវត្តតាម នោះតុលាការនឹងបន្តអនុវត្តតាមនីតិវិធីច្បាប់។
សំណុំរឿង «ញុះញង់» នោះពាក់ព័ន្ធនឹងការចេញសេចក្តីថ្លែងការណ៍មួយ អំពីការបោះបង្គោលព្រំដែនកម្ពុជា-វៀតណាម នៅខេត្តត្បូងឃ្មុំ នៅក្នុងអំឡុងឆ្នាំ ២០២០។
បើតាមលោក រ៉ុង ឈុន ការទាមទារសំណងជំងឺចិត្ត ១០ ម៉ឺនដុល្លារនេះ ក៏ជាការដាក់សម្ពាធដ៏ធំសម្រាប់រូបលោក។ លោកនៅតែចាត់ទុកថា ការចោទប្រកាន់រូបលោកក្នុងសំណុំរឿង «ញុះញង់» ដែលនិយាយអំពីការបោះបង្គោលព្រំដែននោះថាជារឿងអយុត្តិធម៌ បើទោះបីជាលោកបានអនុវត្តទោសក្នុងពន្ធនាគាររួចហើយក្តី។
ស្របពេលដែលតុលាការចេញដីកាបង្គាប់បែបនេះ អ្នកគាំទ្ររបស់លោកបានធ្វើយុទ្ធនាការរៃអង្គាសប្រាក់ឱ្យលោក ដើម្បីបង់សំណងការខូចខាតនោះ។ លោក រ៉ុង ឈុន បានបញ្ជាក់ក្នុងសន្និសីទសារព័ត៌មាននោះថា រហូតមកដល់ពេលនេះ លោកទទួលបានប្រាក់ជាង ២ម៉ឺន ៣ពាន់ដុល្លារអាមេរិក ពីប្រជាពលរដ្ឋជាង ២.០០០ នាក់។
ជាមួយគ្នានេះ លោក ជា មុនី អនុប្រធានគណបក្សកម្លាំងជាតិ និងជាប្រធានស្តីទីទទូចសុំឱ្យតុលាការពិចារណាឱ្យលោក រ៉ុង ឈុន បង់សងសំណងជំងឺចិត្តជាដំណាក់ៗ។
នៅក្នុងសន្និសីទសារព័ត៌មាននោះ លោក ជា មុនី លើកឡើងថា៖ «អ៊ីចឹងយើងខ្ញុំក៏សូមឱ្យតុលាការពិចារណា ការបង់ប្រាក់របស់លោក រ៉ុង ឈុន ក៏ដូចជាអ្នកទាំងពីរនាក់ដែលពាក់ព័ន្ធ គឺនៅតែជាកាតព្វកិច្ចនៃការបង់ទេ មិនគេចវេះទេ គឺបង់ ប៉ុន្តែឱ្យយក ១០ ម៉ឺនភ្លាមៗ គឺអត់បានតែបង់បណ្តាក់ៗរហូតដល់ចប់ គឺមិនគេចវេះទេ គឺអនុវត្តទៅតាមសេចក្តីបង្គាប់របស់តុលាការដដែល។ អាហ្នឹងយើងយល់ទាំងអស់គ្នាស្ថានភាពបច្ចុប្បន្ន យើងយល់ទាំងអស់គ្នាហើយ។ ហើយបើលេងប៉ឹបៗ ១០ ម៉ឺន សូម្បីឧកញ៉ាមួយចំនួនក៏អត់មានលុយ ១០ ម៉ឺនឱ្យដែរ ក្នុងរយៈពេល ១ ខែ ពិបាករកលុយដែរណាស់។
ចំណែកលោក យី សុខសាន្ត មន្ត្រីឃ្លាំមើលសិទ្ធិមនុស្សនៃសមាគមអាដហុក យល់ថាតុលាការគួរពិចារណាទៅតាមការស្នើសុំរបស់មេធាវីលោក រ៉ុង ឈុន។
លោកថ្លែងថា៖ «តុលាការគួរតែអនុគ្រោះ ឬមួយគួរតែយល់ព្រមតាមសំណើដែលមេធាវីរបស់គាត់ស្នើសុំនេះ ជាការល្អ»។
វីអូអេមិនអាចសុំការអត្ថាធិប្បាយពីអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ បាននៅឡើយទេ។
គួរបញ្ជាក់ថា លោក រ៉ុង ឈុន ធ្លាប់ត្រូវបានតុលាការកាត់ទោសពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ក្រោយពីលោកបានរិះគន់អំពីការបោះបង្គោលព្រំដែនកម្ពុជា-វៀតណាម ក្នុងខេត្តត្បូងឃ្មុំ ដោយដាក់ពន្ធនាគាររូបលោករយៈពេល ២ ឆ្នាំ។
ក្រៅពីការកំហិតបង់លុយសងសំណងនេះ លោក រ៉ុង ឈុន ក៏កំពុងជាប់សំណុំរឿងមួយទៀត ដែលលោកត្រូវបានចោទពីបទ «មិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម» និងបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»៕
វេទិកាបញ្ចេញមតិ